Ku kiʼimaktal k-óol ojéeltik tsʼáanchakʼnaj yoʼolal Jesucristo

TU JAʼABIL 1971, Carey W. Barbereʼ, tu tsʼíibtaj upʼéel carta tuʼux ku kʼaʼajsik le yáax cincuenta jaʼaboʼob tuʼux tu jach meyajtaj Diosoʼ, le cartaoʼ ku yaʼalik: «Le jaʼaboʼob tsʼoʼok in máansik táan in meyajtik Jéeobaoʼ, letiʼ u maas maʼalobiloʼoboʼ. U yantal máak ichil u kaajal, u yuʼubikuba máak kanáantaʼan, u tsʼíiboltik máak u tsʼáanchaʼatik le kʼasaʼan yóokʼol kaab yéetel le baʼaxoʼob eʼesik u yaabilaj Jéeobaoʼ, ku beetikoʼob u yantal jeetsʼelil, le jeetsʼelil túun ku kanáantik u puksiʼikʼal máakaʼ ku yáantaj utiaʼal ka chúukpajak óol tak tu xuul».

Seis jaʼaboʼob u tsʼíibt le cartaaʼ, sukuʼun Barber utúul tiʼ le máaxoʼob yéeyaʼan utiaʼal u bin kaʼanoʼ, kʼuch u beetuba utúul tiʼ le Cuerpo Gobernante tiʼ u j-Jaajkunajoʼob Jéeobaoʼ, yéetel ichil le uláakʼ treinta jaʼaboʼoboʼ seguernaj u tsʼíiboltik u tsʼáanchaʼatik le yóokʼol kaab yéetel u yáantaj Jesucristooʼ. Lelaʼ béeychaj u beetik tumen chúukpaj u yóol tak tu tsʼook kʼiinil u kuxtal. Letiʼeʼ kíim tu kʼiinil domingo 8 tiʼ abril tiʼ 2007, le yaan kaʼach 101 jaʼaboʼob tiʼoʼ (1 Corintoiloʼob 15:57).

Le sukuʼun Carey Barberoʼ síij tu luʼumil Inglaterra tu jaʼabil 1905 yéetel okjaʼanaj tu kaajil Winnipeg (Canadá) tu jaʼabil 1921. Kaʼapʼéel jaʼab okjaʼanakeʼ, letiʼ yéetel Norman, u sukuʼuneʼ, binoʼob tu noj kaajil Brooklyn (Nueva York) utiaʼal u yáantajoʼob tiʼ upʼéel túumben meyaj kun káajal. Teʼ kʼiinoʼob jeʼeloʼ, u kaajal Jéeobaeʼ u kaʼaj joʼopʼol kaʼach u tsʼalik le libroʼob kun meyajtiʼ utiaʼal u kʼaʼaytaʼal le maʼalob péektsil «tiʼ tuláakal yóokʼol kaab[oʼ]» (Mateo 24:14). Upʼéel tiʼ le yáax meyajoʼob tsʼaʼab u beet le sukuʼun Barberoʼ, letiʼe u meyaj yéetel upʼéel máquina tuʼux ku tsʼalaʼal juʼunoʼob ku tʼaanoʼob tiʼ le talmil ku bisaʼal tu táan u juesiloʼob Estados Unidos, yaan yil yéetel le kʼaʼaytajoʼ. Tsʼoʼoleʼ meyajnaj xan teʼ Departamento tiʼ Servicio, tuʼux áantajnaj utiaʼal u nuʼuktaʼal le múuchʼuliloʼob yéetel u kʼaʼaytaʼal le maʼalob péektsil tu luʼumil Estados Unidosoʼ.

Le baʼaxoʼob túun tu kanaj teʼ departamentoaʼ, le áant le sukuʼun Barber utiaʼal u beet le meyaj tsʼaʼabtiʼ tu jaʼabil 1948, u superintendentei circuito. Letiʼeʼ tu xíimbaltaj le múuchʼuliloʼob yéetel le asambleaʼob beetaʼab teʼ kaajoʼob yanoʼob tu chikʼinil Estados Unidosoʼ. Tu yaʼaleʼ baʼax maas jatsʼuts u yilik kaʼacheʼ letiʼe u kʼaʼaytaj tiʼ mejen kaajoʼoboʼ. Le meyajaʼ le áant utiaʼal ka u kʼaj óolt yaʼab sukuʼunoʼob. Tumen jach utstutʼaan u kʼaʼaytaj yéetel jach séeb u kaambaleʼ le áant ka bin teʼ xook 26 tiʼ Galaadoʼ. Teʼ xookaʼ joʼopʼ u biskuba yéetel Sydney Lee Brewer, utúul tiʼ u yéet xook Canadá u taal. Ka tsʼoʼok u graduacionoʼobeʼ, ka tsʼoʼok u beeloʼob, chéen pʼelakeʼ lukʼoʼob Nueva York ka bin u xíimbaltoʼob le múuchʼuliloʼob yanoʼob Chicagooʼ (Illinois). Le kiikaʼ jach tu yáantaj u yíicham ichil le veinte jaʼaboʼob táan u beetik u superintendenteiloʼ.

Le máaxoʼob kʼuch u kʼaj óoltoʼob le sukuʼun Barber le táan u meyaj bey superintendente tiʼ circuito yéetel distrito, wa ichil le treinta jaʼaboʼob meyajnaj ichil le Cuerpo Gobernanteoʼ, mantatsʼ ken u kʼaʼajsoʼob le tsoltʼaanoʼob yéetel le jatsʼuts tsikbaloʼob tu beetoʼ. Le oʼolal jach ku taasiktoʼon kiʼimak óolal k-ojéeltik béeychaj u tsʼáanchaʼatik le yóokʼol kaab yoʼolal Jesucristooʼ.