Tuláakal baʼax ku yaʼalik Jéeobaeʼ ku béeychajal
Tuláakal baʼax ku yaʼalik Jéeobaeʼ ku béeychajal
«Tsʼoʼok u béeychajal tuláakal baʼax tu séeb chiʼitaj Yuumtsil. Mix jumpʼéel u séeb chiʼ j-pʼáat wa maʼ béeychajiʼ.» (JOSUÉ 23:14.)
1. ¿Máax Josué, yéetel baʼax tu beetaj le taʼaytak u kíimloʼ?
JOSUEEʼ utúul jach maʼalob soldado tu láakʼintaj Moisés. Letiʼeʼ yéeyaʼab tumen Jéeoba utiaʼal ka u nuʼukt u kaajil Israel teʼ nojoch yéetel sajbeʼentsil x-tokoy luʼum utiaʼal ka u bisoʼob tiʼ upʼéel luʼum tuʼux jach yaan leche yéetel kaab. Le taʼaytak u kíimloʼ, Josueeʼ tu yaʼalaj jujumpʼéel tʼaanoʼob utiaʼal u líiʼsik u yóol u nojchiloʼob u kaajil Israel. Le baʼaxoʼob tu yaʼaloʼ tu jach muʼukʼaʼankúunsaj u fe le máaxoʼob uʼuyoʼ, yéetel jeʼel xan u muʼukʼaʼankúunsik k-fejeʼ.
2, 3. ¿Bix yanil kaʼach u kaajil Israel le ka tu yaʼalaj Josué jujumpʼéel tʼaanoʼob tiʼ u nojchiloʼob le kaajoʼ, yéetel baʼax tu yaʼalajtiʼob?
2 Chéen máans ta tukult le baʼax úuchaʼ. Le Bibliaoʼ ku yaʼalik: «Ku tsʼoʼokol u máan yaʼabkach kʼiinoʼob u tsʼáa jeetsʼel Yuumtsil tiʼ le j-israelitaʼob tiʼ u j-pʼeekoʼobeʼ, Josué tiʼ le kʼiinoʼoboʼ tsʼoʼok kaʼach u nuxibtal, Josué tu [túuxtaj] tʼanbil tuláakal le j-israelitaʼoboʼ, paʼteʼ yéetel u nuukiloʼob, u joʼolpóopiloʼob, j-uʼuyaj baʼateloʼob yéetel u j-tsʼíiboʼob, ka tu yaʼalajtiʼob: Teneʼ tsʼoʼok in nuxibtal, tsʼoʼok u tʼonkintiken le jaʼaboʼobaʼ» (Josué 23:1, 2).
3 Óoliʼ 110 jaʼaboʼob yaan kaʼach tiʼ Josué yéetel ichil tuláakal u kuxtaleʼ tu yilaj le jakʼbeʼen óol baʼaloʼob tu beetaj Jéeoba yoʼolal u kaajal yéetel tu yilaj xan bix béeychajik le baʼaxoʼob u yaʼalmoʼ. Le oʼolal béeychaj u yaʼalik: «Kʼaj óolteʼex yéetel tuláakal a puksiʼikʼaleʼex bey xan yéetel tuláakal a wóoleʼex tsʼoʼok u béeychajal tuláakal baʼax tu séeb chiʼitaj [Jéeoba]. Mix jumpʼéel u séeb chiʼ j-pʼáat wa maʼ béeychajiʼ» (Josué 23:14).
4. ¿Baʼaxoʼob tu yaʼalaj Jéeoba ken u beet tu yoʼolal u kaajil Israel?
4 ¿Baʼaxoʼob tu yaʼalaj Jéeoba béeychaj tu kʼiiniloʼob Josué? Koʼox ilik óoxpʼéel tiʼ le baʼaxoʼob tu yaʼaloʼ. Yáaxeʼ, Dioseʼ tu yaʼalaj yaan u jáalkʼabtik u kaajal palitsiltaʼanoʼ; u kaʼapʼéeleʼ yaan u kanáantkoʼob, yéetel u yóoxpʼéeleʼ, yaan u tséentikoʼob yéetel yaan u tsʼáaiktiʼob le baʼax kʼaʼabéettiʼoboʼ. Jéeobaeʼ láayliʼ letiʼe baʼaxoʼob u yaʼalmaj u beetik yoʼolal u kaajal teʼ kʼiinoʼobaʼ, yéetel toʼon xaneʼ tsʼoʼok k-ilik bix u bin u béeychajloʼob teʼ t-kʼiinoʼobaʼ. Baʼaleʼ, táanil tiʼ k-ilik baʼaxoʼob tsʼoʼok u beetik Jéeoba yoʼolal u kaajal teʼ kʼiinoʼobaʼ, koʼox ilik baʼax tu beetaj yoʼolal u kaajal tu kʼiiniloʼob Josué.
Jéeobaeʼ ku jáalkʼabtik u kaajal
5, 6. ¿Bix tu jóoʼsil Jéeoba le israelitaʼob tiʼ u kaajil Egiptooʼ, yéetel baʼax tu yeʼesaj le baʼax tu beetoʼ?
5 Le palitsiltaʼan le israelitaʼob Egiptooʼ, Jéeobaeʼ tu yuʼubaj u kʼáat óolaloʼob (Éxodo 2:23-25). Le tiaʼan kaʼach Moisés tu táan ukúul chan cheʼ táan u tóochʼbaleʼ, Jéeobaeʼ tu yaʼalajtiʼ: «[Táan] in wéemel in tokoʼob tiʼ u páajtalil le j-egipcioʼoboʼ; bin in kaʼaj in jóokʼesoʼob tiʼ le múuchʼ kaajoʼ, utiaʼal ka in bisoʼob tiʼ jumpʼéel nojoch yéetel maʼalob luʼum tuʼux ku yáalkab leche yéetel kaab» (Éxodo 3:8). ¡Jach kiʼimakchaj wal u yóol Moisés úuchik u yilik bix u béeychajal le baʼaxoʼob u yaʼalmaj Jéeobaoʼ! Le ka tu yaʼalaj le faraón maʼ ken u chaʼa u bin le israelitaʼoboʼ, Moiseseʼ tu yaʼalajtiʼeʼ, Dioseʼ yaan u sutik kʼiʼikʼil u yáalkab jaʼi le Nilooʼ. Yéetel jach bey úuchikoʼ. U jaʼi le Nilooʼ suunaj kʼiʼikʼil, le oʼolal pʼáat maʼ tu páajtal u yukʼaʼal yéetel u kayiloʼobeʼ láaj kíimoʼob (Éxodo 7:14-21). Baʼaleʼ, tumen le faraón maʼ tu yóotik kaʼach u jáalkʼabt le israelitaʼoboʼ, Jéeobaeʼ tu túuxtajtiʼob uláakʼ nueve noj yajiloʼob, baʼaleʼ táanil tiʼ u túuxtik cada upʼéeleʼ tu tsʼáaj u yojéelt le faraón baʼax kun úuchuloʼ (Éxodo, capítulo 8 tak 12). Le ka tsʼoʼok le u diez noj yajil tuʼux kíimsaʼab tuláakal u yáax paalal le egipcioʼoboʼ, le faraonoʼ tu yaʼalaj tiʼ le israelitaʼob ka jóoʼkoʼob, yéetel letiʼobeʼ bey tu beetiloʼoboʼ (Éxodo 12:29-32).
6 Le ka tsʼoʼok u jáalkʼabtaʼaloʼobeʼ Jéeobaeʼ tu yéeyaj Israel bey u kaajaleʼ. Le úuchik u jáalkʼabtaʼal le israelitaʼoboʼ tu nojbeʼenkúuntaj Jéeoba tumen tu yeʼesaj letiʼeʼ mantatsʼ ku béeykuntik le baʼax ku yaʼalikoʼ. Tsʼoʼoleʼ, tu yeʼesaj xan letiʼeʼ maas yaan u páajtalil tiʼ le uláakʼ diosoʼoboʼ. Wa tak chéen u xokaʼal le baʼax úuch ku muʼukʼaʼankúunsik u fe máakoʼ, chéen tukult bukaʼaj wal úuchik u muʼukʼaʼantal u fe le máaxoʼob iloʼ. Josueeʼ, tu yilajeʼ Jéeobaeʼ letiʼe «j-Sen Kaʼanal tu yóokʼol le luʼumaʼ» (Salmo 83:18).
Jéeobaeʼ ku kanáantik u kaajal
7. ¿Bix tu kanáantil Jéeoba u kaajal tiʼ le faraón yéetel tiʼ u soldadoʼoboʼ?
7 ¿Tu kanáantaj wa Jéeoba u kaajal jeʼex úuchik u yaʼalikoʼ? Le ka tu yaʼalaj yaan u jáalkʼabtik le israelitaʼob tiʼ Egipto yéetel u tsʼáaiktiʼob le luʼum u yaʼalmajtiʼoboʼ, tu tsʼáaj naʼatbileʼ yaan u kanáantkoʼob. Maʼ u tuʼubultoʼoneʼ le faraonoʼ, tumen jach pʼujaʼaneʼ, bin tu paach le israelitaʼob yéetel yaʼabach soldadoʼob tiʼ u carroiloʼob baʼateʼel. Letiʼeʼ jach tu tuklaj yaan u xuʼulsik tiʼ le israelitaʼoboʼ, tumen bey minaʼan tuʼux u púutsʼloʼob kaʼacheʼ, tiʼ u tséeleʼ tiʼ yaan le kʼáaʼnáaboʼ yéetel tiʼ uláakʼeʼ le puʼukoʼoboʼ. Baʼaleʼ Dioseʼ tu kanáantaj u kaajal. Tu tsʼáaj upʼéel múuyal utiaʼal maʼ u náatsʼal le egipcioʼob tiʼ u kaajaloʼ. Le tuʼux yaan kaʼach le egipcioʼoboʼ éeʼjochʼeʼen, baʼaleʼ le tuʼux yaan kaʼach le israelitaʼoboʼ sáasil. Moisés túuneʼ tu tichʼaj u xóolteʼeʼ, ka túun tu jatsuba u jaʼil le Chak kʼáaʼnáaboʼ. Le kʼáaʼnáab tuʼux kʼáatmáan le israelitaʼob utiaʼal u púutsʼloʼoboʼ, letiʼ xuʼuls tiʼ le egipcioʼoboʼ. Utiaʼal maʼ u beetaʼal mix baʼal tiʼ u kaajaleʼ, Jéeobaeʼ tu xuʼulsaj tiʼ le faraón yéetel tiʼ u soldadoʼoboʼ (Éxodo 14:19-28).
8. ¿Bix tu kanáantil Jéeoba le israelitaʼob 1) teʼ x-tokoy luʼum yéetel 2) le ka ookoʼob teʼ luʼum aʼalaʼan u tsʼaʼabaltiʼoboʼ?
8 Le ka tsʼoʼok u kʼáat máanoʼob teʼ Chak kʼáaʼnáaboʼ, le israelitaʼoboʼ xáanchaj chéen tiʼ ku máanoʼob «teʼ j-nojoch yéetel sajbeʼentsil x-tokoy luʼum chuup yéetel chiʼibal kanoʼob, bey xan yéetel síinaʼanoʼob, ku tsʼoʼokoleʼ minaʼan kaʼach jaʼ utiaʼal ukʼbiliʼ» (Deuteronomio 8:15). Jéeobaeʼ tu kanáantaj u kaajal ichil tuláakal le jaʼaboʼob tu máansaj teʼ x-tokoy luʼumoʼ. ¿Kux túun le ka ookoʼob teʼ luʼum aʼalaʼan u tsʼaʼabaltiʼoboʼ? Kex tumen anchaj u baʼateloʼob tu contra u nojoch ejercitoʼob le cananeoʼoboʼ, Jéeobaeʼ tu yaʼalaj tiʼ Josué: «Bejelaʼeʼ, teech bíin a chʼakt u yáalkab jaʼil Jordán yéetel tuláakal u kaajil Israel, utiaʼal a bineʼex teʼ j-luʼum bin in kaʼaj in tsʼáaj teʼexoʼ. Mix máak bíin tsʼáancheʼetikeʼex tuláakal u kʼiiniloʼob a kuxtal, teneʼ bíin yanaken ta wéetel jeʼel bix úuchik in wantal yéetel Moiseseʼ, maʼ bíin in pʼatechiʼ, mix bíin in xúumpʼajtech mix bikʼiniʼ» (Josué 1:2, 5). Jéeobaeʼ tu béeykuntaj xan le baʼax tu yaʼalaʼ. Ichil seis jaʼaboʼobeʼ, Josueeʼ tu xuʼulsaj tiʼ 31 utúul reyoʼob yéetel tu beetaj utiaʼalintaʼal tumen le israelitaʼob yaʼab tiʼ le luʼum aʼalaʼan u tsʼaʼabaltiʼoboʼ (Josué 12:7-24). Wa maʼ u kanáantaʼaloʼob tumen Jéeobaeʼ, maʼ kun béeytaloʼob kaʼachi.
Jéeobaeʼ ku tséentik yéetel ku tsʼáaik baʼax kʼaʼabéet tiʼ u kaajal
9, 10. ¿Bix tu tséentil yéetel tu kanáantaj Jéeoba u kaajal teʼ x-tokoy luʼumoʼ?
9 Beoraaʼ koʼox ilik bix úuchik u tséentik Jéeoba yéetel u tsʼáaik baʼax kʼaʼabéet tiʼ u kaajal jeʼex tu yaʼalil u beetkoʼ. Maʼ úuch u jóoʼs u kaajal tiʼ Egiptoeʼ, Dioseʼ tu yaʼalaj: «Bíin in kaʼaj in beet u kʼáaxal u janalil j-kaʼan tiʼob. Le kaajoʼ unaj u jóokʼol u mol sáamsamal chéen le kʼaʼabéet utiaʼal le kʼiinoʼ». Utiaʼal u beetik le baʼax tu yaʼalajtiʼobeʼ, Dioseʼ tu tsʼáatiʼob «u janalil j-kaʼan». «Tu yoʼolal maʼ u yojeloʼob le j-israelitaʼob baʼax le ku yilkoʼoboʼ, joʼopʼ u yaʼalikoʼob tu baatsiloʼob: ¿Baʼax lelaʼ?». Le baʼax tu yiloʼoboʼ maná, lelaʼ letiʼe waaj tu yaʼalaj Jéeoba u tsʼáaiktiʼoboʼ (Éxodo 16:4, 13-15).
10 Tuláakal le cuarenta jaʼaboʼob tu máansoʼob teʼ x-tokoy luʼumoʼ, Jéeobaeʼ tu kanáantoʼob, tumen tu tsʼáaj baʼal u jaantoʼob yéetel jaʼ utiaʼal u yukʼoʼob. Tsʼoʼoleʼ maʼ tu chaʼaj u laʼabal u nookʼoʼobiʼ mix u chuʼupul u yookoʼobiʼ (Deuteronomio 8:3, 4). Josueeʼ tu láaj ilaj le baʼax úuchaʼ. Jeʼex úuchik u yaʼalikeʼ, Jéeobaeʼ tu jáalkʼabtaj u kaajal, tu kanáantaj, tu tséentaj yéetel tu tsʼáaj tuláakal le baʼax kʼaʼabéetchajtiʼoʼ.
Le bix tsʼoʼok u jáalkʼabtik u kaajal teʼ kʼiinoʼobaʼ
11. ¿Baʼax úuch Brooklyn tu jaʼabil 1914, yéetel baʼax kaʼach tsʼoʼok u kʼuchul u kʼiinil u yúuchul?
11 ¿Kux túun teʼ kʼiinoʼobaʼ? Tu jaʼatskabil viernes 2 tiʼ octubre tiʼ 1914, Charles Taze Russell, le máax nuʼuktik kaʼach le u múuchʼ máakoʼob ku xokkoʼob le Biblia kʼaj óolaʼanoʼob bejlaʼa u j-jaajkunajoʼob Jéeobaoʼ, ook teʼ tuʼux ku yúuchul janal tu najil Betel yaan tu kaajil Brooklynoʼ (Nueva York) ka tu tsikaj tuláakal yéetel kiʼimak óolal. Tsʼoʼoleʼ, táanil tiʼ u kutaleʼ, tu yaʼalaj yéetel u jaajil u yóol: «U kʼiinil le máaxoʼob maʼ judíoʼoboʼ tsʼoʼok u máan, u kʼiinil le máaxoʼob ku gobernaroʼoboʼ tsʼoʼok u xuʼulul». Tsʼoʼok kaʼach u kaʼa kʼuchul u kʼiinil utiaʼal u jáalkʼabtik u kaajal Jéeoba, le Máax maas yaan u páajtaliloʼ. Yéetel bey tu beetiloʼ.
12. ¿Baʼax jáalkʼabtajil úuch tu jaʼabil 1919, yéetel baʼax utsiloʼob tu taasaj?
12 Cinco jaʼaboʼob úuchuk lelaʼ, Jéeobaeʼ tu jáalkʼabtaj u kaajal tiʼ le «nojoch Babiloniaoʼ», wa le religionoʼob maʼatech u kaʼanskoʼob u jaajiloʼ (Apocalipsis 18:2). Kex maʼ tuláakloʼon il le jáalkʼabtajilaʼ, teʼ kʼiinoʼobaʼ ku páajtal k-ilik le utsiloʼob tsʼoʼok u taaskoʼ. Jéeobaeʼ tu beetaj u kaʼa adorartaʼal yéetel tu muchʼkíintaj le máaxoʼob u kʼáat u beetoʼoboʼ, jeʼex úuchik u yaʼalik le profeta Isaíasoʼ: «Tiʼ le kʼiinoʼob ku taaloʼoboʼ, bíin maʼalob jéetsʼek le wits tuʼux yaan u [templo] Yuumtsil. Letiʼ bíin [maas] kaʼanal witsak tiʼ tuláakal wits. Bíin taalakoʼob tiʼ tuláakal múuchʼ kaajoʼob» (Isaías 2:2).
13. ¿Bukaʼaj tsʼoʼok u náakal u j-jaajkunajoʼob Jéeoba desde ka káaj a meyajtik Dios?
13 Le baʼax tu yaʼalaj Isaíasoʼ jach táan u béeytal teʼ kʼiinoʼobaʼ. Tu jaʼabil 1919, u yalab le máaxoʼob kun binoʼob kaʼanoʼ joʼopʼ u jach tsʼáaik u yóol u kʼaʼaytoʼob ka adorartaʼak Dios. Utiaʼal u jaʼabil 1930, joʼopʼ xan u kaxtaʼal le «uláakʼ j-tamanoʼob[oʼ]» (Juan 10:16). Ka káajeʼ maʼ jach yaʼaboʼobiʼ, tsʼoʼoleʼ ka joʼopʼ u bin u maas yaʼabtaloʼob yéetel bejlaʼeʼ tsʼoʼok u chukik u millonesiloʼob. Ichil upʼéel náay tsʼaʼab u yil apóstol Juaneʼ, aʼalaʼabeʼ le máakoʼobaʼ letiʼe «yaʼabkach máakoʼob taaljaʼanoʼob tiʼ tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob [...]; tu yoʼolal sen yaʼab le múuchʼkabiloʼ mix máak ku páajtal u xokik jaytúuloʼob» (Apocalipsis 7:9). ¿Tsʼoʼok wa a wilik bix tsʼoʼok u nojochtal u kaajal Jéeoba? ¿Jaytúul j-jaajkunajoʼob tiʼ Jéeoba yaan kaʼach ka káaj a meyajtik Dios? Bejlaʼeʼ yaan maas tiʼ 6,700,000. Le ka tu jáalkʼabtaj u kaajal tiʼ le Nojoch Babiloniaoʼ, Jéeobaeʼ tu tsʼáaj tuʼux u maas nojochtal u kaajal jeʼex táan u yilaʼal u yúuchul bejlaʼeʼ.
14. ¿Bix uláakʼ ken u jáalkʼabtil u kaajal Jéeoba?
14 Jéeobaeʼ, yaan uláakʼ bix ken u jáalkʼabtil u kaajal, yéetel tiʼ tuláakal yóokʼol kaab kun ilbil. Yéetel u nojoch páajtalileʼ, yaan u xuʼulsik tiʼ tuláakal le kʼasaʼan máakoʼoboʼ, utiaʼal ka u tsʼáa tiʼ u kaajal upʼéel túumben luʼum tuʼux maʼ kun antal kʼasaʼanil. Chéen tukult le kiʼimak óolal kun antal ken xuʼuluk u yantal le kʼasaʼanil yéetel ken yanak upʼéel jach jatsʼuts kuxtal jeʼex mix utéen ilaʼakeʼ (Apocalipsis 21:1-4).
Jéeobaeʼ ku kanáantik u kaajal teʼ kʼiinoʼobaʼ
15. Jéeobaeʼ, ¿baʼaxten kʼaʼabéet u kanáantik u kaajal teʼ kʼiinoʼobaʼ?
15 Jeʼex tsʼoʼok k-ilkoʼ, le israelitaʼoboʼ kʼaʼabéetchaj u kanáantaʼaloʼob tumen Jéeoba. Baʼaleʼ ¿kux túun teʼ kʼiinoʼobaʼ? ¿Kʼaʼabéet wa u kanáantik Jéeoba u kaajal? Kʼaʼabéet. Jesuseʼ tu yaʼalaj tiʼ u disipuloʼob: «Bíin kʼuʼubukeʼex túun utiaʼal ka loobiltaʼakeʼex yéetel bíin kíimsaʼakeʼex, yéetel tuláakal yóokʼol kaab kun pʼektikeʼex tin woʼolal» (Mateo 24:9). Desde úucheʼ, u j-jaajkunajoʼob Jéeoba tiʼ jejeláas luʼumiloʼobeʼ tsʼoʼok u jach pʼektaʼaloʼob yéetel u chʼaʼapachtaʼaloʼob. Baʼaleʼ kex beyoʼ Jéeobaeʼ maʼ u xúumpʼattoʼobiʼ (Romailoʼob 8:31). U Tʼaaneʼ ku yaʼalikeʼ jeʼel baʼaxak ka beetaʼak utiaʼal u xuʼulsaʼal k-kʼaʼaytik u maʼalob péektsilil le Reino yéetel k-beetik disipuloʼobeʼ, mix upʼéel kun béeytaliʼ (Isaías 54:17).
16. ¿Baʼaxten k-aʼalik tsʼoʼok u kanáantik u kaajal Jéeoba teʼ kʼiinoʼobaʼ?
16 Kex tumen jach pʼektaʼan u kaajal Jéeobaeʼ maʼ xuʼuluk u bin u maas nojochtaliʼ. Bejlaʼeʼ u j-jaajkunajoʼon Jéeobaeʼ táan k-kʼaʼaytaj tiʼ 236 luʼumiloʼob, yéetel leloʼ ku yeʼesikeʼ Jéeobaeʼ táan u kanáantikoʼon tiʼ le máaxoʼob taak u xuʼulskoʼonoʼob wa u kʼáat u xuʼulsoʼob k-kʼaʼaytajoʼ. ¿Kʼajaʼan wa tech bix u kʼaabaʼ jujuntúul tiʼ le gobernanteʼob wa u nuuktakil le religionoʼob tu jach chʼaʼapachtoʼob u kaajal Diosoʼ? ¿Baʼax úuch tu yéeteloʼob? ¿Tuʼux yanoʼob beoraaʼ? Óoliʼ tuláakaloʼob tsʼoʼok u kíimloʼob, jeʼex úuch yéetel le faraón tiʼ u kʼiiniloʼob Moisés yéetel Josueeʼ. ¿Kux túun le máaxoʼob kíimsaʼaboʼob tumen chúukpaj u yóoloʼob u meyajtoʼob Diosoʼ? Letiʼobeʼ tiʼ láaj yanoʼob tu tuukul Jéeobaeʼ. Jeʼex k-ilkoʼ, Jéeobaeʼ jach tu jaajil tsʼoʼok u kanáantik u kaajal jeʼex úuchik u yaʼalikoʼ.
Jéeobaeʼ ku tséentik yéetel ku kanáantik u kaajal teʼ kʼiinoʼobaʼ
17. ¿Baʼax tu yaʼalaj Jéeoba yoʼolal le kiliʼich jaanloʼ?
17 Jeʼex tu tséentil Jéeoba u kaajal teʼ x-tokoy luʼumoʼ, teʼ kʼiinoʼobaʼ ku tséentkoʼon yéetel u yáantaj «le palitsil chúukpajaʼan u yóol yéetel yaan u naʼat[oʼ]» (Mateo 24:45). Ku tséentkoʼon ken u yáantoʼon k-naʼat le baʼaloʼob tsʼoʼok u máan kʼiinoʼob maʼ naʼataʼakoʼoboʼ. Beyoʼ táan u béeytal le baʼax tu yaʼalaj le ángel tiʼ le profeta Danieloʼ: «Mukult le baʼaloʼobaʼ yéetel tsʼáalkʼabt le juʼunaʼ tak tu tsʼook kʼiin. Yaʼab máakoʼob bíin [...] máanakoʼob tuláakal tuʼux táan u kaxantikoʼob u yaʼabkúuntikoʼob u kʼaj óolaloʼob» (Daniel 12:4).
18. ¿Baʼaxten k-aʼalik tsʼoʼok u yaʼabtal k-kʼaj óolalil?
18 Kuxaʼanoʼon tu tsʼoʼok kʼiinoʼob, yéetel jeʼex úuchik u yaʼalaʼaloʼ, tsʼoʼok u bin u maas yaʼabtal k-kʼaj óolalil. Bejlaʼeʼ, yéetel u yáantaj le kiliʼich muukʼoʼ, máakoʼob tiʼ tuláakal le Luʼumaʼ ku páajtal u jach kʼaj óolkoʼob Dios yéetel baʼax ken u beete. Le Bibliaoʼ letiʼe libro maas kʼaj óolaʼan way yóokʼol kaabeʼ, yéetel yaan xan uláakʼ áantajoʼob utiaʼal k-naʼatik baʼax ku kaʼansik, jeʼex le libro ¿Baʼax jach tu jaajil ku kaʼansik le Bibliaoʼ? * Jujumpʼéel tiʼ le xookoʼob ku taasikoʼ, letiʼ leloʼobaʼ: «U jaajil tu yoʼolal Dios», «¿Tuʼux yaan le kimenoʼoboʼ?», «¿Baʼax u Reino Dios?» yéetel «¿Baʼaxten ku chaʼik Dios u yantal muʼyajil?». Yaʼab máakeʼ úuch joʼopʼok u taaktal u yojéeltik u núukil le kʼáatchiʼobaʼ, yéetel bejlaʼeʼ jeʼel u páajtal u yojéeltkoʼob u núukileʼ. Kex tumen uláakʼ religionoʼob maʼ u yojloʼob u núukil yéetel úuch joʼopʼok u kaʼanskoʼob baʼaloʼob maʼ jaajtakeʼ, le Bibliaoʼ láayliʼ táan u yáantik le máaxoʼob taak u meyajtkoʼob Jéeobaoʼ.
19. ¿Baʼax u yaʼalmaj Jéeoba tsʼoʼok a wilik u béeychajal, yéetel baʼax ka tuklik tu yoʼolal?
19 Yoʼolal le baʼaxoʼob tsʼoʼok k-ilkoʼ, jeʼel xan u páajtal k-aʼalik le baʼax tu yaʼalaj Josueoʼ: «Tsʼoʼok u béeychajal tuláakal baʼax tu séeb chiʼitaj Yuumtsil. Mix jumpʼéel u séeb chiʼ j-pʼáat wa maʼ béeychajiʼ» (Josué 23:14). Jach u jaajileʼ Jéeobaeʼ ku jáalkʼabtik, ku kanáantik yéetel ku tséentik máaxoʼob meyajtik. ¿Yaan wa baʼax u yaʼalmaj u beetik Jéeoba maʼ béeychaj tu kʼiiniliʼ? ¿Máasaʼ minaʼan? Tuláakal baʼax ku yaʼalik le Bibliaoʼ ku béeychajal, le oʼolal jach k-creertik baʼax ku yaʼalik.
20. ¿Baʼaxten unaj u chúukpajal k-óol páaʼt baʼax ku taal u kʼiinil?
20 ¿Baʼax ken u tsʼáatoʼon Dios tiʼ le kʼiinoʼob ku taaloʼ? Óoliʼ tiʼ tuláakloʼoneʼ, Jéeobaeʼ ku yaʼalik u tsʼáaiktoʼon u páajtalil k-kuxtal tiʼ upʼéel jatsʼuts paraíso way Luʼumeʼ. Yéetel tiʼ u chan múuchʼ máakoʼobeʼ ku tsʼáaiktiʼob u páajtalil u binoʼob kaʼan utiaʼal u múul gobernaroʼob yéetel Cristo. Kex wa kaʼan ken k-bin bey xan wa way Luʼum ken k-pʼáatleʼ, unaj u chúukpajal k-óol tiʼ Dios jeʼex tu beetil Josueiʼ, tumen yaan u kʼuchul u kʼiinil u béeychajal baʼax k-páaʼtik. Yéetel le ken k-kʼaʼajs le baʼaxoʼob tu beetaj Jéeoba t-oʼolaleʼ, yaan xan k-aʼalik: «Tsʼoʼok u béeychajal tuláakal».
[Tsolajiloʼob]
^ xóot’ol 18 Beetaʼan tumen u j-jaajkunajoʼob Jéeoba.
¿A wojel wa a tsole?
• ¿Baʼaxoʼob tu yaʼalaj Jéeoba béeychaj tu kʼiiniloʼob Josué?
• ¿Baʼaxoʼob u yaʼalmaj Dios tsʼoʼok a wilik u béeychajal?
• ¿Bix unaj k-ilik le baʼaxoʼob ku yaʼalik Dios u beetkoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Jéeobaeʼ tu jáalkʼabtaj u kaajal
[U tsolajil le oochel teʼ táan juʼun 23]
¿Bix tu kanáantil Jéeoba u kaajal teʼ Chak kʼáaʼnáaboʼ?
[U tsolajil le oochel teʼ táan juʼun 24]
¿Bix tu kanáantil Jéeoba u kaajal teʼ x-tokoy luʼumoʼ?
[U tsolajil le oochel teʼ táan juʼun 25]
Jéeobaeʼ ku tsʼáaik xan baʼax kʼaʼabéet tiʼ u kaajal teʼ kʼiinoʼobaʼ