Unaj k-xakʼaltik «u jach taʼakbil baʼaloʼob Jajal Dios»
Unaj k-xakʼaltik «u jach taʼakbil baʼaloʼob Jajal Dios»
«Le Kiliʼich [muukʼoʼ] ku xakʼlik tuláakal, tak u jach taʼakbil baʼaloʼob Jajal Dios.» (1 CORINTOILOʼOB 2:10.)
1. ¿Baʼax kaʼansajiloʼob ku beetik u kiʼimaktal u yóol le máaxoʼob ku joʼopʼol u kanikoʼob le baʼax ku yaʼalik le Bibliaoʼ?
ÓOLIʼ tuláakloʼon le yanoʼon ichil u kaajal Diosoʼ k-kʼaʼajsik yéetel kiʼimak óolal bix kaʼansaʼabiktoʼon le baʼax ku yaʼalik le Bibliaoʼ. Ku kʼaʼajaltoʼon bix úuchik u kaʼansaʼaltoʼon kʼaʼabéet k-chʼaʼachiʼitik u kʼaabaʼ Dios, baʼaxten ku chaʼik u muʼyaj wíinikoʼob, baʼaxten yaan máaxoʼob kun binoʼob kaʼan yéetel bix le kuxtal kun yantal tiʼ le máaxoʼob kun pʼáatloʼob way Luʼumeʼ. Maʼ xaaneʼ k-yáax xokmaj le Bibliaoʼ, baʼaleʼ jeʼex yaʼab máakoʼob bejlaʼeʼ, maʼ t-naʼataj le baʼax ku kaʼansikoʼ. Beyoʼon kaʼach jeʼex utúul máak ku paktik le kʼáaʼnáaboʼ baʼaleʼ maʼ tu páajtal u yilik tuláakal le jatsʼuts baʼaloʼob yaan ichiloʼ. Baʼaleʼ wa yantiʼ upʼéel u nuʼukulil buceareʼ jeʼel u páajtal u yilik le jatsʼuts kayoʼob, le jatsʼuts xíiwoʼob bey xan uláakʼ jatsʼuts baʼaloʼob yaan ichil le kʼáaʼnáaboʼ. Toʼon xaneʼ le ka áantaʼaboʼon k-naʼat le baʼax ku kaʼansik le Bibliaoʼ, t-kʼaj óoltaj le «u jach taʼakbil baʼaloʼob Jajal Dios[oʼ]» (1 Corintoiloʼob 2:8-10).
2. ¿Baʼaxten mantatsʼ yaan u taasiktoʼon kiʼimak óolal k-kanik baʼax ku yaʼalik le Bibliaoʼ?
2 Baʼaleʼ ¿unaj wa k-tuklik chéen yaan yéetel le upʼíit baʼax tsʼoʼok k-kanik tiʼ le Bibliaoʼ? Le tʼaan «u jach taʼakbil baʼaloʼob Jajal Dios» ku yaʼalik le Bibliaoʼ letiʼe naʼatil ku taal tiʼ Diosoʼ. Le naʼatilaʼ óoliʼ tiʼ tuláakal máak taʼakaʼan, baʼaleʼ tiʼ le máaxoʼob meyajtik Diosoʼ tsʼaʼan u kʼaj óoltoʼob (1 Corintoiloʼob 2:7). Jeʼex túun k-ilkoʼ, jach yaʼab baʼaloʼob jeʼel u kaʼansiktoʼon le naʼatil ku taal tiʼ Diosoʼ. Le naʼatilaʼ jach minaʼan u xuul, le oʼolal mix bikʼin kun kʼuchul k-kʼaj óolt jach bix u tuukul Dios. Baʼaleʼ wa maʼ tu jáawal k-xakʼaltik «u jach taʼakbil baʼaloʼob Jajal Dios[eʼ]», yaan u kiʼimaktal k-óol jeʼex le ka t-kanaj le baʼaloʼob maʼ sen talamtak ku kaʼansik le Bibliaoʼ.
3. ¿Baʼaxten unaj k-kʼaj óoltik «u jach taʼakbil baʼaloʼob Jajal Dios»?
3 Baʼaleʼ ¿baʼaxten unaj k-kanik «u jach taʼakbil baʼaloʼob Jajal Dios»? Tumen baʼax beetik u maas muʼukʼantal k-fejeʼ maʼ chéen letiʼe baʼaxoʼob k-kanik ichil u kaajal Diosoʼ, baʼaleʼ letiʼe k-ojéeltik baʼaxten bey u kaʼansik le Bibliaoʼ. Le Bibliaoʼ ku yaʼalik tiʼ le cristianoʼob ka u yil u yojéeltikoʼob «máakalmáak u yóolal Jajal [Dios], u kʼáat u yaʼaleʼ le baʼax maʼaloboʼ, baʼax utstutʼaanoʼ yéetel baʼax jach tubeel» (Romailoʼob 12:1, 2). Tsʼoʼoleʼ, wa k-naʼatik baʼaxten ku kʼáatiktoʼon Jéeoba ka k-beet wa baʼaxeʼ, yaan u maas taaktal k-beetik. Bey túunoʼ, k-kʼaj óoltik «u jach taʼakbil baʼaloʼob Jajal Dioseʼ» ku tsʼáaiktoʼon u muukʼil utiaʼal maʼ k-lúubul tiʼ kʼeban yéetel utiaʼal kʼubik k-óol k-beet «utsil meyajoʼob» (Tito 2:14).
4. ¿Bix unaj u xakʼalxokik máak le Bibliaoʼ?
4 Utiaʼal k-naʼatik le taʼakbil baʼaloʼoboʼ unaj k-xakʼal xook. Maʼ chéen yaan yéetel k-jáajan xookiʼ, ken xooknakoʼoneʼ kʼaʼabéet k-ilik naʼatik baʼax yaan yil le baʼax k-xokik yéetel le baʼax yáax kanmoʼ (2 Timoteo 1:13). Kʼaʼabéet k-ilik baʼaxten bey u yaʼalaʼal le baʼax táan k-xokikoʼ. Ken k-xok le Bibliaoʼ, unaj xan k-ilik bix jeʼel u yáantkoʼon k-chʼaʼatukult baʼax ken k-beete yéetel bix jeʼel k-áantik uláakʼ máakoʼob u beetoʼob xan beyoʼ. Tsʼoʼoleʼ tumen «tuláakal Kiliʼich Tsʼíib» Jajal Dios beet u tsʼíibtaʼal «utiaʼal kaʼansaj[eʼ]», unaj k-xokik tuláakal le Bibliaoʼ (2 Timoteo 3:16, 17; Mateo 4:4). U jaajileʼ maʼ chéen chʼaʼabil u xokaʼal le Bibliaoʼ, baʼaleʼ jeʼel u yutstal tu yich máakeʼ. Tsʼoʼoleʼ, «u jach taʼakbil baʼaloʼob Jajal Dios[eʼ]» maʼ talam u naʼataʼaliʼ.
Jéeobaeʼ ku tsʼáaik naʼatil tiʼ le máaxoʼob kabal u yóoloʼoboʼ
5. ¿Máaxoʼob ku páajtal u naʼatkoʼob «u jach taʼakbil baʼaloʼob Jajal Dios»?
5 Mix máak unaj u tuklik wa mix bikʼin ken u naʼat «u jach taʼakbil baʼaloʼob Jajal Dios» chéen tumen ku tuklik chich u pool wa tumen maʼ suuk u xakʼal xookiʼ. Le ka taal Jesús way Luʼumeʼ, ¿tiʼ máaxoʼob tu kaʼansaj baʼax ku yaʼalik Jéeoba? Maʼ tiʼ le máaxoʼob jach kaʼanchajaʼan u xookoʼoboʼ, baʼaxeʼ tu kaʼansaj tiʼ máakoʼob «maʼ xooknajaʼanoʼobiʼ bey xan chéen ichil meyajil máakoʼob» kabal u yóoloʼob tu chaʼaj u kaʼansaʼaloʼob. Le máakoʼobaʼ bey mejen paalaloʼob tu tséel le máaxoʼob jach kaʼanchajaʼan u xookoʼoboʼ (Mateo 11:25; Beetaʼanoʼob [Hechos] 4:13). Le ka tʼaanaj le apóstol Pablo tiʼ baʼaxoʼob «u nuʼuktmaj» Dios «utiaʼal le máaxoʼob u yaabiltmaoʼ», letiʼeʼ tu yaʼalaj: «Letiʼ le baʼaloʼob tu beetaj Jajal Dios k-kʼaj óoltik tu yoʼolal u Kiliʼich [muukʼoʼ], tumen le Kiliʼich [muukʼoʼ] ku xakʼlik tuláakal, tak u jach taʼakbil baʼaloʼob Jajal Dios» (1 Corintoiloʼob 2:9, 10).
6. Le kiliʼich muukʼoʼ, ¿bix u «xakʼlik tuláakal, tak u jach taʼakbil baʼaloʼob Jajal Dios»?
6 Le kiliʼich muukʼoʼ, ¿bix u «xakʼlik tuláakal, tak u jach taʼakbil baʼaloʼob Jajal Dios»? Jéeobaeʼ maʼ tu tsolik tiʼ cada cristiano le baʼax ku kaʼansik le Bibliaoʼ, baʼaxeʼ yéetel u kiliʼich muukʼeʼ ku nuʼuktik u kaajal, u kaajal túunaʼ ku tsʼáaik le kaʼansaj tiʼ tuláakal le máaxoʼob múul meyajtik way Luʼumeʼ (Beetaʼanoʼob 20:28; Efesoiloʼob 4:3-6). Tiʼ tuláakal yóokʼol kaabeʼ, upʼéeliliʼ baʼax ku kaʼansaʼal tiʼ tuláakal le múuchʼuliloʼoboʼ, beyoʼ ichil upʼíit jaʼaboʼobeʼ ku páajtal u kʼaʼajsaʼal le baʼax ku kaʼansik le Bibliaoʼ. Bey túunoʼ, teʼ múuchʼuliloʼ k-áantaʼal tumen le kiliʼich muukʼ utiaʼal k-eʼesik le kabal óolal kʼaʼabéet utiaʼal ka páatchajak k-naʼatik «u jach taʼakbil baʼaloʼob Jajal Dios[oʼ]» (Beetaʼanoʼob 5:32).
Baʼax táakaʼan ichil «u jach taʼakbil baʼaloʼob Jajal Dios»
7. ¿Baʼaxten yaʼab máakoʼobeʼ maʼ tu naʼatkoʼob «u jach taʼakbil baʼaloʼob Jajal Dios»?
7 Maʼ unaj k-tuklik wa le «taʼakbil baʼaloʼob[oʼ]» jach talam u naʼataʼaloʼob. U jaajileʼ taʼakaʼan óoliʼ tiʼ tuláakal máak. Baʼaleʼ leloʼ maʼ u kʼáat u yaʼal wa jach talam jeʼel u yantaltoʼon le naʼatil ku taal tiʼ Diosoʼ, baʼaxeʼ u kʼáat u yaʼaleʼ le máaxoʼob tusaʼanoʼob tumen u Kʼaasilbaʼaloʼ maʼ u kʼáat u kʼamoʼob le áantaj ku tsʼáaik u kaajal Diosoʼ (2 Corintoiloʼob 4:3, 4).
8. ¿Tiʼ baʼax «taʼakbil baʼaloʼob» tʼaanaj Pablo teʼ capítulo 3 tiʼ le Efesoiloʼoboʼ?
8 Teʼ capítulo 3 tiʼ le Efesoiloʼoboʼ, Pabloeʼ tu yaʼaleʼ ichil «u jach taʼakbil baʼaloʼob Jajal Dios[eʼ]» táakaʼan le kaʼansajoʼob jach kʼaj óolaʼan tumen óoliʼ tuláakal máax meyajtik Jéeobaoʼ, jeʼex le ku tʼaan tiʼ le Chʼiʼibal aʼalaʼanoʼ, tiʼ le Reino tu kʼab le Mesíasoʼ yéetel tiʼ le máaxoʼob yéeyaʼanoʼob utiaʼal u binoʼob kaʼanoʼ. Pabloeʼ tu yaʼalaj: «Taʼakbil baʼaloʼob maʼ tsʼaʼab ojéeltbil tiʼ mix máak tiʼ uláakʼ kʼiinoʼobiʼ, baʼaleʼ tiʼ le kʼiinoʼobaʼ Jajal Dioseʼ tsʼoʼok u yeʼesik tiʼ u kiliʼich apostoloʼob yéetel u profetaʼob tu yéetel u Kiliʼich Pixan. Le taʼakbil baʼaloʼ letiʼ lelaʼ: [...] Le ayikʼalil kun u kʼam le máaxoʼob maʼ judíoʼoboʼ keet yéetel kun u kʼam le judíoʼoboʼ, yéetel táakpajaʼanoʼob tiʼ jumpʼéeliliʼ wíinkliloʼ, yéetel yaan baʼal u yiloʼob tiʼ le baʼax tu yaʼalaj Jajal Dios tu yoʼolal Cristo Jesusoʼ». Tsʼoʼoleʼ, Pabloeʼ tiaʼalaj xaneʼ kʼubéentaʼabtiʼ ka u beet u yilaʼal tumen «tuláakaleʼ bix u tsʼoʼokpajal u taʼakbil tuukul Jajal Dios» le «Máax [...] tu taʼakaj le tuukulaʼ tiʼ le úuchben kʼiinoʼoboʼ» (Efesoiloʼob 3:5-9).
9. ¿Baʼaxten jach ku taasiktoʼon kiʼimak óolal k-naʼatik «u jach taʼakbil baʼaloʼob Jajal Dios»?
9 Pablo xaneʼ tu yaʼaleʼ Dioseʼ u kʼáat ka tsʼaʼabak ojéeltbil tumen u múuchʼulil «tiʼ tuláakal u páajtaliloʼob yéetel u jalaʼachiloʼob kaʼan [...] u jejeláasil u naʼat Jajal Dios» (Efesoiloʼob 3:10). Le angeloʼoboʼ ku kaambaloʼob xan ken u yiloʼob bix u nuʼuktik Jéeoba u kaajal, tumen beyoʼ ku maas kʼaj óolkoʼob le naʼatil yaan tiʼ Jéeobaoʼ. ¿Máasaʼ ku taasiktoʼon kiʼimak óolal k-naʼatik baʼaloʼob tak le angeloʼob taak u naʼatkoʼoboʼ? (1 Pedro 1:10-12.) Tsʼoʼoleʼ, Pabloeʼ ku yaʼaliktoʼon ka k-il «naʼatikeʼex maʼalob yéetel tuláakal le j-oksaj óoloʼoboʼ bukaʼaj kóochil, bukaʼaj chowakil, bukaʼaj taamil yéetel bukaʼaj kaʼanlil» le baʼax ku kaʼansik le Bibliaoʼ (Efesoiloʼob 3:11, 18). Le oʼolaleʼ, koʼox ilik jujumpʼéel tiʼ le taʼakbil baʼaloʼob maʼ xaaneʼ mix utéen k-xakʼaltoʼoboʼ.
Jujumpʼéel tiʼ le taʼakbil baʼaloʼoboʼ
10, 11. Jeʼex u yaʼalik le Bibliaoʼ, ¿baʼax kʼiin ka kʼuch u beetuba Jesús u Chʼiʼibal le «koʼoleloʼ»?
10 Toʼoneʼ k-ojleʼ Jesuseʼ letiʼe yáax máax táakaʼan tu «chʼiʼibal» le «koʼolel» ku yaʼalaʼal tu libroi Génesis 3:15. Baʼaleʼ utiaʼal k-ilik maas naʼatik le profecíaaʼ, maʼ xaaneʼ jeʼel u páajtal k-beetik le kʼáatchiʼaʼ: «¿Baʼax kʼiin ka kʼuch u beetuba Jesús le Chʼiʼibal aʼalaʼanoʼ? ¿Letiʼe wa maʼ taalak way Luʼumoʼ, letiʼe wa ka síij bey wíinikoʼ, letiʼe wa ka okjaʼanajoʼ wa letiʼe ka kaʼa kuxkíintaʼaboʼ?».
11 Dioseʼ tu yaʼaleʼ le «koʼolel» (wa tuláakal u angeloʼobeʼ) yaan u yantal u chʼiʼibal, yéetel le chʼiʼibalaʼ yaan u tsʼáanchaʼatik u pool le kaanoʼ. Baʼaleʼ, máan u milesi jaʼaboʼobeʼ le koʼolelaʼ maʼ yanak kaʼach utúul u chʼiʼibal jeʼel u páajtal u xuʼulsik tiʼ Satanás yéetel tiʼ le baʼaxoʼob u beetmoʼ. Le oʼolaleʼ, le profeta Isaíasoʼ tu tsʼíibteʼ le koʼoleloʼ «x-maʼ paal» yanik kaʼachi, tu yaʼalaj xaneʼ bey «juntúul x-okʼom óol» koʼoleleʼ (Isaías 54:1, 5, 6). Ka kʼuch túun u kʼiinileʼ, Jesuseʼ síij tu kaajil Belén. Baʼaleʼ, le ka okjaʼanaj, le ka yéeyaʼab tumen le kiliʼich muukʼ yéetel le ka kʼaʼam tumen Dioseʼ, Jéeobaeʼ tu yaʼalaj: «Lelaʼ in paal» (Mateo 3:17; Juan 3:3). Bey túun úuchik u chíikpajal máax yáax táakaʼan ichil u «chʼiʼibal» le koʼoleloʼ. Tsʼoʼoleʼ le kiliʼich muukʼoʼ tu yéeyaj xan uláakʼ tiʼ u disipuloʼob Jesús. Kex yaʼab jaʼaboʼob okʼom u yóol kaʼach le koʼolel tumen maʼ tu páajtal u yantal utúul u paaleʼ, baʼaleʼ páajchaj u «awat [kʼaay] yéetel kiʼimak óolal» (Isaías 54:1; Galaciailoʼob 3:29).
12, 13. ¿Baʼax tekstoiloʼob eʼesik máaxoʼob «le palitsil chúukpajaʼan u yóol yéetel yaan u naʼat[oʼ]»?
12 Uláakʼ upʼéel tiʼ le u jach taʼakbil baʼaloʼob Dios tsʼoʼok k-kʼuchul naʼatoʼ, yaan yil yéetel le 144,000 máakoʼob ku yéeyaʼaloʼob tumen Dios utiaʼal u binoʼob kaʼanoʼ (Apocalipsis 14:1, 4). Tsʼoʼok kʼuchul k-naʼateʼ tuláakal le cristianoʼob yéeyaʼanoʼob ku kuxtaloʼob way Luʼum jeʼel baʼalak kʼiinileʼ, letiʼob «le palitsil chúukpajaʼan u yóol yéetel yaan u naʼat» tu yaʼalaj Jesús kun tsʼáaik «janal» tiʼ le «otochnáaloʼob [...] tu yorailoʼ» (Mateo 24:45). Baʼaleʼ ¿bix jeʼel k-eʼesik yéetel le Biblia jach jaaj le baʼax tsʼoʼok k-aʼalikaʼ? ¿Maʼ wa táan kaʼach u tʼaan Jesús tiʼ jeʼel máaxak cristianoi ka u yáant u yéet sukuʼuniloʼob u maas natsʼubaʼob tiʼ Diosiʼ?
13 Dioseʼ u yaʼalmaj kaʼach tiʼ u kaajil Israel: «Teʼexeʼ in j-jaajkunajeʼex, teʼex in yéeybil palitsileʼex» (Isaías 43:10). Baʼaleʼ, tu kʼiinil 11 tiʼ nisán tiʼ u jaʼabil 33 teʼ yáax siglooʼ, Jesuseʼ tu yaʼaleʼ Dioseʼ jáaw u kʼamik u kaajil Israel bey u palitsil wa bey u kaajaleʼ. Letiʼeʼ tu yaʼalaj tiʼ u nuuktakiloʼob u kaajil Israel: «Bin u kaʼa j-lukʼesbil tiʼ teʼex u [reinoi] Jajal Dios utiaʼal ka tsʼaʼabak tiʼ le máakoʼob jeʼel u kʼubikoʼob le u yich ku tiaʼalintik le [reinooʼ]». Yéetel tu yaʼalaj xan tiʼ le máaxoʼob muchʼukbaloʼoboʼ: «Ileʼex túun a kajtalileʼexeʼ yaan u x-tokoy kúuchital» (Mateo 21:43; 23:38). Jeʼex k-ilkoʼ u kaajil Israeleʼ maʼ chúukpaj u yóol tiʼ Jéeobaiʼ mix tu yeʼesaj xan yaan u naʼatiʼ (Isaías 29:13, 14). Le oʼolaleʼ, le ka tu kʼáataj Jesús máax le palitsil chúukpajaʼan u yóol yéetel yaan u naʼatoʼ, táan u kʼáatik baʼax uláakʼ kaajil chúukpajaʼan u yóol kun jeelintik u kaajil Israel bey u palitsil Dioseʼ. Le baʼax tu kʼáataj Cristoaʼ núukaʼab tumen apóstol Pedro le ka tu tsʼíibtaj tiʼ le cristianoʼob yéeyaʼanoʼoboʼ: «Teʼexeʼ [...] jumpʼéel kaaj kiliʼich, jumpʼéel kaaj utiaʼal Jajal Dios» (1 Pedro 1:4; 2:9). Le kaajaʼ wa le «u Israel Jajal Dios[aʼ]», letiʼ kʼuch u beetuba u túumben palitsil Jéeoba (Gálatas 6:16, LTN). Jeʼex tuláakal le israelitaʼob ku yilaʼaloʼob kaʼach bey juntúuliliʼ «palitsileʼ», tuláakal le cristianoʼob kun binoʼob kaʼan ku kuxtaloʼob way Luʼum jeʼel baʼalak kʼiinileʼ, letiʼob «le palitsil chúukpajaʼan u yóol yéetel yaan u naʼat[oʼ]». ¿Máasaʼ jach ku kiʼimaktal k-óol ikil u tsʼaʼabaltoʼon le kaʼansaj kʼaʼabéettoʼon tumen le u palitsil Diosaʼ?
U xakʼal xook máakeʼ jach jeʼel u taasik kiʼimak óolaleʼ
14. ¿Baʼaxten jeʼel u yutstal t-ich k-xakʼalxoktik le Bibliaoʼ?
14 Ken k-maas naʼat upʼéel tiʼ le baʼax ku kaʼansik le Bibliaoʼ ku jach kiʼimaktal k-óol, tumen ku maas muʼukʼantal k-fe. Le oʼolaleʼ, wa k-xakʼalxoktik le Biblia yéetel maʼ chéen k-jáajan xokikoʼ, jeʼel u kʼuchul utstal t-ich le baʼax k-kankoʼ. Ken k-xok xan le libroʼob, revistaʼob yéetel uláakʼ jóoʼsaʼaniloʼobeʼ maʼalob ka k-tukult lelaʼ: «¿Yaan wa baʼax túumben ku kaʼansikten le baʼax kin xokikaʼ? ¿Yaan wa uláakʼ tekstoʼob wa uláakʼ baʼaxoʼob in kammaj ku yeʼeskoʼob jach jaaj le baʼax kin xokikaʼ?». Wa yaan baʼax maʼ ta jach naʼatkeʼ, tsʼíibt utiaʼal ka a kaxt u núukil tuláakʼ súutukil.
15. ¿Baʼaxoʼob jeʼel k-xakʼaltik jeʼel u taasiktoʼon kiʼimak óolaleʼ? ¿Yéetel baʼax ken u yáantoʼon k-jach jóoʼs utsil tiʼ le baʼax k-kankoʼ?
15 ¿Baʼaxoʼob jeʼel u páajtal k-xakʼaltik utiaʼal k-maas naʼatik baʼax ku kaʼansik le Bibliaoʼ yéetel jeʼel u beetik u maas utstal t-ich k-xookeʼ? Maʼ xaaneʼ jeʼel u páajtal k-xakʼaltik le pactoʼob u beetmaj Dios utiaʼal u yutsil le wíinikoʼoboʼ. Jeʼel xan u páajtal k-xakʼalxoktik le profecíaʼob ku tʼaanoʼob tiʼ Jesusoʼ, wa k-xakʼaltik cada upʼéel versículo tiʼ u libroiloʼob le Biblia ku tʼaanoʼob tiʼ profecíaʼoboʼ. Tsʼoʼoleʼ jeʼel xan u páajtal k-xakʼaltik le libro Los testigos de Jehová, proclamadores del Reino de Dios, * utiaʼal k-ilik baʼax tsʼoʼok u aktáantik u j-jaajkunajoʼob Jéeoba teʼ kʼiinoʼobaʼ. Jeʼel xan u páajtal k-xokik le xóotʼol ku kʼaabaʼtik “Preguntas de los lectores” tsʼoʼok u jóoʼloʼob teʼ revista La Atalaya, utiaʼal k-maas naʼatik jujumpʼéel tekstoʼob tiʼ le Bibliaoʼ. Ken xooknakoʼoneʼ, maʼalob ka k-il baʼax tekstoiloʼob ku meyaj utiaʼal u yeʼesaʼal jaaj le baʼax ku kaʼansaʼaloʼ. Beyoʼ yaan «[k-chʼaʼanuʼuktik] baʼax le utsoʼ bey xan baʼax le kʼaasoʼ» yéetel yaan xan u yantaltoʼon naʼatil (Hebreob 5:14). Tsʼoʼoleʼ, wa k-tsʼíibtik t-Biblia wa tiʼ upʼéel juʼun baʼaxoʼob tsʼoʼok kankeʼ, jach yaan k-jóoʼsik utsil tiʼ le baʼax k-xokikoʼ yéetel yaan k-áantik maʼalob le máaxoʼob k-kaʼanskoʼoboʼ.
Áant a paalaleʼex utiaʼal ka utsak tu yichoʼob u xokkoʼob le Bibliaoʼ
16. Le taatatsiloʼoboʼ, ¿bix jeʼel u yáantik u paalaloʼob utiaʼal ka utsak tu yichoʼob u xokkoʼob le Bibliaoʼ?
16 Le taatatsiloʼoboʼ jach yaʼab bix jeʼel u yáantik u paalaloʼob utiaʼal ka utsak tu yichoʼob u xokkoʼob le Bibliaoʼ. Mix utéen unaj u tuklikoʼob wa le paalaloʼoboʼ maʼ tu páajtal u naʼatkoʼob «u jach taʼakbil baʼaloʼob Jajal Dios[oʼ]». Maʼ xaaneʼ jeʼel u páajtal a waʼalikeʼextiʼob ka u xakʼaltoʼob wa baʼax kaʼansajileʼ, yéetel ken múul xooknakeʼexeʼ jeʼel u páajtal a kʼáatkeʼextiʼob baʼax tu kanoʼob tiʼ le baʼax tu xakʼaltoʼoboʼ. Ken múul xooknakeʼexeʼ maʼalob xan ka a líiʼsabaʼex tu yéeteloʼob utiaʼal ka u yiloʼob bix jeʼel u núukikoʼob upʼéel kʼáatchiʼ jeʼel u beetaʼaltiʼobeʼ. Tsʼoʼoleʼ le folleto Veamos “la buena tierra” * jeʼel xan u meyaj utiaʼal u yeʼesaʼaltiʼob bix le luʼumiloʼob ku chʼaʼachiʼitaʼaloʼob teʼ Bibliaoʼ, beyoʼ yaan u páajtal u máansik tu tuukuloʼob le baʼaxoʼob ku yilaʼal tu xookil le Biblia cada semanaoʼ.
17. Le xakʼal xook k-beetikoʼ, ¿baʼaxten maʼ unaj u luʼsiktoʼon le tiempo k-jóoʼsmaj utiaʼal k-líiʼsikba utiaʼal le muchʼtáambaloʼoboʼ?
17 U jaajileʼ jach ku muʼukʼantal k-fe ken xakʼalxooknakoʼon. Baʼaleʼ, kex jach jatsʼuts k-ilik xakʼalxookeʼ, maʼ unaj u luʼsiktoʼon le tiempo k-jóoʼsmaj utiaʼal k-líiʼsikba yéetel baʼax kun ilbil teʼ muchʼtáambaloʼoboʼ, tumen tiʼ k-kaʼansaʼal tumen «le palitsil chúukpajaʼan u yóol yéetel yaan u naʼat» tsʼaʼan tumen Jéeobaoʼ. Baʼaleʼ wa k-xakʼalxook ken k-líiʼsbaeʼ yaan k-núukik maas maʼalob le kʼáatchiʼob ku beetaʼal teʼ muchʼtáambaloʼoboʼ, jeʼex tu Xookil Libroi Múuchʼulil, tu muchʼtáambalil Kaambalil utiaʼal Kaʼansaj wa le ken máansaʼak le xóotʼol ku tʼaan tiʼ le baʼax ku kaʼansiktoʼon le u xookil le Biblia utiaʼal le semanaoʼ.
18. ¿Baʼaxten jach maʼalob ka k-xakʼalt «u jach taʼakbil baʼaloʼob Jajal Dios»?
18 Jeʼex túun k-ilkoʼ, k-xakʼalxoktik le Bibliaoʼ jeʼel u maas natsʼkoʼon tiʼ Jéeobaeʼ. Tak le Biblia aʼalik baʼaxten maʼalob ka k-beete: «Ojéelajeʼ bey taakʼineʼ ku yáantaj, baʼaleʼ ojéelajeʼ ku tsʼáaik kuxtal tiʼ j-ojéelaj» (Eclesiastés 7:12). Le oʼolaleʼ jach maʼalob ka k-il naʼatik le baʼaxoʼob ku kaʼansik le Bibliaoʼ. Tiʼ tuláakal le máax maʼ tu jáawal u xakʼaltik «u jach taʼakbil baʼaloʼob Jajal Dios[eʼ]», le Bibliaoʼ ku yaʼalik: «¡Bíin a wojéelt xan baʼax u kʼáat u yaʼal u kʼaj óoltaʼal [Dios]!» (Proverbios 2:4, 5).
[Tsolajiloʼob]
^ xóot’ol 15 Beetaʼan tumen u j-jaajkunajoʼob Jéeoba.
^ xóot’ol 16 Beetaʼan tumen u j-jaajkunajoʼob Jéeoba.
¿Jeʼel wa u páajtal k-tsolkeʼ?
• ¿Baʼax le «u jach taʼakbil baʼaloʼob Jajal Dios[oʼ]»?
• ¿Baʼaxten mix bikʼin kun xuʼulul k-xakʼaltik le jach taʼakbil baʼaloʼoboʼ?
• ¿Baʼaxten k-aʼalik tuláakal máax meyajtik Dioseʼ jeʼel u páajtal u naʼatik «u jach taʼakbil baʼaloʼob Jajal Dios»?
• ¿Baʼax jeʼel u páajtal k-beetik utiaʼal k-maas naʼatik «u jach taʼakbil baʼaloʼob Jajal Dios[eʼ]»?
[U kʼáatchiʼiloʼob le xookoʼ]
[U tsolajil le oochel teʼ táan juʼun 28]
¿Baʼax kʼiin ka kʼuch u beetuba Jesús le Chʼiʼibal aʼalaʼanoʼ?
[U tsolajil le oochel teʼ táan juʼun 31]
Le taatatsiloʼoboʼ jeʼel u páajtal u yaʼalik tiʼ u paalaloʼob ka u xakʼaltoʼob wa baʼax kaʼansajil utiaʼal ka u yiloʼob ken múul xooknakoʼoboʼ