Kʼaʼabéet k-kanik beet disipuloʼob
Kʼaʼabéet k-kanik beet disipuloʼob
«Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob.» (MATEO 28:19.)
1. ¿Baʼax kʼaʼabéetchaj u beetik jujuntúul tiʼ le máaxoʼob meyajt Dios úuchiloʼ?
UTIAʼAL u beetkoʼob baʼax u kʼáat Jéeobaeʼ, le máaxoʼob meyajtikoʼ yaan kʼiineʼ unaj u kanikoʼob bix jeʼel u beetkoʼob maas maʼalobeʼ. Jeʼex Abraham yéetel Saraeʼ, le ka jóokʼoʼob tu kaajil Ur jeʼex aʼalaʼabiktiʼob tumen Jéeobaeʼ, kʼaʼabéetchaj u kankoʼob bix jeʼel u kuxtaloʼob tiʼ pasel najoʼobeʼ (Hebreob 11:8, 9, 15). Josué xaneʼ kʼaʼabéetchaj u kʼubik u yóol tiʼ Jéeoba, u kʼaʼaj óoltik le Leyoʼ yéetel maʼ u chʼaʼik saajkil utiaʼal u bisik le israelitaʼob teʼ luʼum aʼalaʼan u tsʼaʼabaltiʼoboʼ (Josué 1:7-9). Maʼ xaaneʼ kex Bezaleel yéetel Aholiab (Oholiab), yaʼab baʼax u yojel u beetoʼobeʼ, tu maas kanaj u beetoʼob yoʼolal u kiliʼich muukʼ Dios; le áantoʼob utiaʼal u táakpajloʼob tiʼ u beetaʼal le tabernaculooʼ, yéetel tu tsʼáajoʼob xan nuʼuktajil utiaʼal u beetaʼal (Éxodo 31:1-11).
2. ¿Baʼax kʼáatchiʼiloʼob yaan yil yéetel u beetaʼal disipuloʼob ken k-il teʼ xookaʼ?
2 Yaʼab jaʼaboʼob úuchuk lelaʼ, Jesuseʼ tu yaʼalaj tiʼ u disipuloʼob: «Xeeneʼex [...] tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob [wa disipuloʼob]; yéetel tsʼaʼex u yokjaʼob tu kʼaabaʼ le Taataoʼ, le Paaloʼ yéetel le Kiliʼich Pixanoʼ, yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex» (Mateo 28:19, 20). Jach yáax u yaʼalaʼal ka beetaʼak upʼéel nojoch meyaj jeʼex lelaʼ. Baʼaleʼ ¿baʼaxoʼob kʼaʼabéet tiʼ máak utiaʼal u beetik disipuloʼob? ¿Bix jeʼel u yantal tiʼ máak le baʼaxoʼob kʼaʼabéetoʼobaʼ?
Kʼaʼabéet k-jach yaabiltik Dios
3. ¿Baʼax k-eʼesik le ken k-táakpajkoʼon tiʼ u beetaʼal disipuloʼob?
3 Kʼaʼabéet k-jach yaabiltik Jéeoba utiaʼal k-tʼaan yéetel le máakoʼoboʼ bey xan utiaʼal k-eʼesiktiʼob unaj u adorarkoʼob le utúuliliʼ jaajil Diosoʼ. Le israelitaʼoboʼ jeʼel u páajtal u yeʼeskoʼob kaʼach u yaabiltmoʼob Dios ken u beetoʼob baʼax u kʼáateʼ, ken u kʼuboʼob maʼalob siibaloʼob tiʼ yéetel ken u kiʼikiʼtʼantoʼob u kʼaabaʼ (Deuteronomio 10:12, 13; 30:19, 20; Salmo 21:13; 96:1, 2; 138:5). Toʼon táan k-meyajtik Dioseʼ k-eʼesik xan k-yaabiltmaj le ken k-beet baʼax u kʼáat. Baʼaleʼ uláakʼ bix k-eʼesik yaabilmeʼ letiʼe ken táakpajkoʼon tiʼ u kaʼansaʼal uláakʼ máakoʼoboʼ. Le oʼolaleʼ, le ken tʼaanakoʼon tiʼ Jéeoba yéetel tiʼ le baʼaxoʼob ken u beetoʼ, kʼaʼabéet k-eʼesik jach tu jaajil k-creertik yéetel unaj k-chíikbesik jach kiʼimak k-óol yoʼolal le baʼax ku yaʼalik u tsʼáaiktoʼonoʼ (1 Tesalonicailoʼob 1:5; 1 Pedro 3:15).
4. ¿Baʼaxten jach tu taasaj kiʼimak óolal tiʼ Jesús u tʼaan tiʼ Jéeoba?
4 Jesuseʼ jach u yaabiltma kaʼach Jéeoba, le oʼolal yéetel kiʼimak óolal tu kaʼansaj baʼax u tukultmaj u beetik u Taata, baʼax ken u beet u Reino yéetel bix le adoración ku kʼamikoʼ (Lucas 8:1; Juan 4:23, 24, 31). Utéenjeakileʼ, letiʼeʼ tu yaʼalaj: «In janaleʼ in beetik u yóolal le máax túuxtenoʼ, yéetel in tsʼoʼoksik u meyaj» (Juan 4:34). Tiʼ letiʼ xan béeychaj le baʼax tu yaʼalaj le salmistaaʼ: «Teneʼ utstintʼaan in beetik le baʼax a kʼáateʼ, in Jajal Dios; kin bisik tin puksiʼikʼal a kaʼambesaj. Tsʼoʼok in tsʼáaik ojéeltbil le baʼax toj tu táan le a nojoch kaajaloʼ. Techeʼ maʼalob a wojelil, Yuumtsil, mix pʼáataken maakal in chiʼ» (Salmo 40:8, 9; Hebreob 10:7-10).
5, 6. ¿Baʼax jach kʼaʼabéet u yantaltoʼon utiaʼal k-beetik disipuloʼob?
5 Yaan máaxoʼob maʼ úuch joʼopʼok u kaambaloʼob tiʼ le baʼax ku kaʼansik le Bibliaoʼ ku jach yaabilkoʼob Dios. Yoʼolal le yaabilajaʼ, le ken tʼaanakoʼob tiʼ Jéeoba yéetel tiʼ u Reinoeʼ, ku yeʼeskoʼob jach ku creerkoʼob le baʼax ku tsikbaltikoʼoboʼ, le oʼolal ku líiʼsik u yóol uláakʼ máakoʼob ka u xokoʼob xan le Bibliaoʼ (Juan 1:41). Bey túunoʼ, le baʼax jach péeksik le máaxoʼob meyajtik Dios utiaʼal ka u beetoʼob disipuloʼobeʼ letiʼe yaabilaj ku yuʼubkoʼob tu yoʼolaloʼ. Le oʼolaleʼ, utiaʼal maʼ u jáawal k-yaabiltik Dioseʼ unaj k-xokik sáamsamal le Bibliaoʼ yéetel unaj k-tuukul tiʼ le baʼax k-xokikoʼ (1 Timoteo 4:6, 15; Apocalipsis 2:4).
6 Tumen jach u yaabiltmaj Jéeobaeʼ, Jesuseʼ tu tsʼáaj u yóol u kaʼans le máakoʼoboʼ. Baʼaleʼ maʼ chéen u yaabilaj tiʼ Dios áant utiaʼal ka xiʼik utsil tiʼ teʼ kʼaʼaytajoʼ. ¿Baʼax uláakʼ áant utiaʼal u beetik disipuloʼob?
Unaj k-eʼesik taak áantik k-éet wíinikil
7, 8. ¿Baʼax tu yeʼesaj Jesús tiʼ le máakoʼoboʼ?
7 Jesuseʼ mantatsʼ tu kaxtaj u yutsil le máakoʼoboʼ yéetel tu yilaj u yáantkoʼob. Tu yaabiltoʼob tak táanil tiʼ u taal way Luʼumeʼ, le tiaʼan kaʼach teʼ kaʼan táan u yáantik u Taata u beet tuláakal baʼaloʼ (Proverbios 8:30, 31). Le ka kuxlaj way Luʼumeʼ, tu chʼaʼaj óotsilil tiʼ le máakoʼoboʼ yéetel tu beetaj u yuʼubkubaʼob maʼalob (Mateo 11:28-30). Jesuseʼ tu yeʼesaj yaabilaj yéetel tu chʼaʼaj óotsilil jeʼex u Taataeʼ, le oʼolal yaʼab máakoʼob taakchaj u adorarkoʼob le utúuliliʼ jaajil Diosoʼ. Jejeláas máaxoʼob uʼuy baʼax tu kaʼansaj, tumen letiʼeʼ jach tu kaxtaj u yutsiloʼob yéetel tu naʼataj bix u yuʼubkubaʼob (Lucas 7:36-50; 18:15-17; 19:1-10).
8 Le ka kʼáataʼab tiʼ Jesús tumen utúul máak baʼax unaj u beetik utiaʼal u yantaltiʼ kuxtal minaʼan u xuuleʼ, letiʼeʼ «tu paktaj yéetel yaakunaj» (Marcos 10:17-21). Le Bibliaoʼ ku yaʼalik xaneʼ Jesuseʼ «jach u yaamaj Marta, María u yíitsʼin yéetel Lázaro», u disipuloʼob kajaʼanoʼob Betania (Juan 11:1, 5). Tumen Jesús jach u kʼáat u yáant le máakoʼoboʼ yanchaj tak kʼiin maʼ jeʼel utiaʼal u kaʼansiktiʼob le maʼalob péektsiloʼ (Marcos 6:30-34). Le yaabilaj yéetel le chʼaʼa óotsilil tu yeʼesaj Jesús tiʼ le máakoʼoboʼ, letiʼ áant utiaʼal ka u kaʼans maʼalob le máakoʼob u adorartoʼob Diosoʼ.
9. ¿Baʼax maʼalob modosi tu yeʼesaj Pablo le ka tu kaʼansaj uláakʼ máakoʼoboʼ?
9 Le apóstol Pablo xanoʼ jach tu yáantaj le máaxoʼob tiʼ le tu kʼaʼaytaj le maʼalob péektsiloʼ. Jeʼex tiʼ le máaxoʼob joʼopʼ u meyajtkoʼob Dios yanoʼob kaʼach Tesalonicaoʼ, tu yaʼalajtiʼob: «Jach k-yaabiltmajeʼex le oʼolaleʼ jeʼel k-óoltik kaʼach k-tsʼáa tiʼ teʼex maʼ chéen u maʼalob péektsilil Jajal Diosiʼ, baʼaleʼ tak k-kuxtal, tumen tsʼoʼok k-kʼuchul k-yaabilteʼex jach yaʼab». Tumen Pablo jach tu yilaj u yáantkoʼob yéetel jach tu yeʼesaj yaabilaj tiʼobeʼ, le tesalonicailoʼoboʼ tu xulaj u adorarkoʼob «le beetbil [diosoʼoboʼ]» utiaʼal u meyajtkoʼob «le kuxaʼan yéetel u jaajil» Diosoʼ (1 Tesalonicailoʼob 1:9; 2:8). Wa k-ilik áantik u maasil jeʼex tu beetil Jesús yéetel Pabloeʼ, maʼ xaaneʼ jeʼel k-ilik bix u kʼuchul le maʼalob péektsil tu puksiʼikʼal «tuláakal le yéeyaʼanoʼob utiaʼal ka yanaktiʼob kuxtal minaʼan u xuuloʼ» (Beetaʼanoʼob 13:48).
Kʼaʼabéet k-ilik xupikba yoʼolal u maasil
10, 11. Utiaʼal k-beetik disipuloʼobeʼ, ¿baʼaxten kʼaʼabéet k-xupikba yoʼolal u maasil?
10 ¿Máaxoʼob jach u yojloʼob u beetoʼob disipuloʼob? Letiʼe máaxoʼob ku meyajkoʼob Dios jach ku yilik u xupkubaʼob yoʼolal u maasiloʼ. Utiaʼal letiʼobeʼ, u kaxtaʼal chéen ayikʼalileʼ maʼ letiʼe baʼax u maas kʼaʼananoʼ. Jesuseʼ tu yaʼalaj tiʼ u disipuloʼob: «¡Jach istikiaj u yokol le ayikʼaloʼob tu [Reino Diosoʼ]!». Le ka tu yaʼalaj Jesús le tʼaanoʼobaʼ, u disipuloʼobeʼ jaʼakʼ u yóoloʼob. Kex beyoʼ, seguernaj u yaʼalik: «Paalaleʼex, ¡Jach istikiaj u yokol tu [reino Dios] le máakoʼob u tsʼaama u yóoloʼob tiʼ ayikʼaliloʼoboʼ! [Maas] séebaʼan jeʼel u máan juntúul camello tu jool jumpʼéel púutsʼeʼ, maʼ ka okok juntúul ayikʼal tu [reino Diosiʼ]» (Marcos 10:23-25). Le oʼolaleʼ, Jesuseʼ tu yaʼalajtiʼob maas maʼalob maʼ u kaxtikoʼob yaʼab baʼaloʼob, utiaʼal ka u maas tsʼáa u yóol u beetoʼob disipuloʼob (Mateo 6:22-24, 33). Baʼaleʼ ¿baʼaxten kʼaʼabéet k-xupikba utiaʼal k-beetik disipuloʼob?
11 Tumen utiaʼal k-kaʼansik le baʼaxoʼob tu yaʼalaj Jesusoʼ jach yaʼab baʼaxoʼob unaj k-beetik. Cada semanaeʼ tuláakal le máaxoʼob beetik disipuloʼoboʼ jach ku tsʼáaik u yóoloʼob utiaʼal u kaʼansikoʼob le máaxoʼob taak u kaambaloʼoboʼ. Jujuntúul tiʼ letiʼobeʼ ku chʼaʼatuklik maʼ u meyajoʼob bulkʼiin utiaʼal u maas yantal tiempo tiʼob u kaxkoʼob le máaxoʼob u kʼáatoʼob kaambaloʼ. U milesi uláakʼ sukuʼunoʼobeʼ ku kanikoʼob uláakʼ tʼaan utiaʼal u yáantkoʼob le máaxoʼob kajaʼanoʼob naatsʼ tiʼ letiʼoboʼ. Yaan xaneʼ ku pʼatik tak u yotochoʼob utiaʼal u binoʼob tuláakʼ kaaj wa tuláakʼ luʼumil utiaʼal u maas táakpajloʼob tiʼ u kʼaʼaytaʼal le maʼalob péektsiloʼ (Mateo 9:37, 38). Utiaʼal u beetaʼal tuláakal lelaʼ ku kʼaʼabéettal u xupkuba máak yoʼolal u maasil. Baʼaleʼ utiaʼal u beetaʼal disipuloʼobeʼ yaan xan uláakʼ baʼax kʼaʼabéet u beetaʼal.
Unaj u chúukpajal k-óol kaʼansaj, baʼaleʼ maʼ unaj k-peʼertik tiempoi
12, 13. Utiaʼal k-beetik disipuloʼobeʼ, ¿baʼaxten jach kʼaʼabéet u yantaltoʼon chúukaʼan óolal?
12 Utiaʼal u páajtal k-beetik disipuloʼobeʼ kʼaʼabéet xan u chúukpajal k-óol. Lelaʼ kʼaʼabéet, tumen kex le máaxoʼob táan k-kaʼanskoʼob kʼaʼabéet u beetkoʼob kʼeexoʼob ichil u kuxtaloʼobeʼ, yanoʼobeʼ ku chan bisik tiempo tiʼob (1 Corintoiloʼob 7:29). Jesuseʼ maʼ chiʼichnakchaj tumen Santiago, u yíitsʼneʼ, maʼ tu jáan beetuba u disipuloiʼ. Maʼ xaaneʼ Santiagoeʼ u kʼaj óol le meyaj ku beetik Jesús kaʼachoʼ, baʼaleʼ yaan wal baʼax oʼolal maʼ tu jáan beetuba disipuloileʼ (Juan 7:5). Baʼaleʼ, maʼ xaaneʼ tu beetuba disipuloi teʼ jaʼab 33, teʼ kʼiinoʼob máan desde ka kíim Jesús tak ka kʼiimbesaʼab le Pentecostesoʼ. K-aʼalik beyaʼ tumen jeʼex u yaʼalik le Bibliaoʼ, teʼ kʼiinoʼob jeʼeloʼ letiʼ, u maama yéetel uláakʼoʼobeʼ tu muchʼubaʼob yéetel le sukuʼunoʼob bey xan le apostoloʼob utiaʼal u oraroʼob (Beetaʼanoʼob 1:13, 14). Santiagoeʼ seguernaj u maas kaambal, le oʼolaleʼ ka máan kʼiinoʼobeʼ tsʼaʼab nojoch meyajoʼob u beet ichil u kaajal Dios (Beetaʼanoʼob 15:13; 1 Corintoiloʼob 15:7).
13 Yaʼab tiʼ le baʼaxoʼob ku pakʼik utúul j-kolnáaleʼ ku chan xáantal táan u nuuktal. Bey xan u yúuchul yéetel le máaxoʼob k-kaʼanskoʼ: ku chan xáantal u naʼatkoʼob baʼax ku kaʼansik le Bibliaoʼ, u kʼuchul u yaabiltoʼob Jéeoba yéetel u beetkoʼob baʼax tu yaʼalaj Jesús. Le oʼolaleʼ kʼaʼabéet u chúukpajal k-óol. Santiagoeʼ tu yaʼalaj: «Yanakteʼex chúukaʼan óolal tak ken taalak Yuumtsil. Le j-meyjil kʼáax ku páaʼtik u molik le jatsʼuts joochoʼ, yaan u páaʼtik yéetel chúukaʼan óolal u taal u kʼiiniloʼob u kʼáaxal jaʼ. Yanakteʼex xan chúukaʼan óolal yéetel maʼ u lúubul a wóoleʼex, tumen táan u náatsʼal u kʼiinil u taal Yuumtsil» (Santiago 5:7, 8). Santiago túuneʼ tu yaʼalaj tiʼ u sukuʼunoʼob ka yanaktiʼob «chúukaʼan óolal tak ken taalak Yuumtsil». Jesuseʼ jach chúukpaj u yóol u kaʼans u disipuloʼob, wa maʼ tu naʼatkoʼob kaʼach upʼéel baʼaleʼ ku kaʼa tsoliktiʼob, yéetel yaan oraeʼ ku meyajtiʼ kettʼaanoʼob utiaʼal ka u naʼatoʼob (Mateo 13:10-23; Lucas 19:11; 21:7; Beetaʼanoʼob 1:6-8). Bejlaʼeʼ Jesuseʼ tsʼoʼok u taal, tumen tsʼoʼok u káajal u gobernar. Baʼaleʼ láayliʼ kʼaʼabéet u seguer k-eʼesik chúukaʼan óolaleʼ, tumen beyoʼ jeʼel k-áantik uláakʼ máakoʼob ka u beetubaʼob disipuloi tiʼ Jesuseʼ (Juan 14:9).
14. Kex k-eʼesik chúukaʼan óolal tiʼ le máaxoʼob k-tsʼáaik xookoʼ, ¿baʼax unaj k-beetik utiaʼal u meyajtoʼon maas maʼalob k-tiempo?
14 Kex jach k-eʼesik chúukaʼan óolaleʼ, yaan oraeʼ le máaxoʼob k-kaʼanskoʼ maʼ tu beetkoʼob le baʼax ku kankoʼoboʼ (Mateo 13:18-23). Kʼaʼabéet k-beetik tuláakal le ku páajtal utiaʼal k-áantkoʼob, baʼaleʼ wa maʼ tu beetkoʼob kʼeexoʼob ichil u kuxtaloʼobeʼ, k-xulik kaʼanskoʼob yéetel k-ilik áantik le máaxoʼob jach taak u kaambaloʼoboʼ (Eclesiastés 3:1, 6). Maʼ u tuʼubultoʼoneʼ, kʼaʼabéet k-maas jóoʼsik tiempo utiaʼal k-áantik le máaxoʼob jach taak u kaambaloʼoboʼ, utiaʼal ka u kʼex bix u tuukuloʼob yéetel ka u pʼat le baʼaloʼob maʼ maʼalobtak ku beetkoʼoboʼ. Le oʼolaleʼ, k-eʼesik chúukaʼan óolal jeʼex tu yeʼesil Jesús le ka tu yáantaj u disipuloʼob ka u kʼex bix u tuukuloʼob kex óoliʼ talamchajtiʼob (Marcos 9:33-37; 10:35-45).
Kʼaʼabéet k-kanik kaʼansaj tubeel
15, 16. ¿Baʼaxten kʼaʼabéet k-líiʼsikba maʼalob yéetel ka k-il ka séeb naʼataʼak le baʼax k-kaʼanskoʼ?
15 Wa k-kʼáat beet disipuloʼobeʼ jach kʼaʼabéet k-yaabiltik Dios, k-eʼesik taak áantik éet wíinikil, unaj k-xupikba yoʼolal u maasil yéetel unaj u yantaltoʼon chúukaʼan óolal. Baʼaleʼ kʼaʼabéet xan k-kanik kaʼansaj tubeel, tumen chéen bey jeʼel k-tsolik maʼalob yéetel ka naʼataʼak le baʼax k-kaʼansikoʼ. Jesuseʼ jach maʼalob úuchik u kaʼansaj, tumen séeb u naʼataʼal le baʼaxoʼob tu yaʼaloʼ. Maʼ xaaneʼ kʼajaʼantoʼon le baʼaxoʼob tu yaʼalaʼ: «Muchʼkíinteʼex ayikʼaliloʼob teʼ kaʼanoʼ», «Maʼ a tsʼáaikeʼex le kiliʼich baʼaloʼob tiʼ peekʼoʼoboʼ», «U yojéelaj Jajal Dioseʼ ku kʼaj óoltaʼal tu yoʼolal baʼax ku beetik» yéetel «Boʼoteʼex túun, tiʼ César baʼax utiaʼal César, yéetel tiʼ Jajal Dios baʼax utiaʼal Jajal Dios» (Mateo 6:20; 7:6; 11:19; 22:21). Baʼaleʼ Jesuseʼ maʼ chéen yéetel upʼíit tʼaanoʼob kaʼansajnajiʼ. Ken kʼaʼabéetchajak kaʼacheʼ ku maas tsolik, baʼaleʼ láayliʼ séeb u naʼataʼaleʼ. ¿Bix jeʼel u páajtal k-kaʼansaj jeʼex letiʼoʼ?
16 Utiaʼal ka naʼataʼak yéetel ka k-tsol tubeel le baʼax k-kaʼansikoʼ jach kʼaʼabéet k-líiʼsikba maʼalob. Utúul máax maʼ tu líiʼskuba tubeeleʼ jach yaʼab u tʼaan. Ku yaʼalik tuláakal baʼax u yojel yoʼolal upʼéel kaʼansajil, le oʼolal maʼ tu naʼataʼal baʼax u kʼáat u kaʼanseʼ. Baʼaleʼ le máax ku líiʼskuba tubeeleʼ ku tuukul yoʼolal le máax ku kaʼansikoʼ, ku tuukul tiʼ le baʼax ken u kaʼansoʼ yéetel ku tsolik chéen le baʼax kʼaʼabéet u tsolaʼaloʼ (Proverbios 15:28; 1 Corintoiloʼob 2:1, 2). Ku chʼaʼik en cuenta baʼax u yojel le máakoʼ yéetel baʼax kʼaʼabéet u maas tsolik. Maʼ xaaneʼ yaʼab baʼax u yojel yoʼolal le baʼax ku kaʼansikoʼ, baʼaleʼ maʼ tu jach láaj aʼalik, beyoʼ maas séeb u naʼataʼal le baʼax ku kaʼansikoʼ.
17. ¿Bix jeʼel k-áantik le máakoʼob ka tuukulnakoʼob yoʼolal baʼax ku kaʼansik le Bibliaoʼ?
17 Jesuseʼ maʼ chéen tu tsolaj wa baʼaxiʼ, tu beetaj xan u tuukul le máaxoʼob uʼuyikoʼ. Jeʼex utéenjeakileʼ, letiʼeʼ tu yaʼalaj: «¿Bix a wilik, Simón? ¿U [reyiloʼob] yóokʼol kaabeʼ, máax tiʼob ku tsáaikoʼob [wa ku kʼáatkoʼob] le [impuestoʼob] yéetel le uláakʼ boʼolaloʼoboʼ; tiʼ u yéet kaajaloʼob wa tiʼ le táanxel luʼumiloʼoboʼ?» (Mateo 17:25). Ken k-kaʼans le máakoʼoboʼ, kʼaʼabéet xan k-chaʼik ka u yaʼaloʼob baʼax ku tuklikoʼob yoʼolal le baʼax táan k-xokkoʼ. Utiaʼal leloʼ kʼaʼabéet k-ilik maʼ k-sen tʼaan, leloʼ maases kʼaʼabéet k-beetik wa jach jatsʼuts k-ilik tsolik le baʼax ku yaʼalik le Bibliaoʼ. Maʼ xan unaj k-sen beetik kʼáatchiʼob tiʼ le máax táan k-kaʼanskoʼ, unaj k-kanik beet chéen wa jaypʼéel kʼáatchiʼob tiʼ yéetel k-ketik tubeel le baʼax táan k-kaʼanskoʼ. Bey túunoʼ jeʼel u páajtal k-áantkoʼob u naʼatoʼob u kaʼansajiloʼob le Biblia ku jóoʼloʼob tiʼ libroʼob, folletoʼob yéetel tiʼ uláakʼ jóoʼsaʼaniloʼoboʼ.
18. ¿Baʼax táakaʼan ichil le «maʼalob kaʼansa[joʼ]»?
18 Le Bibliaoʼ ku tʼaan tiʼ le «maʼalob kaʼansa[joʼ]» (2 Timoteo 4:2; Tito 1:9). Le maʼalob kaʼansajoʼ maʼ chéen yaan yil yéetel k-kaʼansik le máak utiaʼal maʼ u tuʼubultiʼ le baʼax ku xokkoʼ. Baʼax unaj k-ilkeʼ ka naʼataʼak baʼax u jelaʼanil le jaajil tiʼ le maʼatechoʼ, le baʼax maʼaloboʼ tiʼ le baʼax maʼ maʼaloboʼ yéetel bix u yeʼesaʼal naʼatil. Wa k-jach tsʼáaik k-óol beet beyaʼ yéetel k-ilik áantik le máak ka kʼuchuk u yaabilt Jéeobaoʼ, maʼ xaaneʼ jeʼel k-áantik u naʼat baʼaxten kʼaʼabéet u beetik baʼax ku yaʼalik Dioseʼ.
Unaj k-tsʼáaik óol beet disipuloʼob
19. ¿Bix k-áantaj utiaʼal ka beetaʼak disipuloʼob?
19 Tuláakal le máaxoʼob yanoʼob ichil u kaajal Diosoʼ ku yilik u beetkoʼob disipuloʼob. Le oʼolaleʼ, le ken yanak utúul túumben disipuloeʼ, maʼ chéen le sukuʼun tsʼáa xook tiʼ ku kiʼimaktal u yóoloʼ. Lelaʼ jeʼel u páajtal u ketaʼal yéetel u muchʼkuba u jaats máakoʼob utiaʼal u bin u kaxtoʼob utúul chan paal saataleʼ. Kex chéen utúul tiʼ letiʼob ka u kaxt le chan paaloʼ, tuláakloʼob ku kiʼimaktal u yóoloʼob le ken bisaʼak tu yiknal u taataʼob (Lucas 15:6, 7). Bey túun xanoʼ, utiaʼal u beetaʼal disipuloʼobeʼ yaʼab máakoʼob ku táakpajliʼ. Tuláakloʼon k-táakpajal utiaʼal k-kaxtik le máakoʼob jeʼel u kʼuchul u beetubaʼob u disipuloʼob Jesuseʼ. Yéetel le ken joʼopʼok u binoʼob teʼ muchʼtáambaloʼob tu Najil le Reinooʼ, cada utúul tiʼ toʼoneʼ k-ilik áantkoʼob utiaʼal ka u maas tsʼáa u yóol u meyajtoʼob Jéeoba (1 Corintoiloʼob 14:24, 25). Le oʼolaleʼ, tuláakloʼon ku kiʼimaktal k-óol ken k-il cada jaʼabeʼ u milesi máakoʼob ku beetkubaʼob u disipuloʼob Cristo.
20. ¿Baʼax unaj a beetik wa a kʼáat a kaʼans tiʼ uláakʼ máak le baʼax ku yaʼalik le Bibliaoʼ?
20 Yaʼab sukuʼunoʼobeʼ jach u kʼáat u yáantoʼob wa máax u kʼaj óolt Jéeoba yéetel ka u adorarte, baʼaleʼ kex jach ku tsʼáaik u yóoloʼobeʼ maʼ béeychajak u beetkoʼobiʼ. Wa bey u yúuchul toʼonoʼ, unaj k-ilik jach yaabiltik Jéeoba, k-eʼesik taak áantik k-éet wíinikil, k-ilik xupikba yoʼolal u maasil, u chúukpajal k-óol yéetel k-ilik kaʼansaj tubeel. Tsʼoʼoleʼ, aʼal xan tiʼ Jéeoba ich oración a kʼáat a wáant uláakʼ máak u kʼaj óolt u jaajil (Eclesiastés 11:1). Maʼ u lúubul a wóol. Kʼaʼajaktecheʼ tuláakal baʼax ka beetik utiaʼal a meyajtik Jéeobaeʼ ku yáantaj utiaʼal u beetaʼal disipuloʼob yéetel leloʼ ku taasik xan nojbeʼenil tiʼ Jéeoba.
¿A wojel wa a tsole?
• Le ken k-beet disipuloʼobeʼ, ¿bix k-eʼesik wa jach tu jaajil k-yaabiltmaj Jéeoba?
• ¿Baʼaxoʼob kʼaʼabéet tiʼ máak utiaʼal u beetik disipuloʼob?
• ¿Baʼax táakaʼan ichil le «maʼalob kaʼansaj[oʼ]»?
[U kʼáatchiʼiloʼob le xookoʼ]
[U tsolajil le oochel teʼ táan juʼun 15]
K-eʼesik jach k-yaabilmaj Dios le ken k-beet disipuloʼob
[U tsolajil le oochel teʼ táan juʼun 17]
Utiaʼal k-beetik disipuloʼobeʼ, ¿baʼaxten unaj k-eʼesik taak k-áantik éet wíinikil?
[U tsolajil le oochel teʼ táan juʼun 18]
¿Baʼax modosil kʼaʼabéettoʼon utiaʼal k-beetik disipuloʼob?
[U tsolajil le oochel teʼ táan juʼun 19]
Ku kiʼimaktal k-óol ken k-il bix u yaʼabtal máaxoʼob ku beetkubaʼob u disipuloʼob Cristo