«Ilawil a tsʼoʼokbesik le meeyjul ta kʼamaj tiʼ Yuumtsiloʼ»
«Ilawil a tsʼoʼokbesik le meeyjul ta kʼamaj tiʼ Yuumtsiloʼ»
«Ilawil a tsʼoʼokbesik le meyjul ta kʼamaj tiʼ [Jéeobaoʼ].» (COL. 4:17, LTN.)
1, 2. ¿Baʼaxten jach kʼaʼabéet áantik k-éet máakil u chʼaʼatukult baʼax unaj u beetik?
TOʼON k-meyajtik Dioseʼ jach kʼaʼabéet k-áantik le máakoʼob u chʼaʼatukultoʼob baʼax unaj u beetkoʼoboʼ, tumen le baʼax ku chʼaʼatuklikoʼoboʼ jeʼel u biskoʼob tiʼ kuxtal wa tiʼ kíimil tu kʼiinil le «nojoch yaayaj óolaloʼ» (Apo. 7:14). U libroi Proverbioseʼ ku yaʼalik: «Tok le máaxoʼob xotʼkʼiintaʼanoʼob kíimiloʼ; tok le máaxoʼob tiʼ yanoʼob tu chiʼ kíimiloʼ». ¿Máasaʼ jach ku péeksik k-óol le tʼaanoʼobaʼ? U jaajileʼ wa maʼ t-aʼalik tiʼ le máakoʼob baʼax unaj u beetkoʼobeʼ yaan u kíimiloʼob yéetel yaan u yaʼalaʼal tiʼ toʼon anchaj u culpai. U libroi Proverbioseʼ ku seguer u yaʼalik: «Tumen kex ka waʼal maʼ a wojel kaʼacheʼ, máax u yojel baʼax oʼolaleʼ letiʼ bíin u yojéelte; bíin u maʼalob ojéelt le máax chʼúuktikech le máax boʼotik jujuntúul jeʼel bix ku náajmatikeʼ». Jeʼex túun k-ilkoʼ, maʼ kun páajtal k-aʼalik wa «maʼ [k-]ojel kaʼach» baʼax talamiloʼob ku páaʼtik le máakoʼoboʼ (Pro. 24:11, 12).
2 Tumen Jéeoba jach nojoch baʼal u yilik le kuxtaloʼ, ku yaʼalik tiʼ máaxoʼob meyajtik ka u beetoʼob tuláakal le ku páajtal utiaʼal ka u yáant u salvartuba u maas yaʼabil máakoʼob ku páajtal. Tuláakal máaxoʼob meyajtik Dioseʼ kʼaʼabéet u tsʼáaikoʼob ojéeltbil baʼax ku yaʼalik le Biblia utiaʼal u salvarkuba uláakʼ máakoʼob. Le meyaj k-beetkoʼ ku keʼetel yéetel le meyaj ku beetik kaʼach le j-kanan kaaj ku tsʼáaik ojéeltbil baʼax nojoch talamil táan u náatsʼloʼ. Maʼ k-kʼáat ka aʼalaʼak wa tiʼ toʼon yaan u culpai úuchik u kíimil le máakoʼoboʼ (Eze. 33:1-7). Le oʼolaleʼ jach kʼaʼabéet maʼ unaj u jáawal k-tsʼáaik óol «tseʼekt le maʼalob péektsiloʼ» (xokaʼak 2 Timoteo 4:1, 2, 5).
3. ¿Tiʼ baʼax kun tʼaan le xookaʼ bey xan le uláakʼoʼoboʼ?
3 Le xookaʼ yaan u tsolik bix jeʼel k-aktáantik le talamiloʼob jeʼel u beetik u jáawal k-kʼaʼaytajoʼ yéetel bix jeʼel k-áantik u maas yaʼabil máakoʼob ku páajtaleʼ. Le uláakʼ xookoʼ yaan u yeʼesiktoʼon bix jeʼel k-maas maʼalobkíintik bix k-kaʼansik le baʼax ku yaʼalik le Bibliaoʼ. Yéetel le u tsʼookoʼ yaan u yeʼesik baʼax utsiloʼob táan u kʼamik le máaxoʼob kʼaʼaytik le Reino tiʼ tuláakal yóokʼol kaaboʼ. Baʼaleʼ táanil tiʼ k-xakʼalxoktik le xookoʼobaʼ, koʼox ilik baʼaxten jach yaan talamiloʼob teʼ kʼiinoʼob kuxlikoʼonaʼ.
¿Baʼaxten yaʼab máakoʼobeʼ maʼ tu páaʼtkoʼob u yantal upʼéel kuxtal maas maʼalob?
4, 5. ¿Baʼax talamiloʼob ku aktáantik le máakoʼob bejlaʼoʼ, yéetel baʼax ku beetik yaʼab tiʼ letiʼobiʼ?
4 Le baʼaloʼob ku sen úuchloʼob bejlaʼeʼ ku yeʼesikoʼob taʼaytak u xuʼulsaʼal tiʼ le kʼasaʼan yóokʼol kaabaʼ. Wíinikeʼ táan u aktáantik le nukuch talamiloʼob tu yaʼalaj Jesús yéetel u disipuloʼob kun eʼesik tiʼ yanoʼon tu «tsʼook jaʼaboʼob[eʼ]». Ichil «le baʼax kun mukʼyajtbiloʼ» táakaʼan le baʼateltáambaloʼoboʼ, le wiʼijiloʼ yéetel le u kíilbal luʼumoʼ. Tsʼoʼoleʼ, tuláakal tuʼuxoʼob ku yilaʼaleʼ le máakoʼoboʼ chéen ku kaxkoʼob u yutsiloʼob, maʼ tu yuʼubkoʼob tʼaan yéetel maʼatech u yeʼeskoʼob tsiikil tiʼ Dios. Tuláakal máakoʼob, tak máaxoʼob meyajtik Dioseʼ, kuxaʼanoʼob tiʼ jach «talam kʼiinoʼob» (Mat. 24:3, 6-8, 12; 2 Tim. 3:1-5).
5 Baʼaleʼ óoliʼ tuláakal le máakoʼoboʼ maʼ u yojeloʼob baʼaxten jach yaan talamiloʼob bejlaʼeʼ. Le oʼolal yaʼab tiʼ letiʼobeʼ jach chiʼichnakoʼob tumen saajkoʼob ka úuchuk loob tiʼob wa tiʼ u familiaʼob, yéetel ku jach lúubul u yóoloʼob ken kíimik utúul u láakʼtsiloʼob wa ken u aktáantoʼob uláakʼ yaayaj baʼaloʼob. Tumen maʼ u yojeloʼob jach baʼaxten ku yúuchul le baʼaloʼobaʼ mix u yojloʼob baʼax jeʼel u xuʼulsik tiʼ le talamiloʼobaʼ, maʼ tu páaʼtkoʼob u yantal upʼéel kuxtal maas maʼalob (Efe. 2:12).
6. ¿Baʼaxten «le nojoch Babilonia[oʼ]» maʼ páatchajak u yáantik le máakoʼoboʼ?
6 «Le nojoch Babilonia», wa tuláakal le religionoʼob maʼatech u kaʼanskoʼob u jaajiloʼ, maʼ u yáant le máakoʼoboʼ. Baʼaxeʼ tsʼoʼok u tusik yaʼab tiʼ letiʼobiʼ. Jeʼex utúul x-máani koʼoleleʼ, tsʼoʼok u tusik yéetel tsʼoʼok u controlartik u reyiloʼob «yóokʼol kaab». Tsʼoʼoleʼ ku meyajtiʼ le kaʼansajoʼob maʼ jaajtak yéetel le espiritismo utiaʼal u beetik u jach tsʼáaikuba yaʼab máakoʼob yáanal u páajtalil le gobiernoʼoboʼ. Jeʼex k-ilkoʼ, le maʼ jaajil religionoʼ tsʼoʼok u jach yantal u páajtalil yóokʼol yaʼab máakoʼob tumen maʼatech u beetik baʼax ku yaʼalik le Bibliaoʼ (Apo. 17:1, 2, 5; 18:23).
7. ¿Baʼax ku páaʼtik u maas yaʼabil le máakoʼoboʼ, yéetel bix jeʼel u yáantaʼaloʼobeʼ?
7 Jesuseʼ tu yaʼaleʼ u maas yaʼabil le máakoʼoboʼ ku binoʼob tiʼ le kóokoch bej ku bisaj tiʼ le xuʼulsajiloʼ (Mat. 7:13, 14). Jujuntúul máakoʼobeʼ tiʼ yanoʼob teʼ bejaʼ tumen maʼ tu yóotik u kʼamoʼob le baʼax ku kaʼansik le Bibliaoʼ. Uláakʼoʼobeʼ tiʼ yanoʼobiʼ tumen tsʼoʼok u tuʼusloʼob, yéetel tsʼoʼok u kaʼansaʼaltiʼobeʼ le kuxtal ku biskoʼoboʼ letiʼe utstutʼaan Diosoʼ. Baʼaleʼ maʼ xaaneʼ yaan jujuntúul máakoʼob jeʼel u kʼexik u kuxtaloʼob wa ku yeʼesaʼaltiʼob yéetel le Biblia baʼaxten unaj u beetkoʼoboʼ. Le máaxoʼob kun pʼáatloʼob teʼ Nojoch Babilonia yéetel maʼ ken u yóot u kʼamoʼob baʼax ku kaʼansik le Bibliaoʼ, yaan u xuʼulsaʼaltiʼob le ken kʼuchuk le «nojoch yaayaj óolaloʼ» (Apo. 7:14).
Maʼ u jáawal k-kʼaʼaytaj
8, 9. ¿Baʼax tu beetaj le disipuloʼob teʼ yáax siglo le ka chʼaʼapachtaʼaboʼoboʼ, yéetel baʼaxten?
8 Jesuseʼ tu yaʼaleʼ le máaxoʼob tsaypachtikoʼ yaan u tsʼáaikoʼob ojéeltbil u maʼalob péektsilil le Reinooʼ yéetel yaan xan u kaʼansikoʼob u maasil máakoʼob (Mat. 28:19, 20). Utiaʼal le máaxoʼob meyajtik Diosoʼ, u táakpajloʼob teʼ kʼaʼaytajoʼ upʼéel bix u yeʼeskoʼob u yaabilajoʼob yéetel u fejoʼob tiʼ Jéeoba. Leloʼ ku yeʼesik baʼaxten u yáax disipuloʼob Cristooʼ maʼ jáaw u kʼaʼaytajoʼob kex jach chʼaʼapachtaʼaboʼobiʼ. Baʼaxeʼ tu kʼáatoʼob tiʼ Jéeoba ka tsʼaʼabaktiʼob u muukʼil utiaʼal maʼ u xuʼulul u tseʼektoʼob u maʼalob péektsilil le Reino yéetel x-maʼ saajkililoʼ. Jéeoba túuneʼ tu tsʼáajtiʼob u kiliʼich muukʼ utiaʼal u chúukpajal u yóoloʼob kʼaʼaytaj (Hch. 4:18, 29, 31).
9 ¿Lúub wa u yóol le disipuloʼob le ka joʼopʼ u maas chʼaʼapachtaʼaloʼob yéetel le ka beetaʼab loob tiʼoboʼ? Maʼatech. Koʼox ilik baʼax úuchi. Tumen jach pʼuʼuj u nuuktakil le judíoʼob yoʼolal le kʼaʼaytaj ku beetik le apostoloʼoboʼ, le oʼolal tu beetoʼob u kʼalaʼaloʼob, u jaʼajaʼatsʼaʼaloʼob yéetel tu yaʼaloʼobtiʼobeʼ, wa maʼ tu jáawal u kʼaʼaytajoʼobeʼ yaan u bin kʼaasiltiʼob. Kex beyoʼ, le apostoloʼoboʼ «maʼ jáaw u kaʼansikoʼob yéetel u tseʼektikoʼob u kʼaabaʼ Jesucristoiʼ», tumen u yojloʼobeʼ maas kʼaʼabéet u yuʼubaʼal «u tʼaan Jajal Dios, táanil tiʼ u tʼaan máakoʼob» (Hch. 5:28, 29, 40-42).
10. ¿Baʼax talamiloʼob k-aktáantik bejlaʼeʼ, yéetel baʼax utsiloʼob jeʼel u taasik le maʼalob baʼaloʼob k-beetkoʼ?
10 Óoliʼ tuláakloʼon, le k-meyajtik Dios bejlaʼoʼ, maʼatech k-jaʼajaʼatsʼaʼal mix t-kʼalaʼal ikil k-kʼaʼaytik le maʼalob péektsiloʼ. Baʼaleʼ tuláakloʼon k-aktáantik jejeláas talamiloʼob. Maʼ xaaneʼ, yoʼolal baʼax k-kammaj teʼ Bibliaoʼ k-concienciaeʼ maʼ tu chaʼik k-beetik upʼéel baʼax suuk u beetaʼal tumen u maasil máakoʼoboʼ. K-éet meyajoʼob, k-éet xookoʼob wa k-vecinoʼobeʼ maʼ xaaneʼ ku tuklikoʼob jelaʼanoʼon tiʼ u maasil tumen k-ilik k-nuʼuktik k-kuxtal yéetel baʼax ku yaʼalik le Bibliaoʼ. Baʼaleʼ leloʼ maʼ unaj u beetik u lúubul k-óoliʼ. Teʼ yóokʼol kaab tuʼux le máakoʼob bey ich éekʼjochʼeʼenil yanoʼobeʼ, kʼaʼabéet «[k-]léembaleʼex ichiloʼob jeʼel bix le eekʼoʼob[oʼ]» (Fili. 2:15). Maʼ xaaneʼ, yaan máakoʼob uts u puksiʼikʼaloʼobeʼ ku yilkoʼob le maʼalob baʼaloʼob k-beetkoʼ yéetel ku nojbeʼenkúuntkoʼob Jéeoba (xokaʼak Mateo 5:16).
11. 1) ¿Baʼax ku beetik yaʼab máakoʼob ken u yiloʼob táan k-kʼaʼaytaj? 2) ¿Baʼax talamiloʼob tu aktáantaj apóstol Pablo, yéetel baʼax tu beetaj?
11 Jeʼex tsʼoʼok k-ilkoʼ, kʼaʼabéet maʼ k-chʼaʼik saajkil utiaʼal maʼ u jáawal k-kʼaʼaytik u maʼalob péektsilil le Reinooʼ. Jujuntúul máakoʼob, jeʼex k-láakʼtsiloʼobeʼ yaan u pʼaʼaskoʼonoʼob wa yaan u beetkoʼob uláakʼ baʼaloʼob utiaʼal u yilik u luʼskoʼob k-óol (Mat. 10:36). Le apóstol Pablooʼ yaʼab utéenel jaʼajaʼatsʼaʼab tumen jach chúukpaj u yóol u kʼaʼayt le maʼalob péektsiloʼ. Baʼaleʼ koʼox ilik baʼax tu beetaj: «Kex poʼochʼoʼon yéetel jaʼajaʼatsʼaʼaboʼon[eʼ] [...], Jajal Dioseʼ tu yáantoʼon utiaʼal ka k-tseʼekteʼex le maʼalob péektsiloʼ yéetel tuláakal kʼub óolal, chúumuk tiʼ jumpʼéel nojoch chʼaʼapachtajil» (1 Tes. 2:2). Ka tsʼoʼok u maʼachal apóstol Pabloeʼ, maʼ xaaneʼ maʼ chéen chʼaʼabil tu yilil u seguer u kʼaʼaytik le maʼalob péektsiloʼ tumen pitaʼab óoliʼ tuláakal u nookʼ, jaʼajatsʼaʼabi yéetel kʼaʼal cárcel (Hch. 16:19-24). ¿Baʼaxten maʼ jáaw u kʼaʼaytaj kex beetaʼab u sen muʼyajiʼ? Tumen jach tu jaajil u kʼáat u tsʼoʼokbes kaʼach le meyaj kʼubéentaʼab tiʼ tumen Diosoʼ (1 Cor. 9:16).
12, 13. ¿Baʼax talamiloʼob ku aktáantik jujuntúul sukuʼunoʼob yéetel baʼax tsʼoʼok u beetkoʼob?
12 Uláakʼ baʼax jeʼel xan u beetik u lúubul k-óol kʼaʼaytajeʼ, letiʼe k-ilik máakoʼob maʼ u kʼáat u yuʼuboʼoniʼ wa tumen óoliʼ maʼatech u pʼáatloʼob tu najiloʼob. ¿Baʼax jeʼel k-beetik wa bey u yúuchul teʼ tuʼux k-kʼaʼaytajoʼ? Jeʼel u páajtal k-chʼaʼatukultik k-kʼaʼaytik u maʼalob péektsilil le Reino tiʼ jeʼel máaxak maʼ tu najil yaneʼ. Tsʼoʼoleʼ, maʼ xaaneʼ yaan u kʼaʼabéettal k-kʼexik u yorai k-jóokʼol kʼaʼaytaj wa k-ilik k-kʼaʼaytaj teʼ tuʼux maas yaan máakoʼob jeʼel u yuʼubkoʼoneʼ (ket yéetel Juan 4:7-15; Beetaʼanoʼob [Hechos] 16:13; 17:17).
13 Uláakʼ talamiloʼob ku aktáantik yaʼab sukuʼunoʼobeʼ letiʼe u chan yantal u jaʼabiloʼoboʼ yéetel le kʼojaʼaniloʼ, leloʼobaʼ ku beetik maʼ u jach táakpajloʼob teʼ kʼaʼaytajoʼ. Wa bey u yúuchul techoʼ, maʼ u lúubul a wóol. Jéeobaeʼ jach u yojel bukaʼaj jeʼel u páajtal a beetkeʼ yéetel nojoch baʼal u yilik (xokaʼak 2 Corintoiloʼob 8:12). Kex jeʼel baʼalak talamil ka a aktáant jeʼex le chʼaʼapachtajiloʼ, le kʼojaʼaniloʼ yéetel wa maʼ tu kʼaʼamal le kʼaʼaytaj ka beetkoʼ, beet tuláakal le ku páajtal utiaʼal a tsʼáaik ojéeltbil u maʼalob péektsilil le Reinooʼ (Pro. 3:27; ket yéetel Marcos 12:41-44).
Kʼaʼabéet k-ilik wa táan k-tsʼoʼokbesik le meyaj tsʼaʼantoʼonoʼ
14. ¿Bix tu yeʼesil Pablo tiʼ le sukuʼunoʼob unaj u tsʼoʼokbesaʼal le meeyjil kʼaʼaytajoʼ, yéetel baʼax tsolnuʼukil tu tsʼáaj?
14 Le apóstol Pablooʼ jach tu tsʼáaj u yóol teʼ kʼaʼaytajoʼ yéetel tu yaʼalaj tiʼ le sukuʼunoʼob ka u beetoʼob xan beyoʼ (Hch. 20:20, 21; 1 Cor. 11:1). Utéenjeakileʼ bey tu yaʼalil tiʼ Arquipo ka u beetoʼ. Teʼ carta tu tsʼíibtaj tiʼ le Colosailoʼoboʼ, Pabloeʼ tu yaʼalaj: «Aʼaleʼex tiʼ Arquipo: Ilawil a tsʼoʼokbesik le meyjul ta kʼamaj tiʼ [Jéeobaoʼ]» (Col. 4:17, LTN). Maʼ k-ojel máax Arquipoiʼ mix le talamiloʼob tu aktáantoʼ, baʼaleʼ k-ilkeʼ letiʼe tu kʼamaj u meeyjil le kʼaʼaytajoʼ. Wa tsʼoʼok k-kʼubik k-kuxtal tiʼ Jéeobaeʼ, tsʼoʼok xan k-kʼamik u meeyjil le kʼaʼaytajoʼ. ¿Mantatsʼ wa k-ilik wa táan k-tsʼoʼokbesik le meyajaʼ?
15. ¿Baʼax t-eʼesaj le ka t-kʼubaj k-kuxtal tiʼ Jéeobaoʼ, yéetel baʼax kʼáatchiʼiloʼob maʼalob ka k-beete?
15 Táanil tiʼ k-okjaʼeʼ t-kʼubaj k-kuxtal tiʼ Jéeoba ich upʼéel payalchiʼ t-beetaj yéetel u jaajil k-óol, yéetel bey xan t-eʼesil tiʼ tsʼoʼok k-chʼaʼatukultik beetik baʼax u kʼáatoʼ. Le oʼolaleʼ jach maʼalob ka k-tukult lelaʼ: «¿Jach wa tu jaajil kin wilik in tsʼáaik táanil ichil in kuxtal in beetik baʼax u kʼáat Dios?». U jaajileʼ yaan xan uláakʼ baʼaloʼob u kʼáat Jéeoba ka k-beete, upʼéel tiʼ letiʼobeʼ letiʼe k-tsʼáaik baʼax kʼaʼabéet tiʼ k-familiaoʼ (1 Tim. 5:8). Baʼaleʼ ¿bix u meyajtoʼon le u maasil súutukiloʼob ku pʼáataltoʼonoʼ? ¿Baʼax k-maas tsʼáaik táanil ichil k-kuxtal? (Xokaʼak 2 Corintoiloʼob 5:14, 15.)
16, 17. ¿Baʼax jeʼel u páajtal u chʼaʼatuklik u beetik le táankelem paalaloʼob wa le máaxoʼob minaʼan máax u tséentoʼoboʼ?
16 Xiʼipal wa x-chʼúupal ¿tsʼoʼok wa a kʼubik a kuxtal tiʼ Jéeoba? ¿Taʼaytak wa tech 18 jaʼaboʼob? ¿Tsʼoʼok wa a jóokʼol ta xook wa maʼ yaʼab u bin utiaʼal a beetkiʼ? Maʼ xaaneʼ techeʼ minaʼan máax a tséente. Wa beyoʼ, ¿baʼax ka tuklik a beetik yéetel a kuxtal? Bey tsʼoʼok a waʼalik tiʼ Jéeoba yaan a beetik baʼax u kʼáatoʼ, ¿baʼax jeʼel u yáantkech a tsʼoʼokbes baʼax a waʼalmoʼ? Yaʼab táankelem paalaloʼobeʼ yaan jujumpʼéel baʼax tsʼoʼok u xulik u beetkoʼob utiaʼal u páajtal u beetkubaʼob precursori, yéetel leloʼ tsʼoʼok u taasiktiʼob yaʼab utsiloʼob (Sal. 110:3; Ecl. 12:1).
17 Maʼ xaan xaneʼ, utúul táankelmech ka meyaj bulkʼiin chéen utiaʼal a manik baʼax kʼaʼabéettech yéetel minaʼan máax a tséente. U jaajileʼ ku taasiktech kiʼimak óolal a bin muchʼtáambal yéetel a jóokʼol kʼaʼaytaj le bukaʼaj ku páajtal a beetkoʼ. Baʼaleʼ ¿jeʼel wa u páajtal u yantaltech maas yaʼab kiʼimak óolaleʼ? ¿Tsʼoʼok wa a tuklik a maas táakpajal teʼ kʼaʼaytajoʼ? (Sal. 34:8; Pro. 10:22.) Yaan tuʼuxoʼobeʼ yaʼab áantaj kʼaʼabéet utiaʼal u kʼaʼaytaʼal le maʼalob péektsiloʼ. ¿Jeʼel wa u páajtal a beetik kʼeexoʼob ichil a kuxtal utiaʼal a beetik u maasil teʼ kʼaʼaytajoʼ? ¿Jeʼel wa u páajtal a bin tuʼux maas kʼaʼabéet máaxoʼob kʼaʼaytik u maʼalob péektsilil le Reinooʼ? (Xokaʼak 1 Timoteo 6:6-8.)
18. ¿Baʼax kʼeexiloʼob tu beetaj utúul sukuʼun yéetel u yatan, yéetel baʼax utsiloʼob tsʼoʼok u kʼamikoʼob?
18 Koʼox ilik baʼax tu beetaj Kevin yéetel Elena, máaxoʼob yanoʼob tu luʼumil Estados Unidos yéetel maʼ sen úuch tsʼoʼokok u beeloʼobiʼ. * Jeʼex tuláakal máak ku tsʼoʼokol u beeleʼ, Kevin yéetel Elenaeʼ ku tuklikoʼob kaʼacheʼ kʼaʼabéet u manikoʼob upʼéel u yotochoʼob, yéetel bey tu beetiloʼoboʼ. Tu kaʼatúulal ku meyajoʼob kaʼach bulkʼiin, le oʼolal yaʼab baʼaloʼob yantiʼob. Baʼaleʼ yoʼolal le meyaj yantiʼoboʼ bey xan le ku beetkoʼob ichil u yotochoʼoboʼ, óoliʼ maʼatech u jach jóoʼloʼob kʼaʼaytaj. Tu tsʼáajoʼob cuenta chéen jach u kʼubmaj u yóoloʼob u kaxkoʼob u yantaltiʼob yaʼab baʼaloʼob. Baʼaleʼ le ka tu yiloʼob utúul sukuʼun yéetel u yatan ku beetik u precursoriloʼob jach kiʼimak u yóoloʼob kex chéen upʼíit baʼaloʼob yantiʼobeʼ, tu chʼaʼatuklaj u kʼexkoʼob baʼax ku tsʼáaikoʼob táanil ichil u kuxtaloʼob. Le ka tsʼoʼok u kʼáatkoʼob tiʼ Jéeoba ich payalchiʼ ka nuʼuktaʼakoʼobeʼ, tu konoʼob u yotochoʼoboʼ ka binoʼob kajtal tiʼ upʼéel naj maʼ sen nojchiʼ. Elenaeʼ joʼopʼ u meyaj chéen chúumuk kʼiin, ka tu káajsaj u beetik u precursorai. Tumen jach líiʼsaʼab u yóol yoʼolal bix u bin tiʼ u yatan teʼ kʼaʼaytajoʼ, Kevineʼ tu pʼataj u meyajeʼ ka káaj xan u beetik u precursori. Ka máan kʼiineʼ binoʼob áantaj tiʼ upʼéel luʼumil yaan sudamérica tuʼux jach kʼaʼabéet j-kʼaʼaytajoʼobiʼ. Kevineʼ ku yaʼalik: «Desde ka tsʼoʼok k-beeleʼ yantoʼon kiʼimak óolal, baʼaleʼ le ka joʼopʼ k-tsʼáaik táanil k-maas meyajtik Jéeobaeʼ, maas jach nojoch le kiʼimak óolal yantoʼonoʼ» (xokaʼak Mateo 6:19-22).
19, 20. ¿Baʼaxten u kʼaʼaytaʼal le maʼalob péektsiloʼ letiʼe meyaj maas kʼaʼanan ku beetaʼal bejlaʼoʼ?
19 U kʼaʼaytaʼal u maʼalob péektsilil le Reinooʼ letiʼe meyaj maas kʼaʼanan ku beetaʼal tiʼ tuláakal yóokʼol kaab bejlaʼoʼ (Apo. 14:6, 7). ¿Baʼaxten? Tumen ku kiliʼichkúuntik u kʼaabaʼ Jéeoba (Mat. 6:9). Tsʼoʼoleʼ, le baʼax ku kaʼansik le Bibliaoʼ ku yáantik le máakoʼob u maas maʼalobkíint bix u kuxtaloʼob yéetel jeʼel xan u beetik u salvarkubaʼobeʼ. Cada jaʼaboʼobeʼ u milesi máakoʼob ku kʼamkoʼob le maʼalob péektsiloʼ. Baʼaleʼ jeʼex tu yaʼalil apóstol Pabloeʼ: «¿Bix kun u yuʼubiloʼob wa minaʼan mix máak utiaʼal tseʼektiktioʼob le maʼalob péektsiloʼ?» (Rom. 10:14, 15). ¿Máasaʼ jach talam ka béeychajak wa minaʼan mix máak ku kʼaʼaytaj? Le oʼolaleʼ ¿baʼaxten maʼ ta chʼaʼatuklik a beetik tuláakal le ku páajtal utiaʼal a tsʼoʼokbesik le meyaj tsʼaʼantechoʼ?
20 Yaan uláakʼ bix jeʼel k-áantik le máakoʼob u naʼatoʼob baʼax ku chíikbesik le talam kʼiinoʼob kuxlikoʼonaʼ yéetel ka u yiloʼob baʼax jeʼel u yúuchultiʼob wa maʼ tu chʼaʼatukultkoʼob maʼalob baʼax ken u beetoʼobeʼ. ¿Bixi? Letiʼe k-maas maʼalobkíintik bix k-kaʼansajoʼ. Teʼ tuláakʼ xookoʼ yaan u tsolaʼal bix jeʼel k-beetik lelaʼ.
[Tsolajiloʼob]
^ xóot’ol 18 Kʼexaʼan le kʼaabaʼobaʼ.
¿Baʼax jeʼel a núukikeʼ?
• ¿Baʼaxten jach kʼaʼabéet áantik k-éet máakil?
• ¿Bix jeʼel k-aktáantik le talamiloʼob jeʼel u beetik u jáawal k-kʼaʼaytajoʼ?
• ¿Bix jeʼel k-tsʼoʼokbesik u meeyjil le kʼaʼaytaj t-kʼamajoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 5]
Maʼ unaj k-chʼaʼik saajkil kʼaʼaytaj le ken k-aktáant chʼaʼapachtajiliʼ
[U tsolajil le oochel teʼ táan juʼun 7]
¿Baʼax jeʼel a beetik wa óoliʼ mix máak ku pʼáatal tu yotoch teʼ tuʼux ka kʼaʼaytajoʼ?