Kʼaʼabéet k-maas maʼalobkíintik bix k-kaʼansaj
Kʼaʼabéet k-maas maʼalobkíintik bix k-kaʼansaj
«Tseʼekt le maʼalob péektsiloʼ [...]. Eʼes u siʼipiloʼob, kʼeyoʼob yéetel tsolxikintoʼob yéetel tuláakal chúukaʼan óolal bey xan yéetel kaʼansaj.» (2 TIM. 4:2.)
1. ¿Baʼax meyajil tu tsʼáaj Jesús tiʼ u disipuloʼob, yéetel bix tu yeʼesiltiʼob unaj u beetkoʼob?
KEX yaʼab máakoʼob tu tsʼakaj yéetel yaʼab milagroʼob tu beetaj ka taal way Luʼumeʼ, Jesuseʼ maʼ kʼaj óoltaʼab yoʼolal le baʼaloʼobaʼ, baʼaxeʼ kʼaj óoltaʼab bey utúul jach maʼalob j-kaʼansajeʼ (Mar. 12:19; 13:1). Utiaʼal letiʼeʼ maas jach kʼaʼanan kaʼach u kʼaʼaytik u maʼalob péektsilil le Reinooʼ, yéetel letiʼe baʼax xan maas kʼaʼanan utiaʼal le máaxoʼob tsaypachtik teʼ kʼiinoʼobaʼ. Bejlaʼeʼ kʼubéentaʼantoʼon ka k-kaʼans le máakoʼob u tsʼoʼokbesoʼob tuláakal le baʼax u yaʼalmaj Jesusoʼ (Mat. 28:19, 20).
2. ¿Baʼax unaj k-beetik utiaʼal k-kʼaʼaytik le maʼalob péektsiloʼ?
2 Utiaʼal k-beetik le meyaj kʼubéentaʼantoʼonoʼ, cada kʼiin ku máaneʼ kʼaʼabéet k-ilik maas maʼalobkíintik bix k-kaʼansaj. Apóstol Pabloeʼ le ka tsʼíibnaj tiʼ Timoteo, utúul u yéet kʼaʼaytajeʼ, tu yaʼalajtiʼ u kʼaʼananil u beetikuba maʼalob j-kaʼansaj, tu yaʼalajtiʼ: «Kanáantaba teech yéetel kanáant baʼax ka kaʼansik, jeetsʼel pʼáaten xan tiʼ tuláakal. Wa ka beetik lelaʼ, bíin a [salvartaba] teech yéetel bíin a [salvart] xan le máaxoʼob uʼuyikechoʼ» (1 Tim. 4:16). Ka tʼaanaj tiʼ u yúuchul kaʼansajeʼ, Pabloeʼ maʼ táan kaʼach u yaʼalik ka chupaʼak u tuukul le j-xoknáal yéetel yaʼab baʼaloʼoboʼ. Utúul maʼalob j-kaʼansajeʼ ku yilik ka kʼuchuk tu puksiʼikʼal le j-xoknáal le baʼax ku kaʼansiktiʼoʼ utiaʼal ka u tsʼáaj ichil u kuxtal, lelaʼ upʼéel baʼal maʼ chéen chʼaʼabil u beetaʼaliʼ. Le oʼolaleʼ, ¿bix jeʼel k-maas maʼalobkíintik k-kaʼansaj ken k-kʼaʼayt u maʼalob péektsilil le Reinooʼ? (2 Tim. 4:2.)
Bix jeʼel k-maas maʼalobkíintik bix k-kaʼansajeʼ
3, 4. 1) ¿Bix jeʼel k-maas maʼalobkíintik k-kaʼansajeʼ? 2) Le muchʼtáambal Kaambalil utiaʼal Kaʼansajoʼ, ¿bix u yáantkoʼon utiaʼal k-maas maʼalobkíintik bix k-kaʼansaj?
3 Utiaʼal k-maas maʼalobkíintik k-kaʼansajeʼ kʼaʼabéet k-xakʼalxook, k-ilik bix u kaʼansaj u maasil yéetel k-ilik beetik le baʼax k-kanik tiʼoboʼ. Utiaʼal k-maas maʼalobkíintik bix k-kʼaʼaytik le maʼalob péektsiloʼ jach kʼaʼanan k-beetik le óoxpʼéel baʼaloʼobaʼ. Kʼaʼabéet k-xakʼalxook, baʼaleʼ táanil tiʼ k-beetkeʼ unaj k-payalchiʼ utiaʼal k-naʼatik tubeel le baʼax ken k-xokoʼ (xokaʼak Salmo 119:27, 34). Kʼaʼabéet k-ilik bix u kaʼansaj le máaxoʼob úuch joʼopʼok u meyajkoʼob Jéeoba utiaʼal k-beetik xan jeʼex u beetkoʼoboʼ. Yéetel unaj xan k-ilik k-beetik le baʼaxoʼob k-kanik utiaʼal k-maas maʼalobkíintik bix k-kaʼansajoʼ (Luc. 6:40; 1 Tim. 4:13-15).
4 Jéeobaeʼ letiʼe maas jach Maʼalob J-kaʼansajoʼ, yéetel ku meyajtiʼ u kaajal utiaʼal u kaʼansiktoʼon bix unaj k-kʼaʼaytik le maʼalob péektsiloʼ (Isa. 30:20, 21). Teʼ múuchʼuliloʼoboʼ, cada semanaeʼ ku yantal le muchʼtáambal ku kʼaabaʼtik Kaambalil utiaʼal Kaʼansaj, lelaʼ ku meyaj utiaʼal u yáantaʼal le máaxoʼob ku táakpajloʼoboʼ ka u kan bix jeʼel u kʼaʼaytkoʼob maas maʼalob u Reino Diosoʼ. Teʼ muchʼtáambalaʼ letiʼe Biblia ku meyaj utiaʼal u yúuchul kaʼansajoʼ. Le Bibliaoʼ maʼ chéen ku yaʼaliktoʼon baʼax unaj k-kaʼansikiʼ, baʼaxeʼ ku yeʼesik xan bix jeʼel k-maas maʼalobkíintik k-kaʼansajeʼ. Utiaʼal ka k-maas maʼalobkíint bix k-kaʼansajeʼ, tu muchʼtáambalil Kaambalil utiaʼal Kaʼansajeʼ mantatsʼ ku kʼaʼajsaʼaltoʼon kʼaʼabéet tiʼ le Biblia u taal le baʼax k-kaʼansikoʼ, k-kanik beet kʼáatchiʼob, k-beetik upʼéel bix maas séeb jeʼel u naʼataʼaleʼ yéetel k-eʼesik jach tu jaajil k-kʼáat áant le máakoʼoboʼ. Beoraaʼ yaan k-xakʼaltik cada upʼéel tiʼ le baʼaloʼobaʼ yéetel yaan xan k-ilik bix jeʼel k-beetik u kʼuchul tu puksiʼikʼal le j-xoknáaloʼob le baʼax k-kaʼansiktiʼoboʼ.
Kʼaʼabéet teʼ Biblia u taal le baʼax k-kaʼansikoʼ
5. ¿Tuʼux unaj k-chʼaʼik le baʼax k-kaʼansikoʼ, yéetel baʼaxten?
5 Tuláakal le baʼax tu kaʼansaj Jesús, le maas nojoch j-kaʼansaj tsʼoʼok u yantal way Luʼumeʼ, teʼ Biblia tu chʼaʼajoʼ (Mat. 21:13; Juan 6:45; 8:17). Maʼ tu kaʼansaj baʼaloʼob chéen tu tuukul taaliʼ, baʼaxeʼ mantatsʼ tu kaʼansaj le baʼax aʼalaʼabtiʼ tumen le Máax túuxtoʼ (Juan 7:16-18). Toʼoneʼ k-ilik beetik xan jeʼex tu beetil Jesusoʼ. Le oʼolaleʼ, tuláakal baʼax k-aʼalik ken kʼaʼaytajnakoʼon yéetel ken kaʼansajnakoʼoneʼ kʼaʼabéet teʼ Biblia u taaloʼ (2 Tim. 3:16, 17). Kex jach yaan u naʼat máakeʼ, maʼ unaj u kaʼansik baʼax ku taal tu tuukuliʼ, baʼaxeʼ unaj u kaʼansik baʼax ku yaʼalik le Bibliaoʼ, tumen chéen letiʼ maas yaan u páajtalil yéetel letiʼ aʼalik baʼax unaj u beetaʼal. Le oʼolaleʼ utiaʼal k-áantik le j-xoknáal u naʼat jeʼel baʼaxak táan k-kaʼansiktiʼeʼ, maʼalob ka k-aʼaltiʼ ka u xok le baʼax ku yaʼalik le Bibliaoʼ (xokaʼak Hebreob 4:12).
6. ¿Baʼax unaj u beetik le máax ku kaʼansaj utiaʼal ka u naʼat le j-xoknáal le baʼax ku kaʼansiktiʼoʼ?
6 Baʼaleʼ lelaʼ maʼ u kʼáat u yaʼal wa maʼ ken u líiʼsuba máak utiaʼal u tsʼáaik xookiʼ. Baʼaxeʼ táanil tiʼ u bineʼ unaj u yéeyik le versiculoʼob ken u xok letiʼoʼ yéetel le ken u yaʼal tiʼ u j-xoknáal ka u xokoʼ. Maas maʼalob ka xokaʼak le tekstoʼob ku jach chíikbeskoʼob baʼaxten k-creertik wa baʼaxoʼ. Yéetel unaj u yilaʼal xan ka u naʼat tubeel le j-xoknáal cada upʼéel tiʼ le tekstoʼob ku xokaʼaloʼoboʼ (1 Cor. 14:8, 9).
Kʼaʼabéet k-kanik beet kʼáatchiʼob
7. ¿Baʼaxten jach maʼalob ka meyajnaktoʼon kʼáatchiʼob ken kaʼansajnakoʼon?
7 U meyajtoʼon maʼalob le kʼáatchiʼoboʼ yaan u yáantaj utiaʼal ka kʼuchuk tu puksiʼikʼal le j-xoknáal le baʼax k-kaʼansiktiʼoʼ yéetel yaan u yáantaj xan utiaʼal ka tuukulnak tiʼ le baʼax ku kanikoʼ. Le oʼolaleʼ ken k-xok upʼéel tekstoeʼ maas maʼalob ka k-beet kʼáatchiʼob tiʼ le j-xoknáal utiaʼal ka u tsol bix u naʼatikoʼ ke ka k-jáan tsol tiʼ baʼax u kʼáat u yaʼale. Yaan kʼiineʼ tak chéen yéetel upʼéel kʼáatchiʼ ka k-beet tiʼeʼ yaan k-áantik u naʼat tubeel le baʼax k-tsoliktiʼoʼ, baʼaleʼ yaan kʼiin xaneʼ yaan u kʼaʼabéettal k-beetik yaʼab kʼáatchiʼob tiʼ. Ken k-áant le j-xoknáal utiaʼal ka maas táakpajak ichil le xookoʼ, yaan u kʼuchul u naʼat baʼaxten bey unaj u naʼataʼal upʼéel wa baʼaxoʼ yéetel maas jeʼel u kʼuchul u creerteʼ (Mat. 17:24-26; Luc. 10:36, 37).
8. ¿Bix jeʼel u páajtal k-ilik baʼax yaan tu puksiʼikʼal le máaxoʼob k-tsʼáaik xook tiʼoboʼ?
8 Le jóoʼsaʼaniloʼob ku meyajtoʼon utiaʼal k-kaʼansajeʼ ku taasik kʼáatchiʼob yéetel u núukiloʼob. Lelaʼ ku yáantaj utiaʼal ka séeb kaxtaʼak tumen le j-xoknáal u núukil le kʼáatchiʼoboʼ. Baʼaleʼ utúul máax jach maʼalob u kaʼansajeʼ maʼ chéen ku beetik le kʼáatchiʼob yanoʼob teʼ librooʼ. Maʼ xaaneʼ wa táan u xookoʼob tiʼ baʼax yaan yil yéetel le núupkʼebanoʼ jeʼel u páajtal u kʼáatik tiʼe j-xoknáal ka u tsol baʼax ku yaʼalik le Biblia yoʼolal lelaʼ (1 Cor. 6:18). Wa le máax ku kaʼansaj ku yilik maʼ u suʼlakkíintik le j-xoknáal ken u beet kʼáatchiʼobtiʼeʼ, yaan u yojéeltik jach baʼax ku tuklik yoʼolal le núupkʼebanoʼ. Maʼ xaaneʼ jeʼel u páajtal u kʼáatiktiʼeʼ: «¿Baʼaxten ku yaʼalik le Biblia maʼ uts ka núup chilak máak yéetel máax maʼ u núupiʼ? ¿Bix a wilik le baʼax ku yaʼalik le Biblia yoʼolal lelaʼ? A tuklikeʼ, ¿jeʼel wa u taasik yaʼab utsiloʼob u nuʼuktik u kuxtal máak yéetel le baʼax ku yaʼalik Diosoʼ?». Maʼ xaaneʼ le baʼax ken u núuk le j-xoknáaloʼ yaan u yeʼesik jach baʼax yaan tu puksiʼikʼal (xokaʼak Mateo 16:13-17).
Kʼaʼabéet k-kaʼansaj upʼéel bix maas séeb jeʼel u naʼataʼaleʼ
9. ¿Bix unaj k-kaʼansik le baʼaxoʼob ku yaʼalik le Bibliaoʼ?
9 Le baʼaxoʼob ku kaʼansik le Bibliaoʼ, u jaajileʼ jach maʼ talam u naʼataʼaliʼ. Baʼaleʼ le máaxoʼob tiʼ k-tsʼáaik xookoʼ maʼ xaaneʼ tusaʼanoʼob tumen u kaʼansajoʼob le religionoʼob minaʼan u jaajil tiʼoboʼ. Le oʼolal unaj k-ilik k-kaʼansik le baʼax ku yaʼalik le Biblia upʼéel bix maʼ talam jeʼel u naʼatal yéetel jach séeb jeʼel u kanaʼaleʼ. Le máaxoʼob jach maʼalob u kaʼansajoʼoboʼ bey u beetikoʼoboʼ. Le oʼolal maʼ unaj k-tsolik uláakʼ baʼaloʼob mix baʼal yaan yil yéetel le baʼax k-kaʼanskoʼ mix k-tsolik jach tuláakal baʼax táakaʼan ichil le teksto k-xokikoʼ. Baʼaxeʼ chéen unaj k-tsolik le baʼax kʼaʼanan utiaʼal u naʼataʼal le baʼax k-kaʼansikoʼ. Jeʼex kun bin u maas kanik le j-xoknáal baʼax ku yaʼalik le Bibliaoʼ bey xan kun bin u maas naʼatik u jach taʼakbil baʼaloʼob Dios (Heb. 5:13, 14).
10. ¿Baʼax kun áantkoʼon k-il jaypʼéel xóotʼoloʼob unaj k-xokik yéetel le j-xoknáaloʼ?
10 ¿Jaypʼéel xóotʼoloʼob unaj u xokaʼal? Lelaʼ yaan yil yéetel le bukaʼaj jeʼel u páajtal u naʼatik le j-xoknáal yéetel le bukaʼaj jeʼel u páajtal u tsolik le máax tsʼáaik le xookoʼ bey xan le bukaʼaj súutukil yantiʼoboʼ. Baʼax kʼaʼabéet k-kaxtikeʼ k-áantik le j-xoknáal ka muʼukʼanchajak u fejoʼ. Le oʼolaleʼ unaj k-tsʼáaik tiempo tiʼ utiaʼal u xook, u naʼatik le baʼax ku xokikoʼ yéetel u kʼamik le baʼax ku yaʼalik le Bibliaoʼ. Maʼ unaj k-xokik maas yaʼab xóotʼoloʼob tiʼ le ku páajtal u naʼatik le j-xoknáaloʼ baʼaleʼ leloʼ maʼ u kʼáat u yaʼal wa unaj xan k-xokik jach chéen upʼíitiʼ. Wa le j-xoknáal tsʼoʼok u naʼatik le baʼax k-tsolik tiʼoʼ unaj k-máan tuláakʼ xóotʼol wa tuláakʼ xook (Col. 2:6, 7).
11. ¿Baʼax k-kanik tiʼ bix úuchik u kaʼansaj apóstol Pablo?
11 Apóstol Pabloeʼ maʼ talam kaʼach u naʼataʼal le baʼaxoʼob ku kʼaʼaytikoʼ. Kex jach kaʼanchajaʼan kaʼach u xookeʼ maʼ meyajnajtiʼ tʼaanoʼob talam u naʼataʼaliʼ (xokaʼak 1 Corintoiloʼob 2:1, 2). Tumen jach maʼ talam le kaʼansajoʼob ku taasik le Bibliaoʼ yaʼab máakoʼob ku kʼamkoʼob yéetel ku taasik kiʼimak óolal tiʼob; tsʼoʼoleʼ le kaʼansajoʼobaʼ maʼ chéen máakoʼob kaʼanchajaʼan u xookoʼob jeʼel u naʼatkoʼobeʼ (Mat. 11:25; Hch. 4:13; 1 Cor. 1:26, 27).
Kʼaʼabéet k-áantik le j-xoknáal u yil le utsiloʼob ku taasik le baʼax ku kanikoʼ
12, 13. ¿Baʼax unaj u péeksik le j-xoknáal u beet baʼax ku kanikoʼ? Aʼal upʼéel baʼax maʼalob ka u beete.
12 Utiaʼal ka u tsʼáa ichil u kuxtal le j-xoknáal le baʼax ku kanikoʼ, kʼaʼabéet k-ilik u kʼuchul tu puksiʼikʼal. Unaj u naʼatikeʼ, le baʼax ku kankoʼ kʼaʼabéet u tsʼáaik ichil u kuxtal yéetel jeʼel u taasik yaʼab utsiloʼob tiʼeʼ. Unaj xan u naʼatikeʼ wa ku nuʼuktikuba yéetel le tsolnuʼukoʼob ku tsʼáaik le Bibliaoʼ jach yaan u bin utsil tiʼ ichil u kuxtal (Isa. 48:17, 18).
13 Koʼox aʼalikeʼ táan k-xokik Hebreob 10:24, 25, tuʼux ku yaʼalaʼal tiʼ le máaxoʼob meyajtik Diosoʼ, unaj u binoʼob teʼ muchʼtáambaloʼob utiaʼal ka muʼukʼaʼanchajak u fejoʼob, utiaʼal ka u paklan eʼesoʼob yaabilaj yéetel utiaʼal ka u paklan líiʼs u yóoloʼob. Wa maʼ káajak u bin le j-xoknáal teʼ muchʼtáambaloʼoboʼ, jeʼel u páajtal k-tsoliktiʼ bix u beetaʼaloʼobeʼ yéetel baʼaxoʼob ku kaʼansaʼaliʼ. Jeʼel xan u páajtal k-aʼaliktiʼeʼ le muchʼtáambaloʼoboʼ táakaʼan ichil le adoración k-tsʼáaik tiʼ Diosoʼ yéetel jach yaʼab utsiloʼob ku taasiktoʼon k-biniʼ. Tsʼoʼoleʼ maʼalob ka k-invitart ka xiʼik t-éetel teʼ muchʼtáambaloʼ. Baʼaleʼ le j-xoknáaloʼ maʼ unaj u tsʼoʼokbesik baʼax ku yaʼalik le Biblia chéen utiaʼal u kiʼimakkúuntik u yóol le máax tsʼáaik xook tiʼoʼ, baʼaxeʼ unaj u beetik tumen u kʼáat u beet baʼax utstutʼaan Dios (Gal. 6:4, 5).
14, 15. 1) ¿Baʼax jeʼel u kanik le j-xoknáal yoʼolal Jéeobaoʼ? 2) ¿Baʼax utsiloʼob ken u kʼam le j-xoknáal wa ku kʼaj óoltik jach bix Jéeobaoʼ?
14 Wa le j-xoknáaloʼob ku kankoʼob yéetel ku tsʼáaikoʼob ichil u kuxtaloʼob le baʼax ku yaʼalik le Bibliaoʼ yaan u jach kʼaj óoltkoʼob Jéeoba yéetel yaan u jach kʼuchul u yaabiltoʼob (Isa. 42:8). Jéeobaeʼ utúul Taatatsil jach yaan u yaabilaj, letiʼ Beetmail yéetel letiʼ u Yuumil tuláakal baʼal. Tsʼoʼoleʼ ku yáantik le máaxoʼob yaabiltmail yéetel meyajtik utiaʼal ka kʼuchuk u kʼaj óoltoʼob jach bix letiʼ yéetel tak baʼaxoʼob jeʼel u páajtal u beetkeʼ (xokaʼak Éxodo 34:6, 7). Le maʼ yaʼab u bin utiaʼal u jóoʼsik le israelitaʼob tu luʼumil Egiptooʼ, Jéeobaeʼ tu yaʼalaj tiʼ Moisés: «Teneʼ yaan in kʼuchul in beetimba le baʼax kʼaʼabéet in kʼuchul in beetimbaeʼ» (Éxo. 3:13-15, NM). Yéetel le tʼaanoʼobaʼ, Jéeobaeʼ táan kaʼach u yaʼalik yaan u beetik tuláakal baʼax kʼaʼabéet utiaʼal u béeykuntik baʼax u tukulmaj yoʼolal u kaajal. Bey túunoʼ, le israelitaʼoboʼ kʼuch u kʼaj óoltoʼob Jéeobaeʼ utúul Máax ku tsʼáaik salvación, ku baʼatel yoʼolal u kaajal, ku tsʼáaik baʼax kʼaʼabéet, ku béeykuntik baʼax ku yaʼalik yéetel ku beetik uláakʼ baʼaloʼob (Éxo. 15:2, 3; 16:2-5; Jos. 23:14).
15 Maʼ xaaneʼ le máaxoʼob tiʼ k-tsʼáaik xookoʼ maʼ kun tsikbaloʼob yéetel Jéeoba yéetel maʼ ken u yiloʼob nukuch baʼaloʼob jeʼex úuchik yéetel Moiseseʼ. Baʼaleʼ ken péeksaʼakoʼob tumen u fejoʼob yéetel u yaabilajoʼob tiʼ Dios u beetoʼob baʼax ku yaʼalik le Bibliaoʼ, yaan u yilkoʼob u kʼaʼananil u kʼáatikoʼob tiʼ Jéeoba ka áantaʼakoʼob utiaʼal maʼ u chʼaʼikoʼob saajkil, ka tsʼaʼabaktiʼob naʼatil yéetel ka nuʼuktaʼakoʼob. Ken u yiloʼob túun bix u yáantaʼaloʼobeʼ, yaan u kʼuchul u kʼaj óoltoʼob Jéeobaeʼ utúul Máax ku kanáantik le máaxoʼob meyajtikoʼ, ku tsʼáaik tuláakal baʼax kʼaʼabéettiʼob, ku tsʼáaik maʼalob tsolnuʼuk tiʼob yéetel jeʼel u páajtal u jach kʼubik u yóol máak tiʼeʼ (Sal. 55:22; 63:7; Pro. 3:5, 6).
Kʼaʼabéet k-eʼesiktiʼob jach k-kʼáat áantoʼob
16. Kex maʼ k-jach ojel kaʼansajeʼ, ¿baʼax jeʼel u yáantaj utiaʼal ka kʼuchuk tu puksiʼikʼal le j-xoknáal le baʼax ku kanikoʼ?
16 Wa ka wilik maʼ jach a wojel kaʼansaj jeʼex a kʼáateʼ, maʼ u lúubul a wóol. Jéeoba yéetel Jesuseʼ letiʼob nuʼuktik le kaʼansaj ku beetaʼal bejlaʼaʼ way yóokʼol kaabeʼ (Hch. 1:7, 8; Apo. 14:6). Letiʼobeʼ yaan u yáantkoʼonoʼob utiaʼal ka kʼuchul tu puksiʼikʼal le máakoʼob le baʼax k-kaʼansiktiʼoboʼ (Juan 6:44). Wa k-yaabiltmaj le j-xoknáal yéetel wa k-eʼesiktiʼ jach tu jaajil k-kʼáat áanteʼ, jeʼel u natsʼkuba tiʼ Jéeoba kex maʼ k-jach ojel kaʼansajiʼ. Apóstol Pabloeʼ u yojel kaʼach kʼaʼabéet u yaabiltaʼal le máaxoʼob ku kaʼansaʼaloʼoboʼ yéetel letiʼeʼ bey tu beetiloʼ (xokaʼak 1 Tesalonicailoʼob 2:7, 8).
17. ¿Bix jeʼel k-eʼesik jach tu jaajil k-kʼáat áant cada utúul tiʼ le máaxoʼob k-tsʼáaik xookoʼ?
17 Toʼon xaneʼ jeʼel u páajtal k-eʼesik jach tu jaajil k-kʼáat áant cada utúul tiʼ le máaxoʼob k-tsʼáaik xook tiʼob wa k-jóoʼsik u súutukil utiaʼal k-maas kʼaj óoltkoʼob. Ken tsikbalnakoʼon tu yéeteloʼob yoʼolal le nuʼuktajiloʼob ku tsʼáaik le Bibliaoʼ, yaan k-ojéeltik bix kuxlikoʼob yéetel baʼax talamiloʼob ku máanskoʼob. Maʼ xaaneʼ yaan k-ilik táan u tsʼáaikoʼob ichil u kuxtaloʼob jujumpʼéel tiʼ le baʼaxoʼob ku kanikoʼoboʼ, yéetel yaan xan jujumpʼéel kʼeexoʼob kʼaʼabéet u beetkoʼob. Wa k-tsoliktiʼob bix jeʼel u nuʼuktik u kuxtaloʼob yéetel baʼax ku yaʼalik le Bibliaoʼ, yaan k-eʼesik k-yaabilmoʼob yéetel yaan k-áantkoʼob u tsaypachtoʼob Cristo yéetel u jaajil u yóoloʼob.
18. ¿Baʼaxten kʼaʼanan ka payalchiʼinakoʼon yéetel le j-xoknáal bey xan k-kʼáatik ka áantaʼak tumen Jéeobaoʼ?
18 Baʼaleʼ upʼéel baʼax maas jach kʼaʼabéet k-beetkeʼ letiʼeʼ k-payalchiʼ yéetel le j-xoknáaloʼ yéetel k-kʼáatik tiʼ Jéeoba ka u yáante. Le j-xoknáaloʼ kʼaʼabéet u tsʼáaik cuenta jach k-kʼáat áant u kʼaj óolt Jéeoba, u natsʼuba tiʼ yéetel u nuʼukt u kuxtal yéetel le baʼax ku yaʼalik le Bibliaoʼ (xokaʼak Salmo 25:4, 5). Wa k-kʼáatik tiʼ Jéeoba ka u yáant le j-xoknáal u tsʼáa ichil u kuxtal le baʼax ku kanikoʼ, le máax k-kaʼansikoʼ yaan u yilik kʼaʼanan u beetik le baʼax ku yaʼalik Diosoʼ (Sant. 1:22). Tsʼoʼoleʼ ken u yuʼub le payalchiʼob k-beetik yéetel u jaajil k-óoloʼ yaan xan u kanik bix unaj u payalchiʼ. ¿Máasaʼ jach ku taasiktoʼon kiʼimak óolal k-áantik le j-xoknáal u maas natsʼuba tiʼ Diosoʼ?
19. ¿Baʼax kʼáatchiʼil kun núukbil teʼ tuláakʼ xookoʼ?
19 Jach ku taasiktoʼon kiʼimak óolal k-ojéeltik yaan maas tiʼ seis millones J-jaajkunajoʼob táan u yilik u maas maʼalobkíintik bix u «kaʼansaj[oʼob]», utiaʼal u yáantkoʼob le máakoʼob uts u puksiʼikʼaloʼob u beetoʼob le baʼax tu kaʼansaj Cristooʼ. Baʼaleʼ ¿baʼax utsiloʼob tsʼoʼok u taasik le kʼaʼaytaj ku beetkoʼoboʼ? Le kʼáatchiʼaʼ yaan u núukaʼal teʼ tuláakʼ xookoʼ.
¿Kʼajaʼan wa tech?
• ¿Baʼaxten kʼaʼanan k-maas maʼalobkíintik bix k-kaʼansaj?
• ¿Baʼaxoʼob kun áantkoʼon k-maas maʼalobkíint bix k-kaʼansaj?
• Kex maʼ jach k-ojel kaʼansajeʼ, ¿baʼax jeʼel u yáantaj utiaʼal ka kʼuchuk tu puksiʼikʼal le j-xoknáal le baʼax ku kanikoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
¿Tsʼoʼok wa u káajal a táakpajal teʼ Kaambalil utiaʼal Kaʼansajoʼ?
[U tsolajil le oochel teʼ táan juʼun 10]
¿Baʼaxten maʼalob ka k-aʼal tiʼe j-xoknáal ka u xok teʼ Biblia le baʼax k-kaʼansiktiʼoʼ?
[U tsolajil le oochel teʼ táan juʼun 12]
Payalchiʼinen yéetel a j-xoknáal yéetel kʼáat xan ka áantaʼak tumen Jéeoba