Ku náajmatikoʼob u bisaʼaloʼob tu sayabiloʼob u jaʼil kuxtal
Ku náajmatikoʼob u bisaʼaloʼob tu sayabiloʼob u jaʼil kuxtal
«Le tama[noʼ] [...] letiʼ bíin u kanáantoʼob yéetel bíin u bisoʼob tiʼ u sayabiloʼob u jaʼil kuxtal.» (APO. 7:17.)
1. ¿Bix u kʼaabaʼintaʼal teʼ Biblia le máaxoʼob kanáantik u baʼalubaʼob Cristo way Luʼumeʼ, yéetel baʼax meyajil tsʼaʼabtiʼob tumen Jesús?
LE BIBLIAOʼ ku yaʼalikeʼ le máaxoʼob yéeyaʼanoʼob utiaʼal u binoʼob kaʼan kanáantik u baʼalubaʼob Cristo way Luʼumeʼ letiʼe «palitsil chúukpajaʼan u yóol yéetel yaan u naʼa[toʼ]». Ka taal Jesús tu jaʼabil 1918 u yil baʼax ku beetik le «palitsi[loʼ]», tu yileʼ jach u kʼubmaj u yóol u «tsʼáa janal [...] tu yorai» jeʼex aʼalaʼabiktiʼoʼ, le oʼolal Jesuseʼ yéetel kiʼimak óolal tu «tsʼáa u kanáant tuláakal baʼax yaan tiʼ[oʼ]» (xokaʼak Mateo 24:45-47). Le oʼolaleʼ táanil tiʼ u binoʼob kaʼaneʼ, le sukuʼunoʼob yéeyaʼanoʼoboʼ ku tsʼáaikoʼob baʼax kʼaʼabéet tiʼ u sukuʼunoʼob kun pʼáatloʼob kuxtal way Luʼumeʼ.
2. ¿Baʼaxoʼob táakaʼan ichil u baʼalubaʼob Jesucristo?
2 Utúul tsʼuuleʼ, yaan u páajtalil tiʼ u meyaj u baʼalubaʼob jeʼex u tuklik maas maʼalobeʼ. Ichil le baʼaxoʼob yaan tiʼ Jesucristooʼ, táakaʼan tuláakal le baʼaloʼob yaan way Luʼum yaan yil yéetel le Reinooʼ. Ichil lelaʼ tiʼ yaan le «yaʼabkach máakoʼob» tsʼaʼab u yil le apóstol Juan ichil upʼéel náayoʼ, letiʼeʼ ku yaʼalik: «Paakatnajeneʼ ka tin wilaj yaʼabkach máakoʼob taaljaʼanoʼob tiʼ tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob, waʼalakbaloʼob aktáan tiʼ le jalach kʼáancheʼoʼ yéetel aktáan tiʼ le Tamanoʼ; tu yoʼolal sen yaʼab le múuchʼkabiloʼ mix máak ku páajtal u xokik jaytúuloʼob, búukbesaʼanoʼob yéetel sak búuk yéetel u machmajoʼob u leʼ xaʼan» (Apo. 7:9).
3, 4. ¿Baʼax jatsʼuts páajtalil tsʼaʼan tiʼ le yaʼabkach máakoʼoboʼ?
3 Le yaʼabkach máakoʼob wa le «uláakʼ tamanoʼob» tu chʼaʼachiʼitaj Jesusoʼ, yaan u kuxtaloʼob utiaʼal minaʼan u xuul tiʼ upʼéel paraíso way Luʼumeʼ (Juan 10:16). Le yaʼabkach máakoʼobaʼ jach u yojloʼob yaan u bisaʼaloʼob «tiʼ u sayabiloʼob u jaʼil kuxtal» tumen Jesús yéetel yaan u choʼobol «tuláakal u jaʼil u yichoʼob» tumen Dios. Le oʼolal letiʼobeʼ «u pʼoʼomaj u nookʼoʼob yéetel u sakkuntmajoʼob xan yéetel u kʼiʼikʼel le Tamanoʼ» (Apo. 7:14, 17). Tumen ku tsʼáaik u fejoʼob tiʼ u kuxtal tu kʼubaj Jesusoʼ, tu táan Dioseʼ bey saktak u nookʼoʼobeʼ. Yéetel jeʼex úuchik yéetel Abrahameʼ, Dioseʼ ku kʼamikoʼob bey u amigoʼobeʼ yéetel bey máakoʼob jach tojoʼobeʼ.
4 Tumen tsʼoʼok u kʼaʼamloʼob bey máakoʼob tojoʼob tumen Dioseʼ, le yaʼabkach máakoʼobaʼ jach u yojloʼob yaan u kanáantaʼaloʼob utiaʼal maʼ u yúuchultiʼob mix baʼal ken xuʼulsaʼak tiʼ le kʼasaʼan yóokʼol kaab teʼ nojoch yaayaj óolaloʼ (Sant. 2:23-26). Ku páajtal u natsʼkubaʼob tiʼ Jéeoba yéetel wa ku chúukpajal u yóoloʼobeʼ yaan u pʼáatloʼob kuxaʼanil ken tsʼoʼokok le Armagedonoʼ (Sant. 4:8; Apo. 7:15). Baʼaleʼ letiʼobeʼ maʼ tu juunaloʼob ku nuʼuktikubaʼobiʼ. Baʼaxeʼ ku meyajtkoʼob Dios yéetel kiʼimak óolal yáanal u nuʼuktaj Jesucristo yéetel le «palitsil chúukpajaʼan u yóol yéetel yaan u naʼa[toʼ]».
5. Le yaʼabkach máakoʼoboʼ, ¿bix u yáantkoʼob le sukuʼunoʼob kun binoʼob kaʼanoʼ?
5 Le máaxoʼob yéeyaʼanoʼob utiaʼal u binoʼob kaʼanoʼ, mantatsʼ ku aktáantkoʼob chʼaʼapachtajiloʼob ku taal tiʼ u kʼasaʼan yóokʼol kaab Satanás. Baʼaleʼ ku yáantaʼaloʼob tiʼ jujumpʼéel meyajoʼob tumen le uláakʼ tamanoʼoboʼ. Kex tumen le máaxoʼob kun pʼáatloʼob kuxtal way Luʼum cada jaʼab táan u bin u maas yaʼabtaloʼobeʼ, u yalab le sukuʼunoʼob kun binoʼob kaʼaneʼ maʼ yaʼab pʼaatloʼobiʼ. Tumen jach upʼíitoʼobeʼ maʼ tu páajtal u yantaloʼob tiʼ cada upʼéel tiʼ le cien mil múuchʼuliloʼob utiaʼal ka u kanáantoʼoboʼ. Le oʼolal ichil le yaʼabkach máakoʼoboʼ ku yéeyaʼal sukuʼunoʼob noʼojaʼantakoʼob utiaʼal ka u yáantoʼob u nuʼuktoʼob le múuchʼuliloʼoboʼ. Letiʼobeʼ ku yáantajoʼob utiaʼal u kanáantaʼal le u millonesi máakoʼob kʼubéentaʼan tiʼ le «palitsil chúukpajaʼan u yóol yéetel yaan u naʼa[toʼ]».
6. Le profeta Isaíasoʼ, ¿bix tu yaʼalil kun áantbil le máaxoʼob yéeyaʼanoʼob tumen le uláakʼ tamanoʼoboʼ?
6 Le profeta Isaíasoʼ tʼaanaj tiʼ bix kun áantbil le sukuʼunoʼob yéeyaʼanoʼob tumen le uláakʼ tamanoʼoboʼ, letiʼeʼ tu yaʼalaj: «Yuumtsileʼ ku yaʼalik tiʼ Israel: U j-kolnáaliloʼob Egipto [maʼatech u náajaloʼob, NM], u j-koonoloʼob Etiopía yéetel u kajnáaliloʼob Sabaʼ máaxoʼob kaʼanal baʼaloʼob, bíin tʼonlakoʼob ta táan, bíin a palitsiltoʼob; bíin xiʼikoʼob ta paach» (Isa. 45:14). Le máaxoʼob kun pʼáatloʼob way Luʼumeʼ, ikil u chaʼik u nuʼuktaʼaloʼob tumen le «palitsil» yéetel tumen le Cuerpo Gobernanteoʼ, jeʼel u páajtal u yaʼalaʼal bey táan u binoʼob tu paachoʼobeʼ. Jeʼex le j-kolnáaloʼob maʼatech u náajloʼoboʼ, le uláakʼ tamanoʼoboʼ ku xupik u muukʼoʼob yéetel baʼaxoʼob yantiʼob utiaʼal u yáantajoʼob ka kʼaʼaytaʼak le maʼalob péektsil tu kʼubéentaj Cristo tiʼ le yéeyaʼanoʼoboʼ (Hch. 1:8; Apo. 12:17).
7. ¿Baʼax tiaʼal ku kaʼansaʼal le yaʼabkach máakoʼob bejlaʼoʼ?
7 Le táan u yáantik le sukuʼunoʼob yéeyaʼanoʼoboʼ, le yaʼabkach máakoʼoboʼ táan xan u kaʼansaʼaloʼob u yáantoʼob u maasil máakoʼob kun kuxtaloʼob way Luʼum ken tsʼoʼokok le Armagedonoʼ. Le oʼolal letiʼobeʼ unaj u muʼukʼantal u fejoʼob yéetel u beetkoʼob yéetel kiʼimak óolal le baʼax ku yaʼalaʼaltiʼob tumen Cristooʼ. Tiʼ tuláakloʼon ku tsʼaʼabaltoʼon u páajtalil k-eʼesik wa jach tu jaajil jeʼel k-chaʼik k-nuʼuktaʼal tumen Jesucristoeʼ. Wa bejlaʼaʼ k-eʼesik yantoʼon fe yéetel k-kʼubik óol beet baʼax ku yaʼaliktoʼoneʼ, k-eʼesik yaan xan k-tsʼoʼokbesik baʼax ken u yaʼaltoʼon teʼ túumben yóokʼol kaaboʼ.
Le yaʼabkach máakoʼoboʼ ku yeʼeskoʼob yantiʼob fe
8, 9. ¿Bix jejeláas u yeʼesik u fe le yaʼabkach máakoʼoboʼ?
8 Le yaʼabkach máakoʼoboʼ jejeláas bix u yeʼesikoʼob yantiʼob fe. Yáaxeʼ, letiʼe ken u yáantoʼob le sukuʼunoʼob yéeyaʼanoʼob u kʼaʼaytoʼob u maʼalob péektsilil le Reinooʼ (Mat. 24:14; 28:19, 20). U kaʼapʼéeleʼ, letiʼe ken u tsʼáaubaʼob yéetel kiʼimak óolal yáanal u nuʼuktaj le Cuerpo Gobernanteoʼ (Heb. 13:17; xokaʼak Zacarías 8:23).
9 U yóoxpʼéeleʼ, letiʼe ken u nuʼukt u kuxtaloʼob yéetel baʼax ku yaʼalik le Bibliaoʼ; ken u beetoʼob lelaʼ ku yeʼeskoʼob xan ku yáantkoʼob le sukuʼunoʼob yéeyaʼanoʼoboʼ. Ku yilik u yeʼeskoʼob «yaakunaj, kiʼimak óolal, jeetsʼel óolal, chúukaʼan óolal, maʼalob bisajbáail, utsil puksiʼikʼal, [fe], kabal óolal yéetel muʼukʼaʼan óolal» (Gal. 5:22, 23). Teʼ kʼiinoʼobaʼ maʼatech u jach ilaʼal le jatsʼuts modosoʼobaʼ, baʼaxeʼ maas jach suuk u yilaʼal «le kʼaakʼas tsʼíibolaloʼoboʼ». Kex beyoʼ le yaʼabkach máakoʼoboʼ ku kanáantik maʼ u lúubloʼob tiʼ «núupkʼeban, kʼóokʼol kuxtal, x-maʼ subtalil, u [adorartaʼal] beetbil diosoʼob, pulyaʼajil, pʼeklantáambal, paklan baʼatelil, loolob tuukul, tsʼíikilil, chʼiʼilantáambal, jatslantáambal, tuusil kaʼansaj, loolob tsʼíibolal, kíimsaj wíinikil, káaltalil, kʼaakʼas kʼiimbesajil, yéetel uláakʼ baʼaloʼob jeʼel bix leloʼobaʼ» (Gál. 5:19-21, LTN).
10. ¿Baʼax tsʼoʼok u chʼaʼatuklik u beetik le yaʼabkach máakoʼoboʼ?
10 Tumen kʼeban wíinikoʼoneʼ ku talamtaltoʼon k-eʼesik le jatsʼuts modosoʼob ku taal tiʼ le kiliʼich muukʼoʼ, k-kanáantik maʼ k-lúubul tiʼ le kʼaakʼas tsʼíibolaloʼoboʼ yéetel tiʼ le baʼaxoʼob ku beetik u kʼasaʼan yóokʼol kaab Satanasoʼ. Baʼaleʼ kex tumen yaan kʼiin k-lúubul tiʼ u tsʼíibolaloʼob k-bakʼel yéetel k-muʼyajtik uláakʼ talmiloʼobeʼ, maʼatech k-chaʼik u jach lúubul k-óol ka tak xuʼuluk k-meyajtik Dios yéetel k-eʼesik yaabilaj tiʼ. Jach k-ojel Jéeobaeʼ yaan u kanáantik le yaʼabkach máakoʼob ken taalak le nojoch yaaj óolaloʼ.
11. ¿Baʼaxoʼob tsʼoʼok u meyaj tiʼ Satanás utiaʼal u beetik u xuʼulul u meyajtaʼal Dios?
11 Kex beyoʼ maʼatech u xuʼulul k-kanáantikba, tumen k-ojel le Kʼaasilbaʼaloʼ jach u pʼekmoʼon yéetel mantatsʼ ku kaxtik bix jeʼel u lúuʼskoʼoneʼ (xokaʼak 1 Pedro 5:8). Tiʼ letiʼeʼ, tsʼoʼok u meyaj le máaxoʼob ku xúumpʼatkoʼob u jaajiloʼ bey xan uláakʼ baʼaloʼob utiaʼal u beetik k-tuklik maʼ jaaj le baʼax ku kaʼansiktoʼon le palitsil chúukpajaʼan u yóoloʼ. Baʼaleʼ le baʼaloʼobaʼ maʼ u beetoʼob k-náachtal tiʼ Jéeobaiʼ. Tsʼoʼok xan u beetik u yantal chʼaʼapachtajil, yéetel kex tumen yaan kʼiin ku beetik maʼ u chaʼabal u kʼaʼaytaʼal le maʼalob péektsiloʼ, le sukuʼunoʼoboʼ ku maas muʼukʼaʼantal u fejoʼob tu yoʼolal. Le oʼolal bejlaʼeʼ, tiʼ Satanaseʼ maases ku meyaj le u lúubul u yóol máakoʼ. Letiʼeʼ ku tuklikeʼ yéetel lelaʼ yaan u beetik u xuʼulul k-meyajtik Dios. Le sukuʼunoʼob teʼ yáax siglooʼ jach u yojloʼob baʼax jeʼel u yúuchul wa ku lúubul u yóol máakeʼ. Le oʼolal aʼalaʼabtiʼob ka tuukulnakoʼob «tiʼ Jesús, máax tu mukʼyajtaj jach yaʼab chʼaʼapʼektajil tu kʼab le j-kʼeban máakoʼoboʼ». Baʼaleʼ ¿baʼaxten unaj u beetkoʼob lelaʼ? Utiaʼal «maʼ [u kaʼanloʼob] mix u lúubul [u yóoloʼob]» (Heb. 12:3).
12. ¿Baʼax tsolnuʼukoʼob ku tsʼáaik le Biblia jeʼel u yáantik le máaxoʼob luubul u yóoloʼoboʼ?
12 ¿Yaan wa ora ka wuʼuyik bey maʼ taak a seguer a meyajtik Dioseʼ? ¿Yaan wa kʼiin ka wuʼuyik bey maʼatech a beetik baʼax maʼalobeʼ? Wa bey a wuʼuykabaoʼ maʼ a chaʼik tiʼ Satanás u beetik u lúubul a wóol utiaʼal u xuʼulul a meyajtik Dios. Ilawil a xokik le Biblia sáamsamaloʼ, payalchiʼinen mantatsʼ, ilawil a bin tiʼ tuláakal le muchʼtáambaloʼoboʼ yéetel maʼ a náachtal tiʼ le sukuʼunoʼoboʼ. Tuláakal lelaʼ yaan u beetik u muʼukʼaʼantal a fe yéetel yaan u yáantkech utiaʼal maʼ u lúubul a wóol. Jéeobaeʼ u yaʼalmaj yaan u tsʼáaik «túumben muukʼ» tiʼ le máaxoʼob meyajtikoʼ, yéetel tuláakal baʼax ku yaʼalikeʼ ku béeykuntik (xokaʼak Isaías 40:30, 31). Kʼub a wóol a kʼaʼayt le maʼalob péektsiloʼ; maʼ a táakpajal tiʼ le náaysaj óoloʼob ku luʼskoʼob yaʼab tiempo tiʼ máakoʼ; tsʼáa a wóol a wáant u maasil. Beyoʼ yaan u yantaltech u muukʼil utiaʼal a aktáantik le talamiloʼob ku beetkoʼob u lúubul a wóoloʼ (Gal. 6:1, 2).
Ku jóoʼloʼob teʼ nojoch yaayaj óolaloʼ yéetel ku yokloʼob tiʼ upʼéel túumben yóokʼol kaab
13. ¿Baʼax meyajil ken u beet le máaxoʼob kun pʼáatloʼob kuxaʼanil ken tsʼoʼokok le Armagedonoʼ?
13 Ken tsʼoʼokok Armagedoneʼ yaan u kaʼa kuxkíintaʼal le máaxoʼob tu beetoʼob baʼaloʼob kʼaastak tumen maʼ tu kʼaj óoltoʼob Jéeobaiʼ, yéetel yaan u yáantaʼaloʼob u yojéeltoʼob baʼax u kʼáat ka beetaʼak (Hch. 24:15). Maʼ chéen yaan u kaʼansaʼaltiʼob baʼaxten tu kʼubaj u kuxtal Jesusiʼ, baʼaxeʼ yaan xan u kaʼansaʼaloʼob u tsʼáa u fejoʼob tiʼ le baʼax tu beetoʼ, tumen chéen bey jeʼel u jóoʼskoʼob utsil tiʼoʼ. Yaan u kʼaʼabéettal u pʼatkoʼob tuláakal le baʼaxoʼob maʼ jaajtak kaʼansaʼantiʼoboʼ, bey xan le kuxtalil yantiʼob kaʼachoʼ. Tsʼoʼoleʼ, yaan xan u kʼaʼabéettal u búukbeskubaʼob yéetel le jatsʼuts modosoʼob yaan tiʼ le máaxoʼob meyajtik Diosoʼ (Efe. 4:22-24; Col. 3:9, 10). Le máaxoʼob kun pʼáatloʼob kuxaʼanil ken tsʼoʼokok le Armagedonoʼ yaan u yantal yaʼab meyaj u beetoʼob. ¡Jach túun yaan u taasik kiʼimak óolal u yáantaʼal le máakoʼobaʼ, tumen le meyajaʼ yaan u beetaʼal tiʼ upʼéel Luʼum tuʼux minaʼan le talamiloʼob ku aktáantaʼal bejlaʼoʼ!
14, 15. ¿Baʼax ken k-kaʼans tiʼ le utsul máakoʼob kun kaʼa kuxkíintbiloʼoboʼ, yéetel letiʼobeʼ baʼax ken u kaʼansoʼobtoʼon?
14 Le máaxoʼob jach chúukpaj u yóol u meyajtoʼob Dios táanil tiʼ u taal Cristo way Luʼumeʼ, ken kaʼa kuxlakoʼobeʼ yaʼab baʼaloʼob unaj u kankoʼob xan. Yaan u yojéeltkoʼob máax le Mesías aʼalaʼab kun taaloʼ, yéetel maʼ béeychaj u kʼaj óolkoʼoboʼ. Teʼ kʼiinoʼob kuxaʼanoʼob kaʼachoʼ tu yeʼesoʼob jach tu jaajil u kʼáatoʼob ka kaʼansaʼakoʼob tumen Jéeoba. ¿Máasaʼ jach yaan u taasiktoʼon kiʼimak óolal k-tsolik tiʼ Daniel bix úuchik u béeychajal le profecíaʼob tu tsʼíibtaj yéetel maʼ kʼuch u naʼatoʼ? (Dan. 12:8, 9.)
15 Kex le utsul máakoʼob kun kaʼa kuxkíintbiloʼob yaʼab baʼax ken k-kaʼansiktiʼoboʼ, letiʼobeʼ yaʼab baʼaloʼob xan ken u kaʼansoʼobtoʼon. Yaan u tsolkoʼobtoʼon le baʼaloʼob maʼatech u jach tsolaʼaloʼob ichil le Bibliaoʼ. ¡Chéen tukult bukaʼaj kiʼimak óolal ken u taastoʼon k-uʼuyik u tsikbaltiktoʼon Juan Bautista yoʼolal Jesús, u primo! Tuláakal le baʼaloʼob ken k-kan tiʼ le utsul máakoʼobaʼ yaan u yáantkoʼon k-maas naʼat le baʼaxoʼob ku kaʼansik le Bibliaoʼ. Le máaxoʼob meyajt Dios úuchjeakil tsʼoʼok u kíimloʼoboʼ yéetel le máaxoʼob meyajtik ku kíimloʼob xan teʼ kʼiinoʼobaʼ yaan u yantaltiʼob «jumpʼéel kuxtal [maas] maʼalob». Tuláakloʼobeʼ tu meyajtoʼob Jéeoba tiʼ le kʼasaʼan yóokʼol kaab yaan yáanal u nuʼuktaj Satanasoʼ. ¡Jach túun yaan u taasik kiʼimak óolaltiʼob ken u chʼaʼajoʼoltoʼob u meyajtkoʼob Dios teʼ túumben yóokʼol kaab, tuʼux maʼ kun yantal le talamiloʼob ku aktáantaʼal bejlaʼoʼ! (Heb. 11:35; 1 Juan 5:19.)
16. Jeʼex u yaʼalik le Bibliaoʼ, ¿baʼax kun úuchul tu Kʼiinil le Pʼis óoloʼ?
16 Tu Kʼiinil le Pʼis óoloʼ, le Biblia yéetel le rolloʼob kun jeʼebiloʼoboʼ yaan u meyajoʼob utiaʼal u pʼis óoltaʼal le máaxoʼob kun kuxtaloʼob way Luʼumeʼ. Lelaʼ yaan u beetaʼal utiaʼal u yilaʼal wa ku náajaltikoʼob u yantaltiʼob le kuxtal minaʼan u xuuloʼ (xokaʼak Apocalipsis 20:12, 13). Tu Kʼiinil le Pʼis óoloʼ, cada utúul tiʼ le máaxoʼob kun kuxtaloʼob way Luʼumeʼ yaan u yeʼesikoʼob wa chéen Dios unaj u gobernartik tuláakal baʼal. Yaan u yeʼesikoʼob wa u kʼáatoʼob antal yáanal u Reino Dios yéetel ka bisaʼakoʼob tumen le Taman «tiʼ u sayabiloʼob u jaʼil kuxtal», wa yaan u tsʼáaikubaʼob tu contra le Reinooʼ yéetel maʼ ken u chaʼa u nuʼuktaʼaloʼob tumen le Tamanoʼ (Apo. 7:17; Isa. 65:20). Utiaʼal u tsʼoʼokbal u Kʼiinil le Pʼis óoloʼ, tuláakal máak túun ken u yeʼes tu tséel máax tu chʼaʼatuklaj u tsʼáaikuba, tumen teʼ kʼiinoʼob jeʼeloʼ maʼ kun antal kʼeban mix kʼasaʼanil. Mix máak ken u yaʼal wa maʼ toj bix úuchik u pʼis óoltik máak Jéeobaiʼ. Chéen le máaxoʼob maʼ ken u yóot u yutskíint u kuxtaloʼob kun xuʼulsbiltiʼoboʼ (Apo. 20:14, 15).
17, 18. ¿Baʼaxten le yéeyaʼanoʼob yéetel le yaʼabkach máakoʼoboʼ u kʼáatoʼob ka séeb kʼuchuk u Kʼiinil le Pʼis óoloʼ?
17 U yalab le máaxoʼob yéeyaʼanoʼob utiaʼal u binoʼob kaʼaneʼ, tsʼoʼok yeʼeskoʼob ku náajaltikoʼob u yokloʼob tu reino Dios, le oʼolal jach táan u páaʼtkoʼob u binoʼob kaʼan utiaʼal u gobernarkoʼob le Luʼum tu Kʼiinil le Pʼis óoloʼ. ¡Jach túun nojoch baʼal utiaʼaloʼob leloʼ! Yéetel le baʼax ku páaʼtikoʼobaʼ, le áantkoʼob u tsʼoʼokbesoʼob le baʼax tu yaʼalaj le apóstol Pedro tiʼ le sukuʼunoʼob yéeyaʼanoʼob teʼ yáax siglooʼ: «Táan óolteʼex a tʼilkúunskeʼex a tʼanaʼanileʼex yéetel a yéeyaʼanileʼex; tumen wa ka a béeteʼex le baʼaloʼobaʼ, mix bikʼin bíin lúubkeʼex. Tumen beyaʼ bíin piʼjeʼebekteʼex joonaj utiaʼal a wokoleʼex tiʼ u minaʼan u xuul [reino] k-Yuumtsil yéetel [k-salvador] Jesucristo» (2 Ped. 1:10, 11, LTN).
18 Le yaʼabkach máakoʼoboʼ, jach kiʼimak u yóol u yojéeltkoʼob le yéeyaʼanoʼoboʼ yaan u gobernarkoʼob le Luʼumaʼ. Tsʼoʼoleʼ jach u chʼaʼatukulmoʼob u yáantkoʼob tiʼ tuláakal le ku páajtaleʼ. Tumen u yaabilmoʼob Dioseʼ, u kʼáat u beetoʼob tuláakal le ku páajtal utiaʼal u meyajkoʼob teʼ kʼiinoʼobaʼ. Yéetel tu Kʼiinil le Pʼis óol ken bisaʼakoʼob tumen Jesús «tiʼ u sayabiloʼob u jaʼil kuxta[leʼ]», yaan u tsʼoʼokbeskoʼob yéetel kiʼimak óolal le baʼaxoʼob ken u yaʼal Jéeobaoʼ. ¡Jach túun yaan u kiʼimaktal u yóoloʼob ken aʼalaʼaktiʼob ku náajmatkoʼob u meyajkoʼob Jéeoba way Luʼum utiaʼal kʼiinoʼob minaʼan u xuul! (Rom. 8:20, 21; Apo. 21:1-7.)
¿Kʼajaʼan wa tech?
• ¿Baʼax táakaʼanoʼob ichil le baʼaxoʼob yaan tiʼ Jesucristo way Luʼumeʼ?
• Le yaʼabkach máakoʼoboʼ, ¿bix u yáantik le máaxoʼob yéeyaʼanoʼoboʼ?
• ¿Baʼax jatsʼuts páajtalil yaan tiʼ le yaʼabkach máakoʼoboʼ, yéetel baʼax ku páaʼtkoʼob?
• ¿Bix a wuʼuykaba ken tuukulnakech tiʼ u Kʼiinil le Pʼis óoloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
Le yaʼabkach máakoʼoboʼ tsʼoʼok u pʼoʼik u nookʼoʼob yéetel tsʼoʼok u sakkuntkoʼob yéetel u kʼiʼikʼel le Tamanoʼ
[U tsolajil le oochel teʼ táan juʼun 27]
¿Baʼax a tukulmaj a kʼáatik tiʼ le máaxoʼob utsoʼob kun kaʼa kuxtaloʼoboʼ?