Le cristianoʼoboʼ ku tíitaʼaloʼob jeʼex u beetaʼal tiʼ le trigooʼ

TÁANIL tiʼ u kíimsaʼaleʼ, Jesuseʼ tu yaʼalaj tiʼ u disipuloʼob: «Satanaseʼ tsʼoʼok u kʼáatikeʼex utiaʼal u tíiteʼex jeʼel bix u beetaʼal tiʼ trigoeʼ» (Luc. 22:31). ¿Baʼax tu yóotaj u yaʼal Jesús yéetel le tʼaanoʼobaʼ?

Tu kʼiiniloʼob Jesuseʼ, jach yaʼab tiempo yéetel yaʼab meyaj ku bisik u joʼochol le trigooʼ. Yáaxeʼ, ku jochkoʼob le trigooʼ, tsʼoʼoleʼ ku pʼuʼuchul wa ku meyajtiʼob upʼéel nuʼukul ku jíitaʼal tumen wakaxoʼob utiaʼal u juʼuchʼul le trigo paʼteʼ yéetel u chʼilbiloʼ. Ku tsʼoʼoleʼ ku jóoʼsaʼaleʼ yéetel ku puʼulul kaʼanal utiaʼal u saltaʼal yéetel u bisaʼal u sojlil tumen le iikʼoʼ. Tu tsʼookeʼ ku tsʼaʼabal tiʼ upʼéel cernidor yéetel ku tíitaʼal utiaʼal ka pʼáatak chéen le trigooʼ.

Jeʼex tu yaʼalil Jesusoʼ, Satanaseʼ tu beetaj u yantal yaʼab talamiloʼob tiʼ le cristianoʼob kuxlajoʼob teʼ yáax siglooʼ yéetel láayliʼ bey u beetik teʼ kʼiinoʼobaʼ (Efe. 6:11). U jaajileʼ maʼ tuláakal le talamiloʼob Satanás beetik u yantaltoʼonoʼ (Ecl. 9:11). Baʼaleʼ yaʼab baʼax ku beetik utiaʼal u náachkuntkoʼon tiʼ Jéeoba. Maʼ xaaneʼ ku beetik k-tsʼíiboltik ayikʼaliloʼob, k-náaysik óol yéetel baʼaloʼob kʼaastak wa tak ka lúubkoʼon tiʼ baʼaloʼob subtsiltakoʼob. Maʼ xaan xaneʼ, jeʼel u beetik u yaʼalaʼaltoʼon tumen k-éet meyajoʼob, k-éet xookoʼob wa k-láakʼtsiloʼob maʼ j-jaajkunajoʼob ka kaʼanchajak k-xook wa ka k-kaxt upʼéel maas maʼalob meyajeʼ. Jeʼel u beetik xan ka chʼaʼapachtaʼakoʼon utiaʼal ka xuʼuluk k-meyajtik Jéeobaeʼ. Yéetel le baʼaloʼob ku beetik Satanasaʼ bey táan u tíitkoʼon utiaʼal ka náachakoʼon tiʼ Jéeobaeʼ.

¿Bix jeʼel k-kanáantikba tiʼ le baʼaxoʼob ku beetik Satanás utiaʼal u náachkuntkoʼon tiʼ Diosoʼ? U jaajileʼ Satanaseʼ maas yaan u páajtalil tiʼ toʼon le beetik séeb jeʼel u beetik k-lúubul tiʼ baʼax kʼaaseʼ. Baʼaleʼ Jéeobaeʼ maas yaan u páajtalil tiʼ letiʼ. Le oʼolaleʼ unaj k-kʼubik óol tiʼ Jéeoba, k-kʼáatik tiʼ ka u tsʼáatoʼon le naʼat kʼaʼabéettoʼon utiaʼal k-aktáantik le talamiloʼoboʼ yéetel unaj k-beetik tuláakal le baʼax ku yaʼaliktoʼonoʼ. Letiʼ túuneʼ yaan u tsʼáaiktoʼon le muukʼ kʼaʼabéettoʼon utiaʼal maʼ k-lúubul tiʼ u táabsajiloʼob le Kʼaasilbaʼaloʼ (Sal. 25:4, 5).

Ken máankoʼon tiʼ talamiloʼobeʼ kʼaʼabéet k-kanik kʼaj óolt «baʼax le utsoʼ bey xan baʼax le kʼaasoʼ», beyoʼ maʼ ken u tusoʼon Satanás (Heb. 5:13, 14). Yéetel u yáantaj Jéeobaeʼ jeʼel u páajtal k-beetik lelaʼ yéetel jeʼel xan u páajtal k-chʼaʼatuklik maʼalob baʼax ken k-beeteʼ, baʼaleʼ maʼ unaj k-tuʼubsikeʼ le baʼax ken k-chʼaʼatukult k-beetkoʼ unaj k-ilik tsʼoʼokbesik kex jeʼel baʼalak ka úuchkeʼ. Wa k-beetik le baʼax ku yaʼaliktoʼon Jéeobaoʼ, letiʼeʼ yaan u yáantkoʼon utiaʼal ka xiʼiktoʼon utsil (Efe. 6:10).

Satanaseʼ yaan u yilik u tíitkoʼon jeʼex u beetaʼal tiʼ le trigooʼ. Baʼaleʼ Jéeobaeʼ yaan u yáantkoʼon utiaʼal u muʼukʼantal k-fe yéetel utiaʼal maʼ k-lúubul tiʼ u táabsajiloʼob Satanás (1 Ped. 5:9). Le Bibliaoʼ ku yaʼaliktoʼon: «Tokabaʼex tiʼ kʼaasilbaʼal, letiʼ xaneʼ bíin áalkabnakteʼex» (Sant. 4:7).