Le túumben revista U Pʼíich Tulumil Kanan utiaʼal le múuchʼuliloʼ

LE REVISTA ka xokikaʼ, letiʼe yáax tiʼ U Pʼiich Tulumil Kanan kun jóoʼsbil utiaʼal le múuchʼuliloʼ. Beoraaʼ k-kʼáat ka a wojéelt máakalmáak le baʼaloʼob ken u taas le revistaaʼ.

Le túumben revista utiaʼal le múuchʼuliloʼ, yaan u jóoʼsaʼal chéen utiaʼal u j-jaajkunajoʼob Jéeoba yéetel utiaʼal le máaxoʼob ku xokkoʼob le Biblia táan u beetkoʼob baʼax ku yaʼalikoʼ. Yaan u jóokʼol utéen cada mes yéetel yaan u taasik cuatro wa cinco xookoʼob utiaʼal xakʼaltbil teʼ muchʼtáambaloʼoboʼ. U listai le xookoʼob kun xakʼaltbil teʼ múuchʼuliloʼ yaan u chíikpajal tu yáax táan juʼunil. Le revistaaʼ maʼ ken u taas jejeláas oocheloʼob teʼ tu yáax táan juʼuniloʼ, tumen maʼ utiaʼal kʼaʼaytbil jeʼex le uláakʼoʼ.

Teʼ táan juʼun 2 tiʼ ku yaʼalaʼal baʼax u beelal le xookoʼob kun xakʼaltbil teʼ múuchʼuliloʼ. Lelaʼ jach yaan u yáantik le sukuʼunoʼob kun nuʼuktik u xookil U Pʼíich Tulumil Kanan le ken u líiʼsubaʼob utiaʼal ka u nuʼuktoʼob tubeel u xookil le revistaoʼ. Teʼ táan juʼun 2 tiʼ xan ku chíikpajal u listai le uláakʼ xookoʼob jach jeʼel u yáantik le sukuʼunoʼoboʼ.

Yaan a wilkeʼ le xookoʼob kun xakʼaltbil teʼ múuchʼuliloʼ maʼ jach yaʼab táan juʼunoʼob ku taasik jeʼex kaʼacheʼ. Lelaʼ yaan u tsʼáaik u súutukil utiaʼal ka xakʼaltaʼak le tekstoʼob maas kʼaʼabéet u xokaʼal teʼ tu Xookil U Pʼíich Tulumil Kanan teʼ muchʼtáambaloʼ. Le oʼolal maʼalob ka a xok tuláakal le tekstoʼob ken a líiʼsabaoʼ. Yaan a wilkeʼ táanil tiʼ jujumpʼéel tekstoʼobeʼ tsʼíibtaʼan le tʼaan «xokaʼak», leloʼ u kʼáat u yaʼaleʼ kʼaʼabéet u xakʼalxoktaʼal teʼ tu Xookil U Pʼíich Tulumil Kananoʼ. Wa yaan u súutukileʼ, jeʼel xan u páajtal u xoʼokol le uláakʼ tekstoʼob ku taaskoʼ. Tiʼ jujumpʼéel xookoʼobeʼ, táanil tiʼ uláakʼ tekstoʼobeʼ yaan u chíikpajal le tʼaan «ket yéetel». Leloʼobaʼ maʼ kun jach kʼaʼabéettal u xokaʼaloʼob teʼ muchʼtáambaloʼob jeʼex le uláakʼoʼoboʼ, tumen maʼ tu jach tʼaanoʼob tiʼ le baʼax táan u kaʼansaʼaloʼ. Baʼaxeʼ ku meyajoʼob utiaʼal ka maas ojéeltaʼak tiʼ baʼax táan u tʼaan le baʼax ku xokaʼaloʼ. Le oʼolal ken a líiʼsabaeʼ jach maʼalob xan ka a xokoʼob. Wa maʼalob a wilkeʼ jeʼel u páajtal a táakbeskoʼob ichil le núukoʼob ken a tsʼáa teʼ muchʼtáambaloʼ.

Le bukaʼaj meyaj beetaʼab tumen u j-jaajkunajoʼob Jéeoba ku tsʼaʼabal k-ojéelt cada jaʼaboʼ maʼ kun kaʼa chíikpajal teʼ revista U Pʼíich Tulumil Kananoʼ. Teʼ jaʼab 2008 yaan u joʼopʼol u chíikpajal tiʼ upʼéel u tipʼaʼanil K-meeyjil tiʼ le Reinooʼ, yéetel teʼ Anuariooʼ. Baʼaleʼ jeʼex t-aʼaliloʼ, le revistaaʼ yaan u taasik xan uláakʼ xookoʼob jeʼel u yáantik le sukuʼunoʼoboʼ. Kex maʼ kun xakʼaltbiloʼob teʼ muchʼtáambaloʼoboʼ, maʼalob ka a xokeʼ, tumen lelaʼ táakaʼan ichil le janal ku tsʼáaik «le palitsil chúukpajaʼan u yóol yéetel yaan u naʼat[oʼ]» (Mat. 24:45-47).

U tsʼookeʼ, k-kʼáat ka a wojéelteʼ le revista utiaʼal kʼaʼaytbil yéetel le utiaʼal le múuchʼuliloʼ maʼ kaʼapʼéel jejeláas revistaʼobiʼ, baʼaxeʼ chéen kaʼapʼéel bix jóoʼsaʼanil le revista U Pʼíich Tulumil Kanan. Táan u kʼaʼaytik u Reino Jéeoba. Le oʼolal le chan xook yaan teʼ táan juʼun 2 tuʼux ku tsolaʼal baʼax u beelal le revista U Pʼíich Tulumil Kananoʼ keet kun jóokʼol tiʼ le kaʼapʼéel bix kun jóoʼsbil revistaʼobaʼ. Yéetel le xook ku kʼaabaʼtik «¿Kʼajaʼan wa tech?» kun jóokʼol teʼ revista utiaʼal le múuchʼuliloʼ, yaan u taasik jujumpʼéel baʼaxoʼob jóokʼoʼob teʼ kaʼapʼéel revistaʼobaʼ.

Desde tu jaʼabil 1879, le revista bejlaʼa ku kʼaabaʼtik ich maya U Pʼíich Tulumil Kananoʼ, tsʼoʼok u kʼaʼaytik tuláakal baʼax yaan yil yéetel u Reino Dios, kex yaan kʼiinoʼob jach yaan baʼateltáambaloʼob, óotsilil yéetel chʼaʼapachtajil. K-kʼáatik tiʼ Jéeoba u yáantaj utiaʼal ka seguernak u kʼaʼaytaʼal le Reino tumen le túumben bix kun jóokʼol le revista U Pʼíich Tulumil Kananoʼ. K-kʼáatik xan tiʼ ka u yáantech a jóoʼs yaʼab utsiloʼob ken a xok le túumben revista U Pʼíich Tulumil Kanan utiaʼal le múuchʼuliloʼ.