Le yéeyaʼanoʼob utiaʼal kuxtal minaʼan u xuuloʼ ku kʼamkoʼob le maʼalob péektsiloʼ
Le yéeyaʼanoʼob utiaʼal kuxtal minaʼan u xuuloʼ ku kʼamkoʼob le maʼalob péektsiloʼ
«Oksaj óolnajoʼob tuláakal le yéeyaʼanoʼob utiaʼal ka yanaktiʼob kuxtal minaʼan u xuuloʼ.» (HCH. 13:48.)
1, 2. Le yáax cristianoʼoboʼ, ¿bix úuchik u tsʼoʼokbeskoʼob le kʼaʼaytaj jeʼex úuchik u yaʼalik Jesús kun beetbiloʼ?
U LIBROI Beetaʼanoʼob wa Hechoseʼ, ku tʼaan tiʼ bix úuchik u jach chúukpajal u yóol le yáax cristianoʼob u kʼaʼaytoʼob u maʼalob péektsilil le Reino, jeʼex úuchik u yaʼalik Jesús kun beetbil tiʼ tuláakal yóokʼol kaaboʼ (Mat. 24:14). Le máaxoʼob tu jach tsʼáaj u yóoloʼob kʼaʼaytajoʼ tu yeʼesoʼob bix unaj u beetaʼal yéetel yaʼab uláakʼoʼobeʼ tu beetoʼob xan jeʼex eʼesaʼabiktiʼoboʼ. Tumen tu jach tsʼáaj u yóoloʼob kʼaʼaytaj u disipuloʼob Jesús tu kaajil Jerusaleneʼ, u milesi máakoʼob tuʼux táakaʼan «yaʼab xan tiʼ le j-kʼiinoʼo[boʼ]», joʼopʼ u tsaypachkoʼob Cristo (Hch. 2:41; 4:4; 6:7).
2 Teʼ yáax siglooʼ, le sukuʼunoʼob binoʼob kʼaʼaytaj tuláakʼ luʼumiloʼobeʼ tu yáantoʼob xan yaʼab máakoʼob utiaʼal ka u tsaypachtoʼob Cristo. Jeʼex Felipeeʼ bíin kʼaʼaytaj Samaria yéetel teʼeloʼ tu yáantaj yaʼab máakoʼob taak u kaambaloʼob tiʼ Dios (Hch. 8:5-8). Pablo yéetel uláakʼ sukuʼunoʼobeʼ binoʼob kʼaʼaytaj tiʼ náanach luʼumiloʼob jeʼex Chipre, tiʼ jejeláas kaajoʼob yaan tu luʼumil Asia Menor, tiʼ Macedonia, Grecia yéetel Italia. Yaʼab túun tiʼ le judíoʼob yéetel le griegoʼoboʼ joʼopʼ u tsaypachkoʼob Cristo (Hch. 14:1; 16:5; 17:4). Titoeʼ tu tsʼoʼokbesaj upʼéel meyaj kʼubéentaʼab tiʼ ka u beet tu islai Creta (Tito 1:5). Pedroeʼ kʼaʼaytajnaj Babilonia, yéetel le ka tu tsʼíibtaj u yáax cartaeʼ (maʼ xaaneʼ tu jaʼabiloʼob 62 yéetel 64), tsʼoʼok kaʼach u yúuchul kʼaʼaytaj Ponto, Galacia, Capadocia, Bitinia yéetel u kaajiloʼob Asia (1 Ped. 1:1; 5:13). ¡Jach túun jatsʼuts baʼaloʼob úuch teʼ kʼiinoʼob jeʼeloʼ! Tumen le yáax cristianoʼob chúukpaj u yóoloʼob kʼaʼaytajeʼ, le máaxoʼob pʼekmailoʼoboʼ kʼuch tak u yaʼaloʼob tsʼoʼok u «pʼuʼujsikoʼob u yóol tuláakal [...] yóokʼol kaab» (Hch. 17:6; 28:22).
3. ¿Baʼax utsiloʼob táan u kʼamaʼal ikil u kʼaʼaytaʼal u maʼalob péektsilil le Reinooʼ, yéetel bix a wuʼuykaba ken a wojéelte?
3 U kaajal Jéeoba teʼ kʼiinoʼobaʼ láayliʼ xan táan u jach bin u nojochtaleʼ. Leloʼ ¿maʼ wa tu líiʼsik a wóol a xok bukaʼaj meyaj tu beetaj u j-jaajkunajoʼob Jéeoba yéetel baʼax utsiloʼob tsʼoʼok u kʼamkoʼob? ¿Maʼ wa tu taasiktech kiʼimak óolal a wojéeltik kaʼansaʼab maas tiʼ seis millones máakoʼob u kʼaj óoltoʼob Jéeoba tu mesil septiembre tiʼ 2006 tak tu mesil agosto tiʼ 2007? Tsʼoʼoleʼ, teʼ jaʼab máanikoʼ óoliʼ diez millones máakoʼob maʼ tu meyajtkoʼob Jéeoba, baʼaleʼ taak u kaambaloʼob tiʼeʼ, binoʼob tiʼ u Kʼiimbesajil u kíimil Cristo. Leloʼ ku yeʼesik láayliʼ yaʼab meyaj pʼaatal k-beeteʼ.
4. ¿Máaxoʼob táan u kʼamkoʼob u maʼalob péektsilil le Reinooʼ?
4 Jeʼex teʼ yáax siglooʼ, bejlaʼeʼ «tuláakal le yéeyaʼanoʼob utiaʼal ka yanaktiʼob kuxtal minaʼan u xuuloʼ» táan u kʼamkoʼob xan u maʼalob péektsilil le Reinooʼ (Hch. 13:48). Jéeobaeʼ letiʼ beetik u náatsʼal le máakoʼob tiʼ u kaajaloʼ (xokaʼak Ageo 2:7). Baʼaleʼ, ¿baʼax unaj k-beetik utiaʼal ka k-áant xan le máaxoʼob taak u kaambaloʼob tiʼ Diosoʼ?
Maʼ unaj k-yéeyik tiʼ máax ken k-kʼaʼayt le maʼalob péektsililoʼ
5. ¿Máaxoʼob jeʼel u páajtal u biskubaʼob yéetel Dioseʼ?
5 Le yáax cristianoʼoboʼ u yojloʼob kaʼacheʼ «Jajal Dioseʼ mix máak jelaʼan u paktik, baʼaleʼ tiʼ jeʼel baʼalak kaajileʼ ku kʼamik le máax tsikikeʼ yéetel ku beetik baʼax uts» (Hch. 10:34, 35).Tuláakal máax ku tsʼáaik u fe tiʼ u kuxtal Jesús tu kʼubaj t-oʼolaleʼ, jeʼel u páajtal u biskuba yéetel Dioseʼ (Juan 3:16, 36). Jeʼex k-ilkoʼ, Jéeobaeʼ «u kʼáat ka [salvartaʼak] tuláakal máakoʼob yéetel ka kʼuchuk u chúukaʼan kʼaj óoltoʼob le jaajoʼ» (1 Tim. 2:3, 4).
6. ¿Baʼax maʼ maʼalob ka u beet le máaxoʼob kʼaʼaytik u maʼalob péektsilil le Reinooʼ, yéetel baʼaxten?
6 Le máaxoʼob kʼaʼaytik le maʼalob péektsiloʼ maʼ maʼalob ka u juzgartoʼob máak yoʼolal u raza, yoʼolal u religión wa yoʼolal uláakʼ baʼaloʼob. Tuukulnakoʼon tiʼ lelaʼ: ¿máasaʼ ku kiʼimakkúuntik k-óol k-kʼaʼajsik le máax kaʼansoʼonoʼ maʼ tu juzgartoʼon táanil tiʼ u kʼaj óolkoʼoniʼ? Le oʼolaleʼ, ¿baʼaxten túun maʼ k-ilik k-tsʼáaik k-óol áant xan le máaxoʼob maʼ xaaneʼ jeʼel u salvarkubaʼobeʼ? (Xokaʼak Mateo 7:12.)
7. ¿Baʼaxten maʼ maʼalob ka k-juzgart le máaxoʼob yanoʼob teʼ tuʼux k-kʼaʼaytajoʼ?
7 Jéeobaeʼ tsʼoʼok u tsʼáaik tiʼ Jesús u beet u Juesil, le oʼolal mix utúul tiʼ toʼon unaj u juzgartik wa máax. Wíinikeʼ ku juzgartik u yéet máakil chéen yoʼolal bix u yilaʼal wa chéen yoʼolal baʼax ku yaʼalaʼal tu yoʼolal, baʼaleʼ Jesuseʼ ku páajtal u yilik yéetel u yojéeltik baʼax jach yaan tu puksiʼikʼal máak (Isa. 11:1-5; 2 Tim. 4:1).
8, 9. 1) ¿Baʼax ku beetik kaʼach Sauloʼ táanil tiʼ u joʼopʼol u tsaypachtik Cristo? 2) ¿Baʼax k-kanik tiʼ le baʼax tu beetaj apóstol Pablooʼ?
8 Desde úuchil tak bejlaʼeʼ, u jejeláasil máakoʼobeʼ tsʼoʼok u joʼopʼol u meyajtkoʼob Jéeoba. Utúul tiʼ le máakoʼobaʼ Saulo tiʼ Tarso, máax kʼuch kʼaj óolbil bey apóstol Pabloeʼ. Sauloeʼ utúul fariseo ku chʼaʼapachtik kaʼach le máaxoʼob meyajtik Diosoʼ tumen ku tuklik maʼ maʼalob le baʼax ku kaʼanskoʼoboʼ (Gal. 1:13). Chéen jáan ilbileʼ bey maʼ ken u beetuba kaʼach u disipulo Cristoeʼ. Baʼaleʼ Jesuseʼ yaan baʼax maʼalob tu yilaj tu puksiʼikʼal le oʼolal tu yéeyaj utiaʼal ka u beet upʼéel nojoch meyaj. Ka máan kʼiineʼ Sauloeʼ tu jach kʼubaj u yóol u kʼaʼayt u maʼalob péektsilil le Reino teʼ yáax siglooʼ.
9 ¿Baʼax k-kanik tiʼ le baʼax tu beetaj le apóstol Pablooʼ? Maʼ xaaneʼ teʼ tuʼux k-kʼaʼaytajoʼ yaan máaxoʼob bey maʼ u kʼáat u yuʼuboʼoneʼ. Baʼaleʼ, kex tumen k-ilik bey mix máak kun kʼuchul u tsaypacht Cristoeʼ, kʼaʼabéet k-kʼaʼaytik le maʼalob péektsilil tiʼoboʼ. Yaan kʼiineʼ, le máax k-tuklik kaʼach maʼ ken u kʼamoʼoneʼ letiʼ uʼuyikoʼon. Kʼaʼajaktoʼoneʼ maʼ unaj u jáawal k-kʼaʼaytaj tiʼ tuláakal máakiʼ (xokaʼak Beetaʼanoʼob 5:42).
Le utsiloʼob ku taasik le maʼ u jáawal u yúuchul kʼaʼaytajoʼ
10. ¿Baʼaxten kʼaʼabéet k-kʼaʼaytaj tak tiʼ le máaxoʼob k-ilik bey maʼ ken u kʼamoʼoneʼ? Tsikbalt bix tsʼoʼok u beetaʼal teʼ tuʼux kajaʼanechoʼ.
10 Maʼ u tuʼubultoʼoneʼ le ichoʼ jeʼel u tusik máakeʼ. Koʼox ilik baʼax úuch yéetel Ignacio, * letiʼeʼ kʼalaʼan kaʼach cárcel tiʼ upʼéel u luʼumil sudamérica ka joʼopʼ u xokik le Biblia yéetel u j-jaajkunajoʼob Jéeobaoʼ. Tuláakal máak chʼaʼik saajkil tiʼ Ignacio tumen letiʼeʼ jach séeb u baʼatel kaʼach. Le uláakʼ máaxoʼob kʼalaʼanoʼob xanoʼ ku beetkoʼob baʼaloʼob utiaʼal u konoʼob teʼ carceloʼ, ku binoʼob kaʼach u kʼáatoʼob tiʼ Ignacio ka xiʼik u cobrart le máaxoʼob maʼ u kʼáatoʼob boʼoloʼ. Baʼaleʼ jeʼex úuchik u bin u maas kaambal yéetel u beetik le baʼax ku kankoʼ bey úuchik xan u bin u kʼexik u kuxtal yéetel xuʼul u beetik u kʼasaʼanil. Bejlaʼeʼ mix máak aʼaliktiʼ ka xiʼik u cobrart le pʼaaxoʼoboʼ. Ignacioeʼ jach kiʼimak u yóol tumen yoʼolal le baʼax tu kanaj tiʼ le Biblia bey xan yoʼolal u yáantaj u kiliʼich muukʼ Dioseʼ béeychaj u kʼexik bix u kuxtal. Ku tsʼáaik xan u nib óolalil tumen le sukuʼunoʼob áantoʼ maʼ tu juzgartoʼob yoʼolal bix tu yililoʼobiʼ.
11. ¿Baʼaxten maʼatech u jáawal k-xíimbalt le máakoʼoboʼ?
11 ¿Baʼaxten maʼatech u jáawal k-xíimbaltik le máakoʼoboʼ? Tumen maʼ xaaneʼ le bix kuxlikoʼoboʼ jeʼel u jelpajleʼ. Maʼ xaaneʼ, jujuntúul tiʼ le máaxoʼob t-xíimbaltaj tu tsʼookbalakoʼ tsʼoʼok u tsaʼayal jumpʼéel talam kʼojaʼanil tiʼ, pʼáat minaʼan meyaj tiʼ wa yaan utúul u láakʼtsilil kíimi (xokaʼak Eclesiastés 9:11). Wa maʼ xaan xaneʼ le baʼaloʼob ku yúuchul way yóokʼol kaabeʼ tsʼoʼok u beetik u chiʼichnaktal yoʼolal baʼax ku taal u kʼiinil. Le baʼaxoʼob ku yúuchultiʼob bejlaʼeʼ jeʼel u beetik u yuʼubkoʼonoʼob ken kaʼa máankoʼon kʼaʼaytaj, kex tumen maʼ u kʼáatoʼob kaʼach mix baʼal wa joʼopʼ tak u chʼaʼapachkoʼonoʼob. Le oʼolaleʼ, maʼ unaj u jáawal k-kʼaʼaytik le maʼalob péektsil tiʼ tuláakal súutukiloʼ.
12. ¿Bix unaj k-ilik le máaxoʼob yéetel k-tsikbaloʼ, yéetel baʼaxten kʼaʼabéet k-beetik beyoʼ?
12 Wíinikeʼ ku yilik baʼax u razai u yéet máakil tsʼoʼoleʼ ku juzgartik yoʼolal bix u yilaʼal. Baʼaleʼ, Jéeobaeʼ ku jach tsʼáaik cuenta bix utúul máak yéetel ku yilik baʼax jatsʼuts modos yantiʼ (xokaʼak 1 Samuel 16:7). Unaj k-ilik k-beetik jeʼex letiʼ ken jóoʼkoʼon kʼaʼaytajeʼ. Yaʼab baʼaxoʼob uchaʼantak tiʼ jujuntúul sukuʼunoʼobeʼ tsʼoʼok u yeʼesik wa k-kaxtik u maʼalob modos le máax yéetel k-tsikbaloʼ, leloʼ ku taasik yaʼab utsiloʼob.
13, 14. 1) ¿Baʼaxten utúul precursoraeʼ xuʼul u xíimbaltik utúul koʼolel? 2) ¿Baʼax ku kaʼansiktoʼon le baʼax úuchaʼ?
13 Utúul precursora Sandra u kʼaabaʼeʼ, táan kaʼach u máan kʼaʼaytaj joonaj joonai tiʼ upʼéel isla yaan teʼ Caribe ka tu kʼaj óoltaj Ruth. Rutheʼ jach utstutʼaan u yantal teʼ carnavaloʼoboʼ yéetel kaʼatéen tsʼoʼok kaʼach u yéeyaʼal utiaʼal u beetik u reinai. Tumen maʼalob úuchik u kʼamik le baʼax kʼaʼaytaʼabtiʼoʼ, Sandraeʼ tu yaʼalajtiʼ yaan u kaʼa súut u xíimbalt utiaʼal ka u xokoʼob le Bibliaoʼ. Le kiikoʼ ku yaʼalik: «Le ka yáax ooken tu najileʼ, tin wilaj upʼéel u nuxiʼ foto tuʼux u tsʼaamaj u nookʼil le carnavaloʼ, bey xan tuláakal le premioʼob tsʼoʼok u ganarkoʼ. Tin tukleʼ, utúul máax jach famosa yéetel jach utstutʼaan u táakpajal tiʼ kʼiimbesajiloʼob beyaʼ maʼ kun seguer u taaktal u kaambal, ka xuʼul túun in bíin in xíimbalte».
14 Ka máan kʼiineʼ, Rutheʼ bíin teʼ tu Najil Reinooʼ, ka tsʼoʼok le muchʼtáambaloʼ letiʼeʼ tu kʼáataj tiʼ Sandra: «¿Baʼaxten xuʼul a taal a xíimbalten?». Sandraeʼ tu kʼáataj ka saʼatsaʼaktiʼ yéetel tu yaʼalajtiʼ yaan u kaʼa bin u xíimbalt utiaʼal u seguer u xookoʼob. Rutheʼ jach séeb tu tsʼáajil ichil u kuxtal le baʼax tu kanoʼ. Tu luʼsaj tuláakal u fotoʼobeʼ, ka joʼopʼ u bin muchʼtáambal, ka joʼopʼ u jóokʼol kʼaʼaytaj yéetel tu tsʼookeʼ tu kʼubaj u kuxtal tiʼ Jéeoba. Sandra túuneʼ, tu tsʼáaj cuenta maʼ unaj kaʼach u xuʼulul u xíimbaltik Ruthiʼ.
15, 16. 1) ¿Baʼax utsiloʼob tu taasaj úuchik u kʼaʼaytaj utúul kiik tiʼ utúul u láakʼtsiloʼ? 2) ¿Baʼaxten kʼaʼabéet k-kʼaʼaytaj tiʼ utúul k-láakʼtsilil kex tumen jach jelaʼan le kuxtal ku biskoʼ?
15 Yaʼab sukuʼunoʼob xaneʼ tsʼoʼok u kʼaʼaytikoʼob le maʼalob péektsil tiʼ jujuntúul u láakʼtsiloʼob, kex tumen ku yilaʼal bey maʼ ken u kʼamoʼob kaʼacheʼ. Utúul kiik, Joyce u kʼaabaʼ tiʼ u luʼumil Estados Unidoseʼ, tu yáantaj utúul u láakʼtsilil. Le kiikaʼ yaan utúul u cuñado yaʼab utéenel kʼalaʼab cárcel desde tu táankelmil. Le kiikaʼ ku yaʼalik: «Le máakoʼoboʼ ku yaʼalikoʼobeʼ in cuñadoeʼ jach maʼ ken u yutskíint u kuxtal tumen ku konik kaʼach drogas, ku yookol yéetel ku beetik uláakʼ baʼaloʼob maʼ utsiʼ. Kex beyoʼ teneʼ maʼ xuʼul in tsikbaltiktiʼ le baʼax ku kaʼansik le Bibliaoʼ. Treinta y siete jaʼaboʼob xáanchaj táan in wilik in wáantik». Tumen maʼ xuʼul u tsʼáaik u yóol u kʼaʼaytaj tiʼeʼ, u cuñadoeʼ tu yóotaj ka tsʼaʼabak xook tiʼ tumen u j-jaajkunajoʼob Jéeoba yéetel joʼopʼ u beetik kʼeexoʼob ichil u kuxtal. Maʼ sen úucheʼ u cuñado Joyce, 50 jaʼaboʼob yantiʼeʼ, okjaʼanaj tiʼ upʼéel asamblea tiʼ distrito beetaʼab California. Joyce ku yaʼalik: «Le ka okjaʼanajeʼ okʼolnajen tumen jach kiʼimakchaj in wóol. ¡Jach kiʼimak in wóol tumen mix utéen tin tuklaj wa maʼ ken u yutskíint u kuxtaliʼ!».
16 Maʼ xaaneʼ, yaan kʼiineʼ tumen jach jelaʼan bix le kuxtal ku bisik utúul k-láakʼtsiloʼ maʼ k-jach kʼáat k-tsikbalt tiʼ baʼax ku kaʼansik le Bibliaoʼ. Baʼaleʼ, leloʼ maʼ tu beetaj u jáawal u kʼaʼaytaj Joyce tiʼ u cuñadoiʼ. Wíinikeʼ maʼ tu páajtal u yojéeltik jach baʼax yaan tu puksiʼikʼal u yéet máakiliʼ. Tsʼoʼoleʼ, le máakoʼ maʼ xaaneʼ jach tu jaajil u yóol taak u kanik le baʼax ku kaʼansik le Bibliaoʼ. Le oʼolaleʼ, unaj k-áantkoʼob u kanoʼob (xokaʼak Proverbios 3:27).
Upʼéel baʼax jach jeʼel u yáantkoʼon k-kaʼans uláakʼ máakoʼobeʼ
17, 18. 1) Le tsikbaloʼob ku taal tiʼ yaʼab luʼumiloʼobeʼ, ¿baʼax ku yeʼesikoʼob yoʼolal le libro Baʼax ku kaʼansik le Bibliaoʼ? 2) Tsikbalt bix tsʼoʼok u bintech yéetel le libroaʼ
17 Le tsikbaloʼob ku taal tiʼ yaʼab luʼumiloʼobeʼ, ku yeʼesikoʼobeʼ le libro ¿Baʼax jach tu jaajil ku kaʼansik le Bibliaoʼ?, táan u yáantik yaʼab máakoʼob uts u puksiʼikʼaloʼob. Penni, utúul precursora tiʼ u luʼumil Estados Unidoseʼ, joʼopʼ u tsʼáaik xook tiʼ jujuntúul máakoʼob yéetel le libroaʼ. Kaʼatúul tiʼ le máaxoʼob ku tsʼáaik xookoʼ tsʼoʼok u yantal u jaʼabiloʼob yéetel jach u kʼubmaj u yóoloʼob tiʼ u religionoʼob, le oʼolal Pennieʼ tu tuklaj maʼ ken u kʼamoʼob jujumpʼéel tiʼ le baʼaxoʼob ku kaʼansik le libro Baʼax ku kaʼansik le Bibliaoʼ. Baʼaleʼ, letiʼeʼ ku yaʼalik: «Tumen maʼ talam u naʼataʼal yéetel jach maʼalob u tsolaʼal le kaʼansajoʼoboʼ, séeb tu tsʼáajiloʼob cuenta le baʼax ku kankoʼoboʼ letiʼe u jaajiloʼ yéetel jach maʼalob úuchik u kʼamkoʼob».
18 Utúul kiik Pat u kʼaabaʼ, tiʼ u luʼumil Gran Bretañaeʼ, káaj u tsʼáaik xook tiʼ utúul koʼolel asiática púutsʼ tiʼ u luʼumil. Táanil tiʼ u púutsʼleʼ, le koʼolelaʼ tu aktáantaj nukuch talamiloʼob ichil u kuxtal: le soldadoʼob u tsʼaamuba tu contra le gobiernooʼ tu bisoʼob u yíicham bey xan u paalaloʼob, yéetel maʼ tu kaʼa iloʼobiʼ. Aʼalaʼabtiʼ yaan u kíimsaʼal, tóokaʼab u najil yéetel violartaʼab tumen u múuchʼ máakoʼob. Ka tsʼoʼok u aktáantik le baʼaloʼobaʼ, joʼopʼ u yuʼubik minaʼan u beelal u kuxtal, yéetel yaʼab utéenel tu tukultaj u kíimsuba. Baʼaleʼ, le Bibliaoʼ le áant u yil yaan upʼéel kuxtal maas maʼalob ku taal u kʼiinil. Pateʼ ku yaʼalik: «Tumen maʼ talam u naʼataʼal le libro Baʼax ku kaʼansik le Bibliaoʼ, le koʼoleloʼ jach maʼalob úuchik u kʼamik le baʼax ku kankoʼ». Le koʼoleloʼ, maʼ xáanchaj ka joʼopʼ u beetik kʼeexoʼob ichil u kuxtaliʼ, káaj u jóokʼol kʼaʼaytaj yéetel tu yaʼalaj u kʼáat okjaʼ teʼ tuláakʼ asambleaoʼ. ¿Máasaʼ jach ku taasiktoʼon kiʼimak óolal k-áantik uláakʼ máakoʼob u yojéeltoʼob baʼax ken u beet Dios ichil upʼíit kʼiin?
«Maʼ unaj k-kaʼanal k-beet utsiʼ»
19. ¿Baʼaxten jach kʼaʼabéet k-kʼaʼaytaj bejlaʼeʼ?
19 Cada kʼiin ku máaneʼ kʼaʼabéet k-maas kʼaʼaytik le maʼalob péektsililoʼ yéetel k-áantik uláakʼ máakoʼob. Cada jaʼab ku máaneʼ, u milesi le máaxoʼob «yéeyaʼanoʼob utiaʼal ka yanaktiʼob kuxtal minaʼan u xuu[leʼ]» ku kʼamkoʼob u maʼalob péektsilil le Reinooʼ. Baʼaleʼ «tsʼoʼok u náatsʼal u noj kʼiinil Yuumtsil», leloʼ u kʼáat u yaʼaleʼ le máaxoʼob láayliʼ tusaʼanoʼob tumen Satanaseʼ «tiʼ yanoʼob tu chiʼ kíimi[leʼ]» (Sof. 1:14; Pro. 24:11).
20. ¿Baʼax unaj k-chʼaʼatuklik k-beetik?
20 Láayliʼ jeʼel u páajtal k-áantik le máakoʼobaʼ. Baʼaleʼ utiaʼal leloʼ kʼaʼabéet k-beetik jeʼex le cristianoʼob teʼ yáax siglooʼ, letiʼobeʼ «maʼ jáaw u kaʼansikoʼob yéetel u tseʼektikoʼob u kʼaabaʼ Jesucristoiʼ» (Hch. 5:42). Le oʼolaleʼ, jeʼex letiʼobeʼ, maʼ unaj u jáawal k-kʼaʼaytaj kex yaan talamiloʼobiʼ, kʼaʼabéet k-maas maʼalobkíintik bix k-kaʼansaj yéetel maʼ unaj k-yéeyik tiʼ máax ken k-kʼaʼayt le maʼalob péektsiloʼ. «Maʼ unaj k-kaʼanal k-beet utsiʼ» tumen wa maʼ t-kaʼanleʼ, yaan k-kʼamik yaʼab utsiloʼob yéetel yaan k-kʼamaʼal tumen Dios (2 Tim. 4:2; xokaʼak Galaciailoʼob 6:9).
[Tsolajiloʼob]
^ xóot’ol 10 Kʼexaʼan jujumpʼéel tiʼ le kʼaabaʼoboʼ.
¿Baʼax jeʼel a núukikeʼ?
• ¿Máaxoʼob táan u kʼamkoʼob u maʼalob péektsilil le Reinooʼ?
• ¿Baʼaxten maʼ unaj k-tuklik wa maʼ kun kʼambil le maʼalob péektsil tumen le máakoʼoboʼ?
• ¿Baʼax utsiloʼob táan u yantal yéetel le libro Baʼax ku kaʼansik le Bibliaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
U milesi máakoʼob uts u puksiʼikʼaloʼobeʼ táan u kʼamkoʼob u maʼalob péektsilil le Reinooʼ
[U tsolajil le oochel teʼ táan juʼun 15]
¿Baʼax k-kanik tiʼ le kʼeexoʼob tu beetaj apóstol Pablooʼ?
[U tsolajil le oochel teʼ táan juʼun 16]
Le máaxoʼob kʼaʼaytik u maʼalob péektsilil le Reinooʼ maʼatech u juzgarkoʼob le máakoʼoboʼ