Xook 123 Tiʼ galaad líiʼsaʼab u yóol

Le j-xoknáaloʼob ka «páana[koʼob]» teʼ tuʼux túuxtaʼaboʼoboʼ

TU KʼIINIL sábado 8 tiʼ septiembre tiʼ 2007, tu muchʼuba 6,352 máakoʼob taaloʼob tiʼ 41 luʼumiloʼob, utiaʼal u kʼiimbesaʼal u tsʼoʼokol le xook 123 tiʼ le Escuela Bíblica tiʼ Galaad tiʼ le Watchtoweroʼ. Le kʼiimbesajaʼ káaj láas 10:00 jaʼatskab kʼiin, yéetel káajsaʼab tumen le sukuʼun Anthony Morris, utúul tiʼ le máaxoʼob táakaʼanoʼob ichil le Cuerpo Gobernanteoʼ. Ka tsʼoʼok u yaʼalik u tʼaaniloʼob u káajbal le kʼiimbesajil yéetel u kʼamik le máaxoʼob taaljaʼanoʼoboʼ, tu yaʼalaj ka máanak le sukuʼun Gary Breaux, utúul tiʼ le máaxoʼob yanoʼob ichil le Comité tiʼ le Sucursal tiʼ Estados Unidos, le máax ken u máans le yáax tsoltʼaanoʼ.

Le sukuʼun Breauxoʼ tu jach aʼalaj tiʼ le j-xoknáaloʼoboʼ, le máaxoʼob beetik baʼax ku yaʼalik Jéeobaoʼ jach jatsʼutsoʼob tu táan letiʼ kex jeʼel bixak ka ilaʼakoʼobeʼ, yéetel tu yaʼalajtiʼob mantatsʼ unaj u kaxtkoʼob u yilaʼaloʼob bey tumen Jéeobaoʼ (Jer. 13:11, NM). Tsʼoʼoleʼ le sukuʼun Gerrit Lösch, utúul tiʼ le yanoʼob xan ichil le Cuerpo Gobernanteoʼ, tu yaʼaleʼ maʼ jelaʼan ka k-páaʼt k-kʼamik u boʼolil ikil k-meyajtik Diosiʼ (Heb. 11:6). Baʼaleʼ tu yaʼalaj xaneʼ letiʼe yaabilaj unaj u péekskoʼon k-meyajtoʼ, maʼ letiʼe baʼaxoʼob k-páaʼtik u tsʼáaiktoʼonoʼ.

Le sukuʼun William Samuelsonoʼ, superintendente tiʼ Departamento tiʼ Escuelas Teocraticasoʼ, tu yaʼalaj tiʼ le j-xoknáaloʼob ka u jach kʼub u yóoloʼob u kʼaʼaytoʼob tsʼoʼok u beetaʼal Reyil Cristo yéetel ka u bisoʼob upʼéel toj kuxtal mantatsʼ jeʼel tuʼuxak ka yanakoʼobeʼ. * Le sukuʼun Sam Roberson, superintendente auxiliar tiʼ le Departamento tiʼ Escuelasoʼ, tu yaʼalaj xan tiʼ le j-xoknáaloʼob ka u yiloʼob le baʼaloʼob maʼalobtak ku beetik u maasiloʼ, utiaʼal maʼ u talamtaltiʼob u yeʼeskoʼob yaabilaj tiʼ tuláakal le sukuʼunoʼoboʼ (1 Ped. 2:17).

Ka tsʼoʼok u máansaʼal le jatsʼuts tsoltʼaanoʼobaʼ, le sukuʼun Mark Noumair, utúul tiʼ le máaxoʼob ku kaʼansajoʼob Galaadoʼ, tu yaʼalaj tiʼ jujuntúul tiʼ le j-xoknáaloʼob ka u tsikbaltoʼob bix biniktiʼob teʼ kʼaʼaytaj le tiaʼanoʼob teʼ tu xookil Galaadoʼ. Tuláakal le muchʼukbaloʼoboʼ tu tsʼáajoʼob cuentaeʼ le j-xoknáaloʼoboʼ jach nojoch baʼal u yilkoʼob le meeyjil kʼaʼaytajoʼ yéetel jach tu jaajil u kʼáat u yáantoʼob le máakoʼoboʼ. Ka tsʼoʼokeʼ, le sukuʼun Kent Fischer, ku meyaj tu Oficinai Betel yaan Pattersonoʼ, tu kʼáataj u chiʼ jujuntúul tiʼ le sukuʼunoʼob yanoʼob ichil le Comité tiʼ Sucursal tiʼ óoxpʼéel luʼumiloʼob tuʼux yaan misioneroʼobiʼ. Le baʼax tu yaʼalaj le sukuʼunoʼobaʼ tu yeʼesaj tiʼ le muchʼukbaloʼob, tuʼux táakaʼan xan u taata yéetel u maama yaʼab tiʼ le j-xoknáaloʼoboʼ, le túumben misioneroʼobaʼ jach yaan u yáantaʼaloʼob yéetel yaan u kanáantaʼaloʼob tumen Jéeoba. Le sukuʼun Izak Marais, ku meyaj teʼ Departamento tiʼ Servicios tiʼ Traduccionoʼ, tu kʼáataj u chiʼ jujuntúul tiʼ le sukuʼunoʼob úuch joʼopʼok u beetik u misioneroiloʼoboʼ, le baʼaxoʼob tu yaʼaloʼoboʼ tu yeʼesaj jujumpʼéel tiʼ le baʼaxoʼob ken u jach taas kiʼimak óolal tiʼ le túumben misioneroʼoboʼ.

Le sukuʼun Geoffrey Jackson, utúul tiʼ le yanoʼob ichil le Cuerpo Gobernanteoʼ, tu máansaj le noj tsoltʼaan ku kʼaabaʼtik: «¿Baʼax ken a beeteʼex yéetel tuláakal le baʼax tsʼoʼok u kaʼansaʼalteʼexoʼ?». Le sukuʼun Jackson, máax óoliʼ veinticinco jaʼaboʼob tu beetaj u misioneroi teʼ Pacífico suroʼ, tʼaanaj tiʼ le baʼaxoʼob tu yaʼalaj Jesús utiaʼal u tsʼoʼokbal le kaʼansaj tu beetaj teʼ puʼukoʼ. Ichil le kaʼansajaʼ, Jesuseʼ tʼaanaj  tiʼ utúul máak yaan u naʼat yéetel tiʼ utúul máak minaʼan u naʼat, cada utúuleʼ tu beetaj upʼéel naj. Le sukuʼunaʼ tu yaʼaleʼ, maʼ xaaneʼ tu kaʼapʼéelal le najoʼobaʼ maʼ náach yanikoʼob tiʼ jáal jaʼiʼ. Le máak minaʼan u naʼatoʼ tu beetaj u yotoch yóokʼol arena, baʼaleʼ le máak yaan u naʼatoʼ «tu páanaj» jach taam le luʼum tak ka kʼuch yóokʼol tuunich utiaʼal u beetik u chuun pakʼil u yotochoʼ. Le ka taal upʼéel jach kʼaʼamkach cháak yéetel u yiikʼaleʼ, le najaʼ maʼ lúubiʼ baʼaleʼ le beetaʼab yóokʼol le arenaoʼ lúubij (Mat. 7:24-27; Luc. 6:48).

Jesuseʼ tu yaʼaleʼ le máak minaʼan u naʼatoʼ tu chíikbesaj le máaxoʼob chéen tu yuʼuboʼob le kaʼansajoʼob tu beetoʼ. Baʼaleʼ, le máak yaan u naʼatoʼ tu chíikbesaj le máaxoʼob tu yuʼuboʼob yéetel tu tsʼáaj ichil u kuxtaloʼob le baʼaxoʼob tu kaʼansoʼ. Le sukuʼun Jacksonoʼ tu yaʼalaj tiʼ le túumben misioneroʼoboʼ: «Ken a beeteʼex tuláakal le baʼax tsʼoʼok a kanikeʼex teʼ Biblia teʼ tuʼux ka bineʼex kʼaʼaytajoʼ, táan a beetkeʼex jeʼex tu beetil le máak yaan u naʼatoʼ». Utiaʼal u tsʼoʼokbal le tsoltʼaanaʼ le sukuʼunoʼ tu yaʼalajtiʼob ka káajak u «páan[oʼob]» ken yaʼal u kʼuchloʼob teʼ tuʼux túuxtaʼaboʼob kʼaʼaytajoʼ.

Tu tsʼookeʼ, le túumben misioneroʼobaʼ tsʼaʼab u diplomaʼob yéetel aʼalaʼab tiʼ cada utúul tuʼux ku túuxtaʼaloʼob kʼaʼaytaj. Le sukuʼun Morrisoʼ tu yaʼalajtiʼob jujumpʼéel baʼaloʼob jach unaj u beetkoʼob. Tu yaʼalajtiʼob maʼ u xuʼulul u tsaypachtikoʼob Jesús yéetel maʼ u xuʼulul u kʼáatkoʼob u yáantaj Jéeoba. Bey túun úuchik u tsʼoʼokol u kʼiimbesajil le xookoʼ.

[Tsolajiloʼob]

[U tsolajil le oochel teʼ táan juʼun 31]

[U tsolajil le oochel teʼ táan juʼun 31]

BAʼALOʼOB YAAN YIL YÉETEL LE J-XOKNÁALOʼOBOʼ

[U tsolajil le oochel teʼ táan juʼun 31]

Tiʼ 10 luʼumil u taaloʼob • Tiʼ 24 luʼumil kun binoʼob

Le j-xoknáaloʼoboʼ 56 utúulaloʼob • Kex a 33.5 jaʼab yantiʼob • Kex 17.9 jaʼab okjaʼanakoʼob

Kex 13.8 jaʼab káajak u beetik u precursoriloʼob

[U tsolajil le oochel teʼ táan juʼun 31]

[U tsolajil le oochel teʼ táan juʼun 32]

Xook 123 tiʼ le Escuela Bíblica tiʼ Galaad tiʼ Watchtower

[U tsolajil le oochel teʼ táan juʼun 32]

U filai le sukuʼunoʼob yéetel le kiikoʼoboʼ ku káajal desde táanil tak paachil, u kʼaabaʼobeʼ tsolaʼanoʼob x-tsʼíik tak x-noʼoj.

[U tsolajil le oochel teʼ táan juʼun 32]

1) Esparza, E.; Papaya, S.; Bilal, A.; Suárez, M.; Evers, E.; Dimichino, K. 2) Rosa, M.; Fujii, R.; Ratey, O.; Leveton, J.; Van Leemputten, M. 3) Boscaino, A.; Beck, K.; Budanov, H.; Braz, C.; Peltz, K.; Siaw, A. 4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. 5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. 6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. 7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. 8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. 9) Suárez, J.; Clarke, J.; Papaya, S.; Budanov, M.; Wilson, R.; Braz, R.