Unaj k-beetik jeʼex u maas nojchil le misioneroʼoboʼ
Unaj k-beetik jeʼex u maas nojchil le misioneroʼoboʼ
«Kuxleneʼex jeʼel bix in kuxtal tenoʼ, jeʼel bix teneʼ táan in kuxtal jeʼel bix u kuxtal Cristoeʼ.» (1 COR. 11:1.)
1. ¿Baʼaxten kʼaʼabéet k-beetik jeʼex Jesuseʼ?
LE APÓSTOL Pablooʼ tu beetaj jeʼex tu beetil Jesucristo, le u maas nojchil tiʼ le misioneroʼoboʼ. Le oʼolal tu yaʼalaj tiʼ u sukuʼunoʼob: «Kuxleneʼex jeʼel bix in kuxtal tenoʼ, jeʼel bix teneʼ táan in kuxtal jeʼel bix u kuxtal Cristoeʼ» (1 Cor. 11:1). Jesuseʼ tu yaʼalaj xan tiʼ u apostoloʼob ka u beetoʼob jeʼex u beetik letiʼoʼ. Le ka tsʼoʼok u pʼoʼik u yook u apostoloʼob utiaʼal u yeʼesiktiʼob bix unaj u yantal tiʼ máak kabal óolaleʼ, tu yaʼalajtiʼob: «Tsʼoʼok in weʼesikteʼex bix u beetaʼal, utiaʼal ka a beeteʼex jeʼel bix tsʼoʼok in beetik tiʼ teʼexoʼ» (Juan 13:12-15). Bejlaʼeʼ toʼon xaneʼ kʼaʼabéet k-tʼaan jeʼex tu beetil Jesusoʼ, k-beetik le baʼaxoʼob tu beetoʼ yéetel k-eʼesik le modosoʼob tu yeʼesoʼ (1 Ped. 2:21).
2. ¿Bix unaj k-kʼaʼaytik le maʼalob péektsil kex tumen maʼ túuxtaʼanoʼon táanxel luʼumil bey misioneroileʼ?
2 Teʼ xook máanikoʼ t-kaneʼ utúul misioneroeʼ letiʼe máax ku túuxtaʼal upʼéel wa tuʼux u kʼaʼayt le maʼalob péektsilil tiʼ le máakoʼoboʼ. Yoʼolal lelaʼ, apóstol Pabloeʼ tu beetaj jujumpʼéel kʼáatchiʼob ku beetik k-tuukul (xokaʼak Romailoʼob 10:11-15). Upʼéel tiʼ le kʼáatchiʼoboʼ letiʼ lelaʼ: «¿Bix kun u yuʼubiloʼob wa minaʼan mix máak utiaʼal tseʼektiktiʼob [wa u kʼaʼaytiktiʼob] le maʼalob péektsiloʼ?». Tsʼoʼoleʼ, tu chʼaʼachiʼitaj le baʼax tu tsʼíibtaj le profeta Isaíasaʼ: «¡Bukaʼaj jatsʼutsil u yookoʼob le máaxoʼob taasikoʼob u péektsilil jeetsʼel óolal, yéetel ku tseʼektikoʼob le maʼalob péektsiloʼ!» (Isa. 52:7). Kex tumen maʼ túuxtaʼanoʼon táanxel luʼumil bey misioneroileʼ, wa k-beetik jeʼex tu beetil Jesuseʼ, jeʼel u páajtal xan k-maas tsʼáaik k-óol k-kʼaʼayt le maʼalob péektsil jeʼex u beetik le misioneroʼoboʼ. Desde tu mesil septiembre tiʼ 2006 tak tu mesil agosto tiʼ 2007, le jaytúul sukuʼunoʼob tu kʼaʼaytoʼob «le maʼalob péektsil» tiʼ 236 luʼumiloʼoboʼ, 6,957,854 utúulaloʼob (2 Tim. 4:5).
«T-pʼataj tuláakal baʼax yantoʼon utiaʼal k-tsaypachtikech»
3, 4. ¿Baʼax tu pʼataj Jesús teʼ kaʼanoʼ, yéetel bix jeʼel k-beetikba utúul u disipuloeʼ?
3 Utiaʼal u tsʼoʼokbesik le meyaj túuxtaʼab u beet way Luʼumeʼ, Jesuseʼ «tu pʼataj juntséelil le baʼax utiaʼaloʼ ka tu beetuba jeʼel bix palitsileʼ», tu pʼataj le baʼax yaan teʼ kaʼanoʼ bey xan le meyaj ku beetik kaʼachoʼ (Fili. 2:7). U jaajileʼ maʼ tu páajtal u keʼetel le baʼaxoʼob tsʼoʼok k-pʼatik yéetel le baʼaxoʼob tu pʼataj Jesusoʼ. Kex beyoʼ, toʼon xaneʼ jeʼel u páajtal k-tsʼoʼokbesik le meyaj tsʼaʼantoʼon wa maʼ t-yaj óoltik le baʼaxoʼob t-pʼataj teʼ kʼasaʼan yóokʼol kaabaʼ (1 Juan 5:19).
4 Utéenjeakileʼ le apóstol Pedrooʼ tu yaʼalaj tiʼ Jesús: «Toʼoneʼ t-pʼataj tuláakal baʼax yantoʼoneʼ ka taaloʼon ta paach» (Mat. 19:27). Le ka aʼalaʼab tiʼ Pedro, Andrés, Santiago yéetel Juan ka u tsaypachtoʼob Jesuseʼ, tu pʼatoʼob tu séebaʼanil u nuʼukulil u meyajoʼob. Bey túunoʼ tu pʼatoʼob u meeyjil le chuk kay ku beetkoʼob kaʼachoʼ ka tu jach tsʼáaj u yóol u kʼaʼaytoʼob le maʼalob péektsiloʼ. Jeʼex u yeʼesik u Evangelio Lucaseʼ, Pedroeʼ tu yaʼalaj: «Toʼoneʼ t-pʼataj tuláakal baʼax yantoʼon utiaʼal k-tsaypachtikech» (Luc. 18:28). U jaajileʼ maʼ tuláakloʼon tsʼoʼok u kʼaʼabéettal k-pʼatik tuláakal baʼax yantoʼon utiaʼal k-tsaypachtik Cristoiʼ. Baʼaleʼ kʼaʼabéetchaj k-tuʼubsikba wa k-pʼatik juntséelil baʼaxoʼob k-tsʼíiboltik utiaʼal k-beetikba utúul u disipulo Jesús yéetel utiaʼal u chúukpajal k-óol meyajt Jéeoba (Mat. 16:24). Lelaʼ tsʼoʼok u taasiktoʼon yaʼab utsiloʼob (xokaʼak Mateo 19:29). K-tsʼáaik óol kʼaʼaytaj jeʼex tu beetil Jesuseʼ ku taasiktoʼon yaʼab kiʼimak óolal, maases le ken k-áant wa máax u kʼaj óolt Dios yéetel u Hijooʼ.
5. ¿Baʼax ku chʼaʼatuklik u beetik yaʼab máakoʼob ku meyajoʼob tiʼ táanxel luʼumiloʼob ken u kʼaj óoltkoʼob le baʼax ku kaʼansik le Bibliaoʼ? Tsikbalt upʼéel baʼax uchaʼan.
5 Valmir, utúul brasileño ku páanik oro tiʼ upʼéel noj kaaj yaan tu luʼumil Surinameʼ, jach ku káaltal yéetel ku bisik upʼéel kʼaakʼas kuxtal kaʼachi. Utéenjeak le tiaʼan tiʼ upʼéel kaajeʼ, kʼaʼaytaʼabtiʼ le maʼalob péektsil tumen u j-jaajkunajoʼob Jéeobaoʼ. Káaj u xokik sáamsamal le Biblia tu yéeteloʼoboʼ, tu beetaj yaʼab kʼeexoʼob ichil u kuxtal yéetel maʼ xáanchaj ka okjaʼanajiʼ. Le ka tu tsʼáaj cuenta Valmir ku talamtal u tsʼáaik ichil u kuxtal le baʼaxoʼob ku kanik teʼ Biblia yoʼolal le meyaj yantiʼoʼ, tu pʼataj u meyajeʼ ka suunaj Brasil utiaʼal u yáant u familia u kʼaj óoltoʼob Jéeoba. Yaʼab máakoʼob xan ku meyajoʼob tiʼ táanxel luʼumiloʼob tuʼux jach yaan ayikʼalileʼ, ken u kʼaj óoltoʼob le baʼax ku kaʼansik le Bibliaoʼ, ku chʼaʼatuklik u pʼatik u meyajoʼob yéetel ku suutoʼob tu luʼumiloʼob utiaʼal u kaʼanskoʼob tiʼ u láakʼtsiloʼob yéetel tiʼ uláakʼ máakoʼob le baʼax tsʼoʼok u kanikoʼoboʼ. Tuláakal le sukuʼunoʼobaʼ jach ku tsʼáaik u yóoloʼob kʼaʼaytaj jeʼex u beetik le misioneroʼoboʼ.
6. ¿Baʼax jeʼel k-beetik wa maʼ tu páajtal k-bin tuʼux maas kʼaʼabéet u kʼaʼaytaʼal le maʼalob péektsiloʼ?
6 Yaan J-jaajkunajoʼobeʼ ku binoʼob xan kajtal tiʼ uláakʼ kaajoʼob yaan tu luʼumiloʼob tuʼux maas kʼaʼabéet u kʼaʼaytaʼal le maʼalob péektsiloʼ, yéetel yaan uláakʼoʼobeʼ ku binoʼob áantaj táanxel luʼumil. Maʼ xaaneʼ toʼoneʼ maʼ tu páajtal k-bin áantaj tuʼux maas kʼaʼabéet j-kʼaʼaytajoʼob, baʼaleʼ jeʼel u páajtal k-beetik jeʼex Jesuseʼ yéetel k-maas tsʼáaik k-óol teʼ kʼaʼaytajoʼ.
Jéeobaeʼ ku kaʼanskoʼon
7. ¿Máakalmáak le escuelaʼob tsʼaʼan utiaʼal k-áantaʼal maas maʼalobkíint bix k-kʼaʼaytik le maʼalob péektsiloʼ?
7 Jeʼex tiʼ Jesús meyajnaj le baʼax kaʼansaʼabtiʼ tumen u Taataoʼ, toʼon xaneʼ unaj u meyajtoʼon tuláakal le baʼaxoʼob u beetmaj Jéeoba utiaʼal u kaʼanskoʼon teʼ kʼiinoʼobaʼ. Jesuseʼ tu yaʼalaj: «Tiʼ u tsʼíiboʼob le [profetaʼoboʼ] ku yaʼalaʼal beyaʼ: Bíin kaʼansaʼak tuláakal máak tumen Jajal Dios» (Juan 6:45; Isa. 54:13). Bejlaʼeʼ yaan escuelaʼob utiaʼal u kaʼansaʼal máak u maas maʼalobkíint bix u kʼaʼaytik u maʼalob péektsilil le Reinooʼ. Tuláakloʼoneʼ tsʼoʼok k-jóoʼsik utsil tiʼ u muchʼtáambalil Kaambalil utiaʼal Kaʼansaj ku yantal cada semanaoʼ. Le precursoroʼoboʼ ku páajtal xan u binoʼob teʼ Escuela tiʼ Servicio tiʼ Precursoroʼ; yéetel le úuch káajak u beetik u precursoriloʼoboʼ tsʼoʼok xan u páajtal u kaʼa binoʼob teʼ escuelaaʼ. Le ancianoʼob yéetel le siervo ministerialoʼoboʼ ku páajtal u binoʼob teʼ Escuela tiʼ Ministerio tiʼ le Reino utiaʼal u maas maʼalobkíintik bix u kaʼansajoʼob yéetel bix u yáantkoʼob le sukuʼunoʼoboʼ. Yéetel wa maʼ tsʼokaʼan u beeloʼobeʼ, le sukuʼunoʼobaʼ jeʼel xan u páajtal u binoʼob teʼ Escuela tiʼ Entrenamiento Ministerialoʼ, tuʼux ku kaʼansaʼaloʼob utiaʼal ka u yáantoʼob le sukuʼunoʼob u maas tsʼáa u yóoloʼob teʼ kʼaʼaytajoʼ. Tsʼoʼoleʼ, yaʼab tiʼ le sukuʼunoʼob yéetel kiikoʼob táan u meyajoʼob bey misioneroʼobeʼ tsʼoʼok u binoʼob xook teʼ Escuela Bíblica tiʼ Galaad tiʼ le Watchtoweroʼ.
8. ¿Baʼax ku beetik jujuntúul sukuʼunoʼob utiaʼal u kʼamikoʼob le kaʼansaj ku tsʼáaik Jéeobaoʼ?
8 Yaʼab J-jaajkunajoʼobeʼ tsʼoʼok u kʼaʼabéettal u pʼatkoʼob yaʼab baʼaloʼob utiaʼal u páajtal u binoʼob teʼ escuelaʼobaʼ. Utúul sukuʼun Yugu u kʼaabaʼeʼ, utiaʼal u bin teʼ Escuela tiʼ Entrenamiento Ministerial beetaʼab Canadaoʼ, yanchaj u pʼatik le meyaj yaan kaʼach tiʼoʼ tumen maʼ tsʼaʼab permiso tiʼiʼ. Le sukuʼunaʼ ku yaʼalik: «Maʼ yaj tin wóol úuchik in pʼatik le meyajoʼ; tumen wa ka tsʼaʼabakten permiso kaʼacheʼ yaan u páaʼtkoʼob ka pʼáatken meyaj mantatsʼ tu yéeteloʼob. Baʼaleʼ bejlaʼeʼ jeʼel u páajtal in beetik jeʼel baʼalak meyajil ka u tsʼáaten Jéeobaeʼ». Jeʼex k-ilkoʼ, yaʼab sukuʼunoʼobeʼ utiaʼal u kaʼansaʼaloʼob tumen Dioseʼ tsʼoʼok u pʼatikoʼob yaʼab baʼaloʼob jach koʼoj u tojol u yilkoʼob kaʼachi (Luc. 5:28).
9. Tsikbalt upʼéel baʼax uchaʼan ku yeʼesik jach jeʼel u taasik yaʼab utsiloʼob k-kaʼansik yéetel u jaajil k-óol le baʼax ku yaʼalik le Bibliaoʼ.
9 U kaʼansaʼal baʼax ku yaʼalik le Bibliaoʼ jach jeʼel u taasik yaʼab utsiloʼob wa ku beetik máak yéetel u jaajil u yóoleʼ (2 Tim. 3:16, 17). Koʼox tʼaan tiʼ Saulo, utúul chan paal Guatemalai, letiʼeʼ desde ka síijeʼ yaan talamil tiʼ utiaʼal u pʼáatal tu pool baʼax ku kaʼansaʼaltiʼ. Utúul tiʼ u profesoraʼobeʼ, tu yaʼalaj tiʼ u maama Sauloeʼ maʼ maʼalob ka u sen chokʼ u kan xookiʼ tumen leloʼ jeʼel u beetik u jach náakal u yóol u chan hijoeʼ. Le oʼolal Sauloeʼ tu pʼataj le escuelaoʼ yéetel maʼ tu kanaj xookiʼ. Baʼaleʼ utúul sukuʼuneʼ tu kaʼansaj xook yéetel u yáantaj le folleto Tsʼáa a wóol xook yéetel tsʼíib. Ka máan kʼiineʼ, Sauloeʼ tu kanaj xook ka tak joʼopʼ u máansik tsoltʼaanoʼob teʼ Kaambalil utiaʼal Kaʼansajoʼ. Upʼéel kʼiin le táan u kʼaʼaytaj u maama Saulooʼ, tu yilaj le profesora tsʼáaik kaʼach xook tiʼ u hijooʼ. Tu tsikbaltaj tiʼeʼ u hijoeʼ tsʼoʼok u kanik xook, le maestra túunoʼ tu yaʼalajtiʼ ka u taas u hijo ken suunak tuláakʼ semanaoʼ. Le ka bisaʼabeʼ, le maestraoʼ tu kʼáatajtiʼ: «¿Baʼax ken a kaʼansten Saulo?». Le chan xiʼipalaʼ joʼopʼ u xokiktiʼ upʼéel xóotʼol tiʼ le libro ¿Baʼax jach tu jaajil ku kaʼansik le Bibliaoʼ?, le maestra túunoʼ tu yaʼalaj: «¡Maʼ tu páajtal in creertik wa teech kaʼansken beoraaʼ!». Le táan u yokʼoloʼ tu méekʼaj Saulo.
Kaʼansaj ku kʼuchul tu puksiʼikʼal le máakoʼoboʼ
10. ¿Baʼax jach maʼalob jóoʼsaʼanil yantoʼon utiaʼal k-kaʼansik jach baʼax ku yaʼalik le Bibliaoʼ?
10 Tuláakal le baʼax tu kaʼansaj Jesusoʼ letiʼe baʼax kaʼansaʼabtiʼ tumen u Taataoʼ yéetel letiʼe baʼax ku yaʼalik xan le Kiliʼich Tsʼíiboʼoboʼ (Luc. 4:16-21; Juan 8:28). Toʼon xaneʼ k-beetik jeʼex Jesús ken k-chaʼa u nuʼuktikoʼon yéetel ken k-kaʼans jach baʼax ku yaʼalik le Bibliaoʼ. Wa k-beetik beyoʼ, upʼéeliliʼ bix ken k-tuukul yéetel upʼéeliliʼ baʼax ken k-kaʼans yéetel u maasil k-sukuʼunoʼoboʼ (1 Cor. 1:10). «Le palitsil chúukpajaʼan u yóol yéetel yaan u naʼat[oʼ]» ku jóoʼsik libroʼob, revistaʼob yéetel folletoʼob utiaʼal ka k-tsʼáa upʼéeliliʼ kaʼansaj tiʼ tuláakal u máakiloʼob le yóokʼol kaabaʼ. ¿Máasaʼ jach kiʼimak k-óol yoʼolal leloʼ? (Mat. 24:45; 28:19, 20.) Upʼéel tiʼ le jóoʼsaʼaniloʼobaʼ letiʼe libro ¿Baʼax ku kaʼansik le Bibliaoʼ?, le libroaʼ beetaʼan ich 179 jejeláas tʼaanoʼob.
11. ¿Bix úuchik u meyaj le libro ¿Baʼax ku kaʼansik le Bibliaoʼ?, tiʼ utúul kiik utiaʼal u yáantik utúul koʼolel jach pʼujaʼan kaʼachi?
11 K-kaʼansik le baʼax ku yaʼalik le Biblia yéetel u yáantaj le libro ¿Baʼax ku kaʼansik le Bibliaoʼ?, jeʼel u yáantaj utiaʼal ka u kʼex u modos le máaxoʼob pʼekmailoʼonoʼ. Lula, utúul precursora tiʼ u luʼumil Etiopíaeʼ, táan kaʼach u tsʼáaik xook tiʼ utúul koʼolel le ka téek ook utúul u láakʼtsilil le koʼolelaʼ ka joʼopʼ u yaʼalik maʼ kʼaʼabéettiʼob le baʼax ku kaʼansaʼaloʼ. Lulaeʼ maʼ tsʼíikilnaji, baʼaxeʼ yéetel u kettʼaanil le taakʼin falsotak ku chíikpajal teʼ 15 xookil tiʼ le libro ¿Baʼax ku kaʼansik le Bibliaoʼ?, tu yáantaj le koʼolel u naʼat baʼaxten kʼaʼabéet u kanaʼal baʼax ku yaʼalik le Bibliaoʼ. Le koʼolel túunoʼ chʼéen u tsʼíikil yéetel tu chaʼaj u seguer u xookoʼob. Tsʼoʼoleʼ, le ka suunaj Lula u tsʼáa le xookoʼ, tiʼ yaan kaʼach le koʼoleloʼ, tu kʼáataj xan ka kaʼansaʼak yéetel tu yaʼalaj jeʼel tak u boʼotik ka tsʼaʼabak xook tiʼeʼ. Maʼ xáanchaj ka joʼopʼ u xook óoxtéen tiʼ upʼéel semanai yéetel joʼopʼ u beetik xan kʼeexoʼob ichil u kuxtal.
12. Tsikbalt upʼéel baʼax uchaʼan ku yeʼesik le táankelem paalaloʼoboʼ jeʼel xan u páajtal u kaʼanskoʼob le baʼax ku yaʼalik le Bibliaoʼ.
12 Le táankelem paalaloʼoboʼ, jeʼel xan u páajtal u meyajtiʼob le libro ¿Baʼax ku kaʼansik le Bibliaoʼ?, utiaʼal u yáantik le máakoʼoboʼ. Tu luʼumil Hawaieʼ, Keanu, utúul chan paal 11 jaʼaboʼob yantiʼeʼ táan kaʼach u xokik teʼ escuela le libro ¿Baʼax ku kaʼansik le Bibliaoʼ?, le ka kʼáataʼabtiʼ tumen utúul u yéet xook baʼaxten maʼ tu táakpajal tiʼ le kʼiimbesajiloʼob jeʼex u maasil paalaloʼoboʼ. Keanueʼ, tu xokajtiʼ le baʼax ku yaʼalik le tipʼaʼanil ku kʼaabaʼtik «¿Kʼaʼabéet wa k-festejartik le kʼiimbesajiloʼob suuk u beetaʼaloʼoboʼ?». Tsʼoʼoleʼ tu yeʼesajtiʼ le xookoʼob ku taasik le librooʼ, ka tu kʼáatajtiʼ máakalmáak u kʼáat u xokiʼ, yéetel bey tu káajsil upʼéel xookoʼ. Tu mesil septiembre tiʼ 2006 tak agosto tiʼ 2007, u j-jaajkunajoʼob Jéeobaeʼ tu tsʼáajoʼob xook tiʼ 6,561,426 máakoʼob, yaʼab tiʼ letiʼobeʼ kaʼansaʼaboʼob yéetel le libro ¿Baʼax ku kaʼansik le Bibliaoʼ? Kux túun teech ¿táan wa xan a tsʼáaik xook yéetel le libroaʼ?
13. ¿Jach bukaʼaj u yáantik máak le baʼax ku kaʼansik le Bibliaoʼ?
13 U xokaʼal le Biblia yéetel u yáantaj le libro ¿Baʼax ku kaʼansik le Bibliaoʼ?, jach jeʼel u yáantik le máaxoʼob u kʼáat u beetoʼob baʼax utstutʼaan Diosoʼ. Tu luʼumil Noruegaeʼ, utúul sukuʼun yéetel u yatan ku meyajoʼob bey precursor especialileʼ tu káajsoʼob upʼéel xook yéetel utúul máak, u yatan yéetel óoxtúul u hijaʼob, ku taaloʼob tu luʼumil Zambia. Le máak yéetel u yatanaʼ maʼ u kʼáatoʼob kaʼach ka yanak uláakʼ u paalaloʼobiʼ, le oʼolal le ka pʼáat embarazadai le koʼolelaʼ, tu kaʼatúulal tu chʼaʼatukloʼob ka abortarnak. Baʼaleʼ jujumpʼéel kʼiinoʼob táanil tiʼ u binoʼob tu yiknal le doctoroʼ tu xokoʼob le capítulo ku kʼaabaʼtik «Ilawil le kuxtal jeʼex u yilik Diosoʼ». Le u yoochel le chaambal tu jobnel u maama ku chíikpajal teʼ librooʼ, jach tu beetaj u péek u yóoloʼob ka túun tu kʼexaj bix u tuukuloʼob. Le máak yéetel u yatanaʼ seguernaj u tsʼáaik ichil u kuxtaloʼob le baʼax ku kanikoʼoboʼ, yéetel le ka síij le chaambaloʼ, tu tsʼáajoʼob u kʼaabaʼ jeʼex u kʼaabaʼ le sukuʼun tsʼáaik xook tiʼob kaʼachoʼ.
14. Tsikbalt upʼéel baʼax uchaʼan ku yeʼesik baʼax jeʼel u yúuchul wa k-tsʼáaik ichil k-kuxtal le baʼax k-kaʼansikoʼ.
14 Jesuseʼ kʼaj óoltaʼab bey utúul jach maʼalob j-kaʼansajeʼ, tumen ku beetik kaʼach le baʼax ku kaʼanskoʼ. Jeʼex Jesuseʼ toʼoneʼ k-tsʼáaik xan ichil k-kuxtal le baʼax k-kaʼansikoʼ, yéetel yaʼab máakeʼ bey u yilkoʼoboʼ. Koʼox ilik upʼéel baʼax tu beetaj utúul kiik. Utúul máak tiʼ u luʼumil Nueva Zelanda yaan u negocioʼobeʼ jeʼekʼabtaʼab u cocheeʼ ka oklaʼab u portafolio. Le máakaʼ bin u yaʼal tiʼ le policíaʼob tsʼoʼok u yoklaʼaloʼ yéetel utúul tiʼ letiʼobeʼ tu yaʼalaj: «Jeʼel u páajtal a ka ilik a portafolio chéen wa utúul j-jaajkunaj ka u kaxte». Jach bey úuchikoʼ, utúul kiik ku tʼoxik periodicoʼob tu yotoch máakeʼ letiʼ kaxt le portafoliooʼ. Le ka tsʼaʼab u yojéelt tsʼoʼok u kaxtaʼal le portafoliooʼ, le máakaʼ bin tu najil le kiikoʼ yéetel jach kiʼimakchaj u yóol le ka tu yilaj chúukaʼan tuláakal le juʼunoʼob yaan kaʼachoʼ. Le kiikoʼ tu yaʼalaj: «In wojel kʼaʼabéet in sutiktech tumen teneʼ utúul u j-jaajkunajen Jéeoba». Le máakoʼ jach jaʼakʼ u yóol tumen kʼaʼajtiʼ le baʼax tu yaʼalaj le policíaeʼ. Leloʼ ku yeʼesikeʼ le máaxoʼob jach tu jaajil disipuloʼob tiʼ Jesuseʼ ku beetikoʼob jeʼex letiʼeʼ yéetel ku kuxtaloʼob jeʼex u yaʼalik le Bibliaoʼ (Heb. 13:18).
Unaj k-tratartik le máakoʼob jeʼex tu beetil Jesusoʼ
15, 16. ¿Bix jeʼel k-áantik le máakoʼob utiaʼal ka taakak u kankoʼob le baʼax ku kaʼansik le Bibliaoʼ?
15 Yoʼolal bix úuchik u tratartaʼal le máakoʼob tumen Jesusoʼ, yaʼab tiʼ letiʼobeʼ tu kʼamoʼob le maʼalob péektsiloʼ. Le máakoʼob uts u puksiʼikʼaloʼoboʼ jach utstutʼaan u yantaloʼob tu yéetel tumen letiʼeʼ ku yeʼesik kaʼach yaabilaj bey xan kabal óolal. Tu chʼaʼaj óotsilil tiʼob yéetel tu líiʼsaj u yóoloʼob yéetel utsil tʼaanoʼob, tsʼoʼoleʼ tu tsʼakaj xan yaʼab tiʼ letiʼobiʼ (xokaʼak Marcos 2:1-5). Toʼoneʼ maʼ tu páajtal k-beetik milagroʼob, baʼaleʼ jeʼel u páajtal k-eʼesik yaabilaj, kabal óolal yéetel chʼaʼa óotsilileʼ, le jatsʼuts modosoʼobaʼ ku yáantaj utiaʼal ka taakak u kaambal le máakoʼoboʼ.
16 Tariua, utúul kiik ku beetik u precursora especialil tiʼ upʼéel u islai Kiribati yaan teʼ Pacífico suroʼ, bin utsil tiʼ teʼ kʼaʼaytaj úuchik u chʼaʼik óotsililoʼ. Le kiikaʼ tʼaanaj tu yotoch utúul nojoch máak ku kʼaabaʼtik Beere, baʼaleʼ le máakaʼ tu yaʼalaj maʼ u kʼáat u yuʼub baʼax ku kʼaʼaytikiʼ. Le kiik túunaʼ tu tsʼáaj cuenta paralizado u búuj u wíinklil le máakaʼ ka tu chʼaʼaj óotsilil tiʼ. Tariuaeʼ tu kʼáatajtiʼ «¿A wojel wa baʼax u yaʼalmaj Dios u beetik yoʼolal le kʼojaʼanoʼob yéetel le chʼijaʼanoʼoboʼ?». Tsʼoʼoleʼ ka tu xokaj tiʼ upʼéel teksto tiʼ u libroi Isaías (xokaʼak Isaías 35:5, 6). Tumen jach jakʼaʼan u yóoleʼ, le máakaʼ tu yaʼalaj: «Úuch joʼopʼok in xokik le Bibliaoʼ yéetel kin kaʼansaʼal tumen utúul u misioneroi in religión, baʼaleʼ mix utéen kaʼach in xok lelaʼ». Beereeʼ joʼopʼ u tsʼaʼabal xook tiʼ yéetel tu beetaj kʼeexoʼob ichil u kuxtal ka tak okjaʼanajiʼ. Kex maʼ tu páajtal u xíimbal kaʼacheʼ, bejlaʼeʼ táan u yáantik u múuchʼ máakoʼob yanoʼob tiʼ upʼéel chan kaaj yéetel ku xíimbaltik tuláakal le isla utiaʼal u kʼaʼaytik le maʼalob péektsiloʼ.
Maʼ u jáawal k-beetik jeʼex Cristoeʼ
17, 18. 1) ¿Baʼax unaj k-beetik utiaʼal k-maas maʼalobkíintik bix k-kʼaʼaytaj? 2) ¿Baʼax ken u kʼam le máaxoʼob jach ku tsʼáaik u yóoloʼob teʼ kʼaʼaytajoʼ?
17 Le tsikbaloʼob tiʼ bix tsʼoʼok u bin utsil tiʼ le sukuʼunoʼob teʼ kʼaʼaytajoʼ, ku yeʼesik jach jeʼel xan u bintoʼon utsil wa k-ilik ka yanaktoʼon le jatsʼuts modosoʼob anchaj tiʼ Jesusoʼ. Le oʼolaleʼ, unaj k-beetik jeʼex Cristoeʼ yéetel unaj xan k-tsʼáaik óol teʼ kʼaʼaytajoʼ.
18 Le ka joʼopʼ u beetikubaʼob disipuloʼob tiʼ Cristo jujuntúul máakoʼob teʼ yáax siglooʼ, Pedroeʼ tu kʼáataj: «¿Baʼax túun kun antaltoʼon?». Jesuseʼ tu núukajtiʼ: «Tuláakal máax tsʼoʼok u pʼatik najoʼob, wa sukuʼunoʼob, wa kiikoʼob, wa taata, wa maama, wa atan, wa paalal, wa luʼumoʼob tin woʼolaleʼ, bíin u kʼam ciento u téenel u [maas] yaʼabil, yéetel bíin u kʼam xan le kuxtal minaʼan u xuuloʼ» (Mat. 19:27-29). Leloʼ jach letiʼe baʼax ken k-kʼam xan wa maʼ tu jáawal k-beetik jeʼex Jesucristo, u maas nojchil le misioneroʼoboʼ.
¿Baʼax jeʼel a núukikeʼ?
• ¿Baʼaxoʼob u tsʼaamaj Jéeoba utiaʼal u kaʼanskoʼon kʼaʼaytaj?
• ¿Baʼaxten jach ku taasik utsil u meyaj tiʼ máak le libro ¿Baʼax ku kaʼansik le Bibliaoʼ?, teʼ kʼaʼaytajoʼ?
• ¿Bix jeʼel k-tratartik le máakoʼob jeʼex úuchik u beetik Jesusoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 17]
Le ka tʼanaʼab Pedro, Andrés, Santiago yéetel Juan ka u tsaypachtoʼob Jesuseʼ, tu séebaʼanil tu tsaypachtoʼob
[U tsolajil le oochel teʼ táan juʼun 19]
Le libro ¿Baʼax ku kaʼansik le Bibliaoʼ?, upʼéel tiʼ le jóoʼsaʼaniloʼob ku yáantkoʼon k-tsʼáa upʼéeliliʼ kaʼansaj tiʼ tuláakal le máakoʼoboʼ