Jéeobaeʼ ku chʼenxikintik k-payalchiʼob

«[Jéeobaeʼ] u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob.» (SAL. 34:15.)

1, 2. 1) ¿Bix u yuʼubikuba yaʼab máakoʼob teʼ kʼiinoʼobaʼ? 2) ¿Baʼaxten maʼ tu jaʼakʼal k-óol ken k-il le baʼaxoʼob ku yúuchul teʼ kʼiinoʼobaʼ?

¿TÁAN wa a máansik upʼéel nojoch muʼyajil? Wa beyoʼ, kʼaʼajaktecheʼ yaʼab xan uláakʼ máaxoʼob táan u muʼyajoʼob. Sáamsamaleʼ u millonesi máakoʼob táan u aktáantkoʼob nukuch muʼyajiloʼob teʼ kʼasaʼan yóokʼol kaabaʼ. Jujuntúul tiʼ letiʼobeʼ ku yuʼubikoʼob bey maʼ tu páajtal u chúukpajal u yóol u aktáantoʼobeʼ. Ku yuʼubkubaʼob jeʼex David, le máax tu yaʼalaj: «Takʼan yaj in wuʼuyik in wíinklil táan in wuʼuyik jach minaʼan in muukʼ; ¡in wáakamoʼobeʼ u yáakamoʼob in puksiʼikʼal! Táan u titipʼaankil in puksiʼikʼal, táan xan u xuʼupul in muukʼoʼob; tak u sáasil in wicheʼ táan u yéekʼjochʼeʼental» (Sal. 38:8, 10).

² Toʼon k-meyajtik Jéeobaeʼ maʼ tu jaʼakʼal k-óol ken k-il bukaʼaj muʼyajiloʼob yaan teʼ kʼiinoʼobaʼ, tumen k-ojleʼ ichil le baʼaxoʼob kun chíikbesik tsʼoʼok u káajal u gobernar Cristoeʼ, táakaʼan xan le «kʼiʼinamiloʼob» kun muʼyajtbiloʼ (Mar. 13:8, LTN; Mat. 24:3). Le tʼaan griego ku sutaʼal «kʼiʼinamiloʼob[oʼ]», ku meyaj utiaʼal u yúuchul tʼaan tiʼ le nojoch muʼyaj ku yantal tiʼ utúul koʼolel le táan u síijil u chaambaloʼ. Le muʼyajilaʼ jach maʼalob u chíikbesik bukaʼaj yajil le baʼax ku muʼyajtik le wíinikoʼob teʼ «yaayaj kʼiinoʼob[aʼ]» (2 Tim. 3:1, LTN).

Jéeobaeʼ u kʼaj óol baʼaxoʼob k-muʼyajtik

3. ¿Baʼax jach u yojel le máaxoʼob meyajtik Diosoʼ?

³ Toʼon k-meyajtik Dioseʼ jach k-ojel yaniliʼi k-muʼyajtik xan le talamiloʼob yanoʼob teʼ yóokʼol kaabaʼ yéetel k-ojel yaan u maas yaʼabtaloʼob. Tsʼoʼoleʼ maʼ chéen yaan k-muʼyajtik le baʼaloʼob ku yúuchul tiʼ u maasil máakoʼoboʼ, tiʼ toʼoneʼ yaan utúul enemigo, le Kʼaasilbaʼaloʼ, letiʼeʼ u kʼáat u náachkuntoʼon tiʼ Jéeoba (1 Ped. 5:8). Lelaʼ maʼ xaaneʼ jeʼel u beetik k-uʼuyikba jeʼex tu yuʼubiluba Davidaʼ: «Le poochʼiloʼoboʼ tsʼoʼok u beetikoʼob loob tin puksiʼikʼal; ¡minaʼan in wóol mix xan in muukʼ! Chéen kunel in kaxtik máax u chʼaʼaten óotsilil, máax kun u kiʼimakkúunt in wóol» (Sal. 69:20).

4. ¿Baʼax jeʼel u líiʼsik k-óol ken k-máans muʼyajiloʼobeʼ?

⁴ Yéetel le tʼaanoʼobaʼ, ¿táan wa kaʼach u yaʼalik David tsʼoʼok u pʼáatal minaʼan máax áantik? Maʼatech. Tumen teʼ salmo xanaʼ tu yaʼalaj: «[Jéeobaeʼ] ku yuʼubik le óotsiloʼoboʼ yéetel maʼ táan u kúulpachkintik le utiaʼaloʼob, kʼalaʼanoʼoboʼ» (Sal. 69:33). Yaan kʼiineʼ k-uʼuyik xan bey minaʼan xuʼulul tiʼ le muʼyajiloʼoboʼ. Maʼ xaaneʼ jeʼel tak k-tuklikeʼ u maasiloʼobeʼ maʼ tu naʼatkoʼob baʼax ku yúuchultoʼon, lelaʼ yaan kʼiineʼ jach bey u yúuchloʼ. Baʼaleʼ jeʼex Davideʼ, toʼoneʼ jach yaan xan u líikʼil k-óol ken k-ojéelt Jéeobaeʼ jach u kʼaj óol baʼaxoʼob k-muʼyajtik (Sal. 34:15).

5. ¿Baʼax jach u yojel Salomón ken u beet Dios?

⁵ Salomón, u hijo Davideʼ, le ka tu kʼubaj le templo yaan Jerusalenoʼ, tu yeʼeseʼ Jéeobaeʼ jach u kʼaj óol baʼaxoʼob k-muʼyajtik (xokaʼak 2 Crónicas 6:29-31). Letiʼeʼ tu kʼáat óoltaj tiʼ Jéeoba ka u chʼenxikint u payalchiʼ tuláakal le máaxoʼob yéetel u jaajil u yóol ku tsʼáaikoʼob u yojéelt «u loolob óol[oʼob] yéetel u mukʼyaj[oʼoboʼ]». ¿Baʼax túun ken u beet Dios ken u yuʼub kaʼach le payalchiʼobaʼ? Salomoneʼ jach u yojel kaʼach maʼ chéen yaan u chʼenxikint Dios u payalchiʼ le máakoʼobaʼ, yaan xan u núukikoʼob. ¿Baʼaxten? Tumen Jéeobaeʼ jach tu jaajil u kʼaj óol baʼax yaan tu puksiʼikʼal wíinik.

6. ¿Baʼax jeʼel u yáantkoʼon k-aktáant le baʼaxoʼob beetik k-muʼyajoʼ, yéetel baʼaxten?

⁶ Toʼon xaneʼ jeʼel u páajtal k-aʼalik tiʼ Jéeoba  ich payalchiʼ tuláakal le «mukʼyaj[iloʼob]» k-aktáantikoʼ. Yéetel jach ku líiʼsik k-óol ojéeltik letiʼeʼ ku naʼatik bix k-uʼuyikba yéetel ku kanáantkoʼon. Le apóstol Pedrooʼ tu yeʼesaj jach jaaj bey u beetik Jéeobaoʼ, letiʼeʼ tu yaʼalaj: «Pʼateʼex tuláakal a yaayam óolaleʼex tu kʼab Jajal Dios, tumen letiʼeʼ u tsʼaamaj u yóol u kanáanteʼex» (1 Ped. 5:7). Jach beyoʼ, Jéeobaeʼ maʼ chéen ku yilik baʼax ku yúuchultoʼoniʼ. Jesuseʼ tu yeʼesaj bix u kanáantkoʼon Jéeoba, letiʼeʼ tu yaʼalaj: «¿Maʼ wa tu koʼonol kaʼatúul mejen chʼíichʼoʼob tu yoʼolal jumpʼéel chan taakʼiniʼ? Baʼaleʼ mix juntúul tiʼ letiʼob ku lúubul luʼum wa maʼ tu [yojéeltik, NM] a Taataʼex. Tumen tak u tsoʼotsel a pooleʼexeʼ láaj xokaʼan tu jujunkúulil. Maʼ a chʼaʼikeʼex sajakil túun: teʼexeʼ maas yaan a tojoleʼex tiʼ yaʼab mejen chʼíichʼoʼob» (Mat. 10:29-31).

Jeʼel u páajtal k-kʼubik óol yaan k-áantaʼal tumen Jéeobaeʼ

7. ¿Máax jeʼel u páajtal u yáantkoʼoneʼ?

⁷ Jeʼel baʼalak talamil ka k-aktáanteʼ, maʼ u tuʼubultoʼoneʼ Jéeobaeʼ jach yaan páajtalil tiʼ utiaʼal u yáantkoʼon yéetel u kʼáat u beete. Le Bibliaoʼ ku yaʼalik: «Yuumtsil [Jéeobaeʼ] k-taʼakbesajil, Yuumtsileʼ k-muukʼ, ku tsʼáaik tiʼ toʼon áantajil ichil k-yaayaj óolalil» (Sal. 34:15-18; 46:1). ¿Bix u tsʼáaiktoʼon áantaj? Koʼox ilik baʼax ku yaʼalik 1 Corintoiloʼob 10:13: «Teʼexeʼ ku páajtal a alab óoltikeʼex Jajal Dios, tumen letiʼeʼ maʼ bíin [u] pʼat u túuntaʼal a wóoleʼex maas tiʼ le ku páajtal a mukʼyajtikeʼexoʼ. Baʼaleʼ le ken taalak le túuntaj óolaloʼ Jajal Dios túuneʼ bíin u tsʼáa xan bix jeʼel u páajtal a jóokʼoleʼexiʼ». Maʼ xaaneʼ Jéeobaeʼ jeʼel u chʼaʼatuklik u luʼsik le baʼax beetik k-muʼyajoʼ. Wa maʼ xaan xaneʼ, jeʼel u chʼaʼatuklik u tsʼáaiktoʼon u muukʼil utiaʼal k-aktáantikeʼ. Baʼaleʼ jeʼel máakalmáak ka u chʼaʼatukult u beetkeʼ, jeʼel u páajtal k-kʼubik óol yaan u yáantkoʼoneʼ.

8. ¿Baʼax unaj k-beetik utiaʼal u yáankoʼon Dios?

⁸ ¿Baʼax unaj k-beetik utiaʼal k-kʼamik u yáantaj Dios? Kʼaʼajaktoʼoneʼ apóstol Pedroeʼ tu yaʼalaj baʼax unaj k-beetik: «Pʼateʼex tuláakal a yaayam óolaleʼex tu kʼab Jajal Dios». Lelaʼ u kʼáat u yaʼal k-pʼatik tu kʼab Jéeoba le talamil yantoʼonoʼ, wa k-ilik maʼ k-sen chiʼichnaktal tu yoʼolaloʼob yéetel u chúukpajal k-óol páaʼt u yáantaj (Mat. 6:25-32). Lelaʼ u kʼáat u yaʼal xaneʼ unaj k-kʼubik óol tiʼ Dios, maʼ tiʼ k-muukʼiʼ mix tiʼ le naʼatil yantoʼonoʼ. Baʼaleʼ utiaʼal k-beetik lelaʼ kʼaʼabéet u yantaltoʼon kabal óolal. Ken k-tsʼáaba «yáanal u páajtalil u kʼab Jajal Dios[eʼ]», k-eʼesik letiʼeʼ maas yaan u páajtalil tiʼ toʼon (xokaʼak 1 Pedro 5:6). Ken k-beet beyaʼ, maas maʼ kun talamtaltoʼon k-aktáantik le talamiloʼob ku chaʼik Jéeoba u yantaltoʼonoʼ. Kex tumen k-kʼáat séebaʼan ka utsak le talamil k-muʼyajtikoʼ, k-kʼubik óol tiʼ Jéeoba tumen letiʼeʼ u yojel jach baʼax kʼiin yéetel bix ken u yáantiloʼon (Sal. 4:7; Isa. 41:10).

9. ¿Baʼax yaayam óolalil tu pʼataj David tiʼ Jéeoba?

⁹ Tuukulnakoʼon tiʼ le baʼax tu yaʼalaj David teʼ Salmo 55:22: «Pʼat a yaayam óolaloʼob tiʼ Yuumtsil [Jéeoba], letiʼ túuneʼ yaan u tsʼáaiktech jeetsʼel; mix bikʼin bíin u chaʼa u lúubul le máax toj u kuxtaloʼ». Le ka tu tsʼíibtaj le tʼaanoʼobaʼ, Davideʼ jach yaachajaʼan kaʼach u yóol (Sal. 55:4). Maʼ xaaneʼ letiʼe kʼiinoʼob ka líikʼ Absalón, u hijo, tu contraoʼ yéetel tu luʼsaj le reino tiʼoʼ. Tsʼoʼoleʼ Davideʼ traicionartaʼab xan tumen Ahitofel, le máax yéetel ku jach biskuba kaʼachoʼ. Utiaʼal maʼ u kíimsaʼaleʼ, Davideʼ kʼaʼabéetchaj u lukʼul Jerusalén (2 Sam. 15:12-14). Kex tumen táan kaʼach u aktáantik le talamiloʼobaʼ, Davideʼ maʼ xuʼul u kʼubik u yóol tiʼ Jéeobaiʼ, yéetel mantatsʼ áantaʼabi.

10. ¿Baʼax unaj k-beetik ken k-aktáant talamiloʼob?

¹⁰ Jeʼex tu beetil Davideʼ, toʼon xaneʼ kʼaʼabéet k-payalchiʼ tiʼ Jéeoba utiaʼal k-tsʼáaik u yojéelt baʼax talamiloʼob táan k-aktáantik. Koʼox ilik baʼax ku yaʼalik apóstol Pablo unaj k-beetik (xokaʼak Filiposiloʼob 4:6, 7). ¿Baʼax utsiloʼob ken k-kʼam wa mantatsʼ k-payalchiʼ tiʼ Dios? Le Bibliaoʼ ku yaʼalik: «Jajal Dios túuneʼ bíin u tsʼáateʼex jeetsʼel óolal, lelaʼ maas nojoch tiʼ le ku páajtal u naʼatik máakoʼ; le jeetsʼel óolal bíin u kanáant a puksiʼikʼaleʼex yéetel a tuukuleʼex tiʼ Cristo Jesús».

11. Le «jeetsʼel óolal» ku taal tiʼ Diosoʼ, ¿bix u kanáantik k-tuukul yéetel k-puksiʼikʼal?

¹¹ ¿Jeʼel wa u yutstal le talamiloʼob yantoʼon wa k-payalchiʼoʼ? Maʼ xaaneʼ jeʼeleʼ, baʼaleʼ kʼaʼabéet k-naʼatkeʼ yaan kʼiineʼ Jéeobaeʼ maʼatech u núukik k-payalchiʼob jeʼex k-kʼáat ka u beetoʼ. Kex beyoʼ, k-payalchiʼobeʼ yaan u yáantkoʼon  utiaʼal maʼ k-sen chiʼichnaktal yéetel utiaʼal maʼ u jach lúubul k-óol. Le «jeetsʼel óolal» ku tsʼáaik Diosoʼ yaan u beetik k-uʼuyikba maʼalobil yéetel yaan u kanáantik k-tuukul bey xan k-puksiʼikʼal ken k-aktáant upʼéel talamil, jeʼex u beetik le soldadoʼob ku kanáantikoʼob upʼéel kaaj ku taal baʼatelbil tumen le enemigoʼoboʼ. Le jeetsʼeliloʼ yaan u yáantkoʼon utiaʼal maʼ k-sajaktal, utiaʼal maʼ k-tuklik wa maʼ ken k-áantbil, utiaʼal maʼ u yantaltoʼon tuukuloʼob maʼ maʼalobtakiʼ yéetel utiaʼal maʼ k-jáan beetik upʼéel baʼal táanil tiʼ k-tuklik tubeel (Sal. 145:18).

12. Aʼal upʼéel baʼax eʼesik jeʼel u páajtal u yantaltoʼon jeetsʼel óolal kex táan k-aktáantik talamileʼ.

¹² ¿Jeʼel wa u páajtal u yantaltoʼon jeetsʼel óolal ken k-aktáant talamiloʼobeʼ? Koʼox ilik upʼéel baʼax eʼesik jeʼel u páajtal u yantaltoʼoneʼ. Utúul j-meyajeʼ, jach maʼ maʼalob u tratartaʼal tumen u supervisoriʼ. Baʼaleʼ upʼéel kʼiineʼ, le j-meyajaʼ páajchaj u tsikbaltik bix u tratartaʼal tiʼ u yuumil le empresaoʼ, le máakaʼ jach uts u modos. Letiʼeʼ tu yaʼalaj tiʼ le j-meyaj jach ku naʼatik bix u yuʼubikubaoʼ yéetel tu yaʼalajtiʼ maʼ kun xáantal ken luʼsaʼak le kʼasaʼan máak u beet u supervisoriloʼ. Lelaʼ ¿bix ken u beet u yuʼubikuba kaʼach le j-meyajoʼ? Le ken u yil ku naʼataʼal bix u yuʼubikuba tumen u patrón yéetel maʼ kun xáantal ken xuʼuluk le talamil ku aktáantikoʼ, ku chʼaʼatuklik u maas tsʼáaik u yóol meyaj, kex yaan u kʼaʼabéetchajal u chúukpajal u yóol u aktáant le talamiloʼob le maʼ kʼeʼexek u supervisoroʼ. Toʼon xaneʼ k-ojel Jéeobaeʼ ku naʼatik baʼaxoʼob k-muʼyajtik. Tsʼoʼoleʼ letiʼeʼ ku yaʼaliktoʼoneʼ, maʼ kun xáantaleʼ «yaan u tojolchʼintaʼal le máax ku tusbel way yóokʼol kaabeʼ» (Juan 12:31). ¿Máasaʼ jach ku líiʼsik k-óol ojéeltik lelaʼ?

13. Ken tsʼoʼokok k-payalchiʼeʼ, ¿baʼax uláakʼ unaj k-beetik?

¹³ ¿U kʼáat wa túun u yaʼaleʼ, chéen yaan yéetel ka k-aʼal tiʼ Jéeoba baʼax talmiloʼob táan k-aktáantik? Maʼatech; yaan uláakʼ baʼax kʼaʼabéet k-beetik. Ken tsʼoʼokok k-payalchiʼeʼ, kʼaʼabéet k-beetik jeʼex t-kʼáatoʼ. Le ka túuxtaʼab kíimsbil tumen rey Sauleʼ, Davideʼ tu kʼáat óoltaj: «In [Dios,] token tiʼ in j-pʼeekoʼob, token tiʼ máaxoʼob loobiltiken. Token tiʼ le kʼasaʼan máakoʼoboʼ, token tiʼ le loolob wíinikoʼoboʼ» (Sal. 59:1, 2). Baʼaleʼ Davideʼ maʼ chéen payalchiʼinaji, tu yuʼubaj xan baʼax aʼalaʼabtiʼ tumen u yataneʼ ka púutsʼi (1 Sam. 19:11, 12). Toʼon xaneʼ jeʼel u páajtal k-kʼáatik ka tsʼaʼabaktoʼon naʼatil utiaʼal k-ilik bix jeʼel u páajtal u chúukpajal k-óol aktáant wa utiaʼal k-utskíintik le talamiloʼob yantoʼonoʼ (Sant. 1:5).

¿Bix jeʼel u yantaltoʼon u muukʼil utiaʼal u chúukpajal k-óoleʼ?

14. ¿Baʼax jeʼel u yáantkoʼon utiaʼal ka chúukpajak k-óol aktáant le talamiloʼoboʼ?

¹⁴ Maʼ xaaneʼ maʼ kun jáan xuʼulul le talamiloʼob táan k-máansikoʼ. Wa ku yúuchul beyoʼ, ¿baʼax jeʼel u yáantkoʼon utiaʼal ka chúukpajak k-óoleʼ? Yáaxeʼ, letiʼe k-kʼaʼajsik wa ku chúukpajal k-óol meyajt Dios kex táan k-aktáantik talamiloʼobeʼ, k-eʼesik k-yaabilmaj (Hch. 14:22). Kʼaʼajaktoʼoneʼ Satanaseʼ tu yaʼalaj tiʼ Dios yoʼolal Job: «Maʼ chéen kunel u meyajtikech yéetel chúukaʼan óolaliʼ. Techeʼ, maʼ ta chaʼik u beetaʼal mix baʼal tiʼ letiʼ, mix tiʼ u láakʼtsiloʼob, mix tiʼ le baʼaloʼob yantiʼob; techeʼ, ka beetik u bin utsil tiʼ tu yéetel tuláakal baʼax ku beetik, sen yaʼab u yaalakʼ, letiʼeʼ [u maas] ayikʼalil tiʼ tuláakal le luʼumoʼobaʼ. Baʼaleʼ, láaj lukʼes baʼax yaan tiʼ ka a wilaʼa wa maʼ tu loolob kʼaakʼas tʼantikech tu táan a wich» (Job 1:9-11). Baʼaleʼ Jobeʼ chúukpaj u yóol beyoʼ tu yeʼesaj maʼ jaaj le baʼax aʼalaʼab tu yoʼolaloʼ. Wa ku chúukpajal k-óol aktáant le talamiloʼoboʼ yaan xan k-eʼesik chéen táan u tuus Satanás. Tsʼoʼoleʼ ken xan chúukpajak k-óoleʼ, ku maas muʼukʼaʼantal k-kʼub óolal yéetel k-fe tiʼ Jéeoba (Sant. 1:4).

15. ¿Baʼax tsikbaliloʼob jeʼel u líiʼsik k-óoleʼ?

¹⁵ U kaʼapʼéel baʼax kun áantkoʼon utiaʼal ka chúukpajak k-óoleʼ, letiʼe ka kʼaʼajaktoʼon k-sukuʼunoʼob «tiʼ tuláakal yóokʼol kaabeʼ táan u  mukʼyajtikoʼob xan le baʼaloʼob [k-muʼyajtikoʼ]» (1 Ped. 5:9). Jach beyoʼ, «le túuntaj óolaloʼob» k-mukʼyajtikeʼexoʼ «keet yéetel le ku mukʼyajtik tuláakal máakoʼ» (1 Cor. 10:13). Le oʼolaleʼ, maʼ unaj k-sen chiʼichnaktal yoʼolal le talamiloʼob yantoʼonoʼ, baʼaxeʼ maʼalob ka tuukulnakoʼon tiʼ le sukuʼunoʼob tsʼoʼok u chúukpajal u yóol u aktáantoʼob le talamiloʼoboʼ. Wa k-beetik beyoʼ yaan xan u yantaltoʼon u muukʼil yéetel maʼ ken k-sajaktal aktáantoʼob (1 Tes. 1:5-7; Heb. 12:1). ¿Yaan wa máax a kʼaj óol tsʼoʼok u chúukpajal u yóol u meyajt Dios kex táan u aktáantik talamiloʼob? Tuukulnakoʼon tiʼ baʼax jeʼel k-kanik tiʼ le baʼax tu beetoʼ. ¿Tsʼoʼok wa k-xokik u tsikbalil u kuxtal jujuntúul sukuʼunoʼob tsʼoʼok xan u máanskoʼob upʼéel talamil jeʼex le k-aktáantikoʼ? Wa k-xokikoʼobeʼ yaan u jach líiʼskoʼob k-óol.

16. ¿Bix u líiʼsik k-óol Dios ken k-aktáant talamiloʼob?

¹⁶ U yóoxpʼéel baʼax kun áantkoʼon utiaʼal u chúukpajal k-óol aktáant le talamiloʼoboʼ, letiʼe k-kʼaʼajsik Jéeobaeʼ letiʼe «Taata ku chʼaʼik tiʼ toʼon óotsililoʼ yéetel le Jajal Dios ku kiʼimakkúuntik k-óol mantatsʼoʼ. Jajal Dioseʼ ku kiʼimakkúuntik k-óol tiʼ tuláakal k-mukʼyajoʼob, utiaʼal ka páatak k-kiʼimakkúuntik u yóol le máaxoʼob ku mukʼyajoʼoboʼ, ikil k-tsʼáaiktiʼob le kiʼimak óolal u tsʼaamajtoʼon Jajal Diosoʼ» (2 Cor. 1:3, 4). Jach beyoʼ, Jéeobaeʼ tiaʼan t-iknal utiaʼal u líiʼs k-óol yéetel utiaʼal u tsʼáatoʼon muukʼ, maʼ chéen utiaʼal k-aktáantik le talamil yantoʼon beoraaʼ, baʼaxeʼ ku yáantkoʼon mantatsʼ «tiʼ tuláakal k-mukʼyajoʼob». Lelaʼ ku yáantkoʼon xan utiaʼal k-líiʼs u yóol u maasil «ku mukʼyajoʼoboʼ». Pablo, le máax tsʼíibt le tʼaanoʼobaʼ, jach u yojel ku yáantaʼal máak tumen Dios (2 Cor. 4:8, 9; 11:23-27).

17. ¿Bix jeʼel u yáantkoʼon le Biblia utiaʼal ka chúukpajak k-óol aktáant u talamiloʼob le kuxtalaʼ?

¹⁷ U kampʼéel baʼax áantkoʼoneʼ, letiʼe Bibliaoʼ, tumen lelaʼ «maʼalob xan utiaʼal kaʼansaj, utiaʼal u yaʼalaʼal u nuʼukul, utiaʼal tsolxikin, utiaʼal u kaʼansajil tiʼibil óolal; tioʼolal ka utsil chúukaʼanchajak le máak ku meyajtik Jajal Dios, uts kaʼansaʼanil utiaʼal tuláakal maʼalob meyaj» (2 Tim. 3:16, 17, LTN). Le Bibliaoʼ ku yáantik máak utiaʼal ka chúukpajak u yóol u aktáant u chiʼichnakiloʼob le kuxtalaʼ, tumen maʼ chéen ku yáantik máak utiaʼal ka «chúukaʼanchajak» yéetel «[kaʼansaʼan] utiaʼal tuláakal maʼalob meyaj[iʼ]», baʼaxeʼ utiaʼal ka «utsil chúukaʼanchajak» yéetel ka pʼáatak «uts kaʼansaʼanil». Le tʼaan griego ku suʼutul «uts kaʼansaʼanil», u kʼáat u yaʼaleʼ «chuup yéetel baʼax kʼaʼabéet» wa «jach u nuʼukbesmuba utiaʼal u beet upʼéel wa baʼax». Úuchjeakileʼ, le tʼaanaʼ ku meyaj xan utiaʼal u yúuchul tʼaan tiʼ upʼéel barco ku chupaʼal yéetel tuláakal baʼax kʼaʼabéet utiaʼal u beetaʼal upʼéel viaje, yaan kʼiin xaneʼ ku meyaj utiaʼal u yúuchul tʼaan tiʼ upʼéel máquina tsʼoʼok u nuʼukbesaʼal utiaʼal u beet u meyaj. Bey túun xanoʼ, yéetel le Bibliaoʼ Jéeobaeʼ ku tsʼáaik baʼax kʼaʼabéettoʼon utiaʼal ka chúukpajak k-óol aktáant jeʼel baʼalak talamil ka yanaktoʼoneʼ. Le oʼolal jeʼel u páajtal k-aʼalik: «Wa Dios ku chaʼik u yantalten le talamiloʼ, jeʼel xan  u páajtal u chúukpajal in wóol in aktáant yéetel u yáantajeʼ».

Taʼaytak u luʼsaʼal tuláakal baʼax k-muʼyajtik

18. ¿Baʼax unaj k-kʼaʼajsik mantatsʼ utiaʼal ka chúukpajak k-óol aktáant le talamiloʼoboʼ?

¹⁸ U cinco baʼax kun áantkoʼoneʼ, letiʼe k-kʼaʼajsik mantatsʼ natsʼaʼan u kʼiinil u luʼsaʼal tumen Jéeoba tuláakal le baʼaxoʼob beetik u muʼyaj máakoʼ (Sal. 34:19; 37:9-11; 2 Ped. 2:9). Baʼaleʼ maʼ chéen yaan u luʼsik le baʼaxoʼob ku beetik k-muʼyaj bejlaʼoʼ, baʼaxeʼ yaan u tsʼáaiktoʼon u páajtalil k-kuxtal utiaʼal mantatsʼ, teʼ kaʼanoʼ wa teʼ Luʼum sutaʼan Paraísoiloʼ.

19. ¿Baʼaxoʼob unaj k-beetik utiaʼal ka chúukpajak k-óol aktáant le talamiloʼoboʼ?

¹⁹ ¿Máasaʼ jach k-kʼáat ka séeb kʼuchuk u kʼiinil tuʼux maʼ kun antal mix upʼéel tiʼ le baʼaxoʼob ku beetik k-muʼyaj bejlaʼoʼ? (Sal. 55:6-8.) Baʼaleʼ le maʼ kʼuchuk le kʼiinaʼ, kʼaʼabéet u seguer u chúukpajal k-óol. Wa ku chúukpajal k-óol aktáant le talamiloʼoboʼ, yaan k-eʼesik chéen táan u tuus Satanás. Wa k-payalchiʼ mantatsʼ yéetel k-tuukul tiʼ le sukuʼunoʼob táan xan u máanskoʼob le talamiloʼob jeʼex le yantoʼonoʼ, yaan u yantaltoʼon u muukʼil utiaʼal u chúukpajal k-óol aktáantoʼob. Wa k-xokik le Bibliaoʼ, yaan k-utsil chúukaʼanchajal yéetel yaan k-utsil kaʼansaʼal utiaʼal tuláakal maʼalob meyaj. Yéetel mantatsʼ unaj k-kʼubik óol, yaan k-kanáantaʼal yéetel yaabilaj tumen Jéeoba, «le Jajal Dios ku kiʼimakkúuntik k-óol[oʼ] ». Maʼ u tuʼubultoʼoneʼ, «[Jéeobaeʼ] u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob» (Sal. 34:15).

¿A wojel wa u núukil?

• ¿Bix tu yuʼubiluba David le ka tu aktáantaj nukuch talamiloʼoboʼ?

• ¿Baʼax jach u yojel kaʼach rey Salomón ken u beet Jéeoba?

• ¿Baʼaxoʼob jeʼel u yáantkoʼon k-aktáant le talamiloʼob ku chaʼik Jéeoba u yantaltoʼonoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 15]

Davideʼ maʼ chéen payalchiʼinaj tiʼ Jéeoba yéetel tu pʼataj tu kʼab baʼax ku muʼyajtikiʼ, tu beetaj xan jeʼex úuchik u kʼáatikoʼ