¿K-ilik wa u maasil jeʼex u yilaʼaloʼob tumen Jéeobaoʼ?
¿K-ilik wa u maasil jeʼex u yilaʼaloʼob tumen Jéeobaoʼ?
«Maʼ u yantal jatslantáambail tiʼ le wíinkliloʼ, baʼaleʼ tuláakal u xéexetʼal le wíinkliloʼ ka u paklan kanáantubaʼob.» (1 COR. 12:25.)
1. ¿Bix ta wuʼuyilaba ka ookech ichil u kaajal Jéeoba?
¿KʼAJAʼAN wa toʼon bix úuchik k-uʼuyikba le ka t-pʼataj le kʼasaʼan yóokʼol kaab yéetel ka ookoʼon ichil u kaajal Jéeobaoʼ? Maʼ xaaneʼ le yaabilaj tu yeʼesajtoʼon le sukuʼunoʼoboʼ tu beetaj u jach kiʼimaktal k-óol. T-ileʼ ichil u kaajal Jéeobaeʼ minaʼan mix upʼéel tiʼ le baʼaxoʼob yanoʼob tu yóokʼol kaab Satanás, jeʼex le kʼasaʼan máakoʼoboʼ, le pʼekbailoʼ mix le baʼateloʼoboʼ. U jaajileʼ, bey ookoʼon tiʼ upʼéel paraíso tuʼux jach yaan kiʼimak óolal yéetel jeetsʼelileʼ (Isa. 48:17, 18; 60:18; 65:25).
2. 1) ¿Baʼax jeʼel u beetik u xuʼulul k-ilik yéetel utsil u maasileʼ? 2) Maʼ xaaneʼ, ¿baʼax unaj k-beetik utiaʼal maʼ u xuʼulul k-ilkoʼob yéetel utsil?
2 Baʼaleʼ ken máanak kʼiineʼ maʼ xaaneʼ jeʼel u xuʼulul k-ilik yéetel utsil le sukuʼunoʼoboʼ. Tumen kʼeban máakoʼoneʼ, maʼ xaaneʼ ku joʼopʼol k-maas ilik le baʼaloʼob maʼ maʼalobtak ku beetkoʼoboʼ, baʼaleʼ maʼatech k-ilik le jatsʼuts modos yantiʼoboʼ. Ichil uláakʼ tʼaanoʼobeʼ, maʼ xaaneʼ ku xuʼulul k-ilkoʼob jeʼex u yilaʼaloʼob tumen Jéeobaeʼ. Wa ka úuchuktoʼon beyoʼ, kʼaʼabéet k-beetik tuláakal le ku páajtal utiaʼal k-ilkoʼob jeʼex u yilaʼaloʼob tumen Jéeobaoʼ (Éxo. 33:13).
¿Bix u yilaʼal k-sukuʼunoʼob tumen Jéeoba?
3. Teʼ Bibliaoʼ, ¿baʼax yéetel ku keʼetel le u múuchʼulil le máaxoʼob yéeyaʼanoʼoboʼ?
3 Teʼ 1 Corintoiloʼob 12:2-26, apóstol Pabloeʼ tu ketaj u múuchʼulil le máaxoʼob yéeyaʼanoʼob utiaʼal u binoʼob kaʼan yéetel upʼéel wíinklil «yaʼab u xéexetʼal[oʼ]». Jeʼex le u xéexetʼal le wíinklil maʼ u takáaliliʼoboʼ, le máaxoʼob yanoʼob ichil le múuchʼuliloʼ maʼ xan u takáaliliʼ u tuukuloʼobiʼ mix le baʼaxoʼob u yojel u beetoʼoboʼ. Baʼaleʼ kex beyoʼ, Jéeobaeʼ u yaabiltmaj tuláakal máak. Le oʼolal apóstol Pabloeʼ ku yaʼalik xan ka «[k-]paklan kanáant[ba]». Baʼaleʼ, yaan kʼiineʼ ku chan talamtaltoʼon k-beetik le baʼax tu yaʼaloʼ, maases wa jach jelaʼan k-ilik u modos utúul wa máax.
4. ¿Baʼaxten maʼ xaaneʼ yaan u kʼaʼabéettal k-kʼexik bix k-ilik le sukuʼunoʼoboʼ?
4 Jeʼex tsʼoʼok u yaʼalaloʼ, maʼ xaaneʼ yaan kʼiineʼ ku suuktal k-ilik chéen le baʼaloʼob maʼ maʼalobtak ku beetik le sukuʼunoʼoboʼ. Lelaʼ jeʼel u páajtal u keʼetel yéetel u chaʼantaʼal upʼéel fotoeʼ, wa jach naatsʼ yaan máakeʼ maʼ chíikaʼan u yilik tuláakal u jaʼtsiliʼ, baʼaleʼ wa tu pʼiis náachil yaan máakeʼ ku páajtal u chaʼantik tubeel. Bey túun xanoʼ yaan kʼiineʼ k-chʼíikil il chéen le baʼaxoʼob maʼ uts t-tʼaan ku beetik utúul sukuʼunoʼ, baʼaleʼ Jéeobaeʼ ku yilik le máak tu chúukaʼaniloʼ, ichil lelaʼ táakaʼan le jatsʼuts modos yantiʼoʼ. Le oʼolaleʼ, unaj k-ilik u maasil jeʼex u yilaʼaloʼob tumen Jéeobaeʼ, beyoʼ yaan k-áantaj utiaʼal ka yanak kiʼimak óolal yéetel jeetsʼelil ichil le múuchʼuliloʼ (Efe. 4:1-3; 5:1, 2).
5. ¿Baʼaxten maʼ maʼalob ka k-pʼis óolt u maasiliʼ?
5 Jesuseʼ jach u yojel kaʼach tumen kʼeban máakoʼoneʼ yaan kʼiineʼ k-tʼaan kʼaas yoʼolal u maasil, le oʼolal tu yaʼalaj: «Maʼ a pʼis óoltikeʼex uláakʼ máakoʼob tu yoʼolal maʼ a pʼis óoltaʼaleʼex» (Mat. 7:1). Le tʼaan ich hebreo meyajnaj tiʼ Jesusoʼ maʼ chéen u kʼáat u yaʼal maʼ u pʼis óol máak jeʼex u chíikpajal teʼ Biblia ich mayaoʼ; baʼaxeʼ u kʼáat u yaʼal ka xuʼuluk u pʼis óol máak, tumen u yojel yaʼab tiʼ le máaxoʼob chʼenxikintkoʼ suukaʼan kaʼach u tʼaanoʼob kʼaas tiʼ uláakʼ máakoʼob. ¿Tsʼoʼok wa xan u káajal k-beetik jeʼex letiʼoboʼ? Wa beyoʼ, kʼaʼabéet k-ilik u xuʼulul k-beetik utiaʼal maʼ k-pʼis óoltaʼal. U jaajileʼ, ¿máaxoʼon utiaʼal k-pʼis óoltik utúul sukuʼun wa Jéeoba tsʼaamil utiaʼal u beet upʼéel meyaj wa utiaʼal k-aʼalik maʼ unaj u yantal ichil le múuchʼuliloʼ? Maʼ xaaneʼ utúul sukuʼuneʼ yaan baʼaxoʼob maʼ jach maʼalob u beetkiʼ, baʼaleʼ wa láayliʼ u lúubul utsil tiʼ Jéeobaeʼ, ¿máaxoʼon toʼon utiaʼal maʼ k-bisikba tu yéetel? (Juan 6:44.) Toʼoneʼ k-ojel Jéeoba nuʼuktik u kaajal, le oʼolaleʼ wa kʼaʼabéet u beetaʼal jujumpʼéel kʼeexoʼobeʼ, letiʼ kun beetik ken kʼuchuk u kʼiinil (xokaʼak Romailoʼob 14:1-4).
6. ¿Baʼax u yojel Jéeoba tiʼ le máaxoʼob meyajtikoʼ?
6 Jéeobaeʼ u yojel bukaʼaj baʼaxoʼob tsʼoʼok k-kanik teʼ Biblia táan k-tsʼáaik ichil k-kuxtaloʼ. Tsʼoʼoleʼ u yojel xan bukaʼaj jeʼel u páajtal k-beetik cada utúul tiʼ toʼon le ken pʼáatak minaʼan kʼeban t-wíinklil teʼ túumben yóokʼol kaaboʼ. Le oʼolaleʼ letiʼeʼ maʼatech u chʼíikil u yil le baʼaxoʼob k-beetik maʼ tu jóokʼol jach maʼalobiloʼ. Lelaʼ bey u yaʼalik le Salmo 103:12: «Tsʼoʼok u náachkuntik tiʼ toʼon k-kʼebanoʼob jeʼel bix u náachkunsmail lakʼin tiʼ chikʼin[eʼ]». ¿Máasaʼ jach k-tsʼáaik u nib óolalil tiʼ Jéeoba yoʼolal leloʼ? (Sal. 130:3.)
7. ¿Baʼax k-kanik tiʼ bix úuchik u yilaʼal David tumen Jéeoba?
7 Le Bibliaoʼ ku yaʼalikeʼ Jéeobaeʼ yantiʼ u páajtalil u yilik chéen le baʼaloʼob maʼalobtak ku beetik máakoʼ. Yoʼolal Davideʼ, letiʼeʼ tu yaʼalaj: «David in palitsil, máax tu tsʼoʼokbesaj in nuʼukbeʼen tʼaanoʼob tu tsaypachtajen yéetel tuláakal u puksiʼikʼal, tuláakal baʼax tu beetajeʼ toj tin wiljilak» (1 Rey. 14:8). Jeʼex k-ojliloʼ, Davideʼ lúub tiʼ yaʼab kʼebanoʼob. Kex beyoʼ, Jéeobaeʼ tu yilaj toj u puksiʼikʼal, le oʼolal chéen tu yilaj le baʼaloʼob maʼalobtak yanoʼoʼ (1 Cró. 29:17).
Unaj k-ilik le sukuʼunoʼob jeʼex u yilaʼaloʼob tumen Jéeobaoʼ
8, 9. 1) ¿Baʼaxoʼob jeʼel u páajtal k-beetik jeʼex u beetik Jéeobaeʼ? 2) ¿Baʼax yéetel jeʼel u páajtal k-ketik le baʼax ku beetik Jéeobaoʼ, yéetel baʼax ku kaʼansiktoʼon leloʼ?
8 Jéeobaeʼ jeʼel u páajtal u yilik baʼax yaan tu puksiʼikʼal máakeʼ, baʼaleʼ toʼoneʼ maʼ tu páajtal k-beetik. Leloʼ upʼéel baʼax oʼolal maʼ unaj k-jusgartik k-éet máakiliʼ. Toʼoneʼ maʼ k-ojel baʼax péeksik u maasil u beet wa baʼaxiʼ. Le oʼolal kʼaʼabéet k-ilik beetik jeʼex Jéeobaeʼ, maʼ k-paktik chéen le baʼaloʼob maʼ maʼalobtak ku beetik u maasiloʼ, tumen le baʼaloʼobaʼ yaan u kʼuchul u kʼiinil u xuʼululoʼob. ¿Máasaʼ jach maʼalob ka k-beet jeʼex Jéeobaeʼ? Wa k-beetkeʼ yaan k-bisikba maas maʼalob yéetel le sukuʼunoʼoboʼ (Efe. 4:23, 24).
9 Koʼox ketik beyaʼ. Tuukulnakoʼon tiʼ upʼéel naj tsʼoʼok u jach kʼastal: u chukjaʼileʼ táan u júutul, u joonailoʼobeʼ kaachatakoʼob yéetel u yóokʼoleʼ joʼojoʼol. Le máakoʼoboʼ ku yilkoʼob le baʼaxoʼob kʼaschajaʼan tiʼ le najoʼ yéetel ku tuklikoʼobeʼ maas maʼalob ka nikaʼak. Baʼaleʼ tiʼ leloʼ ku kʼuchul utúul máak yaanal bix u tuukul. Letiʼe ku yokol u yil bix yanil le najoʼ yéetel ku yilkeʼ jach maʼalob u cheʼiloʼob, le oʼolal ku tuklikeʼ jeʼel u páajtal u yutskíintaʼaleʼ. Ku chʼaʼatuklik u manik, ku yilik u yutskíintik yéetel ku jatsʼutskíintik. Beoraaʼ le máakoʼob ku máanoʼob tu jooloʼ ku yaʼalikoʼobeʼ jach jatsʼuts. ¿Jeʼel wa u páajtal k-beetikba jeʼex le máak tu yilaj u yutskíintik le najoʼ? Maʼ k-ilik le baʼaxoʼob maʼ maʼalobtak ku beetik k-sukuʼunoʼoboʼ, baʼaxeʼ kʼaʼabéet k-ilik le jatsʼuts modos yantiʼoboʼ bey xan le baʼaxoʼob ku beetkoʼob utiaʼal u maas meyajtikoʼob Diosoʼ. Wa k-beetik beyoʼ, jeʼex Jéeobaeʼ yaan xan k-kʼuchul jach yaabiltoʼob yoʼolal le maʼalob baʼaloʼob ku beetkoʼoboʼ (xokaʼak Hebreob 6:10).
10. ¿Bix u yáantkoʼon le baʼax ku yaʼalik Filiposiloʼob 2:3, 4?
10 Tiʼ le sukuʼunoʼob yanoʼob kaʼach Filiposoʼ apóstol Pabloeʼ tu yaʼalaj baʼax jeʼel u yáantkoʼob utiaʼal ka u bisubaʼob maʼalob yéetel u maasil sukuʼunoʼob teʼ múuchʼuliloʼ. Tu yaʼalajtiʼob: «Maʼ a beetikeʼex mix baʼal chéen utiaʼal a wutsileʼex mix tu yoʼolal kaʼanal ichiliʼ baʼaleʼ yéetel kabal óolal, tu jujuntúuleʼ ka u yil le uláakʼoʼoboʼ bey maas maʼaloboʼob tiʼ letiʼeʼ. Mix juntúul ka u kaxant chéen le baʼaloʼob utiaʼal u yutsil tu juunaloʼ, baʼaleʼ le baʼax utiaʼal u yutsil xan le uláakʼoʼoboʼ» (Fili. 2:3, 4). Le kabal óolaloʼ ku yáantkoʼon utiaʼal ka k-il u maasil jeʼex unajeʼ. Wa k-kaxtik u yutsiloʼob yéetel k-ilik le jatsʼuts modos yantiʼoboʼ, maas maʼ kun talamtaltoʼon k-ilkoʼob jeʼex u yilaʼaloʼob tumen Jéeobaeʼ.
11. ¿Baʼax tsʼoʼok u yilaʼal tiʼ yaʼab múuchʼuliloʼob?
11 Yoʼolal le nukuch talamiloʼob ku yilaʼal way yóokʼol kaabeʼ, yaʼab máakoʼobeʼ tsʼoʼok u binoʼob kajtal táanxel luʼumil. Leloʼ tsʼoʼok u beetik u yantal tiʼ jujumpʼéel noj kaajoʼob máakoʼob jejeláas luʼumil u taaloʼob. Yaʼab tiʼ le máakoʼobaʼ tsʼoʼok u kʼamikoʼob le baʼax ku kaʼansik le Bibliaoʼ yéetel tsʼoʼok u yookloʼob ichil u kaajal Jéeoba. Letiʼobeʼ máakoʼob «taaljaʼanoʼob tiʼ tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob» (Apo. 7:9). Lelaʼ tsʼoʼok u beetik u yantal múuchʼuliloʼob tuʼux yaan sukuʼunoʼob jejeláas luʼumil u taaloʼob.
12. ¿Bix unaj k-ilik tuláakal le sukuʼunoʼoboʼ, yéetel baʼaxten yaan kʼiineʼ ku chan talamtaltoʼon k-beetik?
12 Tu yoʼolal lelaʼ, maʼ xaaneʼ yaan u kʼaʼabéettal k-maas eʼesik jatsʼuts modos tiʼ tuláakal le sukuʼunoʼoboʼ. Kʼaʼajaktoʼoneʼ apóstol Pedroeʼ tu yaʼalaj ka k-paklan yaabiltbaʼex «yéetel x-maʼ kaʼapʼéel ichil» bey xan yéetel tuláakal k-puksiʼikʼal (1 Ped. 1:22). Baʼaleʼ u jaajileʼ, jeʼel u chan talamtaltoʼon k-eʼesik chúukaʼan yaabilaj tiʼ le máaxoʼob jejeláas luʼumil u taaloʼoboʼ, tumen maʼ xaaneʼ le baʼaxoʼob suukaʼantiʼoboʼ jach jelaʼan tiʼ le baʼaxoʼob suukaʼantoʼonoʼ, yaanal u razaʼob, yaanal bix kaʼansaʼaniloʼob yéetel maʼ xaaneʼ maas óotsiloʼob wa maas ayikʼaloʼob tiʼ toʼon. ¿Ku talamtal wa tech a naʼatik baʼaxten jujuntúul tiʼ letiʼobeʼ jelaʼan bix u tuukuloʼob wa jelaʼan baʼax ku beetkoʼob? Maʼ xaaneʼ bey xan u yúuchultiʼob t-éeteloʼ. Baʼaleʼ jeʼel bixak ka úuchkeʼ, tiʼ tuláakloʼon ku yaʼalaʼal: «Yaabilteʼex [tuláakal, NM] le sukuʼunoʼoboʼ» (1 Ped. 2:17).
13. ¿Baʼaxten maʼ xaaneʼ yaan u kʼaʼabéettal k-kʼexik bix k-tuukul?
13 Maʼ xaaneʼ yaan u kʼaʼabéettal k-kʼexik bix k-tuukul yoʼolal u páajtal k-jeʼik k-puksiʼikʼal utiaʼal k-yaabiltik tuláakal le sukuʼunoʼoboʼ (xokaʼak 2 Corintoiloʼob 6:12, 13). Yaan máakoʼobeʼ ku yaʼalikoʼob: «Maʼ tumen wa in pʼekmoʼobiʼ, baʼaleʼ...», ku tsʼoʼokol túuneʼ ku joʼopʼol u yaʼalikoʼob baʼaxoʼob ku yilkoʼob maʼ maʼalobtak ku beetik u jaats máakoʼob táanxel luʼumiloʼobiʼ. ¿Yaan wa kʼiin tsʼoʼok k-aʼalik beyoʼ? Wa beyoʼ, leloʼ ku yeʼesikeʼ maʼ k-luʼs ichil k-puksiʼikʼal jujumpʼéel tiʼ le baʼaxoʼob jeʼel u beetik u xuʼulul k-ilik utsil le sukuʼunoʼoboʼ. Le oʼolaleʼ maʼalob ka tuukulnakoʼon tiʼ le kʼáatchiʼaʼ: «¿Kin wilik wa in maas kʼaj óoltik le máaxoʼob yaanal tuʼux u taaloʼoboʼ?». Wa k-tuukul tiʼ le kʼáatchiʼaʼ, maas maʼ kun talamtaltoʼon k-yaabiltik le sukuʼunoʼob táanxel luʼumil u taaloʼoboʼ.
14, 15. 1) Tʼaanen tiʼ jujuntúul máakoʼob tu kʼexaj u tuukuloʼob tiʼ bix u yilkoʼob u maasil. 2) ¿Bix jeʼel k-beetik jeʼex letiʼobeʼ?
14 Ichil le Bibliaoʼ k-xokik tiʼ jujuntúul máakoʼob tu kʼexaj u tuukuloʼob tiʼ bix u yilkoʼob u maasil. Koʼox tʼaan tiʼ apóstol Pedro. Letiʼeʼ tumen judíoeʼ, mix bikʼin jeʼel u yóotik kaʼach okol tu yotoch utúul máax maʼ judíoeʼ. Le oʼolaleʼ chéen tukult bix úuchik u yuʼubikuba ka aʼalaʼabtiʼ ka xiʼik u xíimbalt Cornelio, utúul máak maʼ judíoiʼ. Baʼaleʼ le ka kʼuch u naʼat, Dioseʼ u kʼáat ka okok tuláakal máak ichil u kaajaleʼ, Pedroeʼ tu kʼexaj bix u tuukul (Hch. 10:9-35). Saulo, le máax kʼuch u beetuba apóstol Pabloeʼ, kʼaʼabéetchaj xan u kʼexik bix u tuukul yéetel u xuʼulul u pʼektik le máaxoʼob meyajtik Diosoʼ. Letiʼeʼ tu yaʼaleʼ táanil tiʼ u kʼaj óoltik Cristoeʼ, jach u pʼekmaj kaʼach le máaxoʼob meyajtik Jéeobaoʼ, letiʼeʼ tu yaʼalaj: «Yéetel bukaʼaj kʼuuxilil tin chʼaʼapachtaj u [múuchʼulil] Jajal Dios, yéetel tin wóoltaj in xuʼulsej». Baʼaleʼ ka tʼanaʼab tumen Cristoeʼ, tu beetaj nukuch kʼeexoʼob ichil u kuxtal yéetel tu kʼamaj le nuʼuktajiloʼob tsʼaʼabtiʼ tumen le máaxoʼob tu chʼaʼapachtajoʼ (Gal. 1:13-20).
15 Jeʼex túun k-ilkoʼ, yéetel u yáantaj u kiliʼich muukʼ Jéeobaeʼ jeʼel u páajtal k-kʼexik bix k-tuukuleʼ. Le oʼolaleʼ, wa k-tsʼáaik cuenta yaan jujumpʼéel baʼaloʼob ichil k-puksiʼikʼal ku beetik k-pʼektik wa máaxeʼ unaj k-ilik luʼsik, beyoʼ yaan u páajtal «[k-]pʼáataleʼex nupaʼan[oʼon] mantatsʼ yéetel u yáantaj kiliʼich pixan, tu yoʼolal le jeetsʼel óolal nupik[oʼonoʼ]» (Efe. 4:3-6). Le Bibliaoʼ ku yaʼalik ka yanaktoʼon «yaakunaj, tumen lelaʼ letiʼ ku nupik yéetel ku chúukbesik tuláakal baʼal» (Col. 3:14, LTN).
Kʼaʼabéet k-beetik jeʼex Jéeoba teʼ meeyjil kʼaʼaytajoʼ
16. ¿Baʼax u kʼáat Jéeoba ka u beet tuláakal máak?
16 Apóstol Pabloeʼ tu tsʼíibtaj: «Tu táan Jajal Dioseʼ minaʼan u jelaʼanil máakoʼob» (Rom. 2:11). Jéeobaeʼ u kʼáat ka meyajtaʼak tumen tuláakal máak (xokaʼak 1 Timoteo 2:3, 4). Le oʼolal ku yilik ka kʼaʼaytaʼak «le maʼalob péektsil [...] tiʼ tuláakal múuchʼ kaajoʼob, jejeláas tʼaanoʼob, chʼiʼibaloʼob yéetel kaajoʼob» (Apo. 14:6). Tsʼoʼoleʼ, Jesuseʼ tu yaʼalaj xan: «Le kooloʼ yóokʼol kaab» (Mat. 13:38). ¿Bix unaj a wilik teech yéetel a familia le meyajaʼ?
17. ¿Bix jeʼel k-áantik le máakoʼob jejeláas luʼumil u taaloʼoboʼ?
17 Maʼ tuláakloʼon jeʼel u páajtal k-bin kʼaʼayt u maʼalob péektsil le Reino teʼ táanxel luʼumiloʼoboʼ. Baʼaleʼ maʼ xaaneʼ jeʼel u páajtal k-kʼaʼaytaj tiʼ le máaxoʼob yaanal luʼumil u taaloʼob kajaʼanoʼob teʼ tuʼux k-kʼaʼaytajoʼ. ¿K-ilik wa k-kʼaʼaytaj tiʼ tuláakal u jejeláasil máakoʼob, wa chéen tiʼ le máaxoʼob úuch joʼopʼok k-kʼaʼaytajoʼ? ¿Baʼaxten maʼ t-ilik kʼaʼaytaj tiʼ tuláakal le máaxoʼob mix utéen kʼaʼaytaʼaktiʼob le maʼalob péektsiloʼ? (Rom. 15:20, 21.)
18. ¿Bix tu yeʼesil Jesús jach u kʼáat u yáant le máakoʼoboʼ?
18 Jesuseʼ jach u kʼáat kaʼach u yáant tuláakal máak, le oʼolal maʼ chéen upʼéeliliʼ tuʼux kʼaʼaytajnajiʼ. Le Bibliaoʼ ku yaʼalikeʼ, letiʼeʼ «tu xíimbaltaj tuláakal le kaajoʼoboʼ yéetel le mejen kajtaliloʼoboʼ». Yéetel «le ka tu yilaj le máakoʼoboʼ tu chʼaʼaj óotsilil tiʼob» yéetel tu jach aʼalaj kʼaʼabéet u yáantaʼaloʼob (Mat. 9:35-37).
19, 20. Toʼon xaneʼ, ¿bix jeʼel k-eʼesik jach k-kʼáat áant tuláakal máak jeʼex tu beetaj Jéeoba yéetel Jesuseʼ?
19 Toʼon xaneʼ, ¿bix jeʼel u páajtal k-eʼesik kʼáat áant le máakoʼoboʼ? Jujuntúul j-kʼaʼaytajoʼobeʼ tsʼoʼok u chʼaʼatuklikoʼob u kʼaʼaytajoʼob teʼ tuʼuxoʼob maʼatech u jach úuchul kʼaʼaytaj, jeʼex teʼ tuʼuxoʼob ku yúuchul koonoloʼ, teʼ parqueʼoboʼ yéetel teʼ tuʼux ku jeʼelel le camionoʼoboʼ. Uláakʼoʼob xaneʼ utiaʼal u páajtal u kʼaʼaytajoʼob tiʼ le máaxoʼob táanxel luʼumiloʼob wa tiʼ le máaxoʼob maʼ jach cada ku kʼaʼaytaʼaltiʼob le maʼalob péektsiloʼ, tsʼoʼok u yilik u kankoʼob le tʼaan ku beetkoʼoboʼ. Tak chéen ka k-kʼáattiʼob bix u beeloʼob, ichil u tʼaanoʼobeʼ, le máakoʼobaʼ yaan u yilkoʼob jach tu jaajil k-kʼáat áantoʼob. U jaajileʼ maʼ tuláakloʼon jeʼel u páajtal k-kanik uláakʼ tʼaaneʼ, baʼaleʼ jeʼel u páajtal k-líiʼsik u yóol le sukuʼunoʼob táan u beetkoʼoboʼ. Yéetel maʼ unaj k-aʼalik mix baʼal jeʼel u beetik u xuʼulul u tsʼáaik yóoloʼobeʼ mix k-aʼaliktiʼob táan u beetikoʼob yoʼolal yaanal baʼal. Jéeobaeʼ jach nojoch baʼal u yilik le kuxtal yaan tiʼ tuláakal máakoʼ, toʼon xaneʼ bey unaj k-ilkoʼ (Col. 3:10, 11).
20 Tsʼoʼoleʼ, wa k-ilik le máakoʼob jeʼex u yilaʼaloʼob tumen Jéeobaoʼ, kex jelaʼan bix kuxlikoʼobeʼ yaan k-kʼaʼaytiktiʼob le maʼalob péektsiloʼ. Lelaʼ unaj k-beetik kex minaʼan u yotochoʼob, kex jelaʼan bix u vestirmilubaʼob wa kex ku biskoʼob upʼéel kʼaakʼas kuxtal. Yéetel wa yaan máax maʼ tu tratarkoʼon maʼalobileʼ, maʼ unaj k-tuklik wa láaj bey u yéet luʼumiloʼoboʼ wa u yéet razailoʼoboʼ. Apóstol Pabloeʼ jach maʼ maʼalob úuchik u tratartaʼal tumen jujuntúul máakoʼobiʼ, baʼaleʼ leloʼ maʼ tu beetaj u xuʼulul u kʼaʼaytaj tiʼ u yéet luʼumil le máakoʼoboʼ (Hch. 14:5-7, 19-22). Letiʼeʼ u yojel kaʼacheʼ, yaan u yantal jujuntúul máaxoʼob kun kʼamik le baʼax ku kʼaʼaytikoʼ.
21. ¿Baʼax kun maas páajtal a beetik wa ka wilik tuláakal máak jeʼex u yilaʼaloʼob tumen Jéeobaoʼ?
21 Jeʼex tsʼoʼok k-kankoʼ, jach kʼaʼabéet k-ilik tuláakal le sukuʼunoʼob jeʼex u yilaʼaloʼob tumen Jéeobaoʼ, kex k-éet luʼumiloʼob bey xan wa maʼ. Wa k-ilik beetik jeʼex Jéeobaeʼ, yaan k-maas áantaj utiaʼal ka yanak kiʼimak óolal yéetel jeetsʼelil teʼ múuchʼuliloʼ. Yéetel bey xan unaj k-ilik le máaxoʼob kajaʼanoʼob teʼ tuʼux k-kʼaʼaytajoʼ. Wa k-beetik beyoʼ yaan u páajtal k-áantkoʼob u yaabiltoʼob Jéeoba, le Dios «maʼ tu tsʼáaikuba chéen tu tséel» u jaats máakoʼoboʼ. Letiʼeʼ u yaabiltmaj tuláakal máak, «tumen letiʼ láaj beetmailoʼob» (Job 34:19).
¿Baʼax jeʼel a núukikeʼ?
• Maʼ xaaneʼ, ¿bix jeʼel u káajal k-ilik le sukuʼunoʼob ken máanak kʼiinoʼ?
• ¿Bix jeʼel u páajtal k-ilik le sukuʼunoʼob jeʼex u yilaʼaloʼob tumen Jéeobaoʼ?
• ¿Baʼax tsʼoʼok a kanik tiʼ bix unaj k-ilik le sukuʼunoʼob táanxel luʼumil u taaloʼoboʼ?
• ¿Bix jeʼel k-ilik le máakoʼob teʼ tuʼux k-kʼaʼaytaj jeʼex u yilaʼaloʼob tumen Jéeobaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
¿Bix jeʼel u páajtal k-maas kʼaj óoltik le máaxoʼob yaanal luʼumil u taaloʼoboʼ?
[U tsolajil le oochel teʼ táan juʼun 28]
¿Baʼax jeʼel u páajtal k-beetik utiaʼal ka k-kʼaʼayt le maʼalob péektsil tiʼ maas yaʼab máakoʼoboʼ?