Bix unaj u yilaʼal le tsʼoʼokol beel yéetel u yantal u paalal máak teʼ tsʼook kʼiinoʼobaʼ

«Chéen jumpʼíit kʼiin pʼaataltoʼon.» (1 COR. 7:29.)

1. 1) ¿Baʼax talamiloʼob tu yaʼalaj le Biblia kun ilbil teʼ tsʼook kʼiinoʼobaʼ? 2) ¿Baʼaxten unaj k-chʼaʼik en cuenta le baʼaxoʼob ku yúuchul yéetel le familia bejlaʼoʼ?

LE BIBLIAOʼ ku yaʼalikeʼ teʼ «tu xuul kʼiinoʼo[baʼ]» yaan u yantal baʼateltáambaloʼob, wiʼijiloʼob, kʼojaʼaniloʼob yéetel yaan xan u kíilbal le luʼumoʼ (Dan. 8:17, 19; Luc. 21:10, 11). Ku yaʼalik xaneʼ teʼ kʼiinoʼobaʼ yaan u kʼastal bix u tuukul le máakoʼoboʼ. Ichil le talam baʼaloʼob kun ilbil teʼ «tsʼook jaʼaboʼob[aʼ]» táakaʼan xan le talamiloʼob kun yantal ichil le familiaoʼ (2 Tim. 3:1-4). ¿Baʼaxten unaj k-chʼaʼik en cuenta le baʼaxoʼob ku yúuchlaʼ? Tumen bejlaʼeʼ, óoliʼ tuláakal tuʼux yaan le talamiloʼobaʼ yéetel séeb jeʼel u kʼexik k-tuukul tiʼ bix unaj k-ilik le tsʼoʼokol beel yéetel le u yantal u paalal máakoʼ. ¿Bix jeʼel u kʼexik k-tuukul le baʼaloʼobaʼ?

2. Yaʼab máakoʼobeʼ, ¿bix u yilkoʼob le tsʼoʼokol beel yéetel le divorcio bejlaʼoʼ?

² Bejlaʼeʼ yaʼab máakoʼob ku divorciarkubaʼob chéen yoʼolal jeʼel baʼalakeʼ; yéetel tiʼ yaʼab luʼumiloʼobeʼ táan u bin u maas yaʼabtal u yúuchul lelaʼ.  Baʼaleʼ, unaj k-kʼaʼajskeʼ Jéeobaeʼ maʼ tu yilik le tsʼoʼokol beel yéetel le u divorciarkuba máak jeʼex u yilik yaʼab máakoʼob teʼ kʼiinoʼobaʼ. ¿Bix túun u yilik letiʼ?

3. Jéeoba yéetel Jesuseʼ, ¿bix u yilkoʼob le tsʼoʼokol beeloʼ?

³ Jéeobaeʼ ku páaʼtik ka u tsʼoʼokbes u votos le máaxoʼob tsʼokaʼan u beeloʼoboʼ. Le ka tu tsʼoʼoksaj u beel Adán yéetel Evaeʼ, Jéeobaeʼ tu yaʼalaj: «Xiibeʼ yaan u [...] nupikuba tiʼ u yatan, beyoʼ ku pʼáataloʼob juntúuliloʼob». Le ka taal Jesús way luʼumeʼ, tu kʼaʼajsaj le tʼaanoʼobaʼ, tsʼoʼoleʼ ka tu yaʼalaj xan: «Le oʼolaleʼ mix máak unaj u jatsik le baʼax nupaʼan tumen Jajal Dioseʼ. [...] Le máax ku pʼatik u yatan, wa maʼ tu yoʼolal núupkʼebaneʼ, yéetel ku tsʼoʼokol u beel yéetel uláakʼ koʼoleleʼ [...] ku núupkʼebantal xan» (Gén. 2:24; Mat. 19:3-6, 9). Jeʼex k-ilkoʼ, Jéeoba yéetel Jesuseʼ ku yilkoʼob le tsʼoʼokol beel bey upʼéel baʼal utiaʼal tuláakal u kʼiiniloʼob u kuxtal máakeʼ, yéetel ku xuʼulul le ken kíimik utúul tiʼ letiʼobiʼ (1 Cor. 7:39). Jach beyoʼ, le tsʼoʼokol beeloʼ upʼéel baʼal kiliʼich. Le oʼolaleʼ, maʼ unaj k-tuklik wa le divorciooʼ upʼéel bix jeʼel u xuʼulul u yantaltoʼon talamileʼ. Le Bibliaoʼ ku yaʼalikeʼ Jéeobaeʼ jach u pʼeek ka u divorciartuba máak chéen yoʼolal jeʼel baʼalakeʼ (xokaʼak Malaquías 2:13-16; 3:6). *

Baʼax unaj u chʼaʼik en cuenta le máaxoʼob ku tuklik u tsʼoʼokol u beeloʼoboʼ

4. ¿Baʼaxten yaan máaxoʼobeʼ ku yilkoʼob maʼ maʼalob úuchik u tsʼoʼokol u beeloʼob jach paaloʼobiʼ?

⁴ Yaʼab máakoʼobeʼ maʼ kʼaas u yilkoʼob le núupkʼebanoʼ, le oʼolal bejlaʼeʼ yaʼab u yeʼesaʼal tiʼ televisión, revistaʼob, periodicoʼob yéetel tiʼ uláakʼ baʼaloʼob le chaknuuliloʼ. Toʼon k-meyajtik Dioseʼ, k-ojleʼ le baʼaloʼobaʼ jeʼel u kʼaskúuntik k-tuukuleʼ, maases le táankelmoʼoboʼ. U jaajileʼ, le baʼaloʼobaʼ jeʼel u beetik u yantal kʼaakʼas tsʼíibolaloʼob tiʼ máak kex maʼ u kʼáateʼ. ¿Baʼax unaj u beetik le táankelmoʼob utiaʼal maʼ u kʼaskúuntaʼal u tuukuloʼob tumen le baʼaloʼobaʼ? Yanoʼobeʼ jach paaloʼob ken tsʼoʼokok u beeloʼob, tumen ku tuklikoʼobeʼ beyoʼ maʼ kun lúubloʼob tiʼ le núupkʼebanoʼ, baʼaleʼ ken máanak kʼiineʼ ku yilkoʼobeʼ maʼ maʼalob le baʼax tu chʼaʼatuklaj u beetkoʼoboʼ. ¿Baʼaxten? Tumen ken chan xáanak tsʼoʼokok u beeloʼob yéetel ken káajak u yantaltiʼob talamiloʼobeʼ, ku tsʼáaikoʼob cuenta maʼ upʼéeliliʼ bix u tuukuloʼobiʼ. Le oʼolal le máaxoʼob jach paaloʼob ken tsʼoʼokok u beeloʼoboʼ maases ku aktáantkoʼob talamiloʼob.

5. ¿Baʼax jeʼel u yáantik le máaxoʼob tsʼokaʼan u beeloʼob utiaʼal ka u tsʼoʼokbes u votosoʼob? (Ilaʼak xan le chan tsolajiloʼ.)

⁵ U tsʼoʼokol u beel máak yéetel utúul wa máax minaʼan tiʼ le modos ku páaʼtaʼal ka u yeʼes kaʼachoʼ jeʼel u beetik u yantal kʼuuxilileʼ, lelaʼ jeʼel u yúuchul tak ichil le máaxoʼob meyajtik Diosoʼ (1 Cor. 7:28). Le familiaʼob beyaʼ mantatsʼ yaan talamil tiʼob. Baʼaleʼ le máaxoʼob jach u kʼubmaj u yóoloʼob tiʼ Diosoʼ, u yojloʼobeʼ u divorciarkuba máak yoʼolal jeʼel baʼaxakeʼ maʼ tu yáantaj utiaʼal ka utsak le talamil yantiʼoboʼ. Le máaxoʼob ku yilik u tsʼoʼokbeskoʼob le votos tu beetoʼob le ka tsʼoʼok u beeloʼoboʼ, unaj u yeʼesaʼal tsiikil tiʼob, u yaabiltaʼaloʼob yéetel u yáantaʼaloʼob tumen le sukuʼunoʼob yanoʼob teʼ múuchʼuliloʼ. *

6. ¿Baʼaxoʼob unaj u chʼaʼik en cuenta le táankelmoʼob ku tuklik u tsʼoʼokol u beeloʼoboʼ?

⁶ Xiʼipal wa chʼúupal, wa táan a tuklik u tsʼoʼokol a beeleʼ, ¿baʼaxoʼob unaj a chʼaʼik en cuenta táanil? Utiaʼal u káajal a biskaba yéetel utúul wa máaxeʼ, kʼaʼabéet yantech u jaʼabil  yéetel ka weʼesik jeʼel u páajtal a tsʼoʼokbesik baʼax ku kʼáatik Jéeoba tiʼ le máaxoʼob tsʼokaʼan u beeloʼoboʼ, tumen beyoʼ maʼ ku yantaltech yaʼab talamiloʼob. Le Bibliaoʼ maʼatech u yaʼalik bukaʼaj jaʼaboʼob unaj u yantaltech utiaʼal ka tsʼoʼokok a beel. * Baʼaleʼ ku yaʼaliktech ka a páaʼt u máan le jaʼaboʼob tuʼux ku maas yaʼabtal a tsʼíiboltik a núupchital yéetel wa máax (1 Cor. 7:36, LTN). ¿Baʼaxten unaj a páaʼtik u máan le jaʼaboʼobaʼ? Tumen le tsʼíibolaloʼob ku yantaltech teʼ jaʼaboʼobaʼ jeʼel u túulchʼinkech a beet baʼaloʼob jeʼel u taasiktech talamiloʼobeʼ. Maʼ u tuʼubultecheʼ, le tsolnuʼukoʼob ku tsʼáaik Jéeoba yaan yil yéetel le tsʼoʼokol beeloʼ utiaʼal ka xiʼiktech utsil yéetel utiaʼal ka yanaktech kiʼimak óolal ichil a kuxtal (xokaʼak Isaías 48:17, 18).

Baʼax unaj u chʼaʼik en cuenta le máaxoʼob u kʼáat ka yanak u paalaloʼoboʼ

7. ¿Baʼax ku aktáantik jujuntúul tiʼ le máaxoʼob tsʼokaʼan u beeloʼoboʼ, yéetel baʼax talamil ku yantaltiʼob?

⁷ Jujuntúul tiʼ le máaxoʼob tsʼokaʼan u beeloʼoboʼ ku yantal u chaambaloʼob le maʼ sen úuch xuʼuluk u beetik u paaliloʼobiʼ. Maʼ u jach kʼaj óoltubaʼob tubeel le ken síijik u hijoʼobiʼ. Le maamatsiloʼ ku máansik maas yaʼab tiempo yéetel le chaambaloʼ tumen kʼaʼabéet u kanáantik yéetel u tsʼáaik baʼax kʼaʼabéettiʼ, leloʼ ku beetik u kʼuuxil le íichamtsiloʼ tumen ku yilik tsʼoʼok maʼatech u chʼaʼabal en cuentai. Tsʼoʼoleʼ tumen óoliʼ maʼatech u jach weneloʼob tumen táan u kanáantkoʼob le chaambaloʼ, ku beetik u maas yantal talamil tiʼob. Ku tsʼáaikoʼob cuenta xaneʼ le baʼaxoʼob ku beetkoʼob kaʼachoʼ, bejlaʼeʼ maʼ tu páajtal u beetkoʼob. Yéetel maʼ tu páajtal u jóoʼloʼob xíimbal jeʼex u beetkoʼob kaʼacheʼ. ¿Baʼax unaj u beetikoʼob beora tsʼoʼok u yantal u hijoʼobaʼ?

8. ¿Bix unaj u yilik máak u yantal u paalal, yéetel baʼaxten?

⁸ Jeʼex le tsʼoʼokol beeloʼ, u yantal u paalal máak bey xan u kanáantaʼaloʼobeʼ unaj u yilaʼal bey upʼéel jatsʼuts meyaj ku taal tiʼ Dioseʼ. U jaajileʼ ken síijik u chaambal máakeʼ, ku kʼaʼabéettal u kʼexik bix u kuxtal le taatatsiloʼoboʼ, baʼaleʼ le máaxoʼob ku meyajtkoʼob Diosoʼ ku beetikoʼob jeʼex u yaʼalik le Bibliaoʼ. Ku yilkoʼob u chan hijo bey upʼéel «u siibal» Jéeobaeʼ, tumen letiʼ tsʼáa u jatsʼuts páajtalil tiʼ máak u yantal u paalal (Sal. 127:3). Le taatatsil yéetel le maamatsiloʼ ku yilik u nuʼuktik u paalaloʼob jeʼex u kʼáat Diosoʼ (Efe. 6:1, NM).

9. 1) ¿Baʼax táakaʼan ichil u líiʼsaʼal utúul paal? 2) ¿Baʼax jeʼel u páajtal u beetik le íichamtsil utiaʼal maʼ u xuʼulul u muʼukʼantal u fe u yatanoʼ?

⁹ U líiʼsaʼal utúul paaleʼ maʼ chéen chʼaʼabiliʼ, ku bisik yaʼab jaʼaboʼob yéetel ku beetik u xupkuba le taatatsiloʼoboʼ. Le íichamtsiloʼ unaj u chʼaʼik en cuentaeʼ le yáax jaʼaboʼob táan u líiʼsaʼal le chan paaloʼ, maʼ xaaneʼ u yataneʼ maʼ ken u jach yuʼub le muchʼtáambaloʼoboʼ, maʼ kun yantal  yaʼab tiempo utiaʼal u xokik le Bibliaoʼ yéetel u tuukul tiʼ le baʼax ku xokkoʼ, leloʼ jeʼel tak u beetik u xuʼulul u muʼukʼantal u fejeʼ. Le oʼolal le íichamtsil ku tuukul yoʼolal u yataneʼ ku beetik tuláakal le ku páajtal utiaʼal u kanáantik xan le chan paaloʼ. Tsʼoʼoleʼ, le ken tsʼoʼokok le muchʼtáambaloʼ unaj u tsikbaltik tiʼ u yatan jujumpʼéel baʼaloʼob aʼalaʼab teʼ muchʼtáambal maʼ tu yuʼubajoʼ. Yéetel yaan kʼiineʼ unaj u kanáantik le chan paal utiaʼal u kʼaʼaytaj tubeel u yatanoʼ (xokaʼak Filiposiloʼob 2:3, 4).

10, 11. 1) ¿Baʼax táakaʼan ichil u kaʼansaʼal le paalaloʼob yéetel «u kaʼansajil Yuumtsil»? 2) ¿Baʼaxten k-aʼalik yaʼab taatatsiloʼobeʼ tsʼoʼok u beetkoʼob upʼéel jach maʼalob meyaj?

¹⁰ Utiaʼal u líiʼsik u hijoʼobeʼ, le taatatsiloʼoboʼ maʼ chéen yaan yéetel ka u tsʼáa tuʼux u kajtaloʼob, ka yanak baʼax u jaantoʼob, baʼax u búukintoʼob yéetel u bisikoʼob tu yiknal doctor ken kʼojaʼanchajkoʼobiʼ. Teʼ talam kʼiinoʼobaʼ, le paalaloʼoboʼ desde tu chichniloʼob kʼaʼabéet u kaʼansaʼaltiʼob baʼax uts tiʼ baʼax kʼaas. Kʼaʼabéet u líiʼsaʼaloʼob «tiʼ jumpʼéel toj kuxtal yéetel tiʼ u kaʼansajil Yuumtsil» Jéeoba (Efe. 6:4). Ichil le kaʼansajaʼ táakaʼan u yáantaʼaloʼob utiaʼal ka tuukulnakoʼob jeʼex u tuukul Jéeobaeʼ, yéetel lelaʼ unaj u beetaʼal desde tu chichniloʼob tak ken tsʼoʼokok u máansik u táankelmiloʼob (2 Tim. 3:14, 15).

¹¹ Le ka tu yaʼalaj Jesús tiʼ u disipuloʼob ka u kaʼansoʼob «u kajnáaliloʼob tuláakal kaajoʼob» utiaʼal ka u beetubaʼob u disipuloʼobeʼ, táan kaʼach xan u yaʼalik tiʼ le taatatsiloʼob ka u yáant u paalaloʼob u beetubaʼob disipuloʼob tiʼ Jesús (Mat. 28:19, 20). U jaajileʼ maʼ chéen chʼaʼabil u kaʼansaʼal le paalaloʼoboʼ, tumen le kʼasaʼan yóokʼol kaabaʼ yaʼab táabsajiloʼob ku tsʼáaik tu táanoʼob. Le oʼolaleʼ, le taatatsiloʼob tsʼoʼok u yáantik u paalal utiaʼal ka okjaʼanakoʼobeʼ, tsʼoʼok u beetkoʼob upʼéel jach maʼalob meyaj. Le taatatsiloʼobaʼ tsʼoʼok u chúukpajal u yóoloʼob yéetel tsʼoʼok u tsʼáanchaʼatikoʼob le yóokʼol kaab yoʼolal u fejoʼoboʼ (1 Juan 5:4).

Ku chʼaʼatuklik maʼ u tsʼoʼokol u beeloʼob wa maʼ u yantal u paalaloʼob utiaʼal u beetkoʼob upʼéel maʼalob meyaj

12. ¿Baʼaxten yaan sukuʼunoʼobeʼ ku chʼaʼatuklik maʼ u séeb tsʼoʼokol u beeloʼob?

¹² Tumen «chéen jumpʼíit kʼiin pʼaataltoʼon» yéetel «le yóokʼol kaab k-ilikaʼ táan u xuʼulu[leʼ]», le Bibliaoʼ ku yaʼalik ka tuukulnakoʼon tiʼ le utsiloʼob jeʼel u yantal tiʼ le máaxoʼob maʼ tu tsʼoʼokol u beeloʼoboʼ (1 Cor. 7:29-31). Le oʼolal yaʼab sukuʼunoʼobeʼ, tsʼoʼok u chʼaʼatuklik maʼ u séeb tsʼoʼokol u beeloʼob wa u pʼáatal maʼ u tsʼoʼokol u beeloʼob. Le sukuʼunoʼobaʼ jach maʼalob le baʼax ku chʼaʼatuklikoʼobaʼ, tumen maʼ tu beetkoʼob chéen utiaʼal u kaxtik u yutsiloʼobiʼ, baʼaxeʼ utiaʼal u meyajkoʼob Jéeoba «yéetel tuláakal [u] puksiʼikʼal[oʼob]» (xokaʼak 1 Corintoiloʼob 7:32-35). Le oʼolal yaan yaʼab sukuʼunoʼob precursoroʼob yéetel betelitaʼob maʼ tsʼokaʼan u beeloʼobiʼ. Uláakʼoʼobeʼ ku binoʼob teʼ Escuela tiʼ Entrenamiento Ministerialoʼ, tumen u kʼáat u maas meyajtoʼob Jéeoba. Ken máanak kʼiineʼ, jujuntúul tiʼ letiʼobeʼ ku tsʼoʼokol u beeloʼob yéetel ku jóoʼskoʼob utsil tiʼ le baʼaxoʼob tu kanoʼob le maʼ tsʼoʼokok u beeloʼoboʼ.

13. ¿Baʼaxten yaan sukuʼunoʼob ku chʼaʼatuklik maʼ u yantal u paalaloʼob?

 ¹³ Tiʼ jejeláas luʼumiloʼobeʼ, yaʼab tiʼ le máaxoʼob tsʼokaʼan u beeloʼoboʼ ku chʼaʼatuklikoʼob maʼ u yantal u paalaloʼob. ¿Baʼax péekskoʼob u chʼaʼatukultoʼob lelaʼ? Yanoʼobeʼ ku beetkoʼob tumen óotsiloʼob, yéetel uláakʼoʼobeʼ tumen u kʼáatoʼob antal tiʼ upʼéel meyaj tuʼux yaʼab u náajalil. Baʼaleʼ ichil le máaxoʼob meyajtik Diosoʼ, ku beetkoʼob tumen u kʼáat u maas meyajtoʼob Jéeoba. Leloʼ maʼ u kʼáat u yaʼal wa maʼ tu páajtal u beetkoʼob baʼaloʼob jeʼel u taasik kiʼimak óolal tiʼobeʼ, baʼaxeʼ ku beetkoʼob tumen u kʼáat u maas kʼaʼaytoʼob le maʼalob péektsiloʼ (1 Cor. 7:3-5). Jujuntúul tiʼ letiʼobeʼ ku meyajoʼob tu najil Betel, ku xíimbaltkoʼob le múuchʼuliloʼoboʼ, precursoroʼob wa misioneroʼob. Jéeobaeʼ maʼ ken u tuʼubs le meyaj ku beetkoʼob yoʼolal le yaabilaj ku yuʼubkoʼob tiʼ letiʼoʼ (Heb. 6:10).

«Yaan u yantal yaayaj óolal tiʼob»

14, 15. ¿Baʼax «yaayaj óolal» jeʼel u yantal tiʼ le taatatsiloʼoboʼ?

¹⁴ Le apóstol Pablooʼ tu yaʼaleʼ le máaxoʼob ku tsʼoʼokol u beeloʼoboʼ «yaan u yantal yaayaj óolal tiʼob» (1 Cor. 7:28). Ichil le yaayaj óolaloʼobaʼ táakaʼan u kʼojaʼantal utúul tiʼ letiʼob, u paalaloʼob wa u taataʼob. Maʼ xaaneʼ táakaʼan xan le talamiloʼob yaan yil yéetel u líiʼsaʼal le paalaloʼoboʼ. Jeʼex t-ilil tu káajbal le xookaʼ, le Bibliaoʼ tu yaʼaleʼ «tiʼ u tsʼook jaʼaboʼobeʼ bíin taalak talam kʼiinoʼob», yéetel ichil le talam baʼaloʼob kun ilbiloʼ táakaʼan le maʼ u yuʼubik tʼaan le paalaloʼoboʼ (2 Tim. 3:1-3).

¹⁵ Tumen tuláakal máak ku aktáantik le «talam kʼiinoʼob[aʼ]», le máaxoʼob meyajtik Diosoʼ maʼ chéen chʼaʼabil xan u líiʼsik u paalaloʼobiʼ. Letiʼobeʼ mantatsʼ unaj u kanáantik u paalaloʼob utiaʼal maʼ u kʼaskúuntaʼal u tuukuloʼob tumen «le baʼax ku beetik le yóokʼol kaabaʼ» (Efe. 2:2, 3). Yéetel kex ku kanáantkoʼobeʼ yaan kʼiineʼ le paalaloʼoboʼ ku xuʼulul u meyajkoʼob Jéeoba. U yúuchul lelaʼ jach ku taasik «yaayaj óolal» tiʼ le taatatsiloʼob tsʼoʼok u beetkoʼob tuláakal le ku páajtal utiaʼal u kaʼansik u paalal u yaabiltoʼob Diosoʼ (Pro. 17:25).

«Bíin yanak táaj yaʼab mukʼyaj»

16. ¿Baʼax «mukʼyaj» tu yaʼalaj Jesús kun yantal?

¹⁶ Jeʼel baʼalak «yaayaj óolal» ka u aktáant le máaxoʼob tsʼokaʼan u beeloʼoboʼ wa le ku líiʼsik u paalaloʼoboʼ, yaan u pʼáatal mix baʼal tu tséel le baʼax ku taal u kʼiinoʼ. Le ka tʼaanaj Jesús tiʼ baʼax kun eʼesik way yaan yéetel tsʼoʼok u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ, tu yaʼalaj: «Tumen bíin yanak táaj yaʼab mukʼyaj jeʼel bix mix juntéen yanak káajik yóokʼol kaab, mix bíin yanak uláakʼ ku tsʼoʼokol le jeʼeloʼ» (Mat. 24:3, 21). Ka máan kʼiineʼ, Jesuseʼ tu tsʼáaj ojéelbil yaan u yantal yaʼab máakoʼob kun salvartbiloʼob tiʼ le «táaj yaʼab mukʼyaj» kun yantaloʼ. Baʼaleʼ táanil tiʼ u yúuchul lelaʼ, le máaxoʼob yanoʼob tu tséel Satanasoʼ yaan u yilkoʼob u xuʼulskoʼob tiʼ u kaajal Jéeoba. ¡Jach túun yaj baʼax ken u muʼyajt tuláakal máak, jeʼex mejen paalal yéetel nojoch máakoʼob!

17. 1) ¿Baʼaxten maʼ unaj k-jach chiʼichnaktal yoʼolal baʼax ku taal u kʼiiniliʼ? 2) ¿Baʼax ken u yáantoʼon k-chʼaʼatukult wa yaan u tsʼoʼokol k-beel bey xan wa yaan u yantal k-paalal?

¹⁷ Baʼaleʼ, maʼ unaj k-jach chiʼichnaktal yoʼolal le baʼax ku taal u kʼiiniloʼ. Le taatatsiloʼoboʼ u yojloʼob yaan u kanáantaloʼob bey xan u mejen paalaloʼob wa ku chúukpajal u yóoloʼob tiʼ Jéeoba (xokaʼak Isaías 26:20, 21; Sof. 2:2, 3; 1 Cor. 7:14). Baʼaleʼ táanil tiʼ u kʼuchul le kʼiin jeʼelaʼ, maʼ u tuʼubultoʼon kuxaʼanoʼon tiʼ talam kʼiinoʼob, yéetel lelaʼ unaj u yáantkoʼon k-chʼaʼatukult wa yaan u tsʼoʼokol k-beel bey xan wa yaan u yantal k-paalal (2 Ped. 3:10-13). Wa k-beetik beyoʼ, tuláakaloʼon kex tsʼokaʼan k-beel wa maʼeʼ bey xan wa yaan k-paalal wa maʼatecheʼ, yéetel bix k-kuxtaleʼ yaan k-nojbeʼenkúuntik Jéeoba bey xan u kaajal.

[Tsolajiloʼob]

Utiaʼal kʼaʼajsbil

• Utúul máax ku meyajtik Dioseʼ, ¿baʼaxten maʼ maʼalob ka tsʼoʼokok u beel jach paaliʼ?

• ¿Baʼax táakaʼan ichil u líiʼsaʼal utúul paal?

• ¿Baʼaxten yaʼab sukuʼunoʼobeʼ ku chʼaʼatuklik maʼ u tsʼoʼokol u beeloʼob, wa maʼ u yantal u paalaloʼob?

• ¿Baʼax «yaayaj óolal» jeʼel u aktáantik le taatatsiloʼob ku meyajtkoʼob Diosoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 17]

¿Baʼaxten maʼ maʼalob ka tsʼoʼokok u beel utúul máax jach paaliʼ?

[U tsolajil le oochel teʼ táan juʼun 18]

Le íichamtsiloʼ jach jeʼel u yáantik u yatan utiaʼal ka maas táakpajak tiʼ baʼax yaan yil yéetel u meyajtaʼal Dioseʼ

[U tsolajil le oochel teʼ táan juʼun 19]

¿Baʼaxten yaan sukuʼunoʼobeʼ ku chʼaʼatuklik maʼ u yantal u paalaloʼob?