¿Kʼajaʼan wa tech?

¿Ta jóoʼsaj wa utsil tiʼ a xokik le revista U Pʼíich Tulumil Kanan le maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼaxten u Reino Dioseʼ maʼ tu puksiʼikʼal máak yaniʼ?

Jesuseʼ tu yaʼalaj: «Tiʼ u puksiʼikʼal máakoʼob ku jóokʼol le kʼaakʼas [tuukuloʼoboʼ], le ookoloʼ, le j-kíimsaj wíinikiloʼ, le núupkʼebaniloʼ; le ookoliloʼoboʼ u tsʼíiboltaʼal baʼax utiaʼal yaanal máakoʼ, le loobiloʼoboʼ» (Marcos 7:20-22). ¿Maʼ wa tu kʼeban puksiʼikʼal máak ku tsʼíiboltik u beetik baʼax maʼ maʼalobiʼ? Lelaʼ ku yeʼesikeʼ u Reino Dioseʼ maʼ tu páajtal u yantal tu kʼeban puksiʼikʼal máak, tumen u Reino Dioseʼ upʼéel baʼal jach maʼalob. Tsʼoʼoleʼ le Bibliaoʼ maʼ tu kaʼansik wa upʼéel baʼax jeʼel u yantal tu puksiʼikʼal máakeʼ. Baʼaxeʼ, jeʼex tu yaʼalaj le profetaʼoboʼ, upʼéel gobierno yaan u yutskíintik tuláakal le yóokʼol kaabaʼ.—wp 01-03, táan juʼun 13.

• ¿Tu áakʼabil wa ka síij Jesús ka bin ilbil tumen le astrologoʼoboʼ?

Upʼéel Bibliaeʼ ku yaʼalik: «Le j-ojéelajoʼoboʼ maʼ anchajoʼob tu yéetel le j-kanan tamanoʼob tu áakʼabil ka síij Jesús jeʼex u tuklik yaʼab máakoʼoboʼ. Tsʼoʼok u máan jujumpʼéel mesoʼob ka bin u yiloʼob Jesús». Tiʼ le kʼiinoʼob jeʼeloʼ, Jesuseʼ utúul «chan paal» yéetel tiʼ yaan tu najileʼ (Mat. 2:7-11). Wa tu áakʼabil ka síij Jesús ka xiʼik ilbil kaʼach tumen le astrologoʼob yéetel ka u bisoʼob oro yéetel uláakʼ siibaloʼob tiʼeʼ, ¿máasaʼ maʼatan kaʼach u tsʼáaik María chéen kaʼatúul chʼíichʼoʼob le ka tu bisaj u kʼub Jesús tu temploi Jerusalén cuarenta kʼiinoʼob síijikoʼ?—wp 01-03, táan juʼun  31.

• ¿Bix jeʼel u yantal kiʼimak óolal ichil a kuxtaleʼ?

Tuukulnen tiʼ lelaʼ: «¿Jeʼel wa u páajtal in beetik kʼeexoʼob ichil in kuxtal utiaʼal in maas meyajtik Jéeobaeʼ?». Amieʼ bey tu beetiloʼ. Kex maʼalob u náajal kaʼacheʼ, ku yuʼubik minaʼan kiʼimak óolal tiʼ. Tu tsʼáaj cuentaeʼ úuchik u chʼíikil meyajeʼ óolak u xúumpʼat u kaajal Jéeoba. Le oʼolaleʼ tu chʼaʼatuklaj u tsʼáaik táanil ichil u kuxtal le Reinooʼ yéetel yaan kʼiinoʼobeʼ tu beetaj u precursorai. Letiʼeʼ ku yaʼalikeʼ bejlaʼeʼ maas yaan kiʼimak óolal tiʼ ke le u kʼubmuba kaʼach chéen meyajoʼ.—15/1, táan juʼun 19.

• ¿Tiʼ baʼax chʼiʼibalil táan kaʼach u tʼaan Jesús le ka tu yaʼalaj le tʼaanoʼob ku chíikpajal tiʼ Mateo 24:34?

Tiʼ Jesuseʼ maases meyajnaj le tʼaan chʼiʼibal utiaʼal u tʼaan tiʼ le máaxoʼob maʼ tu meyajkoʼob Diosoʼ. Baʼaleʼ le ka tu yaʼalaj le tʼaanoʼob ku chíikpajal teʼ tekstoaʼ táan kaʼach u tʼaan tiʼ u disipuloʼob, le máaxoʼob kun yéeybiloʼob utiaʼal u binoʼob kaʼanoʼ. Letiʼob ken u naʼatoʼob tubeel baʼax tsʼoʼok u náatsʼal u kʼiinil u yúuchul jeʼex u chʼaʼachiʼitaʼal tiʼ Mateo 24:32, 33. Le oʼolaleʼ yaʼab baʼaxoʼob eʼesik Jesuseʼ táan kaʼach u tʼaan tiʼ le disipuloʼob yéeyaʼanoʼoboʼ, le kuxlajoʼob teʼ yáax siglooʼ bey xan le kuxaʼanoʼob teʼ kʼiinoʼobaʼ.—15/2, táan juʼunoʼob 23, 24.

• Jeʼex u yaʼalik Santiago 3:17, ¿baʼax jatsʼuts modos unaj u yantaltoʼon?

Upʼéel tiʼ letiʼobeʼ letiʼe kiliʼich kuxtaloʼ, lelaʼ yaan u yáantkoʼon k-tsʼáaba tu contra le baʼax kʼaas tu séebaʼaniloʼ (Gén. 39:7-9). Uláakʼeʼ letiʼe k-eʼesik jeetsʼelilo, tumen lelaʼ yaan u yáantkoʼob utiʼal maʼ k-kaxtik baʼateloʼob tiʼ u maasil. Le oʼolal maʼalob ka k-tukle: «¿Kʼaj óolaʼanen wa bey utúul máak ku beetik u yantal jeetsʼelil ichil le múuchʼuliloʼ wa maases kin kaxtik baʼatel? ¿Mantatsʼ wa kin baʼateltʼaan yéetel u maasil? ¿Séeb wa in pʼuʼujul yoʼolal jeʼel baʼaxak yéetel kin loobiltik u maasil yéetel baʼaxoʼob kin waʼalik? ¿Kin saʼatsik wa le baʼax ku beetaʼaltenoʼ yéetel maʼ tin sen aʼalik ka beetaʼak wa baʼax jeʼex in kʼáatoʼ?».—15/3, táan juʼunoʼob 24, 25.