Mantatsʼ unaj k-chaʼik u nuʼuktikoʼon Jéeoba
Mantatsʼ unaj k-chaʼik u nuʼuktikoʼon Jéeoba
«K-Jajal Dioseʼ utiaʼal jaʼaboʼob minaʼan u xuul. Letiʼ bisikoʼon [wa nuʼuktikoʼon] utiaʼal jaʼaboʼob minaʼan u xuul.» (SAL. 48:14, LSM.)
1, 2. ¿Baʼaxten maas maʼalob ka k-chaʼa u nuʼuktikoʼon Jéeoba ke ka k-nuʼuktba chéen t-juunal, yéetel baʼax kʼáatchiʼiloʼob kun núukbil teʼ xookaʼ?
¡JACH séeb jeʼel u lúubul máak tiʼ baʼaloʼob mix baʼal u beelal bey xan tiʼ baʼaloʼob jeʼel u taasiktoʼon yaʼab talamiloʼobeʼ! (Pro. 12:11.) Wa jach tu jaajil k-kʼáat beet upʼéel baʼax k-ojel maʼ maʼalobeʼ, k-puksiʼikʼaleʼ yaan u túulchʼintkoʼon k-beete (Jer. 17:5, 9). Le oʼolal le salmistaoʼ tu kʼáataj tiʼ Jéeoba: «Túuxt a sáasil yéetel a jaaj utiaʼal ka u yeʼesoʼobten le bej[oʼ]» (Sal. 43:3). Letiʼeʼ tu kʼubaj u yóol tiʼ Jéeoba, maʼ tiʼ le baʼaxoʼob u yojeloʼ, yéetel jach bin utsil tiʼ úuchik u beetik beyoʼ. Toʼon xaneʼ jach maʼalob ka k-kʼáat tiʼ Dios ka u nuʼuktoʼon.
2 Baʼaleʼ, ¿baʼaxten maas maʼalob ka k-chaʼa u nuʼuktoʼon Jéeoba? ¿Tiʼ baʼax súutukiloʼob ku maas kʼaʼabéettal k-kaxtik u nuʼuktaj? ¿Baʼax maʼalob modos kʼaʼabéettoʼon utiaʼal k-chaʼik u nuʼuktikoʼon? ¿Bix u nuʼuktikoʼon Jéeoba bejlaʼeʼ? Teʼ xookaʼ yaan k-ilik u núukil le kʼáatchiʼobaʼ.
¿Baʼaxten maas maʼalob ka k-chaʼa u nuʼuktoʼon Jéeoba?
3-5. ¿Baʼaxten maas maʼalob le nuʼuktaj ku tsʼáaiktoʼon Jéeobaoʼ?
3 Yáaxeʼ tumen Jéeobaeʼ letiʼe k-Taata yaan teʼ kaʼanoʼ (1 Cor. 8:6). Letiʼeʼ jach u kʼaj óoloʼon yéetel u yojel baʼax yaan t-puksiʼikʼal (1 Sam. 16:7; Pro. 21:2). Le rey Davidoʼ tu yaʼalajtiʼ: «Techeʼ a kʼaj óol tuláakal baʼaxoʼob kin beetik; kex tak náachileʼ, a wojel baʼax kin tuklik. Maʼiliʼ tʼaanakeneʼ, Yuumtsil techeʼ tsʼoʼok a wojéeltik» (Sal. 139:2, 4). Tumen jach u kʼaj óoloʼoneʼ, Jéeobaeʼ u yojel baʼax jeʼel u taasiktoʼon utsileʼ. Tsʼoʼoleʼ letiʼeʼ jach yaan u naʼat yéetel maas yaʼab baʼal u yojel ke le wíinikoʼoboʼ. Letiʼeʼ u yojel bix jeʼel u bin tiʼ máak wa ku chʼaʼatuklik u beetik baʼax maʼalob wa baʼax kʼaas (Isa. 46:9-11; Rom. 11:33). Jéeobaeʼ «chéen letiʼ yaan u naʼat» (Rom. 16:27).
4 U kaʼapʼéeleʼ, tumen Jéeobaeʼ u yaabiltmoʼon yéetel u kʼáat ka xiʼiktoʼon utsil (Juan 3:16; 1 Juan 4:8). Tumen u yaabiltmoʼoneʼ ku tsʼáaiktoʼon baʼaloʼob maʼalobtak. Le disipulo Santiagooʼ tu yaʼalaj: «Tuláakal maʼalob yéetel utsil chúukaʼan siibaleʼ kaʼanal u taal tiʼ le Taata máax beet u sáasililoʼob le kaʼanoʼ» (Sant. 1:17). Le máaxoʼob ku chaʼik u nuʼuktaʼaloʼob tumen Diosoʼ, ku jóoʼskoʼob yaʼab utsil tiʼ le baʼaloʼob ku tsʼáaikoʼ.
5 U tsʼookeʼ, tumen tiʼ Jéeobaeʼ yaan tuláakal páajtalil. Le salmistaoʼ tu yaʼalaj: «Le máax kajakbal tu yáanal u boʼoyil Sen Kaʼanaleʼ tiʼ yaan tu yáanal u kanan le máax yaan tuláakal páajtalil tiʼoʼ. Letiʼeʼ ku yaʼalik tiʼ [Jéeoba]: ¡Teech in taʼakbesaj, in toksajil, in [Dios] máax tiʼ yaan in wóol!» (Sal. 91:1, 2). Wa k-chaʼik u nuʼuktikoʼon mantatsʼ Jéeobaeʼ, k-eʼesik k-kʼáat ka u kanáantoʼon. Kex ka chʼaʼapachtaʼakoʼoneʼ, letiʼeʼ yaan u kanáantkoʼon. Mix bikʼin bíin u pʼatoʼon (Sal. 71:4, 5; xokaʼak Proverbios 3:19-26). Jeʼex k-ilkoʼ, Jéeobaeʼ u yojel baʼax jeʼel u taasiktoʼon utsileʼ, u kʼáat ka xiʼiktoʼon utsil yéetel yaan u páajtalil tiʼ u tsʼáaiktoʼon baʼaloʼob maʼalobtak. Le oʼolal mantatsʼ unaj k-chaʼik u nuʼuktikoʼon. Beoraaʼ koʼox ilik tiʼ baʼax súutukiloʼob ku maas kʼaʼabéettal k-kaxtik u nuʼuktaj.
¿Tiʼ baʼax súutukiloʼob maas kʼaʼabéet k-kaxtik u nuʼuktaj Dios?
6, 7. ¿Tiʼ baʼax súutukiloʼob maas kʼaʼabéettoʼon u nuʼuktaj Jéeoba?
6 U jaajileʼ, ichil tuláakal u kʼiiniloʼob k-kuxtal kʼaʼabéettoʼon u nuʼuktaj Jéeoba. Le salmistaoʼ tu yaʼalaj: «K-Jajal Dioseʼ utiaʼal jaʼaboʼob minaʼan u xuul. Letiʼ bisikoʼon utiaʼal jaʼaboʼob minaʼan u xuul» (Sal. 48:14, LSM). Jeʼex tu beetil le salmistaoʼ, toʼoneʼ k-eʼesik yantoʼon naʼatil tumen maʼ tu xuʼulul k-kʼáatik tiʼ Jéeoba ka u nuʼuktoʼon.
7 Baʼaleʼ, yaan súutukiloʼob tuʼux maas kʼaʼabéettoʼon u nuʼuktaj Jéeoba. Maʼ xaaneʼ tiʼ yanoʼon «tu chiʼ kíimil» tumen táan k-aktáantik chʼaʼapachtajil wa upʼéel yaayaj kʼojaʼanil, wa maʼ xaan xaneʼ tsʼoʼok u pʼáatal minaʼantoʼon meyaj (Sal. 69:16, 17). Wa táan k-máansik xan talamiloʼob beyaʼ maʼalob ka k-kʼáat tiʼ Jéeoba ka u yáantoʼon utiaʼal ka chúukpajak k-óol aktáantoʼob bey xan utiaʼal k-chʼaʼatuklik tubeel baʼax unaj k-beetik. ¿Máasaʼ jach ku líiʼsik k-óol ojéeltik yaan u yáantkoʼon? (Xokaʼak Salmo 102:17.) Baʼaleʼ, yaan xan tiʼ uláakʼ baʼaloʼob kʼaʼabéettoʼon u nuʼuktaj Jéeoba. Jeʼex ken k-kʼaʼayt u maʼalob péektsilil le Reino tiʼ le máaxoʼob yanoʼob teʼ tuʼux kajaʼanoʼonoʼ, kʼaʼabéettoʼon u nuʼuktaj Jéeoba utiaʼal ka kʼamaʼak le baʼax k-kʼaʼaytikoʼ. Yéetel ken k-chʼaʼatukult tiʼ baʼax ken k-náays óol, baʼax nookʼil ken k-búukinte, máax yéetel unaj k-bisikba, baʼax meyajil ken k-beete, tak tuʼux kun náakal k-xook, wa tak tiʼ uláakʼ baʼaloʼobeʼ, mantatsʼ unaj k-chʼaʼik en cuenta baʼax ku yaʼalik le Biblia utiaʼal k-beetik baʼax maʼaloboʼ. U jaajileʼ, kʼaʼabéettoʼon u nuʼuktaj Jéeoba tiʼ tuláakal baʼax k-beetik ichil k-kuxtal.
Baʼax jeʼel u yúuchul wa maʼ t-chaʼik u nuʼuktikoʼon Jéeobaeʼ
8. ¿Baʼax táakaʼan ichil le baʼax tu chʼaʼatuklaj u beetik Evaoʼ?
8 Maʼ u tuʼubultoʼoneʼ kʼaʼabéet k-chaʼik u nuʼuktikoʼon Dios yéetel tuláakal k-puksiʼikʼal. Letiʼeʼ maʼatech u obligartik máak utiaʼal ka beetaʼak baʼax u kʼáat. Evaeʼ, letiʼe yáax máak tu chʼaʼatuklaj maʼ u seguer u chaʼik u nuʼuktaʼal tumen Jéeobaoʼ, yéetel le baʼax úuchtiʼoʼ ku yeʼesiktoʼon baʼaxten kʼaʼabéet k-chaʼik u nuʼuktikoʼon Jéeoba. Tuukulnakoʼon tiʼ baʼax táakaʼan ichil le baʼax tu chʼaʼatuklaj u beetikoʼ. Letiʼeʼ tu jaantaj u yich le cheʼ aʼalaʼabtiʼob maʼ unaj u jaantkoʼoboʼ, tumen tu tuklaj yaan u pʼáatal jeʼex Dioseʼ yéetel «yaan u kʼuchul [u yojéelt] baʼax uts yéetel baʼax kʼaas» (Gén. 3:5). Úuchik u beetik beyaʼ, Evaeʼ tu yeʼesaj chéen tu juunal u kʼáat u chʼaʼatukult baʼax ken u beete yéetel tu yeʼesaj maʼ u kʼáat ka nuʼuktaʼak tumen Jéeobaiʼ. Beyoʼ tu tsʼáajuba tu contra u gobernación Jéeoba, yéetel Adaneʼ bey xan tu beetiloʼ (Rom. 5:12).
9. ¿Baʼax k-eʼesik wa maʼ t-tsʼoʼokbesik le baʼax ku yaʼaliktoʼon Jéeobaoʼ, yéetel baʼaxten jach maʼ maʼalob ka k-beet beyoʼ?
9 Toʼon xaneʼ, wa maʼ t-beetik baʼax ku yaʼaliktoʼon Jéeobaeʼ k-eʼesik táan k-tsʼáaikba tu contra u gobernación. Tuukulnakoʼon tiʼ utúul máak ku bin muchʼtáambal, baʼaleʼ tsʼoʼok u suuktal u chaʼantik chaknuulil. Le máakaʼ u yojel baʼax ku yaʼalik Dios yoʼolal le baʼaloʼobaʼ yéetel u yojel maʼ unaj mix u yúuchul tʼaan tu yoʼolaloʼobiʼ. ¿Maʼalob wa túun ka kulak u chaʼant le baʼaloʼob subtsiltakaʼ? (Efe. 5:3.) Le máax maʼatech u beetik le baʼax ku yaʼalik Diosoʼ, táan u tsʼáaikuba tu contra u gobernación (1 Cor. 11:3). Le máax ku beetik lelaʼ ku yeʼesik minaʼan u naʼat, tumen jeʼex tu yaʼalil Jeremíasoʼ, wíinikeʼ «minaʼan u páajtalil u yéeyik bix ku bin [u] xuʼulul» tiʼ u kuxtal (Jer. 10:23).
10. ¿Baʼaxten unaj u meyajtoʼon maʼalob le páajtalil tsʼaʼantoʼon utiaʼal k-chʼaʼatuklik baʼax ken k-beetoʼ?
10 Yaan máakoʼobeʼ ku yaʼalikoʼob maʼ maʼalob le baʼax tu yaʼalaj Jeremíasoʼ, tumen wa Dios tsʼáatoʼon u páajtalil k-chʼaʼatuklik baʼax ken k-beeteʼ, ¿baʼaxten túun ku pʼis óolkoʼon ken k-chʼaʼatukult k-beetik upʼéel wa baʼax? Baʼaleʼ, maʼ u tuʼubultoʼoneʼ kex Dios tsʼáa tiʼ wíinik le jatsʼuts páajtalilaʼ, letiʼeʼ yaan u kʼáatik cuenta tiʼ tuláakal máak yoʼolal baʼax tu beetaj wa yoʼolal baʼax tu yaʼalaj (Rom. 14:10). Jesuseʼ tu yaʼalaj: «Tiʼ u chiʼ máak ku jóokʼol tuláakal baʼax yaan tu puksiʼikʼal». Tsʼoʼoleʼ tu yaʼalaj xan: «Tiʼ le puksiʼikʼal ku jóokʼol kʼaakʼas tuukulil, kíimsaj wíinikil, núupkʼebanil, kʼaakʼas tsʼíibolal, ookolil, tuusil yéetel le aʼalaj baʼaliloʼ» (Mat. 12:34; 15:19). Jeʼex k-ilkoʼ, le baʼax k-beetik yéetel k-aʼalikoʼ ku yeʼeskoʼob jach baʼax yaan t-puksiʼikʼal. Le beetik le máaxoʼob meyajtik Dios yaan naʼat tiʼoboʼ mantatsʼ ku chaʼik u nuʼuktaʼaloʼob tumen Jéeoba. Le máaxoʼob beetik lelaʼ, tu táan Jéeobaeʼ «maʼalob u tuukuloʼob» yéetel letiʼeʼ bíin u «beet uts tiʼ[ob]» (Sal. 125:4).
11. ¿Baʼax k-kanik tiʼ le baʼax tu beetaj le israelitaʼoboʼ?
11 Tuukulnakoʼon tiʼ le baʼaxoʼob tu beetaj le israelitaʼoboʼ. Jéeobaeʼ ku kanáantkoʼob kaʼach ken u chʼaʼatukloʼob maʼalob baʼax ken u beetoʼob bey xan ken u yuʼuboʼob u tʼaan (Jos. 24:15, 21, 31). Baʼaleʼ, yaʼab utéenel tu chʼaʼatukultoʼob u beetkoʼob chéen baʼax u kʼáatoʼob. Tu kʼiiniloʼob Jeremíaseʼ, Jéeobaeʼ tu yaʼalajtiʼob: «Maʼ tu yuʼubajenoʼobiʼ, mix tu tsʼoʼokbesoʼob in tʼaaniʼ, tu tsʼuʼuykintajoʼob u pooloʼob, tu chaʼajoʼob u jíiltaʼaloʼob tumen u kʼaakʼas tsʼíibolal u puksiʼikʼaloʼob. Maʼ tu yóoltajoʼob suut tiʼ teniʼ, tu kúulpachtajenoʼob» (Jer. 7:24-26). ¿Máasaʼ jach maʼ maʼalob le baʼax tu beetoʼoboʼ? Toʼoneʼ maʼ unaj u jáawal k-chaʼik u nuʼuktikoʼon Jéeoba yoʼolal k-tsʼíibolaloʼobiʼ wa tumen chéen k-kʼáat beet baʼax ku yaʼalaʼaltoʼon tumen k-puksiʼikʼaliʼ. Wa k-beetik jeʼex le israelitaʼoboʼ táan xan k-kúulpachkuntik Jéeoba.
¿Baʼax kʼaʼabéettoʼon utiaʼal k-chaʼik u nuʼuktikoʼon Dios?
12, 13. 1) ¿Baʼax kʼaʼabéettoʼon utiaʼal k-chaʼik u nuʼuktikoʼon Jéeoba? 2) ¿Baʼaxten jach kʼaʼabéet u yantaltoʼon fe?
12 Tumen k-yaabilmaj Jéeobaeʼ le oʼolal k-chaʼik u nuʼuktikoʼon (1 Juan 5:3). Baʼaleʼ yaan xan uláakʼ baʼax kʼaʼabéettoʼon. Pabloeʼ tu yaʼalaj: «Táan k-xíimbal tu yoʼolal oksaj óolal, maʼ tu yoʼolal baʼax k-ilikiʼ» (2 Cor. 5:6, 7). ¿Baʼaxten jach kʼaʼabéet u yantaltoʼon fe? Jéeobaeʼ ku biskoʼon «tiʼ toj bejoʼob», baʼaleʼ le bejoʼobaʼ maʼ tu biskoʼon tiʼ ayikʼaliloʼob mix tu beetik ka ilaʼak jach nojoch baʼaloʼon teʼ yóokʼol kaabaʼ (Sal. 23:3). Le oʼolal kʼaʼabéettoʼon fe utiaʼal k-páaʼtik le baʼaloʼob ken u tsʼáatoʼon Diosoʼ (xokaʼak 2 Corintoiloʼob 4:17, 18). Le fejoʼ yaan xan u yáantkoʼon utiaʼal ka yanaktoʼon kiʼimak óolal kex maʼ yaʼab baʼaloʼob yantoʼoniʼ (1 Tim. 6:8).
13 Jesuseʼ tu yaʼaleʼ utiaʼal u meyajtaʼal Dioseʼ yaan baʼaxoʼob kʼaʼabéet u pʼatik máak, yéetel utiaʼal u beetik lelaʼ kʼaʼabéet u yantaltiʼ fe (Luc. 9:23, 24). Yaʼab tiʼ le máaxoʼob ku meyajtkoʼob Diosoʼ yaan baʼaloʼob tsʼoʼok u pʼatikoʼob, tsʼoʼok u pʼektaʼaloʼob yéetel tsʼoʼok xan u chʼaʼapachtaʼaloʼob (2 Cor. 11:23-27; Apo. 3:8-10). Baʼaleʼ, yoʼolal le nojoch fe yantiʼoboʼ tsʼoʼok u chúukpajal u yóol u aktáantoʼob le talamiloʼoboʼ (Sant. 1:2, 3). Wa yantoʼon upʼéel nojoch fejeʼ, mantatsʼ ken k-il u kʼaʼabéetil k-chaʼik u nuʼuktikoʼon Jéeoba, tumen leloʼ mantatsʼ ken u taastoʼon yaʼab utsiloʼob. Toʼoneʼ jach k-ojel, le máaxoʼob ku chúukpajal u yóol u meyajtoʼob Jéeobaeʼ yaan u kʼamkoʼob upʼéel baʼax maas maʼalob tiʼ le baʼax ku muʼyajkoʼoboʼ (Heb. 11:6).
14. ¿Baʼaxten kʼaʼabéetchaj u yeʼesik kabal óolal Agar?
14 Utiaʼal k-chaʼik nuʼuktaʼal tumen Dioseʼ, kʼaʼabéet xan toʼon kabal óolal. Bey tu yeʼesil Agar, u x-palitsil Sara. Le ka tu yilaj Sara maʼ tu páajtal u yantal u paalaleʼ, tu yaʼalaj tiʼ u yíicham ka yanak utúul u paal yéetel u x-palitsil. Agar túuneʼ pʼáat embarazadai, ka káaj u nojbaʼalkúunskuba tu táan Sara. Saraeʼ «joʼopʼ túun u loobiltik» yéetel u tʼaanoʼob, ka anchaj u púutsʼul Agar. Baʼaleʼ utúul u ángel Jéeobaeʼ tu yaʼalajtiʼ: «Suunen tu yotoch a xunáanil, tsʼoʼokbes tuláakal baʼax ku bin u yaʼaltech» (Gén. 16:2, 6, 8, 9). Maʼ xaaneʼ, Agareʼ u kʼáat kaʼach ka aʼalaʼaktiʼ ka u beet yaanal baʼal, tumen utiaʼal u beetik le baʼax aʼalaʼabtiʼoʼ kʼaʼabéet kaʼach u kʼexik bix u modos. Baʼaleʼ, letiʼeʼ tu yeʼesaj kabal óolal yéetel tu beetaj le baʼax aʼalaʼabtiʼoʼ, le oʼolal Ismael, u hijoeʼ, síij tu yiknal Abram, tuʼux jeʼel u kanáantaʼal kaʼacheʼ.
15. ¿Tiʼ baʼax talamiloʼob kʼaʼabéet k-maas eʼesik kabal óolal utiaʼal u nuʼuktikoʼon Jéeoba?
15 Maʼ xaaneʼ, toʼon xaneʼ kʼaʼabéet k-kʼexik modos utiaʼal ka u nuʼuktoʼon Jéeoba. Tuukulnakoʼon tiʼ lelaʼ, maʼ xaaneʼ utúul sukuʼuneʼ kʼaʼabéet u tsʼáaik cuenta yaan tiʼ baʼaxoʼob ku náaysik u yóoleʼ maʼ maʼalob u yilaʼal tumen Jéeobaiʼ. Maʼ xaan xaneʼ, uláakʼeʼ yaan baʼax maʼ maʼalob tu yaʼalaj tiʼ utúul sukuʼun yéetel kʼaʼabéet u kʼáatik ka saʼatsaʼaktiʼ, wa kʼaʼabéet xan u éejemtik yaan baʼax maʼ maʼalob tu beetiʼ. ¿Kux túun wa yaan utúul sukuʼun tsʼoʼok u lúubul tiʼ upʼéel nojoch kʼeban? Unaj u yeʼesik kabal óolal yéetel unaj u tsʼáaik u yojéelt le ancianoʼoboʼ. Tsʼoʼoleʼ, maʼ xaaneʼ yaan utúul máax tsʼoʼok u jóoʼsaʼal ichil u kaajal Jéeoba. Le máakaʼ, ¿baʼax unaj u beetik utiaʼal ka suunak tu kaajal Dios? Unaj u arrepentir yéetel u xuʼulul u beetik le baʼax kʼaasoʼ. Ken úuchuk baʼaloʼob jeʼex leloʼobaʼ maʼalob ka k-kʼaʼajs le baʼax ku yaʼalik Proverbios 29:23: «Máax j-kaʼanal icheʼ, ku paʼajal u subtal, baʼaleʼ j-kabal óoleʼ ku tsiʼikil».
¿Bix u nuʼuktikoʼon Jéeoba bejlaʼeʼ?
16, 17. ¿Bix jeʼel k-jóoʼsik utsil tiʼ le baʼax ku yaʼalik le Bibliaoʼ?
16 Le baʼax maas ku meyaj tiʼ Jéeoba utiaʼal u nuʼuktikoʼonoʼ, letiʼe Bibliaoʼ (xokaʼak 2 Timoteo 3:16, 17). Wa k-kʼáat jóoʼs utsil tiʼ le Bibliaoʼ, maʼ unaj k-páaʼtik u yantaltoʼon upʼéel nojoch talamil utiaʼal k-xakʼaltik baʼax tsolnuʼukiloʼob ku taaskiʼ. Baʼaxeʼ unaj k-xokik sáamsamal (Sal. 1:1-3). Wa k-beetik beyaʼ, yaan k-ojéeltik baʼax tsolnuʼukiloʼob ku tsʼáaiktoʼon Dios. Tsʼoʼoleʼ yaan xan u yáantkoʼon tuukul jeʼex letiʼeʼ, yéetel yaan u páajtal k-aktáantik jeʼel baʼalak talamil ka yanaktoʼoneʼ.
17 Baʼaleʼ, kʼaʼabéet xan k-tuukul tiʼ le baʼaxoʼob k-xokik teʼ Bibliaoʼ yéetel k-payalchiʼ yoʼolal le baʼax k-kankoʼ. Ken tuukulnakoʼon tiʼ le tsikbaliloʼob yaan teʼ Bibliaoʼ, k-kanik baʼax jeʼel k-beetik ken aktáant wa baʼax talamileʼ (Sal. 77:12). Wa yantoʼon upʼéel nojoch talamileʼ, unaj k-kʼáatik u nuʼuktaj Dios ich payalchiʼ utiaʼal k-aktáantik. U kiliʼich muukʼeʼ yaan u yáantkoʼon k-kʼaʼajs le baʼax tsʼoʼok xokik teʼ Biblia wa teʼ jóoʼsaʼaniloʼob utiaʼal k-aktáantik le talamiloʼ (xokaʼak Salmo 25:4, 5).
18. ¿Bix u tsʼáaiktoʼon nuʼuktaj Jéeoba yéetel u kaajal?
18 Uláakʼ baʼax ku meyaj tiʼ Jéeoba utiaʼal u nuʼuktikoʼoneʼ, letiʼe u kaajaloʼ. Ichil lelaʼ táakaʼan «le palitsil chúukpajaʼan u yóol yéetel yaan u naʼat» bey xan le Cuerpo Gobernante ku tʼaan tu yoʼolaloʼ. Le palitsiloʼ mantatsʼ ku tsʼáaiktoʼon kaʼansaj yéetel le jóoʼsaʼaniloʼoboʼ, le muchʼtáambaloʼoboʼ bey xan yéetel le asambleaʼoboʼ (Mat. 24:45-47; ket yéetel Beetaʼanoʼob [Hechos] 15:6, 22-31). Tsʼoʼoleʼ teʼ múuchʼuliloʼoboʼ yaan sukuʼunoʼob noʼojaʼanoʼob jeʼex le ancianoʼob jach u líiʼsmubaʼob utiaʼal u tsʼáaikoʼob áantaj yéetel le nuʼuktaj ku taal teʼ Bibliaoʼ (Isa. 32:1). Le táankelem paalaloʼob yanoʼob teʼ múuchʼuliloʼ, ku nuʼuktaʼaloʼob xan tumen Jéeoba yéetel u yáantaj le taatatsiloʼoboʼ. Le paalaloʼoboʼ mantatsʼ unaj u kaxtik u nuʼuktaj u taataʼob (Efe. 6:1-3).
19. ¿Baʼax utsiloʼob ku kʼamik le máaxoʼob mantatsʼ ku chaʼik u nuʼuktaʼaloʼob tumen Jéeobaoʼ?
19 Jach beyoʼ, Jéeobaeʼ jejeláas bix u tsʼáaiktoʼon nuʼuktaj yéetel mantatsʼ unaj k-kʼamik u nuʼuktaj. Le ka tʼaanaj tiʼ le kʼiinoʼob tuʼux le israelitaʼob tu beetoʼob le baʼax u kʼáat Jéeobaoʼ, le rey Davidoʼ tu yaʼalaj tiʼ Dios: «K-taataʼobeʼ tu kʼubajoʼob u yóoloʼob tiʼ teech; tu alab óoltechoʼob, techeʼ ta [salvartoʼob]; tu kʼáatajoʼob áantaj tiʼ teech, techeʼ ta tsʼáaj [salvación] tiʼob; tu kʼubaj u yóoloʼob tiʼ teech, techeʼ maʼ ta pajaj u subtaloʼo[biʼ]» (Sal. 22:3-5). Wa k-kʼubik k-óol tiʼ Dios yéetel k-chaʼik u nuʼuktikoʼoneʼ, letiʼe yaan xan u yáantkoʼon yéetel yaan u béeychajal le baʼax k-páaʼtikoʼ. Tumen k-tsʼáaik «[k-]kuxtal tu kʼab Yuumtsil» Jéeoba yéetel maʼatech k-beetik chéen baʼax k-tuklikeʼ, le oʼolal k-kʼamik yaʼab utsiloʼob bejlaʼeʼ (Sal. 37:5). Baʼaleʼ wa ku chúukpajal k-óol beet baʼax ku yaʼaliktoʼon Dioseʼ, le utsiloʼob ken k-kʼamoʼ utiaʼal kʼiinoʼob minaʼan u xuul. Davideʼ tu yaʼalaj: «Yuumtsileʼ, u yaakuntmaj baʼax noʼojaʼan; maʼ táan u xúumpʼattik le máakoʼob u kʼubmajoʼob u yóoloʼob tiʼeʼ [...]. Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Sal. 37:28, 29).
¿Jeʼel wa u páajtal a tsolikeʼ?
• ¿Baʼaxten maas maʼalob le nuʼuktaj ku tsʼáaiktoʼon Jéeobaoʼ?
• ¿Baʼax k-eʼesik wa maʼ t-tsʼoʼokbesik le baʼax ku yaʼaliktoʼon Jéeobaoʼ?
• ¿Tiʼ baʼax talamiloʼob kʼaʼabéet k-maas eʼesik kabal óolal?
• ¿Bix u nuʼuktikoʼon Jéeoba bejlaʼeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
¿Ka chaʼik wa u nuʼuktikech Jéeoba tiʼ tuláakal baʼax ka beetik?
[U tsolajil le oochel teʼ táan juʼun 9]
Evaeʼ tu tsʼáajuba tu contra u gobernación Jéeoba
[U tsolajil le oochel teʼ táan juʼun 10]
¿Baʼax kʼaʼabéet kaʼach tiʼ Agar utiaʼal u beetik le baʼax aʼalaʼabtiʼ tumen le angeloʼ?