Táankelem paalaleʼex, kʼaʼajakteʼex Máax Beetmaileʼex

«Kaʼalikil táankelmecheʼ, kʼaʼajak tiʼ teech máax beetech.» (ECL. 12:1.)

1. ¿Baʼaxten k-aʼalik Jéeobaeʼ jach u kʼubmaj u yóol tiʼ le táankelem paalaloʼoboʼ?

JÉEOBAEʼ ku ketik le táankelem paalaloʼob yéetel le pʼuul jaʼ ku síiskuntik u yóol máakoʼ. Letiʼeʼ tu yaʼaleʼ «tu kʼiinil le tsʼáanchaʼatajoʼ», yaan u yantal táankelem paalaloʼob ken u tsʼáaubaʼob yáanal u nuʼuktaj Cristo (Sal. 110:3). Lelaʼ yaan kaʼach u béeytal teʼ kʼiinoʼob tuʼux yaan u yantal yaʼab máakoʼob maʼ ken u yóot u yojéeltoʼob mix baʼal tiʼ Dios, baʼaxeʼ chéen yaan u kaxtik u yutsiloʼob yéetel chéen yaan u binoʼob tu paach taakʼin. Kex beyoʼ, Jéeobaeʼ u yojel kaʼacheʼ le táankelmoʼob kun adorarkoʼ maʼ bey ken u beetiloʼobiʼ. ¿Máasaʼ Jéeobaeʼ jach u kʼubmaj u yóol tiʼ le táankelem paalaloʼoboʼ?

2. ¿Baʼax táakaʼan ichil u kʼaʼajsaʼal Jéeoba?

² ¡Jéeobaeʼ jach ku kiʼimaktal u yóol ken u yil yaan táankelem paalaloʼob ku kʼaʼajskoʼob le Máax Beetmailoʼoboʼ! (Ecl. 12:1.) Baʼaleʼ, u kʼaʼajsaʼal Jéeobaeʼ maʼ chéen u kʼáat u yaʼal u tuukul máak tu yoʼolal letiʼiʼ. Táakaʼan xan k-beetik baʼax utstutʼaan yéetel k-chaʼik u nuʼuktik k-kuxtal yéetel le baʼax ku yaʼalik le Bibliaoʼ. U kʼáat xan u yaʼal k-creertik jach tu jaajil u kʼáat ka xiʼiktoʼon utsil (Sal. 37:3; Isa. 48:17, 18). Táankelem paal, ¿bey wa a wilik le Máax Beetmailechoʼ?

«Okes a wóol tiʼ Yuumtsil yéetel tuláakal a puksiʼikʼal»

3, 4. ¿Bix tu yeʼesil Jesús jach ku kʼubik u yóol tiʼ Jéeoba, yéetel baʼaxten unaj k-beetik jeʼex letiʼoʼ?

³ Jesuseʼ, letiʼe máax tu maas kʼubaj u yóol tiʼ Jéeobaoʼ. Letiʼeʼ tu beetaj le baʼax ku yaʼalik Proverbios 3:5, 6: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej». Maʼ sen úuch okjaʼanak Jesuseʼ, Satanaseʼ tu yaʼalaj jeʼel u tsʼáaiktiʼ u gobiernoiloʼob le yóokʼol kaabaʼ (Luc. 4:3-13). Baʼaleʼ, Jesuseʼ maʼ tu chaʼaj u tuʼusliʼ. Letiʼeʼ u yojel kaʼacheʼ utiaʼal ka yanak «ayikʼalil, tsiikil yéetel kuxtal» tiʼ máakeʼ, kʼaʼabéet u yeʼesaʼal «kabal [óolal] yéetel tsiikil tiʼ Yuumtsil» (Pro. 22:4).

⁴ Bejlaʼeʼ, le máakoʼoboʼ chéen ku kaxtik u yutsiloʼob yéetel ku binoʼob tu paach u tsʼíibolaloʼob. Le oʼolaleʼ, jach kʼaʼabéet k-kuxtal jeʼex tu beetil Jesucristooʼ. Táankelem paal, maʼ u tuʼubultecheʼ Satanaseʼ táan u beetik tuláakal le ku páajtal utiaʼal ka xuʼuluk a bin teʼ bej ku bisik máak teʼ kuxtaloʼ. Letiʼeʼ u kʼáat ka xiʼik tuláakal máak tiʼ u bejil le xuʼulsajiloʼ. ¡Maʼ a chaʼik u tuskech! Baʼaxeʼ, chʼaʼatukult a beetik le baʼaxoʼob ku yaʼalik le Máax Beetmailechoʼ. Kʼub a wóol tiʼ Jéeoba yéetel tuláakal a puksiʼikʼal yéetel beet tuláakal le ku páajtal utiaʼal u yantaltech «le kuxtal minaʼan u xuuloʼ». Maʼ u tuʼubultecheʼ Jéeobaeʼ jach taʼaytak u béeykuntik le baʼax u yaʼalmaj u tsʼáaiktoʼonoʼ (1 Tim. 6:19).

Táankelem paal, yanaktech naʼatil

5. ¿Baʼax ka tuklik unaj u beetik máak wa taʼaytak u xuʼulsaʼal tiʼ le kʼasaʼan yóokʼol kaabaʼ?

⁵ Le táankelem paalaloʼob ku meyajtkoʼob Jéeobaoʼ maas yantiʼob naʼatil ke le uláakʼ maʼatech u beetkoʼoboʼ (xokaʼak Salmo 119:99, 100). U yojloʼob maʼ kun xáantaleʼ Jéeobaeʼ yaan u xuʼulsik tiʼ le kʼasaʼan yóokʼol kaabaʼ. Kex tumen maʼ sen yaʼab a jaʼabileʼ, tsʼoʼok a tsʼáaik cuentaeʼ cada kʼiin ku máaneʼ le máakoʼoboʼ ku maas sajaktaloʼob yéetel ku chiʼichnaktaloʼob yoʼolal le baʼaloʼob ku yúuchloʼoboʼ. Yéetel maʼ xaaneʼ tsʼoʼok a wuʼuyik u yúuchul tʼaan tiʼ bix u sen kʼaskúuntaʼal le Luʼumaʼ, tsʼoʼoleʼ cada jaʼab ku máaneʼ táan u maas chokotal le kʼiinoʼ yéetel táan u yúuchul uláakʼ baʼaloʼob jeʼex leloʼobaʼ. Le baʼaloʼob ku yúuchlaʼ ku beetik u jach chiʼichnaktal yaʼab máakoʼob, baʼaleʼ toʼoneʼ k-ojleʼ le baʼaloʼobaʼ ku yeʼeskoʼob tsʼoʼok u náatsʼal u kʼiinil u xuʼulsaʼal tiʼ u kʼasaʼan yóokʼol kaab Satanás (Apo. 11:18).

6. ¿Bix tsʼoʼok u táabsaʼal jujuntúul táankelem paalaloʼob?

 ⁶ Baʼaleʼ ku yaatal k-óol ken k-il yaan jujuntúul táankelmoʼobeʼ tsʼoʼok u chaʼik u táabsaʼaloʼob yéetel tsʼoʼok u tuʼubultiʼob taʼaytak u xuʼulsaʼal tiʼ le kʼasaʼan yóokʼol kaabaʼ (2 Ped. 3:3, 4). Uláakʼoʼobeʼ tsʼoʼok u lúubloʼob tiʼ kʼebanoʼob ikil u biskubaʼob yéetel máaxoʼob maʼatech u meyajtkoʼob Jéeoba wa ikil u chaʼantkoʼob chaknuulil (Pro. 13:20). ¿Máasaʼ jach yaj ka náachchajkoʼon tiʼ Jéeoba beora jach naatsʼ yanik le xuʼulsajiloʼ? Utiaʼal maʼ u yúuchultoʼon lelaʼ, koʼox ilik baʼax úuch tiʼ le israelitaʼob le tiaʼanoʼob kaʼach naatsʼ tiʼ u luʼumil Moaboʼ. Lelaʼ úuch teʼ jaʼab 1473 táanil tiʼ k-kʼiinoʼob, le jach taʼaytak u yookloʼob kaʼach teʼ luʼum aʼalaʼan u tsʼaʼabaltiʼoboʼ. ¿Baʼax túun úuchtiʼob?

Taʼaytak u yookloʼob kaʼach teʼ luʼum ka táabsaʼaboʼoboʼ

7, 8. 1) ¿Baʼax meyajnaj tiʼ Satanás utiaʼal u táabsik le israelitaʼob le tiaʼanoʼob naatsʼ tu luʼumil Moaboʼ? 2) ¿Baʼax táabsajil ku meyaj xan tiʼ teʼ kʼiinoʼobaʼ?

⁷ Satanaseʼ tu beetaj jejeláas baʼaloʼob utiaʼal maʼ u yokol kaʼach le israelitaʼob teʼ luʼum tu yaʼalaj Dios u tsʼáaiktiʼoboʼ. Yáaxeʼ tu yilaj ka loolobtʼantaʼak le israelitaʼob tumen le profeta Balaamoʼ, baʼaleʼ maʼ béeychaj le baʼax u kʼáat kaʼachoʼ. Le oʼolal tu beetaj ka táabsaʼak le israelitaʼob tumen le kiʼichpam moabitaʼob utiaʼal ka náachchajkoʼob tiʼ Jéeobaoʼ. Le táabsajilaʼ tu beetaj u lúubul tiʼ núupkʼeban yaʼab israelitaʼob yéetel tu beetaj xan u adorarkoʼob Baal. Kex tumen taʼaytak u yookloʼob kaʼach teʼ luʼum aʼalaʼan u tsʼaʼabaltiʼoboʼ, veinticuatro mil utúulaloʼobeʼ kíimoʼob. ¡Jach túun yaj le baʼax úuchtiʼobaʼ! (Núm. 25:1-3, 9.)

⁸ Toʼon xaneʼ jach taʼaytak k-okol teʼ túumben luʼum u yaʼalmaj Dios u tsʼáaiktoʼonoʼ. Yéetel Satanaseʼ láayliʼ táan u meyajtiʼ le núupkʼeban utiaʼal u táabsik le máaxoʼob meyajtik Jéeobaoʼ. Bejlaʼeʼ u máakiloʼob le yóokʼol kaabaʼ maʼ kʼaas u yilkoʼob le núupkʼebanoʼ bey xan u núupchital utúul xiib yéetel u yéet xiibil wa utúul koʼolel yéetel u yéet koʼolelil. Utúul kiikeʼ tu yaʼalaj: «In paalaloʼobeʼ chéen tin wotoch yéetel teʼ muchʼtáambaloʼob ku yuʼubikoʼob u yaʼalaʼal kʼaas tu táan Dios le núupkʼebanoʼ, bey xan u núupchital utúul xiib yéetel u yéet xiibil wa utúul koʼolel yéetel u yéet koʼolelil».

9. ¿Baʼax talmiloʼob ku aktáantik le táankelem paalaloʼoboʼ, yéetel baʼax jeʼel u páajtal u beetkoʼob utiaʼal maʼ u yantal kʼaakʼas tuukul tiʼobeʼ?

⁹ Le táankelem paalaloʼob ku kʼaʼajskoʼob le Máax Beetmailoʼoboʼ, u yojloʼobeʼ le núupchitaloʼ upʼéel baʼal kiliʼich tu táan Dios yéetel tu tsʼáaj utiaʼal u yantal u paalal máak. Le oʼolal ku yilkoʼobeʼ, le núupchitaloʼ chéen utiaʼal le máaxoʼob tsʼokaʼan u beeloʼob jeʼex u yaʼalik Diosoʼ (Heb. 13:4). Baʼaleʼ tu táankelmil wa tu x-lóoʼbaynil máakeʼ, maʼ chéen chʼaʼabil u controlartik u tsʼíibolaliʼ, tumen teʼ jaʼaboʼobaʼ ku maas tsʼíiboltik máak u núupchital yéetel wa máax (1 Cor. 7:36, LTN). ¿Baʼax jeʼel u páajtal a beetik wa ku joʼopʼol u yantaltech kʼaakʼas tuukuloʼobeʼ? Kʼáat tiʼ Dios ich payalchiʼ ka u yáantech tuukul tiʼ baʼaloʼob maʼalobtak. Jéeobaeʼ mantatsʼ ku yáantik le máaxoʼob ku kʼáatkoʼob áantaj tiʼ yéetel u jaajil u yóoloʼoboʼ (xokaʼak Lucas 11:9-13).  Maʼalob xan ka tsikbalnakech yéetel wa máax tiʼ baʼaloʼob jeʼel u yáantkecheʼ.

Chʼaʼatukult maʼalob baʼax ken a beet yéetel a kuxtal

10. ¿Baʼax maʼ unaj a tsʼíiboltikiʼ, yéetel tiʼ baʼax maʼalob ka tuukulnakech?

¹⁰ Bejlaʼeʼ yaʼab táankelmoʼobeʼ chéen ku binoʼob tu paach u tsʼíibolaloʼob. Ku beetikoʼob beyoʼ tumen minaʼantiʼob «u nuʼuktʼaan [Dios]» yéetel maʼ u yojloʼob baʼax ken u beet maʼ kun xáantaliʼ (Pro. 29:18). Beyoʼob jeʼex le israelitaʼob tu kʼiiniloʼob kaʼach Isaías tu kʼububaʼob chéen tiʼ «chaʼanoʼob yéetel kiʼimak óolal» yéetel chéen xan ku jaantkoʼob bakʼ yéetel ku yukʼikoʼob vino (Isa. 22:13). Maʼ a tsʼíiboltik le baʼax ku beetik le máakoʼobaʼ, baʼaxeʼ tuukulnen tiʼ le baʼaxoʼob ku yaʼalik Dios u tsʼáaik tiʼ le máaxoʼob ku chúukpajal u yóoloʼob u meyajtoʼ. Tukult lelaʼ: «¿Táan wa in jach tsʼíiboltik ka kʼuchuk le Paraísooʼ? ¿Kin beetik wa tuláakal le ku páajtal utiaʼal ka kuxlaken jeʼex u kʼáat Dios le táan in páaʼtik u béeytal le baʼax u yaʼalmoʼ?» (Tito 2:12, 13). Le baʼax ken a núukoʼ yaan u yáantkech a chʼaʼatukult maʼalob baʼax ken a beet yéetel a kuxtal.

11. Le mejen paalaloʼob yéetel le táankelmoʼob ku binoʼob xookoʼ, ¿baʼaxten unaj u yilik u jóoʼskoʼob u yutsil tiʼ le kaʼansaj ku kʼamikoʼoboʼ?

¹¹ U máakiloʼob le yóokʼol kaabaʼ, ku túulchʼintik le táankelem paalaloʼob utiaʼal ka kaʼanchajak u xookoʼob. Wa láayliʼ táan a bin xookeʼ, unaj a wilik a jóoʼsik u yutsil le baʼax ku kaʼansaʼaltechoʼ, tumen lelaʼ maʼ chéen yaan u yáantkech utiaʼal ka a kaxt meyajiʼ, baʼaxeʼ yaan xan u yáantkech teʼ múuchʼuliloʼ yéetel yaan u páajtal a kaʼansik tubeel baʼax ku yaʼalik le Bibliaoʼ. Tsʼoʼoleʼ utiaʼal a kaʼansaj tubeeleʼ kʼaʼabéet a naʼatik maʼalob le baʼax ka xokikoʼ, a tsikbal tubeel bey xan a tʼaan yéetel tsiikil. Baʼaleʼ le kaʼansaj maas maʼalob jeʼel a kʼamikoʼ letiʼe ku taal teʼ Bibliaoʼ. Wa ka xakʼaltik yéetel ka tsʼáaik ichil a kuxtal le baʼax ku yaʼalikoʼ, yaan u bintech utsil yéetel yaan u yantaltech le kuxtal minaʼan u xuuloʼ (xokaʼak Salmo 1:1-3). *

12. Le taatatsiloʼoboʼ, ¿bix unaj xan u kaʼansik u mejen paalaloʼob?

¹² Tu úuchben kaajil Israeleʼ, jach kʼaʼanan u yilaʼal kaʼach u kaʼansaʼal le mejen paalaloʼoboʼ. Ichil le kaʼansaj ku tsʼáaik kaʼach le taatatsiloʼoboʼ, táakaʼan le baʼaxoʼob unaj u kanik le paalaloʼob utiaʼal u bintiʼob utsil ichil u kuxtaloʼoboʼ, baʼaleʼ maases le yaan yil yéetel u meyajtaʼal Diosoʼ (Deu. 6:6, 7). Le mejen paalal ku yuʼubkoʼob kaʼach le baʼax ku yaʼalaʼaltiʼob tumen u taataʼob yéetel uláakʼ máaxoʼob meyajtik Dioseʼ, ku kanikoʼob le baʼax kun kʼaʼabéettaltiʼob ichil u kuxtaloʼoboʼ. Baʼaleʼ yoʼolal le kaʼansaj ku kʼamikoʼob tiʼ Diosoʼ ku yantaltiʼob xan jatsʼuts modos, jeʼex le naʼatiloʼ, le ojéelajiloʼ, le kʼaj óolaliloʼ yéetel maʼalob tuukul utiaʼal u chʼaʼatuklikoʼob tubeel baʼax ken u beetoʼob (Pro. 1:2-4; 2:1-5, 11-15). Bejlaʼeʼ, le taatatsiloʼob ku meyajtkoʼob Diosoʼ kʼaʼanan xan u kaʼansik u paalaloʼob.

¿U tsolnuʼuk máaxoʼob unaj a chʼenxikintik?

13. ¿Baʼax tsolnuʼukiloʼob ku tsʼaʼabal tiʼ jujuntúul táankelmoʼob, yéetel baʼaxten kʼaʼabéet u kanáantkubaʼob tiʼ le baʼax ku yaʼalaʼaltiʼoboʼ?

¹³ Le táankelem paalaloʼoboʼ mantatsʼ ku tsʼaʼabal tsolnuʼuk tiʼob tumen yaʼab máakoʼob, jeʼex le maestroʼoboʼ; le máakoʼobaʼ ku yaʼalikoʼobeʼ utiaʼal u bin utsil tiʼ máakeʼ kʼaʼanan u kaʼantal u xook. Le oʼolaleʼ, kʼáat tiʼ Jéeoba ka u nuʼuktech yéetel ilawil wa le baʼax ku yaʼalaʼaltechoʼ maʼatech u bin tu contra baʼax ku yaʼalik le Biblia yéetel le jóoʼsaʼaniloʼoboʼ. Yoʼolal le baʼax ka xokik teʼ Bibliaoʼ, techeʼ a wojleʼ Satanaseʼ maas utstutʼaan u táabsik le táankelmoʼoboʼ yéetel le máaxoʼob minaʼan u naʼatoʼoboʼ. Kʼaʼajaktech le baʼax úuch teʼ tu jardinil Edenoʼ. Evaeʼ, tumen maʼ jach yaʼab baʼaloʼob u yojeleʼ tu chaʼaj u táabsaʼal tumen Satanás, utúul máax maʼ u kʼaj  óoliʼ yéetel maʼ u kʼáat ka xiʼik utsil tiʼiʼ. ¿Máasaʼ maas jeʼel u bin utsil tiʼ wa ka u yuʼub kaʼach u tʼaan Jéeobaeʼ? Letiʼeʼ yaʼab bix úuchik u yeʼesik tiʼ Eva u yaabilmaj yéetel u kʼáat kaʼach ka xiʼik utsil tiʼ (Gén. 3:1-6).

14. ¿Baʼaxten unaj a beetik le baʼax ku yaʼalikoʼobtech Jéeoba yéetel a taataʼob?

¹⁴ Le Máax Beetmailechoʼ u yaabilmech, yéetel u kʼáat ka xiʼiktech utsil. Tsʼoʼoleʼ u kʼáat xan ka yanaktech kiʼimak óolal utiaʼal mantatsʼ. Le oʼolal jeʼex utúul taatatsileʼ, letiʼeʼ ku yaʼaliktech xan le baʼax ku yaʼalik tiʼ le u maasil máaxoʼob meyajtikoʼ: «Way yaan le bejaʼ, xeeneʼex teʼelaʼ» (Isa. 30:21). Wa a taataʼob ku meyajkoʼob Dios yéetel chúukaʼan óolaleʼ, yantech uláakʼ maʼalob áantaj. Uʼuy baʼax ku yaʼalikoʼobtech yéetel chʼaʼa en cuenta u tsolnuʼukoʼob utiaʼal a chʼaʼatuklik maʼalob baʼax ken a beet yéetel a kuxtal (Pro. 1:8, 9). Letiʼobeʼ u kʼáatoʼob ka yanaktech le kuxtal minaʼan u xuuloʼ, upʼéel baʼal maas maʼalob ke le ayikʼaliloʼob yéetel le baʼaxoʼob ku tsʼáaik le yóokʼol kaabaʼ (Mat. 16:26).

15, 16. 1) ¿Baʼax jach k-ojel ken u beet Jéeoba? 2) ¿Baʼax k-kanik tiʼ le baʼax úuch tiʼ Barukoʼ?

¹⁵ Le máaxoʼob ku kʼaʼajsikoʼob le Máax Beetmailoʼoboʼ, kiʼimak u yóoloʼob kex maʼ yaʼab baʼaloʼob yantiʼobiʼ, tumen u yojloʼob mantatsʼ kun áantbiloʼob tumen Jéeoba (xokaʼak Hebreob 13:5). Baʼaleʼ u máakiloʼob le yóokʼol kaabaʼ maʼ bey u tuukuloʼobiʼ. Le oʼolaleʼ, jach unaj k-kanáantikba utiaʼal maʼ u káajal k-tuukul xan beyoʼ (Efe. 2:2). Koʼox kʼaʼajsik baʼax úuch tiʼ Baruc, u secretario Jeremías. Baruqueʼ kuxlaj tiʼ le talam kʼiinoʼob táanil tiʼ u xuʼulsaʼal u kaajil Jerusalén tu jaʼabil 607 táanil tiʼ k-kʼiinoʼob.

¹⁶ Maʼ xaaneʼ Baruqueʼ u kʼáat kaʼach ka yanak yaʼab baʼaloʼob tiʼ. Jéeobaeʼ tu yilaj baʼax tuukulil yaan kaʼach tiʼ Baruc yéetel tu yaʼalajtiʼ ka xuʼuluk u kaxtik nojoch baʼaloʼob. Baruqueʼ tu yeʼesaj kabal óolal yéetel naʼatil ka tu beetaj le baʼax aʼalaʼabtiʼ tumen Jéeobaoʼ, le oʼolal maʼ kíim le ka xuʼulsaʼab tiʼ u kaajil Jerusalenoʼ (Jer. 45:2-5, NM). U kajnáaliloʼob Jerusaleneʼ chéen tu yilaj u yantaltiʼob yaʼab baʼaloʼob yéetel náachchajoʼob tiʼ Jéeoba. Baʼaleʼ tu peʼertoʼob tuláakal, yéetel yaʼab tiʼ letiʼobeʼ kíimsaʼaboʼob tumen le babilonioʼoboʼ (2 Cró. 36:15-18). Le baʼax úuch tiʼ Barukoʼ, ku kaʼansiktoʼoneʼ maas maʼalob ka k-meyajt Jéeoba ke ka k-kaxt chéen ayikʼaliloʼob yéetel ka xiʼikoʼon tu paach le baʼaloʼob ku tsʼáaik le yóokʼol kaabaʼ.

Beet jeʼex le máakoʼob chúukpaj u yóol u meyajtoʼob Diosoʼ

17. ¿Baʼaxten jach maʼalob ka k-beet jeʼex tu beetil Jesús, Pablo yéetel Timoteoeʼ?

¹⁷ Utiaʼal maʼ u jáawal k-bin teʼ bej ku bisik máak tiʼ le kuxtaloʼ, le Bibliaoʼ ku yaʼaliktoʼon ka k-beet jeʼex le máakoʼob chúukpaj u yóol u meyajtoʼob Jéeobaoʼ. Utúul tiʼ letiʼobeʼ Jesús. Kex tumen yaan kaʼach u páajtalil tiʼ u beetik yaʼab baʼaloʼob utiaʼal u kaxtik u yutsileʼ, tu tsʼáaj u yóol tiʼ le meyaj u yojel yaan u taasik utsil tiʼ le máakoʼoboʼ, u kʼaʼaytik «u maʼalob péektsilil u [reino] Jajal Dios» (Luc. 4:43). Uláakʼ máax tu jach tsʼáaj u yóol u meyajt Dioseʼ, apóstol Pablo. Letiʼeʼ tu pʼataj le jach maʼalob meyaj yantiʼoʼ ka tu tsʼáaj u yóol u kʼaʼayt le maʼalob péektsiloʼ. Tsʼoʼoleʼ Timoteo, utúul «jaajil paal tiʼ le oksaj óolaloʼ», tu beetaj jeʼex tu beetil Pablooʼ (1 Tim. 1:2). ¿Yaachaj wa u yóol Jesús, Pablo yéetel Timoteo yoʼolal le baʼax tu chʼaʼatuklaj u beetkoʼoboʼ? Maʼatech. Pabloeʼ kʼuch tak u yaʼaleʼ bey «sojol» le  baʼax ku tsʼáaik le yóokʼol kaaboʼ, tumen maas maʼalob u meyajtaʼal Dios (Fili. 3:8-11).

18. ¿Baʼax kʼeexiloʼob anchaj u beetik utúul táankelem, yéetel baʼaxten maʼ tu yaatal u yóol yoʼolal le baʼax tu beetoʼ?

¹⁸ Bejlaʼeʼ, yaʼab táankelem paalaloʼobeʼ ku beetkoʼob jeʼex tu beetil Jesús, Pablo yéetel Timoteooʼ. Utúul táankelem xiʼipal yaan kaʼach tiʼ upʼéel meyaj maʼalob u boʼolileʼ, tu yaʼalaj: «Tumen kin tsʼáaik ichil in kuxtal le baʼax ku yaʼalik le Bibliaoʼ, yaʼab utéenel tsʼaʼabten upʼéel meyaj maas maʼalob teʼ tuʼux kin meyajoʼ. Baʼaleʼ kex maʼalob in boʼotaʼal kaʼacheʼ, tin wilaj chéen kunel le baʼax kin beetkoʼ. Le ka tin waʼalaj tiʼ le máaxoʼob nuʼuktik le empresa táan in tuklik in beetik in precursoriloʼ, tu yaʼaloʼobten jeʼel u boʼotkenoʼob maas maʼalob utiaʼal maʼ u xuʼulul in meyaj tu yéeteloʼobeʼ. Baʼaleʼ teneʼ tsʼoʼok kaʼach in chʼaʼatuklik baʼax ken in beete. Yaʼab máakoʼobeʼ maʼ tu naʼatoʼob baʼaxten tin pʼataj upʼéel meyaj jach maʼalob u boʼolil utiaʼal in beetik in precursoriliʼ. Tin beetaj utiaʼal in tsʼoʼokbesik le baʼax tin waʼalaj tiʼ Jéeoba le ka tin kʼubimbatiʼoʼ. Bejlaʼeʼ in tsʼaamaj táanil ichil in kuxtal in meyajtik Dios, yéetel lelaʼ jach ku taasikten upʼéel kiʼimak óolal maʼ tu páajtal u keʼetel yéetel u yantal upʼéel maʼalob meyaj mix yaʼab taakʼin tiʼ máak».

19. ¿Baʼax maʼalob ka u chʼaʼatukult u beetik le táankelem paalaloʼoboʼ?

¹⁹ Yaʼab táankelmoʼobeʼ tsʼoʼok u yeʼeskoʼob naʼatil yéetel tsʼoʼok xan u chʼaʼatuklikoʼob baʼax ken u beet yéetel u kuxtaloʼob. Le oʼolaleʼ táankelem paal, ken a chʼaʼatukult baʼax ken a beet yéetel a kuxtaleʼ, maʼ u tuʼubultech jach tsʼoʼok u náatsʼal u kʼiinil Jéeoba (2 Ped. 3:11, 12). Maʼ a tsʼíiboltik a bin tu paach le baʼaxoʼob ku tsʼáaik le yóokʼol kaab jeʼex u beetik yaʼab máakoʼoboʼ. Baʼaxeʼ tsʼáa ichil a kuxtal le tsolnuʼukoʼob ku tsʼáaiktech le máaxoʼob u kʼáatoʼob ka xiʼiktech utsiloʼ. U yantaltech «ayikʼaliloʼob teʼ kaʼanoʼ», letiʼe baʼax maas maʼalob jeʼel u páajtal a kaxtikoʼ yéetel chéen letiʼ ken u taastech utsiloʼob utiaʼal kʼiinoʼob minaʼan u xuul (Mat. 6:19, 20; xokaʼak 1 Juan 2:15-17). Kʼaʼajs mantatsʼ le Máax Beetmailechoʼ, yéetel letiʼeʼ yaan u tsʼáaiktech yaʼab utsiloʼob.

[Tsolajiloʼob]

¿Jeʼel wa u páajtal a kʼaʼajskeʼ?

• ¿Bix k-eʼesik kʼubik óol tiʼ Dios?

• ¿Máakalmáak le maas maʼalob kaʼansaj yanoʼ?

• ¿Baʼax k-kanik tiʼ le baʼax úuch tiʼ Barukoʼ?

• ¿Máaxoʼob tu yeʼesoʼob baʼax unaj k-beetik yéetel k-kuxtal, yéetel baʼaxten unaj k-beetik jeʼex letiʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

Le kaʼansaj maas maʼaloboʼ letiʼe ku taal tiʼ Jéeobaoʼ

[U tsolajil le oochel teʼ táan juʼun 15]

Baruqueʼ tu beetaj le baʼax aʼalaʼabtiʼoʼ le oʼolal maʼ kíimiʼ. ¿Baʼax jeʼel a kanik tiʼ le baʼax tu beetoʼ?