¿Baʼax meyajiloʼob ku beetik le Cuerpo Gobernanteoʼ?

LE SUKUʼUNOʼOB yanoʼob ichil le Cuerpo Gobernante tiʼ u j-jaajkunajoʼob Jéeobaoʼ, yéeyaʼanoʼob utiaʼal u binoʼob kaʼan yéetel u kʼubmaj u kuxtaloʼob tiʼ Dios. Ku tʼaanoʼob yoʼolal le palitsil chúukpajaʼan u yóol yéetel yaan u naʼat, kʼubéentaʼan tiʼ ka u tsʼáa le kaʼansaj ku keʼetel yéetel janaloʼ bey xan ka u nuʼukt u kʼaʼaytaʼal u maʼalob péektsilil le Reino tiʼ tuláakal le yóokʼol kaabaʼ (Mat. 24:14, 45-47).

Le sukuʼunoʼob yanoʼob ichil le Cuerpo Gobernanteoʼ ku muchʼkubaʼob cada semana, maases cada miércoles, lelaʼ ku yáantaj utiaʼal ka múuchʼ meyajnakoʼob (Sal. 133:1). Cada utúul tiʼ letiʼobeʼ, ku meyajoʼob tiʼ uláakʼ comité. Utiaʼal u nuʼuktikoʼob tubeel tuláakal le baʼaxoʼob yaan yil yéetel u kʼaʼaytaʼal u maʼalob péektsilil le Reinooʼ, cada comiteeʼ yaan jujumpʼéel meyaj ku beetik, jeʼex ken k-ilaʼ.

▪ COMITÉ TIʼ COORDINADORES. Ichil le comiteaʼ táakaʼan utúul sukuʼun nuʼuktik cada comité bey xan utúul sukuʼun ku meyaj bey secretarioeʼ, letiʼeʼ láayliʼ xan tiʼ yaan ichil le Cuerpo Gobernanteoʼ. Le comiteaʼ ku yilik ka meyajnak maʼalob le uláakʼ comiteʼoboʼ. Ku yáantaj xan tu séebaʼanil le ken yanak nukuch talamiloʼob jeʼex chʼaʼapachtajiloʼob, nukuch loobiloʼob ku yantal yoʼolal chak iikʼal, u tíitkuba luʼum wa yoʼolal uláakʼ baʼaloʼob, bey xan tiʼ uláakʼ talamiloʼob ku aktáantik u j-jaajkunajoʼob Jéeoba tiʼ tuláakal le yóokʼol kaabaʼ.

▪ COMITÉ TIʼ PERSONAL. Le sukuʼunoʼob yanoʼob ichil le comiteaʼ tsʼaʼan ka u kanáantoʼob yéetel ka u yáantoʼob u muʼukʼaʼantal u fe tuláakal le sukuʼunoʼob ku meyajoʼob tu najiloʼob Betel yanoʼob tiʼ tuláakal le yóokʼol kaabaʼ. Le comiteaʼ ku yéeyik yéetel ku invitartik le sukuʼunoʼob kun meyajoʼob tu najiloʼob Betel, yéetel ku núukik xan kʼáatchiʼob yaan yil yéetel le meyaj ku beetik le sukuʼunoʼob tu najil Beteloʼ.

▪ COMITÉ TIʼ PUBLICACIÓN. Le comiteaʼ ku yilik baʼax kʼaʼabéet u beetaʼal utiaʼal u tsʼalaʼal yéetel u túuxtaʼal le jóoʼsaʼaniloʼob tiʼ tuláakal yóokʼol kaaboʼ. Ku nuʼuktik le kúuchiloʼob tuʼux ku tsʼalaʼal le jóoʼsaʼaniloʼoboʼ yéetel ku tsʼáaik le áantaj kʼaʼabéet tiʼ u najiloʼob Betel yaan tiʼ tuláakal yóokʼol kaaboʼ. Ku kanáantik xan ka meyajnak tubeel le taakʼin siibil u beetaʼal utiaʼal u kʼaʼaytaʼal u maʼalob péektsilil le Reinooʼ.

▪ COMITÉ TIʼ SERVICIO. Le sukuʼunoʼob yanoʼob teʼ comiteaʼ ku nuʼuktikoʼob le kʼaʼaytajoʼ yéetel ku yilkoʼob ka nuʼuktaʼak tubeel le múuchʼuliloʼoboʼ, le precursoroʼoboʼ, le ancianoʼoboʼ yéetel le superintendenteʼob tiʼ circuito yéetel tiʼ distritooʼ. Ku yilik xan baʼax ken u taas le K-meeyjil tiʼ le Reinooʼ, ku invitartik le sukuʼunoʼob kun binoʼob teʼ Escuela tiʼ Galaad wa tiʼ le Escuela tiʼ Entrenamiento Ministerialoʼ, yéetel letiʼ aʼalik tuʼux kun binoʼob kʼaʼaytaj.

▪ COMITÉ TIʼ ENSEÑANZA. Le comiteaʼ ku yilik baʼax kun kaʼansbil teʼ asambleaʼoboʼ yéetel teʼ muchʼtáambaloʼoboʼ. Ku yilik xan baʼax kun kaʼansbil tiʼ le sukuʼunoʼob ku meyajoʼob tu najiloʼob Beteloʼ yéetel ku nuʼuktik jejeláas escuelaʼob, jeʼex le Escuela tiʼ Galaadoʼ yéetel le Xook utiaʼal Precursoroʼoboʼ, yéetel ku yilik xan baʼax kaʼansajiloʼob kun grabarbil utiaʼal uʼuybil wa utiaʼal chaʼantbil.

▪ COMITÉ TIʼ REDACCIÓN. Le comiteaʼ ku yilik baʼax kaʼansajil kun jóoʼsbil teʼ revistaʼob, libroʼob yéetel uláakʼ jóoʼsaʼaniloʼob utiaʼal le sukuʼunoʼoboʼ bey xan utiaʼal uláakʼ máakoʼoboʼ. Ku núukik le kʼáatchiʼob ku beetaʼal yaan yil yéetel le Bibliaoʼ yéetel letiʼ aʼalik baʼax kaʼansajil kun jóokʼol teʼ dramaʼoboʼ bey xan teʼ bosquejoʼob utiaʼal tsoltʼaanoʼ. Tsʼoʼoleʼ, ku nuʼuktik xan u meyajil le suttʼaan ku beetaʼal tiʼ tuláakal yóokʼol kaaboʼ.

Le apóstol Pablooʼ tu ketaj tuláakal le sukuʼunoʼob yéeyaʼanoʼob yéetel upʼéel wíinkliloʼ yéetel tu yaʼalaj xan baʼax meyajil ku beetik cada utúul tiʼ letiʼob, bix u paklan áantikubaʼob, le yaabilaj yantiʼoboʼ yéetel le múul meyaj ku beetikoʼob utiaʼal u tsʼoʼokbeskoʼob le meyaj tsʼaʼantiʼob tumen Diosoʼ (Rom. 12:4, 5; 1 Cor. 12:12-31). Jesucristo le máax nuʼuktikoʼoboʼ, ku tsʼáaiktiʼob tuláakal baʼax kʼaʼabéet utiaʼal u múul meyajoʼob tubeel yéetel utiaʼal u tsʼáaikoʼob le kaʼansaj ku keʼetel yéetel janaloʼ (Efe. 4:15, 16; Col. 2:19). Bey túunoʼ, le Cuerpo Gobernanteoʼ ku páajtal u nuʼuktik tuláakal le meyaj yaan yil yéetel u kʼaʼaytaʼal u maʼalob péektsilil le Reino yáanal u nuʼuktaj u kiliʼich muukʼ Jéeobaoʼ.