Beora táankelmecheʼ meyajt Jéeoba
Beora táankelmecheʼ meyajt Jéeoba
«Jeetsʼel pʼáaten tiʼ le baʼax tsʼoʼok a kanikoʼ, tiʼ le baʼax tsʼoʼok a maʼalob oksik ta tuukuloʼ.» (2 TIM. 3:14.)
1. ¿Bix u yilik Jéeoba le adoración ku tsʼaʼabaltiʼ tumen le táankelem paalaloʼoboʼ?
TUMEN jach nojoch baʼal u yilik Jéeoba le adoración ku tsʼaʼabaltiʼ tumen le táankelmoʼoboʼ, le salmistaoʼ tu yaʼalaj: «A kaajaleʼ ku kʼubikuba tiʼ teech tu kʼiinil le tsʼáanchaʼatajoʼ; tu yóokʼol le kiliʼich puʼukoʼoboʼ, jeʼel bix le pʼuuljaʼ ku síijil tiʼ le jaʼatskab kʼiinoʼ u táankelemileʼ, ku túumbental sáamsamal» (Sal. 110:3.) Lelaʼ ku yeʼesik Jéeobaeʼ jach u yaabilmaj le táankelem paalaloʼob meyajtikoʼ.
2. Yaʼab máakoʼobeʼ, ¿baʼax ku yaʼalikoʼob tiʼ le táankelem paalaloʼob ka u beetoʼoboʼ?
2 ¿Kux túun teech xiʼipal wa chʼúupal, tsʼoʼok wa a kʼubik a kuxtal tiʼ Jéeoba? Tiʼ yaʼaboʼobeʼ ku talamtaltiʼob u chʼaʼatuklikoʼob lelaʼ, tumen le máaxoʼob yaan u negocioʼoboʼ, le maestroʼoboʼ, yéetel yaan kʼiineʼ u láakʼtsiloʼob bey xan u amigoʼobeʼ, ku yaʼalkoʼobtiʼob ka xiʼikoʼob tu paach u baʼalubaʼob le yóokʼol kaabaʼ. Wa ku chʼaʼatukultik utúul táankelem paal u meyajtik Dioseʼ, ku joʼopʼol u pʼektaʼal. Baʼaleʼ le máaxoʼob ku chʼaʼatuklik u meyajtikoʼob Diosoʼ, tsʼoʼok u yéeyik u beetkoʼob upʼéel baʼal jach maʼalob (Sal. 27:4). Beoraaʼ koʼox ilik u núukil óoxpʼéel kʼáatchiʼob yaan yil yéetel lelaʼ: ¿Baʼaxten unaj a meyajtik Jéeoba? ¿Baʼax ken u yáantech a kʼub a kuxtal tiʼ letiʼ kex tumen maʼ utstutʼaan u maasiliʼ? ¿Tiʼ baʼaxoʼob jeʼel u páajtal a maas meyajtik Jéeobaeʼ?
Baʼaxten unaj u meyajtaʼal Jéeoba
3. Ken k-il tuláakal le baʼaxoʼob u beetmaj Jéeobaoʼ, ¿baʼax unaj u túulchʼinkoʼob k-beete?
3 ¿Baʼaxten unaj a meyajtik Jéeoba? U libroi Apocalipsis 4:11, ku yaʼalik baʼaxten: «Yuumtsil [Jéeoba] yéetel k-Jajal Dios, techeʼ [ka] náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel beetaʼaboʼob». Tuláakal baʼax yaneʼ Jéeoba beetmail. Jeʼex le Luʼumaʼ jach jatsʼuts u beetmail. Le cheʼoboʼ, le looloʼoboʼ, le baʼalcheʼoboʼ, le kʼáaʼnáaboʼ, le witsoʼoboʼ yéetel uláakʼ baʼaloʼoboʼ Jéeoba beetmailoʼob. Le salmistaoʼ tu yaʼalaj tiʼ Jéeoba: «¡A meyajeʼ tuláakal tuʼux ku yilaʼal!» (Sal. 104:24). ¿Máasaʼ unaj k-tsʼáaik nib óolal tiʼ Jéeoba úuchik u tsʼáaiktoʼon upʼéel wíinklil, yéetel upʼéel tuukul utiaʼal k-kiʼikiʼ óoltik tuláakal le jatsʼuts baʼaloʼob u beetmoʼ? ¿Máasaʼ lelaʼ unaj u túulchʼinkoʼon k-meyajt Jéeoba?
4, 5. ¿Baʼax áant Josué u kʼub u yóol tiʼ Jéeoba?
4 Uláakʼ baʼax péekskoʼon k-meyajt Jéeobaeʼ letiʼe baʼax tu yaʼalaj Josué, le máax nuʼukt le israelitaʼoboʼ, táanil tiʼ u kíimileʼ tu yaʼalaj: «Kʼaj óolteʼex yéetel tuláakal a puksiʼikʼaleʼex bey xan yéetel tuláakal a wóoleʼex tsʼoʼok u béeychajal tuláakal baʼax tu séebchiʼitaj Yuumtsil [Jéeoba]. Mix jumpʼéel u séebchiʼ pʼáat wa maʼ béeychajiʼ». ¿Baʼaxten béeychaj u yaʼalik lelaʼ? (Jos. 23:14.)
5 Tu chichnil, le kajaʼan kaʼach Egiptooʼ, Josueeʼ u yojel kaʼach Jéeobaeʼ yaan u tsʼáaik upʼéel maʼalob luʼum tiʼ le israelitaʼoboʼ (Gén. 12:7; 50:24, 25; Éxo. 3:8). Ka nojochchajeʼ tu yilaj bix káajik u béeykuntik Jéeoba le baʼax u yaʼalmaj, le ka tu túuxtaj le diez noj yajiloʼob tiʼ le egipcioʼob utiaʼal ka chaʼabak u jóokʼol le israelitaʼob tumen le faraonoʼ. Josueeʼ tiʼ yaan kaʼach ichil le israelitaʼob le ka tu kʼáatmáansoʼob le Cháak kʼáaʼnáaboʼ yéetel tu yilaj bix úuchik u xuʼulsaʼal tiʼ faraón yéetel u soldadoʼob. Tiʼ tuláakal le jaʼaboʼob tu máansoʼob teʼ «nojoch yéetel sajbeʼentsil x-tokoy luʼum[oʼ]», letiʼeʼ tu yilaj bix tu tsʼáajil Jéeoba tuláakal baʼax kʼaʼabéetchaj tiʼ le israelitaʼob, jeʼex jaʼ yéetel baʼal u jaantoʼob (Deu. 8:3-5, 14-16; Jos. 24:5-7). Le ka kʼuch u kʼiinil u chʼaʼaikoʼob le luʼum aʼalaʼan u tsʼaʼabaltiʼoboʼ, Josueeʼ tu yilaj xan bix úuchik u yáantaʼaloʼob tumen Jéeoba (Jos. 10:14, 42).
6. ¿Baʼax ken u yáantech a chʼaʼatukult a meyajtik Dios?
6 Tumen tu yilaj bix úuchik u béeykuntik Jéeoba tuláakal le baʼax u yaʼalmoʼ, Josueeʼ tu yaʼalaj: «Teen yéetel in paalaleʼ, [...] Yuumtsil [Jéeoba] bíin k-meyajte» (Jos. 24:15). ¿Kux túun teech xiʼipal wa chʼúupal, maʼ wa tu taaktal a beetik jeʼex Josué ken tuukulnakech tiʼ le baʼaxoʼob tsʼoʼok u béeykuntik Dios yéetel le baʼaxoʼob ken u beetoʼ?
7. ¿Baʼaxten jach kʼaʼanan u yokjaʼ máak?
7 A wilik le bukaʼaj baʼaloʼob u beetmaj Jéeoba yéetel a tuukul tiʼ le baʼaxoʼob tsʼoʼok u béeykuntikoʼ, unaj u péekskech a kʼub a kuxtal tiʼ yéetel a wokjaʼ. Lelaʼ letiʼe baʼax unaj u beetik tuláakal le máaxoʼob taak u meyajtkoʼob Dios jeʼex tu beetil Jesusoʼ. Táanil tiʼ u káajsik u meeyjil kʼaʼaytajeʼ, bin utiaʼal ka tsʼaʼabak u yokjaʼ tumen Juan Bautista. ¿Baʼaxten? Letiʼeʼ tu yaʼalaj: «Teneʼ maʼ lukʼen kaʼan ka taalaken in beet baʼax in kʼáatiʼ, baʼaleʼ utiaʼal in beet baʼax u kʼáat le máax túuxtenoʼ» (Juan 6:38.) Le úuchik u yokjaʼ Jesusoʼ, tu yeʼesaj tsʼoʼok u kʼubik u kuxtal utiaʼal u beetik baʼax u kʼáat u Taata (Mat. 3:13-17).
8. ¿Baʼaxten tu chʼaʼatuklaj Timoteo u meyajtik Jéeoba, yéetel baʼax unaj a beetik xan?
8 Koʼox ilik baʼax tu beetaj xan Timoteo, utúul táankelem xiʼipal tsʼaʼab u beet jatsʼuts meyajoʼob tumen Jéeoba. ¿Baʼaxten tu chʼaʼatuklaj Timoteo u meyajtik Jéeoba? Le Bibliaoʼ ku yaʼalikeʼ letiʼeʼ jach kʼuch u creert le baʼax kaʼansaʼab tiʼoʼ (2 Tim. 3:14). Wa tsʼoʼok a kanik le baʼax ku yaʼalik le Biblia yéetel tsʼoʼok a kʼuchul a creert jeʼex tu beetil Timoteoeʼ, maʼalob ka a chʼaʼatukult baʼax ken a beet yéetel a kuxtal. ¿Baʼaxten maʼ ta tsikbaltik tiʼ a taataʼob le baʼax ka tuklik a beetkoʼ? Letiʼob yéetel le ancianoʼoboʼ yaan u yáantkechoʼob a wil baʼax unaj a beetik utiaʼal ka okjaʼanakech (xokaʼak Beetaʼanoʼob [Hechos] 8:12).
9. Maʼ xaaneʼ, ¿baʼax jeʼel u beetik jujuntúul máakoʼob ken okjaʼanakecheʼ?
9 Ken okjaʼanakecheʼ, ka weʼesik táan u káajal a meyajtik Jéeoba, yéetel lelaʼ yaan u taasiktech yaʼab kiʼimak óolal teʼ kʼiinoʼobaʼ yéetel maʼ kun xáantaleʼ yaan a kʼamik le kuxtal minaʼan u xuuloʼ (Heb. 12:2, 3). Yaan xan a kiʼimakkúuntik u yóol a láakʼtsiloʼob táan u meyajkoʼob Jéeoba bey xan le sukuʼunoʼob teʼ múuchʼuliloʼ. Baʼaleʼ yaan a maas kiʼimakkúuntik u yóol Jéeoba (xokaʼak Proverbios 23:15). U jaajileʼ yaan máaxoʼob ken u yaʼaloʼobtech maʼ maʼalob le baʼax ta chʼaʼatuklaj a beetkoʼ, yéetel yaan u tsʼáaikubaʼob ta contra. Baʼaleʼ, jeʼel u páajtal a aktáantik le talamiloʼobaʼ.
Ken aʼalaʼak maʼ maʼalob baʼax ta beetiʼ wa ken u tsʼáaubaʼob ta contra
10, 11. 1) ¿Baʼax jeʼel u kʼáataʼaltech ikil ta chʼaʼatuklil a meyajtik Dioseʼ? 2) ¿Bix jeʼel a beetik jeʼex Jesús ken kʼáataʼaktech ka a tsol baʼax ka creertikeʼ?
10 A chʼaʼatuklik a meyajtik Dioseʼ jeʼel u beetik u káajal a wilaʼal jelaʼanil tumen a wéet xookoʼobeʼ, a láakʼtsiloʼob yéetel le máaxoʼob kʼaj óolmilechoʼ. Maʼ xaaneʼ jeʼel u kʼáatkoʼobtech baʼaxten ta chʼaʼatuklaj a beetik leloʼ yéetel baʼaxoʼob ka creertik. ¿Bix unaj a núukiktiʼob? Utiaʼal u béeytal a tsoliktiʼob tubeeleʼ, kʼaʼabéet jach tu jaajil ka creertik le baʼax ken a waʼaloʼ. Yéetel ken a tsoleʼ, unaj a beetik jeʼex Jesuseʼ.
11 Le ka kʼáataʼab tiʼ Jesús tumen u nuuktakil le judíoʼob upʼéel baʼal yaan yil yéetel u kaʼa kuxtal le kimenoʼoboʼ, letiʼeʼ tu chʼaʼachiʼitaj le baʼax ku yaʼalik le Kiliʼich Tsʼíiboʼob maʼ u chʼaʼamoʼob en cuentailiʼ (Éxo. 3:6; Mat. 22:23, 31-33). Le ka kʼáataʼab tiʼ tumen utúul escriba máakalmáak le Ley maas nojochoʼ, Jesuseʼ tu núukaj yéetel jujumpʼéel baʼaxoʼob ku yaʼalik le Kiliʼich Tsʼíiboʼoboʼ, yoʼolal lelaʼ le máakoʼ kiʼimakchaj u yóol (Lev. 19:18; Deu. 6:5; Mar. 12:28-34). Le bix úuchik u tʼaan Jesús yéetel le bix úuchik u meyajtiʼ le Kiliʼich Tsʼíiboʼoboʼ tu beetaj u jatskuba le máakoʼoboʼ, le oʼolal maʼ béeychaj u beetaʼal loob tiʼ tumen le máaxoʼob pʼekmailoʼ (Juan 7:32-46). ¿Bix jeʼel a beetik jeʼex Jesús ken kʼáataʼaktech ka a tsol baʼax ka creertikeʼ? Núuk yéetel baʼax ku yaʼalik le Bibliaoʼ, baʼaleʼ maʼ a séeb kʼuuxil yéetel eʼes tsiikil (1 Ped. 3:15, NM). Wa maʼ a wojel u núukileʼ, aʼal maʼ a wojeliʼ yéetel aʼal jeʼel a kaxtik u núukileʼ. Xakʼalt le baʼax kʼáataʼabtech teʼ Índice de las publicaciones Watch Tower wa teʼ CD-ROM Watchtower Library yanoʼob ich kastlanoʼ. Wa ka líiʼskaba tubeeleʼ yaan a wojéeltik bix jeʼel a núukikeʼ (Col. 4:6).
12. ¿Baʼaxten maʼ unaj u lúubul a wóol wa ka chʼaʼapachtaʼaliʼ?
12 Maʼ xaaneʼ le máakoʼoboʼ maʼ chéen yaan u kʼáatkoʼobtech baʼaxoʼob ka creertik yéetel baʼaxten ta chʼaʼatuklaj a meyajtik Diosiʼ. Kʼaʼajaktecheʼ le yóokʼol kaabaʼ tiʼ yaan yáanal u páajtalil Satanaseʼ (xokaʼak 1 Juan 5:19). Maʼ unaj a tuklik wa tuláakal máak kun kiʼimaktal u yóol yoʼolal le baʼax ta chʼaʼatuklaj a beetkoʼ. Maʼ xaaneʼ jeʼel tak u chʼaʼapachtikechoʼobeʼ. Uláakʼoʼobeʼ jeʼel tak u pochʼikechoʼobeʼ (1 Ped. 4:4, LTN). Baʼaleʼ, maʼ u tuʼubultecheʼ tak Jesucristoeʼ chʼaʼapachtaʼabi. Yéetel bey xan beetaʼabik tiʼ apóstol Pedro, máax tu yaʼalaj: «Sukuʼuneʼex, maʼ a wilkeʼex jelaʼan le yaayaj mukʼyajoʼob ku taal ta wóokʼoleʼexoʼ, bey jeʼel bix táan u yúuchulteʼex wa baʼax jelaʼaneʼ. Baʼax unajeʼ, [kiʼimakchajak] a wóoleʼex tumen ku páajtal a táakpajleʼex tiʼ u mukʼyajoʼob Cristo» (1 Ped. 4:12, 13).
13. ¿Baʼaxten jeʼel u kiʼimaktal u yóol le máaxoʼob meyajtik Dios ken chʼaʼapachtaʼakoʼoboʼ?
13 Wa ka chʼaʼapachtaʼal ikil a meyajtik Dioseʼ unaj u kiʼimaktal a wóol. ¿Baʼaxten? Tumen leloʼ yaan u yeʼesik táan a kuxtal jeʼex u kʼáat Dioseʼ. Jesuseʼ tu yaʼalaj: «Óotsileʼex le ken kiʼikiʼtʼantaʼakeʼex tumen tuláakal máak, tumen bey tu beetajoʼob u úuchben láakʼtsiloʼob tiʼ le maʼ jaajil [profetaʼoboʼ]» (Luc. 6:26). U chʼaʼapachtaʼal máakeʼ, ku yeʼesik maʼ kiʼimak u yóol Satanás ikil u meyajtaʼal Jéeobaiʼ (xokaʼak Mateo 5:11, 12). Yéetel wa ka poʼochʼol ikil a tsaypachtik Cristoeʼ, unaj u yantaltech kiʼimak óolal (1 Ped. 4:14).
14. ¿Baʼax utsiloʼob jeʼel taasik u chúukpajal u yóol máak u aktáant le chʼaʼapachtajiloʼoboʼ?
14 Koʼox ilik kampʼéel utsiloʼob jeʼel u taasik u chúukpajal a wóol a meyajt Jéeoba kex táan a chʼaʼapachtaʼaleʼ. Yáaxeʼ, ka tsʼáaik kʼaj óolbil máax Dios yéetel máax xan u Hijo. U kaʼapʼéeleʼ, ka beetik u líikʼil u yóol le sukuʼunoʼoboʼ. U yóoxpʼéeleʼ, le máaxoʼob maʼ tu meyajkoʼob Diosoʼ jeʼel u káajal u beetkoʼobeʼ (xokaʼak Filiposiloʼob 1:12-14). Yéetel tu tsʼookeʼ, ken a wil bix u tsʼáaiktech Jéeoba u muukʼil utiaʼal u chúukpajal a wóoleʼ, yaan a maas yaabiltik.
Tsʼoʼok u jeʼekʼabtaʼaltech «jumpʼéel kóokoch jool naj»
15. ¿Baʼax «kóokoch jool naj[il]» jeʼekʼabtaʼab tiʼ Pablo?
15 Yoʼolal le meeyjil kʼaʼaytaj tu beetaj Efesooʼ, Pabloeʼ tu yaʼalaj: «Jeʼekʼabten jumpʼéel kóokoch jool naj utiaʼal u meeyjul» Jéeoba (1 Cor. 16:8, 9). Tsʼoʼok kaʼach u jeʼekʼabtaʼaltiʼ upʼéel jool naj utiaʼal u jach kʼaʼaytik le maʼalob péektsiloʼ yéetel u kaʼansik le máakoʼob yanoʼob teʼ kaajoʼ. Le ka tu beetaj lelaʼ, Pabloeʼ tu yáantaj uláakʼ máakoʼob u meyajtoʼob Jéeoba.
16. ¿Bix úuchik u yokol u yalab le máaxoʼob yéeyaʼanoʼob tiʼ upʼéel «kóokoch jool naj» tu jaʼabil 1919?
16 Tu jaʼabil 1919, le rey Jesucristooʼ tu jeʼekʼabtaj upʼéel «kóokoch jool naj» tiʼ u yalab le máaxoʼob yéeyaʼanoʼob utiaʼal u binoʼob kaʼanoʼ (Apo. 3:8). Letiʼobeʼ ookoʼobiʼ yéetel káaj u maas tsʼáaik u yóoloʼob u kʼaʼaytoʼob le baʼax ku yaʼalik le Bibliaoʼ. ¿Baʼax utsiloʼob tsʼoʼok u taasik leloʼ? Le maʼalob péektsiloʼ táan u kʼaʼaytaʼal tiʼ tuláakal yóokʼol kaab, yéetel óoliʼ siete millones máakoʼob táan u páaʼtikoʼob u yantaltiʼob kuxtal minaʼan u xuul way Luʼumeʼ.
17. ¿Bix jeʼel a wokol tiʼ le «kóokoch jool naj utiaʼal u meeyjul» Jéeobaoʼ?
17 Tuláakal le máaxoʼob meyajtik Jéeobaoʼ jeʼekʼab tu táanoʼob «jumpʼéel kóokoch jool naj utiaʼal u meeyjul Yuumtsil». Le máaxoʼob ku yokloʼob yéetel ku jach tsʼáaik u yóoloʼob teʼ kʼaʼaytajoʼ ku yantal kiʼimak óolal tiʼob. ¿Kux túun teech xiʼipal wa chʼúupal? ¿Nojoch baʼal wa a wilik a wáantik a wéet máakil u tsʼáa u fe tiʼ u maʼalob péektsilil le Reinooʼ? (Mar. 1:14, 15.) ¿Tsʼoʼok wa a tuklik a beetik a precursor auxiliar wa regulari? Maʼ xaaneʼ jeʼel xan a bin áantaj utiaʼal u líiʼsaʼal u Najiloʼob Reino, a bin meyaj tu najil Betel wa a bin kʼaʼaytaj tuʼux maas kʼaʼabéet. Tumen maʼ yaʼab u bin utiaʼal u xuʼulsaʼal tiʼ u kʼasaʼan yóokʼol kaab Satanaseʼ, kʼaʼabéet u maas kʼaʼaytaʼal u maʼalob péektsilil le Reinooʼ. ¿Yaan wa a wokol teʼ «kóokoch jool naj» beora jeʼekʼaboʼ?
«Ilawileʼex bukaʼaj utsil» Jéeoba
18, 19. 1) ¿Baʼax áant David utiaʼal ka jach taakchajak u meyajtik Jéeoba? 2) ¿Bix k-ojéeltik mix utéen yaachaj u yóol David úuchik u kʼubikuba u meyajt Jéeoba?
18 Le salmista Davidoʼ tu yaʼalaj: «Ilawileʼex bukaʼaj utsil le Yuumtsil» Jéeobaoʼ (Sal. 34:8). Tu chichnil David, le máax kʼuch u beetuba reyil tiʼ u úuchben kaajil Israeloʼ, áantaʼab tumen Jéeoba utiaʼal maʼ u beetaʼal loob tiʼ tumen le baʼalcheʼoboʼ. Áantaʼab xan utiaʼal ka u kíims Goliat, yéetel áantaʼab xan u aktáant uláakʼ talamiloʼob (1 Sam. 17:32-51; Sal. 18, NM, ilaʼak le chan joʼol xookoʼ). Yoʼolal le nojoch yaabilaj eʼesaʼab tiʼ tumen Jéeobaoʼ, Davideʼ tu yaʼalaj: «Yuumtsil in [Dios], yaʼabkach le jakʼ óol meyajoʼob ta beetaj techoʼ, yaʼab a chʼaʼa óotsilil tiʼ toʼon. ¡Mix baʼal ku ketikuba ta wéetel!» (Sal. 40:5).
19 Davideʼ jach kʼuch u yaabilt Jéeoba yéetel u kʼáat kaʼach u nojbeʼenkúunt yéetel u jaajil u yóol (xokaʼak Salmo 40:8-10). Letiʼeʼ mix utéen yaachaj u yóol úuchik u kʼubikuba u meyajt Jéeoba tuláakal u kʼiiniloʼob u kuxtal. Le baʼax maas kʼaʼanan yéetel ku maas taasik kiʼimak óolal kaʼach tiʼoʼ, letiʼe u chúukpajal u yóol u beet baʼax u kʼáat Diosoʼ. Tu chʼijaʼanileʼ, Davideʼ tu yaʼalaj tiʼ Jéeoba: «Teech in páaʼtajil líikʼbal tin táankelmil teech xan in maʼalob alab óolal», tin chʼijaʼanileʼ «maʼ a xúumpʼattiken bey le ken wéej sakak u tsoʼotsel in pool» (Sal. 71:5, 18). Kex tsʼoʼok kaʼach u pʼáatal minaʼan u muukʼeʼ, láayliʼ muʼukʼaʼan u fe tiʼ Jéeoba yéetel jach maʼalob u biskuba tu yéetel.
20. ¿Baʼaxten u meyajtaʼal Dioseʼ letiʼe baʼax maas maʼalob jeʼel u beetik máakoʼ?
20 Le baʼax tu beetaj Josué, David yéetel Timoteoeʼ, ku yeʼesikoʼob u meyajtaʼal Jéeobaeʼ letiʼe baʼax maas maʼalob jeʼel u beetik máakoʼ. Le utsiloʼob ku kʼamaʼal ikil u meyajtaʼal Dios yéetel tuláakal u kuxtal bey xan yéetel tuláakal u puksiʼikʼal máakeʼ, maas maʼalobtak ke le baʼaloʼob ku tsʼáaik le yóokʼol kaabaʼ (Jos. 22:5). Xiʼipal wa chʼúupal, wa maʼ a kʼub a kuxtal tiʼ Jéeoba ich payalchiʼeʼ, tukult lelaʼ: «¿Yaan wa baʼax maʼ tu chaʼik in beetkimba utúul u j-jaajkunaj Jéeoba?». Yéetel wa tsʼoʼok a wokjaʼeʼ, ¿a kʼáat wa ka maas yanaktech kiʼimak óolal? Wa beyoʼ, ilawil a maas táakpajal teʼ kʼaʼaytajoʼ yéetel a maas meyajtik Dios. Le uláakʼ xookoʼ yaan u yeʼesiktech bix tu beetil apóstol Pablo, yéetel bix jeʼel xan a beetikeʼ.
¿Baʼax jeʼel a núukikeʼ?
• Aʼal kaʼapʼéel baʼax oʼolal unaj k-meyajtik Dios.
• ¿Baʼax áant Timoteo utiaʼal ka u chʼaʼatukult u meyajtik Dios?
• ¿Baʼaxten maʼ unaj u lúubul a wóol wa ka chʼaʼapachtaʼal?
• ¿Tiʼ baʼaxoʼob jeʼel u páajtal a maas meyajtik Jéeobaeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
U meyajtaʼal Dioseʼ letiʼe baʼax maas maʼalob jeʼel u beetik máakoʼ
[U tsolajil le oochel teʼ táan juʼun 19]
¿Jeʼel wa u páajtal a núukik le kʼáatchiʼob ku beetaʼaltech yoʼolal le baʼax ka creertikoʼ?