K-beetik jeʼex Pabloeʼ ku yáantkoʼon k-maas meyajt Jéeoba
K-beetik jeʼex Pabloeʼ ku yáantkoʼon k-maas meyajt Jéeoba
«Tsʼoʼok in baʼateltik le maʼalob baʼateloʼ, tsʼoʼok in wáalkabtik le bej tak tu xuuloʼ, tsʼoʼok in kanáantik le oksaj óolaloʼ.» (2 TIM. 4:7.)
1, 2. ¿Baʼax kʼeexiloʼob tu beetaj Saulo tiʼ Tarso, yéetel baʼax maʼalob meyajil tu káajsaj?
SAULO tiʼ Tarsoeʼ utúul máak jach yanchaj u naʼat yéetel maʼatech u chʼaʼik saajkil kaʼach. Baʼaleʼ chéen ku bin tu paach u tsʼíibolaloʼob (Efe. 2:3). Letiʼeʼ tu yaʼalaj bix u kuxtal: «Kin loobiltik kaʼach [Jesús] yéetel in tʼaanoʼob, kin chʼaʼapachtik kaʼachi yéetel kin pochʼik kaʼachi» (1 Tim. 1:13).
2 Baʼaleʼ Sauloeʼ tu kʼexaj bix u kuxtal, bix u modos yéetel tu yilaj u kaxtik u yutsil u maasil (1 Cor. 10:33). Tsʼoʼoleʼ joʼopʼ xan u yaabiltik le máaxoʼob u pʼekmaj kaʼachoʼ (xokaʼak 1 Tesalonicailoʼob 2:7, 8). Letiʼeʼ tu yaʼalaj: «Tsʼaʼaben utiaʼal in meyajt le maʼalob péektsilaʼ [...]. Teneʼ [maas] chichanen tiʼ u [maas] chichanil tiʼ tuláakal le máaxoʼob utiaʼaloʼob Jajal Diosoʼ; baʼaleʼ letiʼeʼ tsʼoʼok u tsʼáaikten u kiʼimak óolalil in tseʼektik tiʼ le máaxoʼob maʼ judíoʼoboʼ u maʼalob péektsilil u minaʼanil u pʼiis ayikʼalil Cristo» (Efe. 3:7, 8).
3. ¿Bix ken u yáantiloʼon k-xakʼaltik le baʼaxoʼob tu tsʼíibtaj Pablooʼ yéetel le bix úuchik u kʼaʼaytajoʼ?
3 Saulo, máax kʼuch kʼaj óolbil bey apóstol Pabloeʼ, séeb úuchik u káajal u meyajtik Jéeoba (Hch. 13:9). K-xakʼaltik le baʼaxoʼob tu tsʼíibtaj, le bix úuchik u kʼaʼaytaj yéetel k-ilik u yantaltoʼon le nojoch fe yanchajtiʼoʼ, yaan u yáantkoʼon k-maas meyajt Dios (xokaʼak 1 Corintoiloʼob 11:1; Hebreob 13:7). Le xookaʼ yaan u yáantkoʼon k-il bix jeʼel k-jóoʼsik u súutukil utiaʼal k-xokik mantatsʼ le Bibliaoʼ, k-yaabiltik k-éet máakil yéetel k-eʼesik kabal óolal.
Pabloeʼ mantatsʼ u xokik kaʼach le Kiliʼich Tsʼíiboʼoboʼ
4, 5. ¿Baʼax páajchaj u beetik Pablo ikil u xakʼaltik mantatsʼ le Kiliʼich Tsʼíiboʼoboʼ?
4 Pabloeʼ kaʼansaʼab bey utúul fariseo tumen Gamaliel jeʼel bix u kaʼansaʼal kaʼach le Leyoʼ, le oʼolal u yojel kaʼach baʼax ku yaʼalik le Kiliʼich Tsʼíiboʼoboʼ (Hch. 22:1-3; Fili. 3:4-6). Ka tsʼoʼok u yokjaʼeʼ, maʼ xaaneʼ bin tu desiertoi Siria wa tiʼ upʼéel tuʼux tiʼ u luʼumil Arabia utiaʼal u tuukul (Gal. 1:17). Maʼ xaaneʼ, u kʼáat kaʼach tuukul tiʼ le profecíaʼob ku yeʼeskoʼob Jesuseʼ letiʼe Mesíasoʼ. Tsʼoʼoleʼ unaj kaʼach u líiʼskuba utiaʼal le meyaj tsʼaʼabtiʼoʼ (xokaʼak Beetaʼanoʼob [Hechos] 9:15, 16, 20, 22). Le oʼolal Pabloeʼ tu jóoʼsaj u súutukil utiaʼal u tuukul tiʼ le baʼaxoʼob yaan yil yéetel u adorartaʼal Diosoʼ.
5 Le baʼaxoʼob tu kanaj Pablo ikil u xakʼaltik le Kiliʼich Tsʼíiboʼoboʼ, le áant u kaʼans maʼalob le baʼax ku yaʼalik Diosoʼ. Jeʼex le ka tʼaanaj tu sinagogai Antioquía tiʼ Pisidiaeʼ, tu chʼaʼachiʼitaj kex cinco tekstoʼob tiʼ le Kiliʼich Tsʼíiboʼob ich Hebreo utiaʼal u yeʼesik Jesuseʼ letiʼe Mesíasoʼ, yéetel tʼaanaj xan tiʼ uláakʼ baʼaxoʼob ku yaʼalik le Kiliʼich Tsʼíiboʼoboʼ. Tumen jach u yojel u tsol maʼalob le baʼax ku yaʼalik le Kiliʼich Tsʼíiboʼoboʼ, «yaʼab tiʼ le judíoʼoboʼ bey xan tiʼ le máaxoʼob u kʼammajoʼob u yoksaj óolal le judíoʼoboʼ yéetel táan u beetikoʼob yéetel chúukaʼan óolaleʼ binoʼob tu paach Pablo yéetel Bernabé» utiaʼal u maas kaambaloʼob (Hch. 13:14-44). Jujumpʼéel jaʼaboʼob úuchuk leloʼ, u múuchʼ judíoʼobeʼ binoʼob Roma u xíimbaltoʼob Pablo teʼ naj tuʼux kʼalaʼanoʼ, letiʼeʼ desde «jaʼatskab kʼiin tak u bimbal kʼiineʼ tu tsikbaltaj u [reino] [...] Jajal Dios tiʼob, táan u pʼis mukʼtik u beetik u yilikoʼobeʼ tiʼ Yuum Jesús ku chúukpajal u yaʼalmajtʼaan Moisés bey xan u tsʼíiboʼob le [profetaʼoboʼ]» (Hch. 28:17, 22, 23).
6. Le ka tu aktáantaj talamiloʼobeʼ, ¿baʼax áant Pablo utiaʼal ka chúukpajak u yóol?
6 Le ka tu aktáantaj talamiloʼobeʼ Pabloeʼ maʼ xuʼul u xakʼaltik le Kiliʼich Tsʼíiboʼoboʼ, yéetel lelaʼ le áant utiaʼal ka chúukpajak u yóol (Heb. 4:12). Tak le kʼalaʼan kaʼach Roma táanil tiʼ u kíimsaʼaloʼ, tu yaʼalaj tiʼ Timoteo ka u bistiʼ «le juʼunoʼob [wa rolloʼob], maases le tsʼíib tsʼaʼan tiʼ kʼéeweloʼo[boʼ]» (2 Tim. 4:13). Le rolloʼobaʼ maʼ xaaneʼ ku taaskoʼob jujumpʼéel jaatsoʼob tiʼ le Kiliʼich Tsʼíiboʼob ich Hebreooʼ yéetel meyajnajtiʼ utiaʼal u maas kaambal. U xokik mantatsʼ le Kiliʼich Tsʼíiboʼoboʼ le áant utiaʼal u chúukpajal u yóol u meyajt Dios.
7. Aʼal baʼax utsiloʼob jeʼel a kʼamik wa mantatsʼ ka xakʼaltik le Bibliaoʼ.
7 K-xokik mantatsʼ le Biblia yéetel k-tuukul tiʼ bix jeʼel k-tsʼáaik ichil k-kuxtaleʼ, jeʼel u yáantkoʼon k-maas meyajt Dioseʼ (Heb. 5:12-14). Yoʼolal bix u yáantik máak le Bibliaoʼ, le salmistaoʼ tu yaʼalaj: «In tiaʼal teneʼ [maas] koʼoj u tojol u kaʼambesaj a chiʼ maʼ tiʼ yaʼabkach taakʼin beetaʼan yéetel oro wa yéetel plata. A waʼalmajtʼaanoʼobeʼ mantatsʼ in tiaʼaloʼob; tsʼoʼok u beetikenoʼob [maas] ojéelajen, tiʼ in j-pʼeekoʼob. Tsʼoʼok in náachkuntik in wook tiʼ tuláakal kʼaakʼas bej utiaʼal ka in tsʼoʼokbes a tʼaan» (Sal. 119:72, 98, 101). Kux túun teech ¿ka jóoʼsik wa u súutukil utiaʼal a xokik le Bibliaoʼ? ¿Táan wa a xakʼaltik le Biblia yéetel táan a tuukul tiʼ baʼax ka xokik utiaʼal ka tsʼaʼabaktech meyajoʼob a beet teʼ múuchʼuliloʼ?
Tu kanaj u yaabilt u yéet máakil
8. ¿Bix u tratartik kaʼach Saulo le máaxoʼob maʼ u yéet religionoʼoboʼ?
8 Táanil tiʼ u beetkuba disipulo tiʼ Cristoeʼ, Sauloeʼ jach u kʼubmaj u yóol tiʼ u religión yéetel maʼatech u yeʼesik kaʼach u yutsil tiʼ le máaxoʼob maʼ judíoʼoboʼ (Hch. 26:4, 5). Maʼ kʼaas tu yilil u kíimsaʼal Esteban tumen jujuntúul judíoʼobiʼ. Maʼ xaaneʼ tumen ku tuklik maʼalob le baʼax beetaʼab tiʼ le disipuloaʼ, Sauloeʼ káaj u chʼaʼapachtik le disipuloʼoboʼ (Hch. 6:8-14; 7:54–8:1). Le Bibliaoʼ ku yaʼalik: «Sauloeʼ táan kaʼach u chʼéejsik le j-oksaj óoloʼo[boʼ], ook tiʼ le [najoʼoboʼ]; ka tu jóoʼsaj xiiboʼob yéetel koʼoleloʼob, ka tu kʼubaj utiaʼal [u] kʼalaʼaloʼob» (Hch. 8:3, LTN). Tsʼoʼoleʼ, Sauloeʼ bin u «chʼaʼapachtoʼob tak tiʼ le táanxel luʼumoʼoboʼ» (Hch. 26:11).
9. ¿Baʼax beet u káajal Saulo u tratartik maʼalob u yéet máakil?
9 Sauloeʼ táan kaʼach u bin Damasco utiaʼal u beetik loob tiʼ le disipuloʼob le ka tu chíikbesuba Jesús tiʼoʼ. Le sáasilil tu yilaj le ka chíikpaj Cristooʼ tu beetaj u chʼóoptal yéetel kʼaʼabéetchaj u yáantaʼal. Le ka túuxtaʼab Ananías tumen Jéeoba utiaʼal ka u sut u sáasileʼ, Sauloeʼ tsʼoʼok kaʼach u kʼexpajal bix u tuukul tiʼ u maasil (Hch. 9:1-30). Ka tu beetuba disipulo tiʼ Cristoeʼ, tu yilaj u biskuba yéetel tuláakal máak jeʼex úuchik u beetik Jesuseʼ. Utiaʼal u páajtal u beetik lelaʼ xuʼul u beetik loob tiʼ u maasil yéetel joʼopʼ u kuxtal «ich jeetsʼel yéetel tuláakal máak» (xokaʼak Romailoʼob 12:17-21).
10, 11. ¿Bix tu yeʼesil Pablo jach u yaabilmaj u yéet máakil?
10 Pabloeʼ maʼ chéen u kʼáat ka kuxlak kaʼach ich jeetsʼelil yéetel u maasiliʼ, baʼaxeʼ tu yeʼesaj yaabilaj tiʼob. Yéetel bey tu beetil le ka tu kʼaʼaytaj le maʼalob péektsiloʼ. Tu yáax viajei u kʼaʼaytajeʼ bin teʼ luʼumiloʼob yaan Asia Menoroʼ. Kex jach chʼaʼapachtaʼab paʼteʼ yéetel le máaxoʼob u yéet binoʼ, jach tu tsʼáaj u yóol u yáant u maasil utiaʼal ka u beetubaʼob disipuloʼob tiʼ Cristo. Kex máan u kíimsaʼal kaʼach Pablo tumen jujuntúul u kajnáaliloʼobeʼ, letiʼobeʼ suunajoʼob kʼaʼaytaj tu kaajiloʼob Listra yéetel Iconio (Hch. 13:1-3; 14:1-7, 19-23).
11 Ka máan kʼiineʼ, Pablo yéetel le máaxoʼob láakʼintikoʼ binoʼob tu kaajil Filipos yaan Macedonia utiaʼal u yáantkoʼob le máaxoʼob uts u puksiʼikʼaloʼoboʼ. Lidia, utúul koʼolel kʼuch u beetuba judíaeʼ, tu kʼamaj le maʼalob péektsiloʼ yéetel joʼopʼ u tsaypachtik Cristo. Maʼ úuch tiʼ leloʼ, Pablo yéetel Silaseʼ bisaʼaboʼob tu táan le autoridadoʼoboʼ yéetel aʼalaʼab ka jaʼajatsʼaʼakoʼob yéetel ka kʼalaʼakoʼob cárcel. Kex beyoʼ, Pabloeʼ kʼaʼaytajnaj tiʼ le máax ku kanan teʼ carceloʼ, yéetel le máakaʼ bey xan u familiaeʼ okjaʼanajoʼob (Hch. 16:11-34).
12. Kex Saulo jach kʼasaʼan kaʼacheʼ, ¿baʼax áant u beetuba utúul u apóstol Cristo jach ku yeʼesik yaabilaj?
12 ¿Baʼaxten Sauloeʼ joʼopʼ u tsaypachtik Cristo wa ku chʼaʼapachtik kaʼach le disipuloʼoboʼ? ¿Baʼax áant Saulo utiaʼal ka u beetuba utúul apóstol jach ku yeʼesik yaabilaj? ¿Baʼaxten jeʼel u tsʼáaik kaʼach u kuxtal tak tu táan kíimil utiaʼal u yáantik le máakoʼob u kʼaj óoltoʼob Dios yéetel Cristooʼ? Letiʼeʼ ku yaʼalik: «Jajal Dioseʼ [...] tu yoʼolal u siibal utsileʼ tu tʼanajen. Bey túunoʼ le ka tu yóoltajeʼ, tu beetaj in kʼaj óoltik u Paal» (Gal. 1:15, 16). Tsʼoʼoleʼ tiʼ Timoteoeʼ tu yaʼalaj: «Tu chʼaʼajten óotsilil Jajal Dios, utiaʼal beyoʼ Jesucristoeʼ ka u chíikbes tiʼ teen yáaxileʼ tuláakal u chúukaʼan óolal. Ka béeychajen jeʼel bix jumpʼéel kaʼansaj tiʼ le máaxoʼob bíin u yokes u yóoloʼob tiʼ letiʼoʼ utiaʼal ka yanaktiʼob kuxtal minaʼan u xuul» (1 Tim. 1:16). Jéeobaeʼ tsʼoʼok kaʼach u perdonartik Pablo, tsʼoʼoleʼ le utsil bey xan le chʼaʼa óotsilil eʼesaʼabtiʼoʼ le péeks u yeʼes yaabilaj tiʼ u yéet máakil utiaʼal u kʼaʼaytiktiʼob le maʼalob péektsiloʼ.
13. ¿Baʼax ken u péeksoʼon k-yaabilt u maasil, yéetel bix jeʼel k-beetkeʼ?
13 Bejlaʼeʼ Jéeobaeʼ ku perdonartik xan k-kʼebanoʼob (Sal. 103:8-14). Le salmistaoʼ tu yaʼalaj tiʼ Jéeoba: «Yuumtsil, Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ?» (Sal. 130:3). Wa maʼ yoʼolal u chʼaʼa óotsilal Dioseʼ, mix utúul tiʼ toʼon jeʼel u páajtal k-meyajtikeʼ mix k-kʼamik le kuxtal minaʼan u xuuloʼ. Baʼaleʼ Dioseʼ tsʼoʼok u yeʼesiktoʼon u nojoch utsil. Le oʼolaleʼ jeʼex tu beetil Pabloeʼ, unaj k-eʼesik yaabilaj ken k-kʼaʼayt le maʼalob péektsiloʼ, ken k-kaʼans le baʼax ku yaʼalik le Bibliaoʼ bey xan ken k-líiʼs u yóol le sukuʼunoʼoboʼ (xokaʼak Beetaʼanoʼob 14:21-23).
14. ¿Bix jeʼel k-maas maʼalobkíintik bix k-kʼaʼaytajeʼ?
14 Pabloeʼ jach u kʼáat kaʼach u maas kʼaʼayt le maʼalob péektsilo, yéetel le u beetik jeʼex Cristooʼ le jach áante. Upʼéel bix úuchik u yeʼesik Jesús jach u yaabiltmaj le máakoʼoboʼ letiʼe ka tu kʼaʼaytaj le maʼalob péektsiloʼ, letiʼeʼ tu yaʼalaj: «Le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik» (Mat. 9:35-38). Pabloeʼ maʼ chéen tu kʼáataj tiʼ Jéeoba ka yanak maas yaʼab j-kʼaʼaytajoʼobiʼ, baʼaxeʼ tu jach tsʼáaj xan u yóol kʼaʼaytaj. ¿Kux túun teech? ¿Jeʼel wa a maas maʼalobkíintik bix a kʼaʼaytajeʼ? ¿Jeʼel wa u páajtal a jóoʼsik u súutukil utiaʼal a maas táakpajal teʼ kʼaʼaytaj wa tak utiaʼal a beetik a precursori? Unaj k-áantik k-éet máakil u kʼam le maʼalob péektsiloʼ (Fili. 2:16).
Baʼax modosi tu yeʼesaj Pablo
15. ¿Baʼax modos tu yeʼesaj Pablo yéetel bix u yilik kaʼach u maasil?
15 Pabloeʼ tu yeʼesaj xan baʼax modos unaj u yantaltoʼon. Kex yaʼab meyaj tsʼaʼab u beet ichil le múuchʼuliloʼ, mix utéen tu tuklaj wa ku náajmatik ka tsʼaʼabaktiʼ mix tu tuklaj wa chéen tsʼaʼabtiʼ yoʼolal le yaʼab baʼaloʼob u yojeloʼ. U yojleʼ tuláakal le baʼaxoʼob yantiʼoʼ Dios tsʼaamil tiʼ. Tsʼoʼoleʼ u yojel yaan xan uláakʼ sukuʼunoʼob jach maʼalob u kʼaʼaytajoʼob. Kex tumen jach nojoch le meyaj tsʼaʼan u beet kaʼachoʼ, mantatsʼ tu yeʼesaj kabal óolal (xokaʼak 1 Corintoiloʼob 15:9-11).
16. ¿Bix tu yeʼesil kabal óolal Pablo le ka anchaj upʼéel talamil yaan yil yéetel le circuncisionoʼ?
16 Koʼox ilik baʼax tu beetaj le ka anchaj upʼéel talamil tu kaajil Antioquía tiʼ Siria. Le disipuloʼob yanoʼob kaʼach teʼ kaajaʼ ku baʼateltʼaanoʼob yoʼolal le súutkʼuptajil wa circuncisionoʼ (Hch. 14:26–15:2). Tumen letiʼ túuxtaʼan kaʼach kʼaʼaytaj tiʼ le máaxoʼob maʼ judíoʼoboʼ, maʼ xaaneʼ Pabloeʼ jeʼel u tuklik jach u yojel u tratart le máaxoʼob maʼ judíoʼoboʼ yéetel jeʼel u yutskíintik kaʼach le talamiloʼ (xokaʼak Galaciailoʼob 2:8, 9). Baʼaleʼ le ka tu yilaj maʼ tu páajtal u yutskíintik le talamiloʼ, tu yeʼesaj kabal óolaleʼ ka tu kʼáataj u yáantaj le Cuerpo Gobernante yaan kaʼach Jerusalén utiaʼal ka u yiloʼob bix jeʼel u yutskíintaʼal le talamiloʼ. Le sukuʼunoʼobaʼ tu chʼaʼatukloʼob baʼax unaj u beetaʼal yéetel tu yéeyoʼob Pablo utiaʼal ka xiʼik u yaʼal baʼax tsʼoʼok u chʼaʼatuklaʼal (Hch. 15:22-31). Le baʼax tu beetaj Pabloaʼ tu chíikbesaj ku yeʼesik kaʼach tsiikil tiʼ le sukuʼunoʼoboʼ (Rom. 12:10, tsʼook xóotʼ).
17, 18. 1) ¿Baʼax modosi tu yeʼesaj Pablo tiʼ le sukuʼunoʼoboʼ? 2) ¿Baʼax ku kaʼansiktoʼon yoʼolal Pablo le bix tu yuʼubiluba u ancianoiloʼob Éfeso le ka lukʼ tu yiknaloʼoboʼ?
17 Le kabal óolal tu yeʼesaj Pablooʼ le áant utiaʼal ka u bisuba maʼalob yéetel le sukuʼunoʼoboʼ. Le oʼolaleʼ tu tsʼoʼokbal le carta tu túuxtaj tiʼ le Romailoʼoboʼ tu chʼaʼachiʼitaj u kʼaabaʼ maas tiʼ veinte sukuʼunoʼob. Yaʼab tiʼ le sukuʼunoʼobaʼ, maʼatech u kaʼa chʼaʼachiʼitaʼaloʼob ichil le Bibliaoʼ, yéetel maʼ tsʼaʼan nojoch meyaj u beetoʼob ichil le múuchʼuliloʼ. Baʼaleʼ tuláakloʼob jach u tsʼaamaj u yóol u meyajtoʼob Dios, yéetel Pabloeʼ jach tu yaabiltoʼob (Rom. 16:1-16).
18 Tumen Pablo jach ku yeʼesik kaʼach kabal óolal yéetel jach tu bisuba maʼalob yéetel le sukuʼunoʼoboʼ, tu beetaj u muʼukʼantal le múuchʼuliloʼoboʼ. Ka tu tsʼok muchʼuba yéetel u ancianoiloʼob Efesoeʼ, le sukuʼunoʼobaʼ «tu méekʼajoʼob yéetel tu tsʼuʼutsʼajoʼob Pablo. Jach okʼomchaj u yóoloʼob tumen tu yaʼalajtiʼob maʼ bíin u yiloʼob tu kaʼatéeniʼ». Baʼaleʼ wa ka u taasuba noj baʼalil Pablo yéetel maʼ u biskuba yéetel le sukuʼunoʼoboʼ, maʼ kun okʼomtal u yóoloʼob kaʼach tu yoʼolal (Hch. 20:37, 38).
19. ¿Bix k-eʼesik kabal óolal ken k-bisba yéetel k-sukuʼunoʼob?
19 Tuláakal máax u kʼáat u maas meyajt Dioseʼ kʼaʼabéet u yeʼesik kabal óolal jeʼex Pabloeʼ. Letiʼeʼ tu yaʼalaj tiʼ le sukuʼunoʼoboʼ: «Maʼ a beetikeʼex mix baʼal chéen utiaʼal a wutsileʼex mix tu yoʼolal kaʼanal ichiliʼ baʼaleʼ yéetel kabal óolal, tu jujuntúuleʼ ka u yil le uláakʼoʼoboʼ bey [maas] maʼaloboʼob tiʼ letiʼeʼ» (Fili. 2:3). ¿Bix jeʼel k-tsʼáaik ichil k-kuxtal lelaʼ? Upʼéel bixeʼ, letiʼe k-múul meyaj yéetel le ancianoʼoboʼ, k-beetik baʼax ku yaʼalkoʼobtoʼon yéetel maʼ k-aʼalik wa maʼ maʼalob baʼax tu chʼaʼatukloʼob ka beetaʼak teʼ múuchʼuliloʼ (xokaʼak Hebreob 13:17). Uláakʼ bixeʼ letiʼe k-yaabiltik tuláakal le sukuʼunoʼoboʼ. Le máaxoʼob meyajtik Jéeobaoʼ tiʼ jejeláas luʼumil u taaloʼob, jejeláas u razaʼob yéetel jejeláas bix líiʼsaʼaniloʼob. ¿Máasaʼ unaj k-eʼesik yaabilaj tiʼ tuláakloʼob jeʼex tu beetil Pablooʼ? (Hch. 17:26; Rom. 12:10, yáax xóotʼ) Le Bibliaoʼ ku yaʼaliktoʼon: «Utsil kʼamabaʼex ta baatsileʼex, jeʼel bix xan Cristo tu yutsil kʼamajoʼon utiaʼal u nojbeʼenil Jajal Dios» (Rom. 15:7, LTN).
Koʼoneʼex áalkabtik yéetel chúukaʼan óolal le áalkab ku biskoʼon teʼ kuxtaloʼ
20, 21. ¿Baʼax ken u yáantoʼon k-tsʼoʼoks le áalkab ku biskoʼon tiʼ le kuxtal minaʼan u xuuloʼ?
20 U kuxtal le máax meyajtik Diosoʼ jeʼel u páajtal u ketaʼal yéetel upʼéel ketlan áalkabeʼ. Le oʼolal Pabloeʼ tu tsʼíibtaj: «Tsʼoʼok in baʼateltik le maʼalob baʼateloʼ, tsʼoʼok in wáalkabtik le bej tak tu xuuloʼ, tsʼoʼok in kanáantik le oksaj óolaloʼ. Beleʼ táan u páaʼtiken u siibalil jumpʼéel toj kuxtal, lelaʼ bíin u tsʼáaten Yuumtsil tiʼ le kʼiinoʼ, tumen letiʼeʼ juntúul juez toj u pʼis óol. Maʼ chéen tiʼ teen bíin u tsʼáaiʼ baʼaleʼ tak tiʼ le máaxoʼob táan u tsʼíiboltikoʼob yéetel yaakunaj u taalbaloʼ» (2 Tim. 4:7, 8).
21 Wa k-beetik jeʼex Pabloeʼ yaan xan u páajtal k-tsʼoʼoksik le áalkab ku biskoʼon teʼ kuxtal minaʼan u xuuloʼ (Heb. 12:1). Le oʼolaleʼ, mantatsʼ unaj k-xokik le Bibliaoʼ, k-eʼesik yaabilaj tiʼ u maasil yéetel u yantaltoʼon kabal óolal utiaʼal k-maas meyajtik Dios.
¿Baʼax jeʼel a núukikeʼ?
• ¿Baʼax páajchaj u beetik Pablo ikil u xakʼaltik kaʼach mantatsʼ le Kiliʼich Tsʼíiboʼoboʼ?
• ¿Baʼaxten jach unaj k-eʼesik yaabilaj tiʼ u maasil?
• ¿Baʼax maʼalob modosi ken u yáantoʼon k-tratart maʼalob tuláakal máak?
• Le baʼax tu beetaj Pablooʼ, ¿bix u yáantkoʼon utiaʼal k-múul meyaj yéetel le ancianoʼoboʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Jeʼex Pabloeʼ, unaj k-xokik mantatsʼ le Biblia utiaʼal u chúukpajal k-óol aktáant le talamiloʼoboʼ
[U tsolajil le oochel teʼ táan juʼun 24]
Ken a kʼaʼayt le maʼalob péektsiloʼ ka weʼesik a yaabilmaj a wéet máakil
[U tsolajil le oochel teʼ táan juʼun 25]
¿Baʼaxten yaabiltaʼab Pablo tumen le sukuʼunoʼoboʼ?