Maʼ kun xáantal ken u jáalkʼabtoʼon u Reino Dios
Maʼ kun xáantal ken u jáalkʼabtoʼon u Reino Dios
«Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ.» (MAT. 6:10.)
1. ¿Baʼax taal u kʼaʼayt Jesús way Luʼumeʼ?
TEʼ KAʼANSAJ tu beetaj Jesús teʼ puʼukoʼ, tu yaʼalaj tiʼ u disipuloʼob bix unaj u oraroʼob yéetel ka u kʼáatoʼob: «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mat. 6:9-13). Jesuseʼ «máan tiʼ yaʼabkach kaajoʼob yéetel tiʼ mejen kajtaliloʼob, táan u tseʼek yéetel táan u tsʼáaik kʼaj óoltbil u [reino] Jajal Dios» (Luc. 8:1). Yéetel tu yaʼalaj tiʼ u disipuloʼob: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ» (Mat. 6:33). Le baʼaxoʼob ken k-xakʼalt teʼ xookaʼ unaj k-ilik bix jeʼel u meyajtoʼon teʼ kʼaʼaytajoʼ. Tsʼoʼoleʼ maʼalob ka k-tukult xan bix jeʼel k-núukik le kʼáatchiʼobaʼ: ¿Jach wa kʼaʼanan k-tsʼáaik ojéeltbil u maʼalob péektsilil le Reinooʼ? ¿Baʼaxten kʼaʼabéet u jáalkʼabtaʼal wíinik? Yéetel ¿bix ken u jáalkʼabtoʼon u Reino Dios?
2. ¿Baʼaxten jach kʼaʼabéet u tsʼaʼabal ojéeltbil le Reinooʼ?
2 Jesuseʼ tu yaʼalaj: «U maʼalob péektsil le [reinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mat. 24:14). U maʼalob péektsilil le Reinooʼ, letiʼe baʼax maas jach kʼaʼabéet u tsʼaʼabal ojéeltbiloʼ. Le oʼolaleʼ, óoliʼ siete millones u j-jaajkunajoʼob Jéeoba tiʼ maas tiʼ cien mil múuchʼuliloʼob tiʼ tuláakal yóokʼol kaabeʼ táan u kʼaʼaytikoʼob tsʼoʼok u káajal u gobernar le Reino teʼ kaʼanoʼ. Lelaʼ jach ku taasiktoʼon kiʼimak óolal, tumen yéetel le gobiernoaʼ Dioseʼ yaan u yutskíintik tuláakal baʼal. Yáanal le Reinoaʼ yaan u beetaʼal baʼax u kʼáat Jéeoba way Luʼum jeʼex u beetaʼal teʼ kaʼanoʼ.
3, 4. ¿Baʼax utsiloʼob ken u kʼam wíinik ken beetaʼak baʼax u kʼáat Jéeoba way Luʼumeʼ?
3 ¿Baʼax utsiloʼob ken u kʼam wíinik ken beetaʼak baʼax u kʼáat Jéeoba way Luʼumeʼ? Le Bibliaoʼ ku yaʼalik: «Jajal Dios kun choʼik tuláakal u jaʼil u yichoʼob, maʼ túun yantal kíimil, mix okʼol, mix yaj óolal, mix kʼiʼinamil» (Apo. 21:4). Mix máak kun kʼojaʼantal mix kun kíimil tumen yaan u luʼsaʼal le kʼebanoʼ. Le Bibliaoʼ ku yaʼalik yoʼolal le máaxoʼob tsʼoʼok u kíimloʼob yéetel tiaʼanoʼob tu tuukul Jéeobaoʼ: «Yaan u kaʼapúut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Hch. 24:15). Maʼ kun kaʼa antal baʼateltáambaloʼob, kʼojaʼaniloʼob mix wiʼijil yéetel tuláakal le Luʼumaʼ yaan u suut upʼéel paraíso. Tak le tsʼíitsʼik baʼalcheʼoboʼ, yaan u kuxtaloʼob ich jeetsʼelil yéetel le wíinikoʼoboʼ (Sal. 46:9; 72:16; Isa. 11:6-9; 33:24; Luc. 23:43).
4 Le Bibliaoʼ ku yaʼalik bix kun kuxtal le máakoʼob yáanal le Reinoaʼ: «Le j-kabal óoloʼoboʼ bíin utiaʼalintoʼob le luʼumaʼ, bíin kuxlakoʼob ichil nojoch jeetsʼel óolal». Baʼaleʼ ¿baʼax kun úuchul yéetel le kʼasaʼan máakoʼoboʼ? Le Bibliaoʼ ku yaʼalik: «Ichil jumpʼíit kʼiineʼ yaan u minaʼantal loolob máakoʼob». Chéen «le máaxoʼob ku kʼub óolaloʼob tiʼ [Jéeoba] bíin utiaʼalintoʼob le luʼumaʼ» (Sal. 37:9-11).
5. ¿Baʼax kun úuchul tiʼ le kʼasaʼan yóokʼol kaabaʼ?
5 Baʼaleʼ utiaʼal ka yanak le utsiloʼobaʼ, u Reino Dioseʼ kʼaʼabéet u xuʼulsik tiʼ le kʼasaʼan gobiernoʼoboʼ, le religionoʼob minaʼan u jaajil tiʼoboʼ bey xan tiʼ le nukuch negocioʼob ku beetkoʼob u yantal talamiloʼoboʼ. Le profeta Danieloʼ tu yaʼalaj: «Tu kʼiiniloʼob u méekʼtáanoʼob le [gobiernoʼoboʼ], u [Diosil] kaʼaneʼ bíin u líikʼes jumpʼéel [reino teʼ kaʼan] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkíintaʼak tumen mix jumpʼéel múuchʼ kaaj, baʼaleʼ yaan u xuʼulsik jumpuliʼ tuláakal le uláakʼ [gobiernoʼoboʼ]» (Dan. 2:44). Ken tsʼoʼokokeʼ, le «túumben kaʼanoʼo[boʼ]» (wa u gobierno Dioseʼ) yaan u gobernartik le «túumben luʼum» (wa le máaxoʼob kun kuxtaloʼob way Luʼumeʼ) «tuʼux tuláakal baʼal toj» kun beetbiliʼ (2 Ped. 3:13).
Bejlaʼeʼ jach kʼaʼabéet u jáalkʼabtaʼal wíinik
6. ¿Baʼax ku yaʼalik le Biblia yoʼolal le kʼasaʼaniloʼ?
6 Le ka tu tsʼáajuba Satanás, Adán yéetel Eva tu contra Jéeoba yéetel le ka tu chʼaʼatuklaj u luʼskubaʼob yáanal u nuʼuktajeʼ, letiʼe ka káaj u bin kʼaasil tiʼ wíinikoʼ. Maas tiʼ mil seiscientos jaʼaboʼob úuchuk lelaʼ, tu kʼiiniloʼob Noeeʼ pʼáat «máan tipʼaʼan u kʼasaʼanil le wíinik yóokʼol le luʼumaʼ, mantatsʼ xan chéen loob ku tukultik u beetik» (Gén. 6:5). Óoliʼ mil trescientos jaʼaboʼob úuchuk lelaʼ, tumen jach yaan kʼasaʼanileʼ Salomoneʼ tu yaʼalaj: «Le oʼolal tin tuklaj, le kimenoʼoboʼ [maas] maʼalob yaniloʼob tiʼ le kuxaʼanoʼoboʼ; baʼaleʼ le máaxoʼob maʼ síijikoʼoboʼ [maas] maʼalob yaniloʼob tiʼ le kaʼatúuloʼoboʼ, tumen maʼ u yiloʼob le loob ku beetaʼal way luʼumaʼ» (Ecl. 4:2, 3). Kex tsʼoʼok u máan maas tiʼ tres mil jaʼaboʼob aʼalaʼak lelaʼ láayliʼ jach yaan kʼasaʼanileʼ.
7. ¿Baʼaxten maases bejlaʼa kʼaʼabéet k-jáalkʼabtaʼal tumen u Reino Dioseʼ?
7 Kex tumen úuch joʼopʼok u yantal le kʼasaʼaniloʼ, maases teʼ kʼiinoʼob kʼaʼabéet k-jáalkʼabtaʼal tiʼ le talamiloʼob tumen u Reino Diosoʼ. Teʼ tsʼook cien jaʼaboʼobaʼ jach tsʼoʼok u yantal kʼasaʼanil yéetel cada kʼiin ku máaneʼ táan u bin u maas yaʼabtal. Upʼéel Instituto Worldwatch u kʼaabaʼeʼ, tu yaʼalaj: «Teʼ baʼateltáambaloʼoboʼ [anchaj teʼ siglo 20] óoxtéen u maas yaʼabil le máaxoʼob kíimoʼob ke tiʼ tuláakal le baʼateloʼob anchaj desde teʼ yáax siglo tak tu jaʼabil 1899». Desde tu jaʼabil 1914, maas tiʼ cien millones máakoʼob tsʼoʼok u kíimloʼob tiʼ le nukuch baʼateloʼoboʼ. Upʼéel libroeʼ ku yaʼalikeʼ, teʼ kaʼapʼéel Nojoch Baʼateloʼ kíim óoliʼ sesenta millones máakoʼob. Bejlaʼeʼ, jujumpʼéel luʼumiloʼobeʼ yantiʼob nukuch bombaʼob jeʼel u kíimskoʼob maas yaʼab máakoʼobeʼ. Kex tsʼoʼok u jach kaʼantal u naʼat wíinikeʼ maas tiʼ cinco millones mejen paalaloʼob ku kíimiloʼob cada jaʼab yoʼolal wiʼijilil (ilaʼak le xook 9 tiʼ le libro ¿Baʼax jach tu jaajil ku kaʼansik le Bibliaoʼ?).
8. ¿Baʼax tsʼoʼok u yeʼesik tuláakal le jaʼaboʼob gobernarnak wíinikoʼ?
8 Wíinikeʼ maʼ béeychajak u luʼsik le kʼasaʼaniloʼ. Le gobiernoʼoboʼ, le religionoʼoboʼ yéetel le nukuch negocioʼoboʼ maʼ béeychajak u taaskoʼob jeetsʼeliliʼ mix u luʼskoʼob le óotsilil yéetel le kʼojaʼaniloʼoboʼ. Maʼ chéen maʼ béeyak u luʼskoʼob le talamiloʼobaʼ, baʼaxeʼ tsʼoʼok u maas yaʼabkúuntkoʼob. Tuláakal le jaʼaboʼob tsʼoʼok u gobernar wíinikoʼ ku yeʼesik jach jaaj le baʼax ku yaʼalik le Bibliaaʼ: «Xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin [u] xuʼulul» (Jer. 10:23). Jach beyoʼ, «le páajtalil yaan tiʼ wíinik[oʼ]» chéen «utiaʼal u beet loob tiʼ u yéet xiibil» (Ecl. 8:9). Le oʼolal «tuláakal le baʼaloʼob u beetmaj Jajal Diosoʼ ku yáakam yéetel ku mukʼyaj» (Rom. 8:22).
9. ¿Baʼax u yaʼalmaj le Biblia kun úuchul teʼ tsʼook kʼiinoʼobaʼ?
9 Le Bibliaoʼ tu yaʼalaj baʼax kun úuchul teʼ kʼiinoʼobaʼ: «Tiʼ u tsʼook jaʼaboʼobeʼ bíin taalak talam kʼiinoʼob». Ka tsʼoʼok u yaʼalik baʼax ken u beet le máakoʼob yáanal u nuʼuktaj le gobiernoʼoboʼ, tu yaʼalaj xan: «Le máaxoʼob kʼasaʼanoʼoboʼ yéetel le ku tuusoʼoboʼ bíin xiʼikoʼob tiʼ kʼaas tak tu maas kʼaasil» (xokaʼak 2 Timoteo 3:1-5, 13). Toʼoneʼ jach k-ojel beyiliʼ kun úuchloʼ tumen «u túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). Ku taasiktoʼon kiʼimak óolal k-ojéeltik u Reino Dioseʼ maʼ kun xáantal ken u jáalkʼabtoʼon tiʼ le yóokʼol kaab táan u bin u maas kʼastaloʼ.
Chéen Jéeoba jeʼel u jáalkʼabtikoʼoneʼ
10. ¿Baʼaxten k-aʼalik chéen Jéeoba jeʼel u jáalkʼabtikoʼoneʼ?
10 Ken a kʼaʼayt le maʼalob péektsiloʼ unaj a waʼalik chéen Jéeoba jeʼel u jáalkʼabtikoʼoneʼ. Chéen tiʼ letiʼ yaan u páajtalil utiaʼal u jáalkʼabtik tiʼ le talamiloʼob le máaxoʼob meyajtikoʼ yéetel u kʼáat u beete (Hch. 4:24, 31; Apo. 4:11). Jach k-ojel Jéeobaeʼ yaan u jáalkʼabtik u kaajal yéetel yaan u béeykuntik baʼax u tukulmaj, tumen u yaʼalmaj: «Le baʼax tsʼoʼok in waʼalikeʼ, bíin úuchuk». Tsʼoʼoleʼ u yaʼalmaj xan: «Maʼ bíin kaʼa suunak tin wiknal wa maʼ u beet u meyajiʼ» (xokaʼak Isaías 14:24, 25; 55:10, 11).
11, 12. ¿Baʼax ku yaʼalik Jéeoba ken u beet yoʼolal le máaxoʼob meyajtikoʼ?
11 Cada ken u chʼaʼatukult u xuʼulsik tiʼ le kʼasaʼanoʼoboʼ, Jéeobaeʼ ku yaʼalik tiʼ máaxoʼob meyajtik yaan u salvartikoʼob. Le ka tu túuxtaj profeta Jeremías u yaʼal baʼax kun úuchul tiʼ le kʼasaʼan máakoʼoboʼ, Dioseʼ tu yaʼalajtiʼ: «Maʼ a chʼaʼik sajakil tiʼ mix máak, tumen teen bíin yanaken ta wéetel utiaʼal in kanáantech» (Jer. 1:8). Yéetel táanil tiʼ u xuʼulsik tiʼ u kʼasaʼan kaajiloʼob Sodoma yéetel Gomorraeʼ, tu túuxtaj kaʼatúul angeloʼob utiaʼal ka u kanáantoʼob Lot yéetel u familia. Ka tsʼoʼokeʼ Jéeobaeʼ «tu beetaj u kʼáaxal kʼáakʼ yéetel azufre» yóokʼol le kaajoʼobaʼ (Gén. 19:15, 24, 25).
12 Kex Jéeoba yaan u xuʼulsik tiʼ tuláakal le kʼasaʼan máakoʼoboʼ, yaan u jáalkʼabtik wa u salvartik le máaxoʼob meyajtikoʼ. Le ka tu xuʼulsaj tiʼ le kʼasaʼan máakoʼob teʼ Búulkabaloʼ, Dioseʼ «[“tu salvartaj] Noé”, máax tu tseʼektaj toj kuxtal, yéetel uláakʼ siete máakoʼob» (2 Ped. 2:5). Le ken u xuʼuls le kʼasaʼan máakoʼoboʼ, Jéeobaeʼ yaan u salvartik le máaxoʼob meyajtikoʼ. Le oʼolal le Bibliaoʼ ku yaʼalik: «Tuláakaleʼex u kabal óolalileʼex yóokʼol kaabeʼ kaxanteʼex Yuumtsil [Jéeoba] [...]. Meyajneneʼex tubeel yéetel kabal óolajil, maʼ xaan ka a kaxteʼex tuʼux a taʼakbesikabaʼex tiʼ u kʼiinil u pʼujaʼanil Yuumtsi[liʼ]» (Sof. 2:3). Le ken xuʼulsaʼak «le loolob máakoʼo[boʼ]» chéen «le máaxoʼob noʼojaʼan u kuxtaloʼob yéetel x-maʼ siʼipileʼ bíin kuxlakoʼob jumpuliʼ teʼ luʼumaʼ» (Pro. 2:21, 22).
13. ¿Bix ken u jáalkʼabtil Jéeoba le máaxoʼob utstakoʼob tsʼoʼok u kíimloʼoboʼ?
13 Baʼaleʼ, yaʼab tiʼ le máaxoʼob meyajt Diosoʼ tsʼoʼok u kíimloʼob yoʼolal kʼojaʼanil, chʼaʼapachtajil wa yoʼolal uláakʼ talamiloʼob (Mat. 24:9). ¿Baʼax kun úuchul tu yéeteloʼob? Yaan xan u jáalkʼabtaʼaloʼob. ¿Bix kun úuchul? Jeʼex tsʼoʼok aʼalikoʼ, «yaan u kaʼapúut kuxtal le [...] utstakoʼoboʼ» (Hch. 24:15). ¿Máasaʼ jach ku kiʼimakkúuntik k-óol ojéeltik Jéeobaeʼ jach tu jaajil yaan u jáalkʼabtik le máaxoʼob meyajtikoʼ?
Upʼéel gobierno ken u beet baʼax maʼalob
14. ¿Baʼaxten jeʼel k-aʼalik u Reino Dioseʼ yaan u beetik baʼax maʼalob?
14 Ken kʼaʼaytajnakecheʼ, aʼaleʼ u Reino Dioseʼ upʼéel gobierno ken u beet baʼax maʼalob, tumen yaan u chíikbesik u justicia, u tojil yéetel u yaabilaj Jéeoba (Deu. 32:4; 1 Juan 4:8). Tumen tsʼoʼok u yeʼesik jeʼel u páajtal u beetikeʼ, tiʼ Jesuseʼ tsʼoʼok u tsʼaʼabal le Reino utiaʼal u gobernartik le Luʼumaʼ. Tsʼoʼoleʼ tsʼoʼok xan u yéeyaʼal 144,000 máakoʼob utiaʼal ka múul gobernarnakoʼob tu yéetel (Apo. 14:1-5).
15. ¿Baʼaxten jelaʼan u Reino Dios tiʼ le gobiernoʼob yanoʼob bejlaʼoʼ?
15 Jesús yéetel le 144,000 yéeyaʼanoʼoboʼ maas maʼalob kun gobernaroʼob ke le gobiernoʼob yanoʼob bejlaʼoʼ. Yaʼab tiʼ le gobiernoʼoboʼ tsʼoʼok u beetkoʼob u yantal yaʼab muʼyajiloʼob, yéetel yoʼolal le nukuch baʼateloʼoboʼ u millonesi máakoʼob tsʼoʼok u kíimiloʼob. Le oʼolal le Bibliaoʼ ku yaʼalik maʼ k-kʼubik óol tiʼ le «wíinikoʼob maʼ tu páajtal u [salvaroʼoboʼ]» (Sal. 146:3). Baʼaleʼ Cristoeʼ yaan u gobernar yéetel yaabilaj yéetel yaan u beetik baʼax uts. Jesuseʼ tu yaʼalaj: «Koʼoteneʼex tiʼ teen, tuláakaleʼex máaxeʼex kaʼananeʼex tiʼ a meyajeʼex yéetel aal a kucheʼex, teen bíin in beet a jeʼeleʼex. Biseʼex in kuuch ta wóokʼoleʼex, yéetel kaambalneneʼex tiʼ teen, tumen letiʼeʼ teneʼ chúukaʼan in wóol [wa maʼ séeb in kʼuuxiliʼ] yéetel kabal u yóol in puksiʼikʼal; beyoʼ bíin a kaxteʼex jeʼelel utiaʼal a pixaneʼex. Tumen in kuucheʼ maʼ aaliʼ yéetel sáal u bisaʼal» (Mat. 11:28-30).
Maʼ kun xáantal ken xuʼuluk le tsʼook kʼiinoʼobaʼ
16. ¿Baʼax kun úuchul ken kʼuchuk tu xuul le tsʼook kʼiinoʼobaʼ?
16 Desde tu jaʼabil 1914 ka káaj le tsʼook kʼiinoʼobaʼ wa u taal u tsʼoʼokbal le kʼasaʼan yóokʼol kaabaʼ (Mat. 24:3, NM). Le «táaj yaʼab mukʼyaj» wa le nojoch yaayaj óolal tu yaʼalaj Jesusoʼ jach maʼ kun xáantal ken káajak (xokaʼak Mateo 24:21). Le nojoch yaayaj óolalaʼ mix utéen ilaʼak yéetel yaan u xuʼulsik u kʼasaʼan yóokʼol kaab Satanás. Baʼaleʼ ¿bix kun káajal le nojoch yaayaj óolalaʼ, yéetel bix kun tsʼoʼokol?
17. ¿Bix u yaʼalik le Biblia kun káajal le nojoch yaayaj óolaloʼ?
17 Le nojoch yaayaj óolaloʼ yaan u káajal tiʼ upʼéel kʼiin maʼ táan u páaʼtaʼaliʼ. Jach beyoʼ, «u kʼiinil Yuumtsil» Jéeobaeʼ yaan u káajal «le ken u yaʼal máakoʼob: Tuláakal jejetsʼkil yéetel maʼalob yanil» (xokaʼak 1 Tesalonicailoʼob 5:2, 3). Le ken u tukult le máakoʼob jach taʼaytak u yutskíintkoʼob jujumpʼéel tiʼ le nojoch talamiloʼoboʼ letiʼe ken xuʼulsaʼak «le Babilonia» wa tuláakal le religionoʼob maʼatech u kaʼanskoʼob u jaajiloʼ, lelaʼ yaan u yeʼesik tsʼoʼok u káajal le nojoch yaayaj óolaloʼ. Le reyoʼob yéetel le máakoʼoboʼ yaan u jaʼakʼal u yóoloʼob ken u yiloʼob u xuʼulsaʼal tiʼ le nojoch Babiloniaoʼ (Apo. 17:1-6, 18; 18:9, 10, 15, 16, 19).
18. ¿Baʼax ken u beet Jéeoba ken óotaʼak xuʼulsbil tiʼ u kaajal tumen Satanás?
18 Le Bibliaoʼ ku yaʼalikeʼ «bíin yanak chíikulaloʼob tiʼ le kʼiinoʼ, tiʼ le [lunaoʼ] bey xan tiʼ le eekʼoʼoboʼ» yéetel «letiʼ túun ken ilaʼak teʼ kaʼanoʼ u chíikulal u Paal Máak». Letiʼe ken páajchajak k-beetik le baʼax ku yaʼalaʼaltoʼonaʼ: «Líikʼes a pooleʼex tumen séebaʼan kan jáalkʼabtbileʼex» (Luc. 21:25-28; Mat. 24:29, 30). Gog wa Satanaseʼ yaan u yilik u xuʼulsik tiʼ u kaajal Dios. ¿Baʼax túun ken u beet Jéeoba? Letiʼeʼ ku yaʼalik: «Jeʼel máax ka u tsʼáa u kʼab tu yóokʼol in kaajaleʼ, tiʼ u neekʼ in wich ku beetik loob» (Zac. 2:8, 9). Jéeobaeʼ tu séebaʼanil ken u jáalkʼabt wa u salvart u kaajal. Satanaseʼ maʼ kun béeytal yéetel le baʼax u tukulmoʼ (Eze. 38:9, 18).
19. ¿Baʼaxten jach k-ojel u angeloʼob Dioseʼ yaan u xuʼulskoʼob tiʼ u kʼasaʼan yóokʼol kaab Satanás?
19 Le ken u juzgart Jéeoba le kaajoʼoboʼ, yaan u yojéeltaʼal chéen letiʼ le jaajil Diosoʼ (Eze. 36:23). Letiʼeʼ yaan u túuxtik u milesi angeloʼob nuʼuktaʼanoʼob tumen Cristo utiaʼal ka u xuʼulsoʼob tiʼ u kʼasaʼan yóokʼol kaab Satanás (Apo. 19:11-19). Kʼaʼajaktoʼoneʼ, chéen utúul angeleʼ tu kíimsaj ciento ochentaicinco mil soldadoʼob tiʼ upʼéel áakʼab. Lelaʼ ku yeʼesikeʼ, tuláakal le angeloʼobaʼ yaan u béeytal u xuʼulskoʼob u kʼasaʼan yóokʼol kaab Satanás teʼ Armagedonoʼ, tiʼ túun ken tsʼoʼokok le nojoch yaayaj óolaloʼ (2 Rey. 19:35; Apo. 16:14, 16). Satanás yéetel u kʼasaʼan angeloʼobeʼ yaan u kʼalaʼaloʼob mil jaʼaboʼob yéetel tu tsʼookeʼ yaan u xuʼulsaʼaltiʼob (Apo. 20:1-3).
20. ¿Baʼax ken u béeykunt Dios yéetel u Reinooʼ?
20 Bey túunoʼ teʼ Luʼumaʼ maʼ kun kaʼa antal kʼasaʼanil yéetel le máaxoʼob utstakoʼoboʼ yaan u pʼáatloʼob kuxtal utiaʼal mantatsʼ. Tsʼoʼoleʼ yaan u chíikpajal chéen Jéeoba jeʼel u jáalkʼabtikoʼoneʼ (Sal. 145:20). Yéetel u Reinoeʼ, Jéeobaeʼ yaan u yeʼesik chéen letiʼ unaj u gobernar, yaan u nojbeʼenkúuntik u kʼaabaʼ yéetel yaan u béeykuntik baʼax u tukulmaj utiaʼal le Luʼumaʼ. Jach ku kiʼimakkúuntik k-óol u páajtal k-tsʼáaik ojéeltbil le baʼaloʼobaʼ, bey xan k-áantik u maasil ka u yojéeltoʼob u Reino Dioseʼ maʼ kun xáantal ken u jáalkʼabtoʼon (Hch. 13:48).
¿Kʼajaʼan wa teech?
• ¿Bix tu yeʼesil Jesús le Reinooʼ letiʼe baʼax maas jach kʼaʼabéet u tsʼaʼabal ojéeltbiloʼ?
• ¿Baʼaxten maases teʼ kʼiinoʼob kʼaʼabéet k-jáalkʼabtaʼal tumen u Reino Diosoʼ?
• ¿Baʼaxoʼob kun úuchul teʼ nojoch yaayaj óolaloʼ?
• ¿Bix ken u yeʼesil Jéeoba chéen letiʼ jeʼel u jáalkʼabtikoʼoneʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
Le Bibliaoʼ tu yaʼalaj yaan u kʼaʼaytaʼal u maʼalob péektsilil le Reino tiʼ tuláakal yóokʼol kaab teʼ kʼiinoʼobaʼ
[U tsolajil le oochel teʼ táan juʼun 15]
Jeʼex tu salvartil Noé yéetel u familiaeʼ, Jéeobaeʼ yaan xan u salvarkoʼon
[U tsolajil le oochel teʼ táan juʼun 16]
Jéeobaeʼ yaan u «choʼik tuláakal u jaʼil u yichoʼob, maʼ túun yantal kíimil» (Apo. 21:4)