¿Jeʼel wa u páajtal a tsolik baʼax ka creertikeʼ?

¿TSʼOʼOK wa u kʼaʼabéettal a núukik kʼáatchiʼob ku beetaʼaltech yoʼolal baʼax ka creertik? Ilawil baʼax úuch tiʼ Susana utúul kiik táan u xokik u secundaria, yaan 16 jaʼaboʼob tiʼ yéetel kajaʼan tu luʼumil Paraguay. Le táan kaʼach u tsʼaʼabal le xook yaan yil yéetel bix unaj u kuxtal máakeʼ, utúul u yéet xookeʼ tu yaʼaleʼ u j-jaajkunajoʼob Jéeobaeʼ maʼatech u kʼamkoʼob le «Kiliʼich Tsʼíiboʼob ich Hebreooʼ», Jesucristo mix María. Tu yaʼalaj xaneʼ tumen u j-jaajkunajoʼob Jéeoba jach u kʼubmaj u yóoloʼob tiʼ u religionoʼobeʼ maʼatech u yóotikoʼob ka tsʼakaʼakoʼob utiaʼal maʼ u kíimiloʼob. ¿Baʼax jeʼel a beetik kaʼach wa ka aʼalaʼaktech lelaʼ?

Ka tsʼoʼok u payalchiʼ tiʼ Jéeobaeʼ Susanaeʼ tu líiʼsaj u kʼab. Tumen taʼaytak u tsʼoʼokol kaʼach le xookoʼ tu kʼáataj tiʼ le maestra wa jeʼel u páajtal u tsolik tuláakʼ kʼiin baʼax ku creertik u j-jaajkunajoʼob Jéeobaeʼ. Le maestraoʼ tu yaʼalajtiʼ jeʼeleʼ. Le kiikaʼ kaʼapʼéel semana xáanchaj táan u líiʼskuba yéetel u yáantaj le folleto Los testigos de Jehová: ¿quiénes son y qué creen?

Ka kʼuch u kʼiinileʼ, Susanaeʼ tu tsolaj tuʼux chʼaʼabaʼan le kʼaabaʼ j-jaajkunajoʼob tiʼ Jéeoba, tu yaʼalaj táan k-páaʼtik k-kuxtal tiʼ upʼéel Paraíso yéetel tu tsolaj xan baʼaxten maʼatech k-kʼamik ka tsʼaʼabaktoʼon kʼiʼikʼ. Tsʼoʼoleʼ tu núukaj le kʼáatchiʼob beetaʼabtiʼ tumen u yéet xookoʼoboʼ. Le maestraoʼ jach jaʼakʼ u yóol le ka tu yilaj bix meyajnajik le Biblia tiʼ Susana utiaʼal u núukik le kʼáatchiʼoboʼ.

Utúul u yéet xookeʼ tu yaʼalaj maʼ tu yilaj mix upʼéel imagen le ka ook tiʼ upʼéel u Najil Reinooʼ. Le maestraoʼ tu kʼáataj baʼaxten minaʼan imagenoʼobiʼ. Susana túuneʼ tu xokajtiʼ Salmo 115:4-8 yéetel Éxodo 20:4. Ka tsʼoʼokeʼ le maestraoʼ tu kʼáataj: «¿Baʼaxten túun jach chuup yéetel imagenoʼob le k-iglesiaʼob wa le Biblia ku yaʼalik maʼ maʼaloboʼ?».

U beetaʼal yéetel u núukaʼal le kʼáatchiʼobaʼ xáanchaj cuarenta minutos. Le ka tu kʼáataj Susana tiʼ u yéet xookoʼob wa u jeʼel u chaʼantkoʼob le video La negativa a la sangre. La medicina acepta el reto, tuláakaloʼob tu yaʼaloʼob jeʼeleʼ. Le maestraoʼ tu yaʼalaj jeʼel u páajtal u chaʼantaʼal teʼ tuláakʼ xookoʼ. Ka tsʼoʼok u chaʼantaʼal le videooʼ, Susanaeʼ tu yaʼalaj baʼax uláakʼ tratamientoʼob ku kʼamik u j-jaajkunajoʼob Jéeoba, yéetel le maestraoʼ tu yaʼalaj: «Maʼ in wojel kaʼach wa yaan yaʼab tratamientoʼob utiaʼal maʼ u tsʼaʼabal kʼiʼikʼ tiʼ máakiʼ; maʼ in wojel xan baʼax utsiloʼob ku taaskoʼobiʼ. ¿Chéen wa utiaʼal u j-jaajkunajoʼob Jéeoba?». Le ka aʼalaʼabtiʼ maʼeʼ, letiʼeʼ tu yaʼalaj: «Ken kaʼa máanak u j-jaajkunajoʼob Jéeoba tin wotocheʼ, yaan in tsikbal tu yéeteloʼob».

Le baʼax ken u tsol kaʼach Susana ich veinte minutoseʼ xáanchaj óoxpʼéel  oraʼob. Tuláakʼ semanaeʼ, uláakʼ u yéet xookoʼobeʼ tu tsolajoʼob xan baʼax ku creertikoʼob. Baʼaleʼ maʼ béeychaj u núukikoʼob le kʼáatchiʼob beetaʼabtiʼoboʼ. Le maestraoʼ tu kʼáatajtiʼob: «¿Baʼaxten maʼ béeychaj a núukikeʼex le kʼáatchiʼob beetaʼabteʼex yaan yil yéetel baʼax ka creertikeʼex jeʼex tu beetil a wéet xookeʼex j-jaajkunaj tiʼ Jéeobaoʼ?».

Letiʼobeʼ tu yaʼaloʼob: «Tumen letiʼobeʼ ku xokikoʼob le Bibliaoʼ, baʼaleʼ toʼoneʼ maʼatech».

Le maestraoʼ tu yaʼalaj tiʼ Susana: «Techeʼ jach tu jaajil ka xokik le Bibliaoʼ yéetel ka wilik a tsʼoʼokbesik le baʼax ku yaʼalikoʼ. Jach maʼalob le baʼax ka beetikoʼ».

Wa u kʼáat kaʼacheʼ, Susanaeʼ jeʼel u chʼaʼatuklik maʼ u yaʼalik mix baʼaleʼ. Baʼaleʼ, tu beetaj jeʼex le chan chʼúupal israelita palitsiltaʼan kaʼach tumen le sirioʼoboʼ. Letiʼeʼ ku meyaj kaʼach tu yotoch Naamán, utúul u nojchil u soldadoʼob Siria, máax yaan lepra tiʼ. Le chan chʼúupalaʼ tu yaʼalaj tiʼ u xunáanil: «Wa ka xiʼik in tsʼuulil u yil le [profeta] yaan tu kaajil Samariaoʼ, jeʼel u yutschajal tiʼ le [lepraoʼ]». Le chan chʼúupalaʼ tu yilaj u kʼaʼananil u tsʼáaik ojéelbil Jéeobaeʼ letiʼe jaajil Diosoʼ. Le oʼolal ka tsʼoʼokeʼ Naamaneʼ joʼopʼ u adorartik Jéeoba (2 Rey. 5:3, 17).

Jeʼex le chan chʼúupal israelitaaʼ, Susanaeʼ tu yilaj u kʼaʼananil u tsʼáaik ojéelbil Jéeobaeʼ letiʼe jaajil Diosoʼ yéetel tu tsolaj xan máaxoʼob meyajtik. Le ka tu chʼaʼatuklaj u núukik le kʼáatchiʼob beetaʼabtiʼ yoʼolal baʼax ku creertikoʼ, Susanaeʼ tu beetaj le baʼax ku yaʼalik le Bibliaaʼ: «Tsikilteʼex Cristo jeʼel bix Yuumtsil ta puksiʼikʼaleʼexeʼ. Mantatsʼ [a nuʼukmabaʼex] utiaʼal a núukikeʼex tiʼ tuláakal ka u kʼáatoʼob a chiʼex tu yoʼolal le alab óolal yaan tiʼ teʼexoʼ, baʼaleʼ beeteʼex yéetel kabal óolal bey xan yéetel tsiikil» (1 Ped. 3:15). Techeʼ ¿jeʼel wa u páajtal a núukik le kʼáatchiʼob ku beetaʼal yoʼolal baʼax ka creertikoʼ, yéetel yaan wa a núukikoʼob ken beetaʼaktech?

[U tsolajil le oochel teʼ táan juʼun 17]

Le jóoʼsaʼaniloʼobaʼ jeʼel u yáantkechoʼob a núuk le kʼáatchiʼoboʼ

[U tsolajil le oochel teʼ táan juʼun 17]

LOS TESTIGOS DE JEHOVÁ

¿quiénes son y qué creen?

[U tsolajil le oochel teʼ táan juʼun 17]

LA NEGATIVA A LA SANGRE

La medicina

acepta el reto