Kʼáatchiʼob ku beetaʼal

Le ka tu yaʼalaj apóstol Pablo yaan u salvartaʼal tuláakal u kajnáaliloʼob Israeleʼ (Romailoʼob 11:26), ¿tu yóotaj wa u yaʼal yaan u beetkuba cristianoi tuláakal le judíoʼoboʼ?

Maʼ le tu yóotaj u yaʼal Pabloiʼ. Tuláakal u kajnáaliloʼob Israel taaloʼob tiʼ u chʼiʼibal Abrahameʼ maʼ tu kʼamoʼob Jesús bey le Mesíasoʼ. Yéetel le baʼaxoʼob tu beetoʼob ka tsʼoʼok u kíimil Jesuseʼ, tu yeʼesaj maʼ tuláakloʼob ken u beetubaʼob cristianoʼobiʼ. Kex beyoʼ Pabloeʼ tu yaʼalaj yaan u salvartaʼal tuláakal u kajnáaliloʼob Israel. ¿Baʼax u kʼáat u yaʼal lelaʼ?

Jesuseʼ tu yaʼalaj tiʼ u nojchil le judíoʼoboʼ: «Bíin u kaʼaj lukʼesbil tiʼ teʼex u [reino] Jajal Dios utiaʼal ka tsʼaʼabak tiʼ le máakoʼob jeʼel u kʼubikoʼob le u yich ku tiaʼalintik le [reinooʼ]» (Mat. 21:43). Tumen u kajnáaliloʼob Israel maʼ tu kʼamoʼob Jesuseʼ, Jéeobaeʼ tu yéeyaj uláakʼ kaaj. Pabloeʼ tu yaʼaleʼ le kaajaʼ tu kʼaabaʼintaj «u Israel Jajal Dios» (Gál. 6:16, LTN).

Uláakʼ tekstoʼob tiʼ le Kiliʼich Tsʼíiboʼob ich Griegooʼ, ku yaʼalikoʼobeʼ ichil «u Israel Jajal Dios[eʼ]» táakaʼan 144,000 máakoʼob yéeyanoʼob tumen kiliʼich muukʼ (Rom. 8:15-17; Apo. 7:4). Jeʼex u yaʼalik Apocalipsis 5:9, 10, ichil le kaajaʼ táakaʼan tak máaxoʼob maʼ judíoʼobiʼ. Ku yaʼalik xaneʼ le máaxoʼob yanoʼob ichil u Israel Diosoʼ ku taaloʼob «tiʼ tuláakal [chʼiʼibal], [...] tʼaanoʼob, bey xan u múuchʼul [kaajoʼob]» yéetel yéeyaʼanoʼob utiaʼal u meyajoʼob bey reyoʼob yéetel sacerdoteʼob utiaʼal gobernaroʼob yóokʼol le Luʼumaʼ. Baʼaleʼ kex tumen xuʼul u kʼamaʼal u kaajil Israel tumen Dioseʼ, jujuntúul tiʼ letiʼobeʼ jeʼel u páajtal kaʼach u kaʼa natsʼkubaʼob tiʼ Jéeobaeʼ. Bey úuchik yéetel le apostoloʼob bey xan yéetel yaʼab tiʼ le judíoʼob kʼuch u beetubaʼob cristianoʼoboʼ. Baʼaleʼ le judíoʼobaʼ unaj xan kaʼach u maʼanloʼob yéetel u kʼiʼikʼel Cristo (1 Tim. 2:5, 6; Heb. 2:9; 1 Ped. 1:17-19).

Kex tumen óoliʼ tuláakal le judíoʼob tu peʼertoʼob u jatsʼuts páajtalil u gobernaroʼob yéetel Cristo teʼ kaʼanoʼ béeychaj le baʼax u tukulmaj Jéeobaoʼ, tumen letiʼeʼ ku yaʼalik: «Bey xan le tʼaan ku jóokʼol tin chiʼoʼ, maʼ bíin kaʼa suunak tin wiknal wa maʼ u beet u meyajiʼ, baʼaleʼ bíin u beet baʼax in [kʼáat], bíin xan u tsʼoʼokbes baʼax kin waʼalik» (Isa. 55:11).

Lelaʼ bey tsʼoʼok u yúuchloʼ, Dioseʼ tsʼoʼok u yéeyik 144,000 wíinkoʼob utiaʼal u gobernaroʼob yéetel Cristo teʼ kaʼanoʼ. Le Bibliaoʼ ku yaʼalik jach yaan u chúukpajal tuláakal le yéeyanoʼoboʼ; mix utúul ken u bineltiʼ (Apo. 14:1-5).

Le oʼolal ka tu yaʼalaj Pablo yaan u salvartaʼal tuláakal u kajnáaliloʼob Israeleʼ, maʼ táan u yaʼalik wa yaan u beetkuba cristianoi tuláakal le judíoʼoboʼ. Baʼaxeʼ, tu yóotaj u yaʼaleʼ Jéeoba yaan u yéeyik 144,000 máakoʼob utiaʼal u gobernaroʼob yéetel Jesucristo teʼ kaʼanoʼ. Le ken kʼuchuk u kʼiinileʼ, Jéeobaeʼ yaan u salvartik «tuláakal Israel», wa tuláakal le máaxoʼob yanoʼob ichil utiaʼal ka gobernarnakoʼob bey reyoʼob yéetel sacerdoteʼob tu Reino Diosoʼ (Efe. 2:8).

[U tsolajil le oochel teʼ táan juʼun 28]

Le yéeyaʼanoʼoboʼ ku taaloʼob «tiʼ tuláakal [chʼiʼibal], [...] tʼaanoʼob, bey xan u múuchʼul [kaajoʼob]»