Maʼ u xuʼulul k-yaabiltik jéeoba jeʼex tu káajbaleʼ
Maʼ u xuʼulul k-yaabiltik jéeoba jeʼex tu káajbaleʼ
«Maʼ u xuʼulul a kanáantik le baʼax yantechoʼ.» (REV. 3:11, NM.)
1, 2. ¿Bix ta wuʼuyilaba le ka ta tsʼáaj cuenta jach jaaj le baʼax ku kaʼansaʼaltech yoʼolal Jéeobaoʼ?
¿KʼAJAʼAN wa tech le ka yáax tsikbaltaʼabtech baʼax u tukulmaj u beetik Dios yoʼolal le máaxoʼob beetik baʼax u kʼáatoʼ? Wa tiʼ uláakʼ religión yanech kaʼacheʼ, ¿bix ta wuʼuyilaba le ka eʼesaʼabtech yéetel le Biblia baʼax ken u beet Diosoʼ, wa le ka tsolaʼabtech le kaʼansajoʼob maʼ ta jach naʼatikoʼ? Maʼ xaaneʼ ta tsʼáaj cuenta tusaʼanech kaʼach. Baʼaleʼ ¿máasaʼ jach kiʼimakchaj a wóol tumen ta kʼaj óoltaj u jaajil? Wa desde ta chichnil kaʼansaʼabtech u jaajileʼ, ¿kʼajaʼan wa tech bix ta wuʼuyilaba le ka ta tsʼáaj cuenta jach jaaj le baʼax ku kaʼansaʼaltech yoʼolal Jéeoba yéetel ta chʼaʼatuklaj a beetik baʼax u kʼáatoʼ? (Rom. 12:2.)
2 Yaʼab tiʼ le sukuʼunoʼoboʼ maʼ xaaneʼ yaan u yaʼalikoʼobtech jach naatsʼ yanikoʼob tiʼ Jéeoba yéetel jach kiʼimak u yóoloʼob tumen letiʼ natsʼoʼob ichil u kaajal (Juan 6:44). U kiʼimak óolaloʼobeʼ le péekskoʼob u kʼaʼaytoʼob tiʼ tuláakal máak le maʼalob baʼaloʼob tsʼoʼok u kankoʼoboʼ. ¿Bey wa xan úuchik ta wéeteloʼ?
3. ¿Baʼax táan kaʼach u yúuchul tu múuchʼulil Éfeso le ka túuxtaʼab tʼaan tiʼob tumen Jesusoʼ?
3 Ichil le baʼax tu túuxtaj aʼalbil tiʼ u múuchʼulil Éfeso teʼ yáax siglooʼ, Jesuseʼ tu yaʼaleʼ yaan baʼaloʼob maʼalobtak táan u beetikoʼob, baʼaleʼ tu yaʼalajtiʼobeʼ táan u bin u xuʼulul u yaabiltkoʼob Dios. Tu yaʼalajtiʼob: «Teneʼ in wojel tuláakal baʼax ka beetik, in kʼaj óol a talam meyaj bey xan a chúukaʼan óolal, in wojel maʼ táan u páajtal a mukʼyajtik le kʼaakʼas máakoʼoboʼ. In wojel bix úuchik a túuntik u yóol le máaxoʼob ku yaʼalikubaʼob apostoloʼoboʼ, yéetel tsʼoʼok in wilik maʼ letiʼobiʼ baʼaleʼ chéen táan u tuusoʼob. Chúukpaj a wóol, mukʼyajnajech yéetel meyajnajech yaʼab tin woʼolal, mix juntéen lúub a wóol. Baʼaleʼ yanten jumpʼéel tak pool ta woʼolal: minaʼantech le yaakunaj yanji tech tu yáax chuuneʼ» (Apo. 2:2-4).
4. ¿Baʼaxten jach maʼalob ka k-chʼaʼa en cuenta le baʼax tu yaʼalaj Jesús tiʼ le efesoiloʼoboʼ?
4 Tu libroi Apocalipsiseʼ yaan tsolnuʼukoʼob tu tsʼáaj Jesús tiʼe múuchʼulilaʼ yéetel tiʼ uláakʼ múuchʼuliloʼob teʼ yáax siglooʼ. Le tsolnuʼukoʼobaʼ meyajnaj xan tiʼ le sukuʼunoʼob yéeyaʼanoʼob utiaʼal ka páajchajak u aktáantkoʼob le talamiloʼob káaj tu jaʼabil 1914 (Apo. 1:10). Baʼaleʼ maʼ xaaneʼ tak bejlaʼa yaan máaxoʼob ku pʼatkoʼob le yaabilaj anchajtiʼob tu káajbal yoʼolal Jéeoba yéetel yoʼolal le jaajiloʼ. Le oʼolaleʼ,¿baʼax jeʼel k-beetik utiaʼal u kaʼa muʼukʼantal k-yaabilaj tiʼ Dios yéetel k-tsʼáaik óol meyajt jeʼex tu káajbaleʼ? Letiʼe k-kʼaʼajsik yéetel k-tuukul tiʼ le baʼaloʼob uchaʼantoʼon jeʼex ken k-il teʼ xookaʼ.
¿Baʼax beet a tsʼáaik cuenta le baʼax ta kanoʼ letiʼe u jaajiloʼ?
5, 6. 1) ¿Baʼax unaj k-jach ojéeltik cada utúul tiʼ toʼon? 2) ¿Baʼax beet a tsʼáaik cuenta le baʼax ku kaʼansik u j-jaajkunajoʼob Jéeobaoʼ letiʼe u jaajiloʼ? 3) ¿Baʼax jeʼel u yáantik máak utiaʼal u kaʼa muʼukʼantal u yaabilaj tiʼ Dioseʼ?
5 Táanil tiʼ u kʼubik u kuxtal máak tiʼ Jéeobaeʼ, unaj u jach ojéeltik «máakalmáak u yóolal Jajal Dios», «le baʼax maʼaloboʼ, baʼax utstutʼaanoʼ yéetel baʼax jach tubeel» (Rom. 12:1, 2). Lelaʼ u kʼáat xan u yaʼaleʼ kʼaʼabéet k-kanik le baʼaxoʼob ku yaʼalik le Bibliaoʼ. Maʼ xaaneʼ maʼ upʼéeliliʼ baʼax beetik u tsʼáaik cuenta máak, le baʼax ku kaʼansik u j-jaajkunajoʼob Jéeobaoʼ letiʼe u jaajiloʼ. Yaneʼ maʼ xaaneʼ letiʼe u xokik teʼ Biblia bix u kʼaabaʼ Diosoʼ wa u yojéeltik jach baʼax ku yúuchul yéetel le kimenoʼoboʼ (Sal. 83:18; Ecl. 9:5, 10). Uláakʼoʼobeʼ letiʼe u yilikoʼob le yaabilaj yaan ichil le máaxoʼob meyajtik Diosoʼ (Juan 13:34, 35). Yéetel uláakʼoʼob xaneʼ letiʼe u yilkoʼob maʼatech u yokskubaʼob tiʼ política mix tiʼ baʼateloʼob le máaxoʼob meyajtik Diosoʼ (Isa. 2:4; Juan 6:15; 17:14-16).
6 Yoʼolal lelaʼ bey xan yoʼolal uláakʼ baʼaxoʼobeʼ yaʼab máakoʼobeʼ káaj u yaabiltkoʼob Dios. Jóoʼs u súutukil utiaʼal a kʼaʼajsik baʼax beet a tsʼáaik cuenta le baʼax ta kanoʼ letiʼe u jaajiloʼ. Le baʼax beet a yaabiltik Jéeoba yéetel a kʼubik a wóol tiʼ le baʼaxoʼob u yaʼalmoʼ maʼ xaaneʼ maʼ letiʼe baʼax péeks uláakʼ sukuʼunoʼoboʼ, tumen cada máakeʼ yaanal bix líiʼsaʼanil yéetel yaanal bix u modos. Tsʼoʼoleʼ maʼ xaaneʼ láayliʼ nojoch baʼal a wilik le baʼax péeksech a yaabilt Jéeobaoʼ tumen le baʼax ta kanoʼ maʼatech u kʼexpajal. Le oʼolaleʼ kʼaʼajs baʼax péeksech yéetel bix ta wuʼuyilaba, tumen leloʼ yaan u yáantkech utiaʼal u kaʼa muʼukʼantal a yaabilaj tiʼ Dios (xokaʼak Salmo 119:151, 152; 143:5).
Unaj k-beetik u kaʼa muʼukʼantal k-yaabilaj tiʼ Dios jeʼex tu káajbaleʼ
7. ¿Baʼaxten kʼaʼabéet k-kaʼa muʼukʼankúunsik k-yaabilaj tiʼ le baʼax t-kanoʼ, yéetel bix jeʼel k-beetkeʼ?
7 Maʼ xaaneʼ tsʼoʼok u sen jelpajal bix a kuxtal desde ka okjaʼanajech. Le oʼolaleʼ kex tumen tu káajbal jach ta yaabiltaj le baʼax ta kanaj tiʼ Diosoʼ, kʼaʼabéetchaj a maas muʼukʼankúuntik utiaʼal u béeytal a aktáantik le túuntajoʼoboʼ. Yéetel tuláakloʼob ta aktáantoʼob yéetel u yáantaj Jéeoba (1 Cor. 10:13). Le oʼolal tuláakal le baʼaxoʼob ta kanaj yoʼolal le talamiloʼobaʼ jach nojoch baʼal a wilkoʼob. ¿Baʼaxten? Tumen tsʼoʼok u yáantkechoʼob a muʼukʼankúuns a yaabilaj tiʼ Dios jeʼex tu káajbaloʼ yéetel tsʼoʼok xan u yáantkechoʼob a kan baʼax utstutʼaan yéetel baʼax u kʼáat Dios ka a beete (Jos. 23:14; Sal. 34:8).
8. ¿Baʼax tu yaʼalaj Jéeoba tiʼ Moisés, yéetel le israelitaʼoboʼ bix úuchik u maas kʼaj óoltkoʼob?
8 Utiaʼal k-ketikeʼ, tuukulnakoʼon tiʼ le ka tu yaʼalaj Jéeoba yaan u jóoʼsik le israelitaʼob tiʼ Egipto tuʼux palitsiltaʼanoʼob kaʼachoʼ. Letiʼeʼ tu yaʼalaj tiʼ Moisés: «Teneʼ yaan in kʼuchul in beetimba le baʼax kʼaʼabéet in kʼuchul in beetimbaeʼ» (Éxo. 3:7, 8, 13, 14, NM). Jéeobaeʼ táan kaʼach u yaʼalik yaan u beetik jeʼel baʼalak kʼaʼabéet utiaʼal u jáalkʼabtik u kaajaleʼ. Tuláakal le baʼaxoʼob tu beetoʼ tu yeʼesaj tiʼ le israelitaʼob Jéeobaeʼ jach yaan u páajtalil, utúul Máax ku nuʼuktaj, ku tsʼáaik salvación, ku baʼatel yoʼolal u kaajal yéetel ku tsʼáaik baʼax kʼaʼabéettiʼ (Éxo. 12:12; 13:21; 14:24-31; 16:4; Neh. 9:9-15).
9, 10. ¿Baʼaxoʼob jeʼel u yáantik máak u maas kʼaj óolt Dioseʼ, yéetel baʼaxten kʼaʼabéet u kʼaʼajsaʼaloʼob?
9 U jaajileʼ techeʼ yaanal baʼax táan a aktáantik. Baʼaleʼ maʼ xaaneʼ le baʼaxoʼob ta aktáantoʼ tsʼoʼok u yeʼeskoʼobtech Jéeobaeʼ jach u yaabiltmech yéetel tu muʼukʼankúunsaj xan a fe. Maʼ xaaneʼ Jéeobaeʼ tu tsʼáaj baʼax kʼaʼabéettech, tu líiʼsaj a wóol yéetel tu kaʼansech (xokaʼak Isaías 30:20, 21). Maʼ xaan xaneʼ ta tsʼáaj cuenta bix úuchik u núukaʼal upʼéel a payalchiʼ. Tsʼoʼoleʼ maʼ xaaneʼ tsʼoʼok a wáantaʼal tumen utúul sukuʼun tiʼ upʼéel talamil ta aktáantaj, wa ichil a xookeʼ ta wilaj upʼéel teksto jach tsʼoʼok u yáantkech a aktáant le talamiloʼ.
10 Wa ka a tsikbalt baʼaxoʼob tsʼoʼok a aktáantikeʼ, maʼ xaaneʼ yaan máax maʼ ken u yil jeʼex ta wililoʼ tumen maʼ upʼéel milagro le baʼax úuchtechoʼ. Baʼaleʼ techeʼ nojoch baʼaloʼob a wilik, tumen ku kʼaʼajskoʼobtech Jéeoba tsʼáatech le baʼax jach kʼaʼabéetchajoʼ. Tuukulnen tiʼ le jaʼaboʼob tsʼoʼok a máansik ichil u kaajal Diosoʼ. ¿Kʼajaʼan wa tech bix tsʼoʼok u sen kanáantkech Jéeoba? Wa beyoʼ, máans ta tuukul bix úuchik u beetik yéetel kʼaʼajs bix ta wuʼuyilaba. Beyoʼ yaan a kaʼa a yaabiltik Jéeoba jeʼex tu káajbaleʼ. Unaj a wilik nojoch baʼaloʼob yéetel unaj a tuukul tiʼ le baʼaxoʼob uchaʼantechoʼ, tumen yaan u yáantkechoʼob a tsʼáa cuenta jach u yaabiltmech Jéeoba. Yéetel mix máak jeʼel u beetik u xuʼulul a creertik lelaʼ.
Unaj k-ilik wa táan k-kuxtal jeʼex u kʼáat Dioseʼ
11, 12. Wa yaan máax táan u xuʼulul u yaabiltik Dioseʼ, maʼ xaaneʼ ¿baʼax oʼolal, yéetel baʼax tu yaʼalaj Jesús ka beetaʼak?
11 Wa táan u xuʼulul a yaabiltik Dios bey xan le baʼaxoʼob tsʼoʼok a kanikoʼ, lelaʼ maʼ táan u yúuchul tumen tsʼoʼok u jelpajal bix letiʼiʼ. Jéeobaeʼ maʼatech u kʼexpajal (Mal. 3:6; Sant. 1:17). Letiʼeʼ láayliʼ u kʼáat u yáantech jeʼex tu káajbaleʼ. Baʼaleʼ ¿baʼax beetik maʼ a yaabiltik jeʼex kaʼacheʼ? Maʼ xaaneʼ le talamiloʼob yéetel le chiʼichnakiloʼob ka aktáantikoʼ tsʼoʼok u beetik u xuʼulul a jach payalchiʼ tiʼ Dios, a xokik le Bibliaoʼ yéetel a tuukul tiʼ le baʼax ka xokikoʼ. Maʼ xaan xaneʼ tsʼoʼok u pʼáatal maʼatech a jóokʼol kʼaʼaytaj mix tech a bin tiʼ tuláakal le muchʼtáambaloʼoboʼ (2 Cor. 13:5).
12 Maʼ xaaneʼ maʼ letiʼe baʼaxoʼob táan a yúuchultechaʼ, baʼaleʼ wa letiʼeʼ, ¿baʼax beet u yúuchultech? Maʼ xaaneʼ tumen kʼojaʼanech wa tumen unaj a tsʼáaik baʼax kʼaʼabéet tiʼ a familiaeʼ, le oʼolal tsʼoʼok u pʼáatal maʼ ta jach tsʼáaik a wóol a meyajt Dios teʼ tsʼook kʼiinoʼobaʼ. Jesuseʼ tu yaʼalaj tiʼ u apostoloʼob: «Kanáantabaʼex, maʼ a chaʼik u chichtal a puksiʼikʼaleʼex tu yoʼolal kʼaakʼas kuxtal, káaltal yéetel u táan óolal u baʼaluba le kuxtalaʼ, utiaʼal maʼ u taasik [jakʼ] óolal tiʼ teʼex le kʼiinoʼ. Bey jumpʼéel léech ku kʼaʼalaleʼ, tumen bey bíin taalak le kʼiinoʼ tu yóokʼol tuláakal u kajnáaliloʼob yóokʼol kaab. Pʼil a wicheʼex túun yéetel payalchiʼineneʼex mantatsʼ utiaʼal ka páatak a tokikabaʼex tiʼ tuláakal baʼal kun úuchlaʼ» (Luc. 21:34-36).
13. ¿Baʼax yéetel tu ketaj Santiago u Tʼaan Dios?
13 Utiaʼal u líiʼsik u yóol u sukuʼunoʼob u yiloʼob wa táan u kuxtaloʼob jeʼex u kʼáat Dioseʼ, Santiagoeʼ tu yaʼalajtiʼob: «Beeteʼex le baʼax ku kaʼansikteʼex le tʼaanoʼ maʼ chéen ka wuʼuyeʼexiʼ, tumen wa maʼ táan a beetikeʼexeʼ táan a tusikabaʼex. Le máax chéen ku yuʼubik le tʼaanoʼ baʼaleʼ maʼ táan u tsʼoʼokbesikeʼ, bey jeʼel bix juntúul máak ku paktik u yich tiʼ jumpʼéel néeneʼ. Ku néentikuba baʼaleʼ le ken xiʼikeʼ tu séeblakil ku tuʼubul tiʼ bix yanil u yich. Baʼaleʼ le máax maʼ [tu] tuʼubul tiʼ baʼax ku yuʼubikeʼ, yéetel ku yilik maʼalob le utsil chúukaʼan aʼalmajtʼaanoʼ u kʼáat u yaʼaleʼ, le aʼalmajtʼaan ku tsʼáaiktoʼon jáalkʼabiloʼ yéetel ku pʼáatal jeetsʼel u yanil tiʼeʼ táan u beetik le baʼax ku yaʼalaʼaltiʼ tumen le aʼalmajtʼaanoʼ, bíin kiʼimakchajak u yóol tiʼ baʼax ku beetik» (Sant. 1:22-25).
14, 15. 1) ¿Bix jeʼel u yáantkoʼon le Biblia utiaʼal u maas muʼukʼantal k-fejoʼ? 2) ¿Tiʼ baʼaxoʼob unaj k-tuukul?
14 Utúul máakeʼ ku meyajtiʼ upʼéel néen utiaʼal u yilik wa maʼalob yanil. Wa ku yilik maʼ maʼalob yanil u nookʼeʼ jeʼel u yutskíintkeʼ, yéetel wa utúul koʼolel ku yilik kʼaʼabéet u maas xáacheʼtikubaeʼ, ku yilik u beetik. Jeʼex upʼéel néeneʼ, le Bibliaoʼ ku yáantkoʼon xan k-il wa jach tu jaajil táan k-kuxtal jeʼex u kʼáat Dioseʼ. Ken k-il baʼaxoʼob ku yaʼalik yéetel baʼaxoʼob k-beetikeʼ, táan u meyajtoʼon bey upʼéel néeneʼ. Baʼaleʼ chéen kunel k-ilikba teʼ néen wa maʼ t-utskíintik le baʼax maʼ maʼalob k-beetkoʼ. Baʼax unaj k-beetkeʼ letiʼe k-kuxtal jeʼex u yaʼalik u «aʼalmajtʼaan» Diosoʼ. Wa k-ilik táan u xuʼulul k-yaabiltik Jéeoba jeʼex tu káajbal bey xan le baʼaxoʼob t-kanoʼ, maʼalob ka k-tukult lelaʼ: «¿Baʼax talamiloʼob táan in máansik, yéetel baʼax táan in beetik utiaʼal in aktáantkoʼob? ¿Baʼax kin beetik kaʼach? ¿Baʼaxten maʼ táan in beetik jeʼex kaʼacheʼ?». Wa k-tsʼáaik cuenta yaan baʼax kʼaʼabéet k-utskíintikeʼ, unaj k-ilik beetik tu séebaʼanil (Heb. 12:12, 13).
15 K-ilik wa táan k-kuxtal jeʼex u kʼáat Dioseʼ yaan xan u yáantkoʼon k-beet baʼax kʼaʼabéet utiaʼal u maas muʼukʼantal k-fe. Utiaʼal u yáantik Timoteo u maas maʼalobkíint bix u meyajtik Dioseʼ, apóstol Pabloeʼ tu yaʼalajtiʼ: «Tsʼáa tuláakal a wóol tiʼ le baʼaloʼobaʼ, utiaʼal ka páatak u yilaʼal tumen tuláakaleʼ bix a bin táanil». Yéetel u yáantaj le Bibliaoʼ toʼon xaneʼ unaj k-ilik wa yaan baʼax kʼaʼabéet k-utskíintik utiaʼal k-maas maʼalobkíintik bix k-meyajtik Dios (1 Tim. 4:15).
16. ¿Baʼax jeʼel u yúuchul ken k-il wa táan k-kuxtal jeʼex u kʼáat Dioseʼ?
16 Wa ka tsʼáaik a wóol a wil bix táan a kuxtaleʼ yaan a tsʼáaik cuenta yaan baʼax maʼ maʼalob táan a beetkiʼ, baʼaleʼ maʼ a chaʼik u lúubul a wóol. Maʼ u tuʼubultecheʼ táan a kaxtik baʼax maʼ maʼalob ka beetik utiaʼal ka wutskíinte. Satanaseʼ u kʼáat ka a tukult mix bikʼin ken a wutskíint le baʼax ka beetkoʼ. Úuchileʼ yanchaj máax aʼal maʼatech u chʼaʼik en cuenta Dios le baʼaxoʼob k-beetik utiaʼal k-meyajtikoʼ (Job 15:15, 16; 22:3). Baʼaleʼ leloʼ maʼ jaajiʼ yéetel Jesuseʼ bey tu yeʼesiloʼ. Dioseʼ jach yaʼab u tojol u yilik le máaxoʼob meyajtikoʼ (xokaʼak Mateo 10:29-31). K-ojéeltik kʼeban wíinikoʼoneʼ unaj u péekskoʼon k-kaxt u yáantaj Jéeoba utiaʼal k-maas tsʼáaik k-óol meyajte (2 Cor. 12:7-10). Wa tsʼoʼok u pʼáatal maʼ táan a jach meyajtik Dios tumen tsʼoʼok u chan yantal a jaʼabil wa kʼojaʼanecheʼ, ilawil a beetik le ku páajtaleʼ, baʼaleʼ maʼ u xuʼulul a yaabiltik Dios.
Jach yaan baʼax oʼolal unaj k-tsʼáaik nib óolal
17, 18. ¿Baʼax utsiloʼob ken u kʼam le máaxoʼob ken u tsʼáa u yóol u kaʼa yaabiltoʼob Dios jeʼex tu káajbaloʼ?
17 Wa maʼ tu xuʼulul a tsʼáaik a wóol a kaʼa yaabilt Dioseʼ, yaan a kʼamik yaʼab utsiloʼob. Yaan a maas kʼaj óoltik Jéeoba yéetel yaan a tsʼáaik u nib óolalil tiʼ yoʼolal u nuʼuktajoʼ (xokaʼak Proverbios 2:1-9; 3:5, 6). U libroi Salmoseʼ ku yaʼalikeʼ tuláakal le máaxoʼob ku beetkoʼob baʼax ku yaʼalik Jéeobaeʼ yaan u kʼamikoʼob upʼéel «nojoch boʼolil», yéetel ku yaʼalik xaneʼ «u tusbejtʼaan Yuumtsileʼ jach maʼalob, tumen ku beetik u yantal naʼat tiʼ le máax óotsil u naʼat[oʼ]». Tsʼoʼoleʼ ku yaʼalik xan: «Kiʼ yóoloʼob le máaxoʼob ku yutsil kuxtaloʼoboʼ yéetel ku xíimbaloʼob jeʼel bix u kaʼansaj Yuumtsil» Jéeobaoʼ (Sal. 19:7, 11; 119:1).
18 ¿Máasaʼ jach yaan baʼax oʼolal unaj k-tsʼáaik u nib óolalil tiʼ Jéeoba? Upʼéel baʼax oʼolaleʼ tumen k-ojel baʼaxten sen yaan talamiloʼob bejlaʼeʼ yéetel Jéeobaeʼ ku kanáantkoʼon utiaʼal maʼ k-náachtal tiʼ. Tsʼoʼoleʼ letiʼeʼ tsʼoʼok u natsʼkoʼon tiʼ u kaajal yéetel u tsʼaamajtoʼon u jatsʼuts páajtalil k-beetikba u J-jaajkunajoʼob. Tuukulnen tiʼ tuláakal le utsiloʼob tsʼoʼok a kʼamikoʼ, wa ka beetkeʼ yaan a wilik jach yaʼaboʼob. Wa mantatsʼ tuukul tiʼobeʼ yaan a wilik a tsʼoʼokbesik le baʼax ku yaʼalik le Bibliaaʼ: «Maʼ u xuʼulul a kanáantik le baʼax yantechoʼ» (Rev. 3:11, NM).
19. ¿Baʼax uláakʼ kʼaʼabéet a beetik utiaʼal u muʼukʼantal a fe?
19 A tuukul tiʼ bix tsʼoʼok u muʼukʼantal a fe ichil le jaʼaboʼob tsʼoʼok u máanoʼoboʼ jach jeʼel u yáantkech utiaʼal «maʼ u xuʼulul a kanáantik le baʼax yantechoʼ». Baʼaleʼ yaan uláakʼ baʼax unaj a beetik. Le revistaaʼ yaʼab utéenel tsʼoʼok u yaʼalik kʼaʼabéet xan u payalchiʼ máak, u tsʼáaik u yóol u kʼaʼayt le maʼalob péektsiloʼ, u bin teʼ muchʼtáambaloʼoboʼ yéetel u táakpajliʼ. Wa ka beetik tuláakal lelaʼ, yaan u béeytal a kaʼa muʼukʼankúuntik a yaabilaj tiʼ Jéeoba jeʼex tu káajbaleʼ (Efe. 5:10; 1 Ped. 3:15; Jud. 20, 21).
¿Baʼax jeʼel a núukikeʼ?
• ¿Baʼax utsiloʼob ken k-kʼam wa k-tuklik baʼaxten unaj k-yaabiltik Jéeoba?
• ¿Baʼax ken k-tsʼáa cuenta wa k-tuukul tiʼ le baʼaxoʼob uchaʼantoʼon ichil k-kuxtaloʼ?
• ¿Baʼax ken k-tsʼáa cuenta wa k-tuukul tiʼ bix táan k-yaabiltik Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
¿Baʼax beet a tsʼáaik cuenta le baʼax ta kanoʼ letiʼe u jaajiloʼ?
[U tsolajil le oochel teʼ táan juʼun 25]
¿Yaan wa baʼax ka wilik kʼaʼabéet a wutskíintik?