¿Tiʼ baʼaxoʼob unaj k-púutsʼul?
¿Tiʼ baʼaxoʼob unaj k-púutsʼul?
«¡U chʼiʼibaleʼex kaanoʼob! ¿Máax aʼal tiʼ teʼex ka púutsʼukeʼex tiʼ le nojoch jaatsʼ ku náatsʼaloʼ?» (MAT. 3:7.)
1. ¿Máaxoʼob ku yaʼalik le Biblia kʼaʼabéetchaj u púutsʼloʼoboʼ?
¿MÁAX ku taal ta tuukul ken a wuʼuy le tʼaan púutsʼuloʼ? Yaneʼ ku tuukul tiʼ José, le táankelem xiʼipal púutsʼ tiʼ u yatan Potifaroʼ (Gén. 39:7-12). Uláakʼoʼobeʼ ku tuukuloʼob tiʼ le cristianoʼob púutsʼoʼob tiʼ u kaajil Jerusalén tu jaʼabil 66 teʼ yáax siglo jeʼex aʼalabiktiʼob tumen Jesusaʼ: «Le ken a wileʼex bakʼpachtaʼan u kaajil Jerusalén tumen soldadoʼobeʼ, [...] le máaxoʼob yanoʼob Judeaoʼ púutsʼukoʼob teʼ puʼukoʼoboʼ, le yanoʼob ichil u kaajil Jerusalenoʼ jóokʼokoʼobiʼ» (Luc. 21:20, 21).
2, 3. 1) ¿Baʼax u kʼáat kaʼach u yaʼal Juan tiʼ u nuuktakil le judíoʼob yéetel le baʼax tu yaʼalajoʼ? 2) Jeʼex Juaneʼ, ¿baʼax xan tu yaʼalaj Jesús tiʼob?
2 Jeʼex José yéetel le cristianoʼob teʼ yáax siglooʼ, toʼoneʼ yaan xan tiʼ baʼaxoʼob kʼaʼabéet k-púutsʼul. Le ka bin ilbil tumen u nuuktakil le judíoʼoboʼ, Juan Bautistaeʼ tu yaʼalaj le tʼaan «púutsʼukeʼex» utiaʼal u yeʼesik yaan tiʼ baʼaxoʼob unaj u púutsʼul máakoʼ. Le máakoʼobaʼ ku tuklikoʼob kaʼach maʼalob u beetikoʼob tuláakal baʼal, le oʼolal maʼ kʼaʼabéet u arrepentiroʼobiʼ. Tsʼoʼoleʼ, tu mixbaʼalkúuntoʼob xan le máaxoʼob ku arrepentiroʼob utiaʼal ka tsʼaʼabak u yokjaʼob tumen Juanoʼ. Le oʼolal Juaneʼ tu yaʼalajtiʼob: «¡U chʼiʼibaleʼex kaanoʼob! ¿Máax aʼal tiʼ teʼex ka púutsʼukeʼex tiʼ le nojoch jaatsʼ ku náatsʼaloʼ? Beeteʼex baʼal tubeel utiaʼal ka ilaʼak tsʼoʼok a kʼexik a tuukuleʼex» (Mat. 3:7, 8).
3 Juaneʼ táan kaʼach u yaʼaliktiʼob jach tsʼoʼok u náatsʼal u kʼiinil le jaatsʼ wa u kʼiinil le xuʼulsajiloʼ, yéetel wa u kʼáatoʼob púutsʼul tiʼ le kʼiinaʼ kʼaʼabéet u yeʼeskoʼob tsʼoʼok u arrepentiroʼob. Ka máan kʼiineʼ, Jesuseʼ tu yaʼalaj xan tiʼob letiʼe Kʼaasilbaʼal u taataʼoboʼ, tumen bey tu yeʼesiloʼoboʼ (Juan 8:44). Jeʼex Juaneʼ, Jesuseʼ tu yaʼalajtiʼob u chʼiʼibaloʼob kaan, tsʼoʼoleʼ tu kʼáataj xan tiʼob bix kun púutsʼloʼob tiʼ u pʼis óolalil le Gehenaoʼ (Mat. 23:33, NM). Baʼaleʼ ¿tiʼ baʼax táan kaʼach u tʼaan Jesús le ka tu chʼaʼachiʼitaj le tʼaan Gehenaoʼ?
4. ¿Baʼax u kʼáat kaʼach u yaʼal Jesús le ka tu chʼaʼachiʼitaj le tʼaan Gehenaoʼ?
4 Le Gehenaoʼ, u kʼaabaʼ upʼéel kúuchil yaan tu paach u yúuchben kaajil Jerusalén tuʼux ku tóokaʼal u taʼ míis yéetel kimen baʼalcheʼob. Tiʼ Jesuseʼ meyajnaj le tʼaan Gehena utiaʼal u yeʼesik yaan máaxoʼob maʼ kun kaʼa kuxkíintbiloʼoboʼ. Le oʼolal le ka tu yaʼalaj tiʼ u nuuktakil le judíoʼob maʼ kun púutsʼloʼob tiʼ le Gehenaoʼ, Jesuseʼ táan kaʼach u yaʼaliktiʼob maʼ tu náajmatikoʼob u kaʼa kuxkíintaʼaloʼob (Mat. 5:22, 29).
5. ¿Bix béeychajik le baʼax tu yaʼalaj Juan yéetel Jesusoʼ?
5 Úuchik u chʼaʼapachtikoʼob Jesús yéetel u disipuloʼobeʼ, u nuuktakil le judíoʼoboʼ tu maas náajmatoʼob u xuʼulsaʼaloʼob. Jeʼex tu yaʼalil Juan yéetel Jesuseʼ, u kʼiinil le pʼiis óoloʼ kʼuchiʼ. Baʼaleʼ, chéen tu yóokʼol Jerusalén yéetel Judea le oʼolal jeʼel u páajtal kaʼach u púutsʼul le judíoʼoboʼ. Dioseʼ tu chíikbesaj u pʼujaʼanil le ka tu beetaj u xuʼulsaʼal tiʼ Jerusalén yéetel u templo tumen le romanoʼob tu jaʼabil 70 teʼ yáax siglooʼ. Lelaʼ letiʼe «táaj yaʼab mukʼyaj» tu aktáantaj Jerusalenoʼ, tumen yaʼab judíoʼob kíimsaʼaboʼobiʼ yéetel yaan xan palitsiltaʼaboʼobiʼ. Baʼaleʼ lelaʼ chéen tu chíikbesaj upʼéel maas nojoch xuʼulsajil kun taal yóokʼol le máaxoʼob chéen ku yaʼalikoʼob ku tsaypachtikoʼob Cristooʼ bey xan yóokʼol le uláakʼ religionoʼoboʼ (Mat. 24:21).
Jéeobaeʼ yaan u kaʼa eʼesik u pʼujaʼanil
6. ¿Baʼax káaj u yantal teʼ múuchʼulil teʼ yáax siglooʼ?
6 Teʼ yáax siglooʼ, jujuntúul cristianoʼobeʼ tu xúumpʼattoʼob le jaajiloʼ yéetel tu beetoʼob xan ka pʼataʼak tumen uláakʼoʼob (Hch. 20:29, 30). Le kuxaʼan kaʼach le apostoloʼoboʼ maʼ tu chaʼajoʼob u tuʼusul le sukuʼunoʼob tumen le máaxoʼob tu xúumpʼattoʼob u jaajiloʼ, baʼaleʼ ka kíimoʼobeʼ joʼopʼ u yantal yaʼab religionoʼob maʼatech u kaʼansikoʼob u jaajil. Bejlaʼeʼ, yaʼab religionoʼob ku yaʼalikoʼob ku tsaypachtikoʼob Cristoeʼ, maʼ upʼéeliliʼ baʼax ku kaʼansikoʼobiʼ. Le Bibliaoʼ u yaʼalmiliʼ yaan u yantal máakoʼob maʼ ken u kaʼansoʼob u jaajil yéetel ku kʼaabaʼintkoʼob «u máakil le kʼebanoʼ» bey xan «le máax xotʼkʼiintaʼan utiaʼal ka xuʼulsaʼakoʼ», yéetel «yuumtsil Jesuseʼ bíin u kíims [...] yéetel bíin u xuʼuls yéetel u sáasjomeʼenil u taalbal» (2 Tes. 2:3, 6-8).
7. ¿Baʼaxten ku yaʼalaʼal «u máakil le kʼeban» tiʼ u nuuktakiloʼob le religionoʼob ku yaʼalik ku tsaypachkoʼob Cristooʼ?
7 Ichil le kʼebanoʼob tsʼoʼok u beetik u nuuktakiloʼob le religionoʼob ku yaʼalik ku tsaypachkoʼob Cristooʼ, táakaʼan le kaʼansajoʼob, le kʼiimbesajiloʼob yéetel le u yaʼalikoʼob maʼ kʼaas ka beetaʼak jujumpʼéel baʼaloʼob ku bin tu contra le Bibliaoʼ. Jeʼex úuchik yéetel u nuuktakil le judíoʼoboʼ, bejlaʼeʼ le máaxoʼob táakaʼanoʼob xan ichil «le máax xotʼkʼiintaʼan utiaʼal ka xuʼulsaʼakoʼ» maʼ kun kaʼa kuxkíintbiloʼob (2 Tes. 1:6-9). ¿Baʼax kun úuchul tiʼ le máaxoʼob tsʼoʼok u tuʼusloʼob tumen tuláakal le religionoʼob minaʼan u jaajil tiʼoboʼ? Utiaʼal k-núukik le kʼáatchiʼaʼ, koʼox ilik baʼax úuch le ka tsʼoʼok u xuʼulsaʼal Jerusalén tu jaʼabil 607 táanil tiʼ k-kʼiinoʼobaʼ.
«¡Púutsʼeneʼex tiʼ Babilonia!»
8, 9. 1) ¿Baʼax tu yaʼalaj Jeremías tiʼ le judíoʼob yanoʼob kaʼach Babiloniaoʼ? 2) ¿Bix úuchik u púutsʼul le judíoʼob le ka xuʼulsaʼab tiʼ Babilonia tumen le medoʼob yéetel le persaʼoboʼ?
8 Le profeta Jeremíasoʼ tʼaanaj tiʼ le xuʼulsajil taal yóokʼol Jerusalén tu jaʼabil 607 táanil tiʼ k-kʼiinoʼoboʼ. Tu yaʼalaj yaan u bisaʼal palitsilbil le máaxoʼob meyajtik Jéeobaoʼ yéetel tu yaʼalaj xan yaan u kaʼa suutoʼob ken máanak «setenta jaʼaboʼob» (Jer. 29:4, 10). Le profetaoʼ unaj kaʼach u yaʼalik tiʼ le judíoʼob bisaʼanoʼob Babilonia maʼ u chaʼik u kʼaskúuntaʼal le adoración ku tsʼáaikoʼob tiʼ Diosoʼ. Beyoʼ yaan u páaʼtikoʼob u kʼuchul u kʼiinil u suutoʼob Jerusalén utiaʼal ka u chʼaʼajoʼoltoʼob u meyajkoʼob Jéeoba. Yéetel le kʼiinaʼ kʼuch le ka xuʼulsaʼab tiʼ Babilonia tumen le medoʼob yéetel le persaʼob tu jaʼabil 539 táanil tiʼ k-kʼiinoʼobaʼ. Le rey Ciro II tiʼ u luʼumil Persiaoʼ, tu yaʼalaj jeʼel u páajtal u kaʼa suut le judíoʼob Jerusalenoʼ yéetel u jel líiʼskoʼob le templooʼ (Esd. 1:1-4).
9 U milesi judíoʼob béeychaj u suutoʼob (Esd. 2:64-67). Lelaʼ tu yeʼesaj púutsʼoʼob tiʼ Babilonia jeʼex aʼalaʼabiktiʼob tumen Jeremíasoʼ (xokaʼak Jeremías 51:6, 45, 50). Kex tumen maʼ tuláakal le israelitaʼob béeychaj u suutoʼob Judá yéetel Jerusaleneʼ, le máaxoʼob pʼáatoʼob Babilonia jeʼex le profeta Daniel tsʼoʼok u yantal u jaʼabiloʼ, yaan xan u kʼamikoʼob kaʼach yaʼab utsiloʼob tiʼ Jéeoba. Baʼaleʼ kʼaʼabéet kaʼach u yáantajoʼob utiaʼal ka chʼaʼajoʼoltaʼak u meyajtaʼal Dios tu kaajil Jerusalén yéetel maʼ u yantal mix baʼal u yiloʼob yéetel u adoración le babilonioʼoboʼ.
10. ¿Baʼax pʼekbeʼen baʼaloʼob tsʼoʼok u beetik le nojoch Babiloniaoʼ?
10 Bejlaʼeʼ, u millonesi máakoʼob yanoʼob ichil le religionoʼob ku beetkoʼob le baʼaxoʼob ku beetaʼal kaʼach teʼ úuchben Babiloniaoʼ (Gén. 11:6-9). Le oʼolal tuláakal le religionoʼobaʼ ku kʼaabaʼintaʼaloʼob «le nojoch Babilonia, u maama tuláakal x-núupkʼebanoʼob yéetel tuláakal le baʼax pʼekbeʼen yóokʼol kaaboʼ» (Apo. 17:5). Tuláakal le religionoʼobaʼ úuch joʼopʼok u tsʼáaikubaʼob tu tséel le gobiernoʼoboʼ. Ichil le pʼekbeʼen baʼaloʼob tsʼoʼok u beetkoʼoboʼ táakaʼan le yaʼab baʼateloʼob tuʼux tsʼoʼok u kíimil u millonesi máakoʼoboʼ (Apo. 18:24). Táakaʼan xan le u violartaʼal paalaloʼob yéetel uláakʼ baʼaloʼob subtsiltak ku beetaʼal tumen le sacerdoteʼoboʼ yéetel maʼ tu yaʼalaʼaltiʼob mix baʼal tumen u nuuktakiloʼob. Le oʼolal maʼ kun xáantal ken u xuʼuls Jéeoba tiʼ le maʼ jaajil religionoʼobaʼ (Apo. 18:8).
11. Le maʼ xuʼulsaʼak tiʼ le nojoch Babiloniaoʼ, ¿baʼax unaj u beetik le máaxoʼob meyajtik Jéeobaoʼ?
11 Toʼon k-meyajtik Jéeobaeʼ kʼaʼabéet k-aʼalik tiʼ le máaxoʼob yanoʼob ichil le nojoch Babilonia baʼax ku taal u kʼiinil tiʼoʼ. Upʼéel bix k-beetikeʼ letiʼe ken k-pʼattiʼob le Biblia yéetel le jóoʼsaʼaniloʼob ku taal tiʼ «le palitsil chúukpajaʼan u yóol yéetel yaan u naʼat» tsʼaʼan tumen Jesús utiaʼal ka u tsʼáa le kaʼansaj ku keʼetel yéetel janal jach «tu yorailoʼ» (Mat. 24:45). Wa yaan máax u kʼáat maas kaambal tiʼ le Bibliaoʼ, k-ilik áantik utiaʼal ka u natsʼuba tiʼ Dios, yéetel ken máanak kʼiineʼ maʼ xaaneʼ jeʼel u yilik u kʼaʼabéetil u púutsʼul tiʼ Babilonia utiaʼal maʼ u xuʼulsaʼal paʼteʼ tu yéetel (Apo. 18:4).
Unaj k-púutsʼul tiʼ u adorartaʼal beetbil diosoʼob
12. ¿Bix u yilik Dios u adorartaʼal beetbil diosoʼob?
12 Uláakʼ pʼekbeʼen baʼal ku beetik le nojoch Babiloniaoʼ letiʼe u adorartik beetbil diosoʼoboʼ. Tiʼ le baʼaloʼobaʼ Jéeobaeʼ ku yaʼalik «pʼekbeʼen [diosoʼob] beetaʼanoʼob» wa «maʼ jaaj [diosoʼobiʼ]» (Deu. 29:17). Tuláakal máax u kʼáat lúubul utsil tiʼ Dioseʼ maʼ unaj u adorartik le diosoʼobaʼ, tumen letiʼeʼ ku yaʼalik: «Teen [Jéeoba], lelaʼ letiʼ in kʼaabaʼ, maʼ bíin in chaʼa u tsʼaʼabal in nojbeʼenil tiʼ u yaanaliʼ mix ka tsiʼikik beetbil [diosoʼob] ku jeelinten» (Isa. 42:8).
13. ¿Tiʼ baʼaxoʼob unaj k-púutsʼul ku keʼetel yéetel u adorartaʼal beetbil diosoʼob?
13 Le Bibliaoʼ ku yaʼalikeʼ u tsʼíiboltik máak upʼéel baʼax maʼ utiaʼaleʼ u kʼáat u yaʼal u adorartik beetbil diosoʼob (Col. 3:5, NM). Ku yaʼalik xaneʼ maʼ maʼalob ka tsʼíiboltaʼak baʼax utiaʼal yaanaliʼ (Éxo. 20:17). Le ángel kʼuch u beetuba Satanasoʼ maʼ xuʼul u tsʼíiboltik le adoración unaj u tsʼaʼabal chéen tiʼ Diosoʼ (Luc. 4:5-7). Lelaʼ le beet u tsʼáaikuba tu contra Jéeoba yéetel ka u táabs Eva utiaʼal ka u tsʼíibolt xan upʼéel baʼal maʼ utiaʼaliʼ. Le ka tu chʼaʼatuklaj xan u tsʼáaikuba tu contra Dios utiaʼal maʼ u pʼáatal tu juunal ken kíimik u yataneʼ, Adaneʼ kʼuch u beetuba bey utúul máak ku adorartik beetbil diosoʼobeʼ. Tuláakal le máaxoʼob u kʼáatoʼob púutsʼul tiʼ u kʼiinil le xuʼulsajiloʼ, unaj u adorarkoʼob chéen Jéeoba yéetel unaj u kanáantikoʼob maʼ tsʼíiboltikoʼob baʼax maʼ utiaʼaloʼobiʼ.
«Púutsʼeneʼex [...] tiʼ le núupkʼebanoʼ»
14-16. 1) ¿Baʼax tu yeʼesaj José unaj k-beetik? 2) ¿Baʼax unaj k-beetik wa ku yantaltoʼon u tsʼíibolalil k-núupkʼebantal? 3) ¿Bix jeʼel k-púutsʼul tiʼ le núupkʼebanoʼ?
14 Xokaʼak 1 Corintoiloʼob 6:18. Le ka aʼalaʼabtiʼ tumen u yatan Potifar ka núupchilak tu yéeteleʼ, Joseeʼ púutsʼi. ¿Máasaʼ bey xan unaj u beetik le máaxoʼob tsʼokaʼan u beeloʼob bey xan le maʼatechoʼ? U yojéeltik maʼ maʼalob u yilik Jéeoba le núupkʼebanoʼ, le áant José utiaʼal maʼ u lúubul teʼ táabsajiloʼ. Wa maʼ k-kʼáat lúubul tiʼ le núupkʼebanoʼ, unaj k-púutsʼul tiʼ tuláakal le baʼaxoʼob jeʼel u beetik k-tsʼíiboltik máax maʼ k-núupiʼ. Le Bibliaoʼ ku yaʼaliktoʼon: «Beeteʼex u kíimil tuláakal le luʼumkabil baʼaloʼob yaan tiʼ teʼexoʼ: Mix máak ka núupkʼebanchajak, mix ka u beet baʼaloʼob kʼaastak, mix ka xiʼik tu paach kʼaakʼas tuukuloʼob yéetel u kʼaakʼas tsʼíibolaloʼob, mix ka u tsʼíibolt taakʼin, tumen lelaʼ keet yéetel u [adorartaʼal] beetbil [diosoʼob]. Tu yoʼolal le baʼaloʼobaʼ ku taal u yaayaj jaatsʼ Jajal Dios tu yóokʼol le máaxoʼob maʼ táan u yuʼubikoʼob tʼaanoʼ» (Col. 3:5, 6).
15 Jeʼex k-ilkoʼ Pabloeʼ ku yaʼalik «ku taal u yaayaj jaatsʼ Jajal Dios» wa le xuʼulsajiloʼ. Bejlaʼeʼ, yaʼab máakoʼobeʼ ku tsʼíiboltikoʼob yéetel ku yilik u núupkʼebantaloʼob. Toʼoneʼ unaj k-kʼáatik u kiliʼich muukʼ Dios utiaʼal maʼ k-lúubul tiʼ le táabsajilaʼ. Tsʼoʼoleʼ mantatsʼ unaj k-xokik le Bibliaoʼ, k-bin teʼ muchʼtáambaloʼoboʼ yéetel k-kʼaʼaytik le maʼalob péektsil tiʼ u maasiloʼ, tumen beyoʼ yaan k-kuxtal «jeʼel bix ku yaʼalik le kiliʼich pixanoʼ» yéetel maʼ ken k-beet «le kʼaakʼas tsʼíibolaloʼob yaan tiʼ» toʼonoʼ (Gal. 5:16).
16 U jaajileʼ wa k-kʼáat kuxtal «jeʼel bix ku yaʼalik le kiliʼich pixanoʼ», maʼ unaj k-chaʼantik chaknuuliliʼ, mix k-xokik wa k-uʼuyik baʼaloʼob jeʼel u yajsiktoʼon kʼaakʼas tsʼíibolaloʼobeʼ. Tsʼoʼoleʼ, maʼ xan unaj k-báaxal tʼaan tiʼ le baʼaloʼobaʼ tumen utiaʼaloʼon Dios (Efe. 5:3, 4). Wa k-kanáantikba tiʼ le baʼaloʼobaʼ, yaan k-eʼesik tiʼ Jéeoba k-kʼáat púutsʼul tiʼ u kʼiinil u pʼujaʼanil yéetel k-kʼáat kuxtal teʼ túumben luʼumoʼ.
Unaj k-púutsʼul tiʼ «u yaakuntaʼal le taakʼinoʼ»
17, 18. ¿Baʼaxten unaj k-púutsʼul tiʼ u yaabiltaʼal le taakʼinoʼ?
17 Teʼ yáax carta tu tsʼíibtaj tiʼ Timoteooʼ, Pabloeʼ jach tʼaanaj tiʼ baʼax unaj u beetik le palitsiloʼob ku meyajtkoʼob Dios u kʼáatoʼob kaʼach u jóoʼsoʼob u yutsil tiʼ u tsʼuuliloʼob, máaxoʼob ku meyajtkoʼob xan Jéeobaoʼ. Maʼ xaaneʼ uláakʼoʼobeʼ ku aprovecharkubaʼob tiʼ u sukuʼunoʼob utiaʼal u ayikʼaltaloʼob. Pabloeʼ tu yaʼaleʼ u meyajtaʼal chéen Jéeobaeʼ maʼ «utiaʼal u náajaltaʼal taakʼin[iʼ]». Maʼ xaaneʼ le talamilaʼ anchaj ikil «u yaakuntaʼal le taakʼinoʼ», tumen leloʼ ku loobiltik le máaxoʼob ayikʼaloʼoboʼ bey xan le óotsiloʼoboʼ (1 Tim. 6:1, 2, 5, 9, 10).
18 ¿Kʼajaʼan wa tech máaxoʼob ku yaʼalik le Biblia xuʼul u bisikubaʼob yéetel Jéeoba yoʼolal u yaabilajoʼob tiʼ taakʼin wa yoʼolal le baʼaloʼob jeʼel u yantaltiʼoboʼ? (Jos. 7:11, 21; 2 Rey. 5:20, 25-27.) Pabloeʼ tu yaʼalaj tiʼ Timoteo: «Púutsʼen tiʼ tuláakal le baʼaloʼobaʼ. Xeen tu paach le toj kuxtaloʼ, le u meyajtaʼal chéen Diosoʼ, le fejoʼ, le yaabilajoʼ, le chúukaʼan óolaloʼ, le maʼ u séeb kʼuuxil máakoʼ» (1 Tim. 6:11, NM). Tuláakal le máax u kʼáat púutsʼul tiʼ u kʼiinil u pʼujaʼanil Jéeobaeʼ unaj u tsʼoʼokbesik le tsolnuʼukaʼ.
«Púutsʼen [...] tiʼ u kʼaakʼas tsʼíibolaloʼob le táankelemiloʼ»
19. ¿Baʼax kʼaʼabéet tiʼ tuláakal xiʼipal wa chʼúupal?
19 Xokaʼak Proverbios 22:15. Le maʼ naʼatiloʼ jeʼel u túulchʼintik utúul xiʼipal wa chʼúupal u beet baʼaloʼob kʼaastakeʼ, baʼaleʼ le tsolnuʼuk ku tsʼáaik le Bibliaoʼ jeʼel u yáantkeʼ. Kex tumen le taatatsiloʼob maʼatech u meyajkoʼob Diosoʼ, le xiʼipal wa chʼúupaloʼ jeʼel u nuʼuktik u kuxtal yéetel le baʼax ku yaʼalik le Bibliaoʼ, bey xan yéetel le tsolnuʼukoʼob ku tsʼáaik le sukuʼunoʼob úuch joʼopʼok u meyajkoʼob Jéeobaoʼ. Jeʼel máaxak ka u yóot u nuʼuktoʼon yéetel u yáantaj le Bibliaoʼ, maʼalob ka k-uʼuyej tumen leloʼ yaan u taasiktoʼon kiʼimak óolal bejlaʼeʼ bey xan teʼ kʼiinoʼob ku taaloʼoboʼ (Heb. 12:8-11).
20. ¿Baʼax unaj u beetik le táankelem u kʼáat púutsʼul tiʼ le kʼaakʼas tsʼíibolaloʼoboʼ?
20 Xokaʼak 2 Timoteo 2:20-22. Tumen maʼ tu beetoʼob le baʼax ku yaʼalik le Bibliaoʼ, yaʼab táankelmoʼobeʼ tsʼoʼok u káajal u yilik u beetkubaʼob maas maʼaloboʼob tiʼ u maasil, u tsʼíibolkoʼob baʼaloʼob maʼ utiaʼaloʼobiʼ, u núupkʼebantaloʼob, u yaabiltkoʼob taakʼin bey xan chéen u kiʼimakkúunsik u yóoloʼob. Leloʼobaʼ chéen jujumpʼéel tiʼ «u kʼaakʼas tsʼíibolaloʼob le táankelemil» ku yaʼalik le Biblia unaj u púutsʼul máakoʼ. Utiaʼal u béeytaleʼ, le táankelmoʼoboʼ unaj u tsʼáaikubaʼob tu contra tuláakal le baʼaxoʼob jeʼel u beetik u lúubloʼob tiʼ le baʼaloʼobaʼ. Tsʼoʼoleʼ, maʼalob xan ka u yil u yantaltiʼob jatsʼuts modos jeʼex u beetil «le máaxoʼob ku chʼaʼachiʼitikoʼob u kʼaabaʼ Yuumtsil yéetel tuláakal u puksiʼikʼaloʼoboʼ».
21. ¿Baʼax tu yaʼalaj Jesús yoʼolal le máaxoʼob tsaypachtikoʼ?
21 Kex táankelmoʼon wa maʼeʼ, unaj k-tsʼáaikba tu contra le máaxoʼob u kʼáat u tusoʼonoʼoboʼ. Tumen beyoʼ k-eʼesik k-kʼáat beetba u tamanoʼob Jesús maʼ tu yuʼubkoʼob «u tʼaan yaanal máakiʼ» (Juan 10:5). Baʼaleʼ, maʼ chéen yaan yéetel k-púutsʼul tiʼ le baʼaloʼob kʼaastak utiaʼal k-salvartikba tiʼ u kʼiinil u pʼujaʼanil Jéeobaoʼ. Unaj k-ilik xan ka yanaktoʼon jatsʼuts modos. Teʼ tuláakʼ xookoʼ yaan k-kanik bix jeʼel u yantaltoʼon siete tiʼ le modosoʼobaʼ. Le oʼolal unaj k-xakʼaltik maʼalob le xookaʼ tumen Jesuseʼ tu yaʼalaj yoʼolal máaxoʼob tsaypachtik: «Teen tsʼáaik kuxtal minaʼan u xuul tiʼob, mix bikʼin bíin kíimikoʼob, yéetel maʼ bíin jáanpaytaʼakoʼob tin kʼab tumen mix máakiʼ» (Juan 10:28).
¿Baʼax jeʼel a núukikeʼ?
• ¿Baʼax tu yaʼalaj Jesús tiʼ u nuuktakil le judíoʼob ka u beetoʼoboʼ?
• ¿Tiʼ baʼax nojoch talamil yaan le u millonesi máakoʼob tusaʼanoʼob tumen le nojoch Babiloniaoʼ?
• ¿Tiʼ baʼaxoʼob unaj k-púutsʼul ku keʼetel yéetel u adorartaʼal beetbil diosoʼob?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
¿Tiʼ baʼaxoʼob unaj k-púutsʼul?