Tu yiloʼob bix jeʼel u yutskíintkoʼob upʼéel talamileʼ

ÓOXTÚUL táankelem sukuʼunoʼob tiʼ upʼéel u luʼumil Áfricaeʼ, taak kaʼach u binoʼob teʼ asamblea tiʼ distritooʼ, baʼaleʼ le tuʼux kun beetbiloʼ yaan kex 90 kilómetros náachil teʼ tuʼux kajaʼanoʼoboʼ. ¿Bix túun jeʼel u kʼuchloʼobeʼ? Jach kʼaas u bejil yéetel jach ku líikʼil u polvoi, tsʼoʼoleʼ minaʼan mix upʼéel camión utiaʼal u binoʼobiʼ. Le oʼolal tu chʼaʼatuklaj u majáantkoʼob óoxpʼéel bicicletaʼob, baʼaleʼ maʼ anchaj mix upʼéel maʼalobiʼ.

Le ka tu yojéeltaj utúul ancianoeʼ, tu yaʼalaj jeʼel u majáantiktiʼob u bicicletaeʼ, yéetel kex tumen úuchbeneʼ jach maʼalob yanil. Le ancianoaʼ tu tsolajtiʼob bix tu beetil letiʼ yéetel uláakʼ sukuʼunoʼob utiaʼal u binoʼob tiʼ upʼéel asamblea tiʼ distrito. Tu yaʼalaj ka meyajnak tiʼ tu óoxtúulil le bicicletaoʼ. Baʼaleʼ utiaʼal lelaʼ unaj kaʼach u chʼaʼatuklikoʼob bix ken u beetiloʼob. ¿Bix túun ken u beetiloʼob?

Utiaʼal maʼ u sen tóokaʼaloʼob tumen kʼiineʼ, le sukuʼunoʼobaʼ tu náaksaj u nuʼukuloʼob yóokʼol le bicicletaoʼ ka jóokʼ u bimbaloʼob le táan u píikʼiloʼ. Wa utúul ku bin yóokʼol le bicicletaoʼ, le uláakʼoʼoboʼ áalkab xíimbalil u binoʼob tu paach. Ken tsʼoʼokok u yáalkabtik táanchumuk kilometroeʼ, le máax bisik le bicicletaoʼ ku waʼatal yéetel ku pʼatik le bicicleta teʼ bejoʼ. Baʼaleʼ ku tsʼáaik tuʼux jeʼel u páajtal u yilaʼal tumen le uláakʼ kaʼatúuloʼ tumen wa maʼeʼ jeʼel u yoklaʼaltiʼobeʼ. Le sukuʼun túun pʼatik le bicicletaoʼ ku joʼopʼol xan u bin áalkab xíimbalil.

Le ken kʼuchuk le uláakʼ kaʼatúul sukuʼunoʼob tuʼux yaan le bicicletaoʼ, utúuleʼ ku natʼik yéetel le uláakʼoʼ ku seguer u bin áalkab xíimbalil tak ken u chuk uláakʼ táanchumuk kilómetro, tsʼoʼoleʼ ku naʼakal túun letiʼ yóokʼol le bicicletaoʼ. Tumen maʼalob tu chʼaʼatuklil u beetkoʼob yéetel tumen maʼ u kʼáat kaʼach u peʼertoʼob le asambleaoʼ, tu xíimbaltoʼob chéen 60 kilómetros tiʼ le 90 ken u xíimbaltoʼob kaʼachoʼ. Le baʼax tu beetoʼoboʼ maʼ chéen kuneliʼ, tumen béeychaj u yantaloʼob teʼ asamblea yéetel le uláakʼ sukuʼunoʼoboʼ, tsʼoʼoleʼ tu kʼamoʼob xan le kaʼansaj ku keʼetel yéetel janaloʼ (Deu. 31:12). Techeʼ ¿yaan wa a beetik tuláakal le ku páajtal utiaʼal a bin teʼ asamblea tiʼ distrito kun beetbil teʼ jaʼabaʼ?