Unaj k-bin tu paach le jatsʼuts modosoʼoboʼ
Unaj k-bin tu paach le jatsʼuts modosoʼoboʼ
«Xeen tu paach le toj kuxtaloʼ, le u meyajtaʼal chéen Diosoʼ, le fejoʼ, le yaabilajoʼ, le chúukaʼan óolaloʼ, le maʼ u séeb kʼuuxil máakoʼ.» (1 TIM. 6:11, NM.)
1. ¿Máaxoʼob ku taal ta tuukul ken a wuʼuy le tʼaan chʼaʼapachtaʼal?
¿MÁAXOʼOB ku taal ta tuukul ken a wuʼuy le tʼaan chʼaʼapachtaʼal? Maʼ xaaneʼ ka tuukul tiʼ baʼax úuch le ka joʼopʼ u chʼaʼapachtaʼal le israelitaʼob tumen le egipcioʼob búuloʼob teʼ Chak kʼáaʼnáaboʼ (Éxo. 14:23). Wa tiʼ le israelita ku chʼaʼapachtaʼal kaʼach utiaʼal kíimsbil kex tumen maʼ u yóoliliʼ tu kíimsaj wa máaxoʼ. Letiʼeʼ unaj kaʼach u bin tiʼ upʼéel tiʼ le seis kaajoʼob tsʼaʼan utiaʼal u taʼakikubaʼob. ¿Baʼaxten? Le Bibliaoʼ ku yaʼalikeʼ tumen maʼ xaaneʼ utúul u láakʼtsil le kimenoʼ jeʼel «u chʼaʼapach[tik] [...] le máax kíimsajnaj» utiaʼal ka «u chukpacht u kíims» xanoʼ (Deu. 19:6).
2. 1) ¿Baʼax jatsʼuts páajtalil tsʼoʼok u tsʼáaik Jéeoba tiʼ jujuntúul máaxoʼob meyajtik? 2) ¿Baʼax ku yaʼalik xan u tsʼáaik tiʼ le u maasil meyajtik bejlaʼoʼ?
2 Baʼaleʼ yaan uláakʼ baʼaloʼob jeʼel xan u chʼaʼapachtik máakeʼ. Le apóstol Pablooʼ tu yaʼalaj: «Táan in bin tu paach [wa chʼaʼapachtik] le baʼax tsʼaʼan aktáanoʼ, utiaʼal in kʼamik u boʼolil kaʼanil [tʼanaʼabiken] tumen Jajal Dios tiʼ Cristo Jesús» (Fili. 3:14, LTN). Le Bibliaoʼ ku yaʼalikeʼ le 144,000 yéeyaʼanoʼob, tuʼux táakaʼan Pablooʼ, yaan u binoʼob kaʼan utiaʼal u gobernarkoʼob le Luʼum junmúuchʼ yéetel Cristo ich mil jaʼaboʼoboʼ. ¿Máasaʼ jach jatsʼuts le páajtalil tsʼoʼok u tsʼaʼabal tiʼ le sukuʼunoʼobaʼ? Baʼaleʼ, óoliʼ tuláakal le máaxoʼob meyajtik Dios bejlaʼoʼ táan u chʼaʼapachtikoʼob le kuxtal minaʼan u xuul yéetel le Paraíso kun yantal way Luʼumaʼ. Tumen jach u yaabilmoʼoneʼ, Jéeobaeʼ táan u tsʼáaiktoʼon le baʼax tu peʼertaj Adán yéetel Evaoʼ (Apo. 7:4, 9; 21:1-4).
3. ¿Bix jeʼel k-tsʼáaik u nib óolalil tiʼ Dios yoʼolal le baʼax tu beetaj t-oʼolaloʼ?
3 Tumen kʼeban wíinikoʼoneʼ, jeʼel baʼalak ka u beet máak utiaʼal ka kuxlak minaʼan xuuleʼ chéen kunel (Isa. 64:6). Chéen jeʼel u yantaltoʼon wa k-tsʼáaik fe tiʼ le kʼiʼikʼ tu wekaj Cristo t-oʼolaloʼ. ¿Baʼax jeʼel u páajtal k-beetik utiaʼal k-tsʼáaik u nib óolalil tiʼ Jéeoba úuchik u kʼubik u Hijo t-oʼolaloʼ? Upʼéel bixeʼ letiʼe ka k-beet le baʼax ku yaʼalik le Bibliaaʼ: «Xeen tu paach [wa chʼaʼapach] le toj kuxtaloʼ, le u meyajtaʼal chéen Diosoʼ, le fejoʼ, le yaabilajoʼ, le chúukaʼan óolaloʼ, le maʼ u séeb kʼuuxil máakoʼ» (1 Tim. 6:11, NM). K-xakʼaltik le jatsʼuts modosoʼobaʼ yaan u yáantkoʼon k-bin tu paachoʼob yéetel k-tsʼáaikoʼob mantatsʼ ichil k-kuxtal (1 Tes. 4:1).
«Xeen tu paach le toj kuxtaloʼ»
4. ¿Baʼaxten jach kʼaʼanan k-bin tu paach le toj kuxtaloʼ, yéetel baʼaxoʼob unaj k-beetik táanil?
4 Teʼ kaʼapʼéel cartaʼob tu túuxtaj tiʼ Timoteooʼ, le apóstol Pablooʼ tʼaanaj tiʼ le jatsʼuts modosoʼob unaj u yantal tiʼ máakoʼ, yéetel tiʼ tu kaʼapʼéelal tu yáax chʼaʼachiʼitaj le toj kuxtaloʼ (1 Tim. 6:11, NM; 2 Tim. 2:22). Yaan xan uláakʼ tekstoʼob tiʼ le Biblia ku yaʼalikoʼob ka xiʼikoʼon tu paach le toj kuxtaloʼ (Pro. 15:9; 21:21; Isa. 51:1). Utiaʼal u béeytaleʼ yáax unaj k-beetik le baʼax ku yaʼalik le Bibliaaʼ: «U kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Le máaxoʼob ku beetkoʼob lelaʼ, ku arrepentiroʼob yéetel ku suutoʼob tiʼ Jéeoba utiaʼal u beetikoʼob baʼax u kʼáat (Hch. 3:19).
5. ¿Baʼax unaj k-beetik utiaʼal ka xiʼikoʼon tu paach le toj kuxtaloʼ, yéetel baʼax unaj k-beetik utiaʼal maʼ u xuʼulul k-bin tu paach?
5 Le u millonesi máakoʼob u kʼáatoʼob bin tu paach le toj kuxtaloʼ tsʼoʼok u kʼubik u kuxtaloʼob tiʼ Jéeoba yéetel tsʼoʼok u yokjaʼob. Wa teech tsʼoʼok xan a wokjaʼeʼ kʼaʼabéet maʼ u xuʼulul a bin tu paach le toj kuxtaloʼ yéetel bey unaj u yeʼesik le baʼaxoʼob ka beetkoʼ. Uláakʼ bix jeʼel u bin máak tu paach le toj kuxtaloʼ, letiʼe ka meyajnak tiʼ le Biblia ken u chʼaʼatukult baʼax ken u beet yéetel u kuxtaloʼ (xokaʼak Hebreob 5:14). Wa yantech u jaʼabil utiaʼal u tsʼoʼokol a beeleʼ, maʼ maʼalob ka a bisaba yéetel utúul máax maʼ okjaʼanajaʼan yéetel mix u kʼáat u beetiʼ. Wa jach tu jaajil táan a bin tu paach le toj kuxtaloʼ, maʼ ken a bisaba tu yéetel (1 Cor. 7:39).
6. ¿Baʼax u kʼáat u yaʼal u bin máak tu paach le toj kuxtaloʼ?
6 Le máax ku bin tu paach le toj kuxtaloʼ, maʼ unaj u yuʼubik bey maas maʼalob tiʼ u maasiliʼ mix u tuklik «jach uts» (Ecl. 7:16). Jesuseʼ tu yaʼalaj maʼ maʼalob ka u yeʼes máak u yutsil wa u toj kuxtal chéen utiaʼal u yeʼesik maas maʼalob tiʼ u maasiliʼ (Mat. 6:1). U bin máak tu paach le toj kuxtaloʼ, u kʼáat u yaʼal u pʼáatik le kʼaakʼas tuukuloʼ, le bix u kuxtaloʼ yéetel le baʼaxoʼob ku tsʼíibolkoʼ. Wa k-beetkeʼ, maʼ ken k-séeb lúubul tiʼ upʼéel kʼeban (xokaʼak Proverbios 4:23; ketaʼak yéetel Santiago 1:14, 15). Tsʼoʼoleʼ, Jéeobaeʼ yaan u tsʼáaiktoʼon u yutsil yéetel yaan u yáantkoʼon utiaʼal ka yanaktoʼon uláakʼ jatsʼuts modosoʼob.
«Xeen tu paach [...] le u meyajtaʼal chéen Diosoʼ»
7. ¿Baʼax u kʼáat u yaʼal le tʼaan ich griego ku suʼutul «u meyajtaʼal chéen Diosoʼ»?
7 Utiaʼal u meyajtik máak chéen utúul wa máax wa upʼéel wa baʼaxeʼ, unaj u jach yaabiltik yéetel u chúukpajal u yóol tiʼ. Upʼéel diccionarioeʼ, ku yaʼalikeʼ le tʼaan ich griego ku suʼutul «u meyajtaʼal chéen Diosoʼ» u kʼáat u yaʼal «u chʼaʼabal maʼalob saajkilil tiʼ Dios». Le israelitaʼoboʼ yaʼab utéenel pʼáat maʼ tu meyajkoʼob Jéeoba, kex tumen letiʼ jóoʼsoʼob Egipto.
8. 1) ¿Baʼax kʼaʼabéetchaj u yeʼesaʼal ka kʼebanchaj Adán? 2) ¿Bix úuchik u yeʼesaʼal?
8 Le ka kʼebanchaj Adaneʼ, kʼaʼabéetchaj u yeʼesaʼal wa yaan u yantal máax jach jeʼel u chúukpajal u yóol u meyajt Jéeobaeʼ. Máan yaʼab jaʼaboʼob mix utúul u paalal Adán páajchaj u beetik, tumen tuláakal kʼebanoʼob. ¿Máax túun kaʼach jeʼel u páajtal u yeʼesikeʼ? Lelaʼ maʼ séeb ojéeltaʼabiʼ, máan u milesi jaʼaboʼob tiaʼan ichil u «taʼakbil baʼaloʼob» Dioseʼ, baʼaleʼ ka kʼuch u kʼiinileʼ Jéeobaeʼ tu tsʼáaj kʼaj óoltbil. Letiʼeʼ tu máansaj u kuxtal u Hijo tu jobnel María utiaʼal ka síijik bey utúul wíinik minaʼan u kʼebaneʼ. Desde ka síij tak ka kíimsaʼabeʼ, Jesuseʼ tu yeʼesaj baʼax u kʼáat u yaʼal u jach yaabiltaʼal yéetel u chúukpajal u yóol máak u meyajt Jéeoba. Tsʼoʼoleʼ, u payalchiʼobeʼ tu yeʼesaj chéen u Taata ku adorartik (Mat. 11:25; Juan 12:27, 28). Le oʼolal Pabloeʼ tu yaʼalaj chéen Jesús chúukpaj u yóol u meyajt Jéeoba (xokaʼak 1 Timoteo 3:16 *).
9. ¿Bix jeʼel k-eʼesik chéen Jéeoba táan k-meyajtikeʼ?
9 Tumen kʼeban wíinkoʼoneʼ maʼ tu páajtal u jach chúukpajal k-óol meyajt Jéeoba tu chúukaʼanil. Baʼaleʼ sáamsamal jeʼel u páajtal k-ilik kʼubik óol meyajteʼ. Utiaʼal lelaʼ, jach unaj k-ilik k-beetik jeʼex Jesuseʼ (1 Ped. 2:21). Beyoʼ maʼ ken k-beet jeʼex le máakoʼob ku yaʼalik le Biblia chéen ku yeʼeskoʼob «bey j-oksaj óoloʼobeʼ, baʼaleʼ tsʼoʼok u tséel óoltkoʼob u muukʼil le oksaj óolal[oʼ]» (2 Tim. 3:5, LTN). Baʼaleʼ, leloʼ maʼ u kʼáat u yaʼal wa maʼ unaj k-eʼesik yantoʼon oksaj óolaliʼ. Ken k-yéey baʼax nookʼil ken tsʼáa utiaʼal u tsʼoʼokol k-beel, ken xiʼikoʼon máan wa tiʼ uláakʼ súutukileʼ, unaj k-eʼesik tsʼoʼok k-jumpáaykuntikba utiaʼal Jajal Dios (1 Tim. 2:9, 10). Jach beyoʼ, utiaʼal k-eʼesik chéen Jéeoba k-meyajtikeʼ, unaj k-beetik tiʼ tuláakal súutukil le baʼax ku yaʼalik le Bibliaoʼ.
«Xeen tu paach [...] le fejoʼ»
10. ¿Baʼax unaj k-beetik utiaʼal u maas muʼukʼantal k-fe?
10 Xokaʼak Romailoʼob 10:17. Utiaʼal u muʼukʼantal k-fejeʼ, unaj k-tuukul tiʼ le jach maʼalob kaʼansajoʼob ku taasik le Bibliaoʼ. Utiaʼal u páajtal k-beetkeʼ yantoʼon le jóoʼsaʼaniloʼob ku tsʼáaiktoʼon «le palitsil chúukpajaʼan u yóol yéetel yaan u naʼat[oʼ]». Ichiloʼobeʼ táakaʼan le libro El hombre más grande de todos los tiempos, Aprendamos del Gran Maestro yéetel “Ven, sé mi seguidor”, le libroʼobaʼ beetaʼanoʼob utiaʼal u yáankoʼon k-maas kʼaj óolt Jesús yéetel utiaʼal k-kuxtal jeʼex letiʼeʼ (Mat. 24:45-47). Tsʼoʼoleʼ ku tsʼáaik xan toʼon muchʼtáambaloʼob yéetel asambleaʼob tuʼux ku yúuchul tʼaan tiʼ «u maʼalob péektsil Cristo». ¿Tsʼoʼok wa a tuklik bix jeʼel a maas jóoʼsik u yutsiloʼob utiaʼal maʼ u xuʼulul a chʼenxikintik Dioseʼ? (Heb. 2:1.)
11. Le payalchiʼ yéetel k-beetik le baʼax u kʼáat Diosoʼ, ¿bix u muʼukʼankúuntik k-fe?
11 Le payalchiʼoʼ ku muʼukʼankúuntik xan k-fe. Utéenjeakeʼ, le disipuloʼoboʼ tu kʼáatoʼob tiʼ Jesús: «Yaʼabkunt k-oksaj óolal». Toʼoneʼ le unaj xan k-kʼáatik tiʼ Dios (Luc. 17:5). Unaj k-kʼáat óoltik tiʼ ka u tsʼáatoʼon u kiliʼich muukʼ, tumen le fejoʼ táakaʼan ichil le modosoʼob ku tsʼáaik le kiliʼich muukʼoʼ (Gal. 5:22). K-beetik baʼaxoʼob ku yaʼaliktoʼon Dioseʼ ku muʼukʼankúuntik xan k-fe. Le oʼolaleʼ, unaj k-maas táakpajal teʼ kʼaʼaytajoʼ tumen leloʼ ku taasiktoʼon xan kiʼimak óolal. Tsʼoʼoleʼ tuukulnakoʼon tiʼ le utsiloʼob ku kʼamik máak ikil u tsʼáaik «táanil u [reino] Jajal Dios yéetel le toj kuxtal utstutʼaan letiʼoʼ», tumen leloʼ ku muʼukʼankúuntik k-fe (Mat. 6:33).
«Xeen tu paach [...] le yaabilajoʼ»
12, 13. 1) ¿Baʼax tu yaʼalaj Jesús ka k-beete? 2) ¿Bix jeʼel k-eʼesik yaabilaj tiʼ le sukuʼunoʼoboʼ?
12 Xokaʼak 1 Timoteo 5:1, 2. Pabloeʼ tu tsʼáaj jujumpʼéel tsolnuʼukoʼob jeʼel u yáantkoʼon k-yaabilt le sukuʼunoʼoboʼ. Le k-meyajtik chéen Jéeobaoʼ unaj u péekskoʼon k-tsʼoʼokbes le baʼax tu yaʼalaj Jesusaʼ: «Yaabiltabaʼex ta baatsileʼex» (Juan 13:34). Le apóstol Juanoʼ tu yaʼalaj: «Wa yaan juntúul máak yaan luʼumkabil ayikʼalil tiʼ, ku tsʼoʼokoleʼ ku yilik u yóotsilil u sukuʼuneʼ baʼaleʼ maʼ tu chʼaʼik óotsilil tiʼeʼ ¿bix jeʼel u yaʼalik wa yaan u yaakunaj Jajal Dios tu puksiʼikʼaleʼ?» (1 Juan 3:17). ¿Yaan wa baʼax kʼiin tsʼoʼok a beetik bey tiʼ a sukuʼunoʼobaʼ?
13 Uláakʼ bix jeʼel k-eʼesik yaabilajeʼ, letiʼe ken k-perdonart k-sukuʼunoʼoboʼ (xokaʼak 1 Juan 4:20). Unaj k-beetik le baʼax ku yaʼalik le Bibliaaʼ: «Yanakteʼex chowak óolalil ta baatsileʼex, yéetel paklan saʼatsabaʼex wa yaan wa máax yaan baʼal tiʼ tu contra uláakʼ, jeʼel bix tu saʼatseʼex Cristoeʼ, bey xan a beeteʼex ta baatsileʼexoʼ» (Col. 3:13). ¿Yaan wa tiʼ máax teʼ múuchʼulil unaj a weʼesik yaabilajoʼ? Wa yaneʼ, ¿yaan wa a beetik?
«Xeen tu paach [...] le chúukaʼan óolaloʼ»
14. ¿Baʼax jeʼel k-kanik tiʼ u múuchʼulil Filadelfiaeʼ?
14 U jaajileʼ maʼ chéen chʼaʼabil u bin máak tu paach upʼéel baʼax jach nojchiʼ. Le oʼolal unaj u jach chúukpajal u yóol máak u bin tu paach le kuxtal minaʼan u xuuloʼ. Jesuseʼ tu yaʼalaj tiʼ u múuchʼulil Filadelfia: «Tumen ta tsʼoʼokbesaj u tʼaanil in chúukaʼan óolaleʼ, bíin in kanáantech tiʼ le túuntaj óolal bíin taalak tiʼ tuláakal yóokʼol kaaboʼ» (Apo. 3:10). Jach beyoʼ, Jesuseʼ tʼaanaj tiʼ u kʼaʼabéetil u yantal chúukaʼan óolal tiʼ máak utiaʼal u aktáantik le talamiloʼob bey xan le túuntajoʼoboʼ. Le sukuʼunoʼob tiʼ u múuchʼulil Filadelfiaoʼ chúukpaj u yóol u aktáantoʼob le talamiloʼoboʼ. Le oʼolal aʼalaʼabtiʼob tumen Jesús yaan u yáantaʼaloʼob u aktáantoʼob upʼéel talamil maas nojoch ku náatsʼal (Luc. 16:10).
15. ¿Baʼax tu yaʼalaj Jesús yoʼolal le chúukaʼan óolaloʼ?
15 Tumen u yojel kaʼach yaan u pʼektaʼal u disipuloʼobeʼ, Jesuseʼ kaʼatéen tu líiʼsaj u yóoloʼob yéetel le tʼaanoʼobaʼ: «Le máax ku chúukpajal u yóol tak tu xuuleʼ, lelaʼ bin toʼokok» (Mat. 10:22; 24:13, LTN). Tsʼoʼoleʼ tu yaʼalaj xan tiʼob bix jeʼel u chúukpajal u yóoloʼobeʼ. Ichil upʼéel kettʼaaneʼ, Jesuseʼ tu yaʼaleʼ le máaxoʼob «ku kʼamikoʼob yéetel kiʼimak óolal» le maʼalob péektsiloʼ baʼaleʼ maʼ tu chúukpajal u yóoloʼobeʼ beyoʼob tsekʼeleʼ. Yéetel le máaxoʼob ku chúukpajal u yóoloʼob yéetel «ku pʼáatal tu puksiʼikʼaloʼob» le maʼalob péektsil bey xan «yéetel chúukaʼan óolal [...] ku tsʼáaikoʼob maʼalob ich[eʼ]», tu yaʼaleʼ maʼalob luʼumoʼob (Luc. 8:13, 15).
16. ¿Baʼax áantik máak utiaʼal ka yanak chúukaʼan óolal tiʼ?
16 ¿Ta tsʼáaj wa cuenta baʼax áantik máak utiaʼal ka yanak chúukaʼan óolal tiʼ? Letiʼe ka pʼáatak mantatsʼ tu puksiʼikʼal le baʼax ku yaʼalik Jéeobaoʼ. Wa k-tuukul sáamsamal tiʼ le baʼax k-xokik teʼ Bibliaoʼ, yaan u yantaltoʼon u muukʼil utiaʼal k-bisik «yéetel chúukaʼan óolal» le «maʼalob ich[oʼ]» (Sal. 1:1, 2).
«Xeen tu paach [...] le maʼ u séeb kʼuuxil máakoʼ» yéetel le jeetsʼeliloʼ
17. 1) ¿Baʼaxten kʼaʼanan maʼ u séeb kʼuuxil máak? 2) ¿Bix tu yeʼesil Jesús maʼ tu séeb kʼuuxil?
17 Mix máak utstutʼaan ka aʼalaʼak upʼéel baʼal maʼ jaaj tu contraiʼ. U suukileʼ yéetel pʼujaʼanil ku yaʼalik máak maʼ jaaj le baʼax ku yaʼalaʼaloʼ. Baʼaleʼ maas maʼalob wa maʼ tu séeb kʼuuxil (xokaʼak Proverbios 15:1). Baʼaleʼ utiaʼal u béeytaleʼ kʼaʼabéet u controlarkuba. Jesuseʼ tu yeʼesajtoʼon bix unaj k-eʼesik le jatsʼuts modosaʼ. Le Bibliaoʼ ku yaʼalik: «Le ka poʼochʼeʼ maʼ tu núukaj yéetel poochʼiloʼobiʼ; le ka beetaʼab u mukʼyajeʼ, maʼ kʼaakʼas tʼaanajiʼ, baʼaleʼ tu kʼubentaj tiʼ Jajal Dios máax ku pʼis óol jach tubeel» (1 Ped. 2:23). Kex maʼ tu páajtal k-beetik jach jeʼex Jesuseʼ, jeʼel u páajtal k-ilik maas maʼalobkíintik k-modos sáamsamaleʼ.
18. 1) ¿Baʼax jeʼel u yúuchul wa maʼ k-séeb kʼuuxileʼ? 2) ¿Baʼax uláakʼ jatsʼuts modos ku yaʼalaʼal ka yanaktoʼon?
18 Unaj k-beetik jeʼex Jesuseʼ yéetel mantatsʼ kʼaʼabéet k-nuʼukbesmakba utiaʼal k-núukik jeʼel baʼalak kʼáatchiʼ ka beetaktoʼon yoʼolal le baʼax k-creertikoʼ, baʼaleʼ unaj k-beetik yéetel tsiikil yéetel maʼ unaj k-séeb kʼuuxiliʼ (1 Ped. 3:15). Lelaʼ jeʼel u yáantaj utiaʼal maʼ k-baʼateltʼaan yéetel k-sukuʼunoʼob wa yéetel le máaxoʼob tiʼ k-kʼaʼaytaj tumen maʼ upʼéeliliʼ bix k-tuukul yéeteloʼobiʼ (2 Tim. 2:24, 25). Le maʼ u séeb kʼuuxil máakoʼ ku yáantaj utiaʼal ka yanak jeetsʼelil. Maʼ xaaneʼ le oʼolal teʼ tu kaʼapʼéel carta tu túuxtaj tiʼ Timoteooʼ, Pabloeʼ tu chʼaʼachiʼitaj le jeetsʼelil ichil le jatsʼuts modos unaj u yantaltoʼonoʼ (2 Tim. 2:22; ketaʼak yéetel 1 Timoteo 6:11, NM). Le Bibliaoʼ ku yaʼalik ka xiʼikoʼon tu paach le jeetsʼeliloʼ (Sal. 34:14; Heb. 12:14).
19. Beoraaʼ tsʼoʼok k-tʼaan tiʼ le siete jatsʼuts modosoʼobaʼ, ¿baʼax tsʼoʼok a chʼaʼatukultik a beetik, yéetel baʼaxten?
19 Teʼ xookaʼ tsʼoʼok u líiʼsaʼal k-óol utiaʼal ka xiʼikoʼon tu paach siete jatsʼuts modos: le toj kuxtaloʼ, le u meyajtaʼal chéen Diosoʼ, le fejoʼ, le yaabilajoʼ, le chúukaʼan óolaloʼ, le maʼ u séeb kʼuuxil máakoʼ yéetel le jeetsʼeliloʼ. ¿Máasaʼ yaʼab utsiloʼob ku taasik tiʼ le múuchʼulil k-eʼesik le modosoʼobaʼ? Lelaʼ ku nojbeʼenkúuntik Jéeoba yéetel ku béeytal u nuʼuktikoʼon, yéetel ku beetik xan u nojbeʼenkúuntaʼal tumen uláakʼ máakoʼob.
[Tsolajiloʼob]
^ xóot’ol 8 1 Timoteo 3:16 (NM): «U jaajileʼ, u taʼakbil baʼaloʼob tiʼ u chʼaʼabal maʼalob saajkilil tiʼ Dioseʼ jach nojoch: “Letiʼeʼ [Jesuseʼ] chíikbesaʼab bey wíinikeʼ, kaʼa kuxkíintaʼab bey espíritu yoʼolal u toj kuxtal, tu chíikbesuba tiʼ le angeloʼoboʼ, kʼaʼaytaʼab tiʼ tuláakal u jejeláasil máak, yaʼab máakoʼob tu tsʼáajoʼob u fe tiʼ, kʼaʼam teʼ kaʼan yéetel nojbeʼeniloʼ ”».
Kʼáatchiʼob utiaʼal u tuukul máak
• ¿Baʼax u kʼáat u yaʼal u bin máak tu paach le toj kuxtal yéetel le u meyajtaʼal chéen Diosoʼ?
• ¿Baʼax ken u yáantoʼon utiaʼal ka xiʼikoʼon tu paach le fe yéetel le chúukaʼan óolaloʼ?
• ¿Baʼaxten unaj k-eʼesik yaabilaj tiʼ k-sukuʼunoʼob?
• ¿Baʼaxten unaj k-bin tu paach le maʼ u séeb kʼuuxil máak yéetel le jeetsʼeliloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
Le máax ku bin tu paach le toj kuxtaloʼ, maʼ unaj u yuʼubik bey maas maʼalob tiʼ u maasileʼ
[U tsolajil le oochel teʼ táan juʼun 13]
Utiaʼal u muʼukʼantal k-fejeʼ, unaj k-tuukul tiʼ le baʼaxoʼob ku yaʼalik le Bibliaoʼ
[U tsolajil le oochel teʼ táan juʼun 15]
Unaj k-bin tu paach le yaabilaj yéetel le maʼ u séeb kʼuuxil máakoʼ