Unaj k-tsʼoʼokbesik baʼax ku yaʼalik Jéeoba
Unaj k-tsʼoʼokbesik baʼax ku yaʼalik Jéeoba
«U yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob; yéetel u yaʼalmajtʼaanoʼobeʼ maʼ talamoʼobiʼ.» (1 JUAN 5:3.)
1, 2. 1) Bejlaʼeʼ, ¿baʼaxten óoliʼ mix máak u kʼáat u tsʼoʼokbes baʼax ku yaʼalaʼaltiʼ? 2) Yaʼab máakoʼobeʼ, ¿jach wa tu jaajil ku beetkoʼob chéen baʼax u kʼáatoʼob?
BEJLAʼEʼ óoliʼ mix máak u kʼáat u tsʼoʼokbes baʼax ku yaʼalaʼaltiʼ. Yaan máakeʼ ku yaʼalik: «Teneʼ kin beetik baʼax in kʼáat yéetel mix máak unaj u taal u yaʼalten baʼax unaj in beetik». Baʼaleʼ ¿jach wa tu jaajil ku beetkoʼob chéen baʼax u kʼáatoʼob? Maʼatech. Le máakoʼobaʼ chéen ku beetkoʼob le baʼax ku yilik u beetik u maasiloʼ yéetel ku «kuxtal[oʼob] jeʼel bix u yaʼalik le yóokʼol kaabaʼ» (Rom. 12:2). Maʼatech u beetkoʼob chéen baʼax u kʼáatoʼob, baʼaxeʼ jeʼex tu yaʼalil le apóstol Pedrooʼ «letiʼobeʼ palitsiloʼob tiʼ jumpʼéel kʼaakʼas kuxtal» (2 Ped. 2:19). Ku beetkoʼob «le baʼax ku beetik le yóokʼol kaabaʼ» yéetel ku «tsʼoʼokbesi[koʼob] u yóolal kʼaasilbaʼal» (Efe. 2:2).
2 Utúul máakeʼ tu yaʼalaj: «Teneʼ maʼatech in chaʼik u yaʼalaʼalten baʼax unaj in beetik tumen in taataʼob, tumen utúul sacerdote, tumen utúul u nojchil upʼéel wa baʼax religioni [...] mix tumen le Bibliaoʼ». U jaajileʼ yaan máaxoʼob maʼ maʼalob u meyajtiʼob le páajtalil yantiʼoboʼ, le oʼolal maʼ xaaneʼ maʼ unaj k-beetik baʼax ku yaʼalikoʼobiʼ. Baʼaleʼ ¿u kʼáat wa túun u yaʼal jach upuliʼ maʼ unaj k-tsʼoʼokbesik baʼax ku yaʼalaʼaltoʼoniʼ? Le periodicoʼoboʼ ku yeʼesikoʼob baʼax talamiloʼob tsʼoʼok u taasik le u beetik máak chéen baʼax u kʼáatoʼ. Bejlaʼa maas jach kʼaʼabéet nuʼuktajeʼ, óoliʼ tuláakal máak maʼ u kʼáat u kʼamoʼobiʼ.
Unaj wa k-tsʼoʼokbesik tuláakal baʼax ku yaʼalaʼaltoʼon
3. Le disipuloʼob teʼ yáax siglooʼ, ¿bix tu yeʼesiloʼob maʼ tu beetkoʼob tuláakal baʼax ku yaʼalaʼaltiʼob tumen le wíinikoʼoboʼ?
3 Toʼoneʼ maʼatech k-beetik chéen baʼax k-kʼáat jeʼex u máakiloʼob le yóokʼol kaabaʼ. Baʼaleʼ leloʼ maʼ u kʼáat u yaʼal wa k-tsʼoʼokbesik tuláakal baʼax ku yaʼalaʼaltoʼoniʼ. Yaan kʼiineʼ maʼ t-beetik le baʼax ku yaʼalik le máaxoʼob yaan páajtalil tiʼoboʼ. Teʼ yáax siglooʼ, bey tu beetil le disipuloʼoboʼ. Utéenjeakileʼ u nojchil le sacerdoteʼob yéetel le máaxoʼob yanoʼob ichil le Sanedrinoʼ tu yaʼaloʼob tiʼ le apostoloʼob ka xuʼuluk u kʼaʼaytajoʼob, baʼaleʼ letiʼobeʼ maʼ tu beetoʼobiʼ. Letiʼobeʼ u yojloʼob maas kʼaʼabéet kaʼach u tsʼoʼokbesikoʼob le baʼax ku yaʼalik Diosoʼ (xokaʼak Beetaʼanoʼob [Hechos] 5:27-29).
4. Jeʼex u yeʼesik le Bibliaoʼ, ¿máaxoʼob tu chʼaʼatukloʼob maʼ u tsʼoʼokbesikoʼob le baʼax aʼalaʼabtiʼoboʼ?
4 Yaʼab tiʼ le máaxoʼob meyajt Dios táanil tiʼ k-kʼiinoʼobeʼ bey xan tu beetiloʼoboʼ. Jeʼex Moiseseʼ «maʼ tu yóoltaj ka tʼaʼanak bey u paal u x-chʼupul paal u [reyil] Egiptoiʼ, baʼaleʼ tu yóoltaj mukʼyaj yéetel u kaajal Jajal Dios», kex tumen tu beetaj u kʼuuxil le reyoʼ (Heb. 11:24, 25, 27). José xaneʼ maʼ tu yóotaj núupchital yéetel u yatan Potifariʼ, kex u yojel le koʼolelaʼ yaan páajtalil tiʼ utiaʼal u beetik u kíimsaʼal (Gén. 39:7-9). Yéetel Danieleʼ «tu tsʼáaj tu yóol maʼ u kʼebanchajal yéetel u janal, mix yéetel u vino [le reyoʼ]», kex tumen le máax kanáantikoʼ istikiaj tu yóotil u beet le baʼax kʼáataʼabtiʼoʼ (Dan. 1:8-14). Tuláakal lelaʼ ku yeʼesiktoʼoneʼ le máaxoʼob meyajt Dios úuchiloʼ, tu chʼaʼatukloʼob u tsʼoʼokbesikoʼob baʼax u kʼáat Dios kex tumen jeʼel tak u kíimsaʼaloʼob kaʼach tu yoʼolaleʼ. Letiʼobeʼ maʼ tu beetoʼob baʼax aʼalaʼabtiʼob utiaʼal u pʼáataloʼob maʼalobil tu táan le máakoʼoboʼ, toʼon xaneʼ bey unaj k-beetkoʼ.
5. Le máaxoʼob meyajtik Diosoʼ, ¿bix u yilkoʼob le baʼax ku yaʼalik le máaxoʼob yaan páajtalil tiʼoboʼ?
5 Baʼaleʼ lelaʼ maʼatech k-beetik chéen tumen maʼ k-kʼáatiʼ wa tumen maʼ maʼalob bix u gobernar le máakoʼoboʼ. Baʼaxeʼ k-beetik tumen tsʼoʼok k-chʼaʼatuklik tsʼoʼokbesik baʼax u kʼáat Dios. Wa le baʼax ku yaʼalik le wíinikoʼob ku bin tu contra baʼax ku yaʼalik Diosoʼ, toʼoneʼ k-ojel chéen u tʼaan u Jéeoba unaj k-tsʼoʼokbesik. Jeʼex le apostoloʼoboʼ, toʼoneʼ maases k-uʼuyik u tʼaan Dios ke u tʼaan wíinikoʼob.
6. ¿Baʼaxten jach kʼaʼabéet k-tsʼoʼokbesik mantatsʼ baʼax ku yaʼalik Dios?
6 ¿Baʼax áantkoʼon k-tsʼoʼokbes baʼax ku yaʼalik Dios? Letiʼe baʼax ku yaʼalik Proverbios 3:5, 6: «Okes a wóol tiʼ [Jéeoba] yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej». K-ojeleʼ tuláakal baʼax ku yaʼaliktoʼon Jéeobaeʼ utiaʼal ka xiʼiktoʼon utsil (xokaʼak Deuteronomio 10:12, 13). Jéeobaeʼ tu yaʼalaj tiʼ le israelitaʼoboʼ: «Teen kaʼambesik tiʼ teech baʼax unaj a beetik utiaʼal a wutsil, teen eʼesik tiʼ teech, tuʼux bejil unaj a bin». Yéetel tu yaʼalaj xan: «¡Kexiʼiʼ kaʼach ka [tsʼoʼokbes] in túuchiʼ tʼaanoʼobeʼ! A maʼalob yanileʼ bíin nojochchajak jeʼel bix u bin u nojochtal jumpʼéel áalkab jaʼeʼ, u yaʼabtal a nuʼukuloʼobeʼ bíin béeyak u kuklil kʼáaʼnáabeʼ» (Isa. 48:17, 18). Toʼoneʼ jach k-creertik le baʼax ku yaʼalik le tekstoaʼ. K-ojleʼ utiaʼal ka xiʼiktoʼon utsileʼ kʼaʼabéet k-tsʼoʼokbesik mantatsʼ baʼax ku yaʼalik Dios.
7. ¿Baʼax unaj k-beetik kex tumen yaan kʼiin maʼ k-jach ojel baʼaxten ku yaʼaliktoʼon Dios ka k-beet upʼéel wa baʼaxiʼ?
7 Kex tumen yaan kʼiin maʼ k-jach ojel baʼaxten ku yaʼalik Dios ka k-beet upʼéel wa baʼaxeʼ, toʼoneʼ k-tsʼoʼokbesik. Leloʼ maʼ u kʼáat u yaʼal wa jach séeb k-creertik tuláakal baʼaliʼ, baʼaxeʼ ku yeʼesik jach k-kʼubmaj k-óol tiʼ Jéeoba, tumen k-ojel letiʼeʼ mantatsʼ ku kaxtik k-utsil. Tsʼoʼoleʼ ken k-tsʼoʼokbes baʼax ku yaʼalikeʼ k-eʼesik k-yaabilmaj, tumen le apóstol Juanoʼ tu yaʼalaj: «U yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob» (1 Juan 5:3). Baʼaleʼ yaan xan uláakʼ baʼax yaan yil yéetel k-tsʼoʼokbesik baʼax ku yaʼalik Dios.
Kʼaʼabéet k-kanik k-chʼaʼanuʼukt baʼax le utsoʼ bey xan baʼax le kʼaasoʼ
8. ¿Bix u yáantkoʼon k-tsʼoʼokbes baʼax u kʼáat Jéeoba le «[k-chʼaʼanuʼuktik] baʼax le utsoʼ bey xan baʼax le kʼaasoʼ»?
8 Le Bibliaoʼ ku yaʼalikeʼ le máaxoʼob meyajtik Diosoʼ kʼaʼabéet «tsʼoʼok u kanikoʼob pʼis óolal tumen tsʼoʼok u suuktaltiʼob u chʼaʼanuʼuktikoʼob baʼax le utsoʼ bey xan baʼax le kʼaasoʼ» (Heb. 5:14). Le oʼolal maʼ chéen k-jáajan tsʼoʼokbesik baʼax ku yaʼaliktoʼon Jéeobaiʼ, baʼaxeʼ yéetel u yáantaj le Bibliaoʼ «[k-chʼaʼanuʼuktik] baʼax le utsoʼ bey xan baʼax le kʼaasoʼ». Kʼaʼabéet k-naʼatik baʼax utsiloʼob jeʼel u taasiktoʼon k-tsʼoʼokbesik baʼax u kʼáat Jéeoba utiaʼal k-aʼalik xan jeʼex le salmistaaʼ: «¡Kin bisik tin puksiʼikʼal a kaʼambesaj!» (Sal. 40:8).
9. ¿Bix k-nuʼuktikba yéetel baʼax ku yaʼalik le Bibliaoʼ, yéetel baʼaxten kʼaʼabéet k-beetik?
9 Utiaʼal k-yaabiltik le baʼax ku yaʼaliktoʼon Jéeoba jeʼex tu beetil le salmistaoʼ, unaj k-tuukul tiʼ le baʼaxoʼob k-xokik teʼ Bibliaoʼ. Jeʼex ken k-kan baʼax ku yaʼaliktoʼon Jéeoba ka k-beeteʼ, maʼalob ka k-tukult lelaʼ: «¿Baʼaxten jach maʼalob ka in tsʼoʼokbes le leyaʼ, wa le baʼax tsʼoʼok in kanikaʼ? ¿Baʼax utsiloʼob ken u taasten? ¿Baʼax talamil ku yantal tiʼ le máaxoʼob maʼ tu tsʼoʼokbeskoʼob baʼax ku yaʼalik Diosoʼ?». Beyoʼ yaan k-nuʼuktikba yéetel baʼax ku yaʼalik le Bibliaoʼ yéetel yaan u páajtal k-chʼaʼatuklik k-beetik baʼax utstutʼaan Dios. Tsʼoʼoleʼ maʼ kun xuʼulul «[k-naʼatik] baʼax u kʼáat [Jéeoba]» ka k-beete (Efe. 5:17). Baʼaleʼ yaan kʼiineʼ maʼ chéen chʼaʼabil u beetaʼaliʼ. ¿Baʼaxten?
Baʼaloʼob ku beetik Satanás utiaʼal maʼ u tsʼoʼokbesaʼal baʼax ku yaʼalik Jéeoba
10. Aʼal upʼéel baʼax tsʼoʼok u beetik Satanás utiaʼal maʼ u tsʼoʼokbesaʼal baʼax ku yaʼalik Jéeoba.
10 Tumen utstutʼaan u beetik chéen baʼax u kʼáateʼ, Satanaseʼ úuch joʼopʼok u yilik maʼ u tsʼoʼokbesaʼal baʼax ku yaʼalik Jéeoba. Upʼéel bix u beetkeʼ letiʼe maʼ u yilaʼal le tsʼoʼokol beel bey upʼéel baʼax kiliʼich, tsʼaʼan tumen Jéeobaoʼ. Bejlaʼeʼ yaʼab máakoʼobeʼ ku chʼaʼatuklik chéen u múul kajtaloʼob yéetel yaʼab xaneʼ ku kaxtik baʼax u beetoʼob utiaʼal u xúumpʼattik u núupoʼob. Maʼ xaaneʼ tuláakloʼob ku tuukuloʼob jeʼex utúul koʼolel famosa tu yaʼalaj: «Maʼ tu páajtal u múul kajtal máak mantatsʼ chéen yéetel u núup. Maʼ in kʼaj óol mix máak maʼ u tus u núup yéetel yaanaliʼ wa maʼ máanak mix tu tuukul u beetkiʼ». Le ka tʼaanaj tiʼ bix tsʼoʼok u bin kʼaasil tiʼ yéetel u núupoʼobeʼ, uláakʼ utúul artista jach famosoeʼ tu yaʼalaj: «Maʼ in wojel wa beetaʼan wíinik utiaʼal ka múul kuxlak mantatsʼ chéen yéetel utúul máakiʼ». Le oʼolal maʼalob ka k-tukult lelaʼ: «¿Kin wilik wa le tsʼoʼokol beel jeʼex u yilik Diosoʼ? ¿Wa tsʼoʼok u káajal in wilik jeʼex le máaxoʼob maʼatech u meyajkoʼob Jéeobaoʼ?».
11, 12. 1) ¿Baʼaxten yaan táankelmoʼobeʼ ku talamtaltiʼob u tsʼoʼokbeskoʼob baʼax ku yaʼalik Jéeoba? 2) Tsikbalt upʼéel baʼax uchaʼan ku yeʼesik jeʼel u bin kʼaasil tiʼ máak wa maʼ tu tsʼoʼokbesik baʼax ku yaʼalik Jéeobaeʼ.
11 Wa táankelmecheʼ, maʼ u tuʼubultech Satanaseʼ jach u kʼáat u táabsech. Letiʼeʼ maʼ u kʼáat ka a tsʼoʼokbes baʼax u kʼáat Jéeobaiʼ. Le oʼolal ku meyajtiʼ «u kʼaakʼas tsʼíibolaloʼob le táankelmiloʼ», bey xan baʼax ku yaʼalik a wéet táankelmiloʼob utiaʼal a wilik jach talam u tsʼoʼokbesaʼal le baʼax ku yaʼalik le Bibliaoʼ (2 Tim. 2:22). Maʼ a chaʼik a tuʼusul. Ilawil baʼaxten maas jeʼel u taasiktech utsiloʼob a beetik baʼax ku yaʼalik Jéeobaeʼ. Le Bibliaoʼ ku yaʼalik: «Púutsʼeneʼex, túun tiʼ le núupkʼebanoʼ» (1 Cor. 6:18). Tukult lelaʼ: «¿Baʼaxten unaj in púutsʼul tiʼ le núupkʼebanoʼ? ¿Baʼax utsiloʼob ken u taasten wa kin púutsʼul tiʼ?». Maʼ xaaneʼ a kʼaj óol jujuntúul máaxoʼob maʼ tu beetoʼob le baʼax aʼalaʼabtiʼobaʼ yéetel jach bin kʼaasiltiʼob. Maʼ xaan xaneʼ bejlaʼeʼ minaʼanoʼob ichil u kaajal Jéeoba. ¿Yaan wa kiʼimak óolal tiʼob? ¿Maas wa maʼalob bix u kuxtaloʼob ke le táan kaʼach u meyajkoʼob Diosoʼ? ¿Tsʼoʼok wa u kaxtikoʼob uláakʼ bix jeʼel u yantaltiʼob kiʼimak óolal ke le u yojel le máaxoʼob meyajtik Jéeobaoʼ? (Xokaʼak Isaías 65:14.)
12 Maʼ sen úucheʼ utúul kiik Sharon u kʼaabaʼeʼ, tu yaʼalaj: «Maʼ tin tsʼoʼokbesaj baʼax ku yaʼalik Jéeobaiʼ yéetel tsaʼayten sida, upʼéel kʼojaʼanil minaʼan tsʼaakil tiʼ. Mantatsʼ kin máansik tin tuukul le kiʼimak óolal anchajten le táan in meyajtik kaʼachoʼ». Sharoneʼ tu tsʼáaj cuenta jach upuliʼ maʼ maʼalob le baʼax tu beetoʼ, baʼaxeʼ unaj kaʼach u tsʼoʼokbesik baʼax u kʼáat Jéeoba. U jaajileʼ, le baʼaxoʼob ku yaʼalik Jéeobaoʼ ku kanáantkoʼon. Siete semanaʼob u yaʼal lelaʼ Sharoneʼ kíimi. Le baʼax úuchtiʼoʼ ku yeʼesikeʼ Satanaseʼ mix baʼal maʼalob ku tsʼáaik tiʼ le máaxoʼob beetik baʼax ku yaʼalikoʼ. Yaʼab baʼaloʼob ku yaʼalik u tsʼáaik tiʼ máak, baʼaleʼ tumen letiʼ «u taata le tuusoʼ», mix upʼéel ku béeykuntik jeʼex le tu yaʼalaj tiʼ Evaoʼ (Juan 8:44). Jeʼex k-ilkoʼ maas maʼalob ka k-tsʼoʼokbes baʼax ku yaʼaliktoʼon Jéeoba.
Maʼ unaj k-beetik chéen baʼax k-kʼáatiʼ
13. ¿Baʼaxten maʼ unaj k-beetik chéen baʼax k-kʼáatiʼ?
13 Utiaʼal k-tsʼoʼokbesik baʼax u kʼáat Jéeobaeʼ, maʼ unaj k-beetik chéen baʼax k-kʼáatiʼ. Wa k-taasikba noj baʼalileʼ jeʼel u káajal k-tuklik mix máak unaj u yaʼaliktoʼon baʼax unaj k-beetkiʼ. Maʼ xaaneʼ jeʼel u xuʼulul k-beetik baʼax ku yaʼalik le máaxoʼob nuʼuktik u kaajal Diosoʼ. Baʼaleʼ maʼ u tuʼubultoʼoneʼ Jéeobaeʼ u tsʼaamaj le palitsil chúukpajaʼan u yóol utiaʼal u tsʼáaiktoʼon jach tu yorai le kaʼansaj ku keʼetel yéetel janaloʼ (Mat. 24:45-47). Le oʼolaleʼ yéetel kabal óolal unaj k-kʼamik bey u kanáantik Jéeoba u kaajaloʼ. Unaj k-beetik jeʼex le apostoloʼoboʼ. Le ka xuʼul u tsaypachtaʼal Jesús tumen jujuntúul u disipuloʼobeʼ, letiʼeʼ tu yaʼalaj tiʼ u apostoloʼob: «¿Tak wa teʼex a kʼáateʼex bin?». Pedroeʼ tu núukaj: «Yuumtsil, ¿tiʼ máax jeʼel u páajtal k-bineʼ? A tʼaanoʼobeʼ u tʼaaniloʼob kuxtal minaʼan u xuul» (Juan 6:66-68).
14, 15. ¿Baʼaxten yéetel kabal óolal unaj k-beetik le baʼax ku yaʼalik le Bibliaoʼ?
14 Ichil u tsʼoʼokbesaʼal baʼax u kʼáat Jéeobaeʼ táakaʼan u beetaʼal baʼax ku yaʼalik le Bibliaoʼ. Le palitsiloʼ úuch joʼopʼok u yaʼaliktoʼon ka «pʼil ichnakoʼon» yéetel ka «yanakoʼon t-óol» (1 Tes. 5:6, LTN). Le tsolnuʼukaʼ jach unaj u tsʼoʼokbesaʼal bejlaʼeʼ tumen yaʼab «wíinikoʼob ku yaabiltkubaʼob, j-tsʼiibolaloʼob tiʼ ayikʼalil» (2 Tim. 3:1, 2, LTN). ¿Jeʼel wa u káajal k-tuukul beyaʼ? Jeʼeleʼ. Wa maʼ chʼiikloʼon k-meyajt Dioseʼ, jeʼel u káajal k-bin tu paach le ayikʼaliloʼoboʼ wa jeʼel u xuʼulul k-meyajtikeʼ (Luc. 12:16-21). U jaajileʼ, maas maʼalob ka k-tsʼoʼokbes baʼax ku yaʼalik le Bibliaoʼ yéetel maʼ k-beetik jeʼex u máakiloʼob le yóokʼol kaab chéen ku kaxtik u yutsiloʼoboʼ (1 Juan 2:16).
15 Le kaʼansaj ku taal tiʼ le palitsil chúukpajaʼan u yóoloʼ, ku tsʼaʼabaltoʼon tumen le ancianoʼob yanoʼob teʼ múuchʼuliloʼ. Le Bibliaoʼ ku yaʼaliktoʼon: «Uʼuyeʼex u tʼaan le máaxoʼob nuʼuktikteʼex le bejoʼ yéetel aneneʼex yáanal u páajtaliloʼob; tumen letiʼob máaxoʼob kanáantik a pixaneʼex, tumen a wojeleʼexeʼ letiʼobeʼ yaan u yaʼalikoʼob tiʼ Jajal Dios baʼax meyajiloʼob tu beetajoʼob. Ilawileʼex ka páatak u beetikoʼob le meyajoʼ yéetel kiʼimak óolal maʼ yéetel yaayaj óolaliʼ, tumen lelaʼ mix jumpʼéel uts jeʼel u taasikteʼexeʼ» (Heb. 13:17). ¿U kʼáat wa túun u yaʼaleʼ le ancianoʼoboʼ maʼatech u kʼebanchajloʼob? Maʼatech. Letiʼob xaneʼ kʼeban máakoʼob, yéetel Dioseʼ ku yilik baʼax ku beetkoʼob. Kex beyoʼ, Jéeobaeʼ u kʼáat ka k-tsʼáaba yáanal u nuʼuktajoʼob. Ken múul meyajnakoʼon yéetel le ancianoʼob kex yaan kʼiin ku beetkoʼob upʼéel baʼax maʼ jach maʼalobeʼ, k-eʼesik k-tsʼoʼokbesik baʼax ku yaʼalik Jéeoba.
Jach kʼaʼabéet u yantaltoʼon kabal óolal
16. ¿Bix k-eʼesik k-tsʼáaikba yáanal u nuʼuktaj Cristo?
16 Maʼ unaj u tuʼubultoʼoneʼ Jesuseʼ letiʼ u poolil le múuchʼuliloʼ (Col. 1:18). Lelaʼ upʼéel baʼax oʼolal unaj k-tsʼáaikba yáanal u nuʼuktaj le ancianoʼoboʼ yéetel k-jach «yaabilti[koʼob]» (1 Tes. 5:12, 13). Le ancianoʼoboʼ ku tsʼáaikubaʼob xan yáanal u nuʼuktaj Cristo yéetel ku yeʼeskoʼob ken u kaʼansoʼob baʼax ku yaʼalik Dios, maʼ le baʼax ku tuklikoʼoboʼ. Jeʼex u yaʼalik le Bibliaoʼ letiʼobeʼ maʼ tu píitmáanoʼob «tiʼ le baʼax tsʼíibaʼanoʼ», tumen maʼ u kʼáat u kaʼansoʼob chéen le baʼax ku tuklikoʼoboʼ (1 Cor. 4:6).
17. ¿Baʼaxten maʼ maʼalob ka u kaxt máak ka nojbeʼenkúuntaʼakiʼ?
17 Tuláakloʼon unaj k-kanáantik maʼ k-kaxtik chéen k-nojbeʼenil (Pro. 25:27). Lelaʼ letiʼe baʼax maʼ maʼalob tu beetaj utúul disipulo kʼaj óolaʼan tumen le apóstol Juanoʼ. Letiʼeʼ tu yaʼalaj: «Diótrefeseʼ maʼ tu kʼamikoʼon, tumen letiʼeʼ utstutʼaan u beetik u nojochil ichiloʼob. Le oʼolaleʼ, wa kin bineʼ, yaan in kʼaʼajsiktiʼ baʼax ku beetik ikil u máan u yaʼal baʼal kʼaas yéetel tuusoʼob t-contra» (3 Juan 9, 10). Wa táan u joʼopʼol u yantaltoʼon le tuukul beyaʼ, lelaʼ ku kaʼansiktoʼon jach kʼaʼabéet u xuʼulul k-kaxtik ka nojbeʼenkúuntaʼakoʼon. Le Bibliaoʼ ku yaʼaliktoʼon: «Le kaʼanal ichoʼ ku taasik paj subtal; le ojéelajoʼ tiʼ yaan yéetel le kabal óoloʼoboʼ». Le máaxoʼob ku tsʼoʼokbesikoʼob baʼax ku yaʼalik Jéeobaoʼ unaj u kanáantkoʼob maʼ u kaʼantal u yichoʼob tumen lelaʼ ku taasik subtsilil (Pro. 11:2; 16:18).
18. ¿Baʼax ken u yáantoʼon k-tsʼoʼokbes baʼax ku yaʼalik Jéeoba?
18 Unaj k-beetik tuláakal le ku páajtal utiaʼal maʼ k-beetik chéen baʼax k-kʼáat jeʼex u máakiloʼob le yóokʼol kaabaʼ yéetel unaj k-tsʼoʼokbesik baʼax u kʼáat Dios. Tuukulnakoʼon mantatsʼ tiʼ u jatsʼuts páajtalil k-meyajtik Jéeoba. Tumen tiʼ yanoʼon ichil u kaajaleʼ ku yeʼesik letiʼ tʼanoʼon yéetel u kiliʼich muukʼ utiaʼal ka yanakoʼoniʼ (Juan 6:44). Maʼ unaj k-ilik bey mix baʼal k-bisikba yéetel Jéeobaeʼ. Le oʼolaleʼ, unaj k-tsʼáaik óol k-eʼes ichil k-kuxtal maʼ táan k-beetik chéen baʼax k-kʼáatiʼ baʼaxeʼ k-kʼáat tsʼoʼokbes baʼax ku yaʼalik Jéeoba.
¿Kʼajaʼan wa tech?
• ¿Baʼax táakaʼan ichil u tsʼoʼokbesaʼal baʼax ku yaʼalik Jéeoba?
• ¿Bix u yáantkoʼon k-tsʼoʼokbes baʼax u kʼáat Jéeoba le «[k-chʼaʼanuʼuktik] baʼax le utsoʼ bey xan baʼax le kʼaasoʼ»?
• ¿Baʼaxoʼob tsʼoʼok u beetik Satanás utiaʼal maʼ u tsʼoʼokbesaʼal baʼax ku yaʼalik Jéeoba?
• ¿Baʼaxten kʼaʼabéet u yantaltoʼon kabal óolal utiaʼal k-tsʼoʼokbesik baʼax ku yaʼalik Jéeoba?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
«Unaj k-uʼuyik u tʼaan Jajal Dios, táanil tiʼ u tʼaan máakoʼob»
[U tsolajil le oochel teʼ táan juʼun 20]
U tsʼoʼokbesaʼal baʼax ku yaʼalik Jéeobaeʼ jach ku taasik yaʼab utsiloʼob