Bix jeʼel k-aktáantik le talamiloʼob ku yantal ken kʼaʼaytajnakoʼon joonaj joonailoʼ
Bix jeʼel k-aktáantik le talamiloʼob ku yantal ken kʼaʼaytajnakoʼon joonaj joonailoʼ
«Jajal Dioseʼ tu yáantoʼon utiaʼal ka [k-kʼaʼaytteʼex] le maʼalob péektsiloʼ yéetel tuláakal kʼub óolal, chúumuk tiʼ jumpʼéel nojoch chʼaʼapachtajil.» (1 TES. 2:2.)
1. ¿Baʼax talamiloʼob anchaj tiʼ Jeremías, yéetel bix tu aktáantiloʼob?
JEREMÍASEʼ utúul máak kaʼach jeʼex toʼoneʼ. Le ka tsʼaʼab u beet u profetaileʼ, letiʼeʼ tu yaʼalaj: «¡Yuumtsil [Jéeoba]! ¡Teneʼ jach paalen maʼ xan in wojel tʼaaniʼ!». Kex beyoʼ tu kʼubaj u yóol tiʼ Jéeoba ka tu kʼamaj le meyaj tsʼaʼabtiʼoʼ (Jer. 1:4-10). Maas tiʼ cuarenta jaʼaboʼob xáanchaj maʼ tu kʼaʼamal baʼax ku kʼaʼaytik, táan u chʼaʼapachtaʼal yéetel táan u yaʼalaʼal baʼal tiʼ, tsʼoʼoleʼ kʼuch tak loxbil (Jer. 20:1, 2). Kex tumen tu tuklaj u xulik u kʼaʼaytajeʼ, Jeremiaseʼ seguernaj u kʼaʼaytaj tiʼ le judíoʼob kex maʼ u kʼáatoʼobiʼ. Chéen yéetel u yáantaj Jéeoba béeychaj u tsʼoʼokbesik le meyaj tsʼaʼabtiʼoʼ (xokaʼak Jeremías 20:7-9).
2, 3. Jeʼex Jeremiaseʼ, ¿baʼax talamiloʼob k-aktáantik bejlaʼeʼ?
2 Yaʼab tiʼ toʼoneʼ k-uʼuyikba jeʼex Jeremíaseʼ. Le ka t-ojéeltaj kʼaʼabéet k-kʼaʼaytaj joonaj joonaileʼ, jujuntúul tiʼ toʼoneʼ t-tuklaj: «Teneʼ jach upuliʼ maʼ tu páajtal in beetik leloʼ». Baʼaleʼ, le ka t-ojéeltaj le u kʼáat Jéeoba ka k-beeteʼ, xuʼul k-chʼaʼik saajkil yéetel joʼopʼ k-kʼaʼaytaj. Yaʼab tiʼ toʼoneʼ t-aktáantaj talamiloʼob tu beetaj k-tuklik wa yaan u seguer u chúukpajal k-óol kʼaʼaytaj. U jaajileʼ maʼ chéen chʼaʼabil u káajal u kʼaʼaytaj máak joonaj joonai yéetel u chúukpajal u yóol u beet tak tu xuuliʼ (Mat. 24:13).
3 ¿Tsʼoʼok wa u chan xáantal joʼopʼok u tsʼaʼabaltech xook yéetel táan a bin muchʼtáambal, baʼaleʼ maʼ a chʼaʼatukult a jóokʼol kʼaʼaytaj joonaj joonailiʼ? Wa tsʼoʼok a wokjaʼeʼ, ¿talam wa a wilik a jóokʼol kʼaʼaytaj kex minaʼantech mix upʼéel kʼojaʼanil? Bejlaʼeʼ yaʼab máaxoʼob tsʼoʼok u pʼáatal maʼ talam u yilik u jóoʼloʼob kʼaʼaytaj joonaj joonailiʼ. Yéetel u yáantaj Jéeobaeʼ jeʼel xan u páajtal u seguer a kʼaʼaytajeʼ.
Maʼ unaj k-chʼaʼik saajkiliʼ
4. ¿Baʼax áant Pablo utiaʼal maʼ u chʼaʼik saajkil kʼaʼaytaj?
4 K-ojleʼ chéen yoʼolal u yáantaj u kiliʼich muukʼ Dios ku páajtal u yúuchul kʼaʼaytaj tiʼ tuláakal yóokʼol kaab (Zac. 4:6). Toʼon xaneʼ, chéen yoʼolal u yáantaj le kiliʼich muukʼ ku béeytal k-kʼaʼaytajoʼ (2 Cor. 4:7). Tuukulnakoʼon tiʼ baʼax úuch tiʼ le apóstol Pablooʼ. Yoʼolal le baʼax beetaʼabtiʼ bey xan tiʼ le máax láakʼintkoʼ, letiʼeʼ tu yaʼalaj: «Kex poʼochʼoʼon yéetel jaʼajatsʼaboʼon tu kaajil Filipo[seʼ] [...], Jajal Dioseʼ tu yáantoʼon utiaʼal ka [k-kʼaʼaytteʼex] le maʼalob péektsiloʼ yéetel tuláakal kʼub óolal, chúumuk tiʼ jumpʼéel nojoch chʼaʼapachtajil» (1 Tes. 2:2; Hch. 16:22-24). Kex tumen Pablo jach u yojel kʼaʼaytaj kaʼacheʼ, anchaj kʼiinoʼob jach talam tu yilil u kʼaʼaytik le maʼalob péektsiloʼ. Jeʼex toʼoneʼ, Pabloeʼ kʼaʼabéetchaj u yáantaʼal tumen Jéeoba utiaʼal maʼ u chʼaʼik saajkil kʼaʼaytaj (xokaʼak Efesoiloʼob 6:18-20). ¿Bix jeʼel k-beetik jeʼex letiʼeʼ?
5. ¿Baʼax kun áantkoʼon utiaʼal maʼ k-chʼaʼik saajkil kʼaʼaytaj?
5 Le payalchiʼoʼ jach jeʼel u yáantkoʼon utiaʼal maʼ k-chʼaʼik saajkil kʼaʼaytajeʼ. Utúul precursoraeʼ tu yaʼalaj: «Kin payalchiʼ utiaʼal maʼ in chʼaʼik saajkil tʼaan, kin payalchiʼ utiaʼal u kʼuchul tu puksiʼikʼal le máakoʼob le baʼax kin kaʼansiktiʼoboʼ, kin payalchiʼ utiaʼal u kiʼimaktal in wóol ken kʼaʼaytajnaken. Le meyajaʼ utiaʼal Jéeoba, maʼ k-tiaʼaliʼ. Le oʼolal chéen yéetel u yáantaj jeʼel u páajtal k-beetikeʼ» (1 Tes. 5:17). Tuláakloʼon unaj k-kʼáatik mantatsʼ tiʼ Jéeoba u kiliʼich muukʼ utiaʼal maʼ k-chʼaʼik saajkil kʼaʼaytaj (Luc. 11:9-13).
6, 7. 1) ¿Baʼax tsʼaʼab u yil Ezequiel, yéetel baʼax u kʼáat u yaʼale? 2) ¿Baʼax ku kaʼansiktoʼon le baʼax tsʼaʼab u yil Ezequieloʼ?
6 U libroi Ezequieleʼ ku tʼaan tiʼ upʼéel baʼax jeʼel xan u yáantkoʼon utiaʼal maʼ k-chʼaʼik saajkil kʼaʼaytajeʼ. Ichil upʼéel náayeʼ, Jéeobaeʼ tu tsʼáaj tiʼ Ezequiel upʼéel rollo tuʼux tu kaʼa tséelileʼ yaan «u tsʼíibiloʼob okʼol tʼaanoʼob, kʼiʼinamiloʼob yéetel u tʼaaniloʼob jaatsʼoʼob», tsʼoʼoleʼ ka tu yaʼalajtiʼ ka u jaante. Jéeobaeʼ tu yaʼalajtiʼ: «Lukʼ le tsʼíib kin tsʼáaik tiʼ techaʼ, naʼajkuntaba tu yéetel». ¿Baʼax u kʼáat u yaʼal lelaʼ? Ezequieleʼ unaj kaʼach u láaj jaantik le baʼax ken u kʼaʼaytoʼ. Lelaʼ u kʼáat u yaʼaleʼ unaj kaʼach u kʼuchul tu puksiʼikʼal. Ezequieleʼ ku seguer u yaʼalik: «Teneʼ tin jaantaj, ka tin wuʼuyaj sen chʼujuk bey kaabeʼ». Tiʼ Ezequieleʼ tu taasaj kiʼimak óolal u beetik le baʼax aʼalaʼabtiʼoʼ, bey ka u jaant kaabeʼ. Kex tumen yaan u kʼaʼaytik kaʼach upʼéel baʼax maʼ u kʼáat u yuʼub le máakoʼoboʼ, letiʼeʼ nojoch baʼal tu yilil u tʼaan yoʼolal Jéeoba yéetel u tsʼoʼokbesik le baʼax aʼalaʼabtiʼoʼ (xokaʼak Ezequiel 2:8–3:4, 7-9).
7 Le baʼax tsʼaʼab u yil Ezequielaʼ ku líiʼsik k-óol, tumen toʼon xaneʼ kʼaʼabéet k-tsʼáaik ojéeltbil upʼéel baʼal maʼ u kʼáat u yuʼub le máaxoʼob maʼ tu yilkoʼob u kʼaʼananil le baʼax k-beetkoʼ. Utiaʼal maʼ u lúubul k-óol beet le jatsʼuts meyaj u tsʼaamajtoʼon Jéeobaoʼ unaj u seguer k-maas kaambal tiʼ letiʼ. Wa chéen wa baʼax kʼiin k-xokik le Biblia bey xan wa maʼ t-xakʼaltikeʼ, maʼ ken k-jach naʼat baʼax ku kaʼansiktoʼon Jéeoba. ¿Jeʼel wa u páajtal a xakʼaltik yéetel a xokik mantatsʼ le Bibliaoʼ? ¿Baʼaxten maʼ ta wilik a maas tuukul tiʼ le baʼax ka xokkoʼ? (Sal. 1:2, 3.)
Bix jeʼel k-káajsik k-tsikbal yéetel le máakoʼoboʼ
8. ¿Baʼax tsʼoʼok u yáantik jujuntúul sukuʼunoʼob utiaʼal ka u káajsoʼob upʼéel tsikbal yéetel u yuumil naj? (Ilaʼak le recuadro yaan teʼ táan juʼun 9.)
8 Yaʼab j-kʼaʼaytajoʼobeʼ talam u yilkoʼob u káajskoʼob upʼéel tsikbal yéetel u yuumil naj, yéetel yaan tuʼuxoʼobeʼ maas talam u beetaʼal. Jujuntúul sukuʼunoʼobeʼ maas maʼ talam u káajskoʼob upʼéel tsikbal wa ku tuklikoʼob táanil baʼax ken u yaʼaloʼob yéetel tu tsʼookeʼ ku pʼatikoʼob upʼéel tratado, jeʼex u yaʼalik le recuadro ka beetaʼakoʼ. Maʼ xaaneʼ u kʼaabaʼ yéetel le booniloʼob ku taasik le tratadoaʼ jeʼel u beetik u taaktal u yuʼubik u yuumil naj baʼaxten binoʼon xíimbalte yéetel tu tsʼookeʼ maʼalob ka k-beet upʼéel kʼáatchiʼ tiʼ. Jeʼel xan u páajtal u k-eʼesiktiʼ óoxpʼéel wa kampʼéel tratadoʼob utiaʼal ka u chʼaʼa le maas utstuyichoʼ. Baʼaleʼ leloʼ maʼ u kʼáat u yaʼal wa chéen yaan k-máan tʼox tratadoʼob joonaj joonailiʼ, baʼaxeʼ utiaʼal k-káajsik tsikbal yéetel k-tsʼáaik xook tiʼ le máakoʼob yéetel le Bibliaoʼ.
9. ¿Baʼaxten jach kʼaʼabéet k-líiʼsikba tubeel?
9 Jeʼel bixak ka k-kʼaʼayt le maʼalob péektsiloʼ, utiaʼal u yantaltoʼon kiʼimak óolal yéetel utiaʼal maʼ k-chʼaʼik saajkileʼ unaj k-líiʼsikba tubeel. Utúul precursoreʼ tu yaʼalaj: «Wa in líiʼsmimba tubeeleʼ, maas ku taasikten kiʼimak óolal in jóokʼol kʼaʼaytaj, tumen in kʼáat in waʼal le baʼax tin tuklaj ken in kʼaʼaytoʼ». Uláakʼ precursoreʼ tu yaʼalaj: «Wa in wojel baʼax ku yaʼalik le jóoʼsaʼaniloʼoboʼ, maas maʼ saajken in kʼaʼaytoʼobiʼ». Kex tumen maʼalob ka u máans máak tu tuukul baʼax ken u yaʼal ken u líiʼsubaeʼ, yaan sukuʼunoʼobeʼ tsʼoʼok u yilkoʼob maas maʼalob ka u ensayartoʼob. Wa ku beetkoʼob beyoʼ táan u tsʼoʼokbeskoʼob tubeel le meyaj tsʼaʼantiʼob tumen Jéeobaoʼ (Col. 3:23; 2 Tim. 2:15).
10. ¿Bix jeʼel u maas jóoʼsaʼal u yutsil leʼ muchʼtáambaloʼob ku beetaʼal utiaʼal u jóokʼol máak kʼaʼaytajoʼ?
10 Teʼ muchʼtáambaloʼob ku beetaʼal utiaʼal u jóokʼol máak kʼaʼaytajoʼ ku kaʼansaʼaltoʼon bix jeʼel k-kʼaʼaytaj maas maʼalob utiaʼal ka yanaktoʼon kiʼimak óolal. Wa u tekstoi le kʼiin yaan baʼax yil yéetel le kʼaʼaytajoʼ, jeʼel u páajtal u xokaʼal yéetel u xakʼaltaʼaleʼ. Baʼaleʼ le sukuʼun nuʼuktik le muchʼtáambalaʼ maases unaj u jóoʼsik u súutukil utiaʼal u tsolik wa u beetik u yeʼesaʼal upʼéel bix jeʼel u yúuchul kʼaʼaytaj teʼ kʼiin jeʼeloʼ. Beyoʼ le sukuʼunoʼoboʼ yaan u maas maʼalobtal bix u kʼaʼaytajoʼob. Wa le ancianoʼob bey xan le máaxoʼob nuʼuktik le muchʼtáambal ku líiʼskubaʼob tubeeloʼ, yaan u páajtal u yáantkoʼob le sukuʼunoʼoboʼ yéetel yaan u tsʼoʼokol tu yorai le muchʼtáambalaʼ (Rom. 12:8).
Utsiloʼob ku taasik u chʼenxikintaʼal u yuumil naj
11, 12. ¿Baʼax utsil ku taasik u chʼenxikintaʼal le baʼax ku yaʼalik u maasiloʼ? Tsikbalt upʼéel baʼax uchaʼan.
11 Wa k-kʼáat ka u yuʼub yéetel ka kʼuchuk tu puksiʼikʼal u yuumil naj le baʼax k-kʼaʼaytik tiʼoʼ, maʼ chéen unaj k-líiʼsikba tubeeliʼ, baʼaxeʼ unaj k-eʼesiktiʼob k-kʼáat áantoʼob. Lelaʼ yaan k-eʼesiktiʼob ken k-chʼenxikintoʼob. Utúul superintendente tiʼ circuitoeʼ tu yaʼalaj: «U chúukpajal k-óol k-chʼenxikint baʼax ku yaʼalaʼaltoʼoneʼ ku beetik u taaktal u yuʼubaʼal baʼax k-kʼaʼaytik yéetel upʼéel bix k-eʼesik k-yaabilmaj yéetel k-kʼáat áant k-éet máakil». U kanik máak u chʼenxikint u maasileʼ ku beetik u jelpajal bix u tuukul le máakoʼoboʼ, jeʼex ken k-il tiʼ le baʼax úuchaʼ.
12 Le periódico Le Progrès, tiʼ u noj kaajil Saint-Étienne yaan tu luʼumil Franciaeʼ, tu jóoʼsaj u carta utúul koʼolel kíim u chan hija yaan óoxpʼéel mesoʼob kaʼach tiʼ. Le koʼoleloʼ tu yaʼaleʼ le maʼ sen úuch kíimik u hijaoʼ kaʼatúul koʼoleloʼob tʼaanajoʼob tu yotoch. Le koʼolelaʼ tu yaʼalaj: «Tu séebaʼanil tin tsʼáaj cuenta u j-jaajkunajoʼob Jéeoba. Nikaʼaj kaʼach in waʼaltiʼob maʼ in kʼáat in wuʼuyoʼobiʼ, baʼaleʼ tin wilaj yantiʼob upʼéel folleto ku tʼaan tiʼ baʼaxten ku chaʼik Dios u yantal muʼyajil. Tin máansoʼob ichil in wotoch chéen utiaʼal ka in waʼaltiʼob maʼ jaaj le baʼax ku kaʼanskoʼoboʼ. [...] Le koʼoleloʼobaʼ maas tiʼ upʼéel ora tsikbalnajoʼob tin wéetel yéetel jach tu chʼenxikintenoʼob. Ka tsʼoʼok k-tsikbaleʼ jach maʼalob tin wuʼuyilimba, le oʼolal tin waʼalajtiʼob ka kaʼa suunakoʼob» (Rom. 12:15). Ka máan kʼiineʼ, le koʼolelaʼ tu yóotaj ka tsʼaʼabak xook tiʼ. Le baʼax maas tu kʼaʼajsaj le koʼolelaʼ maʼ letiʼe baʼax aʼalaʼabtiʼoʼ, baʼaxeʼ letiʼe bix úuchik u chʼenxikintaʼaloʼ.
13. ¿Baʼax unaj k-beetik utiaʼal k-tʼaan tiʼ baʼax utstutʼaan u tsikbal le máakoʼob yanoʼob teʼ tuʼux kajaʼanoʼonoʼ?
13 Wa k-chʼenxikintik le máakoʼob ken u tsikbaltoʼob baʼax talamil táan u aktáantkoʼobeʼ, yaan u páajtal k-tsoliktiʼob tubeel baʼax ken u beet u Reino Dios tu yoʼolaloʼob. Maʼ xaaneʼ tsʼoʼok a wilkeʼ le sukuʼunoʼob jach maʼalob u kʼaʼaytajoʼoboʼ letiʼe ku chʼenxikintkoʼob baʼax ku yaʼalik u yuumil najoʼ (Pro. 20:5). Letiʼobeʼ jach tu jaajil u kʼáat u yáantoʼob le máakoʼob ku xíimbalkoʼoboʼ. Maʼ chéen ku tsʼíibkoʼob u kʼaabaʼob yéetel tuʼux kajaʼanoʼobiʼ, baʼaxeʼ ku tsʼíibkoʼob xan tiʼ baʼax utstutʼaan u tsikbaloʼob yéetel tiʼ baʼax kʼaʼabéet u yáantaʼaloʼob. Wa yaan máax ku tsikbaltiktiʼob baʼax talamil yantiʼeʼ, le sukuʼunoʼobaʼ ku kaxkoʼob jóoʼsaʼaniloʼob ku tʼaan tiʼ le talamiloʼ yéetel maʼ tu xáantal ken u bisoʼobtiʼ. Jeʼex Pabloeʼ, ku tʼaanoʼob tiʼ baʼax utstutʼaan u tsikbal u yuumil naj (xokaʼak 1 Corintoiloʼob 9:19-23). Lelaʼ ku beetik u maas taaktal u kaambaloʼob tiʼ Dios yéetel k-eʼesik «u yaakunaj yéetel u chʼaʼa óotsilil k-Jajal Dios» (Luc. 1:78).
Maʼ u lúubul k-óol
14. Ken kʼaʼaytajnakoʼoneʼ, ¿bix k-chíikbesik u jatsʼuts modos Jéeoba?
14 Le ka tu tsʼáajtoʼon u páajtalil k-yéeyik baʼax ken k-beeteʼ, Jéeobaeʼ tu yeʼesaj jach u yaabilmoʼon. Kex minaʼan u xuul u páajtalileʼ, maʼatech u obligarkoʼon k-meyajte, baʼaxeʼ u kʼáat ka k-natsʼba tu yiknal yoʼolal le yaabilaj ku yeʼesiktoʼonoʼ, yéetel le máaxoʼob meyajkoʼ ku kʼamikoʼob yaʼab utsiloʼob (Rom. 2:4). Toʼoneʼ mantatsʼ unaj k-líiʼsmakba utiaʼal k-kʼaʼaytik le maʼalob péektsil jeʼex u kʼáat Jéeobaoʼ (2 Cor. 5:20, 21; 6:3-6). Utiaʼal k-beetkeʼ maʼ unaj u lúubul k-óol k-kʼaʼaytaj tiʼ le máakoʼob yanoʼob teʼ tuʼux kajaʼanoʼonoʼ, baʼaleʼ leloʼ maʼ chéen chʼaʼabiliʼ. ¿Baʼax ken u yáantoʼon utiaʼal maʼ u lúubul k-óol?
15. 1) ¿Baʼax unaj kaʼach u beetik le apostoloʼob wa yaan máax maʼ u kʼáat u yuʼuboʼobiʼ? 2) ¿Bix jeʼel k-tsʼáaik k-óol k-kaxt le máaxoʼob taak u maas kaambaloʼoboʼ?
15 Jesuseʼ tu yaʼalaj tiʼ u apostoloʼob maʼ u lúubul u yóoloʼob wa yaan máax maʼ u kʼáat u yuʼuboʼob le baʼax ku kʼaʼaytkoʼoboʼ, baʼaxeʼ unaj u kaxkoʼob le máaxoʼob taak u maas kaambaloʼoboʼ (xokaʼak Mateo 10:11-15). ¿Bix jeʼel k-beetik jeʼex letiʼobeʼ? Unaj k-ilik beetik jujumpʼéel baʼaloʼob jeʼel u yáantkoʼon utiaʼal maʼ u lúubul k-óol kʼaʼaytajeʼ. Utúul sukuʼun ku ketikuba yéetel utúul máax ku kaxtik oroeʼ ku yaʼalik: «Kexiliʼ ka in kaxt upʼíit oro bejlaʼeʼ». Uláakʼ sukuʼuneʼ ku chʼaʼatuklik u «kaxtik cada semana utúul máax u kʼáat maas kaambal yéetel maʼ tu xáantal ken kaʼa suunak u xíimbalte». Uláakʼ j-kʼaʼaytajoʼob xaneʼ ku yilik u xokkoʼob tiʼ u yuumil naj kex upʼéel teksto tiʼ le Biblia cada ken jóoʼkoʼob kʼaʼaytajoʼ. Utiaʼal maʼ u lúubul a wóol teʼ kʼaʼaytajoʼ, ¿baʼax maʼalob ka a chʼaʼatukult a beetik?
16. ¿Baʼaxten maʼ tu xuʼulul k-kʼaʼaytaj?
16 Wa yaan máax maʼ u kʼáat u yuʼub baʼax k-kʼaʼaytkeʼ leloʼ maʼ u kʼáat u yaʼal wa maʼ táan u bintoʼon utsil teʼ kʼaʼaytajoʼ. Kex tumen k-kʼaʼaytaj utiaʼal u salvarkuba le máaxoʼob uts u puksiʼikʼaloʼoboʼ, yaan uláakʼ baʼax oʼolaloʼob k-kʼaʼaytaj. ¿Máakalmáakoʼobiʼ? Ku páajtal k-eʼesik k-yaabilmaj Jéeoba (1 Juan 5:3). Tsʼoʼoleʼ ku yáantaj utiaʼal maʼ u yalaʼal wa t-oʼolal kíim le máakoʼoboʼ (Hch. 20:26, 27). Ku meyaj xan utiaʼal u yaʼalaʼal tiʼ le kʼasaʼan máakoʼob «tsʼoʼok u kʼuchul u kʼiinil u pʼis óol» Jéeobaoʼ (Apo. 14:6, 7). Baʼaleʼ, maases k-beetik utiaʼal u nojbeʼenkúuntaʼal u kʼaabaʼ Dios tiʼ tuláakal le yóokʼol kaabaʼ (Sal. 113:3). Le oʼolaleʼ, kex ka uʼuyaʼakoʼon wa maʼeʼ, maʼ unaj u xuʼulul k-kʼaʼaytik le maʼalob péektsiloʼ. Maʼ u tuʼubultoʼoneʼ Jéeobaeʼ jach nojoch baʼal u yilik tuláakal le baʼax k-beetik utiaʼal k-kʼaʼaytik baʼax ken u beet u Reinooʼ (Rom. 10:13-15).
17. ¿Baʼax ken u tsʼáa cuenta le máakoʼob maʼ kun xáantaloʼ?
17 Kex óoliʼ tuláakal máak maʼ u kʼáat u yuʼuboʼoneʼ, maʼ kun xáantaleʼ yaan u tsʼáaikoʼob cuenta jach jaaj le baʼax t-kʼaʼaytajtiʼoboʼ (Mat. 24:37-39). Jéeobaeʼ tu yaʼalaj tiʼ Ezequieleʼ ken kʼuchuk u kʼiinil le pʼis óol aʼalaʼabtiʼ ka u kʼaʼaytoʼ, le israelitaʼob maʼ tu yuʼuboʼob tʼaanoʼ «bíin u yojéeltoʼob yaan [profeta] ichiloʼob» kaʼachi (Eze. 2:5). Bejlaʼa xaneʼ, ken u pʼis óolt Jéeoba le kʼasaʼan máakoʼoboʼ, yaan u tsʼáaikoʼob cuentaeʼ u j-jaajkunajoʼob Jéeobaeʼ jach tu jaajil Dios túuxtoʼob kʼaʼaytaj joonaj joonai. ¿Máasaʼ jach nojoch baʼal k-ilik k-tʼaan tu kʼaabaʼ Jéeoba yéetel k-tsʼáaik ojéelbil baʼax ken u beet maʼ kun xáantaloʼ? Le oʼolaleʼ maʼ u xuʼulul k-kʼáatik u yáantaj Jéeoba utiaʼal k-aktáantik tuláakal le talamiloʼob ku yantal ken kʼaʼaytajnakoʼon joonaj joonailoʼ.
¿Baʼax jeʼel a núukikeʼ?
• ¿Baʼax jeʼel k-beetik utiaʼal maʼ k-chʼaʼik saajkil kʼaʼaytajeʼ?
• ¿Baʼax ken u yáantoʼon k-káajs upʼéel tsikbal yéetel u yuumil naj?
• ¿Bix k-eʼesik jach tu jaajil k-kʼáat áant le máakoʼoboʼ?
• ¿Baʼax unaj k-beetik utiaʼal maʼ u lúubul k-óol k-kʼaʼaytaj tiʼ le máakoʼob yanoʼob teʼ tuʼux kajaʼanoʼonoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
Jejeláas bix jeʼel k-káajsik k-tsikbal yéetel le máakoʼoboʼ
[U tsolajil le oochel teʼ táan juʼun 9]
Utiaʼal a káajsik le tsikbaloʼ:
▪ Ken tsʼoʼokok a tsikik u yuumil najeʼ, jeʼel u páajtal a tsʼáaiktiʼ upʼéel tratado yéetel a waʼaliktiʼ: «Taalen in xíimbaltech tumen in kʼáat in waʼaltech upʼéel baʼal jach jatsʼuts yaan yil yéetel lelaʼ».
▪ Wa maʼ xaaneʼ ken tsʼoʼokok a tsʼáaik le tratado tiʼoʼ, jeʼel u páajtal a waʼalikeʼ: «Jáan taalen in xíimbaltech tumen in kʼáat in wojéelt baʼax ka tuklik yoʼolal lelaʼ».
Wa ku chʼaʼik le tratadooʼ
▪ Chaʼa u chaʼantik u chan súutuk, tsʼoʼoleʼ kʼáattiʼ baʼax ku tuklik yoʼolal le baʼax ku yaʼalik le tratadooʼ.
▪ Chʼenxikint baʼax ken u yaʼaltech yéetel ilawil a naʼatik baʼaxten bey úuchik u núukikoʼ. Tsʼáa u nib óolalil tiʼ yéetel maʼ a tuʼubsik le baʼax tu yaʼaloʼ.
Utiaʼal u seguer le tsikbaloʼ
▪ Xok upʼéel wa maas tekstoʼob yéetel ilawil a tsolik baʼax ku yaʼalkoʼob. Tʼaanen tiʼ baʼax utstutʼaan u tsikbal yéetel tiʼ baʼax kʼaʼabéet u yáantaʼal u yuumil naj.
▪ Wa letiʼ u kʼáat maas kaambaleʼ, tsʼáa upʼéel jóoʼsaʼanil tiʼ yéetel wa ku páajtaleʼ eʼestiʼ bix u tsʼaʼabal xook yéetel le Bibliaoʼ. Aʼaltiʼ yaan a kaʼa suut a xíimbalte.