¿Ka tʼanik wa tubeel le «tʼaan sakkúunsaʼan[oʼ]»?
¿Ka tʼanik wa tubeel le «tʼaan sakkúunsaʼan[oʼ]»?
«Yaan in kʼexik u tʼaan tuláakal le kaajoʼoboʼ, utiaʼal ka in tsʼáatiʼob upʼéel tʼaan sakkúunsaʼan, utiaʼal beyoʼ ka u chʼaʼachiʼitoʼob tuláakloʼob u kʼaabaʼ Jéeoba.» (SOF. 3:9, NM.)
1. ¿Baʼax jatsʼuts páajtalil u tsʼaamajtoʼon Jéeoba?
JÉEOBA tsʼáa u jatsʼuts páajtalil tiʼ wíinik utiaʼal u tʼaan (Éxo. 4:11, 12). Le ka beetaʼab Adán tumen Dioseʼ maʼ chéen tsʼaʼab u páajtalil u tʼaaniʼ, baʼaxeʼ tsʼaʼab tak u páajtalil u yaʼalik túumben tʼaanoʼob (Gén. 2:19, 20, 23). ¿Máasaʼ jach jatsʼuts le baʼax tsʼaʼabtiʼaʼ? Lelaʼ ku meyajtoʼon utiaʼal k-payalchiʼ tiʼ Dios yéetel k-nojbeʼenkúuntik u kʼaabaʼ.
2. ¿Baʼaxten xuʼul u tʼanik wíinik upʼéeliliʼ tʼaan?
2 Desde ka beetaʼab wíinikeʼ, máan mil setecientos jaʼaboʼob «chéen jumpʼéeliliʼ tʼaan» ku beetaʼal kaʼachiʼ (Gén. 11:1). Baʼaleʼ lelaʼ xuʼul tu kʼiiniloʼob Nimrod (Nemrod), le ka tu tsʼáajuba le máakoʼob tu contra Diosoʼ. Tumen maʼ u kʼáat u beetoʼob kaʼach baʼax tu yaʼalaj Jéeobaeʼ, u múuchʼ máakoʼobeʼ pʼáatoʼob kajtal teʼ kúuchil kʼaabaʼtaʼab Babeloʼ. Tu káajsaj u beetkoʼob upʼéel sen kaʼanal naj, baʼaleʼ maʼ utiaʼal u nojbeʼenkúuntkoʼob Diosiʼ, baʼaxeʼ utiaʼal u «yantal baʼax oʼolal [u kʼaʼajsaʼaloʼob]». Le beetik Jéeobaeʼ tu xaʼakʼbesaj u tʼaanoʼob, bey túun úuchik u kʼiʼitpajal wíinik tiʼ tuláakal le Luʼumaʼ (xokaʼak Génesis 11:4-8).
3. ¿Baʼax úuch le ka tu kʼexaj Jéeoba u tʼaan le máakoʼob yanoʼob Babeloʼ?
3 Cada upʼéel tiʼ le u milesi tʼaanoʼob ku beetaʼal bejlaʼeʼ (ku tuklaʼaleʼ maas tiʼ seis mil ochocientos tʼaanoʼob), ku yeʼesikeʼ maʼ upʼéeliliʼ bix u tuukul wíinikiʼ. Le oʼolal jeʼel u páajtal u yaʼalaʼaleʼ, le ka tu xaʼakʼbesaj Jéeoba u tʼaan le máakoʼoboʼ maʼ chéen tu luʼsaj tu tuukuloʼob le tʼaan u yojloʼoboʼ mix xan chéen tu tsʼáajtiʼob upʼéel túumben tʼaaniʼ, baʼaxeʼ tu kʼexaj tuláakal baʼax ku tuklikoʼob, bey túun úuchik u yantal uláakʼ tʼaanoʼoboʼ. Le beetikeʼ, le kúuchil tuʼux úuch lelaʼ kʼaabaʼintaʼab Babel wa «Xaʼakʼbesaj» (Gén. 11:9). U jaajileʼ chéen le Biblia aʼalik bix úuchik u yantal uláakʼ tʼaanoʼoboʼ.
Upʼéel tʼaan túumben yéetel sakkúunsaʼan
4. ¿Baʼax tu yaʼalaj Jéeoba kun úuchul teʼ kʼiinoʼobaʼ?
4 Kex jach jatsʼuts u tsikbalil baʼax tu beetaj Jéeoba tu kaajil Babeloʼ, teʼ kʼiinoʼobaʼ táan u yúuchul upʼéel baʼal maas kʼaʼanan yéetel jach jatsʼuts. Jéeobaeʼ tu yaʼalaj tiʼ le profeta Sofoníasoʼ: «Yaan in kʼexik u tʼaan tuláakal le kaajoʼoboʼ, utiaʼal ka in tsʼáatiʼob upʼéel tʼaan sakkúunsaʼan, utiaʼal beyoʼ ka u chʼaʼachiʼitoʼob tuláakloʼob u kʼaabaʼ Jéeoba, utiaʼal ka u meyajtoʼob chéen yéetel jumpʼéeliliʼ keléembal» (Sof. 3:9, NM). ¿Baʼax le tʼaan sakkúunsaʼanoʼ, yéetel bix jeʼel k-tʼanik tubeeleʼ?
5. ¿Baʼax le «tʼaan sakkúunsaʼan[oʼ]», yéetel baʼax utsiloʼob tsʼoʼok u taasik le u tʼaʼanloʼ?
5 Le tʼaan sakkúunsaʼanoʼ, letiʼe u jaajil yoʼolal Diosoʼ bey xan le baʼax ken u beetoʼ, yéetel lelaʼ tiaʼan teʼ Bibliaoʼ. Le máaxoʼob u yojloʼob le «tʼaanaʼ» ku naʼatkoʼob tubeel baʼax le Reinooʼ, bix ken u kiliʼichkúunt u kʼaabaʼ Dios, bix ken u yeʼes chéen letiʼ unaj u gobernar yéetel bix ken u taas kiʼimak óolal tiʼ le máaxoʼob utsoʼoboʼ. ¿Baʼax utsiloʼob tsʼoʼok u taasik le u tʼaʼanal le «tʼaan sakkúunsaʼan[oʼ]»? Jeʼex tu yaʼalil Sofoníaseʼ, le máakoʼoboʼ yaan «u chʼaʼachiʼit[koʼob] u kʼaabaʼ Jéeoba, utiaʼal ka u meyajtoʼob chéen yéetel jumpʼéeliliʼ keléembal». Bejlaʼeʼ táan u nojbeʼenkúuntaʼal Jéeoba yéetel múuchʼ yanik u kaajal, maʼ jeʼex úuchik tu kaajil Babeleʼ.
Bix u kanaʼal le tʼaan sakkúunsaʼanoʼ
6, 7. 1) ¿Tiʼ baʼax chíikaʼan u kanik máak upʼéel túumben tʼaan tiʼ u kanaʼal le tʼaan sakkúunsaʼanoʼ? 2) ¿Baʼax ken k-il teʼ xookaʼ?
6 Utiaʼal u kanik máak upʼéel túumben tʼaaneʼ kʼaʼabéet u kʼexik bix u tuukul. Kʼaʼabéet u joʼopʼol u tuukul jeʼex u tuukul le máaxoʼob u yojloʼob le tʼaanoʼ. Utiaʼal xan u yaʼalaʼal tubeel jujumpʼéel tʼaanoʼobeʼ kʼaʼabéet u kʼexik máak bix u péeksik u yaakʼ. Bey u yúuchul xan yéetel le máaxoʼob táan u kanikoʼob le tʼaan sakkúunsaʼanoʼ. Maʼ chéen yaan yéetel k-kanik jujumpʼéel kaʼansajoʼob tiʼ le Bibliaoʼ, baʼaxeʼ kʼaʼabéet k-kʼexik bix k-tuukul (xokaʼak Romailoʼob 12:2; Efesoiloʼob 4:23).
7 Baʼaleʼ maʼ chéen unaj u naʼatik máak le tʼaan sakkúunsaʼanoʼ, baʼaxeʼ unaj u tʼanik tubeel. ¿Bix jeʼel u páajtal k-beetkeʼ? Letiʼe k-beetik jeʼex le máakoʼob ku kankoʼob upʼéel túumben tʼaanoʼ. Koʼox ilik bix u beetkoʼob yéetel bix jeʼel u meyajtoʼon utiaʼal k-kanik tubeel le tʼaan sakkúunsaʼanoʼ.
Bix jeʼel k-tʼanik tubeel le tʼaan sakkúunsaʼanoʼ
8, 9. ¿Baʼax unaj k-beetik utiaʼal k-kanik le tʼaan sakkúunsaʼanoʼ, yéetel baʼaxten jach kʼaʼabéet?
8 Chʼenxikint bix u yaʼalaʼal wa baʼax. U jaajileʼ ken u yuʼub máak upʼéel tʼaan maʼ u yojleʼ maʼ tu naʼatik mix baʼal (Isa. 33:19). Baʼaleʼ jeʼex u suuktal u yuʼubikeʼ ku kʼaj óoltik yéetel ku kanik jujumpʼéel tʼaanoʼob. Le beetikeʼ, le Bibliaoʼ ku yaʼalik: «Unaj k-chʼenxikin[tik] [tubeel] le baʼax tsʼoʼok k-uʼuyikoʼ, utiaʼal maʼ k-saʼatal» (Heb. 2:1). Jesuseʼ mantatsʼ tu yaʼalaj tiʼ u disipuloʼob: «Le máax yaan u xikineʼ uʼuyajnak» (Mat. 11:15; 13:43; Mar. 4:23; Luc. 14:35). Bey túunoʼ utiaʼal k-kanik tubeel le tʼaan sakkúunsaʼanoʼ, kʼaʼabéet k-chʼenxikintik baʼax ku kaʼansaʼaltoʼon yéetel k-ilik naʼatik (Mat. 15:10; Mar. 7:14).
9 U jaajileʼ, utiaʼal u chʼenxikintik máak baʼax ku yaʼalaʼaleʼ maʼ unaj u náayal u yóoliʼ, yéetel u beetaʼaleʼ maʼ chéen kuneliʼ (Luc. 8:18). ¿Suuk wa a chʼenxikintik baʼax ku yaʼalaʼal teʼ muchʼtáambaloʼoboʼ wa maases ku náayal a wóol? Wa maʼ k-tsʼáaik k-óol chʼenxikint baʼax ku kaʼansaʼaleʼ, maʼ ken k-naʼat mix baʼal (Heb. 5:11).
10, 11. 1) Kex maʼalob ka k-chʼenxikint le baʼax ku kaʼansaʼaltoʼonoʼ, ¿baʼax uláakʼ kʼaʼabéet k-beetik? 2) ¿Baʼax uláakʼ xan unaj k-beetik utiaʼal k-tʼanik le tʼaan sakkúunsaʼanoʼ?
10 Beet jeʼex le máaxoʼob u yojloʼob le tʼaanoʼ. Le máaxoʼob táan u kanikoʼob upʼéel túumben tʼaaneʼ, maʼ chéen ku yaʼalaʼaltiʼob ka u chʼenxikintoʼob baʼax ku yaʼalaʼaliʼ, baʼaxeʼ ka u beetoʼob jeʼex le máaxoʼob u yojloʼob le tʼaanoʼ. Wa ku beetkoʼobeʼ, maʼ kun uʼuybil wa kambil tu beetiloʼob yéetel maas séeb kun naʼatbil baʼax ku yaʼalikoʼob. Toʼon xaneʼ unaj k-kaambal tiʼ le máaxoʼob jach u yojloʼob le tʼaan sakkúunsaʼanoʼ yéetel jach maʼalob u kaʼansajoʼoboʼ (2 Tim. 4:2). Kʼáat áantaj yéetel chʼaʼa en cuenta baʼax ku yaʼalaʼaltech (xokaʼak Hebreob 12:5, 6, 11).
11 Utiaʼal k-tʼanik le tʼaan sakkúunsaʼanoʼ maʼ chéen unaj k-creertik yéetel k-kaʼansik tiʼ uláakʼoʼobiʼ, kʼaʼabéet xan k-beetik baʼax ku yaʼaliktoʼon Dios. ¿Bix jeʼel k-beetkeʼ? Letiʼe k-beetik jeʼex uláakʼ sukuʼunoʼoboʼ. Unaj u yantaltoʼon le fe yéetel le chúukaʼan óolal tsʼoʼok u yeʼeskoʼob ikil u meyajkoʼob Diosoʼ. Jesuseʼ letiʼe máax tsʼoʼok u jach eʼesiktoʼon bix unaj k-beetkoʼ (1 Cor. 11:1; Heb. 12:2; 13:7). Wa k-beetkeʼ yaan k-áantaj utiaʼal ka yanak jeetsʼelil ichil le múuchʼuliloʼ, yéetel yaan k-tʼaan jeʼel bix letiʼobeʼ (1 Cor. 4:16, 17).
12. ¿Baʼax ku beetik yaʼab máakoʼob utiaʼal u kanikoʼob upʼéel túumben tʼaan?
12 Ilawil maʼ u tuʼubultech le baʼax ka kanikoʼ. Le máaxoʼob ku kanikoʼob upʼéel túumben tʼaaneʼ kʼaʼabéet u yilkoʼob maʼ u tuʼubultiʼob le tʼaanoʼob ku kankoʼoboʼ. Utiaʼal u béeytal u tʼankoʼob tubeel le tʼaan sakkúunsaʼanoʼ, le máaxoʼob meyajtik Diosoʼ unaj xan u yilikoʼob maʼ u tuʼubultiʼob le baʼax ku kankoʼoboʼ. Upʼéel bix jeʼel u beetaʼaleʼ letiʼe u kanaʼal tu tsoolol u libroiloʼob le Bibliaoʼ. Yaan máaxoʼobeʼ tsʼoʼok u kanikoʼob jujumpʼéel canticoʼob, le jatsʼuts modosoʼob ku tsʼáaik le kiliʼich muukʼoʼ, u kʼaabaʼ u doce chʼiʼibaloʼob Israel yéetel u kʼaabaʼ le doce apostoloʼoboʼ. Yéetel uláakʼoʼobeʼ tsʼoʼok u kanikoʼob jujumpʼéel tekstoʼob tiʼ le Bibliaoʼ. Jeʼex utúul chan xiʼipal yaan seis jaʼaboʼob tiʼeʼ, tu kanaj ochenta versiculoʼob tiʼ le Bibliaoʼ. Tsʼoʼoleʼ tak úuchjeakileʼ le israelitaʼoboʼ tu kanoʼob le salmoʼoboʼ. ¿Jeʼel wa xan u páajtal a beetik beyoʼ?
13. ¿Baʼaxten mantatsʼ unaj k-kʼaʼajsik le baʼax k-kankoʼ?
13 Utiaʼal maʼ u tuʼubultech wa baʼaxeʼ unaj a kʼaʼajsik mantatsʼ. Le oʼolal mantatsʼ kʼaʼabéet u kʼaʼajsaʼaltoʼon le baʼax ku yaʼalik le Bibliaoʼ. Le apóstol Pedrooʼ tu yaʼalaj: «Bíin in kaʼaj in kʼaʼajesteʼex mantatsʼ le baʼaloʼobaʼ, kex tsʼoʼok a wojéeltikeʼexeʼ yéetel jeetsʼel a wanileʼex tiʼ le jaaj yanteʼex[oʼ]» (2 Ped. 1:12). K-kʼaʼajsik mantatsʼ le baʼax k-xokikoʼ ku yáantkoʼon k-maas naʼate bey xan k-chʼaʼatuklik meyajtik Dios (Sal. 119:129). Wa k-xokik mantatsʼ le baʼaxoʼob ku yaʼalik le Bibliaoʼ, yaan k-ilik wa maʼalob baʼaxoʼob k-beetik yéetel maʼ kun séeb tuʼubultoʼon baʼax k-kanik, wa jeʼex u yaʼalik le Bibliaoʼ yaan k-pʼáatal bey «máax maʼ [tu] tuʼubultiʼ baʼax ku yuʼubik[eʼ]» (Sant. 1:22-25). Wa maʼ t-kʼaʼajsik le baʼaxoʼob k-kankoʼ, jeʼel u káajal k-tsʼáaik táanil ichil k-kuxtal yaanal baʼaleʼ yéetel jeʼel u xuʼulul k-tʼanik le tʼaan sakkúunsaʼanoʼ.
14. ¿Baʼax ken u yáantoʼon k-kan le tʼaan sakkúunsaʼanoʼ?
14 Unaj a xook kʼaʼam (Rev. 1:3, NM). Jujuntúul tiʼ le máaxoʼob táan u kankoʼob upʼéel túumben tʼaanoʼ, maʼ kʼaʼam u yaʼalikoʼob le baʼax ku kankoʼoboʼ, baʼaleʼ leloʼ maʼ tu jach taasik utsil. Ken k-xakʼalxokt le tʼaan sakkúunsaʼanoʼ yaan kʼiin kʼaʼabéet k-mukul xokik utiaʼal k-maas naʼatik (xokaʼak Salmo 1:1, 2 *). Wa k-mukul xookeʼ maʼ kun tuʼubultoʼon le baʼaxoʼob k-kankoʼ. Le tʼaan ich hebreo ku suʼutul «ku mukul xokik[eʼ]» u kʼáat u yaʼal u búuyul máak u tukult le baʼax ku xokikoʼ. Jeʼex ken janak máak ku jóoʼsik u yutsileʼ, le ken k-xok le Bibliaoʼ kʼaʼabéet k-tuukul utiaʼal k-jóoʼsik xan u yutsil. Ken tsʼoʼokok a xokik le Bibliaoʼ, ¿ka jóoʼsik wa u súutukil utiaʼal a tuukul tu yoʼolal?
15. ¿Baʼaxten maʼalob ka k-kan jach bix unaj u tsʼíibtaʼal le tʼaan sakkúunsaʼanoʼ?
15 Kan bix u tsʼíibtaʼal le tʼaanoʼ. Le táan k-kanik upʼéel túumben tʼaanoʼ, maʼalob xan ka k-kan bix unaj u tsʼíibtaʼal utiaʼal k-tʼanik maas maʼalob. Jeʼel bix upʼéel tʼaan yaan bix unaj u tʼanaʼal yéetel u tsʼíibtaʼaleʼ, le tʼaan sakkúunsaʼan yaan teʼ Bibliaoʼ u múuchʼ «maʼalob kaʼansa[joʼob]» wa tʼaanoʼob unaj xan k-kanik utiaʼal k-tʼanik tubeel (2 Tim. 1:13).
16. ¿Baʼax unaj k-kanáantik maʼ u yúuchultoʼon, yéetel bix jeʼel k-beetkeʼ?
16 Maʼ u xuʼulul a kaambal. Yaʼab máakoʼobeʼ ku xuʼulul u tsʼáaik u yóoloʼob kaambal ken u yiloʼob jeʼel u páajtal u tsikbaloʼob ichil le tʼaan táan u kankoʼoboʼ. Bey xan jeʼel u yúuchul tiʼ le máax táan u kanik le tʼaan sakkúunsaʼanoʼ (xokaʼak Hebreob 5:11-14). ¿Baʼax unaj k-beetik utiaʼal maʼ u yúuchultoʼon beyoʼ? Unaj k-ilik maʼ u xuʼulul k-kanik le tʼaanoʼ. Le Bibliaoʼ ku yaʼalik: «Koʼox táanil utiaʼal ka kʼuchkoʼon béeytal jeʼel bix nukuch wíinikoʼobeʼ, koʼox pʼatik juntséelil le yáax kaʼansajoʼob tu yóokʼol Cristooʼ. Maʼ k-suut tʼaan tu yóokʼol le yáax chuun pakʼ kaʼansajoʼob, jeʼel bix le u kʼexik u tuukul máak tu yóokʼol le meyajoʼob ku bisikoʼob máak tiʼ kíimiloʼ, le u yoksaj óoltaʼal Jajal Diosoʼ, le kaʼansajoʼob tu yóokʼol le okjaʼoʼ, le u tsʼaʼabal kʼab tu yóokʼol le j-oksaj óoloʼoboʼ, le u kaʼapúut kuxtal le kimenoʼoboʼ yéetel le u pʼis óol Jajal Dios utiaʼal kʼiinoʼob minaʼan u xuuloʼ» (Heb. 6:1, 2).
17. ¿Baʼax kettʼaanil ku yeʼesik u kʼaʼananil u xook máak mantatsʼ?
17 Jóoʼs u súutukil utiaʼal a xook. Maas maʼalob ka xooknakech mantatsʼ chéen u chan súutuk, ke ka xooknakech yaʼab tiempo cada wa baʼax kʼiin. Ilawil a xook tiʼ le súutukiloʼob maʼ jach kaʼanaʼanechoʼ yéetel tuʼux mix baʼal jeʼel u náaysik a wóoleʼ. U kanaʼal upʼéel tʼaaneʼ ku keʼetel yéetel u jolchʼaktaʼal upʼéel bej. Wa mantatsʼ u máan máakeʼ, maas yaan u tʼalba yéetel maʼ kun talamtal u máan máakiʼ. Baʼaleʼ wa maʼeʼ yaan u saʼatal le bejoʼ. Le oʼolal maʼ unaj u xuʼulul u tsʼáaik u yóol máakiʼ (Dan. 6:16, 20). Le oʼolaleʼ maʼ u náayal k-óol yéetel mantatsʼ unaj k-beetik payalchiʼ utiaʼal maʼ u xuʼulul a wóoleʼex k-tʼanik le tʼaan sakkúunsaʼanoʼ (Efe. 6:18).
18. ¿Baʼaxten unaj k-tʼanik le tʼaan sakkúunsaʼanoʼ?
18 Tsikbalnen ichil le tʼaan ka kanikoʼ. Yaan máakoʼobeʼ ku talamtaltiʼob u kanikoʼob upʼéel túumben tʼaan tumen suʼlakoʼob wa sajak u yaʼaloʼob wa baʼax maʼ tubeeliʼ, baʼaleʼ leloʼ maʼ tu yáantaj utiaʼal u seguer u kaambaloʼob. Wa yaan máax taak u kanik upʼéel túumben tʼaaneʼ, mantatsʼ unaj u tsikbal ichil le tʼaanoʼ. Wa ku beetkeʼ, maas maʼ talam ken u yil u tsikbaliʼ. Bey xan unaj k-beetik yéetel le tʼaan sakkúunsaʼanoʼ. «Yéetel le puksiʼikʼaloʼ ku yúuchul oksaj óolal utiaʼal ka tsʼaʼabak máak maʼalob tu táan Jajal Dios, yéetel le chiʼ túunoʼ ku [kʼaʼaytaʼal] Jesucristo utiaʼal ka yanak toksajil tiʼ máak» (Rom. 10:10.) Maʼ chéen k-eʼesik u disipuloʼon Cristo ken okjaʼanakoʼoniʼ, baʼaxeʼ k-eʼesik xan ken k-kʼaʼayt u kʼaabaʼ Jéeoba tiʼ jeʼel baʼalak súutukileʼ (Mat. 28:19, 20; Heb. 13:15). Tsʼoʼoleʼ ken táakpajkoʼon teʼ muchʼtáambaloʼoboʼ unaj k-beetik tubeel yéetel maʼ unaj k-sen tʼaaniʼ, tumen beyoʼ k-eʼesik k-ojel le tʼaan sakkúunsaʼanoʼ (xokaʼak Hebreob 10:23-25).
Meyajnaktoʼon le tʼaan sakkúunsaʼan utiaʼal k-múul nojbeʼenkúuntik Jéeobaoʼ
19, 20. 1) Kex maʼ upʼéeliliʼ tʼaan ku beetkoʼobeʼ, ¿baʼax nojoch meyajil táan u beetik u kaajal Jéeoba teʼ kʼiinoʼobaʼ? 2) ¿Baʼax maʼ unaj u jáawal k-beetkiʼ?
19 Tu jaʼatskabil domingo 6 tiʼ siván tiʼ u jaʼabil 33 teʼ yáax siglooʼ, u jaats máakoʼobeʼ tu muchʼubaʼob tu kaʼapʼéel pisoi upʼéel naj yaan tu kaajil Jerusalén. Táanil tiʼ u tsʼáaik las nueveeʼ, le máakoʼobaʼ «joʼopʼ u tʼaanoʼob ichil jejeláas tʼaanoʼob». ¡Bukaʼaj wal jaʼtsil le baʼax úuchaʼ! (Hch. 2:4.) Bejlaʼeʼ maʼ tu páajtal k-tʼanik jejeláas tʼaanoʼob (1 Cor. 13:8). Kex beyoʼ táan u kʼaʼaytaʼal u maʼalob péektsilil le Reino ich maas tiʼ cuatrocientos treinta tʼaanoʼoboʼ.
20 Kex jeʼel baʼalak tʼaanil k-ojleʼ, tuláakloʼon jeʼel u páajtal k-tʼanik le tʼaan sakkúunsaʼanoʼ. ¿Máasaʼ lelaʼ jach ku taasiktoʼon kiʼimak óolal? Le baʼax táan u yúuchlaʼ jelaʼan tiʼ le ka xaʼakʼbesaʼab u tʼaan le máakoʼoboʼ, tumen bey táan k-tʼanik upʼéeliliʼ tʼaan utiaʼal k-múul nojbeʼenkúuntik Jéeobaeʼ (1 Cor. 1:10). Le oʼolaleʼ maʼ u jáawal k-meyajtik Jéeoba yéetel tuláakal le sukuʼunoʼob yanoʼob way yóokʼol kaab «chéen yéetel jumpʼéeliliʼ keléembal[eʼ]». Maʼ u xuʼulul xan k-tʼanik tubeel le tʼaan sakkúunsaʼan utiaʼal k-nojbeʼenkúuntik Jéeoba, le k-Taata yaan teʼ kaʼanoʼ (xokaʼak Salmo 150:1-6).
[Tsolajiloʼob]
^ xóot’ol 14 Salmo 1:1, 2 (NM): «Kiʼimak u yóol le wíinik maʼ kuxlak jeʼex u nuʼuktaj le kʼasaʼan máakoʼoboʼ, yéetel tu bejil le j-kʼebanoʼoboʼ maʼ waʼalakiʼ, yéetel tu kʼáancheʼil le j-pʼaʼastajoʼoboʼ maʼ kulakiʼ. Baʼaleʼ, u kiʼikiʼ óolaleʼ tiaʼan tu ley Jéeobaeʼ, bulkʼiin yéetel bul áakʼab ku mukul xokik u ley».
¿Baʼax jeʼel a núukikeʼ?
• ¿Baʼax le tʼaan sakkúunsaʼanoʼ?
• ¿Baʼax kʼaʼabéet u beetik máak utiaʼal u kanik le tʼaan sakkúunsaʼanoʼ?
• ¿Baʼax ken u yáantoʼon k-tʼan tubeel le tʼaan sakkúunsaʼanoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 24]
Tuláakal le máaxoʼob meyajtik Jéeobaoʼ u yojloʼob le «tʼaan sakkúunsaʼan[oʼ]»
[U tsolajil le oochel teʼ táan juʼun 23]
Bix jeʼel a tʼanik tubeel le tʼaan sakkúunsaʼanoʼ
◆ Chʼenxikint bix u yaʼalaʼal wa baʼax.
◆ Beet jeʼex le máaxoʼob u yojloʼob
le tʼaanoʼ.
◆ Ilawil maʼ u tuʼubultech le baʼax
ka kanikoʼ.
◆ Unaj a xook kʼaʼam.
Sal. 1:1, 2, NM; Rev. 1:3, NM
◆ Kan bix u tsʼíibtaʼal le tʼaanoʼ.
◆ Maʼ u xuʼulul a kaambal.
◆ Jóoʼs u súutukil utiaʼal a xook.
◆ Tsikbalnen ichil le tʼaan ka kanikoʼ.