Bix jeʼel u pʼáatal le tsʼoʼokol beel bey upʼéel «suum óox chʼooteʼ»
Bix jeʼel u pʼáatal le tsʼoʼokol beel bey upʼéel «suum óox chʼooteʼ»
«Suum óox chʼooteʼ maʼ tu jáan tʼóokol.» (ECL. 4:12.)
1. ¿Máax tsʼoʼoks u beel Adán yéetel Eva?
LE KA tsʼoʼok u beetik le xíiwoʼob yéetel le baʼalcheʼoboʼ, Jéeobaeʼ tu beetaj Adán. Tsʼoʼoleʼ tu beetaj u tʼúubul u wenel ka tu jóoʼsaj upʼéel u baakel u chʼalaʼatel utiaʼal u beetik utúul máax áantik. Le ka tu yilaj Evaeʼ, Adaneʼ tu yaʼalaj: «[¡]Lelaʼ jach tu jaajileʼ u bakʼel in bakʼel, u baakel xan in baakeloʼob!» (Gén. 1:27; 2:18, 21-23). Tumen tu yilaj utúul jach maʼalob x-áantajeʼ, Jéeobaeʼ tu tsʼoʼoksaj u beeloʼob yéetel tu yaʼalajtiʼob ka yaʼabchajak u paalaloʼob (Gén. 1:28; 2:24).
2. Satanaseʼ, ¿bix tu beetil ka yanak talamil tiʼ Adán yéetel Eva?
2 Baʼaleʼ ka máan kʼiineʼ, le yáax máakoʼob tsʼoʼoksaʼab u beeloʼoboʼ tu aktáantoʼob upʼéel nojoch túuntajil. Utúul kʼasaʼan ángel kʼuch kʼaj óoltbil bey Satanaseʼ, tu tusaj Eva yéetel tu yaʼalajtiʼ ka u jaant u yich le cheʼ aʼalaʼabtiʼob maʼ u jaantkoʼoboʼ, letiʼ túuneʼ tu jaanteʼ tsʼoʼoleʼ ka tu tsʼáaj xan tiʼ u yíicham. Úuchik u beetikoʼob lelaʼ, letiʼobeʼ tu tsʼáajubaʼob tu contra u gobernación Dios (Gén. 3:1-7). Le ka kʼáataʼabtiʼob tumen Jéeoba baʼax tsʼoʼok u beetkoʼobeʼ, le baʼax tu núukaj Adanoʼ tu yeʼesaj yaan kaʼach talamil tiʼob. Letiʼeʼ tu yaʼalaj: «Le koʼolel ta tsʼáajten [utiaʼal] in wéet kajtaloʼ tu tsʼáajten u yich le cheʼoʼ, teen xaneʼ tin jaantaj» (Gén. 3:11-13).
3. ¿Baʼax ku yaʼalik kaʼach jujuntúul u nuuktakil le judíoʼob yoʼolal le tsʼoʼokol beeloʼ?
3 Desde teʼ kʼiinoʼob jeʼeloʼ, Satanaseʼ tsʼoʼok u meyajtiʼ jejeláas baʼaloʼob utiaʼal u beetik u yantal talamil tiʼ le máaxoʼob tsʼokaʼan u beeloʼoboʼ. Tsʼoʼok u meyajtiʼ u nuuktakil le religionoʼob utiaʼal ka u kaʼansoʼob baʼaloʼob maʼ jaajtak yoʼolal le tsʼoʼokol beeloʼ. Úuchjeakileʼ jujuntúul tiʼ u nuuktakil le judíoʼoboʼ maʼ tu beetoʼob jeʼex u yaʼalik le Kiliʼich Tsʼíiboʼoboʼ baʼaxeʼ tu yaʼaloʼob jeʼel u páajtal u divorciartuba máak tiʼ u yatan tak chéen ka u máans u taʼabil le janaloʼ. Baʼaleʼ Jesuseʼ tu yaʼalaj: «Le máax ku pʼatik u yatan, wa maʼ tu yoʼolal núupkʼebaneʼ, yéetel ku tsʼoʼokol u beel yéetel uláakʼ [koʼolel] pʼataʼan tumen u yíichameʼ, ku núupkʼebantal» (Mat. 19:9).
4. ¿Bix u yilaʼal le tsʼoʼokol beel bejlaʼoʼ?
4 Le Kʼaasilbaʼaloʼ tak bejlaʼaʼ ku yilik ka xuʼuluk u yilaʼal le tsʼoʼokol beel jeʼex u yilaʼal tumen Diosoʼ. Yéetel tsʼoʼok u jóokʼol yéetel le baʼax u kʼáatoʼ, tumen le xiiboʼoboʼ ku tsʼoʼokol u beeloʼob yéetel u yéet xiibiloʼob bey xan le koʼoleloʼoboʼ yéetel u yéet koʼoleliloʼob. Tsʼoʼoleʼ, yaʼab máakoʼobeʼ chéen múul kajakbaloʼob yéetel wa ku tsʼoʼokol u beeloʼobeʼ tu kaʼapʼéel kʼiineʼ ku divorciarkubaʼob (xokaʼak Hebreob 13:4). ¿Baʼax unaj k-beetik utiaʼal maʼ u joʼopʼol k-tuukul jeʼex u kʼasaʼan máakiloʼob le yóokʼol kaabaʼ? Upʼéel baʼax ken u yáantoʼoneʼ letiʼe k-ojéeltik baʼax beetik u yantal kiʼimak óolal tiʼ jujuntúul máaxoʼob tsʼokaʼan u beeloʼoboʼ.
Chʼaʼa en cuenta Jéeoba
5. ¿Baʼax ku tsʼáaik naʼatbil le tʼaan «suum óox chʼoo[toʼ]»?
5 Utiaʼal ka yanak kiʼimak óolal tiʼ le máaxoʼob tsʼokaʼan u beeloʼoboʼ, unaj u chʼaʼaikoʼob en cuenta Jéeoba. Le Bibliaoʼ ku yaʼalik: «Suum óox chʼooteʼ maʼ tu jáan tʼóokol» (Ecl. 4:12). Le ken keʼetek le tsʼoʼokol beel yéetel upʼéel «suum óox chʼooteʼ», ku tsʼaʼabal naʼatbil le íichamtsil, le atantsil yéetel Jéeobaeʼ beyoʼob óox tíichʼ suum jaxaʼan utiaʼal u pʼáataloʼob chéen upʼéeliliʼeʼ, yéetel Jéeobaeʼ letiʼe maas kʼaʼabéetoʼ. Wa naatsʼ yaniloʼob tiʼ Dioseʼ, le máaxoʼob tsʼokaʼan u beeloʼoboʼ ku kanik u yutskíintoʼob le talamiloʼoboʼ yéetel ku yantaltiʼob kiʼimak óolal.
6, 7. 1) Le máaxoʼob tsʼokaʼan u beeloʼoboʼ, ¿bix jeʼel u chʼaʼaikoʼob en cuenta Jéeobaeʼ? 2) Utúul kiikeʼ, ¿baʼax tu yaʼalaj yoʼolal u yíicham?
6 Le máaxoʼob tsʼokaʼan u beeloʼoboʼ, ¿bix jeʼel u pʼáatloʼob bey upʼéel «suum óox chʼooteʼ»? Le rey Davidoʼ tu yaʼalaj: «In [Dios], teneʼ utstintʼaan in beetik le baʼax a kʼáateʼ; ¡kin bisik tin puksiʼikʼal a kaʼambesaj!» (Sal. 40:8). Le yaabilaj ku yuʼubik kaʼach David yoʼolal Jéeobaoʼ le péeks u meyajte, yéetel le péekskoʼon xan meyajt Dios bejlaʼeʼ. Le oʼolal le íichamtsil yéetel le atantsiloʼ unaj u jach natsʼkubaʼob tiʼ Jéeoba yéetel u beetkoʼob baʼax u kʼáat. Tsʼoʼoleʼ, unaj u paklan áantikubaʼob utiaʼal ka u maas yaabiltoʼob Dios (Pro. 27:17).
7 Wa le máaxoʼob tsʼokaʼan u beeloʼob utstutʼaan u tsʼoʼokbeskoʼob baʼax u kʼáat Jéeobaeʼ, yaan u maas yaabiltikubaʼob yéetel yaan u muʼukʼaʼantal u fejoʼob (1 Cor. 13:13). Sandra, utúul kiik cincuenta jaʼaboʼob tsʼoʼokok u beeleʼ tu yaʼalaj: «Le baʼax maas jatsʼuts in wilik tiʼ in wíichamoʼ letiʼe nuʼuktaj ku tsʼáaikten yéetel le nojoch yaabilaj ku yuʼubik yoʼolal Jéeobaoʼ, tsʼoʼoleʼ le yaabilajaʼ maas nojoch tiʼ le ku yuʼubik tin woʼolaloʼ». Íichamtsileʼex, ¿bey wa u tʼaan ta woʼolaleʼex a wataneʼexoʼ?
8. Le máaxoʼob tsʼokaʼan u beeloʼoboʼ, ¿baʼax unaj u beetkoʼob utiaʼal ka u kʼamoʼob yaʼab utsiloʼob tiʼ Jéeoba?
8 ¿Ka tsʼáaik wa táanil ichil a kuxtal a meyajtik Jéeoba yéetel a kʼaʼaytik u Reino? ¿Ka wilik wa a núup bey utúul máax jeʼel u yáantkech a maas meyajt Dioseʼ? (Gén. 2:24.) Le rey Salomonoʼ tu yaʼalaj: «Kaʼatúuleʼ [maas] maʼalob tiʼ chéen juntúul, tumen yaʼab u náaja[lil]» (Ecl. 4:9). Le máaxoʼob tsʼokaʼan u beeloʼoboʼ tu kaʼatúulal unaj u tsʼáaik u yóoloʼob utiaʼal maʼ u pʼatkubaʼob yéetel utiaʼal u jach yaabiltikubaʼob, wa ku beetkoʼob beyoʼ yaan u kʼamkoʼob yaʼab utsiloʼob tiʼ Jéeoba.
9. 1) ¿Baʼax ku páaʼtaʼal ka u beet le íichamtsiloʼ? 2) Colosailoʼob 3:19, ¿bix u yaʼalik unaj u tratartaʼal le atantsil tumen u yíichamoʼ?
9 Utiaʼal u yáantaʼal le máaxoʼob tsʼokaʼan u beeloʼob tumen Diosoʼ kʼaʼabéet u tsʼoʼokbeskoʼob le baʼax ku yaʼalik le Bibliaoʼ. Le íichamtsiloʼ unaj u tsʼáaik baʼax kʼaʼabéet tiʼ u yatan yéetel u yáantik u maas yaabilt Jéeoba (1 Tim. 5:8). Tsʼoʼoleʼ, unaj u chʼaʼik en cuenta bix u yuʼubikuba u yatan. Colosailoʼob 3:19 ku yaʼalik: «Íichamtsileʼex, yaabilt a wataneʼex yéetel maʼ a kʼuuxileʼex tu yéeteloʼob». Utúul máax ku xakʼaltik u tʼaaniloʼob le Bibliaoʼ, ku yaʼalikeʼ le tʼaan «kʼuuxileʼex» ku chíikpajal teʼ tekstoaʼ u kʼáat u yaʼal «u jatsʼik máak u yatan, u pochʼik wa u yaʼalik baʼal tiʼ, maʼ u yáantik, maʼ u yaabiltik yéetel maʼ u tsʼáaik le baʼax kʼaʼabéettiʼoʼ». Le máaxoʼob meyajtik Diosoʼ jach upuliʼ maʼ unaj u beetkoʼob beyoʼ. Baʼaleʼ, wa le íichamtsil ku nuʼuktik u yotoch yéetel yaabilajeʼ, le atantsiloʼ maʼ talam ken u tsʼáailuba yáanal u páajtaliliʼ.
10. ¿Baʼax ku páaʼtaʼal ka u beet le atantsiloʼoboʼ?
10 Le atantsiloʼob u kʼáatoʼob xan ka áantaʼakoʼob tumen Jéeobaeʼ kʼaʼabéet u tsʼoʼokbeskoʼob baʼax ku yaʼalik. Le apóstol Pablooʼ tuʼ yaʼalaj: «Le atantsiloʼoboʼ ka yanakoʼob tu yáanal u páajtalil u yíichamoʼob, bey jeʼel bix tiʼ Yuumtsileʼ. Tumen le íichamtsiloʼ u pool le atantsiloʼ, bey jeʼel bix Cristo u pool le [múuchʼuliloʼ]» (Efe. 5:22, 23). Satanaseʼ tu tusaj Eva, tumen tu yaʼalajtiʼeʼ wa tu juunal ka u nuʼuktubaeʼ yaan u maas kiʼimaktal u yóol. Teʼ kʼiinoʼob xanaʼ yaʼab atantsiloʼobeʼ bey u beetkoʼoboʼ. Baʼaleʼ le atantsil u yaabilmaj Diosoʼ maʼatech u tuklik wa táan u mixbaʼalkúuntaʼal ken u tsʼáauba yáanal u páajtalil u yíicham, tumen u yojleʼ beetaʼab utiaʼal ka u yáant u yíicham; tsʼoʼoleʼ lelaʼ jach maʼalob xan u yilaʼal tumen Dios (Gén. 2:18). Le atantsil ku tsʼáaikuba yáanal u páajtalil u yíichameʼ, ku yeʼesik tsiikil tiʼ (Pro. 12:4, NM).
11. ¿Baʼax tsʼoʼok u yáantik utúul íichamtsil utiaʼal ka yanak kiʼimak óolal tiʼ yéetel u yatan?
11 Uláakʼ bix jeʼel u kaxtikoʼob u yáantaj Jéeoba le máaxoʼob tsʼokaʼan u beeloʼoboʼ, letiʼe ka u múul xokoʼob le Bibliaoʼ. Gerald, utúul sukuʼun cincuentaicinco jaʼaboʼob tsʼoʼokok u beeleʼ, tu yaʼalaj: «Le baʼax maas kʼaʼabéet utiaʼal ka yanak kiʼimak óolal ichil le máaxoʼob tsʼokaʼan u beeloʼoboʼ, letiʼe ka u múul xokoʼob le Bibliaoʼ». Tsʼoʼoleʼ tu yaʼalaj: «U múul beetkoʼob baʼax utstutʼaanoʼob, maases le yaan yil yéetel u meyajtaʼal Diosoʼ, ku beetik u maas yaabilkubaʼob yéetel u yaabilkoʼob Jéeoba». Wa ku múul xokikoʼob le Bibliaoʼ mantatsʼ ken u yil u beetkoʼob baʼax u kʼáat Jéeoba yéetel yaan u muʼukʼaʼantal u fejoʼob.
12, 13. 1) ¿Baʼaxten kʼaʼabéet u múul payalchiʼ le máaxoʼob tsʼokaʼan u beeloʼoboʼ? 2) ¿Baʼax uláakʼ baʼaloʼob jeʼel u muʼukʼaʼankúuntik u fejoʼobeʼ?
12 Le máaxoʼob tsʼokaʼan u beeloʼob yéetel yaan kiʼimak óolal tiʼoboʼ ku múul payalchiʼob. Wa le íichamtsil ku jach aʼalik tiʼ Jéeoba baʼax talamiloʼob táan u aktáantkoʼobeʼ yaan u maas biskuba yéetel u yatan (Sal. 62:8). Jeʼex wa yaan baʼax ku beetik a kʼuuxileʼexeʼ, ¿máasaʼ maas séeb jeʼel a wutskíintkeʼex wa ka kaxtikeʼex u yáantaj Jéeobaeʼ? (Mat. 6:14, 15.) Maʼalob xan ka a beeteʼex jeʼex úuchik a kʼáatkeʼexoʼ, ilawil a múul áantikabaʼex yéetel «yanakteʼex chowak óolalil ta baatsileʼex, yéetel paklan saʼatsabaʼex» (Col. 3:13). Maʼ u tuʼubultoʼoneʼ le payalchiʼoʼ ku yeʼesik k-kʼáat ka u yáantoʼon Jéeoba. Le salmistaoʼ tu yaʼalaj: «U yichoʼob tuláakal máakoʼobeʼ ku [páaʼtajoʼob] tiʼ teech» (Sal. 145:15). Ken payalchiʼinakoʼon tiʼ Dios yéetel ken k-kʼub k-óol tiʼeʼ, ku xuʼulul k-sen chiʼichnaktal tumen k-ojel yaan u yáantkoʼon (1 Ped. 5:7).
13 Uláakʼ baʼax áantik le máaxoʼob tsʼokaʼan u beeloʼob utiaʼal ka yanak kiʼimak óolal tiʼobeʼ letiʼe u binoʼob tiʼ le muchʼtáambaloʼoboʼ yéetel u múul jóoʼloʼob kʼaʼaytaj. Teʼ muchʼtáambaloʼoboʼ ku kanikoʼob bix jeʼel u kanáantikubaʼob tiʼ le «táabsajiloʼob» ku meyaj tiʼ Satanás utiaʼal u beetik u pʼatkuba le máaxoʼob tsʼokaʼan u beeloʼoboʼ (Efe. 6:11). Yéetel u suuktal u múul jóoʼloʼob kʼaʼaytajeʼ yaan u yáantkoʼob utiaʼal ka chúukpajak u yóoloʼob u meyajtoʼob Dios (1 Cor. 15:58).
Baʼax unaj u beetaʼal ken yanak talamil
14. ¿Baʼaxoʼob jeʼel u beetik u yantal talamil ichil le máaxoʼob tsʼokaʼan u beeloʼoboʼ?
14 Kex tumen maʼ yáax u yúuchul tʼaan tiʼ le tsolnuʼukoʼob ku taasik le xookaʼ, maʼalob ka a tsikbalt yéetel a núup. Maʼ xaaneʼ yaan a tsʼáaikeʼex cuenta yaan baʼax kʼaʼabéet a wutskíintkeʼex. Baʼaleʼ, maʼ unaj u tuʼubultoʼoneʼ le Bibliaoʼ ku yaʼalikeʼ tak le máaxoʼob tsʼokaʼan u beeloʼob ku chʼaʼikoʼob en cuentai Dioseʼ «yaan u yantal yaayaj óolal tiʼob» (1 Cor. 7:28). Jach beyoʼ, le kʼebanoʼ, le kʼasaʼan yóokʼol kaab yéetel le táabsajiloʼob ku tsʼáaik le Kʼaasilbaʼaloʼ jeʼel u beetik u yantal talamil tiʼobeʼ (2 Cor. 2:11). Baʼaleʼ, Jéeobaeʼ jeʼel u yáantik máak u aktáantoʼobeʼ. Koʼox tʼaan tiʼ le baʼax úuch tiʼ Joboʼ. Kex tumen u jach kʼubmaj u yóol tiʼ Dioseʼ tu peʼertaj u yalakʼ baʼalcheʼob, u j-meyajoʼob yéetel kíim u paalaloʼob, kex beyoʼ «Jobeʼ, maʼ kʼebanchajiʼ, mix tu yaʼalaj mix baʼal kʼaas tu yoʼolal [Diosiʼ]» (Job 1:13-22).
15. ¿Baʼax jeʼel u kʼuchul u beet máak yaan ora ken yanak talamiloʼob tiʼeʼ, yéetel baʼax unaj k-beetik wa bey u yúuchul tiʼ k-núupoʼ?
15 U yatan Jobeʼ tu yaʼalajtiʼ: «¿Láayliʼ chʼiikilech a beet baʼal utseʼ? ¡Kʼaakʼastʼant [Dios], ka kíimikech!» (Job 2:9). Jeʼex k-ilkoʼ, tumen ku jach yaatal u yóol máak ken u aktáan talamiloʼobeʼ yaan oraeʼ jeʼel u beetik baʼaloʼob minaʼan u cuentaileʼ. Salomoneʼ tu yaʼalaj: «Meyaj loobeʼ ku kʼaskúuntik u tuukul le j-ojéelaj[oʼ]» (Ecl. 7:7). Wa le «loob» wa talamil ku beetik u tʼaan kʼaas a núupeʼ, maʼ a pʼuʼujul. Wa ka sutik u jeeleʼ chéen yaan u maas nojochtal le talamiloʼ (xokaʼak Salmo 37:8). Maʼ a beetik u cuentai baʼax ku yaʼalik a núup ken jáajan tʼaanak yoʼolal le talamil ka aktáantkeʼex yéetel maʼ a wojeleʼex bix jeʼel a wutskíintkeʼexoʼ (Sal. 106:33).
16. 1) Le máaxoʼob tsʼokaʼan u beeloʼoboʼ, ¿bix jeʼel u beetkoʼob le baʼax ku yaʼalik Mateo 7:1-5? 2) ¿Baʼaxten jach unaj k-chʼaʼik en cuenta baʼax jeʼel u páajtal u beetik k-núup bey xan baʼax maʼeʼ?
16 Le máaxoʼob tsʼokaʼan u beeloʼoboʼ unaj u chʼaʼikoʼob en cuentai yaan baʼaxoʼob maʼ tu páajtal u tsʼoʼokbesik u núupoʼob. Maʼ xaaneʼ yoʼolal le baʼax ku beetkoʼ ka waʼalik: «Yaan in beetik u kʼexik u modos». Wa ka weʼesik yaabilaj tiʼ yéetel wa ku chúukpajal a wóol tiʼeʼ maʼ xaaneʼ jeʼel u bin u yutskíintik u modoseʼ. Baʼaleʼ maʼ u tuʼubultech le baʼax tu yaʼalaj Jesús yoʼolal le máaxoʼob chéen ku chʼíikil u yiloʼob le baʼaxoʼob maʼ maʼalobtak bey «chan sojol» ku beetik u maasiloʼ, baʼaleʼ maʼ tu yilkoʼob le «cheʼ» yaan tu yichoʼob wa le baʼax kʼaas ku beetkoʼoboʼ. Letiʼeʼ tu yaʼalaj: «Maʼ a pʼis óoltikeʼex uláakʼ máakoʼob tu yoʼolal maʼ a pʼis óoltaʼaleʼex» (xokaʼak Mateo 7:1-5). Baʼaleʼ lelaʼ maʼ u kʼáat u yaʼal wa maʼ tu páajtal a wáantik a núup utiaʼal u yutskíintik le baʼax maʼ maʼalob ku beetkoʼ. Robert, utúul sukuʼun óoliʼ cuarenta jaʼaboʼob tsʼoʼokok u beeleʼ, tu yaʼalaj: «Le máaxoʼob tsʼokaʼan u beeloʼoboʼ unaj u tsikbaltikoʼob jach baʼax ku tuklikoʼob yéetel unaj u kʼamikoʼob le baʼax ku yaʼalaʼaltiʼ tumen u núup kʼaʼabéet u kʼexkoʼ». Jeʼex k-ilkoʼ unaj u tsʼáaik cuenta máak baʼax jeʼel u páajtal u tsʼoʼokbesik u núupeʼ bey xan baʼax maʼ. Maʼ unaj k-sen chʼíikil tuukul tiʼ baʼax modosi k-kʼáat ka yanak tiʼ k-núupiʼ, baʼaxeʼ unaj u kiʼimaktal k-óol yoʼolal le yantiʼoʼ (Ecl. 9:9).
17, 18. ¿Baʼax jeʼel u yáantkoʼon wa k-ilik bey minaʼan utstal tiʼ le talamiloʼob yantoʼon yéetel k-núupoʼ?
17 Uláakʼ baʼaxoʼob jeʼel u beetik u chiʼichnaktal wa u yantal talamil tiʼ le máaxoʼob tsʼokaʼan u beeloʼoboʼ, letiʼe u líiʼsaʼal le paalaloʼoboʼ wa ken yanak upʼéel yaayaj kʼojaʼanil tiʼ wa máax ichil le familiaoʼ. Wa maʼ xaan xaneʼ utúul tiʼ u taataʼobeʼ tsʼoʼok u chʼíijil yéetel kʼaʼabéet u kanáantaʼal. Wa maʼ xaaneʼ u paalaloʼobeʼ náach tuʼux binoʼob kajtal. Tsʼoʼoleʼ tak le meyajoʼob ku tsʼaʼabal u beet máak ichil u kaajal Jéeobaoʼ, maʼ xaaneʼ maʼ chéen chʼaʼabil u beetaʼaliʼ. Tuláakal lelaʼ jeʼel u beetik u chiʼichnaktaloʼob wa u yantal talmil tiʼobeʼ.
18 ¿Baʼax jeʼel u páajtal a beetik wa ka wilik bey minaʼan utstal tiʼ le talamiloʼob yantech yéetel a núupoʼ? (Pro. 24:10.) ¡Maʼ u lúubul a wóol, yaan bix jeʼel a wutskíintkeʼexeʼ! Chéen tukulte, wa Satanás jach ku kiʼimaktal u yóol ken xuʼuluk u beetik baʼax maʼalob utúul sukuʼuneʼ, maas jach jeʼel u kiʼimaktal u yóol wa ka náachchajkeʼex tiʼ Dioseʼ. Le oʼolaleʼ ilawil a beetikeʼex tuláakal le ku páajtal utiaʼal maʼ a pʼatkabaʼex. Teʼ Bibliaoʼ yaan u tsikbalil yaʼab máakoʼob tu meyajtoʼob Dios páajchaj u aktáantkoʼob yéetel chúukaʼan óolal nukuch talamiloʼob. Utéenjeakeʼ, Davideʼ tu kʼáat óoltaj tiʼ Jéeoba: «In [Dios] chʼaʼaten óotsilil, tumen yaan wíinikoʼob [...] táan u yetsʼikenoʼob» (Sal. 56:1). ¿Yaan wa kʼiin tsʼoʼok a wuʼuyikaba jeʼex Davideʼ? Wa yoʼolal le talamil yaan ichil a familia wa yoʼolal uláakʼ talamiloʼob ka wuʼuykaba beyoʼ, kʼaʼajaktecheʼ Davideʼ páajchaj u aktáantkoʼob, yéetel techeʼ jeʼel xan u páajtal a aktáantikeʼ. Letiʼeʼ tu yaʼalaj: «Tin natsʼajimba tiʼ Yuumtsil, letiʼ túuneʼ tu núukajen yéetel tu tokajen tiʼ tuláakal in saajkiloʼob» (Sal. 34:4).
Yaan a kʼamikeʼex yaʼab utsiloʼob
19. ¿Bix jeʼel k-aktáantik u táabsajiloʼob le Kʼaasilbaʼaloʼ?
19 Teʼ tsʼook kʼiinoʼob jach talamtakaʼ, le máaxoʼob tsʼokaʼan u beeloʼoboʼ unaj u múul líiʼsik u yóoloʼob yéetel u yáantkubaʼob utiaʼal ka muʼukʼaʼanchajak u fejoʼob (1 Tes. 5:11). Maʼ u tuʼubultecheʼ Satanaseʼ ku yaʼalikeʼ toʼoneʼ k-meyajtik Dios chéen yoʼolal le baʼaxoʼob ku tsʼáaiktoʼonoʼ. Letiʼeʼ yaan u beetik tuláakal le ku páajtal utiaʼal ka xuʼuluk k-meyajtik Dios, jeʼex ka u pʼatuba le máaxoʼob tsʼokaʼan u beeloʼoboʼ. Baʼaleʼ, wa k-kʼubik k-óol tiʼ Jéeobaeʼ, maʼ ken k-lúubul tiʼ u táabsajoʼob (Pro. 3:5, 6). Pabloeʼ tu yaʼaleʼ tuláakal le páajtalil ku yantal tiʼ máakoʼ chéen tiʼ Dios u taal (Fili. 4:13, NM).
20. ¿Baʼax utsiloʼob ku kʼamik le máaxoʼob tsʼokaʼan u beeloʼob ku chʼaʼikoʼob en cuenta Jéeobaoʼ?
20 Le máaxoʼob tsʼokaʼan u beeloʼob ku chʼaʼikoʼob en cuenta Dioseʼ ku kʼamikoʼob yaʼab utsiloʼob. Joel yéetel u yatan, tsʼoʼok cincuenta jaʼaboʼob tsʼoʼokok u beeloʼobeʼ, bey tsʼoʼok u yilkoʼoboʼ. Le sukuʼunaʼ tu yaʼalaj: «Kin tsʼáaik u nib óolalil tiʼ Jéeoba yoʼolal le jach maʼalob atan tu tsʼáajtenoʼ yéetel tumen jach maʼalob k-bisikba. Jach kiʼimak in wóol úuchik u tsʼoʼokol in beel tu yéetel». ¿Baʼaxten jach yaan kiʼimak óolal tiʼob? Le sukuʼunaʼ tu yaʼalaj: «Mantatsʼ k-ilik k-eʼesik utsil, k-jach k-yaabiltikba yéetel maʼ k-séeb kʼuuxil». U jaajileʼ, teʼ kʼasaʼan yóokʼol kaabaʼ mix máak tiʼ le tsʼokaʼan u beeloʼob jeʼel u yaʼalik wa jach minaʼan talamil tiʼobeʼ. Baʼaleʼ jeʼel u páajtal k-chʼaʼik en cuenta Jéeoba yéetel k-ilik tsʼoʼokbesik le tsolnuʼukoʼob ku tsʼáaiktoʼon teʼ Bibliaoʼ. Wa k-beetkeʼ, yaan k-pʼáatal bey upʼéel «suum óox chʼooteʼ maʼ tu jáan tʼóokol» (Ecl. 4:12).
¿Kʼajaʼan wa tech?
• ¿Baʼax u kʼáat u yaʼal u chʼaʼabal en cuenta Jéeoba tumen le máaxoʼob tsʼokaʼan u beeloʼoboʼ?
• ¿Baʼax unaj u beetik le máaxoʼob tsʼokaʼan u beeloʼob wa yaan talamil tiʼoboʼ?
• Wa tsʼokaʼan a beeleʼ, ¿bix jeʼel a wojéeltik wa táan a chʼaʼik en cuenta Jéeobaeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
U múul payalchiʼ le máaxoʼob tsʼokaʼan u beeloʼoboʼ le áantkoʼob u aktáantoʼob le talamiloʼoboʼ