¿Baʼax jeʼel a wóotik a beet utiaʼal ka kuxlakech minaʼan u xuuleʼ?
¿Baʼax jeʼel a wóotik a beet utiaʼal ka kuxlakech minaʼan u xuuleʼ?
«[¿]Bukaʼaj jeʼel u boʼotik máak tu yoʼolal u [kuxtaleʼ, NM]?» (MAT. 16:26.)
1. ¿Baʼaxten kʼeʼey Pedro tumen Jesús?
LE KA tsʼoʼok u yaʼalik Jesucristo jach yaan u beetaʼal u muʼyaj yéetel yaan u kíimsaʼaleʼ, apóstol Pedroeʼ jaʼakʼ u yóol. Tumen maʼ u kʼáat ka úuchuk mix baʼal tiʼ Jesuseʼ, Pedroeʼ tu yaʼalajtiʼ: «Yuumtsil, chʼaʼatech óotsilil; jumpuliʼ maʼ u yúuchultech lelaʼ, LTN». Maʼ xaaneʼ le u maasil disipuloʼoboʼ bey xan u tuukuloʼoboʼ, le oʼolal Jesuseʼ tu sutuba u yiloʼobeʼ, ka túun tu yaʼalaj tiʼ Pedro: «¡Tselaba tin táan Satanás tumen techeʼ tʼóochpajlech in tiaʼal! Techeʼ maʼ ta tuukul jeʼel bix u tuukul Jajal Dioseʼ, baʼaleʼ ka tuukul jeʼel bix u tuukul máakoʼobeʼ» (Mar. 8:32, 33; Mat. 16:21-23).
2. ¿Baʼax u kʼáat Jesús ka u beet le máaxoʼob tsaypachtikoʼ?
2 Le uláakʼ baʼax tu yaʼalaj Jesusoʼ, maʼ xaaneʼ tu yáantaj Pedro u naʼat baʼaxten bey u tuukul Jesusoʼ. Letiʼeʼ «tu tʼanaj túun u j-kaambaloʼob yéetel le máakoʼoboʼ» ka tu yaʼalajtiʼob: «Wa yaan máax u kʼáat taal tin paacheʼ, u tuʼubsuba, u chʼaʼa u [cheʼil u muʼyaj, NM] ka taalak tin paach. Tumen le máax u kʼáat u tok u kuxtaleʼ, bíin u sate; baʼaleʼ le máax ku satik u kuxtal tin woʼolal yéetel tu yoʼolal le maʼalob péektsiloʼ, bíin u toke» (Mar. 8:34, 35). Tumen nukaʼaj u kʼub u kuxtaleʼ, Jesuseʼ u kʼáat kaʼach ka u yóot u kʼub u kuxtal xan u disipuloʼob le táan u meyajtkoʼob Diosoʼ. Wa ku beetkoʼobeʼ, yaan u kʼamkoʼob upʼéel nojoch siibal (xokaʼak Mateo 16:27).
3. 1) ¿Baʼax kʼáatchiʼiloʼob tu beetaj Jesús? 2) Le ka tu beetaj Jesús le kaʼapʼéel kʼáatchiʼoʼ, maʼ xaaneʼ, ¿baʼax tu kʼaʼajsaj le máaxoʼob uʼuyoʼ?
3 Teʼ súutuk xanoʼ, Jesuseʼ tu beetaj kaʼapʼéel kʼáatchiʼob ku beetik u tuukul máak: «[¿]Baʼax u biilal tiʼ máak u náajaltik tuláakal yóokʼol kaab wa ku satik u [kuxtal, NM]?» yéetel «¿Bukaʼaj jeʼel u páajtal u boʼotik juntúul máak utiaʼal u tokik u [kuxtaleʼ, NM]?» (Mar. 8:36, 37). Yoʼolal le yáax kʼáatchiʼ tu beetaj Jesusoʼ, yaʼab máakoʼobeʼ jeʼel u yaʼalikoʼob mix baʼal u beelal u yantal yaʼab baʼaloʼob tiʼ wa yaan u peʼertik u kuxtaleʼ. Le ka tu kʼáataj xan Jesús, «¿Bukaʼaj jeʼel u páajtal u boʼotik juntúul máak utiaʼal u tokik u [kuxtaleʼ, NM]?», le máaxoʼob uʼuyoʼ maʼ xaaneʼ tu kʼaʼajsoʼob le baʼax tu yaʼalaj Satanasaʼ: «Wíinikeʼ, jeʼel u kʼubik tuláakal baʼax utiaʼal, tu yoʼolal maʼ u kíimsaʼal[eʼ]» (Job 2:4). Le máaxoʼob maʼatech u meyajtkoʼob Jéeobaoʼ jeʼel u yaʼalikoʼob jach jaaj le baʼax tu yaʼalaj Satanasoʼ, tumen utiaʼal maʼ u kíimloʼobeʼ jeʼel tak u beetkoʼob baʼaloʼob maʼ patliʼ. Baʼaleʼ toʼoneʼ maʼatech k-beetik beyoʼ.
4. ¿Baʼaxten jach maʼalob ka tuukulnakoʼon tiʼ le kʼáatchiʼob tu beetaj Jesusoʼ?
4 Le ka taal way Luʼumeʼ, Jesuseʼ maʼ taal u luʼs le kʼojaʼaniloʼoboʼ, u ayikʼalkúuntoʼon mix u tsʼáatoʼon kuxtal minaʼan u xuul teʼ kʼasaʼan yóokʼol kʼaabaʼ. Baʼaxeʼ taal u tsʼáatoʼon u jatsʼuts páajtalil k-kuxtal utiaʼal mantatsʼ tiʼ upʼéel túumben yóokʼol kaab (Juan 3:16). Le oʼolaleʼ, ken k-xok le yáax kʼáatchiʼ tu beetaj Jesusoʼ, k-naʼatik beyaʼ: «¿Baʼax u beelal k-náajaltik tuláakal yóokʼol kaab wa maʼ ken k-kʼam le kuxtal minaʼan u xuuloʼ?». U jaajileʼ mix baʼal u beelal (1 Juan 2:15-17). Le tsʼook kʼáatchiʼ tu beetaj Jesusoʼ, jeʼel u páajtal k-naʼatik xan beyaʼ: «¿Baʼax jeʼel in wóotik in beet utiaʼal ka páajchajak in kuxtal minaʼan u xuul teʼ túumben yóokʼol kaaboʼ?». Le bix k-kuxtaloʼ yaan u yeʼesik wa jach tu jaajil k-kʼáat ka yanaktoʼon le kuxtalaʼ (ket yéetel Juan 12:25).
5. ¿Baʼax unaj k-beetik utiaʼal u yantaltoʼon le kuxtal minaʼan u xuuloʼ?
5 U jaajileʼ, Jesuseʼ maʼ táan u yaʼalik kaʼach wa chéen tu juunal máak jeʼel u náajaltik le kuxtal minaʼan u xuuloʼ. Maʼ u tuʼubultoʼoneʼ tak le kuxtal yantoʼon bejlaʼoʼ upʼéel siibal mix máak jeʼel u páajtal u manikeʼ. Le kuxtal minaʼan u xuuloʼ, chéen jeʼel u yantaltoʼon wa «k-oksik óol tiʼ Jesucristo» yéetel tiʼ Jéeoba, le máax «boʼotik le máaxoʼob kaxtikoʼ» (Gal. 2:16; Heb. 11:6). Baʼaleʼ, kʼaʼabéet k-eʼesik k-fe yéetel le baʼaxoʼob k-beetikoʼ, tumen «wa maʼ tu yeʼesaʼal yéetel utsil meyajoʼobeʼ kimen» yanil (Sant. 2:26). Le oʼolal ken tuukulnakoʼon tiʼ le tsʼook kʼáatchiʼ tu beetaj Jesusoʼ, maʼalob ka k-il baʼaxoʼob jeʼel k-beetik utiaʼal k-eʼesik muʼukʼaʼan yanil k-fejeʼ.
Jesuseʼ maʼ tu kaxtaj chéen u yutsiliʼ
6. ¿Baʼax maas kʼaʼanan kaʼach utiaʼal Jesús?
6 Jesuseʼ maʼ bin tu paach u baʼalubaʼob le kʼasaʼan yóokʼol kaabaʼ, mix tu kaxtaj chéen u yutsiliʼ. Baʼaxeʼ tu pʼataj yaʼab baʼaloʼob yéetel mantatsʼ tu yóotaj u beet baʼax u kʼáat Dios. Le oʼolal Jesuseʼ páajchaj u yaʼalik: «Teneʼ mantatsʼ kin beetik le baʼax utstutʼaanoʼ» (Juan 8:29). ¿Tak baʼax kʼuch u beet Jesús utiaʼal u lúubul utsil tiʼ u Taata?
7, 8. 1) ¿Baʼax anchaj u beetik Jesús, yéetel baʼax utsiloʼob tu kʼamaj tu yoʼolal? 2) ¿Baʼax kʼáatchiʼi maʼalob ka k-beete?
7 Jesuseʼ tu yaʼalaj tiʼ u disipuloʼob: «U Paal Máa[keʼ] maʼ taal utiaʼal ka meyajtaʼakiʼ, baʼaleʼ utiaʼal u meyajtik máak, yéetel utiaʼal u tsʼáa u kuxtal bey jumpʼéel boʼol utiaʼal u jáalkʼabtaʼal yaʼabkach máakoʼobeʼ» (Mat. 20:28). Jeʼex t-ilaj tu káajbaloʼ, le ka tsʼoʼok u yaʼalik Jesús tiʼ u disipuloʼob maʼ kun xáantal ken «u tsʼáa u kuxta[leʼ]», Pedroeʼ tu yaʼalaj ka u chʼaʼa óotsiltuba. Baʼaleʼ Jesuseʼ maʼ tu chʼaʼa en cuenta le baʼax aʼalaʼabtiʼoʼ, baʼaxeʼ tu kʼubaj u kuxtal utiaʼal u salvartik le wíinikoʼoboʼ. Jéeoba túuneʼ, tu kaʼa kuxkíintaj yéetel tu yaʼalajtiʼ ka kulak tu tséel u páaʼt u beet u reyil (Hch. 2:32, 33). ¿Máasaʼ jach maʼalob ka k-beet jeʼex Jesusoʼ?
8 Le apóstol Pablooʼ tu yaʼalaj tiʼ le sukuʼunoʼob yanoʼob Romaoʼ «mix Cristo lúub utsil chéen tu táa[niʼ]», yéetel tu yaʼalajtiʼob ka u beetoʼob jeʼex Jesusoʼ (Rom. 15:1-3). ¿Kux túun toʼon? ¿K-kʼáat kuxtal wa jeʼex Cristoeʼ?
Jéeobaeʼ u kʼáat ka k-tsʼáa u maas maʼalobil tiʼ
9. ¿Baʼax ku beetik máak ken u kʼub u kuxtal tiʼ Dios?
9 Le Ley tsʼaʼab tiʼ Moisesoʼ, ku yaʼalikeʼ le israelitaʼob palitsiltaʼanoʼoboʼ jeʼel u páajtal u chaʼabaloʼob ken máanak siete jaʼaboʼob wa tu jaʼabil le Jáalkʼabiloʼ. Baʼaleʼ, wa le palitsil u yaabilmaj u yuumil yéetel utstutʼaan u meyajtikeʼ, jeʼel u yaʼalik maʼ u kʼáat ka chaʼabkeʼ yéetel u pʼáatal u meyajt tuláakal u kʼiiniloʼob u kuxtal (xokaʼak Deuteronomio 15:12, 16, 17). Bey xan u yúuchul ken k-kʼub kuxtal tiʼ Diosoʼ. Toʼon k-chʼaʼatuklik k-beetik baʼax utstutʼaan letiʼ maʼ baʼax k-kʼáatiʼ. Beyoʼ k-eʼesik tiʼ Jéeoba jach k-yaabilmaj yéetel k-kʼáat meyajt tuláakal u kʼiiniloʼob k-kuxtal.
10. ¿Baʼaxten k-aʼalik Jéeoba k-Tsʼuulil, yéetel k-ojéeltik leloʼ baʼax unaj u péekskoʼon k-beet yéetel k-kuxtal?
10 Wa táan u tsʼaʼabaltech xook yéetel le Biblia, ka jóokʼol kʼaʼaytaj yéetel ka bin teʼ muchʼtáambaloʼoboʼ, jach maʼalob le baʼax ka beetikoʼ. K-páaʼtikeʼ maʼ kun sen xáantal ken a kʼub a kuxtal tiʼ Jéeoba yéetel ka a waʼal xan le baʼax aʼalaʼab tiʼ Felipe tumen le etiopíailoʼ: «¿Jeʼel wa u páajtal in wokjaʼeʼ?» (Hch. 8:35, 36). Beyoʼ, yaan a biskaba maʼalob yéetel Dios jeʼex le sukuʼunoʼob aʼalaʼabtiʼob tumen Pablo: «Teʼexeʼ maʼ u yuumileʼex a wíinklileʼexiʼ, tumen nojoch u tojol maʼanikeʼex» (1 Cor. 6:19, 20). Kex wa yaan k-bin kaʼan wa yaan k-pʼáatal kuxtal way Luʼumeʼ, ken k-kʼub k-kuxtal tiʼ Jéeobaeʼ ku pʼáatal letiʼ k-Tsʼuulil. Le oʼolal maʼ unaj k-kaxtik chéen k-utsiliʼ yéetel unaj u xuʼulul «[k-]palitsiltaʼaleʼex tumen máakoʼob» (1 Cor. 7:23). U jaajileʼ, nojoch baʼal k-ilik k-meyajtik Jéeoba yéetel k-chaʼik u nuʼuktikoʼon.
11. ¿Baʼax unaj k-kʼubik tiʼ Jéeoba? Utiaʼal a tsolikeʼ, chʼaʼa en cuenta bix u kʼubaʼal tiʼ Dios le siibaloʼob úuchiloʼ.
11 Pabloeʼ tu yaʼalaj tiʼ le yáax cristianoʼoboʼ: «Kʼub a wíinklileʼex bey jumpʼéel kuxaʼan siibal, jumpáaykúuntaʼan yéetel kʼambeʼen tu táan Jajal Dios. Lelaʼ letiʼ u jaajil [adoración] unaj a tsʼáaikeʼexoʼ» (Rom. 12:1). Le baʼax tu yaʼalaj Pabloaʼ, tu kʼaʼajsaj tiʼ le judíoʼob bix le siibal ku kʼubkoʼob tiʼ Dios táanil u beetkubaʼob cristianoʼoboʼ. Letiʼobeʼ u yojloʼobeʼ, jeʼex u yaʼalik le Leyoʼ, le baʼalcheʼob ku kʼuʼubul tiʼ Diosoʼ kʼaʼabéet letiʼe u maas maʼalobiloʼoboʼ. Wa maʼ maʼalob yanil le siibaloʼoboʼ, maʼ ken u kʼame (Mal. 1:8, 13). Bey xan u yúuchul ken k-kʼub k-kuxtal «bey jumpʼéel kuxaʼan siiba[loʼ]». K-kʼáat tsʼáa u maas maʼalobil tiʼ Dios, maʼ chéen le baʼax ku pʼáataltoʼon ken tsʼoʼokok k-beetik baʼax k-kʼáatoʼ. Le ken k-kʼubba tiʼ Dioseʼ, k-kʼubik tuláakal k-kuxtal tiʼ, jeʼex k-muukʼ, baʼaxoʼob yantoʼon yéetel le baʼaxoʼob k-ojel beetoʼ (Col. 3:23). Baʼaleʼ ¿bix jeʼel k-beetik leloʼ?
Meyajnaktoʼon tubeel le tiempo yantoʼonoʼ
12, 13. Aʼal upʼéel bix jeʼel k-tsʼáaik u maas maʼalobil tiʼ Jéeobaeʼ
12 Upʼéel bix jeʼel k-tsʼáaik u maas maʼalobil tiʼ Jéeobaeʼ, letiʼe u meyajtoʼon tubeel le tiempo yantoʼonoʼ (xokaʼak Efesoiloʼob 5:15, 16). Baʼaleʼ, utiaʼal leloʼ unaj k-ilik bix táan u meyajtoʼon k-tiempo. U kʼasaʼan yóokʼol kaab Satanás yéetel le kʼeban yaan t-wíinkliloʼ, ku péekskoʼon chéen k-náays k-óol yéetel k-kaxt chéen k-utsil. U jaajileʼ «yaan junsúutuk utiaʼal u [beetaʼal] tuláakal baʼax», jeʼex utiaʼal u náaysik u yóol máak yéetel u meyaj utiaʼal u tsʼáaik baʼax kʼaʼabéet tiʼ u familia (Ecl. 3:1). Baʼaleʼ, le máax meyajtik Diosoʼ unaj u yilik jach tiʼ baʼax táan u máansik u tiempo.
13 Le ka bin Pablo kʼaʼaytaj Atenaseʼ, tu yileʼ u kajnáaliloʼob «bey xan le táanxel luʼumiloʼob yanoʼob teʼeloʼ, maʼ tu tsʼáaik u yóoloʼob tiʼ uláakʼ baʼal wa maʼ chéen u yuʼubikoʼob yéetel u yaʼalikoʼob wa baʼax túumbe[niʼ]» (Hch. 17:21). Bejlaʼa xaneʼ yaʼab máakeʼ chéen ku peʼertik u tiempoʼob. Chéen ku náaysik u yóoloʼob yéetel televisión, videojuegoʼob, Internet yéetel uláakʼ baʼaloʼob. Tsʼoʼoleʼ cada kʼiin ku máaneʼ táan u bin u maas yaʼabtal le náaysaj óoloʼob jeʼel u beetkoʼob k-peʼertik yaʼab tiempooʼ. Wa ku náayal k-óoleʼ, jeʼel u xuʼulul k-beetik jujumpʼéel baʼaloʼob ku muʼukʼaʼankúuntik k-fejeʼ. Tsʼoʼoleʼ jeʼel tak k-tuklik minaʼantoʼon tiempo utiaʼal k-beetik le baʼaloʼob maas kʼaʼanantak jeʼex k-xokik le Bibliaoʼ, k-bin muchʼtáambal yéetel k-jóokʼol kʼaʼaytajoʼ (Fili. 1:9, 10).
14. ¿Baʼax kʼáatchiʼiloʼob maʼalob ka k-beete?
14 Le oʼolaleʼ tuláakal le máaxoʼob tsʼoʼok u kʼubik u kuxtaloʼob tiʼ Jéeobaoʼ, unaj u tuklikoʼob lelaʼ: «¿Sáamsamal wa in jóoʼsik u súutukil utiaʼal in xokik le Bibliaoʼ, in tuukul tu yoʼolal bey xan in payalchiʼ?» (Sal. 77:12; 119:97; 1 Tes. 5:17). «¿Kin líiʼskimba wa yéetel le muchʼtáambaloʼoboʼ, yéetel kin líiʼsik wa u yóol le sukuʼunoʼob ken táakpajkenoʼ?» (Sal. 122:1; Heb. 2:12.) Le Bibliaoʼ ku yaʼalikeʼ Bernabé yéetel Pabloeʼ «yaʼabkach kʼiinoʼob [...] tʼaanajoʼob yéetel páajtalil, u tsʼaamajoʼob u alab óolaloʼob tiʼ Yuumtsil» (Hch. 14:3). ¿Jeʼel wa u páajtal a beetik kʼeexoʼob ichil a kuxtal utiaʼal a máansik maas yaʼab tiempo táan a kʼaʼaytaj bey precursoreʼ? (Xokaʼak Hebreob 13:15.)
15. Le ancianoʼoboʼ, ¿tiʼ baʼaxoʼob ku máanskoʼob yaʼab tiempo?
15 Le ka bin Bernabé yéetel Pablo tu múuchʼulil Antioquíaeʼ, «pʼáatoʼob yaʼabkach kʼiinoʼob [...] yéetel le j-oksaj óoloʼob[oʼ]» utiaʼal u líiʼskoʼob u yóoloʼob (Hch. 14:28). Le ancianoʼob xanoʼ ku máanskoʼob yaʼab tiempo táan u líiʼskoʼob u yóol le sukuʼunoʼoboʼ. Maʼ chéen ku jóoʼloʼob kʼaʼaytajiʼ, baʼaxeʼ ku yáantkoʼob le sukuʼunoʼoboʼ, ku bin u xíimbaltoʼob le lubaʼan u yóoloʼob yéetel kʼojaʼanoʼoboʼ, tsʼoʼoleʼ ku beetkoʼob uláakʼ meyajoʼob. Wa tsʼoʼok a wokjaʼeʼ, maʼalob ka a tukult lelaʼ: «Wa ku béeytal in beetkeʼ, ¿jeʼel wa in wóotik in kʼam uláakʼ meyajoʼobeʼ? ¿Táan wa in beetik tuláakal le ku páajtal utiaʼal u tsʼaʼabalten?».
16. Aʼal jujumpʼéel bix jeʼel «k-beetik uts [...] tiʼ le sukuʼunoʼob tiʼ le oksaj óolaloʼ».
16 Yaʼab sukuʼunoʼobeʼ ku binoʼob áantaj teʼ tuʼux uchaʼan nukuch loobiloʼob yoʼolal le baʼateloʼ, le chak iikʼaloʼoboʼ wa yoʼolal uláakʼ baʼaloʼob. Jeʼex utúul kiik ku meyaj tu Najil Betel yéetel yaan maas tiʼ sesenta jaʼaboʼob tiʼeʼ, ken u kʼáat u vacacioneseʼ ku bin áantaj teʼ tuʼux kʼaʼabéetoʼ. ¿Baʼaxten ku beetik lelaʼ? Letiʼeʼ ku yaʼalik: «Yaʼab meyajoʼob maʼ jach in wojel in beetiʼ, baʼaleʼ yéetel kiʼimak óolal tin beetaj le baʼax aʼalaʼabten ka in beetoʼ. Jach tu líiʼsaj in wóol in wilik jach nojoch u fe le sukuʼunoʼob u máansmoʼob le nojoch loobiloʼ». Yaʼab uláakʼ sukuʼunoʼob xaneʼ ku yáantajoʼob utiaʼal u beetaʼal u Najiloʼob Reino yéetel u Najiloʼob Asambleaʼob. Ken táakpajkoʼon tiʼ meyajoʼob jeʼex leloʼobaʼ, «k-beetik uts [...] tiʼ le sukuʼunoʼob tiʼ le oksaj óolaloʼ» (Gal. 6:10).
«Tiʼ yanen ta wéeteleʼex tuláakal kʼiinoʼob[eʼ]»
17. Techeʼ, ¿baʼax jeʼel a beetik utiaʼal ka yanaktech le kuxtal minaʼan u xuuloʼ?
17 U jaajileʼ jach taʼaytak u xuʼulsaʼal tiʼ le kʼasaʼan máakoʼoboʼ. Kex maʼ k-ojel jach baʼax kʼiin ken úuchkeʼ, baʼax k-ojleʼ «chéen jumpʼíit kʼiin pʼaataltoʼon» yéetel «le yóokʼol kaab k-ilikaʼ táan u xuʼulul» (xokaʼak 1 Corintoiloʼob 7:29-31). Le beetikeʼ jach maʼalob ka tuukulnakoʼon tiʼ le kʼáatchiʼ tu beetaj Jesusaʼ: «¿Bukaʼaj jeʼel u páajtal u boʼotik juntúul máak utiaʼal u tokik u [kuxtaleʼ, NM]?». U jaajileʼ jeʼel k-beetik jeʼel baʼaxak ka u kʼáattoʼon Jéeoba utiaʼal ka yanaktoʼon «le kuxtal minaʼan u xuuloʼ» (1 Tim. 6:19). Tsʼoʼoleʼ jach kʼaʼanan mantatsʼ ka k-tsaypacht Jesús yéetel ka k-kaxt táanil le Reinooʼ (Mat. 6:31-33; 24:13).
18. ¿Baʼax k-ojel ken u beet Jéeoba, yéetel baʼaxten?
18 U jaajileʼ, maʼ chéen chʼaʼabil u tsaypachtaʼal Jesusiʼ. Yaneʼ tsʼoʼok tak u peʼertik u kuxtal jeʼex u yaʼalmil Jesuseʼ. Kex beyoʼ, maʼ tu xuʼulul k-tsaypachtik Cristo, yéetel maʼatech k-kaxtik chéen k-utsiliʼ. Tsʼoʼoleʼ jach k-creertik le baʼax tu yaʼalaj tiʼ u disipuloʼobaʼ: «Tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mat. 28:20). Le oʼolaleʼ, utiaʼal k-maas meyajtik Jéeobaeʼ kʼaʼabéet k-beetik tuláakal le ku páajtal utiaʼal u meyajtoʼon tubeel le tiempo yantoʼonoʼ yéetel le baʼaxoʼob k-ojel k-beetoʼ. Beyoʼ k-eʼesik jach tu jaajil k-creertik yaan k-salvartaʼal tumen Jéeoba tiʼ le nojoch yaayaj óolaloʼ, yéetel wa k-kíimleʼ k-ojel yaan u kaʼa kuxkíintkoʼon teʼ túumben yóokʼol kaaboʼ (Heb. 6:10). Le oʼolaleʼ, wa k-beetkeʼ yaan k-eʼesik jach nojoch baʼal k-ilik le kuxtaloʼ.
¿A wojel wa u núukil?
• ¿Bix tu yeʼesil Jesús u kʼáat kaʼach u meyajt Jéeoba yéetel u kaxt u yutsil le máakoʼoboʼ?
• Jeʼex Jesuseʼ, ¿baʼaxten maʼ unaj k-kaxtik chéen k-utsiliʼ, yéetel bix k-beetik?
• ¿Chéen máakalmáak le siibaloʼob ku kʼamik kaʼach Jéeoba tiʼ le israelitaʼoboʼ, yéetel baʼax ku kaʼansiktoʼon leloʼ?
• ¿Bix jeʼel u meyajtoʼon tubeel le tiempo yantoʼonoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
Jesuseʼ mantatsʼ tu beetaj baʼax utstutʼaan Dios
[U tsolajil le oochel teʼ táan juʼun 28]
Le israelitaʼob chúukpaj u yóoloʼoboʼ tu tsʼáajoʼob tiʼ Dios le u maas maʼalobiloʼ
[U tsolajil le oochel teʼ táan juʼun 29]
Jéeobaeʼ u kʼáat ka meyajnaktoʼon tubeel le tiempooʼ