¿Ka weʼesik wa tsiikil tiʼ u maasil?
¿Ka weʼesik wa tsiikil tiʼ u maasil?
«Tiʼ a weʼeskeʼex tsiikil ta baatsileʼexeʼ, teʼex kʼaʼabéet a yáax beetkeʼex.» (ROM. 12:10, NM.)
1. ¿Baʼax tsʼoʼok u pʼáatal maʼatech u yeʼesaʼal?
YAʼAB tuʼuxoʼobeʼ maʼ maʼalob u yilaʼal ka waʼalak utúul chan paal tu tséel utúul nojoch máak kulukbaliʼ, le oʼolal ku yaʼalaʼaltiʼ ka kulak utiaʼal u yeʼesik tsiikil. Yaan tuʼuxoʼob xaneʼ maʼ maʼalob u yilaʼal ka u sut u paach utúul chan paal tiʼ utúul nojoch máakiʼ. U jaajileʼ tiʼ cada luʼumileʼ jejeláas bix u yaʼalaʼal ka eʼesaʼak tsiikil tiʼ u maasil. Jeʼel bixakeʼ, lelaʼ ku kʼaʼajsiktoʼon le baʼax ku yaʼalik le Bibliaaʼ: «Waʼalen utiaʼal a tsikik juntúul nuxib» (Lev. 19:32). Baʼaleʼ, óoliʼ tuláakal tuʼuxeʼ tsʼoʼok u pʼáatal maʼatech u yeʼesaʼal tsiikil.
2. ¿Tiʼ máaxoʼob ku yaʼalik le Biblia ka k-eʼes tsiikiloʼ?
2 Le Bibliaoʼ ku yaʼalikeʼ jach kʼaʼanan u yeʼesaʼal tsiikil tiʼ u maasil. Ku yaʼalik ka k-eʼes tsiikil tiʼ Jéeoba yéetel tiʼ Jesús (Juan 5:23). Ku yaʼalik xan ka k-eʼes tsiikil tiʼ k-láakʼtsiloʼob, tiʼ le sukuʼunoʼoboʼ bey xan tiʼ le máaxoʼob maʼatech u meyajkoʼob Diosoʼ (Rom. 12:10; Efe. 6:1, 2; 1 Ped. 2:17). Baʼaleʼ ¿bix jeʼel k-eʼesik tsiikil tiʼ Jéeobaeʼ? ¿Bix jeʼel k-eʼesik tsiikil tiʼ le sukuʼunoʼoboʼ? Koʼox ilik u núukil le kʼáatchiʼobaʼ yéetel uláakʼ baʼaloʼob yaan yil yéetel u yeʼesaʼal tsiikil.
Unaj k-eʼesik tsiikil tiʼ Dios bey xan k-nojbeʼenkúuntik u kʼaabaʼ
3. Aʼal upʼéel bix jeʼel k-eʼesik tsiikil tiʼ Dioseʼ.
3 Upʼéel bix jeʼel k-eʼesik tsiikil tiʼ Dioseʼ, letiʼe ken k-nojbeʼenkúunt u kʼaabaʼoʼ. Lelaʼ unaj k-beetik tumen ku yilkoʼon bey «jumpʼéel kaaj utiaʼal u kʼaabaʼ[eʼ]» (Hch. 15:14, LTN). U jaajileʼ jach nojoch baʼal k-ilik u yaʼalaʼaltoʼon u j-jaajkunajoʼon Jéeoba, le Dios yaan tuláakal páajtalil tiʼoʼ. Le profeta Miqueasoʼ tu yaʼalaj: «U chuukaʼan kaajoʼoboʼ ku yuʼubajtʼantikoʼob u [diosoʼob], baʼaleʼ toʼoneʼ mantatsʼ bíin k-uʼuyajtʼant [Jéeoba]» (Miq. 4:5). Toʼoneʼ k-uʼuyajtʼantik wa k-eʼesik tsiikil tiʼ Jéeoba ken k-kuxlakoʼon jeʼex u kʼáatoʼ. Jeʼex tu yaʼalil le apóstol Pablo tiʼ le sukuʼunoʼob yanoʼob Romaoʼ, wa maʼ k-tsʼáaik ichil k-kuxtal le baʼax k-kʼaʼaytikoʼ, le máakoʼoboʼ jeʼel u tʼaanoʼob kʼaas tiʼ u kʼaabaʼ Dioseʼ (Rom. 2:21-24).
4. Techeʼ, ¿bix a wilik le a tsʼáaik kʼaj óolbil u kʼaabaʼ Jéeobaoʼ?
4 Uláakʼ bix k-eʼesik tsiikil tiʼ Jéeobaeʼ letiʼe ken táakpajkoʼon teʼ kʼaʼaytajoʼ. Úuchjeakileʼ, Jéeobaeʼ tu tʼanaj le israelitaʼob utiaʼal ka u bisoʼob u kʼaabaʼ, baʼaleʼ maʼ tu beetoʼobiʼ (Isa. 43:1-12). Mantatsʼ tu kúulpachkuntoʼob yéetel tu beetoʼob u okʼom óoltal Jéeoba (Sal. 78:40, 41). Tu tsʼookeʼ xuʼul u lúubuloʼob utsil tiʼ. Baʼaleʼ, toʼoneʼ jach nojoch baʼal k-ilik k-tsʼáaik kʼaj óoltbil máax letiʼ, tumen k-jach yaabilmaj yéetel k-kʼáat ka kiliʼichkúuntaʼak u kʼaabaʼ. Tumen tsʼoʼok ojéeltik u jaajil yoʼolal Jéeoba bey xan yoʼolal le baʼaxoʼob ken u beetoʼ, k-kʼáat ka ojéeltaʼak xan tumen u maasil. Jeʼex Pabloeʼ toʼoneʼ k-aʼalik xan: «Jach unaj in beetik. ¡Óotsilen wa maʼ tin [kʼaʼaytik] le maʼalob péektsiloʼ!» (1 Cor. 9:16).
5. ¿Baʼax yaan yil le fe yéetel u yeʼesaʼal tsiikil tiʼ Jéeobaoʼ?
5 Le rey Davidoʼ tu yaʼalaj: «Le máaxoʼob u kʼaj óoltmajechoʼoboʼ u kʼubmajoʼob u yóoloʼob tiʼ teech, tumen mix bikʼin ka xúumpʼattik le máaxoʼob ku kaxtikechoʼoboʼ» (Sal. 9:10). Wa jach tu jaajil k-kʼaj óol Jéeoba yéetel k-eʼesik tsiikil tiʼ u kʼaabaʼ tumen ku béeykuntik tuláakal baʼax ku yaʼalikeʼ, yaan k-creertik jach tu jaajil yaan u yáantkoʼon jeʼex tu beetil yéetel le máaxoʼob meyajt úuchiloʼ. U jaajileʼ k-kʼubik k-óol tiʼ Jéeoba yéetel k-tsʼáaik fe tiʼeʼ uláakʼ bix k-eʼesik tsiikil tiʼ. Koʼox ilik baʼax yaan yil u kʼubik u yóol máak tiʼ Dios yéetel u yeʼesaʼal tsiikil tiʼ. Le ka xuʼul u kʼubik u yóol le israelitaʼob tiʼ Diosoʼ, letiʼeʼ tu kʼáataj tiʼ Moisés: «¿Baʼax kʼiin bíin jáawak u kúulpachkuntiken [wa maʼ u yeʼesik tsiikil] le kaajaʼ? ¿Tak baʼax kʼiin bíin u kaʼa yoksaj óoltenoʼob, kex tumen tsʼoʼok in weʼesik le [milagroʼob] ichiloʼoboʼ?» (Núm. 14:11). Jeʼex k-ilkoʼ utiaʼal k-eʼesik tsiikil tiʼ Jéeobaeʼ unaj creertik yaan u yáantkoʼon tak ken k-aktáant nojoch talamiloʼob.
6. ¿Baʼax péekskoʼon k-eʼes tsiikil tiʼ Jéeoba?
6 Jesuseʼ tu yaʼaleʼ le u yeʼesaʼal tsiikil tiʼ Diosoʼ tiʼ u puksiʼikʼal máak unaj u síijil. Le ka tʼaanaj yéetel u múuchʼ máakoʼob maʼ tu adorarkoʼob Dios jeʼex u kʼáateʼ, tu chʼaʼachiʼitaj le baʼax u yaʼalmaj u Taataoʼ: «Le máakoʼobaʼ chéen yéetel u booxel u chiʼob ku tsikkenoʼob, baʼaleʼ u puksiʼikʼaloʼobeʼ náach yanil tiʼ teen» (Mat. 15:8). Le oʼolaleʼ utiaʼal k-eʼesik tsiikil tiʼ Dioseʼ, unaj k-yaabiltik yéetel tuláakal k-puksiʼikʼal (1 Juan 5:3). Tsʼoʼoleʼ maʼ unaj u tuʼubultoʼon le baʼax u yaʼalmaj Jéeobaaʼ: «Bíin in nojbeʼenkúunt le máaxoʼob nojbeʼenkúuntikeneʼ» (1 Sam. 2:30).
Le ancianoʼoboʼ ku yeʼeskoʼob tsiikil tiʼ u maasil
7. 1) Le ancianoʼoboʼ, ¿baʼaxten unaj u yeʼeskoʼob tsiikil tiʼ le sukuʼunoʼoboʼ? 2) ¿Bix tu yeʼesil Pablo tsiikil tiʼ le sukuʼunoʼoboʼ?
7 Le apóstol Pablooʼ tu yaʼalaj: «Tiʼ a weʼeskeʼex tsiikil ta baatsileʼexeʼ, teʼex kʼaʼabéet a yáax beetkeʼex» (Rom. 12:10, NM). Le máaxoʼob tsʼaʼan u nuʼuktoʼob le múuchʼuliloʼ, maases letiʼob unaj u yeʼeskoʼob tsiikil tiʼ le sukuʼunoʼoboʼ. Jach maʼalob ka u beetoʼob jeʼex tu beetil Pablooʼ (xokaʼak 1 Tesalonicailoʼob 2:7, 8). Le sukuʼunoʼob xíimbaltaʼaboʼob tumen Pablooʼ, u yojloʼobeʼ le baʼax tu yaʼalajtiʼob ka u beetoʼoboʼ tak letiʼ beete. Beyoʼ tu yeʼesaj tsiikil tiʼob yéetel eʼesaʼab xan tsiikil tiʼ. Tumen maʼ chéen tu yaʼalaj baʼax unaj u beetaʼaleʼ, le sukuʼunoʼoboʼ tu beetoʼob le baʼax tu yaʼalaʼ: «Kin kʼáat óoltik tiʼ teʼex ka a beeteʼex baʼax kin weʼesik tiʼ teʼex» (1 Cor. 4:16).
8. 1) ¿Bix tu yeʼesil tsiikil Jesús tiʼ u disipuloʼob? 2) ¿Bix jeʼel u yeʼeskoʼob tsiikil xan le ancianoʼoboʼ?
8 Uláakʼ bix jeʼel u yeʼeskoʼob tsiikil le ancianoʼoboʼ, letiʼe ken u tsoloʼob tiʼ le sukuʼunoʼob baʼaxten ku chʼaʼatuklaʼal u beetaʼal wa baʼaxoʼ, tumen beyoʼ táan u beetkoʼob jeʼex Jesuseʼ. Le ka tu yaʼalaj tiʼ u disipuloʼob, «kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal [le joochoʼ]», tu tsolajtiʼob baʼaxten: «Le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob» (Mat. 9:37, 38). Yéetel le ka tu yaʼalaj xan tiʼob maʼ u náayal u yóoloʼobeʼ, tu tsolajtiʼob: «Tumen maʼ a wojeleʼex baʼax hora ken taalak Yuumtsiloʼ» (Mat. 24:42). Jesuseʼ maʼ chéen tu yaʼalaj tiʼ u disipuloʼob baʼax unaj u beetkoʼobiʼ, baʼaxeʼ tu yaʼalajtiʼob baʼaxten unaj u beetkoʼob. Beyoʼ tu yeʼesaj tsiikil tiʼob. ¿Máasaʼ jach maʼalob ka u beet xan le ancianoʼob jeʼex Jesusoʼ?
Unaj k-eʼesik tsiikil tiʼ u kaajal Jéeoba bey xan tiʼ le nuʼuktaj ku tsʼáaiktoʼonoʼ
9. Ken k-eʼes tsiikil tiʼ u kaajal Dios yéetel tiʼ le máaxoʼob nuʼuktikoʼ, ¿tiʼ máax jach tu jaajil táan k-eʼesik tsiikil? Tsol baʼaxten bey a núukikoʼ.
9 Utiaʼal k-eʼesik tsiikil tiʼ Jéeobaeʼ, unaj k-eʼesik tsiikil tiʼ u kaajal bey xan tiʼ le máaxoʼob nuʼuktikoʼ. Le ken k-tsʼoʼokbes le baʼax ku yaʼalik le palitsil chúukpajaʼan u yóol yéetel yaan u naʼatoʼ, k-eʼesik tsiikil tiʼ le nuʼuktaj ku tsʼáaiktoʼon Jéeobaoʼ. Teʼ yáax siglooʼ, le apóstol Juanoʼ tu tsolnuʼuktaj jujuntúul sukuʼunoʼob maʼatech u yeʼeskoʼob tsiikil tiʼ le máaxoʼob nuʼuktik le múuchʼuliloʼ (xokaʼak 3 Juan 9-11). Yoʼolal le baʼax tu tsʼíibtaj Juanoʼ, k-ilkeʼ le sukuʼunoʼobaʼ maʼ xan tu yeʼesoʼob tsiikil tiʼ le kaʼansaj yéetel tiʼ le nuʼuktaj ku tsʼaʼabaltiʼoboʼ. Baʼaleʼ maʼ tuláakal beet beyoʼ. Maʼ xaaneʼ le kuxaʼan kaʼach le apostoloʼoboʼ, le sukuʼunoʼoboʼ maʼ xuʼul u yeʼeskoʼob tsiikil tiʼ le máaxoʼob nuʼuktik u kaajal Diosoʼ (Fili. 2:12).
10, 11. Meyajnaktech le Biblia utiaʼal a weʼesik baʼaxten maʼalob ka yanak máaxoʼob nuʼuktik u kaajal Diosoʼ.
10 Yaan sukuʼunoʼob ku yaʼalikoʼob maʼ unaj u tsʼaʼabal máaxoʼob nuʼuktik le múuchʼuliloʼ tumen Jesuseʼ tu yaʼalaj: «Teʼexeʼ láaj sukuʼuntsileʼex» (Mat. 23:8). Baʼaleʼ, le Bibliaoʼ ku tʼaan tiʼ jujuntúul máakoʼob tsʼaʼabtiʼob páajtalil tumen Dios utiaʼal u nuʼuktikoʼob u kaajal jeʼex juesoʼob, reyoʼob yéetel uláakʼ máakoʼob. Le ka xuʼul u yeʼeskoʼob tsiikil le israelitaʼob tiʼ le máaxoʼob nuʼuktikoʼoboʼ, Jéeobaeʼ tu castigartoʼob (2 Rey. 1:2-17; 2:19, 23, 24).
11 Teʼ yáax siglooʼ, le apostoloʼoboʼ tsʼaʼab xan u nuʼuktoʼob u kaajal Dios, yéetel le sukuʼunoʼoboʼ tu tsʼáajubaʼob yáanal u páajtaliloʼob (Hch. 2:42). Jeʼex le apóstol Pablooʼ, tu tsolnuʼuktaj le sukuʼunoʼoboʼ (1 Cor. 16:1; 1 Tes. 4:2). Kex beyoʼ letiʼeʼ tu tsʼáajuba xan yáanal u nuʼuktaj le sukuʼunoʼob maas tsʼaʼan páajtalil tiʼoboʼ (Hch. 15:22; Gal. 2:9, 10). Jeʼex k-ilkoʼ Pabloeʼ tu yeʼesaj tsiikil tiʼ le máaxoʼob nuʼuktik u kaajal Diosoʼ.
12. ¿Baʼax kaʼapʼéel baʼal k-kanik yoʼolal le máaxoʼob tsʼaʼan páajtalil tiʼoboʼ?
12 Lelaʼ ku kaʼansiktoʼon kaʼapʼéel baʼal. Yáaxeʼ, le Bibliaoʼ ku yaʼalikeʼ «le palitsil chúukpajaʼan u yóol yéetel yaan u naʼat[oʼ]», ku meyaj tiʼ le Cuerpo Gobernante utiaʼal u tsʼáaik páajtalil tiʼ jujuntúul sukuʼunoʼob u yéeykoʼob máaxoʼob jeʼel u nuʼuktikoʼob le múuchʼuliloʼoboʼ (Mat. 24:45-47; 1 Ped. 5:1-3). Yéetel u kaʼapʼéeleʼ, tuláakloʼon, tak le ancianoʼoboʼ, unaj u yeʼeskoʼob tsiikil tiʼ le máaxoʼob maas tsʼaʼan páajtalil tiʼoboʼ. Baʼaleʼ, ¿bix jeʼel k-eʼesik tsiikil tiʼ le máaxoʼob ku yáantajoʼob utiaʼal u nuʼuktaʼal u kaajal Diosoʼ?
Unaj k-eʼesik tsiikil tiʼ le sukuʼunoʼob xíimbaltik le múuchʼuliloʼoboʼ
13. ¿Bix jeʼel k-eʼesik tsiikil tiʼ le sukuʼunoʼob xíimbaltik le múuchʼuliloʼoboʼ?
13 Pabloeʼ tu yaʼalaj: «K-kʼáat óoltikteʼex ka tsikeʼex le máaxoʼob ku meyajoʼob ichileʼexoʼ yéetel ku nuʼuktikoʼob a beeleʼex yéetel ku tsolikoʼob a xikineʼex tiʼ Yuumtsil. Unaj a wilkeʼexoʼob yéetel uts yéetel a yaabiltikeʼexoʼob yaʼab, tu yoʼolal le meyaj ku beetikoʼoboʼ. Kuxleneʼex ich jeetsʼel ta baatsileʼex» (1 Tes. 5:12, 13). U jaajileʼ le sukuʼunoʼob xíimbaltik le múuchʼuliloʼoboʼ jach yaʼab meyaj ku beetkoʼob. Le oʼolal unaj k-ilkoʼob yéetel uts bey xan k-yaabiltkoʼob. Upʼéel bix jeʼel k-beetkeʼ, letiʼe ken k-tsʼoʼokbes le baʼax ku yaʼalikoʼoboʼ. Wa yantoʼon «le kaʼanilbeʼen naʼat[oʼ]» yaan k-tsʼoʼokbesik le tsolnuʼukoʼob ku tsʼáaikoʼob ku taal tiʼ le palitsil chúukpajaʼan u yóol yéetel yaan u naʼatoʼ (Sant. 3:17).
14. ¿Bix jeʼel u yeʼesaʼal tsiikil tiʼ le sukuʼunoʼob xíimbaltik le múuchʼuliloʼoboʼ, yéetel baʼax utsiloʼob ku taasik leloʼ?
14 ¿Kux túun wa ku yaʼalikoʼob ka k-beet upʼéel baʼax maʼ suuk k-beetikiʼ? Wa beyoʼ, utiaʼal k-eʼesik tsiikil tiʼobeʼ maʼ unaj k-aʼalik: «Toʼoneʼ maʼ bey suuk k-beetkoʼ», wa «Kex tumen yaan tuʼuxoʼob jeʼel u meyajeʼ, teʼ múuchʼulilaʼ maʼ jach kʼaʼabéetiʼ». Upʼéel baʼax ken u yáantoʼon k-beet le baʼax ku yaʼalikoʼoboʼ letiʼe k-kʼaʼajsik Jéeoba u yuumil le múuchʼuliloʼ yéetel Jesús u Poolil. Ken tsʼoʼokbesaʼak yéetel kiʼimak óolal le baʼax ku yaʼalik le sukuʼunoʼob xíimbaltik le múuchʼuliloʼoboʼ, táan u yeʼesaʼal tsiikil tiʼob. Le apóstol Pablooʼ tu yaʼalaj tiʼ le sukuʼunoʼob yanoʼob Corintooʼ, jach maʼalob úuchik u tsʼoʼokbeskoʼob le baʼax aʼalaʼabtiʼob tumen Tito, le máax xíimbaltoʼoboʼ (2 Cor. 7:13-16). Bejlaʼa xaneʼ, wa k-kʼamik yéetel kiʼimak óolal le baʼax ku yaʼalik le sukuʼunoʼobaʼ, yaan k-tsʼoʼokbesik tubeel le meeyjil kʼaʼaytajoʼ (xokaʼak 2 Corintoiloʼob 13:11).
«Tsikilteʼex tuláakal jeʼel bix unajeʼ»
15. ¿Bix jeʼel k-eʼesik tsiikil tiʼ le sukuʼunoʼoboʼ?
15 Pabloeʼ tu yaʼalaj: «Maʼ a kʼeyik le máax tsʼoʼok u chʼíijiloʼ; baʼaleʼ tsol u xikin bey jeʼel bix a taataeʼ; yéetel bisaba yéetel le máaxoʼob táankelmoʼoboʼ bey jeʼel bix a sukuʼunoʼobeʼ. Bisaba yéetel le koʼoleloʼob tsʼoʼok u chʼíijloʼoboʼ bey jeʼel bix a maamaeʼ, bey xan yéetel le chʼúupaloʼoboʼ bey jeʼel bix a kiikoʼobeʼ, yéetel tuláakal maʼalob tuukul. Áant le x-kimen íichamoʼob jach tu jaajil óotsiloʼoboʼ» (1 Tim. 5:1-3). Jeʼex k-ilkoʼ le Bibliaoʼ ku yaʼaliktoʼon ka k-eʼes tsiikil tiʼ tuláakal le sukuʼunoʼoboʼ. Baʼaleʼ, ¿baʼax jeʼel u yúuchul wa ku yantaltoʼon upʼéel talamil yéetel utúul sukuʼuneʼ? ¿Yaan wa u xuʼulul k-eʼesik tsiikil tiʼ? ¿Maʼ wa maas maʼalob ka k-il le jatsʼuts modos yaan tiʼoʼ? Le ancianoʼob xanoʼ maʼ unaj u tuʼubultiʼob kʼaʼabéet u yeʼeskoʼob tsiikil tiʼ le sukuʼunoʼoboʼ, yéetel maʼ unaj xan u nojbaʼalkúunskubaʼob tu yóokʼoloʼobiʼ (1 Ped. 5:3). U jaajileʼ, teʼ múuchʼuliloʼ yaan jejeláas bix jeʼel k-paklan eʼesik tsiikileʼ (xokaʼak Juan 13:34, 35).
16, 17. 1) ¿Baʼaxten jach kʼaʼanan ka k-eʼes tsiikil tiʼ le máaxoʼob k-kʼaʼaytajoʼ, bey xan tiʼ le máaxoʼob chʼaʼapachkoʼonoʼ? 2) ¿Bix jeʼel k-eʼesik tsiikil tiʼ tuláakal máakeʼ?
16 Baʼaleʼ, maʼ chéen tiʼ le sukuʼunoʼob unaj k-eʼesik tsiikiloʼ. Pabloeʼ tu yaʼalaj: «Jeʼel baʼalak kʼiin ku páajtaleʼ unaj k-beetik uts tiʼ tuláakal» (Gal. 6:10). U jaajileʼ wa utúul k-éet meyaj wa k-éet xook maʼ maʼalob u tratarkoʼoneʼ, maʼ chéen chʼaʼabil k-eʼesik tsiikil tiʼiʼ. Wa bey u yúuchloʼ, maʼ u tuʼubultoʼon le baʼax ku yaʼalik le Bibliaaʼ: «Maʼ a pʼuʼujul tu yoʼolal u siʼipil le kʼaakʼas máakoʼoboʼ» (Sal. 37:1). Le baʼax ku yaʼalik le tekstoaʼ yaan xan u yáantkoʼon k-eʼes tsiikil tiʼ le máaxoʼob chʼaʼapachkoʼonoʼ. Yéetel ken kʼaʼaytajnakoʼoneʼ unaj k-beetik «yéetel kabal óolal bey xan yéetel tsiikil» (1 Ped. 3:15). Tsʼoʼoleʼ, le nookʼ k-búukintmaj bey xan le bix k-líiʼsmikbaoʼ ku yáantkoʼon k-eʼes tsiikil tiʼ le máaxoʼob k-kʼaʼaytik le maʼalob péektsiloʼ.
17 Jeʼex tsʼoʼok k-kankoʼ, ken k-tratart k-sukuʼunoʼob wa le máaxoʼob maʼatech u meyajkoʼob Diosoʼ, mantatsʼ unaj k-beetik le baʼax ku yaʼalik le Bibliaaʼ: «Tsikilteʼex tuláakal jeʼel bix unajeʼ. Yaabilteʼex le sukuʼunoʼoboʼ, chʼaʼex saajkilil tiʼ Jajal Dios, tsikilteʼex le [reyoʼ]» (1 Ped. 2:17).
¿Baʼax jeʼel a núukikeʼ?
¿Bix jeʼel a weʼesik tsiikil...
• ... tiʼ Jéeobaeʼ?
• ... tiʼ le ancianoʼoboʼ, bey xan tiʼ le sukuʼunoʼob xíimbaltik le múuchʼuliloʼoboʼ?
• ... tiʼ tuláakal le sukuʼunoʼoboʼ?
• ... tiʼ le máaxoʼob k-kʼaʼaytajoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Le sukuʼunoʼob teʼ yáax siglooʼ tu yeʼesoʼob tsiikiltiʼ le nuʼuktaj tu tsʼáaj le Cuerpo Gobernanteoʼ
[U tsolajil le oochel teʼ táan juʼun 24]
Tuláakal le ancianoʼoboʼ ku yeʼeskoʼob tsiikil tiʼ le sukuʼunoʼob xíimbaltik le múuchʼuliloʼoboʼ tumen letiʼeCuerpo Gobernante tsʼaamiloʼoboʼ