Tsʼáaba Tu Contra Satanás Jeʼex Úuchik U Beetik Jesusoʼ
Tsʼáaba Tu Contra Satanás Jeʼex Úuchik U Beetik Jesusoʼ
«Tokabaʼex tiʼ kʼaasilbaʼal, letiʼ xaneʼ bíin áalkabnak teʼex.» (SANT. 4:7.)
1. ¿Baʼax u yojel Jesús ken u aktáant kaʼach way Luʼumeʼ, yéetel baʼax beetaʼabtiʼ?
JESUSEʼ u yojel kaʼacheʼ ken taalak way Luʼumeʼ yaan u chʼaʼapachtaʼal tumen le Kʼaasilbaʼaloʼ. Cristoeʼ jach u yojel le baʼax u yaʼalmaj Jéeoba tiʼ Satanás teʼ tu jardinil Edenoʼ: «Teech yéetel le koʼoleloʼ [wa u angeloʼob Jéeobaeʼ] yaan in beetik a pʼektikabaʼex, bey kun úuchul xan tiʼ a chʼiʼibal yéetel u chʼiʼibal letiʼ. U chʼiʼibal letiʼeʼ [wa Jesucristoeʼ] yaan u kiimbesikech ta pool, teech xaneʼ yaan a chiʼik u tuunkuy» (Gén. 3:14, 15; Apo. 12:9). Le ka kíimsaʼab Jesuseʼ óoliʼ bey ka chiʼibik tu tuunkuyeʼ, tumen maʼ xáanchajeʼ Jéeobaeʼ tu kaʼa kuxkíintaj. Baʼaleʼ le kaan wa Satanasoʼ yaan u kiimbesaʼal tu pool wa yaan u xuʼulsaʼaltiʼ (xokaʼak Beetaʼanoʼob 2:31, 32 yéetel Hebreob 2:14).
2. Jéeobaeʼ, ¿baʼaxten jach u yojel Jesuseʼ yaan u chúukpajal u yóol u aktáant le baʼax kun beetbil tiʼ tumen Satanasoʼ?
2 Jéeobaeʼ, u yojeleʼ Jesuseʼ yaan u chúukpajal u yóol u aktáant le baʼaxoʼob kun beetbiltiʼ tumen le Kʼaasilbaʼaloʼ, yéetel yaan u tsʼoʼokbesik tuláakal le baʼax túuxtaʼab u beetoʼ. Jéeobaeʼ u yojel lelaʼ tumen letiʼ beet Jesús, tsʼoʼoleʼ jach u kʼaj óol tumen tsʼoʼok kaʼach u máan yaʼab jaʼaboʼob múuchʼ anakoʼob. U yojel xaneʼ le máax áant u beet tuláakal baʼal yéetel «u yáaxil tiʼ tuláakal baʼax yan[oʼ]» jach ku yuʼubik tʼaan yéetel chúukaʼan u yóol (Pro. 8:22-31; Col. 1:15). Le oʼolal le ka tu túuxtaj way Luʼum yéetel le ka tu chaʼaj u túuntaʼal u yóol tumen Satanás tak tu yorai u kíimileʼ, Jéeobaeʼ jach u yojel kaʼach Jesuseʼ yaan u chúukpajal u yóol u meyajte (Juan 3:16).
Jéeobaeʼ ku kanáantik le máaxoʼob meyajtikoʼ
3. ¿Baʼax u kʼáat u beet Satanás tiʼ le máaxoʼob meyajtik Jéeobaoʼ?
3 Jesuseʼ tu yaʼaleʼ le Kʼaasilbaʼaloʼ letiʼe «máax ku tusbel way yóokʼol kaabeʼ», yéetel tu yaʼalaj tiʼ u disipuloʼob yaan xan u chʼaʼapachtaʼaloʼob jeʼex úuchik u beetaʼaltiʼoʼ (Juan 12:31; 15:20). U máakiloʼob le kʼasaʼan yóokʼol kaabaʼ u pʼekmoʼob le máaxoʼob jach u tsʼaamaj u yóol u meyajtoʼob Jéeobaoʼ yéetel ku kʼaʼaytikoʼob le maʼalob péektsiloʼ (Mat. 24:9; 1 Juan 5:19). Satanaseʼ maases u kʼáat u xuʼuls tiʼ le máaxoʼob yéeyanoʼob utiaʼal u binoʼob kaʼanoʼ. Baʼaleʼ u kʼáat xan u xuʼuls tiʼ le máaxoʼob kun pʼáatloʼob kuxtal way Luʼumeʼ. Le Bibliaoʼ ku yaʼalik: «A enemigoʼex le kʼaasilbaʼaloʼ, táan u máan jeʼel bix león ku yáakameʼ, táan u kaxantik máax u lukʼe» (1 Ped. 5:8).
4. ¿Baʼax eʼesik Satanaseʼ maʼ páajchajak u xuʼulsik tiʼ u kaajal Jéeobaiʼ?
4 Jéeobaeʼ ku kanáantik u kaajal, le oʼolal maʼ xuʼulsaʼaktiʼob tumen Satanasiʼ. Koʼox tuklik lelaʼ. Tiʼ le cien jaʼaboʼob tsʼoʼok u máanoʼoboʼ jujuntúul gobiernoʼob jach kʼasaʼanoʼobeʼ tsʼoʼok u yilkoʼob u xuʼulsikoʼob tiʼ u kaajal Jéeoba. Baʼaleʼ maʼ béeychajkoʼobiʼ, tumen bejlaʼeʼ óoliʼ siete millones j-kʼaʼaytajoʼob yanoʼob tiʼ maas tiʼ cienmil múuchʼuliloʼob tiʼ tuláakal le Luʼumaʼ. ¿Kux túun le máaxoʼob chʼaʼapachkoʼob kaʼachoʼ? Úuch kíimikoʼob.
5. Teʼ kʼiinoʼobaʼ, ¿bix tsʼoʼok u béeytal le baʼax ku yaʼalik Isaías 54:17?
5 Jéeobaeʼ tu yaʼalaj tiʼ le israelitaʼoboʼ: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ. Bíin a mak u chiʼ tuláakal máax ku táabal u tak a pool. Jeʼel baʼax bíin in [tsʼáa] tiʼ tuláakal máaxoʼob meyajtikenaʼ: Bíin in beet ka [ganarnakoʼob]» (Isa. 54:11, 17). Teʼ tu «tsʼook jaʼaboʼob[aʼ]» le máaxoʼob meyajtik Jéeobaoʼ tsʼoʼok u yilkoʼob u béeytal le tʼaanoʼobaʼ (2 Tim. 3:1-5, 13). Tsʼoʼoleʼ maʼ kun xuʼulul u chúukpajal k-óol aktáant u túuntajoʼob le Kʼaasilbaʼaloʼ, tumen Jéeobaeʼ maʼ ken u pʼatoʼon yéetel maʼ ken u chaʼa u xuʼulsaʼaltoʼoniʼ (Sal. 118:6, 7).
6. ¿Baʼax ku yaʼalik u libroi Daniel kun úuchul tiʼ le gobiernoʼob yanoʼob yáanal u páajtalil Satanasoʼ?
6 Maʼ kun xáantaleʼ yaan u xuʼulsaʼal tiʼ tuláakal le máaxoʼob yanoʼob yáanal u páajtalil Satanasoʼ. Le profeta Danieloʼ tu yaʼalaj: «Tu kʼiiniloʼob u méekʼtáanoʼob le [gobiernoʼoboʼ], u [Diosil] kaʼaneʼ bíin u líikʼes jumpʼéel [reino] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkíintaʼak tumen mix jumpʼéel múuchʼ kaaj, baʼaleʼ yaan u xuʼulsik jumpuliʼ tuláakal le uláakʼ [reinoʼoboʼ]» (Dan. 2:44). Le ken béeychajak le profecíaaʼ, le Luʼumaʼ mix bikʼin kun kaʼa gobernarbil tumen le Kʼaasilbaʼaloʼ mix tumen kʼeban wíinikoʼob. Yaan u xuʼulsaʼal tiʼ Satanás bey xan tiʼ tuláakal baʼax ku meyajtiʼ utiaʼal u náachkuntik máak tiʼ Dios; tu tsʼookeʼ u Reino Dioseʼ yaan u gobernartik tuláakal le Luʼumaʼ (xokaʼak 2 Pedro 3:7, 13).
7. ¿Baʼaxten k-aʼalik jeʼel u páajtal k-tsʼáaikba tu contra le Kʼaasilbaʼaloʼ?
7 Jach k-ojeleʼ Jéeobaeʼ yaan u kanáantik u kaajal ken u taas le xuʼulsajiloʼ yéetel maʼ kun xuʼulul u tsʼáaik yaʼab utsiloʼob tiʼ (xokaʼak Salmo 125:1, 2). Baʼaleʼ ¿yaan wa u kanáantik Jéeoba cada utúul tiʼ toʼon? Le Bibliaoʼ ku yaʼalikeʼ jeʼel u páajtal k-tsʼáaikba tu contra le Kʼaasilbaʼal jeʼex úuchik u beetik Jesusoʼ. Tiʼ le apóstol Juanoʼ tsʼaʼab u yil u múuchʼ «yaʼabkach máakoʼob» maʼ kun kíimloʼob ken xuʼulsaʼak tiʼ le kʼasaʼan máakoʼob kex tumen tiaʼan Satanás tu contraʼoboʼ. Le múuchʼ máakoʼobaʼ yaan u yaʼalikoʼob: «Le toksajiloʼ utiaʼal k-Jajal Dios, máax kulukbal teʼ jalaʼach kʼáancheʼoʼ yéetel utiaʼal le tamanoʼ [wa Jesús]» (Apo. 7:9-14). Le Bibliaoʼ ku yaʼalikeʼ le máaxoʼob yéeyanoʼob utiaʼal u binoʼob kaʼanoʼ bey xan le «uláakʼ tamanoʼo[boʼ]» yaan u tsʼáaikubaʼob tu contra le Kʼaasilbaʼaloʼ (Juan 10:16; Apo. 12:10, 11). U jaajileʼ, utiaʼal u béeytal lelaʼ kʼaʼabéet u kanáantkoʼob maʼ u náayal u yóoloʼob yéetel u kʼáatkoʼob tiʼ Dios ka kanáantaʼakoʼob (Mat. 6:13).
Jesuseʼ tu tsʼáajuba tu contra le Kʼaasilbaʼaloʼ
8. ¿Máakalmáak le yáax túuntaj tu tsʼáaj Satanás tiʼ Jesusoʼ, yéetel baʼax núukaʼabtiʼ tumen Jesús?
8 Jesuseʼ jach chúukpaj u yóol u aktáant le baʼaxoʼob tu beetaj Satanás utiaʼal u náachkuntik tiʼ Diosoʼ. Le tiaʼan kaʼach Jesús teʼ x-tokoy luʼumoʼ óoxtéen tu túuntaj u yóol utiaʼal ka u beet baʼax maʼ utstutʼaan Jéeobaiʼ. Yáaxeʼ, le ka tu yilaj tsʼoʼok cuarenta kʼiinoʼob maʼ jaankeʼ, Satanaseʼ tu yaʼalajtiʼ: «Wa u paalech Jajal Dioseʼ aʼal ka suunak waajil le tuunchoʼobaʼ». Baʼaleʼ tiʼ Jesuseʼ maʼ meyajnaj le páajtalil yantiʼ utiaʼal u kaxtik chéen yutsiloʼ, ka túun tu núukajtiʼ: «Le Kiliʼich Tsʼíiboʼ ku yaʼalik: Maʼ chéen yéetel waaj bíin kuxlak wíinikiʼ, baʼaleʼ tak yéetel tuláakal u tʼaan Jajal Dios» (Mat. 4:1-4; Deu. 8:3).
9. ¿Baʼaxten maʼ unaj k-chaʼik tiʼ Satanás ka u táabsoʼon yéetel le baʼaxoʼob uts tu yich máakoʼ?
9 Utiaʼal u náachkuntkoʼon tiʼ Dioseʼ, tiʼ Satanaseʼ ku meyaj le baʼaloʼob jatsʼuts u yilik máakoʼ. Upʼéel tiʼ letiʼobeʼ letiʼe u tsʼíiboltik u núupchital máak yéetel wa máaxoʼ, lelaʼ upʼéel baʼal maʼ jelaʼan u yilaʼal tumen le máakoʼoboʼ. Le oʼolal jach kʼaʼanan k-kanáantikba utiaʼal maʼ k-lúubul tiʼ le núupkʼebanoʼ. Le Bibliaoʼ ku yaʼalik yoʼolal lelaʼ: «¿Maʼ wa a wojeleʼex le máaxoʼob ku beetikoʼob kʼaasoʼ maʼ bíin utiaʼaltoʼob u [reino] Jajal Diosiʼ? Maʼ a tuskabaʼex, tumen maʼ bíin utiaʼaltoʼob u [reino] Jajal Dios le máaxoʼob ku kʼaakʼas kuxtaloʼoboʼ, mix le ku [adorartikoʼob] beetbil [diosoʼoboʼ], mix le ku núupkʼebanoʼoboʼ, mix le ku núupkʼebantkubaʼob yéetel u yéet xiibiloʼoboʼ» (1 Cor. 6:9, 10). Jeʼex k-ilkoʼ, le máaxoʼob yantiʼob upʼéel kʼaakʼas kuxtal yéetel maʼ tu pʼatkoʼoboʼ yaan u xuʼulsaʼaltiʼob.
10. Jeʼex u yaʼalik Mateo 4:5, 6, ¿baʼax uláakʼ túuntajil tsʼaʼab tiʼ Jesús tumen le Kʼaasilbaʼaloʼ?
10 Le Bibliaoʼ ku yaʼalik uláakʼ túuntaj tsʼaʼab tiʼ Jesús: «Le kʼaasilbaʼal túunoʼ tu bisaj Jesús tu kiliʼich kaajil Jerusalén, ka tu naʼaksaj jach tu kaʼanalil [le templooʼ], ka tu yaʼalajtiʼ: Wa u paalech Jajal Dioseʼ, pulaba; tumen le Kiliʼich Tsʼíiboʼ ku yaʼalik: Jajal Dioseʼ yaan u túuxtik u angeloʼob utiaʼal u kanáantikechoʼob», «yéetel u kʼaboʼob [...] bíin u machechoʼob utiaʼal maʼ a tʼóochpajal tiʼ mix jumpʼéel tuunich» (Mat. 4:5, 6). Wa ka u beet le baʼax aʼalaʼabtiʼ tumen Satanasoʼ, maʼ xaaneʼ Jesuseʼ jeʼel kaʼach u yeʼesik letiʼe Mesíasoʼ. Baʼaleʼ yaan xan u chíikpajal chéen u kʼáat u taasuba noj baʼalil yéetel maʼ kun lúubul utsil tiʼ Dios. Jesuseʼ tu kaʼa eʼesaj jach chúukaʼan u yóol tiʼ Jéeoba ka tu yaʼalaj tiʼ Satanás: «Ku yaʼalik xan le Kiliʼich Tsʼíiboʼ: Maʼ a túuntik u yóol Yuumtsil a Jajal Dios» (Mat. 4:7; Deu. 6:16).
11. ¿Baʼax jeʼel u túulchʼinkoʼon k-beet Satanaseʼ, yéetel bix jeʼel u bintoʼon wa k-lúubul tiʼ u táabsajiloʼobeʼ?
11 Bejlaʼa xaneʼ Satanaseʼ jeʼel u túulchʼintkoʼon utiaʼal k-túuntik u yóol Jéeobaeʼ. ¿Bixi? Maʼ xaaneʼ ku péekskoʼon k-beet jeʼex u máakiloʼob le yóokʼol kaabaʼ, jeʼex k-vestirtikba yéetel táakpajal tiʼ náaysaj óoloʼob maʼ pataloʼobiʼ. Baʼaleʼ wa k-beetik upʼéel baʼal ku bin tu contra le baʼax ku yaʼalik le Bibliaoʼ, ¿unaj wa k-páaʼtik ka u kanáantoʼon Jéeoba yéetel u angeloʼob tiʼ le talamiloʼob ku taasik le baʼax kʼaas t-beetoʼ? ¿Máasaʼ maʼatan? Jeʼex Davideʼ, kex arrepentirnaj úuchik u kʼebantal yéetel Betsabeeʼ, Jéeobaeʼ maʼ tu tokaj tiʼ le talamiloʼob tu taasaj le baʼax tu beetoʼ (2 Sam. 12:9-12). Jeʼex k-ilkoʼ, utiaʼal maʼ k-túuntik u yóol Jéeobaeʼ maʼ unaj k-yaabiltik le yóokʼol kaabaʼ (xokaʼak Santiago 4:4 yéetel 1 Juan 2:15-17).
12. ¿Baʼax túuntajil ku chíikpajal teʼ Mateo 4:8, 9, yéetel baʼax tu beetaj Jesús?
12 Teʼ tu yóoxpʼéel túuntajoʼ, Satanaseʼ tu yaʼalaj u tsʼáaik tiʼ Jesús u gobiernoiloʼob le yóokʼol kaabaʼ. Ka tsʼoʼok u yeʼesiktiʼeʼ tu yaʼalaj: «Tiʼ teech bíin in tsʼáa tuláakal le baʼaloʼobaʼ wa ka xoltal a [adorarten]» (Mat. 4:8, 9). Jeʼex k-ilkoʼ Satanaseʼ u kʼáat kaʼach ka tsʼaʼabaktiʼ le adoración unaj u tsʼaʼabal chéen tiʼ Jéeobaoʼ yéetel ka xuʼuluk u beetik Jesús baʼax utstutʼaan Dios. Le u tsʼíiboltik u adorartaʼaloʼ le beet u náachtal tiʼ Jéeoba yéetel u beetkuba utúul jach kʼasaʼan ángel ku tsʼíiboltik baʼax maʼ utiaʼaliʼ (Sant. 1:14, 15). Baʼaleʼ Jesuseʼ tu chʼaʼatuklaj u meyajtik chéen Jéeoba. Le oʼolal tu yaʼalaj tiʼ le Kʼaasilbaʼaloʼ: «Xeen, Satanás, tumen ku yaʼalik le Kiliʼich Tsʼíiboʼ: [Adorart] Yuumtsil a Jajal Dios, meyajt xan chéen letiʼ». Jesuseʼ tu kaʼa tsʼáajuba tu contra le Kʼaasilbaʼaloʼ tumen maʼ u kʼáat ka yanak mix baʼal u yil tu yéeteliʼ. Letiʼeʼ ¡mix bikʼin jeʼel u adorartik kaʼach le máax tu tsʼáajuba tu contra Diosoʼ! (Mat. 4:10; Deu. 6:13; 10:20.)
«Tokabaʼex tiʼ kʼaasilbaʼal, letiʼ xaneʼ bíin áalkabnak teʼex»
13, 14. 1) Le ka tu yeʼesaj Satanás tiʼ Jesús u gobiernoiloʼob le yóokʼol kaabaʼ, ¿baʼax táan kaʼach u yaʼalik u tsʼáaiktiʼ? 2) ¿Bix u yilik u táabskoʼon Satanás bejlaʼeʼ?
13 Le ka tu yeʼesaj tiʼ Jesús tuláakal u gobiernoiloʼob yóokʼol kaabeʼ, Satanaseʼ táan kaʼach u tsʼáaiktiʼ upʼéel páajtalil tiʼ mix máak uláakʼ tsʼaʼabak. Letiʼeʼ ku tuklik kaʼacheʼ, ken u yil Jesús le baʼax ku tsʼáaiktiʼoʼ yaan u taaktal u gobernartik tuláakal le yóokʼol kaabaʼ. Bejlaʼeʼ, Satanaseʼ maʼ tu yaʼalik u tsʼáaiktoʼon mix upʼéel gobierno, baʼaleʼ ku yilik u kʼaskúuntik k-puksiʼikʼal yéetel le baʼaxoʼob k-ilik, k-uʼuyik yéetel k-tuklikoʼ.
14 Tumen Satanás nuʼuktik le yóokʼol kaabaʼ, letiʼ xan nuʼuktik le baʼaxoʼob ku chíikpajal teʼ televisión, teʼ radio yéetel teʼ periodicooʼ. Le oʼolal le baʼaloʼob ku xoʼokol, ku chaʼantaʼal yéetel ku yuʼubaʼaloʼ yaʼab u tʼaanoʼob tiʼ núupkʼeban yéetel tiʼ u beetaʼal loob tiʼ máak. Le baʼaloʼob xanaʼ ku yoksik tu pool máak u yantaltiʼ baʼaloʼob maʼ kʼaʼabéettiʼiʼ. Satanaseʼ bey u yilik u táabskoʼon utiaʼal ka xiʼikoʼon tu paach le ayikʼaliloʼ. Baʼaleʼ, le ken k-kanáant maʼ k-xokik, maʼ k-ilik yéetel maʼ k-uʼuyik baʼaloʼob maʼ pataleʼ, táan k-aʼalik: «Xeen, Satanás». Ken k-chʼaʼatukult maʼ u yantal baʼal k-il yéetel u baʼalubaʼob Satanaseʼ, k-eʼesik táan k-beetik jeʼex Jesuseʼ. Tsʼoʼoleʼ k-eʼesik maʼ táakpajaʼanoʼon tiʼ u yóokʼol kaab Satanás wa maʼ k-chʼaʼik saajkil k-aʼal u j-jaajkunajoʼon Jéeoba yéetel u disipuloʼon Cristo tiʼ k-éet meyajoʼob, k-éet xookoʼob, k-láakʼtsiloʼob yéetel tiʼ uláakʼ máakoʼob (xokaʼak Marcos 8:38).
15. ¿Baʼaxten mantatsʼ unaj k-kanáantikba utiaʼal maʼ u náayal k-óol?
15 Le ka tu yilaj maʼ béeychaj u táabsik Jesuseʼ, «le kʼaasilbaʼal túunoʼ tu pʼataj» (Mat. 4:11). Baʼaleʼ tu kaxtaj uláakʼ súutukil utiaʼal u túuntik u yóol, tumen le Bibliaoʼ ku yaʼalik: «Le ka tu yilaj le kʼasilbaʼal maʼ tu kaxtik bix u túuntik u yóol Jesuseʼ, ka náachchaj tiʼ letiʼ [jujumpʼéel] kʼiin[oʼob]» (Luc. 4:13). Kex maʼ lúubkoʼon tiʼ upʼéel túuntajil, yéetel jach k-tsʼáaik u nib óolalil tiʼ Jéeoba tu yoʼolaleʼ, maʼ unaj u xuʼulul k-kaxtik u yáantajiʼ. Maʼ u tuʼubultoʼoneʼ Satanaseʼ maʼ kun xuʼulul u túuntik k-óoliʼ, yéetel yaan u beetik teʼ kʼiin maʼ táan k-páaʼtikoʼ. Le oʼolal mantatsʼ unaj k-kanáantikba utiaʼal maʼ u táabskoʼon, kʼaʼabéet k-líiʼsikba utiaʼal ka chúukpajak k-óol aktáan le túuntajoʼoboʼ yéetel unaj k-chʼaʼatuklik maʼ u xuʼulul k-meyajtik Jéeoba.
16. Utiaʼal maʼ k-lúubul tiʼ u táabsajiloʼob Satanaseʼ, ¿baʼax unaj k-kʼáatik tiʼ Jéeoba, yéetel baʼaxten mantatsʼ unaj k-beetik?
16 Upʼéel baʼal jach jeʼel u yáantkoʼon utiaʼal maʼ k-lúubul tiʼ u táabsajiloʼob le Kʼaasilbaʼaloʼ, letiʼe u kiliʼich muukʼ Jéeobaoʼ, baʼaleʼ mantatsʼ unaj k-kʼáatiktiʼ. Le kiliʼich muukʼoʼ yaan u yáantkoʼon k-beet baʼaloʼob mix utéen t-tuklaj wa jeʼel u páajtal k-beetik chéen t-juunaleʼ. Utiaʼal u yeʼesik tiʼ u disipuloʼob jach tu jaajil yaan u tsʼaʼabaltiʼob le kiliʼich muukʼoʼ, Jesuseʼ tu yaʼalaj: «Wa teʼex, kex kʼaakʼas máakeʼex, a wojel a tsʼaʼex maʼalob baʼaloʼob tiʼ a paalaleʼexeʼ, jach tu jaajil a Taataʼex yaan teʼ kaʼanoʼ bíin u tsʼáa le Kiliʼich [muukʼ] tiʼ le máaxoʼob kʼáatik tiʼeʼ» (Luc. 11:13). Le oʼolaleʼ maʼ u xuʼulul k-kʼáatik u kiliʼich muukʼ Jéeoba, tumen leloʼ yaan u yáantkoʼon k-tsʼáaba tu contra le Kʼaasilbaʼaloʼ. Wa maʼ k-kʼáat lúubul tiʼ u «táabsajiloʼob» Satanaseʼ, maʼ chéen unaj k-payalchiʼiʼ, baʼaxeʼ unaj k-búukintik tuláakal le u nuʼukulil baʼateʼel ku tsʼáaiktoʼon Jéeobaoʼ (Efe. 6:11-18).
17. ¿Baʼax áant Jesús utiaʼal u tsʼáaikuba tu contra le Kʼaasilbaʼaloʼ?
17 Le Bibliaoʼ ku yeʼesik baʼax áant Jesús u tsʼáauba tu contra le Kʼaasilbaʼaloʼ, yéetel lelaʼ jeʼel xan u yáantkoʼoneʼ: «Jesuseʼ mukʼyajnaj tiʼ [upʼéel cheʼ, NM], maʼ tu beetaj u cuentai wa subtsil u kíimil máak beyoʼ, tumen u yojeleʼ ku tsʼoʼokol u mukʼyajeʼ yaan u yantal kiʼimak óolal tiʼ; ku tsʼoʼokoleʼ ka kulaj tu x-noʼoj u trono Jajal Dios» (Heb. 12:2). Jeʼex Jesuseʼ toʼon xaneʼ jeʼel u kiʼimaktal k-óol wa k-eʼesik chéen Jéeoba unaj u gobernar, k-kiliʼichkúuntik u kʼaabaʼ yéetel k-kʼaʼajsik yaan u tsʼáaiktoʼon le kuxtal minaʼan u xuuloʼ. Jach yaan u kiʼimaktal k-óol ken xuʼulsaʼak tiʼ Satanás yéetel tiʼ u kʼasaʼan yóokʼol kaab, bey xan ken béeychajak le baʼax ku yaʼalik le Bibliaaʼ: «Le j-kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jeetsʼel óolal» (Sal. 37:11). Le oʼolaleʼ maʼ u xuʼulul k-ilik tsʼáaikba tu contra le Kʼaasilbaʼal jeʼex úuchik u beetik Jesusoʼ (xokaʼak Santiago 4:7, 8).
[U tsolajil le oochel teʼ táan juʼun 31]
¿A wojel wa u núukil?
• ¿Baʼaxoʼob eʼesik Jéeobaeʼ ku kanáantik u kaajal?
• ¿Baʼaxten k-aʼalik Jesuseʼ jach chúukpaj u yóol u aktáant u túuntajiloʼob le Kʼaasilbaʼaloʼ?
• ¿Bix jeʼel k-tsʼáaikba tu contra le Kʼaasilbaʼaloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 29]
Wa k-yaabiltik le yóokʼol kaabaʼ, k-tsʼáaikba tu contra Dios
[U tsolajil le oochel teʼ táan juʼun 31]
Jesuseʼ maʼ tu yóotaj u kʼam le páajtalil táan kaʼach u tsʼaʼabaltiʼ tumen Satanasoʼ