Koʼoten túun, tsaypachteniʼ
Koʼoten túun, tsaypachteniʼ
«Wa yaan máax u kʼáat u tsaypachteneʼ, maʼ u yóotikuba jumpuliʼ yéetel u chʼaʼa u cheʼil u mukʼyaj yéetel ka u tsaypachten sáamsamal.» (LUC. 9:23, NM)
1, 2. 1) ¿Baʼax tu yaʼalaj Jesús jeʼel u páajtal u beetik tuláakal máakeʼ? 2) ¿Kux túun teech, táan wa a beetik le baʼax tu yaʼalaj Jesusoʼ?
LE MAʼ yaʼab u bin utiaʼal u kíimsaʼaloʼ, Jesuseʼ bin kʼaʼaytaj teʼ kaajoʼob yaan Pereaoʼ, naatsʼ tiʼ u áalkab jaʼi Jordán. Le tiaʼan kaʼach teʼeloʼ, utúul táankelem xiʼipaleʼ tu kʼáatajtiʼ baʼax unaj u beetik utiaʼal ka yanaktiʼ le kuxtal minaʼan u xuuloʼ. Le ka tu tsʼáaj cuenta Jesús táan u tsʼoʼokbesik le Ley le xiʼipaloʼ, tu yaʼalajtiʼ: «Xeen, kon tuláakal baʼax yantecheʼ ka a tsʼáa tiʼ le óotsiloʼoboʼ; bey túunoʼ bíin yanak tiʼ teech ayikʼalil teʼ kaʼanoʼ. Ku tsʼoʼokoleʼ, koʼoten, ka taalakech tin paach» (Mar. 10:21). ¡Chéen tukult bukaʼaj jaʼtsil u tsaypachtaʼal Jesús, le u juntúuliliʼ Paal Jajal Diosoʼ!
2 Kex tumen le xiʼipal maʼ tu yóotaj u tsaypacht Cristooʼ, anchaj máakoʼob tu beetoʼob. Táanil tiʼ lelaʼ Jesuseʼ tsʼoʼokaʼaniliʼ u yaʼalik tiʼ Felipe: «Tsaypachteniʼ» (Juan 1:43). Felipeiʼ tu tsaypachtaj yéetel ka máan kʼiineʼ tu beetuba utúul tiʼ u apostoloʼob. Le ka tu yaʼalaj xan tiʼ Mateo ka u tsaypachteʼ letiʼeʼ tu beetaj (Mat. 9:9; 10:2-4). U jaajileʼ Jesuseʼ tu yaʼalaj tiʼ tuláakal máak: «Wa yaan máax u kʼáat u tsaypachteneʼ, maʼ u yóotikuba jumpuliʼ yéetel u chʼaʼa u cheʼil u mukʼyaj yéetel ka u tsaypachten sáamsamal» (Luc. 9:23, NM). Le oʼolaleʼ tuláakal le máaxoʼob u kʼáat u beetoʼob baʼax tojeʼ, jeʼel u páajtal u tsaypachkoʼob Cristo wa u kʼáatoʼobeʼ. ¿Kux túun teech, táan wa a tsaypachtik Cristo? Yaʼab tiʼ toʼoneʼ táan k-beetik, yéetel ken kʼaʼaytajnakoʼoneʼ k-aʼalik tiʼ le máakoʼob ka u beetoʼob xan beyoʼ.
3. ¿Baʼax ken u yáantoʼon utiaʼal maʼ u xuʼulul k-tsaypachtik Cristo?
3 Jujuntúul tiʼ le máaxoʼob tsʼoʼok u yokloʼob ichil u kaajal Jéeobaoʼ, tsʼoʼok u xuʼulul u tsaypachkoʼob Jesús, le oʼolal xan tsʼoʼok u náachtaloʼob tiʼ Dios (Heb. 2:1). ¿Kux túun toʼon, baʼax unaj k-beetik utiaʼal xan maʼ u xuʼulul k-tsaypachtik Cristo? Letiʼe ka tuukulnakoʼon tiʼ lelaʼ: «¿Baʼax péeksken utiaʼal ka káajak in tsaypachtik Jesús? ¿Baʼax u kʼáat u yaʼal u tsaypachtaʼal?». U núukil le kʼáatchiʼobaʼ yaan u yáantkoʼon utiaʼal maʼ u xuʼulul k-tsaypachtik Cristo yéetel k-áantik uláakʼ máakoʼob ka u beetoʼob xan beyoʼ.
¿Baʼax péekskoʼon k-tsaypacht Cristo?
4, 5. ¿Baʼaxten k-aʼalik chéen Jesús jeʼel u páajtal u gobernartik wíinik tubeeleʼ?
4 Le profeta Jeremíasoʼ tu yaʼalaj tiʼ Jéeoba: «Yuumtsil, teneʼ in wojeleʼ xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin [u] xuʼulul» tiʼ (Jer. 10:23). Le baʼaxoʼob tsʼoʼok u yúuchul tiʼ wíinikoʼ ku yeʼesik jach jaaj le baʼax ku yaʼalik le tekstoaʼ. Tsʼoʼok u yilaʼaleʼ wíinikeʼ maʼ tu páajtal u gobernarkuba chéen tu juunal. Chéen Jesús jeʼel u páajtal u beetik tubeeleʼ, le oʼolal k-tsaypachtik. ¿Baʼaxten k-aʼalik chéen letiʼ jeʼel u páajtal u gobernartik wíinik tubeeleʼ?
5 Yáaxeʼ, tumen Jéeoba yéey Jesús utiaʼal ka u nuʼuktoʼon. Yéetel u jaajileʼ chéen Jéeoba jeʼel u páajtal u yéeyik máax jeʼel u nuʼuktikoʼon tubeeleʼ. U kaʼapʼéeleʼ tumen tiʼ Jesuseʼ yaan jatsʼuts modosoʼob minaʼan tiʼ mix utúul wíinik (xokaʼak Isaías 11:2, 3). Le oʼolal unaj k-ilik kuxtal jeʼex letiʼeʼ (1 Ped. 2:21). Yéetel u yóoxpʼéeleʼ, tumen Jesuseʼ jach u yaabilmaj u disipuloʼob, tsʼoʼoleʼ bey tu yeʼesil le ka tu kʼubaj u kuxtal tu yoʼolaloʼoboʼ (xokaʼak Juan 10:14, 15). Letiʼeʼ bey utúul j-kanan taman jach u yaabilmaj u tamanoʼobeʼ tumen ku yáantkoʼon utiaʼal ka yanaktoʼon kiʼimak óolal bey xan le kuxtal minaʼan u xuuloʼ (Juan 10:10, 11; Apo. 7:16, 17). Leloʼobaʼ chéen jujumpʼéel tiʼ le baʼaloʼob péeksoʼon utiaʼal ka k-tsaypacht Cristooʼ. Baʼaleʼ, ¿baʼax jach u kʼáat u yaʼal u tsaypachtaʼal Cristo?
6. ¿Baʼax ku páaʼtaʼal ka u beet le máaxoʼob tsaypachtik Cristooʼ?
6 U tsaypachtaʼal Cristoeʼ maʼ chéen ka u yaʼal máak táan u beetkiʼ. Bejlaʼeʼ, óoliʼ dos mil millones máakoʼobeʼ ku yaʼalikoʼob táan bin u tsaypachkoʼob Cristo, baʼaleʼ le baʼax ku beetkoʼoboʼ ku bin tu contra le baʼax ku yaʼalik Diosoʼ, le oʼolal ku yaʼalaʼal chéen táan u «beet[koʼob] baʼaloʼob kʼaastak» (xokaʼak Mateo 7:21-23). Jeʼex k-kaʼansik tiʼ le máakoʼoboʼ, utiaʼal k-tsaypachtik Cristoeʼ mantatsʼ unaj k-beetik jeʼex letiʼeʼ yéetel k-tsʼáaik ichil k-kuxtal le baʼax tu kaʼansoʼ. Beoraaʼ koʼox ilik jujumpʼéel tiʼ le jatsʼuts modos tu yeʼesaj Jesusoʼ yéetel bix jeʼel u páajtal k-beetik jeʼex letiʼeʼ.
Yanaktoʼon naʼatil jeʼex Jesuseʼ
7, 8. 1) ¿Baʼax le naʼatiloʼ, yéetel bix úuchik u yantal tiʼ Jesús? 2) ¿Bix tu yeʼesil Jesús naʼatil, yéetel bix jeʼel k-beetik jeʼex letiʼeʼ?
7 Kex tumen yaʼab jatsʼuts modos yaan tiʼ Jesuseʼ, teʼ xookaʼ chéen kampʼéel ken k-xakʼaltiʼ: u naʼatil, u kabal óolal, bix chúukpajik u yóol u meyajt Dios yéetel le yaabilaj tu yeʼesoʼ. Yáaxeʼ koʼox tʼaan tiʼ le naʼatil tu yeʼesoʼ, wa le páajtalil yaan tiʼ máak utiaʼal u tsʼáaik ichil u kuxtal le baʼax u yojel yéetel u kammaj tiʼ Diosoʼ. Le apóstol Pablooʼ tu yaʼalaj yoʼolal Jesús: «Tiʼ letiʼ kʼalaʼan tuláakal u ayikʼalil le kʼaj óolaliloʼ yéetel le naʼatiloʼ» (Col. 2:3). ¿Bix anchajik tiʼ Jesús le naʼatiloʼ? Letiʼeʼ tu yaʼalaj: «Kin waʼalik chéen le baʼax tu kaʼansajten le Taataoʼ» (Juan 8:28). Tumen tiʼ Jéeoba kaambalnajeʼ, Jesuseʼ mantatsʼ tu yeʼesaj naʼatil tiʼ tuláakal baʼax tu beetaj.
8 Upʼéel bix tu yeʼesileʼ, letiʼe ka tu chʼaʼatuklaj baʼax ken u beet yéetel u kuxtaloʼ. Tu chʼaʼatuklaj maʼ u bin tu paach u baʼalubaʼob le yóokʼol kaabaʼ utiaʼal ka u meyajt tubeel u Taata. Tsʼoʼoleʼ tu xupaj u muukʼ yéetel tu máansaj yaʼab tiempo táan u kʼaʼaytik u maʼalob péektsilil le Reinooʼ. Utiaʼal k-beetik jeʼex letiʼeʼ, maʼ unaj k-bin tu paach u baʼalubaʼob le yóokʼol kaabaʼ mix k-xupik muukʼ yéetel k-máansik yaʼab tiempo tiʼ baʼaloʼob maʼ jach kʼaʼanantakoʼobiʼ (Mat. 6:22). Yaʼab sukuʼunoʼobeʼ tsʼoʼok u chʼaʼatuklik u máansik u kuxtaloʼob chéen yéetel upʼíit baʼaloʼob utiaʼal ka maas táakpajkoʼob teʼ kʼaʼaytajoʼ, yéetel jujuntúul tiʼ letiʼobeʼ táan u meyajoʼob bey precursoroʼobeʼ. Wa bey táan a beetikoʼ, jach maʼalob le baʼax tsʼoʼok a chʼaʼatuklikoʼ. Bey túunoʼ, u tsʼáaik táanil ichil u kuxtal máak u Reino Dioseʼ ku taasik kiʼimak óolal yéetel yaʼab utsiloʼob (Mat. 6:33).
Unaj k-eʼesik kabal óolal jeʼex tu beetil Jesuseʼ
9, 10. Jesuseʼ, ¿bix tu yeʼesil jach yaan kabal óolal tiʼ?
9 Le kabal óolal tu yeʼesaj Jesusoʼ, letiʼe u kaʼapʼéel jatsʼuts modos ken k-iloʼ. Tumen kʼeban wíinikoʼoneʼ, u suukaʼanileʼ ken tsʼaʼabak páajtalil tiʼ máakeʼ ku nojbaʼalkúunskuba. Baʼaleʼ ¡Jesuseʼ maʼ beyiʼ! Kex jach nojoch le meyaj tsʼaʼantiʼ utiaʼal ka béeyak le baʼax u kʼáat Jéeobaoʼ, mix utéen máanak tu tuukul u nojbaʼalkúunskubaiʼ. Le Bibliaoʼ ku yaʼaliktoʼon ka k-eʼes kabal óolal jeʼex Jesuseʼ. Le apóstol Pablooʼ tu yaʼalaj: «Yanak túun tiʼ teʼex letiʼe tuukulaʼ, le yanchaj xan tiʼ Cristo Jesús: Le máax, kex beyiliʼ Jajal Dioseʼ, maʼ tu tuklaj u [...] [ketikuba] yéetel Jajal Dios; baʼaleʼ tu juunal yóoleʼ tu mixbaʼalkúuntuba, ka tu beetuba palitsil, ka tu béeykunsuba jeʼel bix wíinikoʼob[eʼ]» (Fili. 2:5-7, LTN). ¿Baʼax ku kaʼansiktoʼon yoʼolal Jesús le tekstoaʼ?
10 Chéen tukulte, tiʼ Jesuseʼ yaan kaʼach u jatsʼuts páajtalil u yantal tu táan u Taata. Kex beyoʼ, tu yóotaj u «mixbaʼalkúuntuba» utiaʼal u taal way Luʼumeʼ. Dioseʼ tu máansaj u kuxtal Jesús tu jobnel María, yéetel ka máan nueve mesoʼobeʼ síij jeʼex utúul chaambaleʼ. Nojochchaj tu yiknal José, utúul carpintero maʼ ayikʼaliʼ; tiʼ líikʼ u xíimbaliʼ, tiʼ tu máansaj u paaliliʼ bey xan u táankelmiliʼ. Tuláakal le kʼiinoʼobaʼ tu yuʼubaj u tʼaan u taataʼob kex kʼeban wíinikoʼob (Luc. 2:51, 52). ¿Máasaʼ jach nojoch le kabal óolal tu yeʼesoʼ?
11. ¿Bix jeʼel k-eʼesik kabal óolal jeʼex Cristoeʼ?
11 Ken k-beet yéetel kiʼimak óolal le meyajoʼob maʼ noj baʼal u yilaʼaloʼoboʼ, k-eʼesik kabal óolal jeʼex Jesuseʼ. Koʼox tʼaan tiʼ u kʼaʼaytaʼal le maʼalob péektsiloʼ. Yaan máakoʼobeʼ ku tuklikoʼobeʼ u beetaʼal lelaʼ upʼéel baʼal jach subtsil, maases tumen yaan máakoʼob maʼ u kʼáat u yuʼuboʼoniʼ, u pʼekmoʼonoʼob wa u kʼáat u beetoʼobtoʼon loob. Baʼaleʼ u jaajileʼ, le meyajaʼ ku yáantaj utiaʼal ka u salvartuba le máakoʼoboʼ. Le oʼolal maʼ unaj u xuʼulul k-áantik le máakoʼob utiaʼal ka u tsaypachtoʼob Cristooʼ (xokaʼak 2 Timoteo 4:1-5). Beoraaʼ koʼox tʼaan tiʼ u limpiokúuntaʼal u Najil Reino tuʼux táakaʼan u míistaʼal, u moʼolol le basuraoʼ yéetel u pʼoʼobol le bañoʼoboʼ. Tumen le u Najil Reino letiʼe kúuchil tuʼux k-adorartik Jéeobaoʼ, nojoch baʼal k-ilik k-áantaj utiaʼal ka limpiokúuntaʼak. Ken k-beet yéetel kiʼimak óolal le meyajoʼobaʼ, k-eʼesik yantoʼon kabal óolal yéetel táan k-tsaypachtik Cristo.
Chúukpajak k-óol meyajt Dios jeʼex tu beetil Jesuseʼ
12, 13. 1) Jesuseʼ ¿bix tu yeʼesil chúukpaj u yóol u meyajt Jéeoba, yéetel baʼax péeks u beet beyoʼ? 2) ¿Baʼax péekskoʼon k-kʼaʼayt yéetel chúukaʼan óolal le maʼalob péektsiloʼ?
12 Uláakʼ tiʼ le jatsʼuts modos tu yeʼesaj Jesusoʼ, letiʼe úuchik u chúukpajal u yóol u meyajt Jéeobaoʼ. Letiʼeʼ yaʼab baʼaloʼob tu beetaj way Luʼumeʼ: tu táankelmileʼ meyajnaj yéetel José bey carpinteroeʼ. Tsʼoʼoleʼ, le táan u kʼaʼaytajoʼ tu tsʼakaj yaʼab kʼojaʼanoʼob yéetel tu kaʼa kuxkíintaj le kimenoʼoboʼ. Baʼaleʼ maases tu tsʼáaj u yóol u kʼaʼayt le maʼalob péektsil yéetel u kaʼansik le máakoʼoboʼ (Mat. 4:23). Lelaʼ letiʼe meyaj xan unaj u beetik le máaxoʼob tsaypachtik Jesusoʼ. ¿Bix jeʼel k-beetik xan yéetel kiʼimak óolal le meyajaʼ? Utiaʼal k-ojéeltikeʼ, koʼox ilik baʼax péeks Jesús utiaʼal ka chúukpajak u yóol u beete.
13 Kex tumen letiʼe u yaabilaj tiʼ Dios péeksik kaʼach Jesús kʼaʼaytaj yéetel u kaʼansik le máakoʼoboʼ, ku beetik xan kaʼach tumen u yaabilmaj le baʼax ku kaʼansikoʼ. Utiaʼal letiʼeʼ maas yaʼab u tojol ke yaʼabach taakʼin mukaʼan, yéetel jach taak kaʼach u tsʼáaik u yojéelt le máakoʼoboʼ. Toʼoneʼ bey xan k-uʼuyikbaoʼ, tumen k-kaʼansik xan tiʼ uláakʼ máakoʼob le baʼax ku yaʼalik le Bibliaoʼ. Tuukulnakoʼon tiʼ le jatsʼuts baʼaloʼob tsʼoʼok k-kanikoʼ. Tsʼoʼok k-ojéeltik baʼax u yaʼalmaj Satanás tu contra u gobernación Jéeoba yéetel bix kun eʼesbil maʼ jaaj le baʼax tu yaʼaloʼ. Tsʼoʼoleʼ, k-ojel baʼax ku yúuchul tiʼ máak ken kíimik yéetel baʼax utsiloʼob ken u taas u Reino Dios. Kex wa tsʼoʼok u máan kʼiin k-kan le baʼaloʼobaʼ bey xan wa maʼatecheʼ, láayliʼ maas yaʼab u tojol ke yaʼabach taakʼin mukaʼaneʼ (xokaʼak Mateo 13:52). Wa ku chúukpajal k-óol k-kʼaʼayt le maʼalob péektsiloʼ, le máakoʼoboʼ yaan u yilkoʼob jach tu jaajil k-yaabilmaj le baʼax ku kaʼansik le Bibliaoʼ.
14. ¿Bix jeʼel k-kaʼansaj jeʼex tu beetil Jesusoʼ?
14 Beoraaʼ, koʼox ilik xan bix u kaʼansaj kaʼach Jesús. Letiʼeʼ yaʼab utéenel tu chʼaʼachiʼitaj le baʼax ku yaʼalik le Kiliʼich Tsʼíiboʼoboʼ. Le oʼolal utiaʼal u kaʼansik wa baʼaxeʼ mantatsʼ tu yaʼalaj: «Le Kiliʼich Tsʼíiboʼ ku yaʼalik» (Mat. 4:4; 21:13). Jesuseʼ tu chʼaʼachiʼitaj kex 19 libroʼob tiʼ le Kiliʼich Tsʼíiboʼob ich Hebreooʼ. Toʼon xaneʼ, teʼ Biblia unaj k-jóoʼsik le baʼax k-kaʼansikoʼ yéetel mantatsʼ unaj u meyajtoʼon teʼ kʼaʼaytajoʼ. Beyoʼ le máakoʼoboʼ yaan u tsʼáaikoʼob cuenta tiʼ Dios u taal le baʼax k-kaʼansiktiʼoboʼ. Jach ku kiʼimaktal k-óol ken u chaʼa u yuumil naj k-xokiktiʼ upʼéel teksto tiʼ le Bibliaoʼ, k-tsoliktiʼ baʼax u kʼáat u yaʼale bey xan bix jeʼel u tsʼáaik ichil u kuxtaleʼ. Tsʼoʼoleʼ ku maas kiʼimaktal k-óol ken k-il u kʼáat u tsaypacht Cristo.
Le máaxoʼob tsaypachtik Jesusoʼ ku yaabilkoʼob u yéet máakiloʼob
15. ¿Máakalmáak upʼéel tiʼ le modos maas ku yeʼesik Jesusoʼ, yéetel baʼax ku péekskoʼon k-beete?
15 Le yaabilaj tu yeʼesaj Jesús yoʼolal le wíinikoʼoboʼ, letiʼe u tsʼook modos ken k-xakʼalt teʼ xookaʼ yéetel letiʼe maas péekskoʼon k-tsaypachtoʼ. Le apóstol Pablooʼ tu yaʼaleʼ le yaabilaj tu yeʼesajtoʼon Cristooʼ le túulchʼinkoʼon k-yaabilt u maasil (2 Cor. 5:14, NM). Ken tuukulnakoʼon tiʼ le nojoch yaabilaj tu yeʼesajtoʼon Jesusoʼ, ku beetik u taaktal k-eʼesik yaabilaj tiʼ k-éet máakil.
16, 17. Jesuseʼ, ¿bix tu yeʼesil jach u yaabilmaj le wíinikoʼoboʼ?
16 ¿Bix tu yeʼesil Jesús jach u yaabilmaj le wíinikoʼoboʼ? Letiʼe ka tu kʼubaj u kuxtal yoʼolal tuláakal máakoʼ (Juan 15:13). Baʼaleʼ jejeláas xan bix úuchik u yeʼesik le táan u kʼaʼaytajoʼ. Letiʼeʼ ku naʼatik kaʼach bix u yuʼubikuba le máaxoʼob ku muʼyajoʼoboʼ. Le ka tu yilaj táan u yokʼol María bey xan uláakʼ máakoʼob úuchik u kíimil Lazaroeʼ, jach yaachaj xan u yóol. Kex u yojel yaan u kaʼa kuxkíintik Lazaroeʼ, Jesuseʼ «okʼolnaj[i]» (Juan 11:32-35).
17 Le maʼ sen úuch káajak u kʼaʼaytaj Jesusoʼ, utúul máak yaan lepra tiʼeʼ tu kʼáat óoltaj tiʼ: «Wa a kʼáateʼ jeʼel u páajtal a tsʼáaik in toj óolaleʼ». ¿Baʼax túun tu beetaj Jesús? Le Bibliaoʼ ku yaʼalikeʼ «tu chʼaʼaj óotsilil tiʼ», ka tu beetaj upʼéel baʼal mix utéen ilaʼak: «Tu péetsʼkʼabtaj, táan u yaʼalik: In [kʼáat], kin tsʼáaik a toj óolal. Le ka tu yaʼalaj lelaʼ, lukʼ le [lepra] tiʼ le kʼojaʼanoʼ, ka tojchaj u yóol». Jesuseʼ u yojleʼ le Leyoʼ ku yaʼalikeʼ, le máaxoʼob yaan lepra tiʼoboʼ maʼ unaj mix u maʼachloʼobiʼ. Cristoeʼ jeʼel u tsʼakik kaʼach le máak kex maʼ u machikoʼ. Baʼaleʼ, maʼ chéen tu tsʼakiʼ, tu machaj tumen maʼ xaaneʼ tsʼoʼok u yúuchtal maʼachak tumen uláakʼ máak. ¿Máasaʼ jach nojoch bix úuchik u chʼaʼik óotsilil? (Mar. 1:40-42.)
18. ¿Baʼax jeʼel k-beetik utiaʼal k-naʼatik bix u yuʼubikuba le sukuʼunoʼoboʼ?
18 Toʼon u disipuloʼon Cristoeʼ unaj k-yaabiltik k-sukuʼunoʼob, yéetel upʼéel bix jeʼel k-beetkeʼ letiʼe ken k-naʼat bix u yuʼubikubaʼoboʼ (1 Ped. 3:8). Maʼ xaaneʼ maʼ chéen chʼaʼabil k-naʼatik bix u yuʼubikuba utúul sukuʼun yantiʼ upʼéel yaayaj kʼojaʼanil wa jach lubaʼan u yóoliʼ, maases wa mix utéen k-máans upʼéel talamil beyoʼ. Baʼaleʼ Jesuseʼ kex mix utéen kʼojaʼanchajeʼ, tu naʼataj bix u yuʼubikuba le máaxoʼob kʼojaʼanoʼoboʼ. ¿Bix jeʼel k-beetik jeʼex letiʼeʼ? Letiʼe ken k-chʼenxikint utúul sukuʼun táan u tsikbaltiktoʼon bix u yuʼubikubaoʼ. Maʼalob ka k-tukult lelaʼ: «¿Bix jeʼel in wuʼuykimba wa ka in aktáant upʼéel talamil beyaʼ?». Wa k-naʼatik bix u yuʼubikuba u maasileʼ, maas maʼ kun talamtaltoʼon «[k-líiʼsik] u yóol le máaxoʼob luubul u yóoloʼoboʼ» (1 Tes. 5:14). Lelaʼ uláakʼ bix jeʼel k-eʼesik táan k-tsaypachtik Cristoeʼ.
19. ¿Baʼax ku taaktal k-beetik ken kaambalnakoʼon tiʼ Jesús?
19 ¿Máasaʼ jach jeʼel k-jóoʼsik utsil wa k-kaambal tiʼ le baʼaxoʼob tu kaʼansaj yéetel tu beetaj Jesusoʼ? Jeʼex u bin k-maas kaambal tiʼ letiʼeʼ, bey xan kun maas taaktal k-beetik jeʼex tu beetiloʼ yéetel k-áantik u maasil u beetoʼob xan beyoʼ. Le oʼolaleʼ mix bikʼin ka xuʼuluk k-tsaypachtik Jesús, le Rey yéeyaʼan tumen Diosoʼ.
¿Jeʼel wa u páajtal a tsolkeʼ?
• ¿Bix jeʼel u yantaltoʼon naʼatil jeʼex Jesuseʼ?
• ¿Bix jejeláas jeʼel u yeʼesik máak yaan kabal óolal tiʼeʼ?
• ¿Baʼax ken u yáantoʼon k-meyajt Jéeoba yéetel chúukaʼan óolal?
• ¿Bix jeʼel k-eʼesik yaabilaj tiʼ k-éet máakil jeʼex tu beetil Jesusoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
¿Baʼax modosi tu yeʼesaj Jesús le ka tu yóotaj taal way Luʼum yéetel ka síij jeʼex utúul chaambaleʼ?
[U tsolajil le oochel teʼ táan juʼun 6]
¿Baʼax péekskoʼon k-meyajt Jéeoba yéetel chúukaʼan óolal?
[U tsolajil le oochel teʼ táan juʼun 5]
Upʼéel Libro Ku Yáantkoʼon K-tsaypacht Cristo
Teʼ asamblea tiʼ distrito beetaʼab tu jaʼabil 2007, jóoʼsaʼab upʼéel túumben libro 192 u táan juʼuniloʼob, ku kʼaabaʼtik “Ven, sé mi seguidor”. Le libroaʼ beetaʼab utiaʼal ka u yáantoʼon k-kʼaj óolt tubeel bix kuxlajik Jesús yéetel bix le modos tu yeʼesoʼ. Ken tsʼoʼokok le yáax kaʼapʼéel capituloʼoboʼ, ku taasik le yáax jaats tuʼux ku xakʼaltaʼal jujumpʼéel tiʼ u jatsʼuts modos Jesús, jeʼex le kabal óolaloʼ, le naʼatiloʼ, le chúukaʼan óolaloʼ, le u yuʼubik tʼaanoʼ yéetel le úuchik u meyajtik Dios yéetel x-maʼ saajkiloʼ.
Le uláakʼ kaʼapʼéel jaatsoʼoboʼ ku tʼaanoʼob tiʼ le kʼaʼaytaj yéetel le kaʼansaj tu beetoʼ, bey xan tiʼ bix úuchik u yeʼesik yaabilaj. Tiʼ tuláakal le librooʼ ku yeʼesaʼaltoʼon bix jeʼel u páajtal k-beetik jeʼex Jesuseʼ.
Le libroaʼ ku yáantkoʼon k-il baʼax táan k-beetik ichil k-kuxtal, k-ilik wa jach tu jaajil táan k-tsaypachtik Cristo yéetel bix jeʼel u páajtal k-maas eʼesik u jatsʼuts modoseʼ. Tsʼoʼoleʼ yaan xan u yáantik tuláakal le máaxoʼob «yéeyaʼanoʼob utiaʼal ka yanaktiʼob kuxtal minaʼan u xuul[oʼ]» utiaʼal ka u tsaypachtoʼob Cristo (Hch. 13:48).
[U tsolajil le oochel teʼ táan juʼun 5]
“VEN, SÉ MI SEGUIDOR”