U Palitsil Jéeobaeʼ «loʼom tu yoʼolal k-maʼ uʼuyajtʼaanil»
U Palitsil Jéeobaeʼ «loʼom tu yoʼolal k-maʼ uʼuyajtʼaanil»
«Loʼom tu yoʼolal k-maʼ uʼuyajtʼaanil, beetaʼab u mukʼyaj tu yoʼolal k-kʼasaʼaniloʼob; [...] tu yoʼolal u loobiloʼobeʼ yanchaj tiʼ toʼon toj óolal.» (ISA. 53:5)
1. ¿Tiʼ baʼax unaj k-tuukul le ken kʼuchuk u kʼiinil le Kʼaʼajsajiloʼ, yéetel baʼax profecíai ken u yáantoʼon k-beet lelaʼ?
CADA jaʼabeʼ, le u Kʼaʼajsajil úuchik u kíimil Jesusoʼ ku tsʼáaiktoʼon u páajtalil k-tuukul tiʼ le baʼax tsʼoʼok u béeykuntik u kíimil yéetel u kaʼa kuxkíintaʼaloʼ. Lelaʼ ku kʼaʼajsiktoʼon u kʼaʼananil u yeʼesaʼal chéen Jéeoba unaj u gobernar, u kiliʼichkúuntaʼal u kʼaabaʼ yéetel ku kʼaʼajsiktoʼon xan yaan u béeytal le baʼax u tukulmaj utiaʼal le Luʼumaʼ, tuʼux táakaʼan u salvartaʼal wíinik. Maʼ xaaneʼ le baʼax ku yaʼalik Isaías 53:3-12 letiʼe profecía ku maas chíikbesik bix ken u kʼubil kaʼach u kuxtal Jesusoʼ yéetel baʼax utsiloʼob ken u taase. Le profeta Isaíasoʼ tu yaʼalaj baʼaxoʼob ken u muʼyajt le u Palitsil Diosoʼ yéetel tu yaʼalaj xan jach bix kun kíimsbil. Tsʼoʼoleʼ tu yaʼalaj baʼax utsiloʼob ken u kʼam le máaxoʼob yéeyanoʼob utiaʼal u binoʼob kaʼanoʼ bey xan le «uláakʼ tamanoʼob[oʼ]» (Juan 10:16).
2. ¿Baʼax tu yeʼesaj u profecía Isaías yoʼolal u Palitsil Diosoʼ, yéetel tiʼ baʼax ken u yáantoʼon ken k-xakʼalte?
2 Maas tiʼ setecientos jaʼaboʼob táanil tiʼ u síijil Jesuseʼ, Isaíaseʼ tu yaʼaleʼ u Palitsil Jéeobaeʼ yaan u chúukpajal u yóol tak ken kíimsaʼak. Le profecíaaʼ tu yeʼeseʼ Jéeobaeʼ jach u yojel kaʼach le u Hijooʼ yaan u chúukpajal u yóol tiʼ. K-xakʼaltik le profecíaaʼ yaan u yáankoʼon utiaʼal ka muʼukʼaʼanchajak k-fe tiʼ Dios yéetel ka k-maas yaabilte.
Ilaʼab «bey máax maʼ tu náajmatik [u] yilaʼal[eʼ]» yéetel bey mix baʼal u beelaleʼ
3. 1) Le judíoʼoboʼ, ¿baʼaxten unaj kaʼach u kʼamikoʼob Jesús yéetel kiʼimak óolal? 2) ¿Bix tu kʼamiloʼob Jesús?
3 (Xokaʼak Isaías 53:3.) U jaajileʼ, tumen jach u yaabilmaj u Taataeʼ Jesuseʼ maʼ chéen chʼaʼabil úuchik u pʼatik utiaʼal ka taalak way Luʼum muʼyaj yéetel kíimil yoʼolal le kʼeban wíinikoʼoboʼ (Fili. 2:5-8, NM). Le baʼalcheʼob kʼuʼub tu kʼiinil Moisesoʼ chéen tu chíikbesoʼob le baʼax ken u béeykunt Jesús úuchik u kʼubik u kuxtaloʼ: u saʼasaʼal tuláakal u kʼeban le wíinkoʼoboʼ (Heb. 10:1-4). Le oʼolal le u yéet kʼiiniloʼoboʼ unaj kaʼach u kʼamkoʼob Jesús yéetel kiʼimak óolal. Lelaʼ maases letiʼe baʼax unaj u beetik kaʼach le judíoʼob táan u páaʼtikoʼob le Mesíasoʼ (Juan 6:14). Baʼaleʼ le judíoʼoboʼ tu yiloʼob Jesús «bey máax maʼ tu náajmatik [u] yilaʼal[eʼ]», yéetel jeʼex úuchik u yaʼalik Isaíaseʼ tu yiloʼob bey mix baʼal u beelaleʼ. Le apóstol Juanoʼ tu yaʼalaj: «Taal tiʼ jumpʼéel yóokʼol kaab u tiaʼal, baʼaleʼ maʼ kʼaʼam tumen le utiaʼaloʼoboʼ» (Juan 1:11). Tsʼoʼoleʼ le apóstol Pedrooʼ tu yaʼalaj tiʼ le judíoʼoboʼ: «U Jajal Dios k-úuchben láakʼoʼob[eʼ] [...], tsʼoʼok u tsʼáaik nojoch tsikbeʼenil tiʼ Yuum Jesús u Paal, letiʼ le máax ta kʼubajeʼex tiʼ le jalach wíinikoʼoboʼ. Le ka óotaʼab jáalkʼabtbil tumen Pilatoeʼ, teʼexeʼ maʼ ta wóoltajeʼexiʼ. Maʼ ta kʼáatajeʼex ka jáalkʼabtaʼak le máax kiliʼich yéetel minaʼan u siʼipiloʼ, baʼaleʼ ta kʼáatajeʼex ka jáalkʼabtaʼak juntúul kíimsaj wíinik» (Hch. 3:13, 14).
4. ¿Baʼaxten ku yaʼalaʼal Jesuseʼ chuup kaʼach yéetel kʼiʼinamil?
4 Isaíaseʼ tu yaʼaleʼ Jesuseʼ «chuup kaʼach yéetel kʼiʼinamil» wa kʼojaʼaniloʼob. Baʼaleʼ, le Bibliaoʼ ku yaʼalikeʼ kex ku kaʼanal kaʼacheʼ mix utéen kʼojaʼanchaji (Juan 4:6). ¿Baʼaxten túun ku yaʼalaʼal chuup kaʼach yéetel kʼiʼinamil? Ku yaʼalaʼal beyoʼ tumen le ka anchaj way Luʼumeʼ tu kʼaj óoltaj yéetel tu tsʼakaj yaʼab kʼojaʼanoʼob (Mar. 1:32-34). Bey úuchik u béeykuntik Jesús le profecíaaʼ: «Letiʼeʼ [u] kuchmaj kaʼach tuláakal k-mukʼyajoʼob, táan kaʼach u mukʼyajtik k-kʼiʼinaloʼob» (Isa. 53:4 yáax jaats; Mat. 8:16, 17).
Bey táan kaʼach u jaʼatsʼal tumen Dioseʼ
5. Yaʼab judíoʼobeʼ, ¿baʼax tu tukloʼob beet u muʼyaj yéetel u kíimsaʼal Cristo, yéetel lelaʼ baʼaxten tu beetaj u maas muʼyaj Jesús?
5 (Xokaʼak Isaías 53:4 kaʼa jaats.) Yaʼab tiʼ u yéet kʼiiniloʼob Jesuseʼ maʼ tu naʼatoʼob baʼaxten muʼyajnaj yéetel kíimsaʼabi. Ku tuklikoʼobeʼ táan kaʼach u beetaʼal loob tiʼ tumen Dios wa táan kaʼach u jaʼatsʼal yéetel upʼéel kʼaakʼas kʼojaʼanil (Mat. 27:38-44). Le judíoʼoboʼ tu yaʼaloʼobeʼ Jesuseʼ tʼaanaj bin kʼaas tu contra Dios (Mar. 14:61-64; Juan 10:33). Baʼaleʼ Jesuseʼ mix utéen tu beetaj le baʼax aʼalaʼabaʼ, tsʼoʼoleʼ mix lúub tiʼ uláakʼ kʼebanoʼobiʼ. Tumen jach u yaabilmaj u Taataeʼ, u yojéeltik yaan u kíimsaʼal kaʼach bey utúul kʼeban wíinikeʼ tu beetaj u maas muʼyaj. Kex beyoʼ, maʼ xuʼul u tsʼoʼokbesik tuláakal le baʼax aʼalaʼabtiʼ tumen Jéeobaoʼ (Mat. 26:39).
6, 7. ¿Baʼaxten ku yaʼalik le profecíaoʼ Jéeobaeʼ tu jatsʼaj u Palitsil, yéetel baʼaxten xan ku yaʼalik tu taasaj kiʼimak óolal tiʼ?
6 Baʼaleʼ u profecía Isaíaseʼ maʼ chéen tu yaʼalaj yaan u yantal máaxoʼob ken u tukloʼob «jaʼatsʼ» Jesús tumen Diosiʼ, baʼaxeʼ tu yaʼalaj xan: «Yuumtsileʼ tu yóoltaj u beet u mukʼyaj» (Isa. 53:10). Ich hebreoeʼ le tʼaanaʼ ku tsʼáaik naʼatbil Jéeobaeʼ kiʼimakchaj u yóol úuchik u beetik u muʼyaj. Baʼaleʼ wa Jéeoba tsʼoʼok kaʼach u yaʼalik: «Jeʼel in palitsilaʼ, máax kin latʼab kʼabtik, letiʼ máax in yéeymaj, tiʼ máax kin kiʼimak óolta[leʼ]», ¿baʼaxten túun kiʼimakchaj u yóol úuchik u beetik u muʼyaj? (Isa. 42:1). ¿Baʼax jach u kʼáat yaʼal lelaʼ?
7 Utiaʼal k-naʼatikeʼ kʼaʼajaktoʼoneʼ le ka tu yaʼalaj Satanás maʼ maʼalob bix u gobernar Jéeobaeʼ, tu yaʼalaj xan mix máak kun chúukpajal u yóol u meyajt Dios, mix le máaxoʼob yanoʼob teʼ kaʼanoʼ mix le máaxoʼob yanoʼob way Luʼumeʼ (Job 1:9-11; 2:3-5). Tumen chúukpaj u yóol u meyajt Jéeoba tak ka kíimeʼ Jesuseʼ tu yeʼesaj maʼ jaaj le baʼax tu yaʼalaj Satanasoʼ. Le oʼolal kex Jéeoba jach yaachaj tu yóol úuchik u chaʼik u kíimsaʼal u Hijoeʼ, jach kiʼimakchaj u yóol ka tu yilaj chúukpaj u yóol tak tu xuul (Pro. 27:11). Uláakʼ baʼax beet u kiʼimaktal u yóoleʼ letiʼe u yojéeltik le úuchik u kíimil u Hijooʼ yaan u taasik yaʼab utsiloʼob tiʼ le máaxoʼob ken u tsʼáa u fejoʼob tiʼ u kʼiʼikʼel tu wekajoʼ (Luc. 15:7).
«Loʼom tu yoʼolal k-maʼ uʼuyajtʼaanil»
8, 9. 1) ¿Bix úuchik u loʼomol Jesús «yoʼolal k-maʼ uʼuyajtʼaanil»? 2) Le apóstol Pedrooʼ, ¿bix tu yeʼesil jach jaaj bey úuchikoʼ?
8 (Xokaʼak Isaías 53:6.) Jeʼex tamanoʼob saatloʼobeʼ, toʼoneʼ úuch joʼopʼok k-kaxtik máax jeʼel u jáalkʼabkoʼon tiʼ le kʼojaʼanil yéetel tiʼ le kíimil tu pʼatajtoʼon Adanoʼ (1 Ped. 2:25). Tumen kʼeban wíinikoʼoneʼ mix utúul tiʼ toʼon jeʼel u páajtal u tsʼáaik upʼéel boʼol yoʼolal le baʼax tu peʼertaj Adanoʼ (Sal. 49:7). Baʼaleʼ tumen jach u yaabilmoʼoneʼ, «Yuumtsileʼ tu tsʼáaj tu yóokʼol» u Hijo «tuláakal k-kʼasaʼanil». Cristoeʼ tu chaʼaj u loʼomol yéetel u beetaʼal u muʼyaj «yoʼolal k-maʼ uʼuyajtʼaanil» bey xan «tu yoʼolal k-kʼasaʼaniloʼob», bey úuchik u mankoʼon yéetel u bisik k-kʼebanoʼob tiʼ upʼéel cheʼoʼ.
9 Le apóstol Pedrooʼ tu yaʼalaj: «Jajal Dioseʼ tu tʼanajeʼex utiaʼal lelaʼ, tumen Cristoeʼ mukʼyajnaj ta woʼolaleʼex, ka tu tsʼáajteʼex jumpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ. Cristoeʼ tu bisaj k-kʼebanoʼob tu wíinklil tu yóokʼol le [cheʼoʼ, NM], utiaʼal ka kíimikoʼon tiʼ le kʼebanoʼ yéetel ka kuxlakoʼon tiʼ jumpʼéel toj kuxtal». Yéetel le ka tʼaanaj Pedro tiʼ u profecíaʼob Isaíaseʼ, Pedroeʼ tu yaʼalaj: «Letiʼeʼ loobiltaʼabi utiaʼal ka tsʼaʼakakeʼex» (1 Ped. 2:21, 24; Isa. 53:5). Le baʼax tu beetaj Jesusoʼ tu tsʼáaj u páajtalil u kaʼa natsʼkubaʼob tiʼ Dios le kʼeban wíinikoʼoboʼ. Tsʼoʼoleʼ Pedroeʼ tu yaʼalaj xan: «Cristoeʼ tu mukʼyajtaj le kíimiloʼ tu yoʼolal k-kʼebanoʼobeʼ juntéeniliʼ utiaʼal mix bikʼin. Letiʼeʼ uts, baʼaleʼ mukʼyajnaj t-oʼolal toʼon máaxoʼon kʼasaʼanoʼon, utiaʼal u bisikoʼon tiʼ Jajal Dios» (1 Ped. 3:18).
«Bisaʼab jeʼel bix u bisaʼal juntúul taman tu kúuchil kíimsajeʼ»
10. 1) Juan Bautistaeʼ, ¿baʼax tu yaʼalaj yoʼolal Jesús? 2) ¿Baʼaxten jach maʼalob le baʼax tu yaʼalaj Juan tu yoʼolal Jesusoʼ?
10 (Xokaʼak Isaías 53:7, 8.) Le ka tu yilaj Juan Bautista táan kaʼach u náatsʼal Jesús tu yiknaleʼ, tu yaʼalaj: «Ileʼex, lelaʼ u taman Jajal Dios, máax ku lukʼesik u kʼeban yóokʼol kaab» (Juan 1:29). Juaneʼ le ka tu ketaj Jesús yéetel utúul «tama[neʼ]», maʼ xaaneʼ tu beetaj tumen u yojel le baʼax u yaʼalmaj Isaíasaʼ: «Bisaʼab jeʼel bix u bisaʼal juntúul taman tu kúuchil kíimsajeʼ» (Isa. 53:7). Tsʼoʼoleʼ Isaíaseʼ tu yaʼaleʼ Jesuseʼ «tu kʼububa utiaʼal kíimil» wa tu wekaj u kʼiʼikʼel t-oʼolal (Isa. 53:12). Le áakʼab ka tu yaʼalaj Jesús ka kʼaʼajsaʼak u kíimileʼ, tu tsʼáaj upʼéel copa yéetel vino tiʼ u once apostoloʼob, ka tu yaʼalajtiʼob: «Lelaʼ in kʼiʼikʼel ku jaajkúuntik le túumben núuptʼaan yéetel ku weʼekel tu yoʼolal yaʼabkach máakoʼob utiaʼal u saʼatsajil u kʼebanoʼob» (Mat. 26:28).
11, 12. 1) ¿Baʼax tu chíikbesaj yoʼolal Jesús le baʼax tu yóotaj u beet Isaacoʼ? 2) ¿Baʼax maʼ unaj u tuʼubultoʼon ken xiʼikoʼon teʼ Kʼaʼajsajiloʼ?
11 Jeʼex Isaac, u hijo Abrahameʼ, Jesuseʼ tu yóotaj u kʼub u kuxtal (Gén. 22:1, 2, 9-13; Heb. 10:5-10). Baʼaleʼ kʼaʼajaktoʼoneʼ, kex tumen Isaac tu yóotaj u kʼub u kuxtaleʼ, Abraham máax tu chʼaʼatuklaj u kʼubik u paal bey upʼéel kíimsbil siibaleʼ (Heb. 11:17). Jeʼex Isaaqueʼ, Jesuseʼ tu yóotaj u kʼub u kuxtal, baʼaleʼ Jéeoba máax tu chʼaʼatuklaj ka beetaʼak le siibalaʼ. Le oʼolaleʼ, le úuchik u kʼubik u kuxtal Jesusoʼ ku chíikbesik le nojoch yaabilaj ku yuʼubik Dios yoʼolal wíinikoʼ.
12 Jesuseʼ tu yaʼalaj: «Tumen Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Tsʼoʼoleʼ le apóstol Pablooʼ tu yaʼalaj xan: «Baʼaleʼ Jajal Dioseʼ ku yeʼesiktoʼon tu jaajil u yaabiltmajoʼon ikil kíimik Cristo t-oʼolal kex láayliʼ j-kʼebanoʼon kaʼacheʼ» (Rom. 5:8). Le oʼolaleʼ, kex tumen k-eʼesik tsiikil tiʼ Cristo ken k-kʼaʼajs úuchik u kíimleʼ, maʼ u tuʼubultoʼoneʼ Jéeoba chʼaʼatukult u tsʼáaik u Hijo, jeʼex tu beetil Abrahameʼ. Le oʼolal ken xiʼikoʼon teʼ Kʼaʼajsajiloʼ, unaj k-beetik yéetel u tuukulil k-tsʼáaik u nib óolalil tiʼ Dios yoʼolal le baʼax tu beetaj t-oʼolaloʼ.
Le Palitsiloʼ tu «jáalkʼab[taj] yaʼabkach máakoʼob»
13, 14. U Palitsil Jéeobaeʼ, ¿bix úuchik u «jáalkʼab[tik] yaʼabkach máakoʼob»?
13 (Xokaʼak Isaías 53:11, 12.) Le profeta Isaíasoʼ tu yaʼalaj yoʼolal u Palitsil Jéeoba: «Bíin u jáalkʼabt yaʼabkach máakoʼob». ¿Baʼax u kʼáat u yaʼal lelaʼ? Tu tsʼoʼokbal le versículo 12 ku yaʼalik yoʼolal le Palitsiloʼ: «Kʼáat óolnaj tu yoʼolal j-kʼebanoʼob». Tumen tiʼ Adán k-taaleʼ ken síijkoʼoneʼ kʼeban wíinkoʼon le oʼolal k-kíimil, tumen leloʼ letiʼe «u boʼolil le kʼebanoʼ» (Rom. 5:12; 6:23). Le beetik jach kʼaʼanan k-natsʼikba tu kaʼatéen tu yiknal Jéeoba. Le u capítulo 53 tiʼ Isaíaseʼ ku yeʼesik bix úuchik u mankoʼon tiʼ le kʼeban yéetel tiʼ le kíimloʼ. Le tekstooʼ ku yaʼalik: «Le jaatsʼ tu mukʼyajtajoʼ tu taasaj tiʼ toʼon jéetsʼel, tu yoʼolal u loobiloʼobeʼ yanchaj tiʼ toʼon toj óolal» (Isa. 53:5).
14 Úuchik u kʼubik u kuxtaleʼ, Cristoeʼ tu «jáalkʼab[taj] yaʼabkach máakoʼob». Pabloeʼ tu yaʼalaj: «Jajal Dioseʼ tu yóoltaj ka yanak tiʼ Cristoeʼ tuláakal, u chúukaʼanil letiʼ, tu yóoltaj xaneʼ, tu yoʼolal Cristoeʼ, u tsʼáa tiʼ jeetsʼel [...] le baʼax[oʼob] yaan teʼ luʼumoʼ bey xan le baʼa[xoʼob] yaan teʼ kaʼanoʼ, táan u beetik u yantal jeetsʼel óolal tu yoʼolal u kʼiʼikʼel Cristo» (Col. 1:19, 20).
15. 1) ¿Tiʼ máaxoʼob táan u tʼaan Pablo le ka tu chʼaʼachiʼitaj «le baʼa[xoʼob] yaan teʼ kaʼa[noʼ]»? 2) ¿Máaxoʼob jeʼel u páajtal u jaantkoʼob le waaj yéetel u yukʼikoʼob le vinooʼ, yéetel baʼaxten?
15 «Le baʼa[xoʼob] yaan teʼ kaʼanoʼ» ku páajtal u kaʼa natsʼkubaʼob tiʼ Jéeoba úuchik u wekik u kʼiʼikʼel Jesusoʼ; leloʼobaʼ letiʼe máaxoʼob yéeyaʼanoʼob utiaʼal u binoʼob reinar yéetel Cristo teʼ kaʼanoʼ. Le sukuʼunoʼob tsʼoʼok u tʼaʼanloʼob utiaʼal u binoʼob teʼ kaʼanoʼ, ku yaʼalaʼal yantiʼob «jumpʼéel kuxtal tselaʼan tiʼ xotʼkʼinaj» (Heb. 3:1; Rom. 5:1, 18). Jéeoba túuneʼ ku máatkoʼob bey u paalaloʼobeʼ. Le kiliʼich muukʼoʼ ku yeʼesiktiʼob yéeyaʼanoʼob utiaʼal ka u kʼamoʼob «junmúuchʼ yéetel Cristo» le Reinooʼ yéetel utiaʼal ka u beet u reyiloʼob bey xan u sacerdoteiloʼob teʼ kaʼanoʼ (Rom. 8:15-17; Apo. 5:9, 10). Ku táakpajaloʼob xan ichil «u Israel Jajal Dios» bey xan ichil le «túumben núuptʼaan[oʼ]» (Gál. 6:16, LTN; Jer. 31:31-34). Le oʼolal ku páajtal u jaantkoʼob le waaj yéetel u yukʼikoʼob le vino yaan teʼ copa ku meyaj tu kʼiinil le Kʼaʼajsajiloʼ, yéetel yoʼolal lelaʼ Jesuseʼ tu yaʼalaj: «Le [copaaʼ, NM] letiʼ le túumben núuptʼaan jaajkunaʼan yéetel in kʼiʼikʼel wekaʼan ta woʼolaleʼe[xoʼ]» (Luc. 22:20).
16. 1) ¿Tiʼ máaxoʼob táan u tʼaan Pablo le ka tu chʼaʼachiʼitaj «le baʼa[xoʼob] yaan teʼ luʼumoʼ»? 2) ¿Bix u pʼáatloʼob maʼalobil tu táan Jéeoba?
16 «Le baʼa[xoʼob] yaan teʼ luʼumoʼ» letiʼe máaxoʼob kun pʼáatloʼob kuxtal way Luʼum tiʼ upʼéel Paraísooʼ. U Palitsil Dioseʼ tsʼoʼok u jáalkʼabtikoʼob utiaʼal ka pʼáatkoʼob maʼalob tu táan Jéeoba. Tumen ku tsʼáaik u fejoʼob tiʼ Cristo yéetel tumen «u pʼoʼomaj u nookʼoʼob yéetel u sakkúuntmajoʼob xan yéetel u kʼiʼikʼel le Tamanoʼ», ku beetkubaʼob u amigoʼob Jéeoba yéetel ku tsʼaʼabaltiʼob u páajtalil u salvarkubaʼob tiʼ le «nojoch yaayaj óolaloʼ» (Apo. 7:9, 10, 14; Sant. 2:23). Tumen maʼ táakpajaʼanoʼob teʼ túumben núuptʼaan yéetel tumen maʼ yéeyaʼanoʼob utiaʼal u binoʼob kaʼaneʼ, le uláakʼ tamanoʼobaʼ maʼatech u jaantkoʼob le waajoʼ mix tech u yuʼkoʼob le vino ku meyaj teʼ Kʼaʼajsajiloʼ. Baʼaleʼ kex tumen maʼ tu beetkoʼob lelaʼ, ku yeʼeskoʼob tsiikil ken xiʼikoʼob tu Kʼaʼajsajil úuchik u kíimil Cristo.
Unaj k-tsʼáaik u nib óolalil tiʼ Jéeoba yéetel tiʼ u Palitsil
17. U profecíaʼob Isaíaseʼ, ¿bix tsʼoʼok u yáantkoʼon utiaʼal k-líiʼsikba utiaʼal le Kʼaʼajsajiloʼ?
17 U profecíaʼob Isaías tsʼoʼok k-xakʼaltik ku tʼaan tiʼ u Palitsil Diosoʼ, ku yáantkoʼon utiaʼal k-maas naʼatik baʼaxten unaj k-bin tiʼ u Kʼaʼajsajil úuchik u kíimil Jesusoʼ. Tsʼoʼok xan u yáantkoʼon utiaʼal k-tsʼáaik «k-paakat tiʼ Jesús, tiʼ máax ku taal [k-fe] yéetel máax ku yutsil chúukaʼankúuntik[oʼ]» (Heb. 12:2). Tsʼoʼok k-kankeʼ Jesuseʼ mix tu tuukul máanjaʼan u tsʼáaikuba tu contra Dios, jeʼex tu beetil Satanasoʼ. Jesuseʼ jach utstutʼaan u kaambal tiʼ u Taata tumen u yojel chéen Letiʼ yaan u derechoi u gobernar. Le ka anchaj way Luʼumeʼ, Jesuseʼ tu chʼaʼaj óotsilil tiʼ le máakoʼoboʼ yéetel yaʼab tiʼ letiʼobeʼ tu tsʼakaj yéetel tu yáantoʼob u natsʼubaʼob tiʼ Dios. Bey úuchik u yeʼesik baʼax ken u beet ken káajak u gobernar way Luʼumeʼ, «ken u beet u yantal [toj] bejil [yóoʼ] luʼum» (Isa. 42:4). Tumen Jesús «u sáasil múuchʼ kaajoʼo[beʼ]», tu jach kʼubaj u yóol u kʼaʼayt le maʼalob péektsiloʼ, leloʼ ku yeʼesiktoʼon jach kʼaʼabéet xan k-tsʼáaik k-óol kʼaʼayt le maʼalob péektsil tiʼ tuláakal máakoʼ (Isa. 42:6).
18. U profecíaʼob Isaíaseʼ, ¿baʼaxten ku péeksik k-puksiʼikʼal utiaʼal ka k-tsʼáa u nib óolalil tiʼ Jéeoba?
18 U profecíaʼob Isaíaseʼ, ku yáantkoʼon xan utiaʼal k-eʼesik nojoch baʼal k-ilik le baʼax tu beetaj Jéeoba úuchik u túuxtik u Hijo kíimil t-oʼolaloʼ. Jéeobaeʼ yaachaj u yóol úuchik u yilik u muʼyaj u Hijo, baʼaleʼ kiʼimakchaj u yóol tumen chúukpaj u yóol tak ka kíimi. Toʼon xaneʼ ku kiʼimaktal k-óol ojéeltik tuláakal le baʼax tu beetaj Jesusoʼ tu yeʼesaj maʼ jaaj le baʼax tu yaʼalaj Satanasoʼ, tu yeʼesaj chéen Jéeoba unaj u gobernar yéetel tu kiliʼichkúuntaj u kʼaabaʼ u Taata. Tsʼoʼoleʼ Cristoeʼ tu manoʼon tiʼ le kʼeban ka kíim tiʼ upʼéel cheʼ t-oʼolaloʼ. Bey úuchik u beetik u pʼáatal maʼalobil tu táan Dios le máaxoʼob yéeyaʼanoʼob utiaʼal u binoʼob kaʼanoʼ bey xan le uláakʼ tamanoʼoboʼ. Ken xiʼikoʼon tu Kʼaʼajsajil u kíimil Jesuseʼ, k-puksiʼikʼaleʼ yaan u péekskoʼon k-tsʼáa nib óolal tiʼ Jéeoba bey xan tiʼ u Palitsil yoʼolal le baʼax tu beetoʼoboʼ.
Utiaʼal kʼaʼajsbil
• ¿Baʼaxten ku yaʼalaʼal Jéeobaeʼ kiʼimakchaj u yóol úuchik u beetik u muʼyaj u Hijo?
• ¿Bix úuchik u loʼomol Jesús «yoʼolal k-maʼ uʼuyajtʼaanil»?
• U Palitsil Jéeobaeʼ, ¿bix úuchik u «jáalkʼab[tik] yaʼabkach máakoʼob»?
• U profecíaʼob Isaíaseʼ, ¿bix tsʼoʼok u yáantkoʼon utiaʼal k-líiʼsikba utiaʼal le Kʼaʼajsajiloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
Ilaʼab «bey máax maʼ tu náajmatik [u] yilaʼal[eʼ]» yéetel bey mix baʼal u beelaleʼ
[U tsolajil le oochel teʼ táan juʼun 28]
«Tu kʼububa utiaʼal kíimil»
[U tsolajil le oochel teʼ táan juʼun 29]
Le uláakʼ tamanoʼoboʼ maʼatech u jaantkoʼob le waajoʼ mix tech u yukʼikoʼob le vino ken xiʼikoʼob teʼ Kʼaʼajsajiloʼ