U yáantaʼal le máakoʼob kaambal tiʼ Jéeobaoʼ ku taasik kiʼimak óolal

«Xeeneʼex túun [...] ka a beeteʼexoʼob j-kaambaloʼob.» (MAT. 28:19)

1-3. 1) ¿Bix u yuʼubikuba yaʼab sukuʼunoʼob ikil u tsʼáaikoʼob xook tiʼ wa máax? 2) ¿Baʼax kʼáatchiʼiloʼob ken k-núuk teʼ xookaʼ?

TU LUʼUMIL Estados Unidoseʼ, utúul kiik ku tsʼáaik xook tiʼ upʼéel familia ku tʼankoʼob hindieʼ tu yaʼalaj: «Tsʼoʼok once semanaʼob káajak in tsʼáaik xook tiʼ upʼéel familia ku taal tiʼ u luʼumil Pakistán yéetel jach maʼalob k-bisikba. Ku taaktal in wokʼol ken in kʼaʼajs maʼ kun xáantal ken suunakoʼob tu luʼumiloʼob yéetel maʼ ken k-kaʼa ilba. Jach tsʼoʼok u kiʼimakkúunsik in wóol in kaʼansiktiʼob máax Jéeoba».

² Kux túun teech, ¿tsʼoʼok wa xan a wuʼuyik le kiʼimak óolal ku taasik u yáantaʼal utúul máak u kʼaj óolt Diosoʼ? Jesús yéetel u disipuloʼobeʼ jach kiʼimakchaj u yóol úuchik u kaʼanskoʼob uláakʼ máakoʼob. Le ka suunaj le 70 disipuloʼob táan u tsikbalkoʼob jach maʼalob úuchik u bintiʼob teʼ kʼaʼaytajoʼ, «sen kiʼimakchaj u yóol Jesús tu yoʼolal Kiliʼich [muukʼ]» (Luc. 10:17-21). Bejlaʼa xaneʼ yaʼab sukuʼunoʼobeʼ jach ku kiʼimaktal u yóol u kaʼanskoʼob uláakʼ máakoʼob. Tu jaʼabil 2007, cada meseʼ tsʼaʼab xook tiʼ maas tiʼ seis millones máakoʼob.

³ Baʼaleʼ yaan sukuʼunoʼobeʼ maʼ anchajak u jatsʼuts páajtalil u tsʼáaikoʼob xook tiʼ wa máaxiʼ. Yéetel yaneʼ tsʼoʼok u máan kʼiin maʼ kaʼa yanak mix upʼéel tiʼiʼ. ¿Baʼaxoʼob jeʼel u talamkúuntik k-tsʼáaik upʼéel xookeʼ? ¿Baʼax jeʼel k-beetik utiaʼal  ka k-tsʼáa xook tiʼ wa máaxeʼ? ¿Yéetel baʼaxten maʼalob ka k-beet j-kaambaloʼob jeʼex tu yaʼalil Jesusoʼ? (Mat. 28:19.)

Talamiloʼob jeʼel u lúuʼsik k-óoleʼ

4, 5. 1) Tiʼ yaʼab luʼumiloʼobeʼ, ¿bix u yilik yaʼab máakoʼob le kʼaʼaytaj k-beetkoʼ? 2) Tiʼ uláakʼ tuʼuxoʼobeʼ, ¿baʼax talamiloʼob ku aktáantik le sukuʼunoʼob teʼ kʼaʼaytajoʼ?

⁴ Yaan tuʼuxoʼobeʼ yaʼab máakoʼob jach utstutʼaan u kʼamkoʼob le jóoʼsaʼaniloʼob k-kʼaʼaytikoʼ yéetel tu séebaʼanil ku yóotkoʼob ka tsʼaʼabak xook tiʼob. Utúul sukuʼun yéetel u yatan tiʼ u luʼumil Australia u taaloʼob yéetel binoʼob kʼaʼaytaj tu luʼumil Zambiaeʼ, tu yaʼaloʼob: «Jach jaaj le baʼax aʼalaʼabtoʼonoʼ: U kajnáaliloʼob Zambiaeʼ jach utstutʼaan u yuʼubkoʼob le maʼalob péektsiloʼ. Jach maʼalob úuchik u bintoʼon le ka kʼaʼaytajnajoʼon teʼ bejoʼoboʼ. Le máakoʼoboʼ ku náatsʼloʼob u yuʼuboʼob le baʼax k-tsikbaltikoʼ, yéetel jujuntúul tiʼ letiʼobeʼ ku kʼáatkoʼob wa minaʼantoʼon upʼéel revista jóokʼ tiʼ wa baʼax mesil». Tu jaʼabil 2007, teʼ luʼumilaʼ le sukuʼunoʼoboʼ tu tsʼáajoʼob xook tiʼ maas tiʼ doscientos mil máakoʼob, lelaʼ u kʼáat u yaʼaleʼ cada sukuʼuneʼ tu tsʼáaj xook tiʼ utúul wa kaʼatúul máak.

⁵ Baʼaleʼ, yaan luʼumiloʼob tuʼux óoliʼ mix máak u kʼáat u kʼam le jóoʼsaʼaniloʼoboʼ mix ka tsʼaʼabak xook tiʼob. ¿Baʼaxten? Tumen maʼ kulaʼanoʼob ken máankoʼon tu yotochoʼobiʼ wa tumen maʼ u kʼáat u yuʼuboʼob mix baʼal tiʼ religioniʼ. Yaʼab máakoʼobeʼ líikʼoʼob tiʼ upʼéel familia maʼ utstutʼaan u yantaloʼob tiʼ upʼéel religioniʼ, wa tumen tsʼoʼok u tuʼusloʼob tumen u religionoʼob. Uláakʼoʼobeʼ tsʼoʼok xan u beetaʼal kʼaas tiʼob tumen u nojchil u religionoʼob, yéetel tsʼoʼok u pʼáatloʼob bey tamanoʼob mix máak kanáantikoʼobeʼ (Mat. 9:36). Le beetik maʼ u kʼáat u yuʼuboʼob mix baʼal tiʼ le Biblia ken máankoʼon kʼaʼaytajoʼ.

6. ¿Baʼax talamil ku aktáantik jujuntúul sukuʼunoʼob yaan yil yéetel u kaʼansaʼal uláakʼ máakoʼob?

⁶ Uláakʼ sukuʼunoʼobeʼ ku lúubul u yóoloʼob yoʼolal uláakʼ baʼaloʼob. Jujuntúul tiʼ letiʼobeʼ maʼ tu páajtal u jach táakpajloʼob teʼ kʼaʼaytajoʼ tumen kʼojaʼanoʼob wa tumen tsʼoʼok u yantal u jaʼabiloʼob. Uláakʼoʼob xaneʼ ku tuklikoʼob maʼ tu páajtal u tsʼáaikoʼob upʼéel xook yéetel le Bibliaoʼ. Ku yuʼubikubaʼob jeʼex Moisés le ka túuxtaʼab tumen Jéeoba tʼaan yéetel le faraonoʼ. Moiseseʼ tu yaʼalaj: «In Yuumtsil, teneʼ maʼ tʼáalkab in tʼaaniʼ» (Éxo. 4:10). Yaan kʼiineʼ yaʼab sukuʼunoʼobeʼ bey xan u yuʼubikubaʼoboʼ tumen ku tuklikoʼob maʼ kun béeytal u yáantkoʼob le máaxoʼob ken u kaʼansoʼoboʼ. Maʼ xaaneʼ tumen k-tuklik maʼ maʼalob bix k-kaʼansajeʼ, maʼ ken k-áant mix máak utiaʼal ka okjaʼanak. Le oʼolal jeʼel k-tuklik chéen kunel ka u tsʼáa u yóol máakiʼ. ¿Baʼax túun jeʼel k-beetik utiaʼal ka k-tsʼáa xook tiʼ wa máaxeʼ?

Unaj k-tsʼíiboltik k-áantkoʼob

7. ¿Baʼax péeksik kaʼach Jesús u kaʼans le máakoʼoboʼ?

⁷ Yáaxeʼ unaj u yantaltoʼon u tsʼíibolalil k-áantkoʼob. Jesuseʼ tu yaʼaleʼ wíinikeʼ ku yaʼalik le baʼax «chupmajil u puksiʼikʼaloʼ» (Luc. 6:45). ¿Baʼax yaan kaʼach tu puksiʼikʼal Jesús? Letiʼe u tsʼíibolalil u yáantik le máakoʼoboʼ. Leloʼ le péeks u kaʼansoʼob. Le ka tu yilaj minaʼan mix máak áantik le judíoʼob utiaʼal ka u maas natsʼubaʼob tiʼ Diosoʼ, tu chʼaʼaj óotsilil tiʼob ka tu yaʼalaj tiʼ u disipuloʼob: «Le joochoʼ jach yaʼab, [...] le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik» (Mat. 9:36-38).

8. 1) ¿Tiʼ baʼax unaj k-tuukul utiaʼal u taaktal k-kaʼansik u maasil? 2) ¿Baʼax k-kanik tiʼ le baʼax tu yaʼalaj utúul koʼoleloʼ?

⁸ Tuukulnakoʼob tiʼ le yaʼab utsiloʼob tsʼoʼok k-kʼamik tumen anchaj utúul sukuʼun tu jach tsʼáaj u yóol u kaʼansoʼonoʼ. Lelaʼ yaan u yáantkoʼon k-il bukaʼaj utsiloʼob jeʼel xan u kʼamik le máaxoʼob teʼ tuʼux k-kʼaʼaytajoʼ. Utúul koʼoleleʼ tu túuxtaj upʼéel carta tiʼ upʼéel u Najil Betel tuʼux tu yaʼalaj: «Jach kiʼimak in wóol ikil u taal le u j-jaajkunajoʼob Jéeoba u kaʼansenoʼob yéetel le Bibliaoʼ. In wojel maʼ chéen chʼaʼabil u kaʼanskenoʼobiʼ tumen jach yaʼab in beetik kʼáatchiʼob, le oʼolal ku chan xáantal táan u tsʼáaikoʼobten xook. Baʼaleʼ maʼ tu náakal u yóol u yáantenoʼob yéetel u kʼáat u kaʼansoʼobten tuláakal le baʼax u yojloʼob tiʼ le Bibliaoʼ. Jach kin tsʼáaik u nib óolalil tiʼ Jéeoba yéetel  tiʼ Jesús úuchik in kʼaj óoltkoʼob».

9. ¿Baʼax tu tsʼáaj u yóol u beet Jesús, yéetel bix jeʼel k-beetik jeʼex letiʼeʼ?

⁹ Baʼaleʼ maʼ u tuʼubultoʼoneʼ, maʼ tuláakal le máaxoʼob chʼenxikint Jesús tu beetubaʼob u disipuloʼoboʼ (Mat. 23:37). Yanoʼobeʼ kex tumen tu kʼamoʼob le baʼax tu kaʼansoʼ, ka máan kʼiineʼ tu yaʼaloʼob maʼ maʼalobiʼ ka xuʼul u tsaypachkoʼob (Juan 6:66). Baʼaleʼ, Jesuseʼ maʼ tu tuklaj wa maʼ kʼaʼanan le baʼax ku kaʼansik kaʼachoʼ. Kex tumen yaʼab máakoʼob maʼ tu yóotoʼob u tsaypachteʼ, maʼ xuʼul u tsʼáaik u yóol u yáant le máaxoʼob taak u kaambaloʼoboʼ. Tu yilaj beyoʼob upʼéel kool tsʼoʼok u kʼantal utiaʼal ka joʼochokeʼ, yéetel tu taasaj kiʼimak óolal tiʼ u táakpajal teʼ meyajaʼ (xokaʼak Juan 4:35, 36). Toʼon xaneʼ maʼ unaj k-chiʼichnaktal tumen yaan máakoʼob maʼ u kʼáat u kʼamoʼob upʼéel xookiʼ, baʼaxeʼ unaj k-tsʼáaik k-óol áant le máaxoʼob tak u kaambaloʼoboʼ. ¿Bix jeʼel u páajtal k-beetikeʼ?

Kʼaʼaytajnakoʼon yéetel u tuukulil k-káajsik upʼéel xook

10, 11. ¿Baʼax jeʼel u páajtal a beetik utiaʼal maʼ u xuʼulul a kʼaʼaytaj yéetel kiʼimak óolaleʼ?

¹⁰ Le j-kolnáaloʼ ku pakʼal yéetel u tuukulil u jooch. Toʼon xaneʼ, unaj k-kʼaʼaytaj yéetel u tuukulil k-káajsik upʼéel xook. Baʼaleʼ kex jach k-tsʼaamaj k-óoleʼ, maʼ xaaneʼ maʼ yaʼab máakoʼob k-ilik tu yotochoʼob ken kʼaʼaytajnakoʼon wa ken kaʼa suunakoʼon xíimbaltoʼobiʼ, leloʼ jeʼel u beetik u lúubul k-óoleʼ. ¿Unaj wa túun u xuʼulul k-kʼaʼaytaj joonaj joonai? Maʼatech, tumen láayliʼ yaan máakoʼob ku kaambaloʼob tiʼ Dios ikil k-kʼaʼaytaj beyaʼ.

¹¹ Le oʼolaleʼ utiaʼal maʼ u xuʼulul k-kʼaʼaytaj yéetel kiʼimak óolaleʼ, maʼalob ka k-kaxt uláakʼ bix jeʼel k-kʼaʼaytik le maʼalob péektsiloʼ. ¿Tsʼoʼok wa a wilik a kʼaʼaytaj teʼ bejoʼob yéetel teʼ tuʼux ku  yúuchul koonoloʼ? ¿Jeʼel wa u páajtal a kʼáatik u numeroi u teléfono le máakoʼob utiaʼal a kaʼa tsikbal tu yéeteloʼoboʼ? ¿Jeʼel wa xan u páajtal a kʼaʼaytaj tiʼ teléfono tiʼ uláakʼ máakoʼobeʼ? Wa maʼ tu xuʼulul a tsʼáaik a wóol yéetel mantatsʼ ka wilik uláakʼ bix jeʼel a kʼaʼaytajeʼ, yaan a kaxtik máaxoʼob u kʼáatoʼob kaambal tiʼ Dios, yéetel leloʼ yaan u jach taasiktech kiʼimak óolal.

Maʼ u lúubul k-óol wa mix máak u kʼáat u yuʼuboʼoniʼ

12. ¿Baʼax jeʼel u páajtal k-beetik wa óoliʼ mix máak u kʼáat u yojéelt mix baʼal yoʼolal religioneʼ?

¹² ¿Baʼax jeʼel u páajtal k-beetik wa óoliʼ mix máak u kʼáat u yojéelt mix baʼal yoʼolal religioneʼ? Jeʼel u páajtal k-tsikbal tu yéeteloʼob yoʼolal le baʼaxoʼob beetik u chiʼichnaktaloʼoboʼ. Le apóstol Pablooʼ tu yaʼalaj: «Ichil le judíoʼoboʼ, kin beetikimba jeʼel bix juntúul judíoeʼ [...], utiaʼal le máaxoʼob kuxaʼanoʼob yáanal u yaʼalmajtʼaan Moiseseʼ, [...] kin beetkimba jeʼel bix juntúul tiʼ letiʼobeʼ, kex tu jaajileʼ tiʼ yanen tu yáanal u yaʼalmajtʼaan Jajal Dioseʼ [...], tsʼoʼok in beetikimba jeʼel bix cada juntúuleʼ». ¿Baʼaxten bey úuchik u beetik Pablooʼ? Letiʼeʼ tu yaʼalaj: «Utiaʼal in tokik [jujuntúul] tiʼob jeʼel bix ka páatakeʼ» (1 Cor. 9:20-22). Toʼon xaneʼ, jeʼel u páajtal k-tsikbal yoʼolal le baʼax beetik u chiʼichnaktal máakoʼ. Yaʼab máakeʼ u kʼáat ka yanak kiʼimak óolal ichil u familia. Uláakʼoʼob xaneʼ táan u kaxkoʼob baʼax jach tu jaajil jeʼel u taasik kiʼimak óolal tiʼobeʼ. ¿Yaan wa upʼéel bix jeʼel k-beetik u maas taaktal u chʼenxikintkoʼob u maʼalob péektsilil le Reinooʼ?

13, 14. ¿Baʼax jeʼel a beetik utiaʼal maʼ u lúubul a wóol kʼaʼaytajeʼ?

¹³ Teʼ tuʼuxoʼob óoliʼ mix máak u kʼáat u yuʼub le baʼax ku kʼaʼaytaʼaltiʼoboʼ, yaʼab sukuʼunoʼobeʼ tsʼoʼok u kaxkoʼob jejeláas bix jeʼel u seguer u kʼaʼaytajoʼob yéetel kiʼimak óolaleʼ. ¿Baʼax tsʼoʼok u beetkoʼob? Tsʼoʼok u chʼaʼatuklik u kanikoʼob upʼéel túumben tʼaan. Utúul sukuʼun yéetel u yatan, yantiʼob maas tiʼ 60 jaʼaboʼobeʼ tu yiloʼobeʼ teʼ tuʼux ku kʼaʼaytajoʼoboʼ yaʼab chinoʼob kajaʼanoʼobiʼ. Le sukuʼunoʼ tu yaʼalaj: «T-tuklajeʼ jach maʼalob ka k-kan le tʼaan u yojloʼoboʼ. Kex tumen sáamsamal kʼaʼabéetchaj k-xook utiaʼal k-kanikeʼ, maʼ chéen kunelchajiʼ, tumen káaj k-tsʼáaik xook tiʼ yaʼab máakoʼob».

¹⁴ Kex wa maʼ tu páajtal k-kanik uláakʼ tʼaaneʼ, jeʼel u páajtal u meyajtoʼon le folleto Buenas nuevas para gente de todas las naciones, le ken tsikbalnakoʼon yéetel wa máax yaanal tʼaan ku beetikeʼ. Tsʼoʼoleʼ jeʼel u páajtal k-kʼáatik jóoʼsaʼaniloʼob ichil le tʼaan u yojel le máakoʼoboʼ. U jaajileʼ maʼ chéen chʼaʼabil k-tsikbal yéetel wa máax yaanal bix líiʼsaʼanil yéetel yaanal le tʼaan u yojloʼ. Baʼaleʼ maʼ u tuʼubultoʼon le baʼax ku yaʼalik le Bibliaaʼ: «Le máax ku paakʼal yaʼabeʼ, yaʼab xan bíin u joche» (2 Cor. 9:6).

Upʼéel meyaj junmúuchʼ u beetaʼal

15, 16. 1) ¿Baʼaxten k-aʼalik le u kaʼansaʼal uláakʼ máakoʼoboʼ upʼéel meyaj junmúuchʼ u beetaʼal? 2) ¿Bix u yáantaj le sukuʼunoʼob tsʼoʼok u yantal u jaʼabiloʼoboʼ?

¹⁵ U kaʼansaʼal le máakoʼob u kʼaj óoltoʼob Diosoʼ, upʼéel meyaj junmúuchʼ unaj u beetaʼal. ¿Baʼaxten bey k-aʼalikoʼ? Jesuseʼ tu yaʼalaj: «Wa ka yaabiltikbaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaambaleʼex» (Juan 13:35). Tsʼoʼoleʼ le yaabilajaʼ letiʼe ku yilik le máaxoʼob ku yáax binoʼob tiʼ upʼéel muchʼtáambaloʼ. Utúul koʼolel ku tsʼaʼabal xook tiʼeʼ tu yaʼalaj: «Jach utstintʼaan in bin teʼ muchʼtáambaloʼoboʼ. ¡Tuláakloʼob ku yeʼeskoʼobten u yutsiloʼob!». Jesuseʼ tu yaʼaleʼ le máaxoʼob tsaypachkoʼ maʼ xaaneʼ yaan u pʼektaʼaloʼob tumen u láakʼtsiloʼob (xokaʼak Mateo 10:35-37). Baʼaleʼ tu yaʼalaj xaneʼ ichil u kaajal Jéeobaeʼ yaan u yantaltiʼob «sukuʼunoʼob, kiikoʼob, maamaʼob» bey xan «paalal[oʼob]» (Mar. 10:29, 30).

¹⁶ Le sukuʼunoʼob tsʼoʼok u yantal u jaʼabiloʼoboʼ jach yaʼab bix u yáantajoʼob xan utiaʼal ka u maas natsʼuba tiʼ Dios le j-xoknáaloʼoboʼ. ¿Baʼaxten? Kex tumen maʼ tu páajtal u tsʼáaikoʼob upʼéel xookeʼ, ken táakpajkoʼob teʼ muchʼtáambaloʼoboʼ ku muʼukʼaʼankúuntkoʼob u fe le j-xoknáaloʼoboʼ. Tsʼoʼoleʼ tumen úuch joʼopʼok u biskoʼob  «jumpʼéel maʼalob kuxtal[eʼ]», ku líiʼsik u yóol le sukuʼunoʼoboʼ yéetel ku péeksik uláakʼ máakoʼob utiaʼal ka u natsʼubaʼob tiʼ Jéeoba (Pro. 16:31).

Maʼ unaj k-chʼaʼik saajkil beet le meyajoʼ

17. ¿Baʼax unaj k-beetik wa k-tuklik maʼ kun béeytal k-tsʼáaik xook tiʼ wa máaxeʼ?

¹⁷ ¿Baʼax jeʼel u páajtal k-beetik wa k-tuklik maʼ kun béeytal k-tsʼáaik xook tiʼ wa máaxeʼ? Maʼ u tuʼubultoʼoneʼ Jéeobaeʼ tu tsʼáaj u kiliʼich muukʼ tiʼ Moisés utiaʼal u béeytal u tʼaan tu táan faraón, yéetel tu túuxtaj Aarón utiaʼal ka u láakʼinte (Éxo. 4:10-17). Jesús xaneʼ tu yaʼalaj yaan u yáantaʼal u disipuloʼob tumen le kiliʼich muukʼ utiaʼal ka kʼaʼaytajnakoʼoboʼ (Hch. 1:8). Yéetel tu yeʼesaj le utsiloʼob ku taasik u jóokʼol máak kʼaʼaytaj kaʼakatúuliloʼ (Luc. 10:1). Le oʼolaleʼ wa ku talamtaltech a tsʼáaik xook tiʼ wa máaxeʼ, kʼáat tiʼ Jéeoba ka u tsʼáatech naʼatil yéetel u kiliʼich muukʼ, yéetel ilawil a jóokʼol yéetel utúul sukuʼun jach u yojel u tsʼáa xook. Jach ku líiʼsik k-óol k-ojéeltik tiʼ Jéeobaeʼ ku meyaj máakoʼob maʼ kaʼanchajaʼan u xookoʼob utiaʼal ka u kaʼansoʼob uláakʼ máakoʼobiʼ (1 Cor. 1:26-29).

18. ¿Baʼax jeʼel u páajtal k-beetik wa k-tuklik maʼ kun béeytal k-áantik le máaxoʼob ken k-tsʼáa xook tiʼoboʼ?

¹⁸ ¿Baʼax jeʼel u páajtal k-beetik wa k-tuklik maʼ kun béeytal k-áantik le máaxoʼob ken k-tsʼáa xook tiʼoboʼ? U yáantaʼal utúul máak u kʼam u jaajiloʼ maʼ jeʼex u beetaʼal upʼéel janaleʼ, tumen utiaʼal u jóokʼol kiʼeʼ chéen le máax beetik unaj u tsʼáaik u yóoloʼ. Baʼaleʼ utiaʼal ka u natsʼuba utúul j-xoknáal tiʼ Dioseʼ yaan óoxpʼéel baʼaloʼob kʼaʼabéetoʼob. Yáaxeʼ Jéeoba unaj u natsʼkoʼob, lelaʼ letiʼe baʼax maas kʼaʼananoʼ (Juan 6:44). U kaʼapʼéeleʼ, letiʼe áantaj k-tsʼáaik junmúuchʼ yéetel le sukuʼunoʼob utiaʼal k-kaʼansik le j-xoknáaloʼ yéetel utiaʼal ka muʼukʼaʼanchajak u fe (xokaʼak 2 Timoteo 2:15). U tsʼookeʼ, letiʼe j-xoknáal unaj u chʼaʼatuklik wa yaan u tsʼáaik ichil u kuxtal le baʼax ku kankoʼ (Mat. 7:24-27). U jaajileʼ ku lúubul k-óol ken u pʼat u xok utúul tiʼ le j-xoknáaloʼoboʼ, tumen k-kʼáat ka u chʼaʼatukult u meyajtkoʼob Jéeoba. Baʼaleʼ k-ojel xaneʼ Jéeobaeʼ yaan u kʼáatik tiʼ cada utúul tiʼ toʼon baʼax tu beetaj yéetel u kuxtal (Rom. 14:12).

Upʼéel meyaj maʼ chéen kuneliʼ

19-21. 1) ¿Baʼax utsiloʼob k-kʼamik ken k-tsʼáa xook tiʼ wa máax? 2) ¿Bix u yilik Jéeoba tuláakal le máaxoʼob ku táakpajloʼob teʼ kʼaʼaytajoʼ?

¹⁹ K-tsʼáaik xook tiʼ le máakoʼoboʼ ku yáantkoʼon utiaʼal ka k-tsʼáa táanil u Reino Dios ichil k-kuxtal. Tsʼoʼoleʼ, ku yáantaj utiaʼal ka maas pʼáatak t-tuukul yéetel t-puksiʼikʼal le baʼaxoʼob ku yaʼalik le Bibliaoʼ. ¿Bix u yúuchul? Utúul precursor Barak u kʼaabaʼeʼ tu yaʼalaj: «A tsʼáaik xookeʼ ku beetik a xakʼaltik le Bibliaoʼ. Tumen utiaʼal u páajtal a kaʼansik wa máaxeʼ táanil kʼaʼabéet a creertik le baʼax ka kaʼanskoʼ».

²⁰ Baʼaleʼ, ¿wa maʼ táan a tsʼáaik mix upʼéel xookeʼ, u kʼáat wa túun u yaʼal mix baʼal u beelal le meeyjil kʼaʼaytaj ka beetkoʼ? Maʼatech. Jéeobaeʼ jach ku kiʼimaktal u yóol ikil k-beetik tuláakal le ku páajtal utiaʼal k-nojbeʼenkúuntik u kʼaabaʼoʼ. Tuláakal le máaxoʼob ku táakpajloʼob teʼ kʼaʼaytajoʼ ku múul meyajoʼob yéetel Dios. Baʼaleʼ, wa teech táan a tsʼáaik xook tiʼ wa máaxeʼ yaan u maas kiʼimaktal a wóol, tumen yaan a wilik bix u bin u maas muʼukʼaʼantal u fe le máax táan a kaʼansikoʼ (1 Cor. 3:6, 9, NM). Utúul precursora Amy u kʼaabaʼeʼ tu yaʼalaj: «Ken a wil bix u bin u maas natsʼkubaʼob tiʼ Dios le j-xoknáaloʼoboʼ, ka tsʼáaik u nib óolalil tiʼ Jéeoba úuchik u tsʼáaiktech u jatsʼuts páajtalil u kʼaj óoltkoʼob yéetel a wáantkoʼob u kʼamoʼob le kuxtal minaʼan u xuuloʼ».

²¹ Wa k-beetik tuláakal le ku páajtal utiaʼal k-tsʼáaik xook tiʼ wa máaxoʼ, yaan k-maas kʼubik k-óol meyajt Jéeoba yéetel yaan k-maas creertik yaan u béeytal le baʼax u yaʼalmaj u tsʼáaiktoʼonoʼ. Tsʼoʼoleʼ yéetel u yáantaj Dioseʼ, maʼ xaaneʼ yaan u páajtal k-áantik wa máax utiaʼal ka u salvartuba (xokaʼak 1 Timoteo 4:16). ¿Máasaʼ minaʼan uláakʼ baʼal jeʼel u maas taasiktoʼon kiʼimak óolaleʼ?

¿Kʼajaʼan wa tech?

• ¿Baʼax talamiloʼob jeʼel u beetik maʼ k-tsʼáaik xook tiʼ wa máaxeʼ?

• ¿Baʼax jeʼel u páajtal k-beetik wa maʼ taak u yuʼubaʼal le baʼax k-kʼaʼaytikoʼ?

• ¿Baʼaxten maʼ chéen kunel tuláakal le baʼaxoʼob k-beetik utiaʼal k-tsʼáaik xook tiʼ wa máaxoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 9]

¿Ka kaxtik wa uláakʼ bix jeʼel a kʼaʼaytaj tiʼ le máakoʼoboʼ?