Chaʼa u nuʼuktaʼal a kuxtal tumen u kaʼansajoʼob Jesús
Chaʼa u nuʼuktaʼal a kuxtal tumen u kaʼansajoʼob Jesús
«Le máax túuxtaʼan tumen Jajal Dioseʼ ku yaʼalik u tʼaanoʼob Jajal Dios.» (JUAN 3:34)
1, 2. ¿Baʼaxten jeʼel u páajtal k-aʼalikeʼ le tsolnuʼukoʼob tu tsʼáaj Jesusoʼ «u tʼaanoʼob Jajal Dios»?
LE TSOLNUʼUKOʼOB tu tsʼáaj Jesús ka kaʼansanaj teʼ puʼukoʼ maas yaʼab u tojoloʼob tiʼ le orooʼ wa uláakʼ baʼaxoʼob jach koʼojtakoʼ. Le baʼax tu kaʼansoʼ jach maʼalobtak tumen tiʼ Jéeoba u taal. Le Bibliaoʼ ku yaʼalik yoʼolal Jesús: «Le máax túuxtaʼan tumen Jajal Dioseʼ ku yaʼalik u tʼaanoʼob Jajal Dios» (Juan 3:34-36).
2 Maʼ xaaneʼ óoliʼ media hora tu bisaj tiʼ Jesús le kaʼansaj tu beetaj teʼ puʼukoʼ, teʼeloʼ tu chʼaʼachiʼitaj 21 tekstoʼob tiʼ ocho libroʼob tiʼ le Kiliʼich Tsʼíiboʼob ich Hebreooʼ. Le oʼolal le tsolnuʼukoʼob tu tsʼáajoʼ u jaajileʼ «u tʼaanoʼob Jajal Dios». Koʼox ilik jujumpʼéel bix jeʼel u páajtal k-tsʼáaik ichil k-kuxtal le baʼax tu kaʼansoʼ.
«Xeen táanil a kaxant kiʼimak óolal yéetel a sukuʼun»
3. Ka tsʼoʼok u yaʼalik Jesús tiʼ u disipuloʼob baʼax jeʼel u yúuchultiʼob wa ku séeb pʼuʼujuloʼobeʼ, ¿baʼax tsolnuʼukil tu tsʼáaj?
3 Le yaabilaj yéetel le jeetsʼeliloʼ kaʼapʼéel tiʼ le jatsʼuts modos ku taal tiʼ le kiliʼich muukʼoʼ (Gal. 5:22, 23). Tsʼoʼoleʼ tumen yantoʼon le kiliʼich muukʼoʼ kiʼimak k-óol yéetel yantoʼon jeetsʼelil. Tumen Jesús maʼ u kʼáat ka xuʼuluk u yantal tiʼ u disipuloʼob le jatsʼuts modosaʼ, tu yaʼalaj baʼax jeʼel u yúuchultiʼob wa ku séeb pʼuʼujuloʼobeʼ (Mateo 5:21, 22, NM). Tsʼoʼoleʼ tu yaʼalaj xan tiʼob: «Bey túunoʼ wa ka bisik a siibal tu kúuchil [adoracioneʼ], baʼaleʼ ku kʼaʼajal tiʼ teech, kʼuuxtech a sukuʼuneʼ, pʼat a siibal teʼeloʼ, xeen táanil a kaxant kiʼimak óolal yéetel a sukuʼun. Ku tsʼoʼokoleʼ ku páajtal a suut a kʼub a [siibaloʼ]» (Mat. 5:23, 24).
4, 5. 1) ¿Baʼax le «siibal» tu chʼaʼachiʼitaj Jesús teʼ Mateo 5:23, 24? 2) Wa yantoʼon upʼéel kʼuuxilil yéetel k-sukuʼuneʼ, ¿baʼaxten jach kʼaʼanan k-séeb utskíintik?
4 Le «siibal» tu chʼaʼachiʼitaj Jesús teʼ tekstoaʼ letiʼe baʼaxoʼob jeʼex le baʼalcheʼob ku kʼuʼubul kaʼach tiʼ Jéeoba teʼ templo yaan Jerusalenoʼ. Le siibaloʼobaʼ jach kʼaʼanantakoʼob tumen táakaʼanoʼob ichil le adoración ku tsʼáaik le israelitaʼob tiʼ Jéeobaoʼ. Baʼaleʼ Jesuseʼ tu yaʼaleʼ wa yantoʼon upʼéel kʼuuxilil yéetel utúul sukuʼuneʼ táanil tiʼ k-bisik jeʼel baʼaxak siibalil tiʼ Dioseʼ jach kʼaʼanan ka yanaktoʼon jeetsʼelil yéetel le sukuʼunoʼ.
5 ¿Baʼax k-kanik tiʼ le baʼax tu yaʼalaj Jesusaʼ? K-kanikeʼ le bix k-tratartik u maasiloʼ yaan yil yéetel le adoración k-tsʼáaik tiʼ Jéeobaoʼ (1 Juan 4:20). Le oʼolal le siibaloʼob ku tsʼaʼabal úuchjeakil tiʼ Diosoʼ mix baʼal u beelal wa le máax tsʼáaikoʼ maʼ maʼalob bix u tratartik u yéet máakiliʼ (xokaʼak Miqueas 6:6-8).
Kʼaʼabéet u yantaltoʼon kabal óolal
6, 7. ¿Baʼaxten unaj u yantaltoʼon kabal óolal ken k-utskíint upʼéel talamil yéetel utúul sukuʼun?
6 U jaajileʼ utiaʼal k-utskíintik upʼéel talamil yéetel utúul sukuʼuneʼ kʼaʼabéet u yantaltoʼon kabal óolal. Le máax ku yeʼesik le jatsʼuts modosaʼ maʼatech u baʼateʼel yéetel u sukuʼun utiaʼal u yeʼesik maʼ tiʼ letiʼ anchaj u culpai le baʼax úuchoʼ, tumen leloʼ jeʼel u beetik u yantal upʼéel talamil jeʼex le anchaj ichil le sukuʼunoʼob yanoʼob kaʼach Corintooʼ. Le apóstol Pablooʼ tu yaʼalajtiʼob: «Kʼaas u yantal baʼateliloʼob ta baatsileʼex. ¿Baʼaxten maʼ táan a mukʼyajtikeʼex u beetaʼalteʼex kʼaas? ¿Baʼaxten maʼ ta chaʼikeʼex a woklaʼaleʼex?» (1 Cor. 6:7).
7 Jesuseʼ maʼ tu yaʼalaj ka xiʼikoʼon tʼaan yéetel k-sukuʼun chéen utiaʼal k-aʼalik tiʼ letiʼ anchaj u culpai le baʼax úuchoʼ. Baʼaxeʼ unaj k-kaxtik ka yanaktoʼon jeetsʼelil tu yéetel. U jaajileʼ maʼalob ka k-aʼal baʼax k-tuklik, baʼaleʼ unaj kʼaʼajsikeʼ k-sukuʼuneʼ yaachajaʼan xan u yóol yoʼolal le baʼax úuchoʼ. Tsʼoʼoleʼ wa yaan baʼax maʼ maʼalob t-beetajtiʼeʼ, unaj u yantaltoʼon kabal óolal yéetel k-kʼáatik tiʼ ka u perdonartoʼon.
Wa a x-noʼoj ich ku beetik a lúubul tiʼ kʼeban
8. Tsol baʼax tu yaʼalaj Jesús teʼ Mateo 5:29, 30.
8 Ichil le baʼaxoʼob tu kaʼansaj teʼ puʼukoʼ, Jesuseʼ tu yaʼalaj maʼ maʼalob ka núupkʼebanchajak máakiʼ. Letiʼeʼ u yojel kaʼacheʼ jujumpʼéel u xéexetʼal k-wíinklileʼ jeʼel u beetkoʼob k-lúubul tiʼ kʼebaneʼ. Le oʼolal tu yaʼalaj: «Wa a x-noʼoj ich ku beetik a lúubul tiʼ kʼebaneʼ jóokʼes a puleʼ, tumen [maas] maʼalob ka saʼatak junxéetʼ a wíinklileʼ maʼ ka puʼuluk [Gehena, NM] tuláakal a wíinklil. Bey xan wa a x-noʼoj kʼab ku beetik a lúubul tiʼ kʼebaneʼ, xotʼ a pule, tumen [maas] maʼalob ka saʼatak junxéetʼ a wíinklileʼ maʼ ka puʼuluk [Gehena, NM] tuláakal a wíinklil» (Mat. 5:29, 30).
9. Le ich yéetel le kʼaboʼ, ¿bix jeʼel u beetikoʼob k-lúubul tiʼ kʼebaneʼ?
9 Le ich tu chʼaʼachiʼitaj Jesusoʼ táan u tʼaan tiʼ u páajtalil u paktik máak wa baʼax, yéetel le kʼaboʼ táan u tʼaan tiʼ le baʼaxoʼob ku páajtal u beetik máak tu yéeteloʼ. Wa maʼ k-kanáantikbaeʼ, leloʼobaʼ jeʼel u beetik «[k-]lúubul tiʼ kʼebaneʼ» yéetel k-náachtal tiʼ Dios (Gén. 5:22; 6:9). Le oʼolal ken máanak t-tuukul k-beetik wa baʼax ku bin tu contra Jéeobaeʼ, unaj k-séeb luʼsik t-tuukul, jeʼex ka k-luʼs upʼéel k-ich wa upʼéel k-kʼabeʼ.
10, 11. ¿Baʼax ken u yáantoʼon utiaʼal maʼ k-lúubul tiʼ le núupkʼebanoʼ?
10 ¿Baʼax jeʼel k-beetik utiaʼal maʼ k-paktik baʼaloʼob jeʼel u beetik k-lúubul tiʼ le núupkʼebanoʼ? Job, utúul máax meyajt Dios úuchjeakileʼ tu chʼaʼatuklaj maʼ u tsʼíiboltik mix utúul koʼolel wa maʼ u yatniʼ (Job 31:1, NM). Jobeʼ tu chʼaʼatuklaj maʼ u beetik mix baʼal ku bin tu contra u leyoʼob Jéeoba. Toʼon xaneʼ kex wa tsʼokaʼan k-beel bey xan wa maʼeʼ bey xan unaj k-beetkoʼ. Utiaʼal maʼ k-lúubul tiʼ le núupkʼebanoʼ kʼaʼabéettoʼon u yáantaj le kiliʼich muukʼ utiaʼal k-controlartik k-tsʼíibolaloʼoboʼ (Gal. 5:22-25).
11 Le oʼolaleʼ maʼalob ka tuukulnakoʼon tiʼ lelaʼ: «¿Ku beetik wa u yantalten kʼaakʼas tsʼíibolaloʼob le baʼaxoʼob kin xokik teʼ libroʼob wa le baʼaxoʼob kin chaʼantik teʼ Internet yéetel teʼ televisionoʼ?». Kʼaʼajaktoʼon le baʼax tu yaʼalaj le disipulo Santiagoaʼ: «Le ken táabsaʼak wa máax tu yoʼolal u kʼaakʼas tsʼíibolaloʼobeʼ letiʼ túun le ken túuntaʼak u yóo[l]. Tiʼ le kʼaakʼas tsʼíibolaloʼobaʼ ku síijil le kʼebanoʼ; tiʼ le kʼebanoʼ, le ken chúukaʼanchajak u chʼíijileʼ ku síijil le kíimiloʼ» (Sant. 1:14, 15). Le oʼolaleʼ, wa utúul máax meyajtik Jéeoba mantatsʼ «ku paktik» yéetel ku tsʼíiboltik máax maʼ u núupeʼ unaj u xulik tu séebaʼanil, jeʼex ka u jóoʼs u yich yéetel ka u píikchʼinteʼ (xokaʼak Mateo 5:27, 28).
12. ¿Baʼax tu yaʼalaj Pablo jeʼel u yáantkoʼon utiaʼal maʼ k-lúubul tiʼ le kʼaakʼas tsʼíibolaloʼoboʼ?
12 Le k-kʼaboʼoboʼ jeʼel xan u beetkoʼob k-lúubul tiʼ baʼaloʼob kʼaastakeʼ. Le oʼolaleʼ unaj k-chʼaʼatuklik k-pʼáatal maʼalobil tu táan Jéeoba jeʼex úuchik u yaʼalik Pabloaʼ: «Beeteʼex u kíimil tuláakal le luʼumkabil baʼaloʼob yaan tiʼ teʼexoʼ: Mix máak ka núupkʼebanchajak, mix ka u beet baʼaloʼob kʼaastak, mix ka xiʼik tu paach kʼaakʼas tuukuloʼob yéetel u kʼaakʼas tsʼíibolaloʼob, mix ka u tsʼíibolt taakʼin, tumen lelaʼ keet yéetel u [adorartaʼal] beetbil [diosoʼob]» (Col. 3:5). Le tekstoaʼ ku yeʼesik jach kʼaʼanan k-beetik tuláakal le ku páajtal utiaʼal maʼ k-lúubul tiʼ le kʼaakʼas tsʼíibolaloʼoboʼ.
13, 14. ¿Baʼaxten unaj k-náachtal tiʼ le kʼaakʼas tuukuloʼob yéetel tiʼ le núupkʼebanoʼ?
13 Yaʼab máakoʼobeʼ tumen ku yaʼalaʼaltiʼob jeʼel u kíimiloʼob wa maʼ tu luʼsaʼal u xéetʼ u wíinkliloʼobeʼ, ku yóotkoʼob ka luʼsaʼaktiʼob. Utiaʼal xan maʼ k-pʼáatal kimenoʼon tu táan Dioseʼ tu séebaʼanil unaj k-náachtal tiʼ le kʼaakʼas tuukuloʼob yéetel tiʼ le kʼebanoʼ. U jaajileʼ utiaʼal maʼ k-puʼulul teʼ Gehena wa utiaʼal maʼ u xuʼulsaʼaltoʼoneʼ maʼ unaj u yantaltoʼon kʼaakʼas tuukuloʼobiʼ, maʼ unaj k-núupkʼebantaliʼ yéetel maʼ unaj k-náachtal tiʼ Jéeobaiʼ.
14 Tumen kʼeban wíinkoʼoneʼ maʼ chéen chʼaʼabil u yantaltoʼon upʼéel toj kuxtaliʼ. Pabloeʼ tu yaʼalaj: «Teneʼ kin jatsʼik in wíinklil yéetel kin beetik u yuʼubik in tʼaan[,] bik úuchuk maʼ in kʼaʼamal teen ku tsʼoʼokol in kaʼansik uláakʼ máakoʼob» (1 Cor. 9:27). Le oʼolaleʼ, unaj k-chʼaʼatuklik beetik mantatsʼ le baʼax tu kaʼansaj Jesusoʼ. U jaajileʼ jach upuliʼ maʼ unaj k-beetik upʼéel baʼax jeʼel u mixbaʼalkúuntik le u kuxtal tu kʼubaj t-oʼolaloʼ (Mat. 20:28; Heb. 6:4-6).
Áanteʼex uláakʼ máakoʼob
15, 16. 1) ¿Bix tu yeʼesil Jesús maʼ unaj k-beetik k-tsʼuʼutiliʼ? 2) ¿Baʼax u kʼáat u yaʼal Lucas 6:38?
15 Yéetel le baʼaxoʼob tu beetaj bey xan yéetel le baʼaxoʼob tu kaʼansoʼ, Jesuseʼ tu yeʼesaj kʼaʼanan ka meyajnaktoʼon le baʼaxoʼob yantoʼon utiaʼal k-áantik u maasiloʼ. Letiʼeʼ tu yóotaj taal way Luʼumeʼ utiaʼal ka u tsʼáa u kuxtal tu yoʼolal wíinik (xokaʼak 2 Corintoiloʼob 8:9). Tu yóotaj xan u pʼat le nojbeʼenil yaan kaʼach tiʼ tu yiknal u Taataoʼ, u síijil bey wíinikeʼ yéetel u tsʼáaik u kuxtal tu yoʼolal kʼeban wíinikoʼob. Tsʼoʼoleʼ yoʼolal u kuxtal tu kʼuboʼ yaan máaxoʼob ku páajtal u binoʼob kaʼan utiaʼal u gobernaroʼob tu yéetel (Rom. 8:16, 17).
16 Utiaʼal u yeʼesik maʼ unaj u tsʼuʼuttal máakeʼ Jesuseʼ tu yaʼalaj: «Tsʼaʼex tiʼ uláakʼ máakoʼobeʼ, beyoʼ bíin tsʼaʼabak tiʼ teʼex tumen Jajal Dios. Bíin u tsʼáateʼex jumpʼéel maʼalob pʼisib, chúukaʼan, chíiktaʼan yéetel chuup. Bíin meyajnak tiʼ Yuum Jajal Dios le pʼisib ku meyaj tiʼ teʼex utiaʼal a pʼisikeʼex uláakʼ máakoʼo[boʼ]» (Luc. 6:38). Le tʼaan «maʼalob pʼisib» tu chʼaʼachiʼitaj Jesús teʼ tekstoaʼ, ich hebreoeʼ u kʼáat u yaʼal u jaats tiʼ u nookʼ le judíoʼob tuʼux ku tsʼáaikoʼob kaʼach le baʼax ku manikoʼoboʼ. Le baʼax tu yaʼalaj Jesusoʼ ku yeʼesikeʼ wa k-áantik u maasil yéetel le baʼax yantoʼonoʼ yaan xan k-kʼamik «jumpʼéel maʼalob pʼisib», maʼ xaaneʼ teʼ kʼiin ken maas kʼaʼabéetchajaktoʼonoʼ (Ecl. 11:2).
17. Jéeobaeʼ ¿bix tu yeʼesil maʼ maʼalob ka k-beet tsʼuʼutiliʼ, yéetel baʼax ken u taastoʼon kiʼimak óolal?
17 Jéeobaeʼ u yaabilmaj yéetel ku yeʼesik u yutsil tiʼ le máaxoʼob ku tsʼáaikoʼob yéetel kiʼimak óolal le baʼax yantiʼoboʼ. Bey úuchik u beetik le ka tu túuxtaj u juntúuliliʼ Paal «utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Pabloeʼ tu yaʼalaj: «Le máax ku pakʼal yaʼabeʼ, yaʼab xan bíin u joche. Cada juntúuleʼ unaj u tsʼáaik jeʼel bix u tukultmaj tu puksiʼikʼaleʼ, maʼ yéetel x-maʼ óoliʼ, mix tumen táan u [kʼáataʼaltiʼiʼ], tumen Jajal Dioseʼ u yaabiltmaj le máax ku tsʼáa yéetel kiʼimak óolaleʼ» (2 Cor. 9:6, 7). Jach beyoʼ, wa ku meyajtoʼon k-tiempo, k-muukʼ yéetel le uláakʼ baʼaxoʼob yantoʼon utiaʼal k-maas meyajtik Jéeobaoʼ jach yaan u yantaltoʼon kiʼimak óolal yéetel yaan k-kʼamik yaʼab utsiloʼob (xokaʼak Proverbios 19:17 yéetel Lucas 16:9).
«Maʼ a beetik u yustaʼal paax ta táan»
18. ¿Baʼax maʼ unaj k-beetik utiaʼal ka páatak k-kʼamik u yutsiloʼob Jéeobaiʼ?
18 «Maʼ a beetikeʼex a wutsil meyajeʼex tu táan máakoʼob chéen utiaʼal ka u yiloʼob. Wa ka beetikeʼex beyoʼ, mix jumpʼéel boʼolal bíin a kʼameʼex tiʼ a Taataʼex yaan teʼ kaʼanoʼ.» (Mat. 6:1.) Teʼ tekstoaʼ, Jesuseʼ táan kaʼach u tʼaan tiʼ u yantal tiʼ máak upʼéel toj kuxtal tu táan Dios. Letiʼeʼ maʼ tu yaʼalaj wa mix máak unaj u yilik kaʼach le utsil meyaj ku beetik u disipuloʼoboʼ, tumen tsʼokaʼaniliʼ u yaʼaliktiʼob: «Juulnak a sáasileʼex tu táan le máakoʼoboʼ» (Mat. 5:14-16). Baʼaleʼ «mix jumpʼéel boʼolal» ken k-kʼam tiʼ Jéeoba wa k-eʼesik utsil «chéen utiaʼal ka u yil» u maasil, jeʼex le máakoʼob chéen ku tsʼáakoʼob chaʼan tiʼ upʼéel cineoʼ. Wa k-beetik beyoʼ, mix bikʼin ken k-lúubul utsil tiʼ Jéeoba mix ken k-kʼam le utsiloʼob ken u taas u Reinooʼ.
19, 20. 1) ¿Baʼaxten tu yaʼalaj Jesús maʼ unaj k-beetik u yustaʼal paax ken k-áant le óotsiloʼoboʼ? 2) ¿Baʼax u kʼáat u yaʼal maʼ u yojéeltik le x-tsʼíik kʼab le baʼax ku beetik le x-noʼojoʼ?
19 Wa k-kʼáat lúubul utsil tiʼ Dioseʼ unaj k-beetik le baʼax tu yaʼalaj Jesusaʼ: «Le ken a wáant le óotsiloʼoboʼ, maʼ a beetik u yustaʼal paax ta táan, jeʼel bix u beetik le j-kaʼapʼéel ichoʼob teʼ sinagogaʼoboʼ yéetel teʼ kʼíiwikoʼoboʼ, leloʼobaʼ ku beetikoʼob beyoʼ utiaʼal ka utsiltʼantaʼakoʼob tumen máakoʼob. Tu jaajil kin waʼalikteʼexeʼ, tsʼoʼok u kʼamikoʼob u boʼolaloʼob beyoʼ» (Mat. 6:2). Jesús yéetel u disipuloʼobeʼ suuk u líiʼskoʼob kaʼach taakʼin utiaʼal u yáantkoʼob le óotsiloʼoboʼ (Juan 12:5-8; 13:29). U jaajileʼ mix máak jeʼel u beetik kaʼach u yustaʼal paax ken u yáant le óotsiloʼoboʼ, le oʼolal le ka tu yaʼalaj Jesús le tʼaanoʼobaʼ táan kaʼach u meyajtiʼ upʼéel kettʼaan utiaʼal u yeʼesik maʼ maʼalob ka máanak máak u tsikbalt le áantaj tu tsʼáaj, jeʼex u beetik kaʼach le fariseoʼoboʼ. Jesuseʼ tu yaʼaleʼ letiʼobeʼ j-kaʼapʼéel ichoʼob tumen ku máan u tsikbaltoʼob tiʼ tuláakal máak le baʼax tu síioʼoboʼ. Letiʼobeʼ «tsʼoʼok [kaʼach] u kʼamikoʼob u boʼolaloʼob». Le boʼolalaʼ letiʼe u nojbaʼalkuntaʼaloʼob tumen le máakoʼoboʼ yéetel maʼ xaaneʼ letiʼe u kutaloʼob tu tséel u nuuktakil le u religionoʼoboʼ. Baʼaleʼ mix upʼéel boʼol tu kʼamoʼob tiʼ Jéeoba (Mat. 23:6). ¿Baʼax túun unaj u beetik kaʼach u disipuloʼob Jesús?
20 Jesuseʼ tu yaʼalaj: «Baʼaleʼ techeʼ le ken a wáant le óotsiloʼoboʼ, maʼ u yojéeltik a x-tsʼíik baʼax ku beetik a x-noʼoj; ilawil a x-mukul beetik. A Taata máax táan u yilik baʼax ka x-mukul beetikeʼ letiʼ bíin u tsʼáatech a boʼolal» (Mat. 6:3, 4). U suukaʼanileʼ yéetel u kaʼapʼéelal k-kʼab k-meyaj, le oʼolaleʼ le x-noʼoj kʼaboʼ ku náatsʼal tiʼ le x-tsʼíikoʼ. Le oʼolaleʼ le ken u yaʼal le teksto maʼ unaj u yojéeltik le x-tsʼíik kʼab le baʼax ku beetik le x-noʼoj kʼaboʼ, u kʼáat u yaʼal maʼ unaj k-máan tsikbalt le áantaj tsʼoʼok k-tsʼáaik tiʼ wa máaxoʼ, mix ka k-aʼal tiʼ le máaxoʼob yanoʼob naatsʼ tiʼ toʼonoʼ.
21. ¿Baʼax táakaʼan ichil le boʼol ku yaʼalik u tsʼáaiktoʼon le k-Taata yaan teʼ kaʼanoʼ?
21 Tumen maʼatech k-máan tsikbalt le áantaj k-tsʼáaik tiʼ wa máaxoʼ mix máak ku kʼuchul u yojéelte. Wa k-beetik beyoʼ, le k-Taata yaan teʼ kaʼan «táan u yilik baʼax» «[k-]mukul beetikeʼ» yaan u boʼotiktoʼon. Ichil le boʼol ku tsʼáaiktoʼonaʼ táakaʼan le k-bisikba maʼalob tu yéeteloʼ, u saʼatsik k-kʼebanoʼob yéetel u tsʼáaiktoʼon le kuxtal minaʼan u xuuloʼ (Pro. 3:32; Juan 17:3; Efe. 1:7). ¿Máasaʼ lelaʼ maas maʼalob tiʼ le nojbeʼenil ku yaʼalik u tsʼáaiktoʼon le wíinikoʼoboʼ?
Kaʼansajoʼob jach yaʼab u tojol
22, 23. ¿Baʼaxten unaj k-ilik yaʼab u tojol le kaʼansajoʼob tu tsʼáaj Jesusoʼ?
22 Jeʼex k-ilkoʼ, le kaʼansaj tu beetaj Jesús teʼ puʼukoʼ ku tʼaan tiʼ yaʼab baʼaloʼob jatsʼutstak yéetel yaʼab u tojoloʼob. Kex kuxaʼanoʼon teʼ talam kʼiinoʼobaʼ, le baʼaxoʼob tu yaʼalaj Jesusoʼ ku taasiktoʼon kiʼimak óolal. Jach beyoʼ, wa k-ilik yaʼab u tojol le kaʼansajoʼob tu tsʼáaj Jesús yéetel k-chaʼik u nuʼuktik k-kuxtaleʼ, leloʼ yaan u taasiktoʼon yaʼab kiʼimak óolal.
23 Tuláakal le máax uʼuyik yéetel ku beetik le baʼax tu kaʼansaj Jesusoʼ yaan u kʼamik yaʼab utsiloʼob (xokaʼak Mateo 7:24, 25). Le oʼolaleʼ unaj k-chʼaʼatuklik tsʼoʼokbesik le tsolnuʼukoʼob tu tsʼáaj Jesusoʼ. Teʼ tuláakʼ xookoʼ yaan k-ilik uláakʼ kaʼansajoʼob tu beetaj teʼ puʼukoʼ.
¿Baʼax jeʼel a núukikeʼ?
• ¿Baʼaxten unaj k-séeb utskíintik le talamil ku yantaltoʼon yéetel utúul sukuʼunoʼ?
• ¿Baʼax unaj k-beetik utiaʼal maʼ k-lúubul tiʼ kʼeban tu yoʼolal le «x-noʼoj ich[oʼ]»?
• ¿Baʼax maʼ unaj k-beetik ken k-áant wa máaxiʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 11]
Jach jeʼel u taasik yaʼab utsil k-séeb utskíintik le talamiloʼob ku yantaltoʼon yéetel wa máaxoʼ
[U tsolajil le oochel teʼ táan juʼun 13]
Jéeobaeʼ ku yeʼesik u yutsil tiʼ le máaxoʼob ku yáantajoʼob yéetel kiʼimak óolaloʼ