¿Ka payalchiʼ wa jeʼex tu kaʼansil Jesusoʼ?
¿Ka payalchiʼ wa jeʼex tu kaʼansil Jesusoʼ?
«Le ka tsʼoʼok u tʼaan Jesuseʼ, le máakoʼoboʼ jakʼaʼan u yóoloʼob tu yoʼolal u kaʼansaj.» (MAT. 7:28)
1, 2. Le bix kaʼansajnajik Jesusoʼ, ¿baʼaxten jach tu beetaj u jaʼakʼal u yóol le máakoʼoboʼ?
TULÁAKLOʼONEʼ unaj k-chʼaʼik en cuenta yéetel k-beetik baʼax tu kaʼansaj Jesús, le utúuliliʼ Paal Diosoʼ. Mix máak ku tʼaan kaʼach jeʼex úuchik u tʼaanoʼ. Le oʼolal le ka tsʼoʼok u kaʼansaj teʼ puʼukoʼ le máakoʼoboʼ pʼáat jach jakʼaʼan u yóoloʼob (xokaʼak Mateo 7:28, 29).
2 Jesuseʼ maʼ kaʼansajnaj jeʼex úuchik u beetik u nuuktakil le judíoʼoboʼ, tumen le baʼax ku kaʼanskoʼoboʼ chéen tiʼ máakoʼob u taal; baʼaleʼ Cristoeʼ tʼaanaj «bey juntúul máak yaan u páajtalileʼ», tumen le baʼaxoʼob tu kaʼansoʼ tiʼ Dios u taal (Juan 12:50). Beoraaʼ koʼox xakʼaltik uláakʼ baʼaxoʼob tu yaʼalaj Jesús teʼ kaʼansaj tu beetaj teʼ puʼukoʼ yéetel bix jeʼel u yáantkoʼon utiaʼal ka k-maas maʼalobkíint bix k-payalchiʼeʼ.
Maʼ unaj k-payalchiʼ «jeʼel bix le j-kaʼapʼéel ichoʼoboʼ»
3. Tsol baʼax tu yaʼalaj Jesús teʼ Mateo 6:5.
3 Le payalchiʼoʼ táakaʼan ichil le adoración k-tsʼáaik tiʼ Jéeobaoʼ, le beetik mantatsʼ unaj k-payalchiʼ. Baʼaleʼ maʼ unaj u tuʼubultoʼon le baʼax tu yaʼalaj Jesús yoʼolal le payalchiʼ le ka kaʼansajnaj teʼ puʼukoʼ. Letiʼeʼ tu yaʼalaj: «Le ken payalchiʼinakeʼexeʼ, maʼ a béeytaleʼex jeʼel bix le j-kaʼapʼéel ichoʼoboʼ máaxoʼob utstutʼaanoʼob u waʼataloʼob payalchiʼ teʼ sinagogaʼoboʼ yéetel teʼ noj bejoʼoboʼ tu yoʼolal u yilaʼaloʼob tumen máakoʼob. Tu jaajil kin waʼalikteʼexeʼ, tsʼoʼok u kʼamikoʼob u boʼolaloʼob beyoʼ» (Mat. 6:5).
4-6. 1) Le fariseoʼoboʼ, ¿baʼaxten utstutʼaan u waʼataloʼob payalchiʼ teʼ sinagogaʼob yéetel teʼ noj bejoʼoboʼ? 2) ¿Baʼax boʼolil tu kʼamoʼob úuchik u beetkoʼob beyoʼ?
4 U disipuloʼob Jesuseʼ maʼ unaj u payalchiʼob kaʼach jeʼex u beetik le fariseoʼoboʼ. Le máakoʼobaʼ ku tuklikoʼob maas maʼalob yaniloʼob tiʼ u maasil, baʼaleʼ chéen j-kaʼapʼéel ichoʼob tumen maʼ jaaj wa u yaabilmoʼob Dios jeʼex u yaʼalikoʼoboʼ (Mat. 23:13-32). Letiʼobeʼ «utstutʼaanoʼob u waʼataloʼob payalchiʼ teʼ sinagogaʼoboʼ yéetel teʼ noj bejoʼob[oʼ]». ¿Baʼaxten ku beetkoʼob? Chéen utiaʼal «u yilaʼaloʼob» tumen u maasiloʼ. Le judíoʼob jach tu jaajil u kʼubmaj u yóol u meyajtoʼob Diosoʼ suuk kaʼach u muchʼkubaʼob payalchiʼ tu yorai táan u kʼuʼubul le siibaloʼob teʼ templooʼ (las nueve jaʼatskab kʼiin yéetel las tres u chíinil kʼiin). Yaʼab tiʼ u kajnáaliloʼob Jerusaleneʼ suuk kaʼach u muchʼkubaʼob utiaʼal payalchiʼ teʼ templooʼ, yéetel le máaxoʼob kajakbaloʼob táanxeliloʼ suuk u payalchiʼob waʼatalil teʼ sinagogaʼob yanoʼob tu kaajaloʼoboʼ (ket yéetel Lucas 18:11, 13).
5 Baʼaleʼ tumen maʼ tuláakal máak yaan naatsʼ tiʼ le templo wa tiʼ upʼéel sinagoga tu yorai le payalchiʼoboʼ, yaʼab tiʼ letiʼobeʼ ku payalchiʼob jeʼel tuʼuxak ka yanakoʼobeʼ. Baʼaleʼ jujuntúul máakoʼob ku tuklikoʼob jach maʼalob yaniloʼob tu táan Dioseʼ ku yilik u yantaloʼob «teʼ noj bejoʼob» chéen utiaʼal ka ilaʼak táan u payalchiʼoboʼ. Tsʼoʼoleʼ kex maʼ unajeʼ ku beetkoʼob «chowak payalchiʼob» utiaʼal ka aʼalaʼak jach u kʼubmaj u yóoloʼob tiʼ Dios (Luc. 20:47). Toʼon k-meyajtik Jéeobaeʼ jach upuliʼ maʼ unaj k-beetik jeʼex le máakoʼobaʼ.
6 Jesuseʼ tu yaʼaleʼ le j-kaʼapʼéel ich máakoʼobaʼ «tsʼoʼok u kʼamikoʼob u boʼolaloʼob beyoʼ». Letiʼobeʼ u kʼáatoʼob kaʼach ka nojbaʼalkuntaʼakoʼob, yéetel chéen letiʼe boʼol ken u kʼamoʼoboʼ, tumen Jéeobaeʼ maʼ ken u yuʼub u payalchiʼob. Baʼaleʼ, Dioseʼ yaan kaʼach u yuʼubik u payalchiʼ u disipuloʼob Cristo, jeʼex u yeʼesik le baʼax tu yaʼalaj Jesús ken k-il beoraaʼ.
7. ¿Baʼax u kʼáat u yaʼal u payalchiʼ máak tu juunal u kʼalmaj u joonai u yotoch?
7 «Techeʼ le ken payalchiʼinakecheʼ, ooken ta wotoch, kʼal u jool naileʼ ka payalchiʼinakech tiʼ a Taata chéen ta juunal tu yéetel. A Taata máax táan u yilik baʼax ka x-mukul beetikeʼ, letiʼ bíin u tsʼáatech a boʼolal.» (Mat. 6:6.) Le ka tu yaʼalaj Jesús ka payalchiʼinak máak tu juunal u kʼalmaj u joonai u yotochoʼ maʼ táan u yaʼalik kaʼach wa maʼ tu páajtal u beetaʼal tu táan u maasiliʼ. Baʼaxeʼ táan u yaʼalik maʼ maʼalob ka payalchiʼinak máak tu táan u maasil chéen utiaʼal ka ilaʼak wa utiaʼal ka nojbaʼalkuntaʼakiʼ. Lelaʼ mantatsʼ unaj k-kʼaʼajsik ken payalchiʼinakoʼon tu táan k-sukuʼunoʼob. Beoraaʼ koʼox ilik uláakʼ baʼax tu yaʼalaj Jesús unaj k-beetik.
8. Jeʼex u yaʼalik Mateo 6:7, ¿baʼax maʼ unaj u beetik máak ken payalchiʼinakiʼ?
8 «Le ken payalchiʼinakecheʼ, maʼ a babal aʼalik maʼ nuʼukaʼan tʼaanoʼobiʼ, jeʼel bix u beetik le máaxoʼob maʼ u kʼaj óoloʼob Jajal Dios, tumen ku tukultikoʼobeʼ tu yoʼolal u sen tʼaanoʼobeʼ bíin uʼuyaʼakoʼob.» (Mat. 6:7.) Le tekstoaʼ ku yeʼesikeʼ maʼ maʼalob ka u babal aʼal máak chéen jumpʼéeliliʼ baʼal ichil u payalchiʼi. Baʼaleʼ Jesuseʼ maʼ tu yóotaj u yaʼal wa upuliʼ maʼ tu páajtal k-tsʼáaik yaʼab utéenel nib óolal tiʼ Jéeoba bey xan k-kʼáatiktiʼ le baʼax kʼaʼabéettoʼonoʼ, tumen le áakʼab táanil tiʼ u kíimsaʼaloʼ letiʼeʼ maʼ chéen utéen tu yaʼalaj tiʼ u Taata le baʼax chiʼichnakkúuntikoʼ (Mar. 14:32-39).
9, 10. ¿Baʼax maʼ unaj u babal aʼalik máak ken payalchiʼinakiʼ?
9 Baʼax maʼ maʼalobeʼ letiʼe ka k-beet jeʼex «le máaxoʼob maʼ u kʼaj óoloʼob Jajal Dios[oʼ]». Letiʼobeʼ chéen ku «babal aʼalik[oʼob]» le baʼaxoʼob u kammoʼob de memoriaoʼ. Bey xan úuchik u beetik le máaxoʼob adorart Baaloʼ. Letiʼobeʼ «buul jaʼatskab tak chúumuk kʼiin payalchiʼinajoʼob tiʼ Baal, táan yaʼalikoʼob: ¡Núukoʼoniʼ Baal!» (1 Rey. 18:26). Bejlaʼa xaneʼ yaʼab máakoʼobeʼ ku xáantal táan u payalchiʼob yéetel chéen upʼéeliliʼ baʼal ku sen aʼalikoʼob tumen ku tuklikoʼobeʼ chéen bey «bíin uʼuyaʼakoʼob[oʼ]». Baʼaleʼ Jesuseʼ tu yeʼeseʼ Jéeobaeʼ maʼ utstutʼaan ka k-sen aʼal baʼaloʼob minaʼan u cuentai ken payalchiʼinakoʼoniʼ wa ka k-babal aʼal chéen upʼéeliʼ baʼal. Koʼox ilik uláakʼ baʼax tu yaʼalaj Jesús.
10 «Maʼ a béeytaleʼex jeʼel bix letiʼoboʼ, tumen le Taataoʼ u yojel baʼax kʼaʼabéetteʼex maʼiliʼ a kʼáateʼex tiʼeʼ.» (Mat. 6:8.) Yaʼab tiʼ u nuuktakil le judíoʼoboʼ ku payalchiʼob jeʼex «le máaxoʼob maʼ u kʼaj óoloʼob Jajal Dios[oʼ]». U jaajileʼ u payalchiʼ máak utiaʼal u tsʼáaik nib óolal tiʼ Jéeoba, utiaʼal u nojbeʼenkúuntik u kʼaabaʼ yéetel utiaʼal u kʼáatik u yáantajeʼ upʼéel bix u adorartaʼal (Fili. 4:6). Baʼaleʼ maʼ maʼalob ka u kan máak de memoria baʼax ken u yaʼal ich payalchiʼ tumen ku tuklik chéen bey jeʼel u kʼaʼajsik Jéeoba le baʼax ku kʼáatiktiʼoʼ. Maʼ u tuʼubultoʼoneʼ letiʼeʼ u yojel baʼax kʼaʼabéettoʼon tak táanil tiʼ k-kʼáatiktiʼ.
11. Ken payalchiʼinakoʼon tu táan u maasileʼ, ¿baʼax maʼ unaj u tuʼubultoʼoniʼ?
11 Le baʼax tu yaʼalaj Jesús yoʼolal le payalchiʼoʼ ku kʼaʼajsiktoʼoneʼ Jéeobaeʼ maʼ utstutʼaan le payalchiʼob ku beetaʼal yéetel tʼaanoʼob jach yéeyaʼanoʼob wa mix baʼal yaan u yil yéetel le baʼax táan u kʼáataʼaloʼ. Ken payalchiʼinakoʼon tu táan u maasileʼ maʼ unaj k-beetik chéen utiaʼal ka uʼuyaʼak jatsʼuts le payalchiʼ k-beetkoʼ. Maʼ unaj xan u sen xáantal táan k-payalchiʼ ka tak joʼopʼok u tuklik le sukuʼunoʼob baʼax hora ken tsʼoʼokok utiaʼal ka u yaʼaloʼob «amén». Tsʼoʼoleʼ le payalchiʼ k-beetik tu táan u maasiloʼ maʼ utiaʼal k-tsʼáaik ojéelbil wa baʼaxiʼ mix utiaʼal k-tsʼáaik upʼéel tsolnuʼukiʼ, tumen leloʼ ku bin tu contra le baʼax tu kaʼansaj Jesús teʼ puʼukoʼ.
Jesuseʼ tu kaʼansaj bix unaj k-payalchiʼ
12. ¿Bix jeʼel a tsolik baʼax u kʼáat u yaʼal le tʼaan «kiliʼichkúunsaʼak a kʼaabaʼ»?
12 Jesuseʼ maʼ chéen tu yaʼalaj tiʼ u disipuloʼob baʼax maʼ unaj u beetkoʼobiʼ, baʼaxeʼ tu kaʼansajtiʼob bix unaj u payalchiʼob (xokaʼak Mateo 6:9-13). Letiʼeʼ maʼ tu yaʼalajtiʼob ka u kanoʼob de memoria u payalchiʼi le padrenuestrooʼ mix ka u babal aʼaloʼob cada ken payalchiʼinakoʼobiʼ, baʼaxeʼ tu kaʼansajtiʼob chéen utiaʼal u yeʼesiktiʼob bey baʼaxoʼob jeʼel u páajtal u kʼáatkoʼob tiʼ Dioseʼ. Le yáax baʼax tu yaʼalaj teʼ tu payalchiʼi le padrenuestrooʼ ku yeʼesik le baʼax maas kʼaʼanan u kʼáataʼalaʼ: «K-Yuum yanech teʼ kaʼanoʼ, kiliʼichkúunsaʼak a kʼaabaʼ» (Mat. 6:9). K-aʼalik tiʼ Jéeoba «Yuum» tumen letiʼ beetmailoʼon yéetel «teʼ kaʼan» kajaʼanoʼ (Deu. 32:6; 2 Cró. 6:21; Hch. 17:24, 28). Tsʼoʼoleʼ ken k-aʼal «k-Yuum» xan tiʼ Jéeobaeʼ ku kʼaʼajsiktoʼoneʼ uláakʼ sukuʼunoʼobeʼ láayliʼ naatsʼ yaniloʼob tiʼ Jéeobaeʼ. Le ken k-aʼal «kiliʼichkúunsaʼak a kʼaabaʼ[eʼ]», táan k-kʼáatik tiʼ Jéeoba ka u beet baʼax kʼaʼabéet utiaʼal ka u limpiokíint u kʼaabaʼ tiʼ tuláakal le subtsilil tsʼoʼok u taasaʼal tiʼ desde ka kʼebanchaj le yáax máakoʼoboʼ. Jach beyoʼ Jéeobaeʼ yaan u kiliʼichkúuntik u kʼaabaʼ ken u luʼs le kʼasaʼanil yaan way Luʼumeʼ (Eze. 36:23).
13. 1) ¿Baʼax táan k-kʼáatik tiʼ Jéeoba ka u beet ken k-aʼaltiʼ ka taalak u Reino? 2) ¿Baʼax kun úuchul ken béeyak baʼax utstutʼaan Dios way Luʼumeʼ?
13 «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ.» (Mat. 6:10.) ¿Baʼax le Reino ku kʼáataʼal ichil u payalchiʼi le padrenuestrooʼ? Letiʼe gobierno tsʼaʼan tiʼ Cristo bey xan tiʼ le máaxoʼob yéeyanoʼob utiaʼal u binoʼob kaʼanoʼ (Dan. 7:13, 14, 18; Isa. 9:6, 7). Le ken k-kʼáat ka «taalak» u Reino Dioseʼ táan k-kʼáatik ka xuʼulsaʼak tiʼ le máaxoʼob u tsʼaamubaʼob tu contra Diosoʼ. Lelaʼ maʼ kun xáantal ken úuchuk, le Luʼum túunoʼ yaan u suʼutul upʼéel paraíso tuʼux kun antal tojil, jeetsʼelil yéetel toj óolal tiʼ tuláakal máak (Sal. 72:1-15; Dan. 2:44; 2 Ped. 3:13). Teʼ kʼiinoʼobaʼ táan u beetaʼal baʼax utstutʼaan Jéeoba teʼ kaʼanoʼ. Bejlaʼeʼ táan k-kʼáatik ka beetaʼak baʼax utstutʼaan way Luʼumeʼ. Ichil lelaʼ táakaʼan u xuʼulsik tuláakal le máaxoʼob pʼekmil jeʼex tu beetil úuchjeakiloʼ (xokaʼak Salmo 83:1, 2, 13-18).
14. ¿Baʼaxten maʼalob ka k-kʼáat ka tsʼaʼabaktoʼon le waaj chéen utiaʼal le kʼiinoʼ?
14 «Tsʼáatoʼon bejelaʼeʼ le waaj kʼaʼabéet tiʼ toʼon[oʼ].» (Mat. 6:11; Luc. 11:3.) Lelaʼ upʼéel baʼax k-aʼalik tiʼ Jéeoba utiaʼal ka u tsʼáatoʼon le janal kʼaʼabéettoʼon utiaʼal le kʼiinaʼ. Tumen jach k-ojel yaan u tsʼáaiktoʼon le baʼax kʼaʼabéettoʼon sáamsamaloʼ, le oʼolal chéen k-kʼáatiktiʼ le baʼax kʼaʼabéetoʼon tiʼ le kʼiinoʼ. Lelaʼ ku kʼaʼajsiktoʼoneʼ le tiaʼanoʼob kaʼach teʼ desiertooʼ, Jéeobaeʼ tu yaʼalaj tiʼ le israelitaʼob ka u moloʼob «sáamsamal chéen le [maná] kʼaʼabéet utiaʼal le kʼiinoʼ» (Éxo. 16:4).
15. ¿Baʼax unaj k-beetik utiaʼal ka perdonartaʼakoʼon tumen Jéeoba?
15 Le uláakʼ baʼax ku kʼáataʼal ichil u payalchiʼi le padrenuestrooʼ ku yeʼesiktoʼon baʼax unaj k-beetik cada utúul tiʼ toʼon. Jesuseʼ tu yaʼalaj: «Saʼatestoʼon le kʼaas tsʼoʼok k-beetikoʼ, jeʼel bix toʼon k-saʼatsik le máaxoʼob ku beetiktoʼon kʼaasoʼ» (Mat. 6:12). Jéeobaeʼ chéen jeʼel u perdonarkoʼon wa tsʼoʼok «k-saʼatsik le máaxoʼob» tsʼoʼok u kʼebantaloʼob t-contraoʼ (xokaʼak Mateo 6:14, 15). Le oʼolal mantatsʼ unaj k-perdonartik u maasil yéetel k-tuʼubsik le baʼax ku beetaʼaltoʼonoʼ (Efe. 4:32; Col. 3:13).
16. ¿Baʼax u kʼáat u yaʼal le tʼaanoʼob «maʼ a chaʼik k-lúubul tiʼ túuntaj óolal» yéetel «tokoʼon tiʼ kʼaa[soʼ]»?
16 «Maʼ a chaʼik k-lúubul tiʼ túuntaj óolal, baʼaleʼ tokoʼon tiʼ kʼaas.» (Mat. 6:13.) ¿Baʼax tu yóotaj u yaʼal Jesús yéetel le tʼaanoʼobaʼ? Le tʼaan «maʼ a chaʼik k-lúubul tiʼ túuntaj óola[loʼ]», upʼéel baʼax k-kʼáatik tiʼ Jéeoba utiaʼal ka u yáantoʼon maʼ k-lúubul tiʼ baʼax kʼaas ken túuntaʼak k-óol. Le tʼaan «tokoʼon tiʼ kʼaas[oʼ]» u kʼáat u yaʼaleʼ k-kʼáatik tiʼ Jéeoba ka u yáantoʼon utiaʼal maʼ k-lúubul tiʼ u táabsajiloʼob Satanás. Tsʼoʼoleʼ le Bibliaoʼ ku yaʼalik yoʼolal Jéeoba: «Maʼ bíin [u] pʼat u túuntaʼal a wóoleʼex maas tiʼ le ku páajtal a mukʼyajtikeʼexoʼ» (xokaʼak 1 Corintoiloʼob 10:13).
Maʼ u jáawal a kʼáataj, a kaxan yéetel a kʼoop
17, 18. ¿Baʼax tu yóotaj u yaʼal Jesús yéetel le tʼaanoʼob maʼ u jáawal a kʼáatajeʼex, maʼ u jáawal a kaxaneʼex yéetel maʼ u jáawal a kʼoopeʼexoʼ?
17 Le apóstol Pablooʼ tu yaʼalaj tiʼ le sukuʼunoʼob teʼ yáax siglooʼ: «Payalchiʼineneʼex mantatsʼ» (Rom. 12:12). Jesuseʼ bey xan úuchik u yaʼalikoʼ: «Kʼáatneneʼex, bíin tsʼaʼabakteʼex; kaxanneneʼex, bíin a núuptáan a kaxaneʼex; kʼoopneneʼex, bíin jeʼebekteʼex le jool najoʼ. Tumen máax ku kʼáatajeʼ ku kʼam; máax ku kaxaneʼ ku núuptáan; máax xan ku kʼoopeʼ ku jeʼebel jool naj tiʼ» (Mat. 7:7, 8). Jeʼex k-ilkoʼ maʼ unaj u xuʼulul k-kʼáatik tiʼ Jéeoba le baʼaxoʼob kʼaʼabéettoʼon utiaʼal k-meyajtikoʼ. Yoʼolal le baʼax tu yaʼalaj Jesusoʼ, le apóstol Juanoʼ tu yaʼalaj: «Yantoʼon kʼub óolal tiʼ Jajal Dios, tumen k-ojel wa k-kʼáatik wa baʼax jeʼel bix utstutʼaaneʼ, letiʼeʼ ku yuʼubikoʼon» (1 Juan 5:14).
18 Le ka tu yaʼalaj Jesús maʼ u jáawal a kʼáatajeʼex yéetel maʼ u jáawal a kaxaneʼexeʼ, tu yóotaj u yaʼaleʼ maʼ unaj u xuʼulul k-kʼáatik ich payalchiʼ le baʼaxoʼob kʼaʼabéettoʼonoʼ. Tsʼoʼoleʼ maʼ unaj u xuʼulul k-kʼoop utiaʼal ka ookkoʼon teʼ Reinooʼ yéetel ka k-kʼam le utsiloʼob ken u taasoʼ. Baʼaleʼ ¿jach wa tu jaajil yaan u núukik Dios le payalchiʼob k-beetkoʼ? Chéen yaan u beetik wa ku chúukpajal k-óol meyajte, tumen Jesuseʼ tu yaʼalaj: «Máax ku kʼáatajeʼ ku kʼam; máax ku kaxaneʼ ku núuptáan; máax xan ku kʼoopeʼ ku jeʼebel jool naj tiʼ». Yaʼab tiʼ le baʼaxoʼob uchaʼan tiʼ k-sukuʼunoʼoboʼ ku yeʼesikeʼ Jéeobaeʼ ku yuʼubik le payalchiʼoboʼ (Sal. 65:2).
19, 20. ¿Baʼaxten Mateo 7:9-11 ku yaʼalikeʼ Jéeobaeʼ bey utúul utsul taatatsileʼ?
19 Jesuseʼ tu yaʼaleʼ Dioseʼ bey utúul taatatsil u yaabilmaj yéetel ku tsʼáaik tuláakal baʼax kʼaʼabéet tiʼ u paalaleʼ. Máans ta tuukuleʼ tiaʼanech tu yiknal Jesús táan a wuʼuyik le baʼax tu yaʼalaʼ: «¿Yaan wa máax ichileʼex jeʼel u tsʼáaik jumpʼéel tuunich tiʼ u paal le ken kʼáataʼak waaj tiʼeʼ? ¿Wa ka u tsʼáa juntúul kaan tiʼ le ken kʼáataʼak juntúul kay tiʼeʼ? Wa teʼex, kex kʼaakʼas máakeʼex, a wojeleʼex a tsʼaʼex maʼalob baʼaloʼob tiʼ a paalaleʼexeʼ, a Taataʼex yaan teʼ kaʼanoʼ [maas] jeʼel u tsʼáaik maʼalob baʼaloʼob tiʼ máaxoʼob kʼáatik tiʼoʼ» (Mat. 7:9-11).
20 Kex tumen wíinik «kʼaakʼas máak» yoʼolal le kʼebanoʼ, jach ku kʼuchul u yaabilt u paalaloʼob. Utúul utsul taatatsileʼ maʼatech u tusik u paalal, baʼaxeʼ ku yilik u tsʼáaik «maʼalob baʼaloʼob» tiʼob. Jeʼex utúul utsul taatatsileʼ Jéeobaeʼ ku tsʼáaiktoʼon xan «maʼalob baʼaloʼob», upʼéel tiʼ leloʼobaʼ letiʼe kiliʼich muukʼoʼ (Luc. 11:13). Chéen yoʼolal lelaʼ ku páajtal k-meyajtik Jéeoba, tiʼ Máax ku taal «tuláakal maʼalob yéetel utsil chúukaʼan siibal» (Sant. 1:17).
Maʼ u jáawal k-kaambal tiʼ le baʼaxoʼob tu kaʼansaj Jesusoʼ
21, 22. 1) ¿Baʼaxten le kaʼansaj tu beetaj Jesús teʼ puʼukoʼ letiʼe maas maʼalob tsoltʼaan tsʼoʼok u beetaʼaloʼ? 2) Techeʼ ¿bix a wilik le kaʼansajoʼob tu beetaj Jesusoʼ?
21 Jeʼex tsʼoʼok k-ilkoʼ le kaʼansaj tu beetaj Jesús teʼ puʼukoʼ letiʼe maas maʼalob tsoltʼaan tsʼoʼok u beetaʼal way yóokʼol kaabeʼ. Jach ku yáantik máak utiaʼal ka kuxlak jeʼex utstutʼaan Jéeobaeʼ, tsʼoʼoleʼ jach séeb u naʼataʼal. Jeʼex tsʼoʼok k-ilik teʼ óoxpʼéel xookoʼobaʼ, jach yaʼab utsiloʼob jeʼel k-kʼamik wa k-tsʼáaik ichil k-kuxtal le tsolnuʼukoʼob tu tsʼáaj Jesusoʼ. Jeʼel xan u taasiktoʼon jeetsʼelil ichil k-kuxtaleʼ yéetel ku yeʼesiktoʼon jeʼel u yantaltoʼon upʼéel kuxtal minaʼan xuuleʼ.
22 Teʼ xookoʼobaʼ tsʼoʼok k-ilik chéen wa jaypʼéel tiʼ le jach maʼalob tsolnuʼukoʼob tu kaʼansaj Jesús teʼ puʼukoʼ. Le oʼolal bakáan le máaxoʼob uʼuyoʼ pʼáat «jakʼaʼan u yóoloʼob tu yoʼolal u kaʼansaj» (Mat. 7:28). Toʼon xaneʼ yaan u jaʼakʼal k-óol wa k-jach chʼenxikintik le maʼalob tsolnuʼukoʼob tu tsʼáaj Jesús, le maas nojoch j-Kaʼambesaj yanchajaʼanoʼ.
¿Baʼax jeʼel a núukikeʼ?
• ¿Baʼax tu yaʼalaj Jesús yoʼolal le payalchiʼ ku beetik kaʼach le j-kaʼapʼéel ichoʼoboʼ?
• Ken payalchiʼinakoʼoneʼ, ¿baʼaxten maʼ maʼalob ka k-babal aʼal chéen upʼéeliliʼ baʼaxiʼ?
• ¿Baʼaxoʼob ku kʼáataʼal ichil u payalchiʼi le padrenuestrooʼ?
• ¿Baʼax tu yóotaj u yaʼal Jesús yéetel le tʼaanoʼob maʼ u jáawal a kʼáatajeʼex, a kaxaneʼex yéetel a kʼoopeʼexoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 15]
Jesuseʼ tu yaʼaleʼ maʼ maʼalob ka payalchiʼinak máak chéen utiaʼal ka ilaʼakiʼ
[U tsolajil le oochel teʼ táan juʼun 17]
¿Baʼaxten maʼalob ka payalchiʼinak máak yoʼolal le janal chéen utiaʼal le kʼiinoʼ?