Xook 125 tiʼ Galaad

Ku yaʼalaʼal tiʼ le misioneroʼob ka u beetoʼob jeʼex Jeremíaseʼ

«DESDE ka káaj le Escuela tiʼ Galaadoʼ mix utéen beetaʼak upʼéel xook jeʼex lelaʼ.» Bey úuchik u yaʼalik le sukuʼun Geoffrey Jackson, máax táakaʼan ichil le Cuerpo Gobernanteoʼ. Lelaʼ tu yaʼalaj le ka tu káajsaj tu táan 6,156 máakoʼob u kʼiimbesajil u tsʼoʼokbal le xook 125 tiʼ le Escuela Bíblica tiʼ Galaad tiʼ le Watchtower, beetaʼab tu kʼiinil 13 tiʼ septiembre tiʼ 2008. Le 56 j-xoknáaloʼob anchajoʼob teʼ xookaʼ, táakaʼanoʼob ichil le maas tiʼ ocho mil misioneroʼob tsʼoʼok u túuxtaʼaloʼob tumen le Escuela tiʼ Galaad «tak [teʼ] kúuchiloʼob yaan tu xuul yóokʼol kaaboʼ» (Hch. 1:8).

Le sukuʼun Jacksonoʼ tu beetaj le kʼáatchiʼaʼ: «¿Baʼax ken u yáanteʼex utiaʼal ka creertaʼak le baʼax ka kaʼanskeʼexoʼ?» Ka tsʼoʼokeʼ tu yaʼalaj kampʼéel baʼax jeʼel u yáantajeʼ: u yantaltiʼob jatsʼuts modos, u yeʼeskoʼob bix unaj u kuxtal máak, u kaʼanskoʼob mantatsʼ baʼax ku yaʼalik le Bibliaoʼ yéetel u tsʼáaikoʼob kʼaj óolbil u kʼaabaʼ Dios.

Le sukuʼun David Schafer, ku meyaj teʼ Comité tiʼ Redaccionoʼ, tu máansaj le tsoltʼaan «¿Yaan wa a naʼatkeʼex tubeel tuláakal baʼal?». Letiʼeʼ tu yaʼalaj tiʼ le j-xoknáaloʼoboʼ jeʼel u naʼatkoʼob tubeel tuláakal baʼax táakaʼan ichil u meyaj utúul misionero wa maʼ tu xuʼulul u kaxtikoʼob u yáantaj Jéeoba yéetel u tsʼoʼokbeskoʼob baʼax ku yaʼalik «le palitsil chúukpajaʼan u yóol yéetel yaan u naʼat[oʼ]» (Pro. 28:5; Mat. 24:45).

Ka tsʼoʼokeʼ John E. Barr, táakaʼan xan ichil le Cuerpo Gobernanteoʼ, tu máansaj le tsoltʼaan «Maʼ chaʼikeʼex tiʼ mix baʼal ka u náachkunteʼex tiʼ u yaabilaj Dios». Le tsolnuʼukoʼob tu tsʼáajoʼ tu yáantaj le j-xoknáaloʼob utiaʼal maʼ u chʼaʼikoʼob saajkil tiʼ le talamiloʼob ken u aktáantoʼob teʼ tuʼux kun túuxtbiloʼoboʼ, yéetel tu yáantaj u taataʼob utiaʼal maʼ u sen chiʼichnaktaloʼob tu yoʼolaloʼob. Le sukuʼunaʼ tu yaʼalaj xan: «U yantal máak yáanal u yaabilaj Dioseʼ letiʼe baʼax maas maʼaloboʼ yéetel upʼéel baʼax ku beetik u yuʼubikuba máak jach kanáantaʼan». Wa le misioneroʼob maʼ u kʼáatoʼobeʼ mix baʼal jeʼel u beetik u náachtaloʼob tiʼ Dioseʼ.

Le sukuʼun Sam Roberson, ku meyaj teʼ Departamento tiʼ Escuelas Teocráticasoʼ, tu yaʼalaj tiʼ le máaxoʼob binoʼob tiʼ le kʼiimbesajiloʼ ka u búukintoʼob «le nookʼ maas nojbeʼen yanoʼ». Le j-xoknáaloʼoboʼ jeʼel u páajtal u búukbesikoʼob le bix úuchik u kuxtal Jesús wa ku maas kaambaloʼob tiʼ letiʼ yéetel wa ku tsʼoʼokbeskoʼob le baʼaxoʼob tu kaʼansoʼ (Rom. 13:14). Ka tsʼoʼokeʼ William Samuelson, u superintendentei le departamentoaʼ, tu yaʼaleʼ utiaʼal u yeʼesaʼal tsiikil tiʼ máakeʼ maas unaj u chʼaʼabal en cuenta bix u yilaʼal máak tumen Dios ke bix u yilaʼal tumen wíinik.

Michael Burnett, utúul tiʼ le máaxoʼob nuʼukt le xookoʼ tu kʼáataj tiʼ jujuntúul j-xoknáaloʼob ka u tsikbaltoʼob jujumpʼéel baʼaxoʼob úuchtiʼob teʼ kʼaʼaytajoʼ. Kex jach yaʼab u yúuchul kʼaʼaytaj teʼ tuʼux kʼaʼaytajnajoʼob le tiaʼanoʼob kaʼach teʼ Escuela tiʼ Galaadoʼ (Patterson, Nueva York), tsikbalnajoʼob yéetel máakoʼob u kʼáatoʼob maas kaambal tiʼ le Bibliaoʼ. Gerald Grizzle, máax ku meyaj teʼ Oficina tiʼ Asambleas tiʼ Distritooʼ, tu kʼáataj u chiʼ óoxtúul sukuʼunoʼob táan u xookoʼob teʼ Escuela utiaʼal Miembros tiʼ Comités tiʼ Sucursal. Le baʼax tu yaʼalaj le sukuʼunoʼobaʼ tu yáantaj le j-xoknáaloʼob  utiaʼal ka u yojéeltoʼob baʼax táakaʼan ichil le meyaj ken u beetoʼob teʼ tuʼux kun túuxbiloʼoboʼ.

David Splane, bin teʼ xook 42 tiʼ le Escuela tiʼ Galaad yéetel táakaʼan ichil le Cuerpo Gobernanteoʼ, tu máansaj le tsoltʼaan «Beeteʼex jeʼex Jeremíaseʼ». Kex Jeremías tu chʼaʼaj saajkil u beet le meyaj kʼubéentaʼabtiʼoʼ, Jéeobaeʼ tu yáantaj utiaʼal ka u tsʼoʼokbese (Jer. 1:7, 8). Dioseʼ bey xan ken u beetil yéetel le máaxoʼob kun káajal u beetik u misioneroiloʼoboʼ. Le sukuʼun Splaneoʼ tu yaʼalajtiʼob: «Wa yanteʼex upʼéel kʼuuxil yéetel utúul sukuʼuneʼ, kuleneʼex yéetel tsʼíibteʼex diez jatsʼuts modos yaan tiʼ le sukuʼunoʼ. Wa maʼ tu chukik diez upʼéeleleʼ, leloʼ u kʼáat yaʼaleʼ maʼ a kʼaj óoleʼex tubeeliʼ».

Jeremíaseʼ jach tu xupuba u meyajt Jéeoba. Le ka tu chʼaʼatuklaj u xuʼulul u beetkeʼ, payalchiʼinaj tiʼ Jéeoba yéetel áantaʼabiʼ (Jer. 20:11). Le sukuʼun Splaneoʼ tu yaʼalajtiʼob: «Ken a wuʼuyeʼex jach luubul a wóoleʼexeʼ, tsikbalteʼex tiʼ Dios baʼax ku yúuchulteʼex. Yaan u kiʼimaktal a wóoleʼex ken a wileʼex bix ken u yáantileʼex».

Utiaʼal u tsʼoʼokbal le kʼiimbesajoʼ le sukuʼun Jacksonoʼ tu kʼaʼajsaj tiʼ le j-xoknáaloʼoboʼ jach yaʼab baʼax tsʼoʼok u kankoʼob utiaʼal u creertaʼal le baʼaxoʼob ken u kaʼansoʼoboʼ. Wa ku beetkoʼob tuláakal le baʼax tu kanoʼoboʼ jach yaan u creertaʼal le baʼax ken u kaʼansoʼoboʼ (Isa. 43:8-12).

[U tsolajil le oochel teʼ táan juʼun 22]

BAʼALOʼOB YAAN YIL YÉETEL LE J-XOKNÁALOʼOBOʼ

Tiʼ 6 luʼumil u taaloʼob • Tiʼ 21 luʼumil kun binoʼob

Le j-xoknáaloʼoboʼ 56 utúulaloʼob • Kex a 32.9 jaʼab yantiʼob • Kex 17.4 jaʼaboʼob okjaʼanakoʼob

Kex 13 jaʼaboʼob káajak u beetik u precursoriloʼob

[U tsolajil le oochel teʼ táan juʼun 23]

Xook 125 tiʼ Escuela Bíblica tiʼ Galaad tiʼ le Watchtoweroʼ

U filai le sukuʼunoʼob yéetel le kiikoʼoboʼ ku káajal desde táanil tak paachil, u kʼaabaʼobeʼ tsolaʼanoʼob x-tsʼíik tak x-noʼoj.

1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Pérez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Pérez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.