Jobeʼ tu nojbeʼenkúuntaj u kʼaabaʼ Jéeoba
Jobeʼ tu nojbeʼenkúuntaj u kʼaabaʼ Jéeoba
«¡Kiʼikiʼtʼantbil u kʼaabaʼ Yuumtsil!» (JOB 1:21)
1. Maʼ xaaneʼ, ¿máax tsʼíib u libroi Job, yéetel baʼax kʼiin ka tu beetaj?
MOISESEʼ yaan kex cuarenta jaʼaboʼob tiʼ le ka púutsʼ tiʼ faraón yéetel ka bin tu kaajil Madianoʼ (Hch. 7:23). Maʼ xaaneʼ le tiaʼan teʼeloʼ tu yojéeltaj le talamiloʼob tu muʼyajtaj Job, máax kajaʼan tu kaajil Uz. Ku máan kʼiineʼ, le taʼaytak u yokol le israelitaʼob teʼ Luʼum Aʼalaʼan u Tsʼaʼabaltiʼoboʼ, máanoʼob naatsʼ tiʼ le kaajaʼ. Maʼ xaaneʼ teʼeloʼ, Moiseseʼ tu yojéeltaj bix binik tiʼ Job tu tsʼook kʼiiniloʼob u kuxtal. Jeʼex u yaʼalaʼal tumen le judíoʼoboʼ le ka tsʼoʼok u kíimil Joboʼ, Moisés tsʼíibt le libro ku tʼaan tu yoʼolaloʼ.
2. U libroi Jobeʼ, ¿baʼaxten jeʼel u líiʼsik u yóol le máaxoʼob meyajtik Diosoʼ?
2 U libroi Jobeʼ jach ku líiʼsik u yóol le máaxoʼob meyajtik Diosoʼ. ¿Baʼaxten? Tumen ku tʼaan tiʼ baʼaxoʼob úuch teʼ kaʼan ku yeʼeskoʼob chéen tiʼ Jéeoba yaan u derechoi u gobernaroʼ. Ku yáantkoʼon naʼat baʼax u kʼáat u yaʼal u chúukpajal u yóol máak u meyajt Dios yéetel baʼaxten yaan kʼiineʼ Jéeobaeʼ ku chaʼik u muʼyaj le máaxoʼob meyajtikoʼ. Tsʼoʼoleʼ jach ku yeʼesikeʼ Satanaseʼ jach u pʼekmaj Jéeoba bey xan wíinik. Ku kaʼansiktoʼon xaneʼ kex kʼeban wíinkoʼon yéetel kex ka yanaktoʼon nukuch muʼyajiloʼobeʼ, jeʼel u chúukpajal k-óol meyajt Dios jeʼex tu beetil Jobeʼ. Koʼox ilik jujumpʼéel tiʼ le baʼaxoʼob ku yaʼalik u libroi Joboʼ.
Satanaseʼ tu túuntaj u yóol Job
3. 1) ¿Baʼax k-ojel yoʼolal Job? 2) ¿Baʼaxten túuntaʼab u yóol Job tumen Satanás?
3 Jobeʼ utúul máak jach ayikʼal kaʼach, jach kʼaj óolaʼan, ku bisik upʼéel toj kuxtal, ku tsʼáaik maʼalob tsolnuʼukoʼob yéetel ku yáantik kaʼach le óotsiloʼoboʼ. Baʼaleʼ u maas kʼaʼananileʼ tu jach ilaj u beetik baʼax utstutʼaan Dios. Le Bibliaoʼ ku yaʼalik tu yoʼolal: «Sen toj kaʼach u kuxtal, jach u yokesmaj u yóol u meyajtik [Dios]» yéetel ku «kanáantik maʼ u beetik kʼaas tiʼ mix máak». Jobeʼ maʼ túuntaʼab u yóol tumen Satanás tu yoʼolal le ayikʼaliloʼob yantiʼoʼ, baʼaxeʼ tumen u kʼubmaj u yóol u meyajt Dios (Job 1:1; 29:7-16; 31:1).
4. ¿Baʼax u kʼáat u yaʼal le chúukaʼan óolaloʼ?
4 Tu káajbal u libroi Jobeʼ ku yúuchul tʼaan tiʼ upʼéel muchʼtáambal anchaj tiʼ le angeloʼob yéetel Jéeoba teʼ kaʼanoʼ. Teʼ muchʼtáambalaʼ ook xan Satanás tu táan Jéeobaeʼ ka tu takaj u pool Job (xokaʼak Job 1:6-11). Letiʼeʼ tu yaʼaleʼ Jobeʼ chúukpajaʼan u yóol u meyajt Dios yoʼolal le ayikʼaliloʼob yantiʼoʼ, maʼ tumen wa u yaabiltmiʼ. Le tʼaan u chúukpajal u yóol máakoʼ, u kʼáat u yaʼaleʼ u bisik máak upʼéel toj kuxtal. Le ken chʼaʼachiʼitaʼak teʼ Bibliaoʼ u kʼáat u yaʼaleʼ u kʼubik u yóol máak u meyajt chéen Jéeoba.
5. ¿Baʼax tu yaʼalaj Satanás tu yoʼolal Job?
5 Satanaseʼ tu yaʼaleʼ Jobeʼ ku meyajtik Dios chéen yoʼolal le baʼaxoʼob ku tsʼaʼabal tiʼoʼ. Tu yaʼalaj tiʼ Dioseʼ wa ka xuʼuluk u yáantik Jobeʼ yaan u xuʼulul u meyajtaʼal. Jéeoba túuneʼ tu chaʼaj u túuntik u yóol Job. Le oʼolal chéen ichil upʼéel kʼiineʼ, u yaalakʼoʼobeʼ oklaʼabi yéetel yaneʼ kíimsaʼabi, u maas yaʼabil tiʼ u j-meyajoʼobeʼ kíimsaʼaboʼob yéetel u paalaloʼobeʼ láaj kíimoʼob (Job 1:13-19). ¿Baʼax túun tu beetaj Job? Maʼ tu náachkuntuba tiʼ Dios jeʼex tu yaʼalil le Kʼaasilbaʼaloʼ. Baʼaxeʼ le ka tu yojéeltaj le baʼaxoʼob tsʼoʼok u yúuchloʼ, tu yaʼalaj: «Yuumtsil tsʼáa tiʼ teen tuláakal, Yuumtsil xan lukʼes tiʼ teen; ¡kiʼikiʼtʼantbil u kʼaabaʼ Yuumtsil!» (Job 1:21).
6. 1) ¿Baʼax úuch le ka tu kaʼa muchʼuba le angeloʼob tu táan Jéeobaoʼ? 2) Le ka tʼaanaj Satanás tu contra Jobeʼ, ¿tiʼ uláakʼ máaxoʼob táan kaʼach u tuukul?
6 Maʼ úuch tiʼ lelaʼ tu kaʼa muchʼuba le angeloʼob tu táan Jéeobaoʼ. Satanás túuneʼ tu kaʼa aʼalaj tu contra Job: «Kaʼalikil maʼ tu xeʼepʼaʼal u yootʼel juntúul wíinikeʼ, tuláakal uts utiaʼal. Wíinikeʼ, jeʼel u kʼubik tuláakal baʼax utiaʼal, tu yoʼolal maʼ u kíimsaʼal. Baʼaleʼ, beet wa baʼax tiʼ u kuxtal ka wilaʼa wa maʼ tu kʼaakʼastʼantikech tu táan a wich». Jeʼex k-ilikoʼ le Kʼaasilbaʼaloʼ maʼ chéen tu contra Job tʼaanajiʼ. Le ka tu yaʼalaj «Wíinikeʼ, jeʼel u kʼubik tuláakal baʼax utiaʼal, tu yoʼolal maʼ u kíimsaʼal[eʼ]», táan kaʼach u yaʼalikeʼ mix máak jeʼel u chúukpajal u yóol u meyajt Dioseʼ. Jéeoba túuneʼ tu chaʼaj u kaʼa túuntaʼal u yóol Job, le Kʼaasilbaʼaloʼ tu beetaj u tsaʼayal upʼéel yaayaj kʼojaʼanil tiʼ (Job 2:1-8). Baʼaleʼ maʼ chéen le tu muʼyajtaj Jobiʼ.
Le baʼaxoʼob k-kanik tiʼ Joboʼ
7. ¿Bix beetaʼabik u maas muʼyaj Job tumen u yatan bey xan le máaxoʼob bin xíimbaltkoʼ?
7 Le ka káaj u muʼyaj Jobeʼ u yatneʼ muʼyajnaj xan. Letiʼeʼ jach yaachaj u yóol úuchik u kíimil u paalaloʼob, úuchik u peʼertikoʼob tuláakal baʼax yantiʼob yéetel maʼ xaaneʼ úuchik u tsaʼayal upʼéel yaayaj kʼojaʼanil tiʼ u yíicham. Le oʼolal tu yaʼalajtiʼ: «¿Láayliʼ chʼiikilech a beet baʼal [utseʼ]? ¡Kʼaakʼastʼant [Dioseʼ], ka kíimikech!» Maʼ sen úuch tiʼ leloʼ kʼuch Elifaz, Bildad yéetel Zofar tu yiknal Job utiaʼal u líiʼsoʼob u yóol. Baʼaleʼ le baʼaloʼob tu yaʼaloʼob tiʼ Joboʼ maʼ jaajtakiʼ, le oʼolal maʼ tu líiʼsoʼob u yóoliʼ, baʼaxeʼ chéen tu beetoʼob u maas «mukʼyaj». Jeʼex Bildadeʼ tu tsʼáaj naʼatbileʼ u paalal Jobeʼ yaan baʼax kʼaas u beetmoʼob le oʼolal ku náajalkoʼob ka kíimikoʼob. Elifaz xaneʼ tu yaʼaleʼ Jobeʼ táan kaʼach muʼyaj yoʼolal baʼaxoʼob kʼaastak u beetmaj. Kʼuch tak u yaʼaleʼ Dioseʼ maʼ u yaabilmaj le máaxoʼob meyajtikoʼ (Job 2:9, 11; 4:8; 8:4; 16:2; 22:2, 3). Kex beyoʼ, Jobeʼ chúukpaj u yóol meyajt u Dios. U jaajileʼ maʼ maʼalob le úuchik u «sen aʼalik maʼ siʼipilnajaʼaniʼ» yéetel «chéen táan u jaʼatsʼal tumen [Dios]» (Job 32:2). Baʼaleʼ letiʼeʼ maʼ tu xulaj u meyajtik Jéeobaiʼ.
8. ¿Bix tu yeʼesil Elihú bix unaj u tsolik máak u nuʼuk tiʼ u maasil?
8 Uláakʼ máak bin xan u xíimbalt Jobeʼ, Elihú. Tu káajbaleʼ chéen tu yuʼubaj baʼax ku yaʼalik Job bey xan le uláakʼ óoxtúul máakoʼoboʼ. Kex letiʼ u maas táankelmileʼ, le ka tʼaanajeʼ tu yeʼesaj maas yaan u naʼat tiʼ Job bey xan tiʼ uláakʼ óoxtúuloʼoboʼ. Úuchik u tʼanik tu kʼaabaʼeʼ, tu yeʼesaj tiʼ Job jach u amigo yéetel u kʼáat u yáante, maʼ jeʼex uláakʼoʼoboʼ. Tsʼoʼoleʼ tu yaʼalajtiʼ jach maʼalob le bix u tsʼáaik u yóol u beet baʼax maʼaloboʼ. Baʼaleʼ tu yaʼalaj xan tiʼeʼ maʼ maʼalob ka u sen aʼal minaʼan u siʼipil tu táan Diosiʼ. Ka tsʼoʼokeʼ tu yaʼalajtiʼ maʼ chéen kunel u meyajtaʼal Dios yéetel chúukaʼan óolaliʼ (xokaʼak Job 36:1, 11). Le baʼax tu beetaj Elihuoʼ, ku yeʼesik bix unaj u tsʼaʼabal tsolnuʼuk bejlaʼeʼ. Letiʼeʼ maʼ kʼuuxilnaj yéetel Jobiʼ, tu chʼenxikintaj, tu líiʼsaj u yóol yéetel tu tsʼáaj maʼalob tsolnuʼuk tiʼ (Job 32:6; 33:32).
9. ¿Bix úuchik u yáantaʼal Job tumen Jéeoba?
9 Ka tsʼookeʼ Jéeobaeʼ «tu tʼanaj Job tu chúumuk jumpʼéel chak iikʼal». Jéeobaeʼ maʼ tu kʼeʼekʼeyaj Jobiʼ, baʼaxeʼ tu beetaj kʼáatchiʼob tiʼ utiaʼal u yáantik u yutskíint bix u tuukul. Job túuneʼ yéetel kabal óolal tu kʼamaj le tsolnuʼukoʼ, le beetik tu yaʼalaj: «¿Baʼax jeʼel u páajtal in núukik wa mix baʼaleneʼ? [...] Kin kʼexik in tuukul kin kutal ichil maʼay luʼum yéetel ichil taʼanil kʼáakʼ». Ka tsʼoʼokeʼ Jéeobaeʼ tu yaʼalaj tiʼ le óoxtúul máakoʼob bin u xíimbaltoʼob Joboʼ jach kʼuuxilnajaʼan tumen maʼ jaaj le baʼax tu yaʼaloʼoboʼ. Yéetel tu yaʼalaj tiʼ Job ka payalchiʼinak tu yoʼolaloʼob. Le Bibliaoʼ ku yaʼalik: «Ku tsʼoʼokol u payalchiʼ Job tu yoʼolal[oʼobeʼ], suʼut u ayikʼalil tu kaʼatéen tumen [Dios], tsʼaʼab kaʼamáal u yaʼabil tiʼ u úuchben ayikʼalil» (Job 38:1; 40:4; 42:6-10).
¿Bukaʼaj nojchil k-yaabilaj tiʼ Jéeoba?
10. ¿Baʼaxten maʼ xuʼulsaʼab tiʼ Satanás tumen Jéeobaiʼ?
10 Jéeoba beet tuláakal baʼal, le oʼolaleʼ letiʼ u Noj Jalaʼachil tuláakal baʼax yaan. Wa u kʼáateʼ jeʼel u pʼatik kaʼach chéen bey le baʼax tu yaʼalaj le Kʼaasilbaʼaloʼ. Baʼaleʼ ¿baʼaxten túun maʼ tu beetiʼ? Tumen kʼaʼabéet u jach chíikpajal tiʼ máax yaan u derechoi u gobernar, baʼaleʼ wa ka u xuʼuls kaʼach tiʼeʼ maʼ kun chíikpajal. Satanaseʼ tu yaʼaleʼ Jobeʼ yaan u xuʼulul u meyajtik Dios wa ka u peʼert tuláakal baʼax yantiʼ, baʼaleʼ Jobeʼ tu yeʼesaj maʼ jaajiʼ tumen chúukpaj u yóol kex tu aktáantaj yaʼab talamiloʼob. Tsʼoʼoleʼ Satanaseʼ tu yaʼalaj xaneʼ wíinikeʼ jeʼel u xuʼulul u meyajtik Dios wa ka tsaʼayak upʼéel yaayaj kʼojaʼanil tiʼeʼ. Baʼaleʼ, kex Job tu muʼyajtaj yaʼab baʼaloʼobeʼ maʼ xuʼul u meyajtik Jéeoba yéetel chúukaʼan óolaliʼ. Úuchik u beetik beyoʼ, tu yeʼesaj chéen táan u tuus Satanás. Baʼaleʼ ¿baʼax unaj u beetik xan le máaxoʼob meyajtik Dios bejlaʼaʼ?
11. ¿Bix tu chíikbesil Jesús maʼ jaajtak le baʼax ku yaʼalik le Kʼaasilbaʼaloʼ?
11 Ken chúukpajak u yóol u aktáant jeʼel baʼalak talamil utúul máax meyajtik Dioseʼ, ku yeʼesik chéen táan u tuus Satanás. Ka taal Jesús way Luʼumeʼ tu jach eʼesaj maʼ jaaj le baʼax u yaʼalmaj Satanasoʼ. Tiʼ letiʼeʼ minaʼan mix upʼíit kʼeban jeʼex Adán tu káajbaleʼ, le oʼolal úuchik u chúukpaj u yóol tak ka kíimeʼ tu yeʼesaj maʼ jaajtak le baʼaxoʼob ku yaʼalik le Kʼaasilbaʼaloʼ (Apo. 12:10).
12. ¿Baʼax unaj k-beetik cada utúul tiʼ toʼon?
12 Kex beyoʼ le Kʼaasilbaʼaloʼ maʼ xuʼuluk u túuntik u yóol le máaxoʼob meyajtik Jéeobaoʼ. Le oʼolaleʼ cada utúul tiʼ toʼoneʼ nojoch baʼal k-ilik u chúukpajal k-óol k-meyajt Dios tu yoʼolal k-yaabilaj tiʼ letiʼ, maʼ chéen tumen ku tsʼáaiktoʼon yaʼab utsiloʼobiʼ. ¿Máasaʼ ku kiʼimakkúuntik óol k-beetik lelaʼ? Tsʼoʼoleʼ ku kiʼimaktal k-óol ojéeltik Jéeobaeʼ yaan u tsʼáaiktoʼon u muukʼil utiaʼal aktáantik le talamiloʼoboʼ, yéetel jeʼex úuchik u beetik yéetel Jobeʼ maʼ ken u chaʼa u túuntaʼal k-óol maas tiʼ le bukaʼaj ku páajtal k-aktáantikoʼ (1 Cor. 10:13).
Le maas nojoch enemigooʼ yéetel le máax tu yáax xulaj u meyajtik Diosoʼ
13. ¿Baʼax ku yaʼalik u libroi Job yoʼolal Satanás?
13 Le Kiliʼich Tsʼíiboʼob ich Griegooʼ, ku tʼaanoʼob tiʼ le Kʼaasilbaʼaloʼ yéetel bix úuchik u tsʼáaikuba tu contra Dios. Jeʼex tu libroi Apocalipsiseʼ ku yaʼalikeʼ Jéeobaeʼ yaan u yeʼesik chéen tiʼ letiʼ yaan u derechoi u gobernar yéetel ku yaʼalikeʼ yaan u xuʼulsaʼal tiʼ u maas nojoch enemigo Dios. Le Kiliʼich Tsʼíiboʼob ich Hebreooʼ ku tʼaanoʼob xan tiʼ baʼaxoʼob tu beetaj Satanás utiaʼal u náachkuntik wíinik tiʼ Dios. Tu libroi Jobeʼ ku yaʼalikeʼ le ka ook le Kʼaasilbaʼal tu táan Jéeobaoʼ maʼ tu beetaj utiaʼal u adorarkiʼ, baʼaxeʼ utiaʼal u tʼaan kʼaas tu contra Job. Le oʼolaleʼ ka tsʼoʼok u yaʼalaʼaltiʼ jeʼel u páajtal u beetik jeʼel baʼalak utiaʼal u túuntik u yóol Jobeʼ «lukʼ tu táan Yuumtsil» (Job 1:12; 2:7).
14. ¿Baʼax beetaʼab tiʼ Job tumen Satanás?
14 Jeʼex túun k-ilkoʼ, u libroi Jobeʼ ku yeʼesikeʼ Satanás u maas nojoch enemigo wíinik. Le muchʼtáambal ku yaʼalik Job 1:6 anchaj teʼ kaʼanoʼ maʼ jach ojéelaʼan bukaʼaj tiempo máan tak le ka yanchaj le ku yaʼalik Job 2:1, baʼax k-ojleʼ Jobeʼ yaʼab talamiloʼob tu máansaj teʼ kʼiinoʼoboʼ. Baʼaleʼ maʼ xuʼul u meyajtik Diosiʼ. Le oʼolaleʼ Jéeobaeʼ tu yaʼalaj tiʼ le Kʼaasilbaʼaloʼ: «Kex tumen ta beetaj in wóotsilkúuntik kex tumen minaʼan u siʼipileʼ, letiʼeʼ chúukaʼan u yóol utiaʼal u toj kuxtal». Kex beyoʼ Satanaseʼ maʼ tu éejemtaj wa jach tu jaajil chúukaʼan u yóol Job u meyajt Diosiʼ, le oʼolal chaʼab u kaʼa túuntik u yóol. Satanaseʼ tu beetaj u muʼyaj Job tu kʼiinil jach ayikʼal bey xan ka óotsilchaji, lelaʼ ku yeʼesikeʼ Satanaseʼ maʼatech u chʼaʼik óotsilil tiʼ le máaxoʼob ku muʼyajoʼoboʼ mix tiʼ le óotsiloʼoboʼ. U jaajileʼ jach u pʼekmaj le máaxoʼob chúukaʼan u yóol u meyajtoʼob Diosoʼ (Job 2:3-5). Baʼaleʼ, kex Job jach yaʼab úuchik u muʼyajeʼ maʼ tu xulaj u meyajtik Dios yéetel chúukaʼan óolaliʼ, bey úuchik u yeʼesik chéen táan u tuus Satanasoʼ.
15. ¿Tiʼ baʼax chíikaʼan Satanás tiʼ le máaxoʼob tsʼoʼok u xulik u meyajkoʼob Diosoʼ?
15 Satanaseʼ letiʼe yáax máax tu xulaj u meyajtik Jéeobaoʼ. Le máaxoʼob ku xulik xan u meyajkoʼob Dios teʼ kʼiinoʼobaʼ jach chíikaʼanoʼob tiʼ letiʼ. Letiʼobeʼ ku sen tʼaanoʼob tu contra le múuchʼuliloʼ, tu contra le ancianoʼob yéetel tu contra le Cuerpo Gobernanteoʼ, tuláakal le baʼaxoʼob ku yaʼalikoʼoboʼ jeʼel u beetkoʼob u náachtal máak tiʼ Dioseʼ. Yaan tiʼ letiʼobeʼ maʼ u kʼáatoʼob u chʼaʼachiʼitoʼob u kʼaabaʼ Jéeobaiʼ, maʼ u kʼáat u maas kʼaj óoltoʼobiʼ mix u meyajtoʼob. Jeʼex u beetik Satanás, u taataʼobeʼ, ku chʼaʼapachkoʼob le máaxoʼob chúukaʼan u yóol u meyajtoʼob Jéeobaoʼ (Juan 8:44). Le oʼolaleʼ maʼ unaj u yantal mix baʼal k-il tu yéeteloʼobiʼ (2 Juan 10, 11).
Jobeʼ tu nojbeʼenkúuntaj u kʼaabaʼ Jéeoba
16. ¿Baʼax maʼ xuʼul u beetik Jobiʼ?
16 Jobeʼ tu chʼaʼachiʼitaj u kʼaabaʼ Jéeoba yéetel tu nojbeʼenkúuntaj. Maʼ tʼaanaj kʼaas tu contra mix le ka tu yojéeltaj tsʼoʼok u láaj kíimil u paalaloʼobiʼ. U jaajileʼ maʼ maʼalob le úuchik u tuklik Jéeoba luʼs tuláakal baʼax yaan kaʼach tiʼoʼ, baʼaleʼ maʼ xuʼul u nojbeʼenkúuntik u kʼaabaʼiʼ. Upʼéel tiʼ le baʼaxoʼob tu yaʼaloʼ letiʼ lelaʼ: «U meyajtaʼal Yuumtsil tu yéetel chúukaʼan oʼolaleʼ: leloʼ letiʼ le kʼaj óolaloʼ; u náachtal wíinik tiʼ le kʼaasoʼ: letiʼ le ojéelajiloʼ» (Job 28:28).
17. ¿Baʼax áant Job utiaʼal ka chúukpajak u yóol u muʼyajt le talamiloʼoboʼ?
17 ¿Baʼax áant Job utiaʼal ka chúukpajak u yóol u muʼyajt le talamiloʼoboʼ? Letiʼeʼ bix u biskuba yéetel Dios táanil tiʼ u káajal u muʼyajoʼ. Kex maʼ u yojel wa Satanás túuntik u yóoleʼ, Jobeʼ tu chʼaʼatuklaj maʼ u xuʼulul u meyajtik Jéeoba. Letiʼeʼ tu yaʼalaj: «Yaan in bisik upʼéel toj kuxtal tuláakal u kʼiiniloʼob in kuxtal» (Job 27:5, NM). ¿Baʼax áant utiaʼal ka u jach bisuba yéetel Dios? Maʼ xaaneʼ letiʼeʼ u yojel bix úuchik u biskuba yéetel Abraham, Isaac yéetel Jacob, u yúuchben láakʼtsiloʼob. Uláakʼ baʼax áanteʼ, maʼ xaaneʼ letiʼe u tuukul tiʼ u jatsʼuts modos Dios ku chíikpajal tiʼ le baʼaxoʼob u beetmoʼ (xokaʼak Job 12:7-9, 13, 16).
18. 1) ¿Bix úuchik u chúukpajal u yóol Job u meyajt chéen Dios? 2) ¿Bix jeʼel k-beetik jeʼex tu beetil Jobeʼ?
18 Le baʼaxoʼob tu kanaj Job tiʼ Jéeobaoʼ le áant utiaʼal u beetik baʼax utstutʼaan. Letiʼeʼ mantatsʼ ku kʼubik kaʼach tokbil siibaloʼob tiʼ Dios tumen ku tuklikeʼ u paaloʼobeʼ maʼ xaaneʼ ku «kʼaakʼastʼantikoʼob [Dios] tu puksiʼikʼaloʼob» (Job 1:5). Yéetel kex tu aktáantaj nukuch talamiloʼobeʼ mantatsʼ tu yaʼalaj jach uts Jéeoba tu yéetel (Job 10:12). ¿Máasaʼ jach maʼalob ka k-beet jeʼex tu beetil Joboʼ? Toʼon xaneʼ unaj k-kʼaj óoltik tubeel Jéeoba bey xan le baʼaxoʼob ken u beetoʼ. Unaj xan k-jóoʼsik u tiempoi utiaʼal k-xook, utiaʼal k-bin teʼ muchʼtáambaloʼoboʼ, utiaʼal k-payalchiʼ yéetel utiaʼal k-jóokʼol kʼaʼaytaj. Yéetel kʼaʼabéet xan k-beetik tuláakal le ku páajtal utiaʼal k-tsʼáaik kʼaj óolbil u kʼaabaʼ Dios. Jeʼex kiʼimakkúuntaʼabik u yóol Jéeoba tumen Jobeʼ, toʼon xaneʼ wa ku chúukpajal k-óol meyajteʼ jeʼel xan k-kiʼimakkúuntik u yóoleʼ. Lelaʼ letiʼe ken k-il tuláakʼ xookoʼ.
¿Kʼajaʼan wa tech?
• ¿Baʼax oʼolal túuntaʼab u yóol Job tumen Satanás?
• ¿Baʼax talamiloʼob tu aktáantaj Job, yéetel baʼax tu beetaj?
• ¿Baʼax jeʼel u yáantkoʼon utiaʼal ka chúukpajal k-óol meyajt Dios jeʼex tu beetil Jobeʼ?
• ¿Baʼax ku kaʼansiktoʼon u libroi Job yoʼolal Satanás?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
U tsikbalil Jobeʼ ku kʼaʼajsiktoʼon chéen tiʼ Jéeoba yaan u derechoi u gobernar
[U tsolajil le oochel teʼ táan juʼun 6]
¿Baʼaxoʼob jeʼel u chíikbesik wa chúukaʼan k-óol meyajt chéen Jéeobaeʼ?