Íichamtsileʼex, eʼeseʼex yaabilaj jeʼex Cristoeʼ

LE ÁAKʼAB táanil tiʼ u kíimsaʼal Jesusoʼ, tu yaʼalaj tiʼ u apostoloʼob: «Kin tsʼáaik tiʼ teʼex le túumben aʼalmajtʼaanaʼ: Yaabiltabaʼex ta baatsileʼex. Jeʼel bix in yaabiltmaʼexeʼ teʼexeʼ unaj a yaabiltkabaʼex ta baatsileʼex. Wa ka yaabiltkabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaambaleʼex» (Juan 13:34, 35). Lelaʼ ku yeʼesikeʼ, le u jaajil cristianoʼoboʼ unaj u paklan yaabiltkubaʼob.

Ku máan kʼiineʼ, apóstol Pabloeʼ tu yaʼalaj tiʼ le íichamtsiloʼob meyajtik Diosoʼ: «Íichamtsileʼex yaabilt a wataneʼex bey jeʼel bix Cristo tu yaabiltaj le [múuchʼuliloʼ] ka tu tsʼáaj u kuxtal tu yoʼolal» (Efe. 5:25). Koʼoneʼex ilik bix jeʼel u beetik le íichamtsil le baʼax ku yaʼalik le Bibliaaʼ, lelaʼ maas unaj u beetik wa u yatan xaneʼ ku meyajtik Jéeoba.

Cristoeʼ ku kanáantik le múuchʼuliloʼ

Le Bibliaoʼ ku yaʼalik: «Le íichamtsiloʼoboʼ unaj u yaabiltikoʼob u yatanoʼob, jeʼel bix u yaabiltikoʼob u wíinkliloʼobeʼ. Le máax u yaabilmaj u yataneʼ u yaabiltmajuba letiʼ. Tumen mix máak ku pʼektik u wíinklil, baʼaleʼ ku tséentik yéetel ku kanáantik; bey u beetik Cristo yéetel le [múuchʼuliloʼ]» (Efe. 5:28, 29). Jesuseʼ jach tu yaabiltaj u disipuloʼob, kex kʼeban wíinkoʼobeʼ letiʼeʼ tu yeʼesaj u yutsil tiʼob. Letiʼeʼ maas tu beetaj u cuentai le jatsʼuts modos tu yeʼesoʼoboʼ, maʼ le baʼaxoʼob maʼ maʼalobtak tu beetoʼoboʼ (Efe. 5:27).

Jeʼex Jesucristo tu yaabiltaj le múuchʼuliloʼ, le íichamtsiloʼ unaj u yaabiltik u yatan, lelaʼ unaj u yeʼesik yéetel baʼaxoʼob ku yaʼalik bey xan yéetel baʼaxoʼob ku beetik. Le atantsil yaabiltaʼanoʼ ku yuʼubikuba maʼalobil yéetel kiʼimak u yóol. Baʼaleʼ utúul atantsil maʼ yaabiltaʼan yéetel maʼatech u beetaʼal u cuentaileʼ, kex jatsʼuts u yotoch yéetel ayikʼaloʼobeʼ maʼ kiʼimak u yóoliʼ.

¿Baʼaxoʼob ku beetik le íichamtsil utiaʼal u yeʼesik tiʼ u yatan u yaabiltmoʼ? Ken yanak tu táan yaʼabach máakeʼ ku tʼanik yéetel tsiikil, yéetel tiʼ jeʼel baʼalak súutukileʼ ku yaʼaliktiʼ maʼalob baʼax ku beetik. Maʼatech u suʼlaktal u yaʼal xan tu táan u maasil jach maʼalob bix u yáantaj u yatan ichil u familia. Baʼaleʼ ken yanakoʼob xan chéen tu juunaloʼobeʼ ku yeʼesiktiʼ u yaabiltmaj. U machik u kʼab, u cheʼej, u méekʼik yéetel u yaʼaliktiʼ jach u yaabiltmeʼ bey baʼaloʼob jach mejentakeʼ, baʼaleʼ le baʼaloʼob beyaʼ mix bikʼin jeʼel u tuʼubsik u yataneʼ.

«Jesuseʼ maʼ tu chʼaʼik subtal u yaʼalik sukuʼun tiʼob»

Jesucristoeʼ maʼatech u suʼlaktal u yaʼal «sukuʼun» tiʼ le máaxoʼob yéeyaʼanoʼob utiaʼal u binoʼob kaʼanoʼ (Heb. 2:11, 12, 17). Le oʼolaleʼ wa tsʼokaʼan a beel yéetel utúul koʼolel meyajtik Jéeobaeʼ maʼ unaj u tuʼubultecheʼ láayliʼ xan a kiikeʼ. Le voto u beetmaj le ka tu kʼubaj u kuxtal tiʼ Jéeobaoʼ maas nojoch ke le voto tu beetaj le ka tsʼoʼok u beel ta wéeteloʼ, lelaʼ bey u yúuchul kex tsʼokaʼaniliʼ u beel ka okjaʼanaji. Le oʼolal le sukuʼun nuʼuktik upʼéel xook teʼ múuchʼuliloʼ ku yaʼalik «kiik» tiʼ u yatan ken táakpajak teʼ muchʼtáambaloʼ. Letiʼeʼ a kiik teʼ múuchʼuliloʼ bey xan ta wotoch. Le oʼolaleʼ kʼaʼabéet a weʼesik tsiikiltiʼ tuláakal tuʼux.

Wa tsʼaʼan a beet wa baʼax meyajil teʼ múuchʼuliloʼ, maʼ xaaneʼ yaan kʼiineʼ ku talamtal a beetik tumen unaj a tsʼáaik xan baʼaxoʼob  kʼaʼabéet ichil a wotoch. Baʼaleʼ wa le ancianoʼob yéetel le siervo ministerialoʼob ku paklan áantikubaʼob utiaʼal u beetaʼal le meyaj ichil le múuchʼuliloʼ, jeʼel u yantaltech tiempo utiaʼal a maas áantik a watneʼ. Maʼ u tuʼubultecheʼ le meyajoʼob ka beetik teʼ múuchʼuliloʼ jeʼel u páajtal u beetaʼal tumen uláakʼ sukuʼunoʼobeʼ, baʼaleʼ a watneʼ chéen teech unaj a tsʼáaik baʼaxoʼob kʼaʼabéettiʼ.

Tsʼoʼoleʼ teech u poolil a watan. Le Bibliaoʼ ku yaʼalik: «Cristoeʼ u pool tuláakal máak, yéetel le íichamoʼ u pool u yatan» (1 Cor. 11:3). Jeʼex k-ilkoʼ le íichamtsiloʼ tsʼaʼan páajtaliltiʼ ichil u yotoch. ¿Bix túun jeʼel u tsʼáaik maʼalob nuʼuktajeʼ? Letiʼeʼ maʼ láalaj hora ken u yaʼal tiʼ u yatan unaj u yuʼubik tʼaaniʼ, baʼaxeʼ unaj u yaabiltik, jeʼex tu beetil Jesuseʼ (1 Ped. 2:21).

«Teʼexeʼ in amigoʼex»

Jesuseʼ tu yaʼaleʼ u disipuloʼobeʼ u amigoʼob. Tu yaʼalajtiʼob: «Maʼ táan in waʼalik wa palitsileʼex, tumen le palitsiloʼ maʼ u yojel baʼax ku beetik u tsʼuuliliʼ. Táan in waʼalikteʼexeʼ in amigoʼex, tumen tsʼoʼok in tsʼáaik a wojéelteʼex tuláakal baʼax tu yaʼalajten in Taata» (Juan 15:14, 15). Jesuseʼ tu máansaj tiempo yéetel u disipuloʼob yéetel tsikbalnaj tu yéeteloʼob. Jeʼex utéenjeakileʼ bin yéetel u disipuloʼob tiʼ upʼéel tsʼoʼokol beel yanchaj Caná (Juan 2:2). Tsʼoʼoleʼ suukaʼan u muchʼkubaʼob jejeláas tuʼux, jeʼex tu jardinil Getsemaní. Le Bibliaoʼ ku yaʼalikeʼ «Jesuseʼ yaʼab utéenel tu muchʼuba yéetel u j-kaambaloʼob teʼeloʼ» (Juan 18:2).

Le atantsiloʼ unaj u yuʼubik letiʼ u maas nojoch amiga u yíicham. Le oʼolaleʼ jach kʼaʼabéet a múul meyajtkeʼex Jéeoba, a múul xokkeʼex le Bibliaoʼ, a múul jaanleʼex, a jóoʼleʼex xíimbal yéetel a tsikbaleʼex. Kʼaʼabéet u yilaʼal tumen u maasileʼ maʼ chéen tsʼokaʼan a beeleʼexiʼ, baʼaxeʼ jach maʼalob bix a biskabaʼex.

«Tu yaabiltajoʼob tak tu xuul»

Jesuseʼ tu yaabiltaj u disipuloʼob «tak tu xuul» (Juan 13:1). Baʼaleʼ yaan íichamtsiloʼobeʼ maʼatech u yeʼeskoʼob yaabilaj jeʼex Jesuseʼ. Yanoʼobeʼ ku pʼatik u yatanoʼob utiaʼal u kaʼa tsʼoʼokol u beeloʼob yéetel uláakʼ koʼolel maas x-lóoʼbayan (Mal. 2:14, 15).

Baʼaleʼ yaan íichamtsiloʼob xan eʼesik yaabilaj jeʼex Cristoeʼ. Tuukulnakoʼon tiʼ Willi, letiʼeʼ tsʼoʼok u máan yaʼab jaʼaboʼob joʼopʼok u kanáantik u yatan. Letiʼeʼ ku yaʼalik: «Mantatsʼ kin wilik in watan bey upʼéel siibal tiʼ Dios u taaleʼ. Teneʼ bey wilik in watnoʼ. Tsʼoʼok sesenta jaʼaboʼob in waʼaltiʼ yaan in kanáantik kex ka xiʼiktoʼon utsil wa ka k-aktáant talamil, mix bikʼin u tuʼubulten le baʼax in waʼalmaj tiʼoʼ».

Íichamtsileʼex, eʼeseʼex yaabilaj jeʼex Cristo tiʼ a watneʼex, tumen letiʼobeʼ a kiikeʼex yéetel a maas nojoch amigaʼex.

[U tsolajil le oochel teʼ táan juʼun 20]

¿Ka wilik wa a watan jeʼex a maas nojoch amigaeʼ?

[U tsolajil le oochel teʼ táan juʼun 20]

«Íichamtsileʼex yaabilt a wataneʼex»