¿Baʼaxten unaj k-tsaypachtik Cristo?
¿Baʼaxten unaj k-tsaypachtik Cristo?
«Wa yaan máax u kʼáat u tsaypachteneʼ, maʼ u yóotikuba jumpuliʼ [...] yéetel ka u tsaypachten sáamsamal.» (LUC. 9:23, NM)
1, 2. ¿Baʼaxten maʼalob ka k-il baʼax oʼolal unaj k-tsaypachtik Cristo?
JÉEOBAEʼ jach ku kiʼimaktal u yóol ken u yil yaʼab táankelmoʼob yéetel nukuch máakoʼobeʼ táan u káajal u kaambaloʼob tiʼ letiʼ. Wa táan a beetik beyaʼ maʼ u xuʼulul a tsʼáaik a wóol a xok le Bibliaoʼ yéetel a bin teʼ muchʼtáambaloʼoboʼ, beyoʼ yaan a maas kʼaj óoltik le u jaajil ku kaʼansik le Bibliaoʼ. Tsʼoʼoleʼ maʼalob ka a beet le baʼax tu yaʼalaj Jesusaʼ: «Wa yaan máax u kʼáat u tsaypachteneʼ, maʼ u yóotikuba jumpuliʼ yéetel u chʼaʼa u cheʼil u mukʼyaj yéetel ka u tsaypachten sáamsamal» (Luc. 9:23, NM). Jeʼex u yeʼesik le tekstoaʼ, techeʼ unaj u xuʼulul a kaxtik chéen a wutsil utiaʼal ka tsaypacht Cristo. ¿Baʼaxten jach unaj k-beetik? Teʼ xookaʼ yaan u núukaʼal le kʼáatchiʼaʼ (Mat. 16:13-16).
2 ¿Kux túun toʼon le úuch joʼopʼok tsaypachtik Cristooʼ? Tiʼ toʼoneʼ ku yaʼalik le Bibliaoʼ: «Bey ka a beeteʼex mantatsʼ[oʼ]» (1 Tes. 4:1, 2). Kex táant u káajal k-tsaypachtik Cristo wa kex tsʼoʼok u xáantaleʼ, maʼalob ka k-tukult baʼaxten jach unaj k-tsaypachtik «mantatsʼ» jeʼex tu yaʼalil Pablooʼ. Koʼox ilik cinco baʼax oʼolal unaj k-beetik.
Yaan k-maas natsʼikba tiʼ Jéeoba
3. ¿Baʼaxoʼob jeʼel u yáantkoʼon k-kʼaj óolt Dioseʼ?
3 Le ka bin apóstol Pablo Atenaseʼ «waʼalaj chúumuk tiʼob teʼ Aereópago[oʼ]» ka tu yaʼalaj: «[Dioseʼ] tu tsʼáaj le kʼiinoʼob yéetel le kúuchiloʼob tuʼux unaj u kajtaloʼob[oʼ], utiaʼal u kaxtikoʼob Jajal Dios, wa ku páajtal u kaxtikoʼob táan u tatalkʼaboʼobeʼ, kex tu jaajileʼ Jajal Dioseʼ maʼ náach yanil tiʼ jujuntúul tiʼ toʼoniʼ» (Hch. 17:22, 26, 27). Jeʼex túun k-ilikaʼ, le máaxoʼob kaxtik Diosoʼ yaan u kʼuchul u kʼaj óoltoʼob. ¿Bix jeʼel u beetkoʼobeʼ? Upʼéel bixeʼ letiʼe ka u yiloʼob le baʼaxoʼob beetaʼanoʼoboʼ, lelaʼ ku kaʼansik tiʼ máak le jatsʼuts modos yaan tiʼ Diosoʼ yéetel ku yeʼesik u nojoch páajtalil. Wa k-tuukul tiʼ le jatsʼuts baʼaloʼob beetaʼanoʼ yaʼab baʼax jeʼel k-kanik tiʼ Dios, le Máax beetoʼoboʼ (Rom. 1:20). Tsʼoʼoleʼ teʼ Bibliaoʼ jeʼel xan u páajtal k-kanik u maasil tiʼ Jéeobaeʼ (2 Tim. 3:16, 17). Wa mantatsʼ k-tuukul tiʼ le baʼaxoʼob u beetmaj Jéeoba bey xan tiʼ le modos ku yeʼesik tiʼ wíinikoʼ, yaan k-kʼuchul k-maas kʼaj óolte (Sal. 77:12).
4. ¿Baʼaxten k-tsaypachtik Cristoeʼ ku yáantkoʼon k-maas natsʼba tiʼ Jéeoba?
4 K-tsaypachtik Cristoeʼ jeʼel u yáantkoʼon k-maas natsʼba tiʼ Jéeobaeʼ. «Maʼiliʼ yanak le yóokʼol kaabaʼ», Jesuseʼ jach maʼalob u biskuba yéetel u Taata (Juan 17:5). Letiʼeʼ letiʼ «u yáax chuun tuláakal baʼaloʼob beetaʼan tumen Jajal Dios» (Apo. 3:14). Ichil le u millonesi jaʼaboʼob tu máansaj yéetel u Taata teʼ kaʼanoʼ Jesús, u yáaxil tiʼ tuláakal baʼax beetaʼaneʼ, yaʼab meyajoʼob tu beetaj. Letiʼeʼ jach tu bisuba yéetel Jéeoba, tsʼoʼoleʼ yéetel kiʼimak óolal múul meyajnaj tu yéetel, le oʼolal jeʼel u páajtal u yaʼalaʼaleʼ mix máak u bisubaʼob jach maʼalob jeʼex letiʼobeʼ. Jesuseʼ maʼ chéen tu yilaj le baʼaxoʼob ku beetik u Taataoʼ, u jatsʼuts modos yéetel bix u yuʼubikubaiʼ, baʼaxeʼ kaambalnaj tiʼ tuláakal le baʼaxoʼob tu yilaj tiʼoʼ. Le oʼolaleʼ letiʼeʼ jach chíikaʼan tiʼ u Taata, le Bibliaoʼ ku yaʼalikeʼ letiʼeʼ u yoochel «le maʼ ilajbeʼenil Diosoʼ» (Col. 1:15, NM). Lelaʼ ku yeʼesiktoʼoneʼ wa k-ilik tsaypachtik Cristoeʼ, jeʼel u páajtal k-maas bisikba yéetel Jéeobaeʼ.
Yaan k-maas kanik k-eʼes u modos Jéeoba
5. ¿Baʼax jeʼel u yáantkoʼon k-eʼes u jatsʼuts modos Jéeobaeʼ, yéetel baʼaxten?
5 Dioseʼ u beetmoʼon jeʼex letiʼeʼ, le oʼolal jeʼel u páajtal k-eʼesik u jatsʼuts modoseʼ (Gén. 1:26). Apóstol Pabloeʼ tu yaʼalaj tiʼ le máaxoʼob meyajtik Diosoʼ ka u yil u beetkoʼob jeʼex letiʼeʼ (Efe. 5:1). Upʼéel baʼax jeʼel u yáantkoʼon k-beeteʼ letiʼe k-tsaypachtik Cristooʼ. ¿Baʼaxten? Tumen chéen letiʼ eʼes jach bix u tuukul u Taata yéetel bix u jatsʼuts modos. Tsʼoʼoleʼ mix máak páajchajak u tsolik u jaajil tu yoʼolal Jéeoba jeʼex tu beetil letiʼoʼ. Jesuseʼ maʼ chéen tu tsʼáaj kʼaj óolbil u kʼaabaʼ u Taataiʼ, baʼaxeʼ tu tsʼáaj kʼaj óolbil xan u jatsʼuts modos (xokaʼak Mateo 11:27). Lelaʼ tu beetaj yéetel baʼaxoʼob tu kaʼansaj.
6. ¿Baʼax ku yeʼesiktoʼon yoʼolal Jéeoba le baʼaxoʼob tu kaʼansaj Jesusoʼ?
6 Yéetel baʼaxoʼob tu kaʼansaj Jesuseʼ tu yeʼesaj baʼax ku páaʼtik Dios tiʼ máaxoʼob meyajtik yéetel baʼax ku yuʼubik tu yoʼolaloʼob (Mat. 22:36-40; Luc. 12:6, 7; 15:4-7). Jeʼex le ka tsʼoʼok u yaʼalik upʼéel tiʼ le Diez Mandamientos ku yaʼalik: «Maʼ a núupkʼebantal», tu tsolaj baʼax yaan tu puksiʼikʼal le máak táanil tiʼ u lúubul tiʼ le kʼebanaʼ yéetel baʼax ku tuklik Jéeoba tu yoʼolal. Jesuseʼ tu yaʼalaj: «Jeʼel máaxak ku paktik juntúul koʼolel utiaʼal u tsʼíibolteʼ tsʼoʼok u núupkʼebantal tu puksiʼikʼal tu yéetel» (Éxo. 20:14; Mat. 5:27, 28). Tsʼoʼoleʼ ka tu tsolaj baʼax u kʼáat u yaʼal upʼéel tiʼ le Ley yaanal bix u kaʼansaʼal tumen le fariseoʼoboʼ. Letiʼobeʼ ku yaʼalikoʼob kaʼacheʼ chéen unaj u yaabiltik máak le máaxoʼob yaabiltmailoʼ yéetel unaj u pʼektik le máaxoʼob pʼekmiloʼ. Baʼaleʼ Jesuseʼ tu yaʼalaj baʼax ku tuklik u Taata yoʼolal lelaʼ: «Yaabilt a j-pʼeekoʼob, payalchiʼineneʼex tu yoʼolal le máaxoʼob pochʼikeʼexoʼ yéetel ku chʼaʼapachtikeʼexoʼ» (Mat. 5:43, 44; Éxo. 23:4; Lev. 19:18). Le ken k-maas naʼat bix u tuukul Jéeoba yéetel baʼax ku páaʼtik tiʼ toʼoneʼ, ku pʼáatal maas maʼ talam k-eʼesik u jatsʼuts modosiʼ.
7, 8. ¿Baʼax k-kanik tiʼ Jéeoba ken k-xok le baʼaxoʼob tu beetaj Jesusoʼ?
7 Yéetel le baʼaxoʼob tu beetaj Jesusoʼ tu yeʼesaj baʼax jatsʼuts modosi yaan tiʼ u Taata. Le Evangelioʼoboʼ ku yeʼesikoʼobeʼ Jesuseʼ tu chʼaʼaj óotsilil tiʼ le máaxoʼob ku muʼyajoʼoboʼ bey xan tiʼ le óotsiloʼoboʼ. Utéenjeakileʼ tu yaʼalaj tiʼ u apostoloʼob ka u chaʼob u náatsʼal le mejen paalaloʼob tu yiknaloʼ. Jeʼex túun k-ilkoʼ ken k-xok le baʼaxoʼob tu beetaj Jesusoʼ ku yáantkoʼon k-maas k-kʼaj óolt u jatsʼuts modos Jéeoba (Mar. 1:40-42; 10:13, 14; Juan 11:32-35). Le baʼaxoʼob tu beetaj Jesusoʼ ku yáantkoʼon k-il le kampʼéel modos maas nuuktak yaan tiʼ Diosoʼ. Jeʼex le milagroʼob tu beetoʼ ku yeʼesik le nojoch páajtalil tsʼaʼab tiʼ tumen Diosoʼ, baʼaleʼ mix utéen meyajnaj tiʼ utiaʼal u kaxtik chéen u yutsil wa utiaʼal u beetik kʼaas tiʼ wa máax (Luc. 4:1-4). Le ka xan tu tojolchʼintaj le máaxoʼob ku koonoloʼob teʼ templooʼ, tu yeʼesaj u justicia Dios (Mar. 11:15-17; Juan 2:13-16). Le naʼat anchaj tiʼ Jesusoʼ maas nojoch tiʼ le anchaj tiʼ Salomonoʼ, le oʼolal le baʼaxoʼob tu yaʼalaj yéetel tu kaʼansoʼ kʼuch tu puksiʼikʼal le máakoʼoboʼ (Mat. 12:42). Tsʼoʼoleʼ le úuchik u kʼubik u kuxtal yoʼolal wíinikoʼ tu yeʼesaj u nojoch yaabilaj. ¿Máasaʼ minaʼan «u maas nojochil yaakunaj» tiʼ le tu yeʼesoʼ? (Juan 15:13.)
8 Jesuseʼ tu beetaj yéetel tu yaʼalaj tuláakal baʼal jeʼex u beetik u Taataeʼ. Le oʼolal páajchaj u yaʼalik: «Le máax ku yilken teneʼ ku yilik le Taataoʼ» (xokaʼak Juan 14:9-11). Jeʼex túun k-ilkoʼ, ken k-tsaypacht Cristoeʼ táan k-beetik jeʼex Jéeobaeʼ.
Jesuseʼ letiʼe máax Yéeyaʼan tumen Jéeobaoʼ
9. ¿Baʼax kʼiin yéetel bix úuchik u yéeyaʼal Jesús utiaʼal u beetuba Cristoi?
9 Koʼoneʼex ilik baʼax úuch tu jaʼabil 29 tiʼ le yáax siglooʼ, teʼ kʼiinoʼob jeʼeloʼ Jesuseʼ yaan kaʼach treinta jaʼaboʼob tiʼ ka bin yiknal Juan Bautista. Le Bibliaoʼ ku yaʼalik: «Ka tsʼoʼok u tsʼaʼabal u yokjaʼ Jesuseʼ, jóokʼ tiʼ le jaʼoʼ. Ka téek jeʼepaj le kaʼanoʼ, ka tu yilaj Jesús u yéemel u kiliʼich [muukʼ] Yuum Jajal Dios bey juntúul palomaeʼ táan u taal tu yóokʼol». Teʼ súutuk jeʼeloʼ Jesuseʼ kʼuch u beetuba Cristoi wa Mesías. Jéeobaeʼ tu yeʼesaj letiʼ yéey Jesús, le ka tu yaʼalaj: «Lelaʼ in yaabilaj paal, tiʼ máax yaan in kiʼimak óolal» (Mat. 3:13-17, LTN). Le oʼolal jach unaj k-tsaypachtik Jesús.
10, 11. 1) ¿Bix u meyaj le tʼaan «Cristo» ichil le Bibliaoʼ? 2) ¿Baʼaxten unaj k-tsaypachtik Jesús mantatsʼ?
10 Yaan kʼiineʼ teʼ Bibliaoʼ tiʼ Jesuseʼ ku yaʼalaʼal «Jesucristo», «Cristo Jesús» yéetel «Cristo». Le ken chíikpajak le tʼaan Cristo tu tsʼoʼokbal le kʼaabaʼ Jesusoʼ, ku meyaj utiaʼal u yeʼesaʼal yéeyaʼan tumen Dios. Le tʼaan Jesucristooʼ tiʼ letiʼ yáax meyajnaj le ka tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Le ken chíikpajak le tʼaan «Cristo» táanil tiʼ le kʼaabaʼ Jesusoʼ, ku yeʼesik le meyaj yéetel le páajtalil tsʼaʼantiʼoʼ (2 Cor. 4:5). Le ken chíikpajak chéen le kʼaabaʼ «Cristooʼ» ku meyaj utiaʼal u yeʼesik letiʼ le Mesíasoʼ (Hch. 5:42).
11 Jeʼel máakalmáak tiʼ le óoxpʼéel kʼaabaʼobaʼ, le tʼaan «Cristooʼ» ku yeʼesikeʼ kex Jesús kuxlaj way Luʼum yéetel tu kaʼansaj baʼax utstutʼaan Dioseʼ, letiʼeʼ maʼ jeʼex u maasil máakoʼobeʼ mix chéen utúul profetaiʼ. Letiʼe máax yéeyaʼan tumen Diosoʼ. Le oʼolal mix bikʼin unaj u xuʼulul k-tsaypachtik.
Chéen yoʼolal Jesús jeʼel u salvarkuba máakeʼ
12. ¿Baʼax tu yaʼalaj Jesús tiʼ apóstol Tomás?
12 Uláakʼ baʼax oʼolal unaj k-tsaypachtik Cristo mantatsʼeʼ, ku chíikpajal teʼ tsikbal tu beetaj yéetel u apostoloʼob le taʼaytak u kíimsaʼaloʼ. Upʼéel tiʼ le baʼaxoʼob tu yáax aʼalajtiʼoboʼ letiʼe u kʼaʼabéetil u kaʼa bin kaʼan utiaʼal u nuʼuktik tiʼob upʼéel kúuchiloʼ. Tomás túuneʼ tu kʼáatajtiʼ baʼax u kʼáat u yaʼal yéetel leloʼ, Jesús túuneʼ tu núukajtiʼ: «Teen le bejoʼ, teen le jaajoʼ yéetel teen le kuxtaloʼ. Chéen tin woʼolaleʼ ku páajtal u taal máak tiʼ le Taataoʼ» (Juan 14:1-6). Kex chéen tiʼ u once apostoloʼob tu yaʼalaj le tʼaanoʼobaʼ, baʼaleʼ lelaʼ jach ku líiʼsik u yóol xan le máaxoʼob kun pʼáatloʼob kuxtal way Luʼumeʼ (Apo. 7:9, 10; 21:1-4). ¿Baʼaxten k-aʼalik lelaʼ?
13. ¿Baʼaxten ku yaʼalaʼal Jesuseʼ letiʼ «le bejoʼ»?
13 Jesucristoeʼ letiʼ «le bejoʼ», lelaʼ u kʼáat u yaʼaleʼ chéen tu yoʼolal jeʼel u páajtal u natsʼkuba máak tiʼ Dioseʼ. Le oʼolal ken payalchiʼinakoʼoneʼ unaj k-beetik tu kʼaabaʼ, chéen bey jeʼel u tsʼáaiktoʼon Jéeoba le baʼax k-kʼáatiktiʼoʼ (Juan 15:16). Baʼaleʼ yaan uláakʼ baʼax oʼolal ku yaʼalaʼal letiʼ «le bejoʼ». ¿Baʼax túun oʼolal? Táanileʼ kʼaʼajaktoʼoneʼ le kʼebanoʼ tu beetaj u náachtal wíinik tiʼ Dios (Isa. 59:2). Le oʼolal Jesuseʼ kʼaʼabéetchaj u tsʼáaik «u kuxtal bey jumpʼéel boʼol utiaʼal u jáalkʼabtaʼal yaʼabkach máakoʼob[eʼ]» (Mat. 20:28). Bey túunoʼ, jeʼex u yaʼalik le Bibliaoʼ u kʼiʼikʼeleʼ «ku pʼoʼikoʼon tiʼ tuláakal kʼeban» (1 Juan 1:7). Jeʼex túun k-ilkoʼ Jesuseʼ tu jeʼekʼabtaj u bejil utiaʼal k-kaʼa natsʼikba tiʼ Dios (Rom. 5:8-10). Wa k-tsʼáaik fe tiʼ Jesús yéetel wa k-beetik baʼax ku yaʼaliktoʼoneʼ, jeʼel u páajtal k-bisikba maʼalob yéetel Dioseʼ (Juan 3:36).
14. ¿Baʼaxten ku yaʼalaʼal Jesuseʼ letiʼ «le jaajiloʼ»?
14 Jesuseʼ letiʼ «le jaajoʼ», tumen mantatsʼ tu yaʼalaj u jaajil yéetel tu tsʼáaj ichil u kuxtal le baʼax tu kaʼansoʼ. Tsʼoʼoleʼ tiʼ letiʼ béeychaj tuláakal le profecíaʼob aʼalaʼan tu yoʼolal le Mesíasoʼ. Le apóstol Pablooʼ bey tu yaʼalilaʼ: «Tiʼ letiʼ ku béeychajal tuláakal u tsʼaatʼaanoʼob Jajal Dios» (2 Cor. 1:20). Tsʼoʼoleʼ Jesuseʼ letiʼ «u yoochel le maʼalob baʼaloʼob» aʼalaʼan tu Ley Moisés «bíin taalakoʼ» (Heb. 10:1; Col. 2:17). Tuláakal le profecíaʼoboʼ tʼaanajoʼob tiʼ Jesús, yéetel tu yaʼaloʼob baʼax ken u beet utiaʼal u béeytal le baʼaxoʼob u tukultmaj u beetik Diosoʼ (Apo. 19:10). Utiaʼal k-ilik u béeytal le baʼaloʼobaʼ unaj u seguer k-tsaypachtik Cristo.
15. ¿Baʼaxten ku yaʼalaʼal Jesuseʼ letiʼ «le kuxtaloʼ»?
15 Jesuseʼ letiʼ «le kuxtaloʼ», tumen tu wekaj u kʼiʼikʼel tu yoʼolal tuláakal máak. Tu yoʼolal «Cristo Jesus[eʼ]», Jéeobaeʼ yaan u tsʼáaiktoʼon le kuxtal minaʼan u xuuloʼ (Rom. 6:23). Uláakʼ baʼax oʼolal ku yaʼalaʼal letiʼ «le kuxtaloʼ», tumen yaan u kaʼa kuxkíintik le kimenoʼoboʼ (Juan 5:28, 29). Tsʼoʼoleʼ ken u beet u Nojoch Sacerdoteileʼ, yaan u luʼsik le kʼeban yéetel le kíimil ichil le Mil Jaʼaboʼob kun gobernaroʼ (Heb. 9:11, 12, 28).
16. ¿Baʼax oʼolal unaj k-tsaypachtik Jesús?
16 Jeʼex túun k-ilkoʼ, le baʼax tu yaʼalaj Jesús tiʼ Tomasoʼ jach yaʼab utsiloʼob xan ken u taastoʼon. Jesuseʼ letiʼ le bejoʼ, le jaajoʼ yéetel le kuxtaloʼ. Tsʼoʼoleʼ letiʼ le máax yéeyaʼab tumen Dios utiaʼal ka taalak way Luʼum utiaʼal u salvarkuba wíinikoʼ (Juan 3:17). Yéetel chéen tu yoʼolal jeʼel u páajtal k-natsʼikba tiʼ Jéeobaeʼ. Le Bibliaoʼ ku yaʼalik: «Minaʼan uláakʼ máak ku tsʼáaik [salvación]; tumen maʼ tsʼaʼan tiʼ máakoʼob uláakʼ kʼaabaʼ way yóokʼol kaabeʼ, utiaʼal ka páatak u yantaltoʼon [salvación]» (Hch. 4:12). Le oʼolaleʼ, kʼaʼabéet k-kʼexik k-tuukul utiaʼal k-creertik Jesús yéetel k-tsaypachtik, beyoʼ jeʼel u yantaltoʼon le kuxtal minaʼan u xuuloʼ (Juan 20:31).
Unaj k-uʼuyik u tʼaan Cristo
17. ¿Baʼaxten jach unaj k-uʼuyik u tʼaan Jesús?
17 Pedro, Juan yéetel Santiagoeʼ tu yiloʼob u transfiguración Jesús. Letiʼobeʼ tu yuʼuboʼob u yaʼalaʼal teʼ kaʼanoʼ: «Lelaʼ in yaabilaj Paal, uʼuyeʼex u tʼaan» (Luc. 9:28, 29, 35). Toʼoneʼ jach unaj k-beetik le baʼax ku yaʼalik le tʼaanoʼobaʼ, unaj k-uʼuyik u tʼaan le Mesíasoʼ (xokaʼak Hechos [Beetaʼanoʼob] 3:22, 23).
18. ¿Baʼax u kʼáat u yaʼal u yuʼubaʼal u tʼaan Jesús?
18 K-uʼuyik u tʼaan Jesuseʼ u kʼáat u yaʼal k-kuxtal jeʼex kuxlajikoʼ (Heb. 12:2, 3). Le oʼolaleʼ «unaj [k-maas] chʼenxikint [...] le baʼax tsʼoʼok k-uʼuyik» tu yoʼolal Jesús teʼ Bibliaoʼ yéetel teʼ jóoʼsaʼaniloʼob ku taal tiʼ «le palitsil chúukpajaʼan u yóol yéetel yaan u naʼat[oʼ]» (Heb. 2:1; Mat. 24:45). Toʼoneʼ u j-taamanoʼon; le oʼolal unaj k-uʼuyik u tʼaan yéetel k-tsaypachtik (Juan 10:27).
19. ¿Baʼax jeʼel u yáantkoʼon k-tsaypacht Jesús mantatsʼeʼ?
19 ¿Yaan wa u chúukpajal k-óol tsaypacht Cristo mantatsʼ kex ka yanaktoʼon jeʼel baʼalak talamileʼ? Wa k-tʼilkúunsik t-tuukul «le maʼalob kaʼansaj[oʼ]» yaan, lelaʼ u kʼáat u yaʼaleʼ k-tsʼáaik ichil k-kuxtal «le oksaj óolal yéetel le yaakunaj yantoʼon tiʼ Cristo Jesusoʼ» (2 Tim. 1:13).
¿Baʼax ta kanaj?
• ¿Baʼaxten k-tsaypachtik Cristoeʼ jeʼel u yáantkoʼon k-maas natsʼba tiʼ Jéeobaeʼ?
• ¿Baʼaxten k-aʼalik ken k-beet jeʼex Jesuseʼ táan k-beetik jeʼex Jéeobaeʼ?
• ¿Baʼaxten ku yaʼalaʼal Jesuseʼ letiʼ «le bejoʼ», «le jaajoʼ» yéetel «le kuxtaloʼ»?
• ¿Baʼaxten unaj k-uʼuyik u tʼaan Jesús, le máax yéeyaʼan tumen Jéeobaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 29]
Le baʼaxoʼob tu kaʼansaj Jesusoʼ ku yeʼesikoʼob bix u tuukul Jéeoba
[U tsolajil le oochel teʼ táan juʼun 30]
Unaj k-tsaypachtik Jesús, le máax yéeyaʼan tumen Jéeobaoʼ
[U tsolajil le oochel teʼ táan juʼun 32]
«Lelaʼ in yaabilaj Paal, uʼuyeʼex u tʼaan»