Kʼáatchiʼob ku beetaʼal

Wa kʼaʼaytajnaj Jesús tiʼ tuláakal u kajnáaliloʼob Israeleʼ, ¿baʼaxten túun apóstol Pedroeʼ tu yaʼalaj tiʼ le judíoʼoboʼ: «Le ka ta kíimseʼex Jesuseʼ ta beetajeʼex tumen maʼ ta wojéeltajeʼex tu jaajil baʼax ka beetikeʼexiʼ»? (Hch. 3:17.)

Ka aʼalaʼab tumen apóstol Pedro tiʼ u jaats judíoʼob tiʼ letiʼob yaan u culpai úuchik u kíimsaʼal le Mesíasoʼ, tu yaʼalajtiʼob: «Tsʼoʼok in wojéeltik, [tu]láakaleʼex, teʼex yéetel a nojchileʼex, le ka ta kíimseʼex Jesuseʼ, ta beetajeʼex tumen maʼ ta wojéeltajeʼex tu jaajil baʼax ka beetikeʼexiʼ» (Hch. 3:14-17). Jujuntúul tiʼ letiʼobeʼ maʼ u yojeloʼob baʼax tu beetoʼobiʼ, tumen maʼ xaaneʼ maʼ tu naʼatoʼob wa Jesuseʼ letiʼ le Mesíasoʼ wa tumen maʼ tu naʼatoʼob le baʼaxoʼob tu kaʼansoʼ. Yanoʼob xaneʼ, tu beetoʼob tumen maʼ u kʼáat u kanoʼob u maasil tiʼ Diosiʼ, tumen maʼ tiʼ upʼéel familia ayikʼal u taaliʼ wa chéen tumen tu pʼektoʼob.

Koʼox ilik baʼax tu beetaj le judíoʼob tumen maʼ u kʼáat u kanoʼob u maasil tiʼ Diosoʼ. Tiʼ Jesuseʼ suukaʼan kaʼach u meyaj kettʼaanoʼob utiaʼal u kaʼansaj, tsʼoʼoleʼ ku maas tsolik tiʼ le máaxoʼob u kʼáat u yojéeltoʼob jach baʼax u kʼáat u yaʼaloʼ. Baʼaleʼ, yaan tiʼ le judíoʼoboʼ lukʼoʼob tu yiknal tumen maʼ u kʼáat u seguer u yuʼuboʼob baʼax ku yaʼalikiʼ. Utéenjeakileʼ jujuntúul tiʼ le disipuloʼoboʼ tu pʼatoʼob Jesús yoʼolal upʼéel kettʼaan tu beetaj (Juan 6:52-66). Mix utúul tiʼ letiʼob naʼat wa Jesuseʼ meyajnaj kettʼaanoʼob tiʼ utiaʼal u yáantkoʼob u kʼex u tuukuloʼob (Isa. 6:9, 10; 44:18; Mat. 13:10-15). Mix kʼaʼajtiʼob xan le profecía tuʼux ku yaʼalik le Mesíasoʼ yaan u meyaj kettʼaanoʼob tiʼ utiaʼal u kaʼansaj (Sal. 78:2).

Yaan xan tiʼ letiʼobeʼ maʼ tu kʼamoʼob le baʼaxoʼob tu kaʼansaj Jesusoʼ, tumen maʼ tiʼ upʼéel familia ayikʼal u taaliʼ. Jeʼex le ka joʼopʼ u kaʼansaj tu sinagogai Nazaret, u kaajaleʼ, le máakoʼoboʼ jaʼakʼ u yóoloʼob. Baʼaleʼ maʼ tu kʼaj óoltoʼob wa letiʼ le Mesíasoʼ, baʼaxeʼ maas tuukulnajoʼob tiʼ baʼax familiai u taal. Joʼopʼ u yaʼalikoʼob: «¿Tuʼux tu kanaj le máak tuláakal le baʼaloʼobaʼ? [...] ¿Lelaʼ maʼ wa letiʼ le carpintero u paal María yéetel u sukuʼun Jacobo, José, Judas yéetel Simón? ¿Maʼ wa way kajnáaloʼob xan ichiloʼon u x-chʼupul íitsʼinoʼobeʼ?» (Mar. 6:1-3). Jeʼex túun k-ilkoʼ, maʼ tu kʼamoʼob le baʼaxoʼob tu kaʼansaj Jesusoʼ, tumen maʼ tiʼ upʼéel familia ayikʼal u taaliʼ.

¿Kux túun u nuuktakil le judíoʼoboʼ? U maas yaʼabil tiʼ letiʼobeʼ láayliʼ maʼ tu kʼamoʼob u kaʼansaj Jesús yoʼolal le baʼaloʼob tsʼoʼok k-aʼalikoʼ (Juan 7:47-52). Tsʼoʼoleʼ tu pʼektoʼob tumen yaʼab máakoʼob tsaypachte (Mar. 15:10). Yéetel le ka aʼalaʼab tumen Jesús le baʼaloʼob maʼ maʼalobtak ku beetkoʼoboʼ maas tu chʼaʼapʼektoʼob (Mat. 23:13-36). U nuuktakil le judíoʼoboʼ maʼ tu yóotoʼob u kʼamoʼob u kaʼansajiʼ, le oʼolal Jesuseʼ tu yaʼalajtiʼob: «¡Yaj a wanileʼex, u j-kaʼambesajileʼex aʼalmajtʼaan! Tumen tsʼoʼok a kʼalikeʼex u joonajil naʼat, mix teʼex ka wookleʼexiʼ mix ka chaʼikeʼex u yokol le máaxoʼob u kʼáatoʼob ookloʼ» (Luc. 11:37-52).

Jesuseʼ tu kʼaʼaytaj le maʼalob péektsil tu luʼumil Israel ich óoxpʼéel jaʼab yéetel táanchumuk. Tsʼoʼoleʼ tu kaʼansaj yaʼab uláakʼ máakoʼob ka u beetoʼob xan (Luc. 9:1, 2; 10:1, 16, 17). Le meyaj tu beetoʼobaʼ tu taasaj yaʼab utsil, le oʼolaleʼ le fariseoʼoboʼ joʼopʼ u yaʼalikoʼob: «Ileʼex[,] tuláakal yóokʼol kaab táan u bin tu paach» (Juan 12:19). Jeʼex túun k-ilkoʼ, maʼ u kʼáat u yaʼal wa jach mix baʼal u yojel le judíoʼob tiʼ Jesusoʼ. Baʼaleʼ maʼ tu naʼatoʼob le meyaj tu beetaj bey Mesíasiloʼ. Letiʼobeʼ jeʼel u páajtal kaʼach u maas kʼaj óoltikoʼob yéetel u yaabilkoʼobeʼ, baʼaleʼ maʼ tu beetoʼobiʼ. Yaan tak tiʼ letiʼobeʼ yanchaj baʼax u yiloʼob tiʼ úuchik u kíimsaʼal. Le oʼolal apóstol Pedroeʼ tu yaʼalaj tiʼ letiʼob: «Kʼex a tuukuleʼex yéetel suuneneʼex tiʼ Jajal Dios, utiaʼal ka lukʼsaʼak a kʼebaneʼex. Bey túunoʼ Yuumtsileʼ ku páajtal u túuxtik tiʼ teʼex maʼalob kʼiinoʼob, yéetel yaan u túuxtik Jesús le Cristooʼ, máax tsʼaʼaniliʼ a tiaʼal teʼexeʼ» (Hch. 3:19, 20). Yaʼab tiʼ le judíoʼoboʼ tu beetoʼob le baʼax tu yaʼalaj Pedrooʼ, ichiloʼobeʼ táakaʼan «yaʼab xan tiʼ le j-kʼiinoʼob[oʼ]». Bey túunoʼ tu maas kʼaj óoltoʼob jach máax Jesús, tu kʼexaj u tuukuloʼob yéetel tu natsʼubaʼob tiʼ Jéeoba (Hch. 2:41; 4:4; 5:14; 6:7).