Le j-kanan ayikʼalil chúukaʼan u yóol yéetel u Cuerpo Gobernanteoʼ
Le j-kanan ayikʼalil chúukaʼan u yóol yéetel u Cuerpo Gobernanteoʼ
«¿Máax le j-kanan ayikʼalil chúukaʼan u yóol yéetel yaan u naʼat, máax u tsʼuulil bin u tsʼáa u kanáant u yotoch, utiaʼal u tsʼik janal jach tu kʼiinil?» (LUC. 12:42, LTN)
1, 2. ¿Baʼax kʼáatchiʼi tu beetaj Jesús le ka tsʼoʼok u tʼaan tiʼ le baʼaxoʼob kun ilbil tu tsʼook kʼiinoʼoboʼ?
KA TSʼOʼOK u yaʼalik Jesús baʼax kun ilbil tu tsʼook kʼiinoʼobeʼ tu beetaj le kʼáatchiʼaʼ: «¿Máax le palitsil chúukpajaʼan u yóol yéetel yaan u naʼat, ku pʼaʼatal tumen u tsʼuulil utiaʼal u táan óolt le máaxoʼob otochnáaloʼob utiaʼal ka u tsʼáa janal tiʼob tu yorailoʼ?». Ka tsʼoʼokeʼ tu yaʼaleʼ tumen chúukpaj u yóol le palitsiloʼ, le Tsʼuuloʼ yaan u tsʼáaiktiʼ u kanáant tuláakal u ayikʼalil (Mat. 24:45-47).
2 Jesuseʼ tsʼokaʼaniliʼ u yáax beetik upʼéel kʼáatchiʼ beyaʼ (xokaʼak Lucas 12:42-44). Teʼ kettʼaanaʼ «le palitsil chúukaʼan u yóol[oʼ]» utúul «j-kanan ayikʼalil», yéetel le «otochnáaloʼob[oʼ]» «uláakʼ palitsiloʼob». Úuchjeakileʼ utúul j-kanan ayikʼalileʼ ku tsʼaʼabal u kanáant upʼéel naj yéetel letiʼ aʼalik baʼax unaj u beetik u maasil palitsiloʼob. ¿Máax túun le palitsil wa j-kanan ayikʼalil chʼaʼachiʼitaʼab tumen Jesusoʼ? ¿Bix u tsʼáaik le kaʼansaj ku keʼetel yéetel janal jach tu yorailoʼ? Jach unaj k-ilik u núukil le kʼáatchiʼobaʼ, tumen jach kʼaʼabéet k-naʼatik máaxoʼob ku meyaj tiʼ Dios utiaʼal u tsʼáaiktoʼon le kaʼansaj ku keʼetel yéetel janaloʼ.
3. 1) Yaʼab máaxoʼob xakʼalxoktik u tʼaaniloʼob le Bibliaoʼ, ¿baʼax ku yaʼalikoʼob yoʼolal le «palitsil» chʼaʼachiʼitaʼab tumen Jesusoʼ? 2) ¿Máax le «j-kanan ayikʼalil» wa «palitsil[oʼ]», yéetel máaxoʼob «le uláakʼ palitsiloʼob» wa le «otochnáaloʼob[oʼ]»?
3 Yaʼab máaxoʼob ku xakʼalxoktikoʼob u tʼaaniloʼob le Bibliaoʼ ku yaʼalikoʼobeʼ Jesuseʼ táan kaʼach u tʼaan tiʼ u nuuktakil le iglesiaʼoboʼ. Baʼaleʼ Jesús, le «tsʼuulil» ku chʼaʼachiʼitaʼal teʼ kettʼaanoʼ, maʼ tu yaʼalaj wa yaan u yantal yaʼab u palitsiloʼob ichil yaʼab iglesiaʼobiʼ. Letiʼeʼ tu yaʼaleʼ chéen utúul «j-kanan ayikʼalil» wa «palitsil» kun kanáantik tuláakal u yotoch. Le oʼolaleʼ, jeʼex tsʼoʼok u tsolaʼal yaʼab utéenel tiʼ U Pʼíich Tulumil Kananeʼ, le «otochnáaloʼob[oʼ]» letiʼ le «upʼíit tamanoʼoboʼ» wa tuláakal le máaxoʼob yéeyaʼanoʼob utiaʼal u binoʼob kaʼanoʼ. Tu Evangelioi Lucaseʼ k-ilkeʼ Jesuseʼ táan u tʼaan tiʼ letiʼob le ka tu chʼaʼachiʼitaj le «j-kanan ayikʼalil[oʼ]» (Luc. 12:32). Le tʼaan «uláakʼ palitsiloʼob» yéetel le «otochnáaloʼob[oʼ]» láayliʼ tiʼ letiʼob ku tʼaaneʼ, baʼaleʼ tiʼ cada utúul. ¿Tuláakloʼob wa túun ku táakpajloʼob ichil le palitsil utiaʼal u tsʼáaikoʼob le kaʼansaj ku keʼetel yéetel janal jach tu yorailoʼ? Koʼoneʼex xakʼalxoktik jach baʼax ku yaʼalik le Biblia utiaʼal k-ilik u núukil le kʼáatchiʼaʼ.
Le u palitsil Jéeoba úuchjeakiloʼ
4. 1) ¿Bix úuchik u yaʼalaʼal tiʼ u kaajil Israel tumen Jéeoba úuchjeakil? 2) ¿Chéen máaxoʼob kaʼans u Ley Dios tiʼ le israelitaʼoboʼ?
4 Úuchjeakileʼ, Jéeobaeʼ tu yaʼaleʼ u kaajil Israeleʼ u palitsil. Tu yaʼalaj: «Teʼexeʼ in j-jaajkunajeʼex [yaʼaboʼob] [...], in palitsil [chéen utúul] in yéeymaj» (Isa. 43:10, NM). Le israelitaʼob úuchjeakiloʼ letiʼob u palitsil Dios. Kex beyoʼ, chéen le j-kʼiinoʼob yéetel u yaalab le levitaʼob kaʼans u Ley Dios tiʼ le kaajoʼ (2 Cró. 35:3; Mal. 2:7).
5. ¿Baʼax nojoch kʼeexil tu yaʼalaj Jesús kun antal?
5 Baʼaleʼ ¿letiʼ wa le israelitaʼob le palitsil aʼalaʼab tumen Jesusoʼ? Maʼatech, tumen letiʼeʼ tu yaʼalaj tiʼ le judíoʼob teʼ kʼiinoʼob jeʼeloʼ: «Bin u kaʼa lukʼesbil tiʼ teʼex u [reino] Jajal Dios utiaʼal ka tsʼaʼabak tiʼ le máakoʼob jeʼel u kʼubikoʼob le u yich ku tiaʼalintik le [reinooʼ]» (Mat. 21:43). Jeʼex túun k-ilkoʼ Jéeobaeʼ jach taʼaytak u yéeyik upʼéel túumben kaaj. Baʼaleʼ le kaʼansaj ku keʼetel yéetel janal ku tsʼáaik le palitsil teʼ kettʼaan tu yaʼalaj Jesusoʼ, yaan u seguer u tsʼaʼabal jeʼex u beetaʼal kaʼach tu úuchben kaajil Israel, le u «palitsil» Dios kaʼachoʼ.
Baʼax kʼiin ka chíikpaj le palitsil chúukaʼan u yóoloʼ
6. ¿Baʼax kaajil yanchaj teʼ Pentecostés tiʼ u jaʼabil 33, yéetel máaxoʼob yanoʼob ichil?
6 Teʼ túumben kaaj wa «u Israel Jajal Dios[oʼ]» táakaʼan tak máaxoʼob maʼ israelitaʼobiʼ (Gál. 6:16, LTN; Rom. 2:28, 29; 9:6). Le kaajaʼ yanchaj teʼ Pentecostés tu jaʼabil 33 tiʼ le yáax siglo, le ka tsʼaʼab kiliʼich muukʼ tiʼ u disipuloʼob Cristooʼ. Desde teʼ kʼiin jeʼeloʼ tuláakal le máaxoʼob ku tsʼaʼabal kiliʼich muukʼ tiʼoboʼ ku táakpajaloʼob ichil le kaajoʼ, lelaʼ kʼuch u beetuba u palitsil Jesucristo, le Tsʼuuloʼ. Cada utúul tiʼ le máaxoʼob yanoʼob ichil le kaajaʼ aʼalaʼabtiʼob ka u kʼaʼaytoʼob le maʼalob péektsiloʼ yéetel ka u kaʼansoʼob uláakʼ máakoʼob (Mat. 28:19, 20). ¿Yaan wa túun u táakpajal tuláakloʼob utiaʼal u tsʼaʼob le kaʼansaj ku keʼetel yéetel jaanloʼ? Koʼoneʼex ilik baʼax ku yaʼalik le Biblia yoʼolal lelaʼ.
7. 1) ¿Baʼax meyajil maas unaj beetaʼal kaʼach tumen le apostoloʼoboʼ? 2) ¿Baʼax uláakʼ meyajil tsʼaʼab u beetoʼob?
7 Jesuseʼ tu yéeyaj doce apostoloʼob yéetel tu túuxtoʼob u kʼaʼaytoʼob le maʼalob péektsiloʼ. Lelaʼ letiʼe meyaj maas unaj u beetkoʼoboʼ (xokaʼak Marcos 3:13-15). Le kʼaabaʼ tsʼaʼabtiʼoboʼ jach yaan baʼax u yil yéetel le meyaj aʼalaʼabtiʼob ka u beetoʼoboʼ, tumen le tʼaan griego apóstolos meyajnaj tiʼ Jesusoʼ tiʼ u taal tiʼ upʼéel tʼaan ku suʼutul «u túuxtaʼal máak». Baʼaleʼ le taʼaytak u yantal le múuchʼuliloʼ, tsʼaʼab uláakʼ «meyaj» u beetoʼob, letiʼe u nuʼuktikoʼob le máaxoʼob kun ookloʼob ichil u kaajal Diosoʼ (Hch. 1:20-26).
8, 9. 1) ¿Baʼax meyajil maas chʼíik u beet le doce apostoloʼob le ka tsʼoʼok le Pentecostesoʼ? 2) ¿Tiʼ máaxoʼob tsʼaʼab uláakʼ meyaj u beetoʼob ichil le múuchʼulil kʼaʼam xan tumen le Cuerpo Gobernanteoʼ?
8 ¿Baʼax meyajil túun tu maas tsʼáaj u yóol u beet le apostoloʼoboʼ? Utiaʼal k-ojéeltikeʼ, koʼoneʼex ilik baʼax úuch le ka tsʼoʼok le Pentecostesoʼ. Le Bibliaoʼ ku yaʼalikeʼ le táan u yáantaʼal le x-kimen íichamoʼob yéetel baʼax kʼaʼabéettiʼoboʼ yanchaj upʼéel talamil. Le apostoloʼob túunoʼ tu muchʼoʼob u maasil disipuloʼoboʼ ka tu yaʼaloʼobtiʼob: «Maʼ uts ka k-pʼat u maʼalob péektsil Jajal Dios» utiaʼal k-meyaj tiʼ tʼox janaliʼ (xokaʼak Beetaʼanoʼob [Hechos] 6:1-6). Ka túun tu tsʼáajoʼob sukuʼunoʼob yiijchajaʼan u tuukuloʼob utiaʼal u beetkoʼob «le meyajaʼ». Beyoʼ letiʼobeʼ páajchaj u maas «kaʼansik[oʼob] u maʼalob péektsil Jajal Dios». Le baʼax tu chʼaʼatukultoʼobaʼ jach maʼalob ilaʼabik tumen Jéeoba, le oʼolal «u maʼalob péektsil Jajal Dioseʼ [joʼopʼ] u tʼiʼitʼpajal, yéetel u múuchʼul j-kaambaloʼoboʼ [káaj] u jach yaʼabtal Jerusalén» (Hch. 6:7). Jeʼex túun k-ilkoʼ, le meyaj maas tu tsʼáaj u yóol u beet le apostoloʼoboʼ letiʼe u tsʼáaikoʼob le kaʼansaj ku keʼetel yéetel janaloʼ (Hch. 2:42).
9 Ka máan kʼiineʼ yáanal u nuʼuktaj le kiliʼich muukʼoʼ, le apostoloʼoboʼ tu tsʼáajoʼob meyaj beetbil tumen uláakʼ disipuloʼob. Koʼoneʼex ilik baʼax tu beetaj Pablo yéetel Bernabé. Yáanal u nuʼuktaj le kiliʼich muukʼoʼ túuxtaʼaboʼob u beet u misioneroiloʼob tumen le múuchʼulil yaan Antioquíaoʼ. Kex maʼ táakpajoʼob ichil le doce apostoloʼoboʼ, kʼuch kʼaj óolbiloʼob bey apostoloʼobeʼ (Hch. 13:1-3; 14:14; Gal. 1:19). Yéetel le Cuerpo Gobernante yaan kaʼach Jerusalenoʼ tu kʼamoʼob xan bey apostoloʼobeʼ (Gal. 2:7-10). Maʼ sen úuch tiʼ leloʼ, Pabloeʼ tu tsʼíibtaj u yáax carta yáanal u nuʼuktaj Dios, bey túunoʼ yanchaj u páajtalil u tsʼáaik xan le kaʼansaj ku keʼetel yéetel janaloʼ.
10. ¿Táakpaj wa tuláakal le sukuʼunoʼob yéeyaʼanoʼob utiaʼal u binoʼob kaʼan utiaʼal u tsʼaʼob le kaʼansaj ku keʼetel yéetel janaloʼ? Tsol baʼaxten bey a núukikoʼ.
10 ¿Ku táakpajal wa túun tuláakal le yéeyaʼanoʼob utiaʼal u binoʼob kaʼan u nuʼuktoʼob le kʼaʼaytaj yéetel u tsʼaʼob le kaʼansaj ku keʼetel yéetel janaloʼ? Maʼatech. Apóstol Pabloeʼ tu yaʼalaj: «¿Láaj apostoloʼob wa? ¿Tuláakal wa [profetaʼob]? ¿Láaj kaʼambesajoʼob wa? ¿Tuláakal wa ku beetikoʼob chíikulaloʼob?» (1 Cor. 12:29). Kex tuláakal le yéeyaʼanoʼob utiaʼal u binoʼob kaʼan ku kʼaʼaytajoʼoboʼ, chéen ocho utúul tiʼ letiʼob yéeyaʼab utiaʼal u tsʼíibt le veintisiete libroʼob tiʼ le Kiliʼich Tsʼíiboʼob ich Griegooʼ.
Le palitsil chúukpajaʼan u yóol teʼ kʼiinoʼobaʼ
11. ¿Baʼaxoʼob tsʼaʼan u kanáant le palitsiloʼ?
11 Le baʼax tu yaʼalaj Jesús ku chíikpajal teʼ Mateo 24:45, ku yeʼesikeʼ le palitsil chúukpajaʼan u yóol yéetel yaan u naʼatoʼ yaan u seguer u meyaj tak tu tsʼook kʼiiniloʼob le kʼasaʼan yóokʼol kaabaʼ. Apocalipsis 12:17 ku yaʼalikeʼ le sukuʼunoʼobaʼ «u yalab» le u chʼiʼibal le koʼoleloʼ. Tiʼ letiʼob kʼubéentaʼan u nuʼuktoʼob tuláakal baʼax utiaʼal Cristo way Luʼumeʼ. Ichil le baʼaxoʼob tsʼaʼan u kanáantoʼoboʼ táakaʼan le máaxoʼob táan u páaʼtik u pʼáatloʼob kuxtal way Luʼumeʼ bey xan u najiloʼob Betel tuʼux ku nuʼuktaʼal u kʼaʼaytaʼal u maʼalob péektsilil le Reinooʼ.
12, 13. ¿Bix u yojéeltik utúul máax meyajtik Dios wa yéeyaʼan utiaʼal u bin kaʼan?
12 ¿Bix jeʼel u yojéeltik utúul máax meyajtik Dios wa yéeyaʼan utiaʼal u bin kaʼaneʼ? Koʼoneʼex ilik baʼax tu yaʼalaj Pablo tiʼ le máaxoʼob táan u páaʼtikoʼob u binoʼob kaʼanoʼ: «Tuláakal le máaxoʼob ku nuʼuktaʼal u beeloʼob tumen u kiliʼich [muukʼ] Jajal Dioseʼ letiʼobeʼ u paalaloʼob Jajal Dios. Tumen le kiliʼich [muukʼ] ta kʼamajeʼexoʼ maʼ [utiaʼal] [...] palitsilil ka u beet a chʼaʼikeʼex sajakil tu kaʼatéeniʼ, baʼaleʼ le kiliʼich [muukʼaʼ] ku beetikeʼex u paalaleʼex Jajal Diosoʼ. Le kiliʼich [muukʼaʼ] ku beetik k-aʼalik: ¡“K-Taata” tiʼ Jajal Dios! Le kiliʼich [muukʼaʼ] ku nupikuba yéetel [k-kuxtal] utiaʼal u yaʼaliktoʼoneʼ u paalaloʼon Jajal Dios. Tumen u paalaloʼoneʼ, yaan xan baʼal k-il yéetel le ayikʼalil u yaʼalmaj Jajal Dios u tsʼáaik tiʼ toʼonoʼ, lelaʼ bíin k-kʼam junmúuchʼ yéetel Cristo, wa k-mukʼyaj bejelaʼa tu yéetel utiaʼal ka páatak k-antal tu nojbeʼenil» (Rom. 8:14-17).
13 Lelaʼ u kʼáat u yaʼaleʼ le máaxoʼob ku yokol ichil u Israel Diosoʼ yéeyaʼanoʼob tumen le kiliʼich muukʼoʼ, le oʼolal «táakpajaʼan[oʼob] ichil le máaxoʼob tʼanaʼanoʼob» utiaʼal u binoʼob kaʼanoʼ (Heb. 3:1). Jeʼex k-ilkoʼ Jéeoba tʼankoʼob. Letiʼob xaneʼ tu séebaʼanil ku yóotik u kʼamoʼob yéetel x-maʼ saajkilil u táakpajloʼob ichil u paalal Dios (xokaʼak 1 Juan 2:20, 21). Bey túunoʼ maʼ letiʼob yéeyik u binoʼob kaʼaniʼ, Jéeoba yéeykoʼob yéetel u kiliʼich muukʼ (2 Cor. 1:21, 22; 1 Ped. 1:3, 4).
Baʼax tuukulil unaj u yantaltiʼob
14. ¿Baʼax tuukulil yaan tiʼ le máaxoʼob yéeyaʼanoʼob utiaʼal u binoʼob kaʼanoʼ?
14 ¿Baʼax tuukulil unaj u yantal tiʼ le máaxoʼob yéeyaʼanoʼob utiaʼal u binoʼob kaʼanoʼ? Letiʼobeʼ u yojloʼobeʼ kex tʼanaʼanoʼob tumen Dioseʼ, kʼaʼabéet u chúukpajal u yóoloʼob u meyajtoʼob tak ken kíimkoʼob. Letiʼobeʼ ku yaʼalikoʼob xan le tʼaanoʼob tu yaʼalaj Pabloaʼ: «Sukuʼuneʼex teneʼ maʼ táan in waʼalik wa tsʼoʼok in chukpachtik lelaʼ; baʼaleʼ jumpʼéel baʼal kin beetik: in tuʼubsik le baʼax ku pʼáatal paachiloʼ yéetel in mukʼulmuukʼ utiaʼal in chukpachtik le baʼax yaan táaniloʼ, utiaʼal in kʼuchul tu xuul utiaʼal in kʼamik le siibaloʼ, lelaʼ úuchik u tʼanikoʼon Jajal Dios teʼ kaʼanoʼ tu yoʼolal Cristo Jesús» (Fili. 3:13, 14). Le máaxoʼob yéeyaʼanoʼob utiaʼal u binoʼob kaʼanoʼ ku yilik u beetkoʼob baʼax «maʼalob jeʼel bix unaj u beetik le máaxoʼob tʼanaʼanoʼob tumen Jajal Diosoʼ» yéetel ku yeʼeskoʼob «kabal óolal yéetel sajakil» (Efe. 4:1, 2; Fili. 2:12; 1 Tes. 2:12).
15. ¿Baʼax unaj k-beetik wa utúul sukuʼun ku jaantik le waaj yéetel ku yukʼik le vino ken beetaʼak le Kʼaʼajsajiloʼ, yéetel baʼax tuukulil maʼ unaj u yantal tiʼ le máaxoʼob kun binoʼob kaʼanoʼ?
15 ¿Baʼax unaj k-beetik wa utúul sukuʼun ku jaantik le waaj yéetel ku yukʼik le vino ku máansaʼal ken beetaʼak le Kʼaʼajsajiloʼ? Mix máak unaj u yaʼalik maʼ maʼalob baʼax ku beetkiʼ, tumen letiʼ kun kʼubik cuenta tiʼ Jéeoba (Rom. 14:12). Le máaxoʼob yéeyaʼanoʼob utiaʼal u binoʼob kaʼanoʼ maʼatech u yaʼalkoʼob ka ilaʼakoʼob maas maʼalobil tiʼ u maasil. Maʼatech u tuklikoʼob wa maas ku naʼatikoʼob le baʼax ku yaʼalik le Biblia ke tiʼ le «yaʼabkach máakoʼob» úuch joʼopʼok u meyajtikoʼob Dios kun pʼáatloʼob kuxtal way Luʼumeʼ (Apo. 7:9). Maʼatech u tuklikoʼob xan wa maas yaan kiliʼich muukʼ tiʼob ke tiʼ le «uláakʼ tamanoʼob[oʼ]» (Juan 10:16). Tsʼoʼoleʼ maʼatech u tuklikoʼob wa maas yaan páajtalil tiʼob ke tiʼ le ancianoʼob maʼatech u jaantkoʼob le waaj yéetel u yukʼikoʼob le vinooʼ.
16-18. 1) ¿Ku táakpajal wa tuláakal le máaxoʼob kun binoʼob kaʼan utiaʼal ka tsʼaʼabak le kaʼansaj ku keʼetel yéetel jaanloʼ? Tʼaanen tiʼ upʼéel baʼax eʼesik leloʼ. 2) ¿Baʼaxten le Cuerpo Gobernanteoʼ maʼatech u kʼáatik baʼax ku tuklik le u maasil máaxoʼob yéeyaʼanoʼob utiaʼal u binoʼob kaʼan táanil tiʼ u chʼaʼatuklik baʼax ken u beetoʼ?
16 ¿Ku táakpajal wa tuláakal le máaxoʼob yéeyaʼanoʼob utiaʼal u tsʼaʼob le kaʼansaj ku keʼetel yéetel jaanloʼ? Maʼatech. Kex tiʼ le palitsil kʼubéentaʼan ka u kanáant u yotoch le tsʼuul, wa le máaxoʼob yéeyaʼanoʼob utiaʼal u binoʼob kaʼanoʼ, maʼ tuláakloʼob upʼéeliliʼ meyaj ku beetkoʼobiʼ (xokaʼak 1 Corintoiloʼob 12:14-18). Jeʼex tsʼoʼok k-ilkoʼ, tuláakal le máaxoʼob yéeyaʼaboʼob utiaʼal u binoʼob kaʼan teʼ yáax siglooʼ táakpajoʼob teʼ kʼaʼaytajoʼ, baʼaleʼ chéen jujuntúul tiʼ letiʼob tu tsʼíibtoʼob u libroiloʼob le Bibliaoʼ yéetel tu tsʼáajoʼob nuʼuktaj tiʼ le múuchʼuliloʼ.
17 Koʼox tuukul tiʼ lelaʼ. Yaan kʼiineʼ le Bibliaoʼ ku yaʼalikeʼ le «múuchʼul[iloʼ]» ku jóoʼsik le máaxoʼob maʼatech u arrepentiroʼoboʼ (Mat. 18:17). Baʼaleʼ u jaajileʼ, lelaʼ letiʼe ancianoʼob beetkoʼ. Letiʼobeʼ maʼatech u kʼáatkoʼob tiʼ cada utúul j-kʼaʼaytaj baʼax ku tuklikoʼob táanil tiʼ u chʼaʼatuklik u beetkoʼob wa baʼax. Baʼaxeʼ ku beetkoʼob le meyaj tsʼaʼantiʼoboʼ yéetel ku tʼaanoʼob tu kʼaabaʼ le múuchʼuliloʼ.
18 Bejlaʼa xaneʼ, maʼ yaʼab tiʼ le yéeyaʼanoʼob tumen le kiliʼich muukʼ ku tʼaanoʼob tu kʼaabaʼ le palitsiloʼ. Letiʼobeʼ táakaʼanoʼob ichil le Cuerpo Gobernante tiʼ u J-jaajkunajoʼob Jéeobaoʼ. Ku nuʼuktikoʼob u kʼaʼaytaʼal le maʼalob péektsiloʼ bey xan le baʼaxoʼob ku kaʼansaʼaloʼ. Jeʼex teʼ yáax siglooʼ, le Cuerpo Gobernante yaan bejlaʼoʼ maʼatech u kʼáatik tiʼ cada utúul tiʼ le yéeyaʼanoʼob baʼax unaj u beetaʼal táanil tiʼ u chʼaʼatuklaʼal u beetaʼal wa baʼaxoʼ (xokaʼak Beetaʼanoʼob 16:4, 5). Baʼaleʼ tuláakal le yéeyaʼanoʼob utiaʼal u binoʼob kaʼanoʼ ku táakpajloʼob teʼ kʼaʼaytaj ku beetaʼal teʼ kʼiinoʼobaʼ. «Le palitsil chúukpajaʼan u yóol yéetel yaan u naʼa[toʼ]» yaʼab máaxoʼob táakaʼan ichil yéetel cada utúul tiʼ letiʼobeʼ jejeláas meyaj tsʼaʼan u beetoʼob (1 Cor. 12:19-26).
19, 20. ¿Bix unaj u yilaʼal «le palitsil chúukpajaʼan u yóol yéetel yaan u naʼat» yéetel u Cuerpo Gobernante tumen le máaxoʼob kun pʼáatloʼob way Luʼumoʼ?
19 Le baʼax tsʼoʼok k-ilik teʼ xookaʼ, ¿bix u yilaʼal tumen le máaxoʼob táan u páaʼtik u kuxtaloʼob utiaʼal mantatsʼ way Luʼumeʼ? Letiʼobeʼ táakaʼanoʼob ichil u ayikʼalil le Reyoʼ, le oʼolal ku tsʼáaikubaʼob yáanal u nuʼuktaj le Cuerpo Gobernante ku tʼaan tu yoʼolal «le palitsil chúukpajaʼan u yóol yéetel yaan u naʼat[oʼ]». Ku kʼamkoʼob yéetel kiʼimak óolal le kaʼansaj ku tsʼaʼabal yáanal u nuʼuktaj le Cuerpo Gobernanteoʼ. Kex ku yeʼeskoʼob tsiikil tiʼ le palitsiloʼ, ku kanáantkoʼob maʼ u tsʼáaikoʼob nojbeʼenil tiʼ máax u kʼaj óoloʼob táakaʼan ichil le palitsiloʼ. Mix utúul sukuʼun yéeyaʼan tumen le kiliʼich muukʼ u kʼáat ka tsʼaʼabak nojbeʼenil tiʼoʼ (Hch. 10:25, 26; 14:14, 15).
20 Kex wa táakaʼanoʼon ichil u yalab le yéeyaʼanoʼob utiaʼal u binoʼob kaʼan, bey xan wa táan k-páaʼtik k-kuxtal way Luʼumeʼ, unaj k-chʼaʼatuklik k-múuchʼ meyaj yéetel le j-kanan ayikʼalil chúukaʼan u yóol yéetel u Cuerpo Gobernanteoʼ. Bey túunoʼ unaj k-ilik k-pʼil ich mantatsʼ yéetel u chúukpajal k-óol tak tu xuul (Mat. 24:13, 42).
¿A wojel wa u núukil?
• ¿Máax «le palitsil chúukpajaʼan u yóol yéetel yaan u naʼatoʼ», yéetel máaxoʼob le «otochnáaloʼob[oʼ]»?
• ¿Bix u yojéeltik utúul máax meyajtik Dios wa yéeyaʼan utiaʼal u bin kaʼan?
• ¿Máax unaj u tsʼáaik le kaʼansaj ku keʼetel yéetel janaloʼ?
• ¿Baʼax tuukulil unaj u yantal tiʼ le máaxoʼob yéeyaʼanoʼob utiaʼal u binoʼob kaʼanoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Jeʼex teʼ yáax siglooʼ, le Cuerpo Gobernante yaan bejlaʼoʼ ku tʼaan tu kʼaabaʼ le palitsil chúukpajaʼan u yóol yéetel yaan u naʼatoʼ