U maʼalob péektsilil le Reinooʼ kʼuch tak tu maas náachil le luʼumaʼ

U REPÚBLICAI Tuvaeʼ tiʼ yaan tu luʼumil Rusiaeʼ, taakʼal tiʼ u luʼumil Mongolia. Yaʼab tiʼ u kajnáaliloʼobeʼ tiʼ mejen kaajoʼob jach náachtak kajaʼanoʼob, le oʼolal maʼatech u kʼuchul kʼaʼaytbil u maʼalob péektsilil le Reinooʼ. Baʼaleʼ, maʼ sen úucheʼ bin u jaats tiʼ u kajnáaliloʼob tiʼ upʼéel seminario beetaʼab tu noj kaajil Kyzyl. María, utúul precursora yaan teʼ kaajoʼ, tu yojéeltaj yaan u taaloʼobeʼ ka tu tuklaj unaj u tsikbaltiktiʼob le maʼalob péektsiloʼ.

Maríaeʼ ku yaʼalik bix tu beetil: «Teʼ najil xook tuʼux kin meyaj bey profesorailoʼ chʼaʼatuklaʼab u yantal upʼéel seminario utiaʼal u yilaʼal bix jeʼel u pʼatik máak wa baʼax vicioileʼ. Invitartaʼab kex cincuenta máakoʼob tiʼ u náanach kaajiloʼob Tuva. Ichil le kun taaloʼoboʼ táakaʼan profesoroʼob, psicologoʼob, máaxoʼob ilik maʼ u beetaʼal loob tiʼ le mejen paalaloʼoboʼ yéetel uláakʼ máakoʼob». Maríaeʼ tu yileʼ le baʼax kun beetbiloʼ jach yaan u tsʼáaik tuʼux u kʼaʼaytik le maʼalob péektsiloʼ, baʼaleʼ chan talam u yilik jeʼel u beetikeʼ. Letiʼeʼ ku yaʼalik: «Teneʼ jach suʼlaken yéetel talam in wilik in kʼaʼaytaj wa maʼ le jokʼaʼanen in beetiʼ. Baʼaleʼ tin kʼáataj tiʼ Jéeoba ka u yáanten utiaʼal ka xuʼuluk in chʼaʼik saajkil utiaʼal ka páajchajak in kʼaʼaytik le maʼalob péektsil tiʼoboʼ». ¿Bix binik túun tiʼ?

Letiʼeʼ ku yaʼalik: «Tin kaxtaj upʼéel ¡Despertad! ku tʼaan tiʼ baʼaxoʼob sajakkúuntik máak (fobia), ka tin tuklaj: “Lelaʼ jeʼel u yutstal tu yich utúul psicologoeʼ”, ka túun tin bisaj teʼ tu najil xookoʼ. Teʼ kʼiin jeʼeloʼ bin tin oficina utúul tiʼ le profesoraʼob taaljaʼanoʼob teʼ seminariooʼ ka tin kʼaʼaytaj le revista tiʼoʼ. Letiʼeʼ tu yóotaj u chʼaʼe, yéetel tu yaʼaleʼ yaan upʼéel talamil tiʼ jeʼex le ku yaʼalik le revistaoʼ. Ka sáaschaj tuláakʼ kʼiineʼ tin bisajtiʼ le libro Lo que los jóvenes preguntan. Respuestas prácticas (yáax libro), letiʼeʼ tu yóotaj xan u chʼaʼe. Ka tin wilaj tu yóotaj u chʼaʼa le jóoʼsaʼaniloʼoboʼ tin tukleʼ u maasil profesoroʼoboʼ jeʼel xan u yóotik u kʼamoʼobeʼ. Ka túun tin bisaj upʼéel caja chuup yéetel le libro Los jóvenes preguntan yéetel uláakʼ jóoʼsaʼaniloʼob». Jach beora ka xuʼupaʼ. Maríaeʼ ku yaʼalikeʼ yaʼab tiʼ u yéet meyaj le profesoraoʼ binoʼob tu oficina utiaʼal chʼaʼikoʼob xan le jóoʼsaʼaniloʼoboʼ.

Le seminario tiʼ upʼéel sábado ka tsʼoʼoki. Baʼaleʼ teʼ kʼiin jeʼeloʼ Maríaeʼ maʼatech u meyaj, le oʼolaleʼ tu tsolaj le jóoʼsaʼaniloʼob teʼ mesaʼob yanoʼob tu oficinaoʼ, ka tu tsʼíibtaj teʼ pizarraoʼ: «Profesoreʼex: jeʼel u páajtal a biskeʼex le jóoʼsaʼaniloʼoboʼ, biseʼex tak tiʼ le máaxoʼob a kʼaj óoleʼexoʼ. Le baʼaxoʼob ku kaʼanskoʼoboʼ jeʼel u yáantkeʼex teʼ tuʼux ka meyajeʼexoʼ yéetel jeʼel u líiʼsik u yóol a familiaʼexeʼ». ¿Baʼax túun úuchi? Maríaeʼ ku yaʼalik: «Teʼ kʼiin jeʼeloʼ máanen tin oficinaeʼ ka tin wileʼ óoliʼ tu láaj bisoʼob le jóoʼsaʼaniloʼoboʼ. Ka binen tu séebaʼanil in kaxt uláakʼ libroʼob yéetel revistaʼob». Tu kʼiiniloʼob le seminariooʼ, Maríaeʼ tu tʼoxaj 380 revistaʼob, 173 libroʼob yéetel 34 folletoʼob. Le máaxoʼob binoʼob teʼ seminariooʼ tu bisoʼob le jóoʼsaʼaniloʼob tak teʼ tuʼuxoʼob kajaʼanoʼoboʼ. Maríaeʼ ku yaʼalik: «Jach kiʼimakchaj in wóol úuchik u bisaʼal u maʼalob péektsilil le Reino tak tu maas náachil u mejen kaajiloʼob Tuvaoʼ» (Ecl. 11:6).

[U tsolajil le oochel teʼ táan juʼun 32]

RUSIA

U REPÚBLICAI TUVA