«Pʼáateneʼex tiʼ u yaakunaj Jajal Dios»
«Pʼáateneʼex tiʼ u yaakunaj Jajal Dios»
«Pʼáateneʼex tiʼ u yaakunaj Jajal Dios yéetel páaʼteʼex u chʼaʼa óotsilil k-Yuumtsil Jesucristo utiaʼal kuxtal minaʼan u xuul.» (JUD. 21)
1, 2. 1) ¿Bix tsʼoʼok u yeʼesik Jéeoba u yaabilmoʼon? b) ¿Jeʼel wa u chaʼik Dios k-pʼáatal tiʼ u yaakunaj kex jeʼel baʼalak ka k-beeteʼ? Tsol baʼaxten bey a núukikoʼ.
JÉEOBAEʼ jejeláas bix tsʼoʼok u yeʼesiktoʼon u yaabilaj. Upʼéel bix úuchik u yeʼesik jach u yaabiltmoʼoneʼ letiʼe úuchik u tsʼáaik u Hijo utiaʼal u boʼotik k-kʼebanoʼ. Le yaabilaj ku yuʼubik tu yoʼolal wíinikoʼ jach nojoch, le oʼolal tu túuxtaj u Hijo way Luʼum utiaʼal u tsʼáaj u kuxtal t-oʼolaleʼ (Juan 3:16). Letiʼeʼ tu beetaj lelaʼ tumen u kʼáat ka yanaktoʼon le kuxtal minaʼan u xuuloʼ yéetel ka pʼáatkoʼon mantatsʼ tiʼ u yaakunaj.
2 Baʼaleʼ ¿jeʼel wa u chaʼik k-pʼáatal tiʼ u yaakunaj kex jeʼel baʼalak ka k-beeteʼ? Maʼatan, tumen le versículo 21 tiʼ Judasoʼ ku yaʼalik: «Pʼáateneʼex tiʼ u yaakunaj Jajal Dios yéetel páaʼteʼex u chʼaʼa óotsilil k-Yuumtsil Jesucristo utiaʼal kuxtal minaʼan u xuul». Le ken u yaʼal «Pʼáateneʼex tiʼ u yaakunaj Jajal Dios[eʼ]» ku yeʼesikeʼ yaan baʼax kʼaʼabéet k-beetik utiaʼal ka pʼáatkoʼon tiʼ u yaakunaj. ¿Baʼax túun kʼaʼabéet k-beetik?
¿Baʼax kʼaʼabéet k-beetik utiaʼal ka pʼáatkoʼon tiʼ u yaakunaj Dios?
3. ¿Baʼax kʼaʼabéetchaj u beetik Jesús utiaʼal u pʼáatal tiʼ u yaakunaj u Taata?
3 Utiaʼal k-ilik baʼax unaj k-beetkeʼ, koʼoneʼex k-ilik baʼax tu yaʼalaj Jesús le áakʼab táanil tiʼ u kíimiloʼ. Letiʼeʼ tu yaʼalaj: «Wa ka tsʼoʼokbesikeʼex in waʼalmajtʼaanoʼobeʼ bíin pʼáatakeʼex tiʼ in yaakunaj, jeʼel bix teen kin tsʼoʼokbesik u yaʼalmajtʼaan in Taataeʼ yéetel pʼaatlen tiʼ u yaakunaj» (Juan 15:10). Jesuseʼ u yojeleʼ utiaʼal ka pʼáatak tiʼ u yaakunaj u Taataeʼ, unaj u yuʼubik u tʼaan. Wa letiʼ kex minaʼan u kʼeban kʼaʼabéetchaj u beetik beyoʼ, toʼoneʼ maas unaj k-uʼuyik u tʼaan Jéeoba.
4, 5. 1) ¿Bix jeʼel k-eʼesik tiʼ Jéeoba k-yaabilmeʼ? 2) ¿Baʼaxten maʼ unaj k-tuklik maʼ tu páajtal k-beetik baʼax ku yaʼalik Diosiʼ?
4 Le bix maas maʼalob jeʼel k-eʼesik tiʼ Dios k-yaabiltmoʼ letiʼe ka k-beet baʼax ku yaʼalikoʼ. Apóstol Juaneʼ ku yaʼalik: «Tumen u yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob; yéetel u yaʼalmajtʼaanoʼobeʼ maʼ talamoʼobiʼ» (1 Juan 5:3). U jaajileʼ, maʼ tuláakal máak utstutʼaan u beetik baʼax ku yaʼalaʼaltiʼiʼ. Baʼaleʼ, le tekstooʼ ku yaʼalikeʼ u yaʼalmajtʼaanoʼob Dioseʼ «maʼ talamoʼobiʼ». Jach beyoʼ, Jéeobaeʼ mix utéen ku kʼáatiktoʼon wa baʼax u yojel maʼ tu páajtal k-beetik.
5 Tuukulnakoʼon tiʼ lelaʼ: ¿jeʼel wa a waʼalik tiʼ utúul a amigo ka u kuch upʼéel baʼal a wojel maʼ tu páajtal u kuchikeʼ? ¿Máasaʼ maʼatan? Jéeobaeʼ maʼatech xan u beetiktoʼon beyoʼ, tumen letiʼeʼ jach uts yéetel u kʼaj óol baʼax jeʼel u páajtal k-beetkeʼ yéetel baʼax maʼ. Le Bibliaoʼ ku yaʼalikeʼ Jéeobaeʼ jach «maʼalob u yojelil, toʼoneʼ maʼay luʼumoʼon» (Sal. 103:14). Letiʼeʼ mix bikʼin jeʼel u yaʼaliktoʼon ka k-beet upʼéel baʼax u yojel jach talam k-tiaʼaleʼ. Le oʼolaleʼ, maʼ unaj k-tuklik wa maʼ tu béeytal k-tsʼoʼokbesik baʼaxoʼob ku yaʼalikiʼ. Baʼaxeʼ, unaj k-ilik k-beetik baʼax ku yaʼalik Dios utiaʼal k-eʼesiktiʼ k-yaabiltmaj yéetel utiaʼal ka pʼáatkoʼon tiʼ u yaakunaj.
Upʼéel baʼax jach maʼalob u tsʼaamajtoʼon Jéeoba
6, 7. 1) ¿Baʼax le concienciaoʼ? 2) Aʼal upʼéel kettʼaan ku yeʼesik bix u yáantkoʼon le conciencia utiaʼal ka pʼáatkoʼon tiʼ u yaakunaj Diosoʼ.
6 Teʼ kʼasaʼan yóokʼol kaab tuʼux kuxaʼanoʼonaʼ ku kʼaʼabéettal k-chʼaʼatuklik baʼaxoʼob ken k-beete. ¿Bix jeʼel k-ilik wa maʼatech u bin tu contra baʼax ku yaʼalik Dios le baʼaxoʼob k-chʼaʼatuklik k-beetikoʼ? Jéeobaeʼ u tsʼaamajtoʼon upʼéel baʼax jach jeʼel u yáantkoʼon k-beet baʼax ku yaʼalikeʼ. Lelaʼ letiʼe concienciaoʼ. ¿Baʼax le concienciaoʼ? Letiʼe u páajtalil u yilik máak wa maʼalob baʼax ku beetikoʼ wa maʼatech. Lelaʼ ku yáantkoʼon k-il wa maʼalob le baʼax k-chʼaʼatuklik k-beetikoʼ, yéetel ku yáantkoʼon k-il wa maʼalob le baʼaxoʼob tsʼoʼok k-beetikoʼ (xokaʼak Romailoʼob 2:14, 15).
7 ¿Bix u yáantkoʼon le concienciaoʼ? Tuukulnakoʼon tiʼ utúul máak táan u bin u xíimbal tiʼ upʼéel desierto tuʼux minaʼan bejoʼob mix carreteraʼobiʼ. Kex beyoʼ kʼuch teʼ tuʼux ku binoʼ. ¿Bix úuchik u beetik? Meyajnajtiʼ upʼéel brújula. Le brujulaoʼ bey upʼéel relojeʼ, u púutsʼileʼ beetaʼan yéetel imán yéetel mantatsʼ ku yeʼesik tuʼux yaan xaman. Wa maʼ yoʼolal le chan nuʼukulaʼ jeʼel u saʼatal kaʼach le máakaʼ. Toʼon xaneʼ wa maʼ k-nuʼuktikba yéetel k-concienciaeʼ jeʼel k-beetik baʼaxoʼob maʼ maʼalobtakeʼ.
8, 9. 1) ¿Baʼax beetik u xuʼulul u meyaj maʼalob u conciencia máak? 2) ¿Baʼax unaj k-beetik utiaʼal maʼ u xuʼulul u nuʼuktikoʼon tubeel k-conciencia?
8 Baʼaleʼ jeʼex le brujulaoʼ, le concienciaoʼ yaan kʼiineʼ maʼ tu nuʼuktik máak tubeel. Wa le máak ku xíimbal teʼ desierto ku natsʼik upʼéel imán tu yiknal le brujulaoʼ, u púutsʼileʼ yaan u xuʼulul u yeʼesik tuʼux yaan xaman. K-conciencia xaneʼ, jeʼel u xuʼulul u meyaj tubeel wa k-bin tu paach chéen baʼaxoʼob ku tsʼíiboltik k-puksiʼikʼaleʼ. Maʼ u tuʼubultoʼoneʼ «minaʼan uláakʼ baʼal ku tuus yéetel sen [kʼasaʼan] jeʼel bix u puksiʼikʼal wíinikeʼ» (Jer. 17: 9; Pro. 4:23). Tsʼoʼoleʼ wa minaʼan upʼéel mapa tiʼ le máak ku máan teʼ desiertooʼ láayliʼ chéen kunel ka yanaktiʼ le brujulaoʼ. Toʼon xaneʼ, wa maʼ k-kaxtik le maʼalob nuʼuktaj ku tsʼáaik le Bibliaoʼ, maʼ ken u yáantoʼon xan k-conciencia (Sal. 119:105). Baʼaleʼ bejlaʼeʼ, yaʼab máakoʼobeʼ chéen ku binoʼob tu paach u tsʼíibolaloʼob, maʼatech u chʼaʼikoʼob en cuentai le baʼax ku yaʼalik Bibliaoʼ (xokaʼak Efesoiloʼob 4:17-19). Lelaʼ ku yáantkoʼon k-naʼat baʼaxten yaʼab máakoʼob kex yaan u concienciaʼobeʼ ku beetoʼob baʼaloʼob kʼaastak (1 Tim. 4:2).
9 Baʼaleʼ toʼoneʼ maʼ k-kʼáat beetba jeʼex letiʼoboʼ. Le oʼolaleʼ, utiaʼal ka páajchajak k-nuʼuktaʼal tubeel tumen k-concienciaeʼ unaj k-chaʼik u kaʼansaʼal tumen baʼax ku yaʼalik le Bibliaoʼ. Le oʼolaleʼ ken joʼopʼok k-tsʼíiboltik wa baʼaxeʼ k-chʼaʼik en cuentai baʼax ku yaʼaliktoʼon k-conciencia. Tsʼoʼoleʼ, k-ilik chʼaʼik en cuentai u conciencia u maasil sukuʼunoʼob. K-ilik maʼ k-beetik u tʼóochpajloʼob yoʼolal baʼaxoʼob k-beetik, tumen maʼ xaaneʼ maʼ tu chaʼabal u beetkoʼob wa baʼax tumen u concienciaʼob (1 Cor. 8:12; 2 Cor. 4:2; 1 Ped. 3:16).
10. ¿Baʼaxoʼob ken k-il beoraaʼ?
10 Beoraaʼ koʼoneʼex ilik óoxpʼéel bix jeʼel k-eʼesik tiʼ Jéeoba k-yaabilmaj yéetel k-uʼuyik u tʼaaneʼ: 1) k-yaabilt le máaxoʼob u yaabiltmoʼ, 2) k-uʼuy u tʼaan le máaxoʼob tsʼaʼan autoridad tiʼoboʼ, yéetel u 3) k-il maʼ k-beetik baʼax maʼ utstutʼaaniʼ. K-xakʼaltik le óoxpʼéel baʼaloʼobaʼ yaan u yáantkoʼon k-ileʼ utiaʼal ka nuʼuktaʼakoʼon maʼalob tumen k-concienciaeʼ, kʼaʼabéet xan nuʼuktaʼan tumen le baʼax ku yaʼalik le Bibliaoʼ.
Unaj k-yaabiltik le máaxoʼob yaabiltaʼanoʼob tumen Jéeobaoʼ
11. ¿Baʼaxten unaj k-yaabiltik le máaxoʼob yaabiltaʼanoʼob tumen Jéeobaoʼ?
11 Yáaxeʼ unaj k-yaabiltik le máaxoʼob yaabiltaʼanoʼob tumen Jéeobaoʼ. Jeʼel u páajtal u yaʼalaʼaleʼ, toʼoneʼ beyoʼon piitsʼeʼ, tumen jeʼex le piitsʼ séeb u tsʼuʼutsʼik jaʼoʼ, toʼoneʼ séeb k-kanik le baʼaxoʼob k-ilik u beetaʼaloʼ. Dioseʼ u yojeleʼ toʼoneʼ séeb jeʼel u káajal k-tuukul jeʼex le máaxoʼob yéetel k-bisikbaoʼ. Le oʼolal ku yaʼaliktoʼon: «Bisaba yéetel le j-ojéelaloʼoboʼ ka yanak tiʼ teech ojéelaj; bisaba yéetel [le] j-maʼ naʼatoʼoboʼ beyoʼ bíin kʼasakech» (Pro. 13:20; 1 Cor. 15:33). U jaajileʼ, tuláakloʼon k-kʼáat ka yanaktoʼon «ojéelaj», tumen maʼ k-kʼáat ka xiʼiktoʼon kʼaasiliʼ. Le oʼolaleʼ, maʼalob ka k-beet jeʼex u beetik Jéeobaeʼ. Kex letiʼ u yojel tuláakal baʼal yéetel maʼ tu páajtal u kʼaskúuntaʼal u tuukul tumen mix máakeʼ, letiʼeʼ ku yéeyik yéetel máaxoʼob ku biskuba. ¿Máaxoʼob túun ku yéeyik utiaʼal u biskuba tu yéeteloʼob?
12. ¿Máaxoʼob ku yéeyik Jéeoba utiaʼal ka u bisuba tu yéeteloʼob?
12 Kʼaʼajaktoʼoneʼ Jéeobaeʼ tu yaʼaleʼ u amigo Abraham (Isa. 41:8). Abrahameʼ utúul máak yanchaj u fe, chúukpaj u yóol u meyajt Dios yéetel tu beetaj baʼaloʼob maʼalobtak (Sant. 2:21-23). Letiʼe máakoʼob bey ku kaxtik Jéeoba utiaʼal u biskuba tu yéeteloʼoboʼ. Wa letiʼ jach ku yéeyik máax yéetel ku biskubaeʼ, ¿maʼ wa maas bey unaj k-beetik toʼoniʼ? Lelaʼ ku yeʼesiktoʼoneʼ unaj k-bisikba yéetel máaxoʼob beetik baʼax maʼalob utiaʼal ka k-beet jeʼex letiʼoboʼ.
13. ¿Baʼax jeʼel u yáantkoʼon k-yéey tubeel yéetel máaxoʼob ken k-bisbaeʼ?
13 ¿Baʼax jeʼel u yáantkoʼon utiaʼal ka k-yéey tubeel yéetel máaxoʼob ken k-bisbaeʼ? Upʼéel baʼax jeʼel u yáantkoʼoneʼ letiʼe ka k-il baʼax tu beetaj jujuntúul máaxoʼob meyajt Dios úuchiloʼ. Tuukulnakoʼon tiʼ bix úuchik u biskuba Rut yéetel Noemí, u suegra; bix úuchik u biskuba David yéetel Jonatán, wa bix úuchik u biskuba Timoteo yéetel Pablo (Rut 1:16, 17; 1 Sam. 23:16-18; Fili. 2:19-22). Letiʼobeʼ jach maʼalob úuchik u biskubaʼob tumen u paklan yaabiltmoʼob Jéeoba. Toʼoneʼ ¿jach wa k-yaabiltmaj xan Jéeoba? ¿K-kaxtik wa k-amigoʼob jach u yaabiltmoʼob Jéeoba jeʼex k-yaabiltmil toʼoneʼ? Teʼ múuchʼuliloʼ jeʼel k-kaxtik yaʼab amigoʼob beyoʼ. Letiʼobeʼ maʼ ken u beetoʼob k-náachtal tiʼ Dios, baʼaxeʼ jeʼel u yáantkoʼonoʼob utiaʼal ka k-beet baʼax ku yaʼalik Jéeobaeʼ yéetel utiaʼal ka k-maas tsʼáa k-óol meyajte (xokaʼak Galaciailoʼob 6:7, 8). Chéen bey jeʼel k-pʼáatal tiʼ u yaakunaj Jajal Diosoʼ.
Unaj k-uʼuyik u tʼaan le máaxoʼob tsʼaʼan autoridad tiʼoboʼ
14. ¿Baʼaxten ku talamtaltoʼon k-uʼuyik u tʼaan le máaxoʼob tsʼaʼan autoridad tiʼoboʼ?
14 Le u kaʼapʼéel bix jeʼel k-eʼesik k-yaabiltmaj Jéeobaeʼ letiʼe ka k-uʼuy u tʼaan le máaxoʼob tsʼaʼantiʼob autoridadoʼ. Baʼaleʼ, yaan kʼiineʼ maʼ chéen chʼaʼabil u beetaʼaliʼ. ¿Baʼaxten? Yáaxeʼ tumen le máaxoʼob tsʼaʼan autoridad tiʼoboʼ kʼebanoʼob. U kaʼapʼéeleʼ, toʼoneʼ kʼebanoʼon xan, le oʼolal ku talamtaltoʼon k-uʼuyik tʼaan.
15, 16. 1) ¿Baʼaxten unaj u yuʼubaʼal u tʼaan le máaxoʼob tsʼaʼanoʼob tumen Jéeoba utiaʼal u kanáantoʼob u kaajaloʼ? 2) ¿Baʼax k-kanik tiʼ le úuchik u bin le israelitaʼob tu contra Moisesoʼ?
15 Le oʼolal maʼ xaaneʼ, yaan máaxeʼ jeʼel u yaʼalikeʼ: «Wa jach talam u yuʼubik tʼaan máakeʼ, ¿baʼaxten túun unaj u beetaʼal?». Tumen u yuʼubaʼal tʼaaneʼ yaan u yil yéetel u tsʼáaikuba máak yáanal u gobernación Dios. Wa ku yéeyik máak u tsʼáaikuba yáanal u gobernación Jéeobaeʼ yaan xan u beetik baʼaxoʼob ku yaʼalik. Wa maʼeʼ, maʼ tu páajtal u yaʼalik máak wa letiʼ le Rey nuʼuktikoʼ. Tsʼoʼoleʼ, Jéeobaeʼ ku yéeyik kʼeban wíinikoʼob utiaʼal u kanáantik u kaajal. Le oʼolaleʼ, ¿bix jeʼel u yilik Jéeoba wa maʼatech k-chaʼik u nuʼuktikoʼonoʼobeʼ? (Xokaʼak 1 Tesalonicailoʼob 5:12, 13).
16 Jeʼex le ka joʼopʼ u tʼaan le israelitaʼob tu contra Moisés yéetel ka pʼáat maʼatech u tsʼáaikubaʼob yáanal u nuʼuktajoʼ, Jéeobaeʼ tu yilaj bey letiʼ maʼatech u yuʼubaʼal u tʼaaneʼ (Núm. 14: 26, 27). Dioseʼ maʼ kʼexpajkiʼ. Wa maʼ k-tsʼáaikba yáanal u nuʼuktaj le máaxoʼob u tsʼaamaj autoridad tiʼoboʼ, u kʼáat u yaʼaleʼ letiʼ maʼatech k-uʼuyik u tʼaan.
17. ¿Baʼax tuukulil unaj u yantaltoʼon yoʼolal le máaxoʼob tsʼaʼan autoridad tiʼob teʼ múuchʼuliloʼ?
17 Apóstol Pabloeʼ ku yaʼalik baʼax tuukulil unaj u yantaltoʼon yoʼolal le máaxoʼob tsʼaʼan autoridad tiʼob teʼ múuchʼuliloʼ. Letiʼeʼ ku yaʼalik: «Uʼuyeʼex u tʼaan le máaxoʼob nuʼuktikteʼex le bejoʼ yéetel aneneʼex yáanal u páajtaliloʼob; tumen letiʼob máaxoʼob kanáantik a [kuxtaleʼex], tumen a wojeleʼexeʼ letiʼobeʼ yaan u yaʼalikoʼob tiʼ Jajal Dios baʼax meyajiloʼob tu beetajoʼob. Ilawileʼex ka páatak u beetikoʼob le meyajoʼ yéetel kiʼimak óolal maʼ yéetel yaayaj óolaliʼ, tumen lelaʼ mix jumpʼéel uts jeʼel u taasikteʼexeʼ» (Heb. 13:17). U jaajileʼ yaan kʼiineʼ maʼ chéen chʼaʼabil u yuʼubik tʼaan máakiʼ. Baʼaleʼ maʼ unaj u tuʼubultoʼoneʼ chéen bey jeʼel k-pʼáatal tiʼ u yaakunaj Jajal Diosoʼ. Le oʼolaleʼ, ¿máasaʼ jach maʼalob ka k-il k-beetik?
Unaj k-ilik maʼ k-beetik baʼax maʼ utstutʼaan Jéeobaiʼ
18. ¿Baʼaxten u kʼáat Jéeoba ka pʼáatak limpioi máaxoʼob meyajtik?
18 Le u yóoxpʼéel bix k-eʼesik k-yaabiltmaj Diosoʼ letiʼe k-ilik maʼ k-beetik baʼax maʼ utstutʼaanoʼ. U suukaʼanileʼ, le taatatsiloʼoboʼ ku yilkoʼob ka pʼáatak limpioi u mejen paalaloʼob. ¿Baʼaxten? Yáaxeʼ, tumen u yojloʼob beyoʼ maʼ kun jach kʼojaʼantaloʼob. U kaʼapʼéeleʼ, u yojloʼob ken ilaʼak limpio u mejen paalaloʼobeʼ, ku yúuchul tʼaan maʼalob tu yoʼolaloʼob yéetel ku yaʼalaʼal jach u yaabiltmoʼob yéetel ku kanáantikoʼob. Lelaʼ letiʼe baʼax oʼolal ku yaʼalik xan Jéeoba ka pʼáatkoʼon limpioi tu táanoʼ. Jéeoba, k-Taata yaan teʼ kaʼanoʼ u yojel wa k-pʼáatal limpioileʼ maʼ ken k-jach kʼojaʼantal yéetel jeʼel u yúuchul tʼaan maʼalob tu yoʼolaleʼ. Lelaʼ upʼéel baʼal jach kʼaʼabéet k-ilik beetik, tumen yaʼab máakoʼobeʼ jeʼel u taaktal u natsʼkubaʼob tiʼ Dios ken u yiloʼob maʼ beyoʼon jeʼex u máakiloʼob le kʼasaʼan yóokʼol kaabaʼ.
19. ¿Baʼaxten jach kʼaʼabéet k-ilik k-pʼáatal limpioi?
19 Toʼoneʼ unaj k-bisik upʼéel kuxtal limpio tu táan Jéeoba. Letiʼeʼ tu yaʼalaj tiʼ le israelitaʼob ka u yil u pʼáatloʼob limpioiloʼ (Lev. 15:31). Le Ley tu tsʼáajtiʼoboʼ ku yeʼesik unaj u mukikoʼob u baʼalil u choocheloʼob, u limpiokíintik u nuʼukuloʼob, u pʼoʼik u kʼaboʼob, u yookoʼob bey xan u nookʼoʼob (Éxo. 30:17-21; Lev. 11:32; Núm. 19:17-20; Deu. 23:13, 14). Le leyoʼobaʼ tu kʼaʼajsaj tiʼ u kaajil Israeleʼ Jéeobaeʼ utúul Dios limpio yéetel kiliʼich. Le máaxoʼob meyajtik le Dios limpiooʼ unaj xan u pʼáatloʼob limpioi (xokaʼak Levítico 11:44, 45).
20. ¿Tiʼ baʼaxoʼob unaj k-ilik k-pʼáatal limpioi?
20 Baʼaleʼ maʼ chéen yaan yéetel ka k-limpiokíint k-wíinkliliʼ; kʼaʼabéet xan k-pʼatik limpioi k-tuukul yéetel k-puksiʼikʼal. Le oʼolaleʼ, kex u máakiloʼob le yóokʼol kaab ku tuukuloʼob chéen tiʼ baʼaloʼob kʼaastak yéetel subtsiltakeʼ, toʼoneʼ k-ilik k-tuukul jeʼex Jéeobaeʼ. K-ilik xan k-adorartik jeʼex utstutʼaaneʼ yéetel maʼatech k-táakpajal tiʼ le baʼaxoʼob ku beetik le religionoʼob maʼatech u kaʼansikoʼob u jaajiloʼ. Maʼatech u tuʼubultoʼon le baʼax ku yaʼalik Isaías 52:11: «¡Jóokʼeneʼex tu luʼumil Babilonia, maʼ a machikeʼex mix baʼal [sucioiʼ]». Ken k-il maʼ k-táakpajal tiʼ le baʼaloʼob ku beetik le religionoʼob maʼatech u kaʼansikoʼob u jaajiloʼ, k-pʼáatal limpioi tu táan Jéeoba. Le oʼolaleʼ maʼatech k-táakpajal tiʼ le kʼiimbesajoʼob ku beetikoʼoboʼ. U jaajileʼ maʼ chéen chʼaʼabil u pʼáatal limpioi máakiʼ, baʼaleʼ wa k-tsʼáaik k-óol k-beeteʼ yaan k-pʼáatal tiʼ u yaakunaj Jajal Dios.
21. ¿Baʼax unaj k-beetik utiaʼal ka pʼáatkoʼon tiʼ u yaakunaj Dios?
21 Jéeobaeʼ u kʼáat ka pʼáatkoʼon tiʼ u yaakunaj utiaʼal mantatsʼ. Le oʼolal cada utúul tiʼ toʼoneʼ unaj u tsʼáaik u yóol utiaʼal u beetik. Jeʼex tsʼoʼok k-ilkoʼ unaj k-beetik jeʼex tu beetil Jesuseʼ; unaj k-beetik baʼax ku yaʼalik Dios utiaʼal k-eʼesik k-yaabiltmaj. Beyoʼ mix baʼal kun páajtal u tselikoʼon tiʼ u yaakunaj Dios le «tu yeʼesajtoʼon tiʼ Cristo Jesús[oʼ]» (Rom. 8:38, 39).
¿Kʼajaʼan wa tech?
• ¿Bix u yáantkoʼon k-conciencia utiaʼal ka pʼáatkoʼon tiʼ u yaakunaj Dios?
• ¿Baʼaxten unaj k-yaabiltik le máaxoʼob yaabiltaʼanoʼob tumen Diosoʼ?
• ¿Baʼaxten unaj k-tsʼáaikba yáanal u nuʼuktaj le máaxoʼob tsʼaʼan autoridad tiʼoboʼ?
• ¿Baʼaxten le máaxoʼob meyajtik Diosoʼ jach ku yilik u pʼáatloʼob limpioi?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
«Wa ka tsʼoʼokbesikeʼex in waʼalmajtʼaanoʼobeʼ bíin pʼáatakeʼex tiʼ in yaakunaj, jeʼel bix teen kin tsʼoʼokbesik u yaʼalmajtʼaan in Taataeʼ yéetel pʼaatlen tiʼ u yaakunaj»
[U tsolajil le oochel teʼ táan juʼun 20]
UPʼÉEL LIBRO KU YÁANTIK MÁAK U BIS UPʼÉEL TOJ KUXTAL
Teʼ asambleaʼob tiʼ distrito 2008-2009 tʼoxaʼab le libro «Pʼáateneʼex tiʼ u yaakunaj Jajal Dios», le libroaʼ yaan 224 u táan juʼuniloʼob. ¿Baʼax oʼolal jóoʼsaʼab le túumben libroaʼ? Utiaʼal u yáant le máaxoʼob meyajtik Dios u maas kʼaj óoltoʼob baʼaxoʼob ku yaʼalikoʼ yéetel ka u maas tsʼaʼob ichil u kuxtaloʼob. Wa k-xakʼalxoktik le libroaʼ, yaan k-ilkeʼ baʼax maas maʼalob ka k-beeteʼ letiʼe ka k-tsʼáa ichil k-kuxtal le baʼax ku yaʼalik Jéeobaoʼ, lelaʼ le kun biskoʼon tiʼ le kuxtal minaʼan u xuuloʼ.
Le libroaʼ yaan u yáantkoʼon xan k-ileʼ u beetaʼal baʼax ku yaʼalik Jéeobaeʼ maʼ talmiʼ, baʼaxeʼ upʼéel bix k-eʼesik k-yaabiltmaj. Ken k-xokeʼ unaj k-tuklik: «¿Baʼaxten táan in meyajtik Jéeoba?».
Baʼaleʼ yaan máaxoʼob meyajtik kaʼach Dioseʼ tsʼoʼok u náachtaloʼob tiʼ yéetel tiʼ u yaabilaj. ¿Baʼaxten? Maʼ tumen wa maʼ tu naʼatoʼob le baʼaxoʼob ku kaʼansik le Bibliaoʼ, baʼaxeʼ tumen lúuboʼob tiʼ kʼeban. Le oʼolaleʼ, unaj k-ilik k-maas yaabiltik baʼaxoʼob ku yaʼalik Jéeoba yéetel k-chaʼik u nuʼuktikoʼon sáamsamal. Le túumben libroaʼ yaan u yáantik le máaxoʼob meyajtik Jéeoba tiʼ tuláakal yóokʼol kaab utiaʼal ka u yeʼesoʼob ku taasik utsil u beetik máak le baʼaxoʼob ku yaʼalikoʼ, yaan u yáantkoʼob xan u yeʼesoʼobeʼ Satanaseʼ chéen táan u tuus yéetel yaan u yáantkoʼob utiaʼal ka pʼáatkoʼob tiʼ u yaakunaj Dios (Jud. 21).