Upʼéel baʼax eʼesik máaxoʼob jach tu jaajil u disipuloʼob Cristo

U síijil tu puksiʼikʼal máak u kʼamik maʼalob u yuʼulabeʼ upʼéel baʼax eʼesik jach máax u disipuloʼob Cristo. Ka tsʼoʼok u tsʼaʼabal le kiliʼich muukʼ tu kʼiinil le Pentecostés tiʼ u jaʼabil 33 tiʼ le yáax siglooʼ, yaʼab tiʼ le máaxoʼob kʼam u kaʼansajoʼob Cristooʼ, pʼáatoʼob Jerusalén utiaʼal ka maas kaʼansaʼaktiʼob u maʼalob péektsilil le Reinooʼ. Le cristianoʼob kajaʼanoʼob kaʼach Jerusalenoʼ tu kʼamoʼob yéetel utsil tu yotochoʼob, tu koʼonoʼob tak baʼaxoʼob yantiʼob yéetel tu tʼoxoʼob u taakʼinil jeʼel bix kʼaʼabéet tiʼ cada juntúuleʼ (Hch. 2:42-46). Ka máan kʼiineʼ, le apostoloʼoboʼ tu kaxtoʼob máakoʼob noʼojaʼanoʼob utiaʼal ka u tʼoxoʼob baʼal u jaant le koʼoleloʼob kimen u yíichamoʼob kʼaʼabéet u yáantaʼaloʼoboʼ (Hch. 6:1-6).

Le máaxoʼob meyajtik Dios úuchjeakiloʼ unaj u kʼamikoʼob maʼalob u yuʼulaboʼob. Kex tsʼoʼok u sen chʼaʼapachtaʼaloʼob yéetel tsʼoʼok u lúuʼsaʼal baʼaxoʼob yantiʼobeʼ, Pabloeʼ tu yaʼalajtiʼob: «Maʼ u tuʼubul teʼex a kʼamikeʼex maʼalob le máaxoʼob ku kʼuchuloʼob ta wotocheʼexoʼ» (Heb. 13:2; 10:34). Pedroeʼ tu yeʼesaj unaj u beetkoʼob yéetel kiʼimak óolal, le ka tu yaʼalaj: «Kʼamabaʼex ta baatsileʼex ta wotocheʼex x-maʼ kʼuuxilil» (1 Ped. 4:9; ketaʼak yéetel 2 Cor. 9:7). Pabloeʼ tu yaʼaleʼ maases le máaxoʼob meyajtik Diosoʼ unaj u kʼamkoʼob maʼalob tu yotochoʼob u yéet sukuʼuniloʼob, letiʼeʼ tu yaʼalajtiʼob: «Unaj k-beetik uts tiʼ tuláakal, yáax táanileʼ tiʼ le sukuʼunoʼob[oʼ]» (Gal. 6:10).

U kʼamik máak tubeel u yuʼulabeʼ upʼéel tiʼ le baʼaxoʼob unaj u beetik le sukuʼunoʼob u kʼáatoʼob ka tsʼaʼabak u beet u ancianoiloʼob teʼ múuchʼuliloʼ (1 Tim. 3:2; Tito 1:7, 8). Pabloeʼ tu yaʼalaj xan tiʼ Timoteoeʼ unaj u yáantaʼal le koʼoleloʼob kimen u yíichamoʼob «tu utsil [kʼamoʼob] le máaxoʼob ku kʼuchuloʼob tu taanaj[oʼoboʼ]» (1 Tim. 5:9, 10).