¿K-tsʼáaik wa u nib óolalil tiʼ Jéeoba úuchik u salvarkoʼon?
¿K-tsʼáaik wa u nib óolalil tiʼ Jéeoba úuchik u salvarkoʼon?
«Kiʼikiʼtʼantaʼak Yuumtsil u Jajal Dios Israel, tumen [...] tsʼoʼok u [salvarkoʼon].» (LUC. 1:68)
1, 2. 1) ¿Yéetel baʼax jeʼel u páajtal u keʼetel le bix yantoʼonoʼ? 2) ¿Baʼax kʼáatchiʼiloʼob ken k-núuk teʼ xookaʼ?
KOʼOX aʼalikeʼ tiaʼanech tiʼ upʼéel hospitaleʼ. Tuláakal le máaxoʼob yanoʼob teʼ tuʼux yanechoʼ, láayliʼ letiʼe kʼojaʼanil yantech paakʼal tiʼoboʼ, upʼéel kʼojaʼanil minaʼan u tsʼaak. Baʼaleʼ ka wojéeltikeʼ utúul doctoreʼ táan u kaxtik u tsʼaak le kʼojaʼanil yantechoʼ. ¿Máasaʼ jach yaan a tsʼíiboltik ka u séeb kaxte? Ken tsʼoʼokok u sen meyaj túuneʼ, le doctoroʼ ku kaxtik baʼax jeʼel u tsʼakikecheʼ. ¿Bix jeʼel a wuʼuyikaba ken a wojéelte? ¿Máasaʼ jach yaan a tsʼáaik u diosboʼotikil tiʼ tumen páajchaj u salvartik a kuxtal bey xan u kuxtal uláakʼ máakoʼoboʼ?
2 Lelaʼ upʼéel baʼal jach yaj, baʼaleʼ u jaajileʼ le bix yaniloʼonoʼ maas yaj, le oʼolal kʼaʼabéet utúul máax jeʼel u páajtal u salvarkoʼoneʼ (xokaʼak Romailoʼob 7:24). Le máax jeʼel u páajtal u salvarkoʼonoʼ Jéeoba yéetel Jesús, u Hijo, letiʼobeʼ yaʼab baʼaxoʼob tsʼoʼok u beetkoʼob utiaʼal u salvarkoʼonoʼob. Teʼ xookaʼ yaan k-ilik u núukil le kampʼéel kʼáatchiʼobaʼ: ¿Baʼaxten kʼaʼabéet k-salvartaʼal? ¿Baʼax yanchaj u beetik Jesús utiaʼal ka páajchajak u salvarkoʼon? ¿Baʼax yanchaj u beetik Jéeoba? ¿Yéetel bix jeʼel k-tsʼáaik u nib óolalil tiʼob yoʼolal le baʼaxoʼob tu beetoʼob utiaʼal u salvarkoʼonoʼob?
¿Baʼaxten kʼaʼabéet k-salvartaʼal?
3. ¿Baʼaxten k-aʼalik le kʼebanoʼ bey upʼéel kʼaakʼas kʼojaʼanileʼ?
3 Maʼ sen úucheʼ aʼalaʼabeʼ le seʼen kʼaj óoltaʼab gripe española, yanchaj tu jaʼabil 1918 yéetel tu kíimsaj u millonesi máakoʼoboʼ, upʼéel epidemia, tumen jach pakʼbeʼen. Baʼaleʼ yaan uláakʼ kʼojaʼaniloʼobeʼ maʼ jach pakʼbeʼenoʼobiʼ, baʼaleʼ óoliʼ tuláakal le máaxoʼob ku tsaʼayaltiʼoboʼ ku kíimloʼob. * Jeʼel u páajtal k-aʼalikeʼ le kʼebanoʼ bey jeʼex le kʼaakʼas kʼojaʼaniloʼob beyaʼ. Romailoʼob 5:12 ku yaʼalik: «Tu yoʼolal juntúuliliʼ máak ook le kʼeban tiʼ le yóokʼol kaabaʼ ka tu taasaj yéeteleʼ le kíimiloʼ, bey xan máanik xan le kíimiloʼ tiʼ tuláakal máakoʼob tumen tuláakal kʼebanchajoʼob». Jeʼel u páajtal u yaʼalaʼaleʼ le kʼaakʼas kʼojaʼanil wa le kʼebanoʼ, tiʼ tuláakal máak paakʼal (xokaʼak Romailoʼob 3:23). ¿Kex jaytúul máakoʼob túun ku beetik u kíimil? Pabloeʼ tu yaʼaleʼ ku beetik u kíimil «tuláakal máak».
4. ¿Bix u yilik le máakoʼob le kíimiloʼ, baʼaleʼ bix u yilaʼal tumen Jéeoba?
4 Bejlaʼeʼ tsʼoʼok u pʼáatal maʼ jach jelaʼan u yilaʼal u kíimil máakiʼ. U jaajileʼ yaʼab máakeʼ jach ku yaatal tu yóol ken kíimik utúul máax táankelem, baʼaleʼ ken kíimik utúul máax chʼijaʼaneʼ ku tuklikoʼobeʼ upʼéel baʼal suukaʼan u yúuchul. Maʼ u yojloʼob baʼax ku tuklik Dios yoʼolal le kíimiloʼ. U jaajileʼ le jaypʼéel jaʼaboʼob ku kuxtal máak bejlaʼoʼ maʼ letiʼe bukaʼaj u tukulmaj Dios kaʼachoʼ. Tu táan letiʼeʼ mix máak kuxlak maas tiʼ upʼéel kʼiin (2 Ped. 3:8). Le oʼolal le Bibliaoʼ ku yaʼalikeʼ u kuxtal wíinikeʼ jach kóom, jeʼex kóomil u kuxtal upʼéel chan looleʼ wa jeʼex u xáantal u múus ikʼ máakeʼ (Sal. 39:5; 1 Ped. 1:24). ¿Baʼaxten maʼ unaj u tuʼubultoʼon lelaʼ? Tumen ken kʼuchkoʼon k-naʼat jach yaj yanikoʼon yoʼolal le «kʼojaʼanil» yantoʼon (wa le kʼebanoʼ), yaan k-maas tsʼáaik nib óolal tiʼ Jéeoba yoʼolal le «tsʼaak» tsʼoʼok tu tsʼáaj utiaʼal u tsʼakikoʼon wa u salvartik k-kuxtaloʼ.
5. ¿Baʼax t-peʼertaj tu yoʼolal le kʼebanoʼ?
5 Utiaʼal k-naʼatik tubeel jach maʼ maʼalob yaniloʼoneʼ, tuukulnakoʼon tiʼ le baʼaxoʼob t-peʼertaj yoʼolal le kʼebanoʼ. Lelaʼ upʼéel baʼal chan talam k-naʼatik, tumen le baʼax tu luʼsajtoʼon le kʼebanoʼ chéen tiʼ k-yáax taataʼob anchaji. ¿Tiʼ baʼax táan k-tʼaan? Le ka beetaʼab Adán yéetel Evaeʼ tsʼaʼabtiʼob upʼéel jach maʼalob tuukul yéetel upʼéel jach maʼalob wíinklil, minaʼan u kʼebanoʼob kaʼachi. Le oʼolaleʼ jeʼel u páajtal kaʼach u controlartik u tuukuloʼob bey xan baʼaxoʼob ku beetikoʼobeʼ, bey túunoʼ cada kʼiin ku máaneʼ yaan kaʼach u maas maʼalobtal bix u meyajtkoʼob Dios bey xan baʼaxoʼob ku beetkoʼob. Baʼaleʼ letiʼobeʼ tu sutaj u paachoʼob tiʼ le baʼaloʼobaʼ. Ka tu beetoʼob baʼax maʼ utstutʼaan Jéeobaeʼ maʼ chéen letiʼob peʼert le jatsʼuts kuxtaloʼ, tak u paalaloʼob (Gén. 3:16-19). Tsʼoʼoleʼ tsaʼaytiʼob le kʼaakʼas kʼojaʼanil tsʼoʼok k-aʼalikoʼ, yéetel tu pakʼoʼob xan tiʼ u paalaloʼob. Bey túunoʼ Jéeobaeʼ tu yaʼalaj yaan u kíimloʼob, baʼaleʼ tiʼ toʼoneʼ tsʼoʼok u tsʼáaik u páajtal k-salvartik k-kuxtal (Sal. 103:10).
Le bajux yanchaj u boʼotik Jesusoʼ
6, 7. 1) ¿Baʼax kʼiin ka yáax tʼaanaj Jéeoba tiʼ bix ken u boʼotil k-jáalkʼabtaʼal tiʼ le kʼeban yéetel tiʼ le kíimiloʼ? 2) ¿Baʼax k-kanik tiʼ le kíimsbil baʼalcheʼob tu kʼubaj Abel bey xan le tu kʼubaj uláakʼ máakoʼob meyajt Dios úuchjeakiloʼ?
6 Jéeobaeʼ u yojel jach koʼoj ken u tojolt u boʼotik u jáalkʼabtaʼal u paalal Adán yéetel Eva. U profecíai Génesis 3:15 ku yáantkoʼon k-il baʼax ken u tsʼáa utiaʼal u boʼotik. Jéeobaeʼ yaan u tsʼáaik upʼéel «chʼiʼibal» wa utúul máax kun tsʼáaik jáalkʼabil yéetel yaan u xuʼulsik tiʼ Satanás. Baʼaleʼ táanileʼ letiʼeʼ yaan u muʼyaj tumen yaan u chiʼibil tu tuunkuy. ¿Baʼax u kʼáat u yaʼal le u chiʼibil tu tuunkuyoʼ? ¿Baʼax ken u muʼyajt le Máax kun yéeybil tumen Jéeobaoʼ?
7 Utiaʼal u salvarkoʼoneʼ, le Máax kun jáalkʼabtikoʼonoʼ yaan baʼax unaj u beetik utiaʼal ka páajchajak u perdonartaʼal k-kʼebanoʼob, utiaʼal ka luʼsaʼak t-wíinklil yéetel utiaʼal ka béeyak k-maas natsʼikba tiʼ Dios. ¿Baʼax túun unaj u beetik? Desde tu káajbaleʼ yaan baʼaxoʼob eʼes unaj u kʼubik u kuxtal. Ka kʼuʼub tumen Abel kíimsbil baʼalcheʼob tiʼ Dioseʼ kʼaʼam tiʼ. Dios xaneʼ tu kʼamaj le kíimsbil baʼalcheʼob tu kʼubaj Noé, Abraham, Jacob, Job yéetel uláakʼ máakoʼob tu meyajtoʼob yéetel chúukaʼan óolaloʼ (Gén. 4:4; 8:20, 21; 22:13; 31:54; Job 1:5). Teʼ Ley tsʼaʼab tiʼ Moisesoʼ ku maas tsolaʼal baʼax u beelal le kíimsbil baʼalcheʼob ku kʼubaʼal kaʼach tiʼ Diosoʼ.
8. ¿Baʼax ku beetik u nojchil le j-kʼiinoʼob tu kʼiinil le Saʼasaj Siʼipiloʼ?
8 Upʼéel tiʼ le siibaloʼob ku yaʼalik le Ley ka beetaʼakoʼ letiʼe ku kʼuʼubul tu kʼiinil le Saʼasaj Siʼipiloʼ. Lelaʼ upʼéel kʼiimbesaj ku beetaʼal kaʼach cada jaʼab, teʼ kʼiin jeʼeloʼ u nojchil le j-kʼiinoʼoboʼ ku kʼubik jejeláas siibaloʼob. Táanileʼ ku kʼubik siibaloʼob utiaʼal u saʼasaʼal u siʼipil le j-kʼiinoʼoboʼ, tsʼoʼoleʼ ku kʼubik uláakʼ siibal utiaʼal u saʼasaʼal u siʼipil u maasil israelitaʼoboʼ. Tu tsʼookeʼ ku yokol ichil le tabernáculo teʼ chan cuarto ku kʼaabaʼtik Jach Kiliʼich Kúuchiloʼ. Chéen letiʼ ku páajtal kaʼach u yokol teʼ chan cuarto jeʼeloʼ yéetel chéen teʼ kʼiin unaj u yokol ichiloʼ. Ken okok ichileʼ ku chʼajik tu táan u arcai le núuptʼaan u kʼiʼikʼel le baʼalcheʼob tsʼoʼok u kʼuʼubloʼob tiʼ Jéeobaoʼ. Yaan kʼiineʼ ku chíikpajal upʼéel sak múuyal yóokʼol le arca utiaʼal u yeʼesik tiʼ yaan Jéeobaoʼ (Éxo. 25:22; Lev. 16:1-30).
9. 1) Tu kʼiinil le Saʼasaj Siʼipiloʼ, ¿máax ku chíikbesik u nojchil le j-kʼiinoʼoboʼ, yéetel baʼax ku chíikbesik le kíimsbil baʼalcheʼob ku kʼuʼubloʼoboʼ? 2) ¿Baʼax ku chíikbesik le u yokol kaʼach u nojchil le j-kʼiinoʼob teʼ Jach Kiliʼich Kúuchiloʼ?
9 Apóstol Pabloeʼ tu tsolaj baʼax u kʼáat u yaʼal tuláakal le baʼaxoʼob ku beetaʼal teʼ kʼiin jeʼeloʼ. Tu yeʼesajeʼ u nojchil le j-kʼiinoʼoboʼ ku chíikbesik Jesucristo, le Mesíasoʼ, yéetel le siibaloʼob ku kʼubaʼal kaʼachoʼ ku chíikbesik u kuxtal tu kʼuboʼ (Heb. 9:11-14). Tu yoʼolal le u kuxtal tu kʼuboʼ yaan u perdonartaʼal u kʼeban kaʼa jaats máakoʼob, yáaxeʼ le 144,000 ken u beet u j-kʼiiniloʼoboʼ, yéetel uláakʼ u jaatsʼoʼ letiʼe «uláakʼ tamanoʼob[oʼ]» (Juan 10:16). Le u yokol le u nojchil le j-kʼiinoʼob ichil le Jach Kiliʼich Kúuchiloʼ ku chíikbesik le úuchik u yokol Jesús tu táan Jéeoba teʼ kaʼan utiaʼal u kʼub u tojol u kuxtaloʼ (Heb. 9:24, 25).
10. Jeʼex u yeʼesik le profecíaʼoboʼ, ¿baʼax kun úuchul tiʼ le Mesíasoʼ?
10 Jeʼex túun k-ilkoʼ, u tojol utiaʼal u jáalkʼabtaʼal u paaloʼob Adán yéetel Evaeʼ jach koʼoj, le Mesíasoʼ unaj u kʼubik u kuxtal tu yoʼolaloʼob. Le profetaʼob ku chʼaʼachiʼitaʼaloʼob ichil le Kiliʼich Tsʼíiboʼob ich Hebreooʼ tʼaanajoʼob tiʼ le baʼax kun úuchul tiʼ le Mesíasoʼ. Jeʼex Danieleʼ tu yaʼaleʼ le Máax «jumpáaykuntaʼanoʼ» «bíin lukʼesaʼak u kuxtal» utiaʼal u tsʼaʼabal «saʼatsaj siʼipil» (Dan. 9:24-26). Isaías xaneʼ tu yaʼaleʼ le Mesíasoʼ maʼ kun kʼambil, yaan u kíimsaʼal yéetel yaan u kuchik u bis u kʼeban tuláakal máak (Isa. 53:4, 5, 7).
11. ¿Bix úuchik u yeʼesik Jesús u kʼáat u kʼub u kuxtal t-oʼolal?
11 Táanil tiʼ u taal way Luʼumeʼ, Jesuseʼ u yojel yaan u sen muʼyaj yéetel yaan u kíimsaʼal utiaʼal u jáalkʼabtikoʼon tiʼ le kʼeban yéetel tiʼ le kíimiloʼ. ¿Kʼuuxilnaj wa le ka tsʼaʼab u yojéelt tumen u Taata le baʼax kun úuchultiʼoʼ, wa sajakchaji? Maʼatech. Baʼaxeʼ yéetel kiʼimak óolal tu beetaj le baʼax aʼalaʼabtiʼoʼ (Isa. 50:4-6). Ka taal way Luʼumeʼ, tu beetaj mantatsʼ baʼax utstutʼaan u Taata. ¿Baʼaxten? Letiʼeʼ tu yaʼalaj upʼéel baʼax oʼolal: «Teneʼ in yaabiltmaj le Taataoʼ». Yéetel tu yaʼalaj xan: «U maas nojochil yaakunaj ku páajtal u yantal tiʼ juntúul máakeʼ letiʼ lelaʼ: u tsʼáaik u kuxtal tu yoʼolal u amigoʼob» (Juan 14:31; 15:13). Bey túunoʼ, chéen tu yoʼolal u yaabilaj Jesús, u Hijo Dios, ku páajtal k-salvartikba. Letiʼeʼ tu yóotaj u kʼub u kuxtal t-oʼolal utiaʼal k-salvartikba.
Le bajux yanchaj u boʼotik Jéeobaoʼ
12. ¿Máax chʼaʼatukult u jáalkʼabtikoʼon, baʼaxten tsʼaʼab u boʼolil k-jáalkʼabtaʼal?
12 Unaj u kʼaʼajaltoʼoneʼ maʼ Jesús chʼaʼatukult u tsʼaʼabal upʼéel boʼoliʼ. Jéeoba chʼaʼatukulte, tumen utiaʼal ka béeyak baʼax u tukulmeʼ kʼaʼabéet u tsʼaʼabal upʼéel boʼol. Apóstol Pabloeʼ tu yaʼaleʼ le altar yaan kaʼach teʼ templo tuʼux ku kʼuʼubul le tóokbil baʼalcheʼoboʼ ku chíikbesik baʼax u tukultmaj u beetik Dios (Heb. 10:10). Le oʼolaleʼ tiʼ Jéeoba unaj k-tsʼáaik u nib óolalil úuchik k-jáalkʼabtaʼal, tumen letiʼ tukult u salvarkoʼon (Luc. 1:68). Tsʼoʼoleʼ leloʼ upʼéel bix úuchik u yeʼesik u yaabilaj tiʼ tuláakal máak (xokaʼak Juan 3:16).
13, 14. Le baʼax tu beetaj Abrahamoʼ, ¿bix u yáantkoʼon k-naʼat bix tu yuʼubiluba Jéeoba yoʼolal le baʼax tu beetaj t-oʼolaloʼ?
13 ¿Bukaʼaj muʼyajnajik Jéeoba yoʼolal le bix úuchik u yeʼesik u yaabilaj toʼonoʼ? U jaajileʼ maʼ tu páajtal k-jach naʼatik, baʼaleʼ yaan upʼéel tsikbalil ichil le Biblia jeʼel u yáantkoʼon k-il bukaʼaj úuchik u muʼyajoʼ. Jéeobaeʼ tu yaʼalaj tiʼ Abraham ka u kʼub Isaac, u hijo, bey upʼéel tóokbil siibaleʼ. Leloʼ upʼéel baʼax jach talam úuchik u yilik Abraham, tumen letiʼeʼ jach u yaabiltmaj u hijo. Jéeobaeʼ tu yaʼalajtiʼ: «Chʼaʼa Isaac le a [juntúuliliʼ] paal máax a sen yaabilmajoʼ» (Gén. 22:2). Abrahameʼ u yojel maas kʼaʼanan u beetik baʼax ku yaʼalik Dios, le oʼolal tu yóotaj u kʼub Isaac jeʼex aʼalaʼabiktiʼoʼ. Baʼaleʼ Jéeobaeʼ maʼ tu chaʼaj tiʼ Abraham u kʼubik Isaac bey upʼéel siibal, jeʼex ken u kʼubil u Hijo letiʼeʼ. Le oʼolaleʼ, le jach nukaʼaj u kíims Isaakoʼ, Jéeobaeʼ tu túuxtaj utúul ángel utiaʼal maʼ u chaʼik u beetik mix baʼal tiʼ. Abrahameʼ u chʼaʼatukulmaj u beetik baʼax aʼalaʼabtiʼ tumen Dios, tumen jach ku creertik jeʼel u kaʼa kuxkíintaʼal Isaac tumen Dioseʼ. Pabloeʼ ku yaʼalikeʼ Abrahameʼ tu kʼamaj Isaac ichil le kimenoʼob «bey jumpʼéel kettʼaaneʼ» (Heb. 11:19).
14 Chéen tukult bix tu yuʼubiluba Abraham le táan u beetik le tuʼux ken u kʼub u hijooʼ. Le bix tu yuʼubilubaoʼ ku yeʼesik bix úuchik u yuʼubikuba Jéeoba le ka tu kʼubaj u Hijo jach u yaabiltmaj utiaʼal ka kíimik t-oʼolaloʼ (Mat. 3:17). Baʼaleʼ Jéeobaeʼ maas jach nojoch úuchik u muʼyaj, tumen letiʼ yéetel u Hijoeʼ u millonesi jaʼaboʼob tsʼoʼok u múul máansikoʼob teʼ kaʼanoʼ. Jesuseʼ múul meyajnaj yéetel u Taata utiaʼal u beetik u maasil baʼaloʼoboʼ, yéetel letiʼ bisik kaʼach u tʼaan Jéeoba (Pro. 8:22, 30, 31; Juan 1:1). Maʼ tu páajtal k-naʼatik jach bukaʼaj úuchik u muʼyaj Jéeoba ka tu yilaj baʼaxoʼob ku sen beetaʼal tiʼ u Hijo, bix u pʼaʼastaʼal yéetel le úuchik u kíimsaʼal jeʼex utúul kʼasaʼan máakoʼ. Jeʼex túun k-ilkoʼ, jach koʼoj tu tojoltajtiʼ úuchik u salvarkoʼon. ¿Bix jeʼel k-eʼesik k-tsʼáaik u nib óolalil tiʼ yoʼolal le baʼax tu beetoʼ?
¿Bix jeʼel k-tsʼáaik u nib óolalil tiʼ Jéeoba úuchik u salvarkoʼoneʼ?
15. 1) ¿Baʼax tu beetaj Jesús utiaʼal u boʼotik u saʼasaʼal k-siʼipil? 2) ¿Baʼax utsiloʼob ku taasik le úuchik u kʼubik u kuxtal Jesús t-oʼolaloʼ?
15 Le ka tsʼoʼok u kaʼa kuxtal Jesús yéetel ka bin teʼ kaʼanoʼ tu boʼotaj u saʼasaʼal k-siʼipil. Ka kʼuch tu táan u Taataeʼ tu kʼubajtiʼ u tojol le u kuxtal tu tsʼáaj t-oʼolaloʼ. ¿Baʼax utsiloʼob ken u taas le baʼax tu beetoʼ? Tu tsʼáaj u páajtalil u perdonartaʼal u kʼeban le máaxoʼob yéeyaʼanoʼob utiaʼal u binoʼob kaʼanoʼ bey xan u kʼeban «tuláakal yóokʼol kaab». Yoʼolal u kuxtal tu kʼuboʼ, tuláakal le máaxoʼob ku arrepentiroʼob yéetel ku beetkubaʼob u disipuloʼobeʼ jeʼel u páajtal u biskubaʼob yéetel Dioseʼ (1 Juan 2:2). Le oʼolaleʼ, ¿baʼax unaj k-beetik yoʼolal le baʼax tu beetaj t-oʼolaloʼ?
16. ¿Baʼax kettʼaanil eʼesik jach unaj k-tsʼáaik u nib óolalil tiʼ Jéeoba yoʼolal le baʼax tu beetaj utiaʼal u salvarkoʼonoʼ?
16 Tuukulnakoʼon tu kaʼatéen tiʼ le kettʼaan t-ilaj tu káajbal le xookaʼ. Tukulteʼ le doctor kaxt u tsʼaak le kʼojaʼanil yantechoʼ, ku bin teʼ tuʼux yaan tuláakal le kʼojaʼanoʼoboʼ yéetel ku joʼopʼol u yaʼalikeʼ le tsʼaakoʼ jach maʼalob, baʼaleʼ unaj u yukʼik máak jach jeʼex ken u yaʼaloʼ. Baʼaleʼ u maas yaʼabil le kʼojaʼanoʼoboʼ ku yaʼalik maʼ ken u kʼamoʼob tumen jach talam le baʼax ku kʼáatik ka beetaʼakoʼ. ¿Baʼax ken a beet teech? ¿Yaan wa xan a waʼalik maʼ ken a kʼam kex tsʼoʼok a wojéeltik jach tu jaajil jeʼel u tsʼakikecheʼ? ¿Máasaʼ maʼatan? Baʼaxeʼ jach yaan a tsʼáaik u nib óolalil tiʼ le doctoroʼ yéetel yaan a beetik jach jeʼex ken u yaʼaltechoʼ. Tsʼoʼoleʼ yaan a wilik a waʼalik tiʼ u maasil ka u yukʼoʼob xan le tsʼaakoʼ. Toʼon xaneʼ, jach k-tsʼáaik u nib óolalil tiʼ Jéeoba úuchik u tsʼáaik u Hijo utiaʼal u salvarkoʼon (xokaʼak Romailoʼob 6:17, 18).
17. ¿Bix jeʼel k-eʼesik k-tsʼáaik u nib óolalil tiʼ Jéeoba úuchik u salvartikoʼon tiʼ le kʼeban yéetel tiʼ le kíimiloʼ?
17 Yéetel bix kuxlikoʼoneʼ k-eʼesik k-tsʼáaik u nib óolalil tiʼ Jéeoba yéetel tiʼ Jesús úuchik u salvarkoʼon tiʼ le kʼeban yéetel tiʼ le kíimiloʼ (1 Juan 5:3). K-ilik xan maʼ k-beetik baʼax kʼaas utiaʼal maʼ k-lúubul tiʼ kʼeban kex jeʼel tuʼuxak yanoʼoneʼ. Tumen wa k-beetik baʼaloʼob kʼaastakeʼ k-eʼesik maʼatech k-tsʼáaik u nib óolalil tiʼ Jéeoba úuchik u salvarkoʼon. Baʼaxeʼ yaan k-ilik k-beetik baʼax maʼalob utiaʼal k-lúubul utsil tu táan (2 Ped. 3:14). Tsʼoʼoleʼ yaan xan k-tsikbaltik tiʼ u maasil baʼax tsʼoʼok u beetik Jéeoba utiaʼal u salvarkoʼon, utiaʼal ka páajchajak u natsʼkubaʼob tu yiknal yéetel utiaʼal ka yanak xan tiʼob kuxtal minaʼan u xuul (1 Tim. 4:16). ¿Máasaʼ jach ku náajaltik Jéeoba yéetel Jesús ka k-beet tuláakal le ku páajtal utiaʼal k-tsʼáaik nojbeʼenil tiʼoboʼ? (Mar. 12:28-30.) Tuláakloʼon k-jach tsʼíiboltik ka láaj luʼsaʼak le kʼeban yaan t-wíinkliloʼ utiaʼal ka béeyak k-ilik le baʼax u tukulmaj Dios desde tu káajbaloʼ, le kuxtal minaʼan u xuul tuʼux minaʼan le kʼebanoʼ. Tuláakal lelaʼ jach yaan u béeytal yoʼolal tuláakal le baʼaxoʼob tsʼoʼok u beetik Jéeoba utiaʼal u salvarkoʼonoʼ (Rom. 8:21).
[Tsolajiloʼob]
^ xóot’ol 3 Ku tuklaʼaleʼ kex veinte wa cincuenta tiʼ cada cien máakoʼob tiʼ tuláakal le Luʼumaʼ tsaʼaytiʼob le seʼen ku kʼaabaʼtik gripe españolaoʼ yéetel tu kíimsaj utúul wa diez tiʼ cada cien tiʼ le máaxoʼob tsaʼayoʼ. Baʼaleʼ u virusi le kʼojaʼanil ku kʼaabaʼtik ebolaoʼ maʼ jach yaʼab máaxoʼob tiʼ tsʼoʼok u tsaʼayliʼ, baʼaleʼ óoliʼ tuláakal le máaxoʼob ku tsaʼayaltiʼoboʼ ku kíimloʼob.
¿Baʼax jeʼel a núukikeʼ?
• ¿Baʼaxten jach kʼaʼabéetchaj k-salvartaʼal?
• ¿Baʼax unaj u péekskoʼon k-beet le úuchik u yóotik Jesús u kʼub u kuxtal t-oʼolaloʼ?
• ¿Baʼax ka wuʼuyik ichil a puksiʼikʼal ken tuukulnakech tiʼ le boʼol tu tsʼáaj Jéeoba t-oʼolaloʼ?
• ¿Bix a tuklik jeʼel a tsʼáaik u nib óolalil tiʼ Jéeoba yoʼolal le baʼax tu beetaj utiaʼal u salvarkoʼonoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 27]
U nojchil le j-kʼiinoʼoboʼ ku chíikbesik le Mesíasoʼ
[U tsolajil le oochel teʼ táan juʼun 28]
Le úuchik u yóotik Abraham u kʼub u hijooʼ ku yáantkoʼon k-naʼat bix tu yuʼubiluba Jéeoba ka tu kʼubaj u Hijo t-oʼolal